Mingħand il-​Qarrejja

Il-​Problemi tat-​Tfal Kemm qanqluni l-​artikli fis-​serje “Il-​Problemi tat-​Tfal—Fl-​Aħħar Hemm Soluzzjoni Għalihom!” (8 taʼ Diċembru, 2000) Għandi memorji mimlija swied il-​qalb taʼ tfuliti. Ommi kienet tixrob ħafna u kienet taħqarni kważi kuljum. Maż-​żmien, jien spiċċajt dipressa u kemm-il darba xtaqt immut. L-​artikli fakkruni kemm hi importanti r-​rabta bejn it-​tfal u l-​ġenituri. Issa li esperjenzajt l-​imħabba li Jehovah għandu għalija, qed nipprova nifhimha iktar lil ommi; hi kellha esperjenzi simili fi tfulitha.

U. P., Repubblika tal-​Korea

Jien għalliema li propjament niġi mill-​Arġentina, u naħseb li tkun xi ħaġa meraviljuża li kieku l-​ġenituri u l-​għalliema kollha jipprattikaw il-​pariri li hemm f’din il-​ħarġa—u tal-​Bibbja, li intom tikkwotawha ħafna.

F. S., Spanja

Ir-​Rabja Qrajt il-​parti fil-​“Ħarsa Lejn id-​Dinja” bit-​titlu “Ir-​Rabja u Qalbek.” (8 taʼ Diċembru, 2000) Kemm hu tassew minnu. Jien għandi problema fil-​qalb li taʼ spiss iġġagħalni nħossni għajjiena u marida. L-​iskola hi taʼ sfida għalija għax irrid niġġieled miegħi nnifsi biex ma nirrabjax. Iżda, grazzi ’l Alla Jehovah li rnexxieli nneħħi r-​rabja minn ħajti.

A. F., Stati Uniti

Problemi fil-​Prostata L-​artiklu reċenti “Problemi fil-​Prostata—Kif Tistaʼ Tkampa” (8 taʼ Diċembru, 2000) apprezzajtu ferm. Madankollu, dan ma semma xejn dwar il-​proċedura li jiddaħħal materjal radjoattiv. Dan l-​aħħar din ġiet imxandra pubblikament f’rivisti ewlenin taʼ l-​Istati Uniti u għandha rata baxxa taʼ effetti negattivi.

H. Z., Stati Uniti

Grazzi talli qed tiftaħ għajnejn il-​qarrejja tagħna rigward din il-​kura. Xi rapporti jindikaw li t-​terapija b’materjal radjoattiv (brachytherapy) hija taʼ inqas tfixkil għall-​pazjent milli l-​operazzjoni tradizzjonali u f’xi każi tistaʼ tkun effettiva daqsha. Madankollu, se jgħaddi ftit żmien qabel ma t-​tobba jsiru jafu l-​effetti fit-​tul tagħha. Sadanittant, il-​pazjenti għandhom jiġu informati bis-​sħiħ dwar x’inhuma l-​għażliet tagħhom qabel ma jagħżlu.—ED.

Missirijiet Neqsin Missieri telaq mid-​dar meta kelli sitt snin. Issa għandi 20 sena, u minn mindu telaq ma rajtux iktar. Dejjem ħassejt li kien it-​tort tiegħi li telaq u li ma kienx iħobbni. L-​artiklu “Iż-​Żgħażagħ Jistaqsu . . . Missieri Għala Telaqna?” (8 taʼ Diċembru, 2000) wieġeb kollox biċ-​ċar. Grazzi talli tifhmu xi jħossu t-​tfal mingħajr missier.

K. M., Ġappun

Iktar minn sentejn ilu, jien u żewġi ddivorzjajna. Għamilt kulma stajt biex ibni jitkellem miegħi dwar kif qed iħossu minħabba li l-​familja tkissret, imma ma rnexxieli b’xejn. Issa għall-​ewwel darba, ibni ammetta li kien effettwat minħabba d-​divorzju. Dan kien progress kbir. Bil-​mod il-​mod, qed jikkomunika iktar miegħi. Ma nistax nesprimi l-​gratitudni tiegħi għal ħafna għajnuniet li tipprovdu għaż-​żgħażagħ matul l-​hemm kollu tagħhom.

D. H., Stati Uniti

Ħlief għal stqarrija qasira, l-​artiklu qal li l-​missirijiet jitilqu mid-​dar minħabba kondotta mhix xierqa min-​naħa tagħhom. Madankollu, jidher li n-​numru taʼ nisa miżżewġin li qed jitilqu lil żwieġhom qed jiżdied. Wara 18-il sena miżżewġin, marti bdiet tgħix ħajja immorali. Ġagħlitni nitlaq minn dari stess. Ħassejt li kelli nsemmi dan l-​aspett tal-​problema.

L. G., Stati Uniti

Kif semmejt int, aħna nifhmu li xi missirijiet jitilqu mid-​dar minħabba l-​kondotta mhix xierqa taʼ marthom. Ħafna mill-​prinċipji diskussi fl-​artiklu japplikaw għal din is-​sitwazzjoni wkoll.—ED.

Anestesija Fl-​artiklu “Mill-​Agunija għall-​Anestesija” (8 taʼ Diċembru, 2000), intom stqarrejtu li qabel l-​1840 ma kinitx teżisti l-​anestesija. Fil-​Ġappun kienu jsiru operazzjonijiet b’suċċess minn Seishu Hanaoka ħafna qabel l-​1840.

S. A., Ġappun

B’mod ġenerali, id-​dinja tal-​mediċina ma daħletx l-​użu taʼ l-​anestesija qabel l-​1840. Madankollu, il-​“Kodansha Encyclopedia of Japan” tgħid li Seishu Hanaoka (1760-1835) ipprepara sustanza anestetika msejħa “mafutsusan” billi ħallat sitt ħxejjex naturali. Hu “użaha b’suċċess f’operazzjoni kirurġika għal kanċer tas-​sider fl-​1805, madwar 40 sena qabel ma ntuża l-​etere għall-​ewwel darba f’Massachusetts General Hospital, Boston.” Wara dan, Seishu uża l-​anestesija tiegħu f’diversi operazzjonijiet.—ED.