“Kif Jistgħu Jisimgħu?”
1 Ġesù qal b’enfasi: “L-ewwel jeħtieġ li l-Evanġelju jkun imxandar lill-ġnus kollha.” (Mk. 13:10) Minkejja l-isforzi biżlin tagħna, għad hemm mijiet taʼ miljuni taʼ nies li ma ngħatawx xiehda personalment. Xi gvernijiet jipprojbixxu x-xogħol tagħna. F’ħafna pajjiżi hemm popolazzjonijiet enormi li qed ikomplu jikbru b’pass mgħaġġel. Allura dawn, “kif jistgħu jisimgħu?”—Rum. 10:14.
2 Afda f’Jehovah: Irridu niftakru li Jehovah jaf il-kundizzjoni tal-qalb taʼ kulħadd. Tkun xi tkun is-sitwazzjoni taʼ l-individwu, jekk hu jfittex sinċerament il-verità dwar Alla, dan se jsibha.—1 Kron. 28:9.
3 Abraham kien inkwetat għall-aħħar dwar dawk li kienu jgħixu f’Sodoma u Gomorra. Iżda Alla żgurah li Sodoma ma kinitx se tinqered anki jekk kien isib biss għaxar persuni tajbin hemmhekk. (Ġen. 18:20, 23, 25, 32) Jehovah qatt ma qered lit-tajbin mal-ħżiena, bħalma kien wera meta salva lil Lot u ’l-ulied bniet tiegħu.—2 Pt. 2:6-9.
4 Elija darba ħaseb li kien kompletament waħdu f’li jaqdi lil dak Alla veru. Madankollu, Jehovah żgurah li ċertament ma kienx waħdu u li x-xogħol li beda kien se jitwettaq. (1 Slat. 19:14-18) Xi ngħidu għas-sitwazzjoni taʼ żmienna?
5 Ibqaʼ Attiv Ferm fis-Servizz t’Alla: Kemm għad irid ikompli jinfirex ix-xogħol taʼ l-għoti taʼ xiehda għadna ma nafux. Jehovah hu responsabbli għal dan ix-xogħol u qed juża lill-anġli tiegħu biex jindokrawh. (Apk. 14:6, 7) Hu l-wieħed li jiddetermina sa liema punt ix-xiehda trid tingħata lill-ġnus kollha. Jekk irid, Jehovah jistaʼ jieħu ħsieb li l-messaġġ tas-Saltna jinfirex b’tali mod li aħna għalissa lanqas biss nistgħu nimmaġinaw sabiex ħafna iktar nies ikunu jistgħu “jisimgħu l-kelma taʼ l-Evanġelju u jemmnu.” (Atti 15:7) Dak li jagħmel Jehovah se jkun kompletament fi qbil maʼ dak li hu—Alla li jħobb, għaref, u ġust.
6 Huwa l-privileġġ tagħna li naħdmu fi qbil mar-rieda taʼ Jehovah, filwaqt li nagħmlu l-almu tagħna biex insemmgħu l-aħbar tajba lil kulħadd.—1 Kor. 9:16.