Ibni Ħajtek Madwar is-​Servizz taʼ Jehovah

¹ Ġesù xebbah lis-​semmiegħa tiegħu maʼ żewġ tipi taʼ bennejja. Wieħed bena l-​mod taʼ ħajja tiegħu fuq il-​blat t’ubbidjenza lejn Kristu u kien kapaċi jiflaħ għall-​maltemp t’oppożizzjoni u tribulazzjoni. L-​ieħor bena fuq ir-​ramel taʼ diżubbidjenza egoista u ma kienx kapaċi jieqaf sod meta ġiet il-​pressjoni. (Mt. 7:​24-27) Billi qegħdin ngħixu f’din il-​konklużjoni tas-​sistema t’affarijiet, aħna nġarrbu ħafna maltempati t’avversità. Fuq ix-​xefaq, is-​sħab mudlam tat-​tribulazzjoni l-​kbira qed jinġabar bil-​ħeffa. Se nibqgħu nissaportu sa l-​aħħar bil-​fidi tagħna mhix mittiefsa? (Mt. 24:​3, 13, 21) Dan jiddependi ħafna minn kif qed nibnu ħajjitna issa. B’hekk, huwa urġenti li nsaqsu lilna nfusna, ‘Qiegħed jien nibni l-​ħajja Kristjana tiegħi madwar is-​servizz ubbidjenti lejn Alla?’

² X’ifisser li nibnu ħajjitna madwar is-​servizz taʼ Jehovah? Ifisser li nagħmlu lil Jehovah sewwa sew iċ-​ċentru taʼ ħajjitna. Dan jinvolvi li niffokaw fuq is-​Saltna bħala t-​tħassib prinċipali tagħna. Jinkludi l-​ubbidjenza lejn Alla fl-​attivitajiet kollha tal-​ħajja tagħna taʼ kuljum. Jirrikjedi li l-​istudju tal-​Bibbja persunali, tal-​familja, u tal-​kongregazzjoni u l-​ministeru tagħna taʼ l-​għalqa nwettquhom b’qalb sħiħa, billi nagħmluhom il-​prijoritajiet tagħna. (Koħ. 12:13; Mt. 6:33) Korsa ubbidjenti bħal din tirriżulta f’fidi soda daqs il-​blat li m’hijiex se tiġġarraf meta tiġi wiċċ imbwiċċ maʼ xi maltempati t’avversità li għandhom mnejn jolqtuna.

³ Huwa pjaċevoli li tara miljuni taʼ nies li b’fiduċja qed jibnu ħajjithom u tamiethom għall-​futur madwar is-​servizz lejn Alla, saħansitra bħalma għamel Ġesù. (Ġw. 4:34) Huma jżommu mill-​qrib maʼ skeda konsistenti t’attivitajiet teokratiċi u bħala riżultat igawdu barkiet għonja. Waħda omm spjegat kif hi u żewġha rnexxielhom irabbu liż-​żewġ ulied subjien tagħhom biex jaqdu lil Jehovah: “Imlejna ħajjitna bil-​verità​—billi morna għall-​konvenzjonijiet kollha, ippreparajna u attendejna għal-​laqgħat kollha, u billi għamilna s-​servizz taʼ l-​għalqa parti regulari minn ħajjitna.” Żewġha żied: “Il-​verità m’hijiex parti minn ħajjitna, hija ħajjitna. L-​affarijiet l-​oħrajn iduru madwarha.” Poġġejt int bl-​istess mod is-​servizz taʼ Jehovah bħala l-​prijorità ewlenija fil-​familja tiegħek?

⁴ Organizza Skeda Prattika taʼ kull Ġimgħa: L-​organizzazzjoni taʼ Jehovah tgħinna nsegwu rutina spiritwali tajba permezz taʼ l-​arranġament taʼ ħames laqgħat fil-​ġimgħa. Il-​Kristjani li qed jibnu ħajjithom madwar il-​qima taʼ Jehovah jirranġaw l-​affarijiet tagħhom kemm sekulari u kemm tal-​familja b’tali mod li jkunu jistgħu jattendu għal dawn il-​laqgħat vitali kollha. Ma jħallux lil kwistjonijiet t’inqas importanza jfixklu l-​attendenza regulari tagħhom.​—Flp. 1:10; Lhud 10:25.

⁵ Kristjani maturi jirrikonoxxu li daqskemm huma importanti ikliet regulari f’ċerti ħinijiet tal-​ġurnata, daqstant ieħor huwa vitali li ssir skeda definita għal studju persunali u tal-​familja, inkluż il-​preparazzjoni għal-​laqgħat. (Mt. 4:4) Tistaʼ twarrab għall-​inqas kwarta jew għoxrin minuta kull ġurnata għall-​istudju persunali? Is-​soluzzjoni hi li ma tħallix affarijiet oħrajn jiħdulek mill-​ħin imwarrab għall-​istudju. Ħudha drawwa li tagħmel din il-​ħaġa siewja. Dan jistaʼ jirrikjedi li kull fil-​għodu tqum iktar kmieni milli qed tqum issa. Mad-​dinja kollha, is-​17,000 membru tal-​familja Betel iqumu kmieni fil-​għodu biex jiddiskutu t-​test tal-​jum. M’għandniex xi ngħidu, biex tqum kmieni fil-​għodu jirrikjedi li bil-​lejl tmur torqod f’ħin raġunevoli sabiex tibda l-​ġurnata taʼ wara b’saħħtek u mhux għajjien.

⁶ Jekk int kap taʼ familja, ħu l-​inizjattiva biex tippjana u torganizza l-​iskeda t’attività teokratika tal-​familja tiegħek. Xi familji jaqraw il-​Bibbja, il-​Yearbook, jew xi pubblikazzjoni oħra flimkien hekk kif ikunu qed jirrilassaw wara l-​ikla taʼ fil-​għaxija. Ħafna ġenituri li raw lil uliedhom jikbru u jsiru Kristjani b’saħħithom spiritwalment jgħidu li fattur wieħed li kkontribwixxa għas-​suċċess tagħhom kien id-​drawwa tal-​familja li jwarrbu lejla waħda kull ġimgħa li matulha kienu jgawdu ħin spiritwali bnin flimkien. Missier bħal dan qal: “Inħoss li l-​iżvilupp spiritwali t’uliedna kien dovut fil-​biċċa l-​kbira għall-​istudju tal-​familja regulari kull nhar t’Erbgħa fil-​għaxija, li nbeda xi 30 sena ilu.” It-​tlett itfal tiegħu tgħammdu t’età żgħira, u iktar tard it-​tlieta li huma daħlu fil-​ministeru full-time. Flimkien maʼ l-​istudju tal-​familja, jistgħu jsiru provi taʼ preżentazzjonijiet fis-​servizz taʼ l-​għalqa jew taʼ partijiet fil-​laqgħa, u jistgħu jitgawdew flimkien attivitajiet bnien oħrajn.

⁷ Fl-​iskeda tiegħek taʼ kull ġimgħa, ‘xtrajt int il-​ħin opportun’ għall-​ippridkar tas-​Saltna? (Kol. 4:5, NW) Il-​biċċa l-​kbira tagħna għandna ħajjiet mgħaġġlin, billi għandna responsabbiltajiet tal-​familja u tal-​kongregazzjoni x’nieħdu ħsieb. Jekk ma nagħmlux arranġamenti definiti biex nieħdu sehem fix-​xogħol taʼ l-​ippridkar u taʼ tagħlim kull ġimgħa, se jkun faċli ħafna li affarijiet oħrajn ma jħallux wisaʼ għal din l-​attività vitali. Sid taʼ razzett kbir tal-​baqar qal: “Madwar l-​1944 irrealizzajt li l-​uniku mod li bih stajt immur fuq is-​servizz kien li nippjana ġurnata partikulari għalih fil-​ġimgħa. Sal-​lum għadni nieħu ġurnata franka matul il-​ġimgħa għas-​servizz.” Wieħed anzjan Kristjan isib li bis-​saħħa taʼ skeda definita għall-​għoti taʼ xiehda jkun jistaʼ jagħmel medja taʼ 15-il siegħa fix-​xahar fl-​attività taʼ l-​ippridkar. Jekk is-​Sibt ikollu xi negozju sekulari, hu jippjanah għal wara s-​servizz taʼ l-​għalqa taʼ fil-​għodu. Tistgħu int u l-​familja tiegħek tippjanaw minn taʼ l-​inqas ġurnata waħda fil-​ġimgħa għas-​servizz taʼ l-​għalqa, billi tagħmluh parti mill-​mod taʼ ħajja spiritwali tagħkom?​—Flp. 3:16.

⁸ Għarbel ir-​Rutina Tiegħek tal-​Ħajja: Hemm xi affarijiet li jaħdmu kontra li nibnu ħajjitna madwar is-​servizz taʼ Jehovah. Ċirkustanzi mhux mistennijin jistgħu jfixklu l-​iskeda tagħna ppjanata bir-​reqqa għall-​istudju, għal-​laqgħat, u għas-​servizz. U l-​Avversarju tagħna, Satana, se jagħmel kulma jistaʼ biex ‘ifixkilna’ u jħassrilna l-​pjanijiet. (1 Tess. 2:18; Efes. 6:​12, 13) Tħallix lil dawn l-​ostakli jiskuraġġuk, u b’hekk taqtaʼ qalbek. Agħmel l-​aġġustamenti kollha meħtiġin biex twettaq l-​attività teokratika li għandek ippjanata. Id-​determinazzjoni u l-​persistenza huma bżonnjużi biex twettaq dak li hu verament taʼ siwi.

⁹ M’għandniex inħallu l-​influwenzi dinjin u l-​ġibda degradanti tal-​ġisem imperfett tagħna jintroduċu attivitajiet mhux spiritwali li jistgħu jibdew jieħdu iktar u iktar mill-​ħin u l-​attenzjoni tagħna. Jinħtieġ li ngħarblu lilna nfusna, billi nsaqsu mistoqsijiet bħal dawn: ‘Bdiet il-​korsa taʼ ħajti ssir bil-​mod il-​mod żbilanċjata jew mhix iffokata sew, biex ngħidu hekk? Bdejt jien nibni ħajti madwar affarijiet f’din id-​dinja li qed jgħaddu? (1 Ġw. 2:​15-17) Kemm inqattaʼ ħin f’ġiri wara affarijiet materjali, ivvjaġġar għall-​gost, attivitajiet sportivi, jew divertiment ieħor​—inkluż li noqgħod nara t-​televixin jew inqalleb fl-​Internet—​meta nqabblu mal-​ħin li nqattaʼ f’attivitajiet spiritwali?’

¹⁰ Jekk qed tħoss li ħajtek saret imburġata b’iktar u iktar attivitajiet mhux essenzjali, x’għandu jsir? Għala ma tissupplikax lil Jehovah għall-​għajnuna biex għal darb’oħra tiċċentra ruħek fuq is-​servizz tiegħu, sewwa sew bħalma Pawlu talab li ħutu jkunu “aġġustati mill-​ġdid,” u “miġjubin fil-​linja xierqa”? (2 Kor. 13:​9, 11, NW, ntt.) Imbagħad kun determinat li tgħix fi qbil mad-​deċiżjoni tiegħek u tagħmel l-​aġġustamenti meħtiġin. (1 Kor. 9:​26, 27) Jehovah se jgħinek tevita li ddur lejn il-​lemin jew lejn ix-​xellug mis-​servizz ubbidjenti lejh.​—Qabbel Isaija 30:​20, 21.

¹¹ Ibqaʼ Ħabrieki fis-​Servizz Ferrieħi t’Alla: Miljuni taʼ nies ifittxu disperatament l-​hena biex imbagħad jiskopru li hekk kif joqrob it-​tmiem tal-​ħajja, l-​affarijiet materjali li jkunu ġrew warajhom bil-​ħerqa ma ġabulhomx hena dejjiem. Kien “ġiri wara r-​riħ.” (Koħ. 2:11) Mill-​banda l-​oħra, meta nżommu ħajjitna ċċentrata fuq Jehovah, billi ‘nżommuh dejjem quddiemna,’ nesperjenzaw sodisfazzjon kbir. (Salm 16:​8, 11) Dan huwa minnu għaliex Jehovah huwa r-​raġuni propja għall-​eżistenza tagħna. (Apk. 4:11) Mingħajru, il-​Wieħed Grandjuż li għandu skop, il-​ħajja tkun bla sens. Is-​servizz lejn Jehovah jimla lil ħajjitna b’attività siewja, li fiha skop, u li hija taʼ benefiċċju għalina kif ukoll għal ħadd­ieħor għal dejjem, iva, għal dejjem taʼ dejjem.

¹² Huwa importanti li ma nsirux indifferenti u nitilfu s-​sens t’urġenza tagħna rigward it-​tmiem tad-​dinja taʼ Satana li riesaq bil-​ħeffa. Il-​mod t’għajxien tagħna taʼ kuljum huwa influwenzat mill-​ħarsa tagħna lejn il-​futur. In-​nies fi żmien Noè, li m’emmnux li kien se jkun hemm dilluvju globali, “b’xejn ma nteb[ħ]u,” billi ċċentraw il-​ħajja tagħhom taʼ kuljum fuq ġiri wara affarijiet persunali​—l-​ikel, ix-​xorb, u ż-​żwieġ—​sakemm id-​dilluvju “ġarr lil kulħadd.” (Mt. 24:​37-39) Illum, dawk li jiċċentraw ħajjithom fuq din id-​dinja se jaraw li l-​prospetti tagħhom għall-​futur se jitmermru quddiemhom fl-​akbar qerda li l-​bniedem qatt ġarrab, ‘il-​jum t’Alla.’​—2 Pt. 3:​10-12.

¹³ Mela, kompli ibni ħajtek madwar Alla l-​ħaj, Jehovah, u li tagħmel ir-​rieda tiegħu. M’hemm l-​ebda investiment li tistaʼ tagħmel f’din il-​ħajja, li hu appoġġat minn xi ħadd taʼ min jafdah bħal Jehovah. Hu ma jistax jigdeb​—hu se jwettaq il-​wegħdi tiegħu. (Titu 1:2) Ma jistax imut​—xejn minn dak li taħżen maʼ Jehovah m’hu mitluf. (Ħab. 1:12; 2 Tim. 1:12) Il-​ħajja t’ubbidjenza u fidi li qed nibnu issa hija biss il-​bidu taʼ ħajja li se ddum għall-​eternità fis-​servizz ferrieħi t’Alla tagħna li hu hieni!​—1 Tim. 1:11; 6:19.

[Kumment f’paġna 3]

“Il-​verità m’hijiex

parti minn ħajjitna, hija ħajjitna. L-​affarijiet l-​oħrajn iduru madwarha.”