Ħrejjef u Fatti Dwar in-Nies Anzjani
Jeżistu ħafna ħrejjef dwar ix-xjuħija. Il-Programm dwar ix-Xjuħija u s-Saħħa, li hu programm taʼ l-Organizzazzjoni Dinjija tas-Saħħa, ħareġ pubblikazzjoni bl-isem “Ageing—Exploding the Myths” (Ix-Xjuħija—Il-Ħrejjef Jinġabu fix-Xejn). Din tikxef kif xi wħud minn dawn il-ħrejjef huma foloz. Ikkunsidra xi eżempji.
Ħrafa: Il-biċċa l-kbira tan-nies anzjani jgħixu fid-dinja industrijalizzata.
Fatt: Fil-fatt, iktar minn 60 fil-mija tal-580 miljun anzjan li hawn fid-dinja jgħixu f’pajjiżi li għadhom qed jiżviluppaw. Għadd li dejjem jiżdied taʼ nies f’dawn il-pajjiżi qed jgħixu ħajja itwal bħala riżultat taʼ kura aħjar għas-saħħa u titjib fis-sistema tad-drenaġġ, fid-djar, u fl-ikel.
Ħrafa: L-anzjani m’għandhom xejn x’joffru għall-benefiċċju taʼ ħaddieħor.
Fatt: L-anzjani jagħmlu ħafna għal ħaddieħor billi jagħmlu xogħol li ma jitħallsux għalih. Per eżempju, huwa kalkulat li madwar 2 miljun tifel u tifla fl-Istati Uniti jieħdu ħsiebhom in-nanniet tagħhom, u 1.2 miljun minnhom jgħixu fid-dar tan-nanniet. B’hekk l-anzjani jipprovdu dar, ikel, u edukazzjoni u jgħaddu valuri kulturali lin-neputijiet tagħhom filwaqt li l-ommijiet u l-missirijiet ikunu jistgħu jibqgħu joħorġu jaħdmu. Bl-istess mod, fid-dinja industrijalizzata, ħafna organizzazzjonijiet volontiera ma kinux jimxu mingħajr il-kontribut siewi taʼ l-anzjani. L-anzjani jduru b’ħaddieħor ukoll u dan hu tant meħtieġ. F’xi pajjiżi li qed jiżviluppaw, fejn sa 30 fil-mija tan-nies adulti għandhom l-AIDS, l-anzjani jieħdu ħsieb taʼ wliedhom il-kbar li jkunu mardu, u meta dawn imutu huma jkollhom irabbu lin-neputijiet orfni tagħhom.
Ħrafa: L-anzjani jieqfu jaħdmu għax ma jibqgħux kapaċi jwettqu xogħolhom.
Fatt: Ir-raġuni m’hijiex bilfors l-età avanzata. Ħafna drabi ma jibqgħux jaħdmu minħabba żvantaġġi fl-edukazzjoni jew taħriġ jew minħabba l-preġudizzju kontra l-anzjani.
Ħrafa: L-anzjani ma jridux jaħdmu.
Fatt: Taʼ spiss l-anzjani jitħallew barra minn impjiegi bil-paga minkejja li huma jkollhom il-volontà u l-abbiltà li jkomplu jaħdmu. Speċjalment matul żmien taʼ qgħad, xi wħud jirraġunaw li l-anzjani għandhom jieqfu jaħdmu xogħol b’paga biex ħaddiema iżgħar fl-età jkunu jistgħu jiħdulhom posthom. Madankollu, billi l-ħaddiema anzjani jieqfu jaħdmu qabel ma jkollhom għalfejn jieqfu, ma jfissirx li bilfors se joħolqu impjiegi għal uħud iżgħar. Individwu iżgħar fl-età u li qiegħed ifittex xogħol jistaʼ ma jkollux l-abbiltajiet meħtieġa biex jieħu post ħaddiem anzjan. Ħaddiema anzjani li huma taʼ l-esperjenza jgħinu biex tinżamm il-produttività u l-istabbiltà fil-qasam tax-xogħol.
B’dawn il-fatti f’moħħhom, tinnota l-Organizzazzjoni Dinjija tas-Saħħa (WHO), il-komunitajiet fid-dinja għandhom iqisu l-popolazzjoni anzjana tagħhom bħala sors taʼ esperjenza li tistaʼ tintuża għall-ġid. Alexandre Kalache, il-bniedem inkarigat mill-Programm dwar ix-Xjuħija u s-Saħħa, programm tal-WHO, għaldaqstant jinnota li “l-pajjiżi . . . m’għandhomx iqisu l-popolazzjonijiet anzjani tagħhom bħala problema imma bħala soluzzjoni possibbli għall-problemi.” U dan huwa fatt.