Lest li Tadatta Ruħek?

1. Liema aġġustamenti jkollna nagħmlu minħabba l-​bidliet fid-​dinja?

¹ Fl-​1 Korintin 7:31, il-​Bibbja tqabbel lid-​dinja maʼ palk b’xeni u atturi li l-​ħin kollu jinbidlu. Minħabba l-​bidliet fid-​dinja, kull tant żmien ikollna nagħmlu aġġustamenti fil-​metodi taʼ ppritkar, fl-​iskeda, u fil-​preżentazzjoni tagħna. Lest li tadatta ruħek?

2. Għala għandna nadattaw ruħna biex inżommu l-​pass mal-​organizzazzjoni?

² Il-​Metodi Tiegħek taʼ Ppritkar: Il-​kongregazzjoni Kristjana minn dejjem kienet lesta li tadatta ruħha. L-​ewwel darba li Ġesù bagħat lid-​dixxipli tiegħu jippritkaw, qalilhom biex ma jiħdux magħhom ħorġa tal-​ikel jew flus fil-​but. (Mt. 10:9, 10) Imma iktar tard ta istruzzjonijiet ġodda għax kien jaf li n-​nies kienu se jkunu ostili lejn id-​dixxipli tiegħu u li x-​xogħol tal-​ippritkar kien se jespandi f’territorji oħra. (Lq. 22:36) Matul l-​aħħar seklu, l-​organizzazzjoni taʼ Ġeħova użat metodi differenti taʼ ppritkar—bħal pereżempju, il-​kards tat-​testimonjanza, ix-​xandir fuq ir-​radju, u l-​karozzi bl-​ispeakers—skont il-​bżonn taʼ dak iż-​żmien. Illum il-​ġurnata, peress li n-​nies f’ħafna nħawi rari ssibhom id-​dar, qed issir iktar enfasi biex minbarra l-​ministeru li nagħmlu minn dar għal dar nagħtu xhieda lill-​pubbliku u xhieda informali. Ukoll, ġejna inkuraġġiti mmorru minn dar għal dar kmieni filgħaxija jekk in-​nies ikunu għax-​xogħol matul il-​ġurnata. Hekk kif il-​karru ċelestjali taʼ Ġeħova jaġġusta l-​korsa tiegħu, qed iżżomm il-​pass miegħu int?—Eżek. 1:20, 21.

3. Il-​fatt li nadattaw ruħna kif jgħinna nkunu effettivi fit-​territorju tagħna?

³ Il-​Preżentazzjoni Tiegħek: In-​nies fl-​inħawi tiegħek dwar xiex huma konċernati bħalissa? L-​ekonomija? Il-​familja? Il-​kriminalità? Ikun tajjeb li nkunu konxji tal-​problemi u ċ-​ċirkustanzi kurrenti li huma komuni fit-​territorju tagħna ħalli nkunu nistgħu nippreparaw preżentazzjoni xierqa. (1 Kor. 9:20-​23) Meta l-​inkwilini jesprimu ruħhom, minflok ma nagħtuhom tweġiba tipika u nkomplu bil-​preżentazzjoni li nkunu beħsiebna nużaw, ikun ħafna aħjar li nadattaw ruħna u nitkellmu dwar dak li jikkonċernahom.

4. Għala għandna nkunu ħfief biex nadattaw ruħna?

⁴ Ix-​“xena” finali taʼ din id-​dinja dalwaqt se tiġi fi tmiemha, u se tibda t-​tribulazzjoni l-​kbira. “Iż-​żmien li fadal tqassar.” (1 Kor. 7:29) Għalhekk, kemm hu importanti li nadattaw ruħna mingħajr dewmien ħalli nwettqu kulma nistgħu fiż-​żmien limitat li fadal!