Dawn Għamlu r-​Rieda taʼ Jehovah

Marija Tagħżel “l-​Aħjar Sehem”

FI ŻMIEN Ġesù, in-​nisa Lhud kienu mxekklin mit-​tradizzjonijiet rabbiniċi. Għaldaqstant, kienu skuraġġiti milli jistudjaw il-​Liġi. Fil-​fatt, opinjoni waħda kwotata fil-​Mixna kienet tgħid: “Jekk xi raġel jagħti lil bintu xi għarfien mil-​Liġi jkun qisu għallimha xi ħaġa faħxija.”—Sotah 3:4.

Minħabba f’hekk, ħafna nisa fil-​Ġudea fl-​ewwel seklu ma kinux taʼ skola. “M’hemm l-​ebda evidenza li xi darba, qabel il-​ministeru taʼ Ġesù, in-​nisa Lhud kienu qatt tħallew ikunu dixxipli taʼ xi għalliem kbir, aħseb u ara li jivvjaġġaw maʼ għalliem bħal dan, jew jgħallmu lil xi ħadd jekk mhux lit-​tfal,” jinnota The Anchor Bible Dictionary. Biex iktar ibaxxu lin-​nisa, xi mexxejja reliġjużi saħansitra għamlu regola li tesiġi li raġel m’għandux ikellem lil xi mara fil-​pubbliku!

Ġesù injora attitudnijiet bħal dawn li jiċħdu ’l Alla. Hu għallem kemm lin-​nisa u kemm lill-​irġiel, u fost is-​segwaċi tiegħu kien ikun hemm kemm irġiel u kemm nisa. (Luqa 8:1-3) F’okkażjoni minnhom, Ġesù kien mistieden għand Marta u Marija. (Luqa 10:38) Dawn iż-​żewġ nisa kienu ħut Lazzru, u t-​tlieta li huma kienu dixxipli u ħbieb sewwa taʼ Ġesù. (Ġwann 11:5) Din il-​familja għandha mnejn kienet prominenti, meta wieħed iqis l-​għadd kbir taʼ nies li ġew ifarrġu lil Marta u Marija meta miet Lazzru. Kien x’kien il-​każ, dak li ġara f’darhom meta Ġesù kien mistieden għandhom ipprovda lezzjoni taʼ valur mhux għalihom biss imma għalina wkoll.

Titgħallem f’Riġlejn Ġesù

Bla dubju, Marta u Marija kienu ħerqanin biex lil Ġesù jlestulu ikla kbira, u probabbli kellhom biex. (Qabbel Ġwann 12:1-3.) Madankollu, meta wasal il-​mistieden tagħhom, Marija “niżlet bil-​qiegħda f’riġlejn il-​Mulej tisimgħu x’kien qiegħed jgħid.” (Luqa 10:39) L-​ebda tradizzjoni tal-​bniedem ma kienet se twaqqaf lil Ġesù milli jgħallem mara sinċiera li kienet tant ħerqana biex titgħallem! Nistgħu nimmaġinaw lil Marija bil-​qegħda quddiem Ġesù, waqt li qegħdet lilha nfisha f’pożizzjoni bħala studenta, mitlufa tismaʼ t-​tagħlim taʼ l-​Imgħallem tagħha.—Qabbel Dewteronomju 33:3; Atti 22:3.

Kuntrarju għal Marija, Marta “kienet moħħha fuq il-​ħafna xogħol tad-​dar.” Peress li kienet qed tipprepara ikla kbira, kellha ħafna x’tagħmel. Marta ma ħaditx pjaċir li baqgħet waħedha tagħmel ix-​xogħol waqt li oħtha kienet bil-​qegħda f’riġlejn Ġesù! Għalhekk, Marta qatgħet il-​kliem taʼ Ġesù lil Marija, forsi ħesrem, u stqarret: “Mulej, m’intix tara kif oħti ħalliet ix-​xogħol kollu fuqi biss? Mela għidilha taqbad tagħmel xi ħaġa miegħi!”—Luqa 10:40.

Ma kien hemm xejn ħażin fit-​talba nfisha taʼ Marta. Fuq kollox, biex tħejji ikla għal xi grupp jirrikjedi xogħol iebes, u l-​piż m’għandux jaqaʼ fuq persuna waħda. Madankollu, fl-​istqarrija tagħha Ġesù ra l-​opportunità biex jgħallem lezzjoni taʼ valur. “Marta Marta,” hu qal, “inti taħseb wisq u tinkwieta fuq ħafna ħwejjeġ; imma waħda hi meħtieġa. U Marija għażlet l-​aħjar sehem, li ma jitteħdilhiex.”—Luqa 10:41, 42.

Ġesù ma kienx qed jgħid li Marta ma kellhiex interess biżżejjed fl-​affarijiet spiritwali. Għall-​kuntrarju, hu kien jafha bħala mara taʼ devozzjoni kbira lejn Alla.a Wara kollox, dan kien mingħajr dubju dak li qanqalha biex tistieden lil Ġesù f’darha. Madankollu, fit-​twiddiba tiegħu bil-​ħlewwa, Ġesù kien qed joħroġ il-​punt li Marta, minħabba l-​attenzjoni ansjuża għall-​ikla, kienet qed titlef opportunità rari li tirċievi istruzzjoni persunali mingħand Bin Alla.

Veru, il-​kultura taʼ dak iż-​żmien għandha mnejn kienet tappoġġa l-​ħarsa li l-​aħjar prova taʼ kemm mara tiswa hi l-​kapaċità tagħha fil-​faċendi tad-​dar. Imma l-​kliem taʼ Ġesù wera li n-​nisa, bħall-​irġiel, setgħu joqogħdu bil-​qegħda f’riġlejn Bin Alla u jirċievu l-​kliem tal-​ħajja! (Ġwann 4:7-15; Atti 5:14) Meta tqis dan, kien ikun ħafna aħjar għal Marta li tipprovdi sempliċement ftit ikel​—jew saħansitra platt wieħed biss—​jekk dan setaʼ jħallilha l-​opportunità li toqgħod f’riġlejn l-​Imgħallem u titgħallem mingħandu.—Qabbel Mattew 6:25.

Lezzjoni Għalina

Illum, kemm l-​irġiel u kemm in-​nisa jinsabu fost dawk li jwieġbu għall-​istedina taʼ Ġesù biex ‘jieħdu l-​ilma tal-​ħajja b’xejn.’ (Apokalissi 22:17) Imqanqlin mill-​imħabba, xi wħud​—bħal Marta—​jagħmlu ħilithom biex ikunu t’għajnuna għall-​bżonnijiet taʼ sħabhom fit-​twemmin. Huma prattiċi u ħfief biex jieħdu azzjoni, u Jehovah jwiegħed li se jbierek ix-​xogħlijiet li jagħmlu bl-​imħabba. (Lhud 6:10; 13:16) Oħrajn forsi jixbhu iktar mill-​qrib lil Marija. Huma ġwejdin u jħobbu jaħsbu fil-​kwiet fuq affarijiet spiritwali. Il-​ħerqa tagħhom biex jimmeditaw fuq il-​Kelma t’Alla tgħinhom jibqgħu bl-​għeruq tagħhom sodi fil-​fidi.—Efesin 3:17-19.

Iż-żewġ tipi taʼ individwi jimlew bżonn vitali fil-​kongregazzjoni Kristjana. Madankollu, fl-​aħħar mill-​aħħar, kulħadd għandu ‘jagħżel l-​aħjar sehem’ billi jpoġġi enfasi primarju fuq l-​affarijiet spiritwali. Billi nkunu żguri mill-​affarijiet iktar importanti, aħna se jkollna l-​favur u l-​barka taʼ Jehovah.—Filippin 1:9-11.

[Nota taʼ taħt]