Tapprezzaha Int l-​Organizzazzjoni taʼ Jehovah?

“Dan jgħid il-​Mulej: ‘Is-​smewwiet it-​tron tiegħi, l-​art mirfes riġlejja!’”—ISAIJA 66:1.

1, 2. (a) Lejn liema evidenza viżibbli taʼ l-​organizzazzjoni taʼ Jehovah tistaʼ tipponta? (b) Jehovah fejn jgħammar?

TEMMEN int li Jehovah għandu organizzazzjoni? Jekk iva, għala temmen? Għandek mnejn twieġeb: ‘Mela, aħna għandna Sala tas-​Saltna. Għandna kongregazzjoni organizzata tajjeb b’ġemgħa t’anzjani. Għandna indokratur tas-​circuit maħtur kif suppost u li jżurna regolarment. Nattendu assembleat u konvenzjonijiet organizzati. Għandna uffiċċju tal-​fergħa tal-​Watch Tower Society f’pajjiżna. Ċertament, dan kollu u ħafna iżjed jagħti prova li Jehovah għandu organizzazzjoni li tiffunzjona.’

² Fatturi bħal dawn jammontaw għal evidenza taʼ organizzazzjoni. Imma jekk dak kollu li naraw u napprezzaw qiegħed hawn fuq l-​art, m’aħniex nifhmu kompletament x’inhi l-​organizzazzjoni taʼ Jehovah. Jehovah qal lil Isaija li l-​art hija biss mirfes għal Riġlejh, imma s-​smewwiet huma t-​tron Tiegħu. (Isaija 66:1) Għal liema “smewwiet” kien qed jirreferi Jehovah? Għall-​atmosfera tagħna? Għal barra fl-​ispazju? Jew għal xi livell ieħor taʼ ħajja? Isaija jitkellem dwar l-​“għamara mqaddsa u glorjuża” taʼ Jehovah, u s-​salmista jiddeskrivi lil dawn is-​smewwiet bħala l-​“post fejn jgħammar.” B’hekk, is-​“smewwiet” f’Isaija 66:1 jirreferu għall-​qasam inviżibbli taʼ l-​ispirti li fih Jehovah jokkupa l-​pożizzjoni suprema, jew aħħarija.—Isaija 63:15; Salm 33:13, 14.

3. Kif nistgħu negħlbu d-​dubji?

³ Għalhekk, jekk verament irridu naraw ċar u napprezzaw l-​organizzazzjoni taʼ Jehovah, irridu nħarsu lejn is-​smewwiet. U hawn qiegħda l-​problema għal xi wħud. Ladarba l-​organizzazzjoni taʼ Jehovah hija inviżibbli, kif nafu li din tassew teżisti? Xi wħud jistgħu saħansitra jgħaddu minn perijodu taʼ dubji, billi jistaqsu, ‘Kif nistgħu nkunu żguri?’ Sewwa, kif tistaʼ l-​fidi tegħleb id-​dubju? Żewġ modi fundamentali huma studju persunali intensiv tal-​Kelma t’Alla u attendenza regulari u involviment fil-​laqgħat Kristjani. Imbagħad nistgħu neliminaw id-​dubji tagħna bid-​dawl tal-​verità. Kien hemm qaddejja oħrajn t’Alla li kellhom xi dubji. Ejjew nikkunsidraw il-​każ tal-​qaddej taʼ Eliżew meta Iżrael kien taħt attakk mis-​sultan tas-​Sirja.—Qabbel Ġwann 20:24-29; Ġakbu 1:5-8.

Wieħed li Ra l-​Qtajjaʼ tas-​Sema

4, 5. (a) Liema problema kellu l-​qaddej taʼ Eliżew? (b) Jehovah kif wieġeb għat-​talba taʼ Eliżew?

⁴ Is-​sultan tas-​Sirja bagħat qawwa militari kbira bil-​lejl lejn Dotan biex jaħtaf lil Eliżew. Meta l-​qaddej taʼ Eliżew qam kmieni fil-​għodu u ħareġ barra, forsi biex jieħu naqra arja friska fuq il-​bejt tad-​dar fejn kienu joqogħdu fil-​Lvant Nofsani, x’waħda din, x’qatgħa ħa! Il-​belt kienet imdawra minn armata sħiħa taʼ Sirjani biż-​żwiemel u l-​karrijiet tal-​gwerra, lesta biex taħtaf lill-​profeta t’Alla. Il-​qaddej għajjat lil Eliżew: “Ah! sidi, x’se nagħmlu?” Milli jidher, bil-​kalma u b’konvinzjoni, Eliżew wieġeb: “La tibżax! hemm . . . aktar magħna milli magħhom.” Il-​qaddej għandu mnejn ħaseb bejnu u bejn ruħu, ‘Fejn huma? Ma nistax narahom!’ Xi kultant dik għandha mnejn tkun il-​problema tagħna wkoll​—nonqsu li naraw bil-​għajnejn tal-​fehma, jew li naraw ċar, il-​qtajjaʼ tas-​sema.—2 Slaten 6:8-16; Efesin 1:18.

⁵ Eliżew talab biex għajnejn il-​qaddej tiegħu jinfetħu. Imbagħad x’ġara? “U l-​Mulej fetaħ għajnejn il-​qaddej, u dan ra l-​għolja mimlija żwiemel u karrijiet tan-​nar madwar Eliżew.” (2 Slaten 6:17) Iva, hu ra l-​qtajjaʼ tas-​sema, armati anġeliċi lesti biex jipproteġu lill-​qaddej t’Alla. Issa setaʼ jifhem għala Eliżew kien tant fiduċjuż.

6. Kif nistgħu niksbu d-​dehen rigward l-​organizzazzjoni tas-​sema taʼ Jehovah?

⁶ Ikollna aħna xi drabi problema biex naraw ċar simili għal dik li kellu l-​qaddej taʼ Eliżew? Għandna aħna t-​tendenza li naraw biss il-​lat fiżiku taʼ sitwazzjonijiet li jheddu lilna jew lix-​xogħol Kristjan f’ċerti pajjiżi? Jekk iva, nistgħu nistennew xi viżjoni speċjali biex iddawwalna? Le, għaliex aħna għandna xi ħaġa li l-​qaddej taʼ Eliżew ma kellux​—ktieb sħiħ li fih ħafna viżjonijiet, il-​Bibbja, li tistaʼ tagħtina dehen rigward l-​organizzazzjoni tas-​sema. Dik il-​Kelma ispirata tagħti wkoll prinċipji taʼ gwida li jiddrittaw il-​mentalità u l-​mod taʼ ħajja tagħna. Madankollu, irridu nagħmlu sforz biex infittxu għad-​dixxerniment u nikkultivaw apprezzament għall-​arranġament taʼ Jehovah. U dan nistgħu nagħmluh permezz taʼ studju persunali, flimkien maʼ talb u meditazzjoni.—Rumani 12:12; Filippin 4:6; 2 Timotju 3:15-17.

Nistudjaw biex Naraw Ċar

7. (a) Xi wħud liema problema jistaʼ jkollhom rigward l-​istudju persunali tal-​Bibbja? (b) L-​istudju persunali għala jiswa kull sforz?

⁷ L-​istudju persunali m’huwiex neċessarjament prospett pjaċevoli għal ħafna nies, bħal per eżempju dawk li qatt ma ħadu pjaċir bl-​istudju l-​iskola jew li qatt ma kellhom l-​opportunità li jieħdu sehem fih. Madankollu, jekk irridu naraw ċar u napprezzaw l-​organizzazzjoni taʼ Jehovah bil-​għajnejn tal-​fehma tagħna, irridu nikkultivaw xewqa għall-​istudju. Tistaʼ int tgawdi ikla tajba mingħajr preparazzjoni? Bħalma jistaʼ jgħidlek kwalunkwe xeff jew kok, il-​preparazzjoni taʼ ikla delizzjuża tinvolvi ħafna xogħol. Iżda, din tistaʼ tittiekel f’nofs siegħa jew inqas. Mill-​banda l-​oħra, il-​benefiċċji taʼ studju persunali jistgħu jservuk għal għomrok. L-​istudju persunali jistaʼ jsir xi ħaġa li nitgħallmu nieħdu pjaċir biha meta naraw il-​progress li nistgħu nagħmlu. L-​appostlu Pawlu sewwa qal li għandna noqogħdu attenti kontinwament għalina nfusna u għat-​tagħlim tagħna u nibqgħu napplikaw lilna nfusna għall-​qari pubbliku. Huwa meħtieġ sforz konsistenti, imma l-​benefiċċji jistgħu jkunu għal dejjem.—1 Timotju 4:13-16.

8. Proverbji liema attitudni jirrikkmanda?

⁸ Raġel għaref tal-​qedem qal: “Ibni [jew binti], jekk int tilqaʼ kliemi, u taħżen ġo fik il-​kmandamenti tiegħi billi tagħti widen għall-​għerf, u tħalli lil moħħok jifhem sewwa; jekk issejjaħ l-​għerf, u tgħolli leħnek għall-​fehma t-​tajba; jekk tfittex l-​għerf bħall-​fidda, u tħaffer għalih bħal teżor moħbi; mbagħad tifhem il-​biżaʼ tal-​Mulej, u ssib it-​tagħrif taʼ Alla.”—Proverbji 2:1-5.

9. (a) Il-​valur tad-​deheb kif jitqabbel mat-​“tagħrif taʼ Alla”? (b) Liema għodda għandna bżonn biex niksbu tagħrif eżatt?

⁹ Qed tinduna għand min qiegħda r-​responsabbiltà? ‘Jekk int’ hija l-​frażi rripetuta. U innota l-​espressjoni, ‘Jekk tfittex għalih bħal teżor moħbi.’ Aħseb dwar il-​ħaddiema tal-​minjieri li għal sekli sħaħ ħaffru għall-​fidda u għad-​deheb fl-​Afrika taʼ Isfel, il-​Bolivja, il-​Messiku, u pajjiżi oħrajn. Ħadmu iebes, bil-​pala u l-​fies, biex iħaffru l-​blat li minnu setgħu jieħdu l-​metalli prezzjużi. Tant kienu jistmawh id-​deheb li f’minjiera waħda f’California, l-​Istati Uniti, ħaffru 591 kilometru taʼ mini, billi niżlu fond vertikali taʼ madwar 1.5 kilometri​—sempliċement biex isibu d-​deheb. Iżda, tistaʼ tiekol id-​deheb? Tixrob id-​deheb? Se jsostnik dan f’deżert jekk tkun qed tmut bil-​ġuħ u bil-​għatx? Le, il-​valur tiegħu huwa artifiċjali u arbitrarju, li jinbidel minn jum għall-​ieħor kif inhu rifless fis-​swieq internazzjonali. Minkejja dan, nies mietu għalih. Mela kemm għandna nagħmlu sforz biex nieħdu d-​deheb spiritwali, “it-​tagħrif taʼ Alla”? Aħseb ftit, l-​istess tagħrif tal-​Mulej Sovran taʼ l-​univers, l-​organizzazzjoni tiegħu, u l-​iskopijiet tiegħu! F’dan ir-​rigward nistgħu nużaw pala u fies spiritwali. Dawn huma pubblikazzjonijiet ibbażati fuq il-​Bibbja li jgħinuna nħaffru fil-​Kelma taʼ Jehovah u nagħrfu t-​tifsir tagħha.—Ġob 28:12-19.

Inħaffru għad-​Dehen

10. Danjel x’ra f’viżjoni?

¹⁰ Ejjew nagħmlu ftit tħaffir spiritwali sabiex nibdew nieħdu l-​istess tagħrif taʼ l-​organizzazzjoni tas-​sema taʼ Jehovah. Għal dehen fundamentali, ejjew immorru lejn il-​viżjoni taʼ Danjel dwar l-​Antik fil-​Jiem fuq it-​tron tiegħu. Danjel jikteb: “Kont għadni qiegħed inħares, meta tqiegħdu xi tronijiet, u wieħed Xiħ fl-​għomor [“Antik fil-​Jiem,” New World Translation] qagħad bilqiegħda; lbiesu abjad silġ, u xuxtu bajda suf; ilsna tan-​nar it-​tron tiegħu, nar iħeġġeġ ir-​roti tiegħu; xmara taʼ nar kienet għaddejja, ħierġa minn quddiemu; eluf taʼ eluf kienu jaqduh, u għaxart elef taʼ għaxriet taʼ eluf wieqfa quddiemu. Il-​Qorti qagħdet bilqiegħda, u l-​kotba nfetħu.” (Danjel 7:9, 10) Min kienu dawn l-​eluf li kienu jaqdu lil Jehovah? Ir-​referenzi marġinali fin-​New World Translation, użati bħala “pala u fies,” jiħduna għal referenzi bħal Salm 68:18 [Salm 68:17, NW] u Lhud 1:14. Iva, dawk li kienu qed jaqduh kienu anġli tas-​sema!

11. Il-​viżjoni taʼ Danjel kif tistaʼ tgħinna nifhmu l-​kliem taʼ Eliżew?

¹¹ Ir-​rakkont taʼ Danjel ma jgħidx li hu ra l-​anġli leali kollha li Alla għandu taħt il-​kmand tiegħu. Għandu mnejn hemm miljuni oħrajn. Imma żgur li issa nistgħu napprezzaw għala Eliżew setaʼ jgħid: “Hemm . . . aktar magħna milli magħhom.” L-​armata tas-​sultan tas-​Sirja, għalkemm appoġġjata minn anġli żleali, id-​demonji, kienet issuperata fl-​għadd mill-​armati tas-​sema taʼ Jehovah!—Salm 34:8 [Salm 34:7, NW]; Salm 91:11.

12. Kif tistaʼ ssir taf iżjed dwar l-​anġli?

¹² Forsi tixtieq tkun taf iżjed dwar dawn l-​anġli, bħal ngħidu aħna l-​irwol li għandhom f’li jaqdu lil Jehovah. Mill-​kelma Griega għal anġlu, nistgħu naraw li huma messaġġiera għaliex din tfisser ukoll “messaġġier.” Madankollu, id-​dmirijiet tagħhom jikkonsistu f’wisq iżjed. Iżda, biex issir taf x’inhuma trid tħaffer. Jekk għandek Insight on the Scriptures, tistaʼ tistudja l-​artiklu “Angels,” jew tistaʼ tikkonsulta artikli li diġà ħarġu dwar l-​anġli f’It-Torri taʼ l-​Għassa. Tibqaʼ skantat kemm tistaʼ titgħallem dwar dawn il-​qaddejja ċelestjali t’Alla u ssir tapprezza l-​appoġġ tagħhom. (Apokalissi 14:6, 7) Madankollu, fl-​organizzazzjoni tas-​sema t’Alla, xi ħlejjaq spirti jaqdu skopijiet speċjalizzati.

Dak li Ra Isaija

13, 14. Isaija x’ra f’viżjoni, u dan kif effettwah?

¹³ Ejjew issa nagħmlu ftit tħaffir fil-​viżjoni taʼ Isaija. Meta taqra kapitlu 6, versi 1 sa 7, għandek tibqaʼ impressjonat. Isaija jgħid li hu ‘ra lil Jehovah bil-​qiegħda fuq tron għoli,’ u, “’il fuq minnu kien hemm serafini.” Huma kienu qed jipproklamaw dwar il-​glorja taʼ Jehovah, billi jeżaltaw il-​qdusija tiegħu. Għandek tiġi effettwat anki jekk biss taqra dan ir-​rakkont. X’kienet ir-​reazzjoni taʼ Isaija? “Jaħasra għalija! Mitluf jien! Bniedem b’xufftejh imniġġsa jien! U f’nofs poplu b’xufftejh imniġġsa ngħammar; madankollu rajt b’għajnejja lis-​Sultan, Il-​Mulej taʼ l-​eżerċti.” Kemm kien impressjonat b’dik il-​viżjoni! Int hekk tħossok?

¹⁴ Allura Isaija kif kien kapaċi jissaporti din id-​dehra glorjuża? Hu jispjega li serafin ġie jagħtih l-​għajnuna u qallu: “Ħżunitek għebet, u dnubek inħafer.” (Isaija 6:7) Isaija setaʼ jafda fil-​ħniena t’Alla u joqgħod attent għall-​kliem taʼ Jehovah. Mela issa, ma tixtieqx tkun taf iżjed dwar dawn il-​ħlejjaq spirti taʼ grad għoli? Allura x’għandek tagħmel? Ħaffer għal iżjed informazzjoni. Biċċa għodda li tistaʼ tuża huwa l-​Watch Tower Publications Index, billi ssegwi r-​referenzi tiegħu għal ħafna sorsi taʼ informazzjoni li tikkjarifika.

X’Ra Eżekjel?

15. X’jindika li l-​viżjoni taʼ Eżekjel hija taʼ min joqgħod fuqha?

¹⁵ Ejjew issa mmorru għal tip ieħor taʼ kreazzjoni spirtu. Eżekjel kien ipprivileġġat li jkollu viżjoni li tispira waqt li kien għadu rsir f’Babilonja. Iftaħ il-​Bibbja tiegħek f’Eżekjel kapitlu 1, l-​ewwel tliet versi. Kif jibda r-​rakkont? Jgħid, ‘Darba waħda, f’pajjiż imbiegħed . . . ’? Le, din m’hijiex xi ħrafa f’xi perijodu taʼ żmien mitoloġiku. Vers 1 jistqarr: “Ġara li fis-​sena tletin, fir-​rabaʼ xahar, fil-​ħamsa tax-​xahar, kif kont fost l-​itturufnati ħdejn ix-​xmara Kebar, nfetħu s-​smewwiet u rajt viżjonijiet taʼ Alla.” X’tinnota dwar dan il-​vers? Jagħti data eżatta u post preċiż. Dawn id-​dettalji jippontaw lejn il-​ħames sena taʼ l-​eżilju tas-​Sultan Ġeħojakin, is-​sena 613 Q.E.K.

16. Eżekjel x’ra?

¹⁶ Id Jehovah kienet fuq Eżekjel, u dan beda jara viżjoni li tqanqal il-​biżaʼ taʼ Jehovah fuq tron f’karru vast ċelestjali li kellu roti immensi b’għajnejn mad-​dawra kollha tar-​rimmijiet. Id-​dettall li jinteressana hawnhekk huwa li kien hemm erbaʼ ħlejjaq, wieħed wieqaf ħdejn kull rota. “Mid-​dehra tagħhom kellhom is-​sura taʼ bniedem. Kellhom erbaʼ wċuħ kull wieħed, u erbaʼ ġwienaħ kull wieħed. . . . U x-​xbieha taʼ wiċċhom kienet wiċċ taʼ bniedem minn quddiem, u wiċċ taʼ ljun fuq il-​lemin tagħhom l-​erbgħa, u wiċċ taʼ għoġol (“barri,” NW) fuq ix-​xellug tagħhom l-​erbgħa, u wiċċ taʼ ajkla fuq wara.”—Eżekjel 1:5, 6, 10.

17. L-​erbaʼ wċuħ tal-​kerubini x’jirrappreżentaw?

¹⁷ X’kienu dawn l-​erbaʼ ħlejjaq ħajjin? Eżekjel innifsu jgħidilna li kienu kerubini. (Eżekjel 10:1-3, 14) Għala kellhom erbaʼ wċuħ? Biex jirrappreżentaw l-​erbaʼ attributi li jispikkaw tal-​Mulej Sovran Jehovah. Wiċċ l-​ajkla kien simbolu taʼ għerf li jara fil-​bogħod. (Ġob 39:27-29) X’kien jirrappreżenta wiċċ il-​barri? Bis-​saħħa tremenda taʼ għonqu u spallejh, barri tal-​ġlied huwa magħruf li kapaċi jgħolli fl-​arja lil żiemel bir-​rikkieb tiegħu. Ċertament, il-​barri huwa simbolu tal-​qawwa bla limitu taʼ Jehovah. L-​iljun jintuża bħala simbolu taʼ ġustizzja b’kuraġġ. Fl-​aħħar, wiċċ taʼ bniedem bix-​xieraq jirrappreżenta l-​imħabba t’Alla, peress li l-​bniedem huwa l-​uniku ħlejqa taʼ l-​art li tistaʼ turi din il-​kwalità b’mod intelliġenti.—Mattew 22:37, 39; 1 Ġwann 4:8.

18. L-​appostlu Ġwanni kif jgħinna naraw iżjed ċar l-​organizzazzjoni tas-​sema?

¹⁸ Hemm viżjonijiet oħrajn li jistgħu jgħinuna biex ikollna l-​istampa kollha. Dawn jinkludu l-​viżjonijiet taʼ Ġwanni rrakkontati fil-​ktieb Bibliku taʼ Apokalissi. Dan, bħal Eżekjel, jara lil Jehovah fuq tron glorjuż akkumpanjat minn kerubini. X’qegħdin jagħmlu l-​kerubini? Huma jtennu l-​proklamazzjoni tas-​serafini f’Isaija kapitlu 6, billi jgħidu: “Qaddis, Qaddis, Qaddis il-​Mulej, Alla li jistaʼ kollox, li kien, u li hu, u li ġej.” (Apokalissi 4:6-8) Ġwanni jara wkoll ħaruf ħdejn it-​tron. Dak lil min jistaʼ jirrappreżenta? Lill-​istess Ħaruf t’Alla, Ġesù Kristu.—Apokalissi 5:13, 14.

19. Permezz taʼ dan l-​istudju, x’rajt iżjed ċar rigward l-​organizzazzjoni taʼ Jehovah?

¹⁹ Għalhekk, x’rajna ċar permezz taʼ dawn il-​viżjonijiet? Li l-​organizzazzjoni taʼ Jehovah għandha fil-​quċċata tagħha lil Alla Jehovah fuq it-​tron tiegħu akkumpanjat mill-​Ħaruf, Ġesù Kristu, li hu l-​Kelma, jew Logos. Imbagħad rajna qatgħa taʼ anġli tas-​sema, inklużi serafini u kerubini. Dawn huma parti minn organizzazzjoni waħda, vasta u magħquda, li taqdi l-​iskopijiet taʼ Jehovah. U wieħed minn dawk l-​iskopijiet huwa l-​ippridkar taʼ l-​aħbar tajba mad-​dinja kollha f’dan iż-​żmien tat-​tmiem.—Mark 13:10; Ġwann 1:1-3; Apokalissi 14:6, 7.

20. Liema mistoqsija se titwieġeb fl-​artiklu li jmiss?

²⁰ Fl-​aħħar, għandna lix-​Xhieda taʼ Jehovah fuq l-​art li jiltaqgħu fis-​Swali tas-​Saltna tagħhom sabiex jitgħallmu kif jagħmlu r-​rieda tal-​Mulej Sovran. Ċertament, issa nistgħu napprezzaw li hemm iżjed li huma magħna milli huma maʼ Satana u l-​għedewwa tal-​verità. Iżda tibqaʼ l-​mistoqsija, L-​organizzazzjoni tas-​sema kif għandha x’taqsam maʼ l-​ippridkar taʼ l-​aħbar tajba tas-​Saltna? L-​artiklu li jmiss se jeżamina dan u affarijiet oħrajn.

Mistoqsijiet għal Reviżjoni

◻ Biex napprezzaw l-​organizzazzjoni taʼ Jehovah, liema ħaġa rridu naraw ċar?

◻ Il-​qaddej taʼ Eliżew liema esperjenza kellu, u l-​profeta kif inkuraġġih?

◻ Kif għandna nqisuh l-​istudju persunali?

◻ Danjel, Isaija, u Eżekjel kif jagħtu dettalji dwar l-​organizzazzjoni tas-​sema?

[Stampa f’paġna 13]

Il-​benefiċċji taʼ studju persunali jservu iktar fit-​tul minn dawk taʼ ikla ppreparata tajjeb

[Stampa f’paġna 15]

Viżjoni taʼ qtajjaʼ tas-​sema kienet it-​tweġiba taʼ Jehovah għat-​talba taʼ Eliżew