Il-​Jum taʼ Jehovah li Jispira l-​Biżaʼ Huwa Qrib

“Ktieb taʼ tfakkira beda jinkiteb quddiemu għal dawk fil-​biżaʼ taʼ Jehovah u għal dawk li kienu qegħdin jaħsbu fuq ismu.”—MALAKIJA 3:16.

1, 2. Malakija dwar liema jum li jispira l-​biżaʼ jwissi bil-​quddiem?

LI JISPIRA L-​BIŻAʼ! Hekk kif żernaq il-​jum tas-​6 t’Awissu, 1945, belt kbira ġġarrfet f’mument wieħed. Madwar 80,000 mejtin! Għaxriet t’eluf feruti għall-​mewt! Nar iħeġġeġ! Il-​bomba nukleari kienet għamlet xogħolha. Ix-​Xhieda taʼ Jehovah kif fendew matul dik il-​katastrofi? Kien hemm biss Xhud wieħed f’Hiroshima​—miżmum wara l-​ħitan protettivi taʼ ħabs minħabba l-​integrità Kristjana tiegħu. Il-​ħabs ċeda u sar gozz ġebel, imma ħuna ma weġġax. Bħalma poġġieha hu, kien ġie ‘splodut ’il barra mill-​ħabs’​—forsi l-​unika ħaġa tajba li wettqet il-​bomba.

² Kienet kemm kienet tal-​biżaʼ dik l-​isplużjoni tal-​bomba, issir insinjifikanti meta tiġi mqabbla mal-​“jum il-​kbir u li jispira l-​biżaʼ taʼ Jehovah” li jinsab preċiż quddiemna. (Malakija 4:5) O, iva, kien hemm jiem li spiraw il-​biżaʼ fil-​passat, imma dan il-​jum taʼ Jehovah se jiżboqhom ilkoll kemm huma.—Mark 13:19.

3. Liema kuntrast għandu jiġi nnotat bejn “[i]l-laħam kollu” u l-​familja taʼ Noè sakemm ġiet l-​Għarqa?

³ Fi żmien Noè, “il-​laħam kollu kien irrovina l-​mogħdija tiegħu fuq l-​art,” u Alla ddikjara: “L-​art mimlija vjolenza bħala riżultat tagħhom; u hawn jien qiegħed inġibhom f’rovina flimkien maʼ l-​art.” (Ġenesi 6:12, 13) Bħalma huwa ddokumentat f’Mattew 24:39, Ġesù qal li n-​nies “ma tawx kas sakemm ġie d-​dilluvju u kinishom ilkoll.” Imma l-​leali Noè, “predikatur tat-​tjieba,” flimkien mal-​familja tiegħu li kellha l-​biżaʼ t’Alla, salvaw minn dik l-​għarqa.—2 Pietru 2:5.

4. Liema eżempju taʼ twissija huwa pprovdut minn Sodom u Gomorra?

⁴ “Hekk ukoll,” Ġuda vers 7 jirrakkonta, “Sodom u Gomorra u l-​ibliet taʼ madwarhom, wara li huma . . . kienu kkommettew fornikazzjoni b’mod eċċessiv u telqu wara l-​laħam għal użu m’huwiex naturali, huma mqegħdin quddiemna bħala eżempju taʼ twissija billi għaddew mill-​kastig ġudizzjarju taʼ nar taʼ dejjem.” Dawk in-​nies taʼ mingħajr Alla għebu minħabba l-​istil taʼ ħajja maħmuġ b’mod diżgustanti tagħhom. Ħalli l-​komunitajiet taʼ din id-​dinja moderna li moħħhom biss fis-​sess jiġu mwissijin! Innota, madankollu, li Lot u l-​bniet tiegħu li kellhom il-​biżaʼ t’Alla ġew ippreservati ħajjin matul dik il-​katastrofi, saħansitra bħalma l-​adoraturi taʼ Jehovah se jiġu protetti matul it-​tribulazzjoni l-​kbira li qiegħda toqrob bil-​ħeffa.—2 Pietru 2:6-9.

5. X’nistgħu nitgħallmu mill-​ġudizzji esegwiti fuq Ġerusalemm?

⁵ Imbagħad ikkunsidra l-​eżempji taʼ twissija pprovduti meta Jehovah uża l-​armati taʼ invażjoni biex jeqred għalkollox lil Ġerusalemm, il-​belt glorjuża li darba kienet “l-​eżaltar taʼ l-​art kollha kemm hi.” (Salm 48:2) Dawn il-​ġrajjiet traġiċi seħħew, l-​ewwel fis-​sena 607 Q.E.K. u jerġaʼ fis-​sena 70 E.K., minħabba li l-​hekk imsejjaħ poplu t’Alla abbanduna l-​qima vera. B’hena, qaddejja leali taʼ Jehovah salvaw. Id-​diżastru tas-​sena 70 E.K. (li jidher hawn taħt) huwa deskritt bħala “tribulazzjoni li bħalha ma ġratx mill-​bidu tal-​ħolqien li Alla ħalaq sa dak iż-​żmien.” Din neħħiet darba għal dejjem is-​sistema t’affarijiet Lhudija apostata, u ċertament li f’dak ir-​rigward din “m’hijiex se terġaʼ tiġri.” (Mark 13:19) Imma saħansitra din l-​esekuzzjoni taʼ ġudizzju divin kienet sempliċement dell tat-​“tribulazzjoni l-​kbira” li issa qiegħda thedded lil din is-​sistema t’affarijiet dinjija kollha kemm hi.—Rivelazzjoni 7:14.

6. Jehovah għala jippermetti l-​hemmijiet?

⁶ Għala għandu Alla jippermetti hemmijiet terribbli, b’telf taʼ tant ħajjiet? Fil-​każ taʼ Noè, taʼ Sodom u Gomorra, u taʼ Ġerusalemm, Jehovah kien qiegħed jesegwixxi ġudizzju fuq dawk li kienu rrovinaw il-​mogħdija tagħhom fuq l-​art, li kienu ġiddmu lil din il-​pjaneta sabiħa b’tinġis litterali u degradazzjoni morali, u li kienu apostatizzaw minn, jew ċaħdu, il-​qima vera. Illum qegħdin fix-​xifer t’esekuzzjoni taʼ ġudizzju li tinkludi kollox u li se tkopri d-​dinja kollha kemm hi.—2 Tessalonkin 1:6-9.

“Fl-​Aħħar Jiem”

7. (a) Ġudizzji divini tal-​qedem dwar liema ħaġa kienu profetiċi? (b) Liema prospett glorjuż jinsab quddiemna?

⁷ Dawk l-​atti taʼ qerda taʼ żmien l-​antik kienu profetiċi dwar it-​tribulazzjoni l-​kbira li tispira l-​biżaʼ deskritta fit-2 Pietru 3:3-13. L-​appostlu jgħid: “Għax tafu dan l-​ewwel, li fl-​aħħar jiem se jiġu dawk li jwaqqgħu għaċ-​ċajt bit-​twaqqigħ għaċ-​ċajt tagħhom, jissoktaw skond ix-​xewqat tagħhom stess.” Imbagħad, billi jiffoka fuq żmien Noè, Pietru jikteb: “Id-​dinja taʼ dak iż-​żmien sofriet qerda meta kienet mgħarrqa bl-​ilma. Imma bl-​istess kelma s-​smewwiet u l-​art li huma issa huma maħżunin għan-​nar u qegħdin jiġu merfugħin għall-​jum taʼ ġudizzju u taʼ qerda tan-​nies taʼ mingħajr Alla.” Billi ssegwi lil dik l-​akbar waħda mit-​tribulazzjonijiet kollha, il-​ħakma tas-​Saltna tant mistennija tal-​Messija se tieħu dimensjonijiet ġodda​—“smewwiet ġodda u art ġdida . . . , u f’dawn it-​tjieba għandha tgħammar.” Xi prospett mimli ferħ!

8. Il-​ġrajjiet dinjin kif qegħdin jimxu lejn quċċata?

⁸ Matul is-​seklu 20 tagħna, ġrajjiet dinjin imxew b’mod progressiv lejn quċċata. Għalkemm it-​tħarbit taʼ Hiroshima ma kienx xi żjara minn Alla, jistaʼ jiġi inkluż fid-​“dehriet tal-​biżaʼ” li Ġesù pprofetizza għaż-​żmien tat-​tmiem. (Luqa 21:11) Dan ta bidu għal theddida nukleari li għadha mdendla bħal sħaba tal-​maltemp fuq l-​umanità. B’hekk, titlu prinċipali f’The New York Times tad-​29 taʼ Novembru, 1993, jgħid: “Il-​Kanuni Jistgħu Jkunu Xi Ftit Imsaddin imma l-​Armamenti Nukleari Għadhom Ileqqu.” Sadattant, gwerer internazzjonali, interrazzjali, u intertribali jkomplu jaħsdu ħsad orribbli. Fil-​gwerer taʼ qabel il-​maġġoranza vasta taʼ vittmi kienet fost is-​suldati. Illum, 80 fil-​mija tal-​vittmi tal-​gwerra huma rrapportati li huma pajżani, biex ma nsemmux il-​miljuni li jaħarbu minn art twelidhom bħala refuġjati.

9. Il-​mexxejja reliġjużi kif urew ħbiberija mad-​dinja?

⁹ Mexxejja reliġjużi taʼ spiss urew, u jkomplu juru, “ħbiberija mad-​dinja” billi jkunu involuti b’mod attiv fi gwerer u rivoluzzjonijiet imdemmijin. (Ġakbu 4:4) Xi wħud ikkollaboraw mal-​barunijiet rgħiba tad-​dinja kummerċjali hekk kif dawn jipproduċu armamenti bil-​massa u jibnu imperi tad-​drogi. Per eżempju, billi rrapportat l-​assassinar taʼ wieħed mill-​perċimes tad-​drogi mill-​Amerka t’Isfel, The New York Times stqarret: “Billi ħeba l-​ittraffikar tad-​drogi wara stqarrijiet t’għana minn negozju leġittimu u l-​immaġni taʼ benefattur, kellu programm tar-​radju tiegħu stess u taʼ spiss kien akkumpanjat minn qassisin Kattoliċi Rumani.” The Wall Street Journal irrapporta li flimkien maʼ l-​irrovinar tal-​ħajjiet taʼ miljuni li saru jiddependu fuq id-​drogi, dan il-​perċimes tad-​drogi dderieġa personalment il-​qtil t’eluf. The Times taʼ Londra nnotat: “Il-​qattilin taʼ spiss iħallsu biex issir Quddiesa speċjali biex iroddu ħajr . . . fl-​istess ħin li l-​quddiesa tal-​funeral tal-​vittma tkun qiegħda ssir xi mkien ieħor.” X’kattiverja!

10. Kif għandna nqisu l-​kundizzjonijiet tad-​dinja li sejrin għall-​agħar?

¹⁰ Min jaf xi straġi għad iridu jagħmlu fuq din l-​art il-​bnedmin ispirati mid-​demonji? Bħalma jistqarr 1 Ġwann 5:19, “[i]d-dinja kollha qiegħda taħt il-​poter tal-​wieħed mill-​agħar,” Satana x-​Xitan. Illum huwa “gwaj għall-​art u għall-​baħar, għaliex ix-​Xitan niżel għandkom, billi għandu rabja kbira, billi jaf li għandu perijodu qasir taʼ żmien.” (Rivelazzjoni 12:12) B’hena, iżda, Rumani 10:13 jassigurana li “kulmin isejjaħ isem Jehovah se jkun salvat.”

Alla Jersaq Qrib Biex Jiġġudika

11. Liema kundizzjonijiet f’Iżrael invokaw il-​profezija taʼ Malakija?

¹¹ Inkwantu għall-​futur immedjat taʼ l-​umanità, il-​profezija taʼ Malakija tixħet dawl fuq dak li dalwaqt se jiġri. Malakija huwa mniżżel l-​aħħar fil-​linja twila taʼ profeti Ebrej tal-​qedem. Iżrael kien ġarrab il-​ħerba taʼ Ġerusalemm fis-​sena 607 Q.E.K. Imma 70 sena wara Jehovah wera qalb tajba bl-​imħabba mimlija ħniena f’li rrestawra lil dak il-​ġens lejn artu. F’temp taʼ mitt sena, madankollu, Iżrael kien għal darb’oħra qed jinġarr lejn l-​apostasija u l-​ħażen. In-​nies kienu qegħdin jiddiżonoraw isem Jehovah, billi injoraw il-​liġijiet taʼ tjieba tiegħu, u niġġsu t-​tempju tiegħu billi ġabu annimali għomja, zopop, u morda għas-​sagrifiċċju. Kienu qegħdin jiddivorzjaw lin-​nisa taʼ żgħożithom sabiex setgħu jiżżewġu nisa barranin.—Malakija 1:6-8; 2:13-16.

12, 13. (a) Liema ppurifikar kien meħtieġ għall-​klassi saċerdotali midluka? (b) Il-​folla kbira kif jibbenefikaw ukoll mit-​tindif?

¹² Xogħol taʼ purifikar kien meħtieġ. Dan huwa deskritt f’Malakija 3:1-4. Bħal Iżrael tal-​qedem ix-​Xhieda taʼ Jehovah taʼ llum kellhom bżonn jiġu mnaddfin, u għalhekk ix-​xogħol taʼ purifikar deskritt minn Malakija jistaʼ jiġi applikat għalihom. Hekk kif l-​ewwel gwerra dinjija kienet waslet biex tintemm, xi wħud mill-​Istudenti tal-​Bibbja, bħalma kienu magħrufin ix-​Xhieda f’dak iż-​żmien, ma żammewx newtralità stretta fl-​affarijiet dinjin. Fl-​1918, Jehovah bagħat lill-​“messaġġier tal-​patt” Tiegħu, Ġesù Kristu, lill-​arranġament tat-​tempju spiritwali Tiegħu biex inaddaf lill-​grupp żgħir t’adoraturi Tiegħu minn tbajjaʼ dinjin. Profetikament, Jehovah kien staqsa: “Min se jkun qiegħed jissaporti l-​jum tal-​miġja [tal-messaġġier], u min se jkun il-​wieħed wieqaf meta jidher hu? Għax hu se jkun bħan-​nar taʼ raffinatur u bħal-​lissija tal-​ħasselin. U jrid joqgħod bil-​qiegħda bħal raffinatur u wieħed li jnaddaf il-​fidda u jrid inaddaf lil ulied Levi [grupp taʼ qassisin midlukin]; u jrid jiċċarahom bħad-​deheb u bħall-​fidda, u ċertament li se jsiru għal Jehovah nies li qegħdin jippreżentaw offerta taʼ l-​għotja fit-​tjieba.” Bħala poplu ppurifikat, għamlu preċiżament hekk!

¹³ Dak il-​grupp taʼ qassisin midlukin jikkonsisti biss f’144,000. (Rivelazzjoni 7:4-8; 14:1, 3) X’ngħidu, iżda, dwar Kristjani ddedikati oħrajn illum? Issa billi qegħdin jiżdiedu fil-​miljuni, dawn jifformaw “folla kbira” li wkoll trid tiġi mnaddfa minn mogħdijiet dinjin, ‘billi jaħslu lbieshom u jagħmluhom bojod fid-​demm tal-​Ħaruf.’ (Rivelazzjoni 7:9, 14) B’hekk, billi jeżerċitaw fidi fis-​sagrifiċċju bħala rahan tal-​Ħaruf, Kristu Ġesù, huma jistgħu jżommu waqfa nadifa quddiem Jehovah. Huma mwegħdin salvazzjoni matul it-​tribulazzjoni l-​kbira kollha kemm hi, il-​jum taʼ Jehovah li jispira l-​biżaʼ.—Sofonija 2:2, 3.

14. In-​nies t’Alla llum taʼ liema kliem għandhom jagħtu kas hekk kif jibqgħu jikkultivaw il-​personalità l-​ġdida?

¹⁴ Flimkien mal-​fdal saċerdotali, din il-​folla kbira trid tagħti kas il-​kliem li jmiss t’Alla: “Jien se nersaq lejkom għall-​ġudizzju, u se nsir xhud għaġġiel kontra s-​saħħâra, u kontra l-​adulteri, u kontra dawk li qegħdin jaħilfu fil-​falz, u kontra dawk li qegħdin jaġixxu bil-​frodi mal-​pagi taʼ ħaddiem li jitħallas il-​paga, maʼ l-​armla u mat-​tifel bla missier, u dawk li qegħdin ikeċċu lir-​resident barrani, waqt li huma ma beżgħux minni . . . Għax jien Jehovah; jien ma nbdiltx.” (Malakija 3:5, 6) Le, il-​livelli taʼ Jehovah ma jinbidlux, u għalhekk fil-​biżaʼ taʼ Jehovah, in-​nies tiegħu llum iridu jevitaw idolatrija taʼ kull xorta u jkunu wħud li jgħidu l-​verità, onesti, u ġenerużi hekk kif ikomplu jikkultivaw il-​personalità Kristjana.—Kolossin 3:9-14.

15. (a) Jehovah liema stedina mimlija ħniena jestendi? (b) Kif nistgħu nevitaw li ‘nisirqu’ lil Jehovah?

¹⁵ Jehovah jestendi stedina lil kulmin setaʼ warrab mill-​mogħdijiet tiegħu taʼ tjieba, billi jgħid: “Erġgħu lura lejja, u jien se nerġaʼ lura lejkom.” Jekk dawn jistaqsu: “B’liema mod se nerġgħu lura?” hu jwieġeb: “Intom qegħdin tisirquni.” U bi tweġiba għall-​mistoqsija l-​oħra: “B’liema mod sraqniek?” Jehovah jistqarr li serquh billi naqsu li jġibu l-​aħjarnett tagħhom bħala offerti għas-​servizz tiegħu tat-​tempju. (Malakija 3:7, 8) Billi sirna parti mill-​poplu taʼ Jehovah, għandna tabilħaqq inkunu rridu niddedikaw l-​aħjar parti taʼ l-​enerġiji, l-​abbiltajiet, u assi materjali tagħna għas-​servizz taʼ Jehovah. B’hekk, minflok ma nisirqu lil Alla, aħna ‘nibqgħu nfittxu l-​ewwel is-​saltna u t-​tjieba tiegħu.’—Mattew 6:33.

16. Liema inkuraġġiment insibu f’Malakija 3:10-12?

¹⁶ Hemm premju grandjuż għal dawk kollha li jpoġġu l-​modi materjalistiċi tad-​dinja f’li jaqdu lilhom infushom warajhom, bħalma jindika Malakija 3:10-12: “‘Ittestjawni, jekk jogħġobkom, f’dan ir-​rigward,’ Jehovah taʼ l-​armati qal, ‘jekk inix se niftħilkom il-​kanċelli taʼ l-​għargħar tas-​smewwiet u attwalment inbattal fuqkom barka sakemm m’hemmx iktar bżonn.’” Lil dawk kollha li japprezzaw, Jehovah iwiegħed prosperità u fertilità spiritwali. Hu jżid: “[I]l-ġnus kollha se jkollhom jippronunzjawkom henjin, għax intom infuskom se ssiru pajjiż t’għaxqa.” Ma tax dak prova li hekk sar fost il-​miljuni taʼ nies grati t’Alla madwar l-​art illum?

Uħud Li Jżommu L-​Integrità Fil-​Ktieb Tal-​Ħajja

17-19. (a) It-​taqlib fl-​Irwanda kif effettwa lil ħutna hemmhekk? (b) Dawn l-​uħud leali kollha b’liema konvinzjoni mxew ’il quddiem?

¹⁷ F’dan il-​mument, nistgħu nikkummentaw dwar l-​integrità taʼ ħutna rġiel u nisa fl-​Irwanda. Huma dejjem ġabu l-​aħjar offerti spiritwali għad-​dar spiritwali taʼ qima taʼ Jehovah. Per eżempju, fil-​Konvenzjoni Distrettwali tagħhom “Tagħlim Divin” f’Diċembru 1993, l-​2,080 pubblikatur tagħhom tas-​Saltna kellhom ħsad t’attendenza totali taʼ 4,075. Kien hemm 230 Xhud ġodda li tgħammdu, u minn dawn, kważi 150 ingaġġaw fis-​servizz taʼ pijunier awżiljarju x-​xahar taʼ wara.

¹⁸ Meta l-​mibgħeda etnika sbroffat f’April 1994, mill-​inqas 180 xhud, inkluż l-​indokratur tal-​belt f’Kigali, il-​kapitali, u l-​familja tiegħu kollha kemm hi, ġew maqtulin. Is-​sitt tradutturi fl-​uffiċċju tal-​Watch Tower Society f’Kigali, erbgħa minnhom Hutu u tnejn Tutsi, komplew jaħdmu għal diversi ġimgħat taħt theddid qalil, sakemm it-​Tutsi kellhom jaħarbu, biex jaħasra ġew maqtulin f’checkpoint. Fl-​aħħarnett, billi ġarrew dak li kien baqaʼ mit-​tagħmir tal-​kompjuter, l-​erbgħa li kien fadal ħarbu lejn Goma, fiż-​Zaire, fejn komplew jittraduċu lealment The Watchtower fil-​lingwa Kinjarwanda.—Isaija 54:17.

¹⁹ Dawn ix-​Xhieda refuġjati, għalkemm f’ċirkostanzi estremi, dejjem talbu għal ikel spiritwali qabel ma talbu għal provvedimenti materjali. B’sagrifiċċju kbir, aħwa kollhom imħabba minn diversi pajjiżi setgħu jwasslulhom il-​provisti. Permezz tal-​kelma mitkellma u biż-​żamma taʼ l-​ordni tagħhom f’sitwazzjoni taʼ stress, dawn ir-​refuġjati taw xiehda meraviljuża. Tabilħaqq komplew iġibu l-​aħjar tagħhom għall-​qima taʼ Jehovah. Urew konvinzjoni, bħal dik taʼ Pawlu espressa f’Rumani 14:8: “Kemm jekk ngħixu, aħna ngħixu għal Jehovah, u kemm jekk immutu, aħna mmutu għal Jehovah. Għalhekk kemm jekk ngħixu u kemm jekk immutu, aħna nappartjenu lil Jehovah.”

20, 21. (a) L-​ismijiet taʼ min m’humiex miktubin fil-​ktieb taʼ tfakkira taʼ Jehovah? (b) L-​ismijiet taʼ min jidhru fil-​ktieb, u għala?

²⁰ Jehovah iżomm rekord taʼ dawk kollha li jaqduh bl-​integrità. Il-​profezija taʼ Malakija tkompli: “F’dak iż-​żmien dawk fil-​biżaʼ taʼ Jehovah tkellmu maʼ xulxin, kull wieħed maʼ sieħbu, u Jehovah qagħad jagħti kas u jagħti widen. U ktieb taʼ tfakkira beda jinkiteb quddiemu għal dawk fil-​biżaʼ taʼ Jehovah u għal dawk li kienu qegħdin jaħsbu fuq ismu.”—Malakija 3:16.

²¹ Kemm huwa importanti llum li aħna nuru biżaʼ t’Alla f’li nonoraw isem Jehovah! Billi nagħmlu hekk, m’aħniex se nsofru ġudizzju kontra tagħna, bħalma se jagħmlu dawk li b’ammirazzjoni jappoġġjaw lis-​sistemi taʼ did-dinja. Rivelazzjoni 17:8 jirrakkonta li “ismijiethom ma ġewx miktubin fuq ir-​romblu tal-​ħajja.” Loġikament, l-​isem li jispikka miktub fil-​ktieb tal-​ħajja taʼ Jehovah huwa dak taʼ l-​Aġent Ewlieni tal-​ħajja, l-​Iben t’Alla stess, Ġesù Kristu. Mattew 12:21 jiddikjara: “Tabilħaqq, f’ismu ġnus se jittamaw.” Is-​sagrifiċċju bħala rahan taʼ Ġesù jiggarantixxi ħajja taʼ dejjem għal dawk kollha li jeżerċitaw fidi f’dan. Xi privileġġ huwa dan li jkollna l-​ismijiet individwali tagħna miżjudin maʼ isem Ġesù f’dak ir-​romblu!

22. Liema distinzjoni se tkun tidher meta Jehovah jesegwixxi ġudizzju?

²² Il-​qaddejja t’Alla kif se jkampaw fil-​ġudizzju? Jehovah iwieġeb f’Malakija 3:17, 18: “Se nuri mogħdrija lejhom, sewwa sew bħalma raġel juri mogħdrija lejn ibnu li qiegħed jaqdih. U intom ċertament li se taraw mill-​ġdid id-​distinzjoni bejn wieħed twajjeb u wieħed mill-​agħar, bejn wieħed li qiegħed jaqdi lil Alla u wieħed li ma qdiehx.” Il-​firda se tkun ċara għal kulħadd: dawk mill-​agħar, isseparati għal qtugħ taʼ dejjem, u t-​twajbin, approvati għal ħajja taʼ dejjem fil-​qasam tas-​Saltna. (Mattew 25:31-46) B’hekk folla kbira taʼ persuni bħal ngħaġ se jsalvaw mill-​jum kbir taʼ Jehovah li jispira l-​biżaʼ. (w95 4/15)

Tiftakar Int?

◻ Jehovah liema ġudizzji esegwixxa fi żminijiet Bibliċi?

◻ Il-​kundizzjonijiet illum kif inhuma paralleli maʼ dawk taʼ żmien l-​antik?

◻ Liema purifikar seħħ bi twettieq tal-​profezija taʼ Malakija?

◻ L-​ismijiet taʼ min huma miktubin fil-​ktieb taʼ tfakkira t’Alla?