Qiegħed Int Taħdem bi Skop?

¹ Jehovah hu dak Alla taʼ skop. (Is. 55:​10, 11) Aħna niġu mħeġġin biex nimitawh. (Efes. 5:1) Ċertament li dan għandu jkun muri fil-​mod kif inwettqu l-​ministeru tagħna. Mela l-​mistoqsija addattata hija: “Qiegħed int taħdem bi skop?”

² Il-​fatt li tippriedka minn bieb għal bieb, tagħti xiehda informali, u tqassam il-​letteratura, dan kollu huwa parti minn ministeru bi skop. Imma ftakar li l-​inkarigu tagħna ma jinvolvix biss l-​ippridkar imma wkoll li nagħmlu dixxipli. (Mt. 28:​19, 20) Wara li niżirgħu ż-​żrieragħ tal-​verità tas-​Saltna, ikollna bżonn nerġgħu mmorru biex insaqquhom u nieħdu ħsiebhom regolarment waqt li nħallu f’idejn Jehovah biex iġib iż-​żjieda. (1 Kor. 3:6) Għandna nkunu kuxjenzjużi dwar li nagħmlu żjajjar lura u li nibdew studji tal-​Bibbja.

³ Żid il-​Ministeru Tiegħek: Dejjem tħossok tajjeb meta tħares lura lejn dak li għamilt fis-​servizz u tgħid bejnek u bejn ruħek: “Għamilt dak li kelli f’moħħi li nagħmel.” Bħalma huwa mniżżel fit-​2 Timotju 4:​5, Pawlu ħeġġeġ: “Aqdi sewwa l-​ministeru tiegħek.” Dan jinkludi li żżid l-​isforzi tiegħek biex issegwi l-​interess kollu li ssib. Fl-​iskeda tas-​servizz tiegħek taʼ kull ġimgħa, ippjana ħin definit biex tagħmel iż-​żjajjar lura. Aħdem bil-​mira li tipprova tibda studji tal-​Bibbja maʼ dawk li huma inklinati lejn it-​tajjeb. Dan għandu jkun l-​iskop tiegħek meta tkun qed tieħu sehem fil-​ministeru.

⁴ Staqsi lil xi pubblikaturi kif ħassewhom meta raw lill-​istudenti tagħhom tal-​Bibbja jitgħammdu f’xi assemblea. Huma x’aktarx li ferħu daqs dawk li tgħammdu. Kienu wettqu skop grandjuż! Wieħed li għamel dixxipli esprima ruħu b’dan il-​mod: “Li nagħmel dixxipli jfisser li nagħmel iktar uħud li jfaħħru lil Jehovah. Ifisser ħajja għal dawk li jaċċettaw il-​verità. Jien tgħidx kemm inħobb ngħallem il-​verità lil oħrajn​—veru xi ħaġa sabiħa! . . . Ħafna minn dawk li saru jħobbu lil Jehovah saru ħbieb tassew għeżież għalija.”

⁵ Immaġinak tistaʼ tgħin individwu jsir qaddej dedikat taʼ Jehovah! X’raġuni għal ferħ! Dan il-​frott jirriżulta mill-​fatt li tkun ħdimt bi skop fil-​ministeru.​—Kol. 4:17.