¹ L-​Erbgħa fil-​għaxija, 19 t’April, se tkun l-​iktar ġrajja taʼ interess speċjali fis-​sena taʼ servizz tagħna. Dak in-​nhar, hekk kif tibda nieżla x-​xemx f’post wara l-​ieħor madwar id-​dinja, kull kongregazzjoni u grupp tax-​Xhieda taʼ Jehovah mad-​dinja kollha se jiċċelebraw il-​Mafkar tal-​mewt taʼ Kristu. Ngħixu f’liema parti tad-​dinja ngħixu, bil-​ħinijiet differenti tagħna, li nikkommemoraw is-​sagrifiċċju taʼ Ġesù Kristu se jkun l-​iktar ġrajja taʼ interess speċjali tas-​sena. Id-​data tal-​Mafkar hija mmarkata fix-​xahar t’April fuq il-​kalendarju tas-​Soċjetà għas-​sena 2000.

² Ix-​xahar sħiħ t’April jagħtina opportunità meraviljuża biex nuru b’qalbna kollha l-​apprezzament tagħna għall-​qalb tajba mhix mistħoqqa taʼ Jehovah murija permezz tas-​sagrifiċċju taʼ Ibnu. Kif? L-​appostlu Pawlu kiteb: “L-​imħabba taʼ Kristu ġġegħelna naħsbu dan; li wieħed miet għal kulħadd, mela kulħadd miet. U miet għal kulħadd biex dawk li jgħixu ma jgħixux għalihom infushom, imma għal dak li miet u rxoxta għalihom.” (2 Kor. 5:​14, 15) Iva, matul April aħna nistgħu nuru li m’aħniex qed ngħixu għalina nfusna, imma għal dak li miet għalina, billi dan ix-​xahar nagħmluh l-​aħjar wieħed li qatt kellna bħala ministri tas-​Saltna!

³ Iffirma biex Tkun Pijunier Awżiljarju f’April: L-​appostlu Pawlu tana eżempju li jqanqlilna qlubna meta qal: “Jien lil ħajti xejn ma nqisha għażiża għalija jekk mhux biex intemm il-​mixja tiegħi u l-​ministeru li ħadt mingħand il-​Mulej Ġesù, jiġifieri, li nagħti xhieda taʼ l-​Evanġelju tal-​grazzja taʼ Alla.” (Atti 20:24) Aħna għandna l-​istess privileġġ li nagħtu xiehda tajba dwar Alla Jehovah. Minħabba f’hekk, nixtiequ nagħmlu x-​xahar t’April l-​aħjar wieħed li qatt kellna fl-​attività taʼ pijunier awżiljarju!

⁴ Billi fih ħames Sibtijiet u Ħdud, April 2000 se jkun xahar eċċellenti għal ħafna biex ikunu pijunieri. Lura f’April taʼ l-​1989, meta lħaqna l-​ogħla quċċata li qatt kellna taʼ pijunieri awżiljarji, it-​73 li pparteċipaw kienu jirrappreżentaw 19 fil-​mija tat-​total taʼ pubblikaturi. Għaxar snin wara, it-​total taʼ pubblikaturi li rrapportaw f’April taʼ l-​1999 żdied b’iktar minn 34 fil-​mija. Dan ifisser li għandna potenzjal kbir biex naqbżu l-​quċċata li qatt kellna taʼ pijunieri awżiljarji. Iżjed minn hekk, minn dak in-​nhar ’l hawn il-​ħtieġa tas-​sigħat tnaqqset, u b’hekk dan l-​aspett tas-​servizz sar aċċessibbli għal ħafna iktar fil-​kongregazzjoni. Kull pubblikatur mgħammed għandu jikkunsidra bit-​talb jekk jistax ikun pijunier awżiljarju f’April li ġej.

⁵ Billi tuża x-​xahar t’April fuq il-​kalendarju tas-​Soċjetà għas-​sena 2000, ippjana l-​iskeda tiegħek issa għax-​xahar li ġej. Iddeċiedi f’liema ġranet se tkun tistaʼ tieħu sehem fis-​servizz taʼ l-​għalqa, u għodd is-​sigħat kollha li tħoss li tistaʼ tiddedika għall-​attività taʼ l-​ippridkar matul dan ix-​xahar. Inkludi l-​ħin li tistaʼ tqattaʼ f’li tagħti xiehda lil oħrajn kemm formali kif ukoll informali. It-​total li ġiek joqrob lejn il-​ħtieġa taʼ 50 siegħa għall-​pijunieri awżiljarji? Jekk m’għandekx biżżejjed sigħat, tistaʼ tagħmel xi aġġustamenti oħra fl-​iskeda tiegħek sabiex tixtri l-​ħin biex tkun pijunier awżiljarju? Trid tikkalkula bejn wieħed u ieħor siegħa u 40 minuta kuljum biex tilħaq il-​50 siegħa għal dan ix-​xahar.

⁶ Issa li anki l-​ħtieġa tas-​sigħat tnaqqset wkoll għall-​pijunieri regulari, ħsibt xejn jekk tistax tidħol fil-​ministeru full-time? Għala toqgħod tistenna sas-​sajf biex tibda? Issa li x-​xitwa spiċċat, April jistaʼ jkun xahar mill-​aħjar biex tibda! Jekk m’intix ċert dwar il-​kapaċità tiegħek biex tilħaq il-​ħtieġa taʼ 70 siegħa għall-​pijunieri regulari, għax ma tagħmilx ix-​xogħol taʼ pijunier awżiljarju f’April u tagħmilha mira li tagħmel 70 siegħa? Hekk kif tara li tistaʼ tagħmlu, tkun iktar inklinat li tapplika biex tingħaqad mal-​grupp taʼ pijunieri regulari malajr kemm jistaʼ jkun.—Ara l-​ktieb Our Ministry, paġni 113-14.

⁷ Ħu Sehem Sħiħ Bħala Pubblikatur taʼ l-​Aħbar Tajba: Għalina lkoll, kemm il-​pubblikaturi kif ukoll il-​pijunieri, l-​imħabba ġenwina għal Alla u għal ġarna tqanqalna biex nagħmlu b’ruħna kollha kulma nistgħu fis-​servizz taʼ Jehovah skond iċ-​ċirkustanzi persunali tagħna. (Lq. 10:27) B’hekk, aħna nuru li “nitħabtu u nitqabdu, għax it-​tama tagħna hi f’Alla l-​ħaj, li hu s-​Salvatur tal-​bnedmin kollha, l-​aktar taʼ dawk li jemmnu.” (1 Tim. 4:10) Huwa għalhekk li aħna qed nistennew li naraw 100 fil-​mija tal-​parteċipazzjoni f’April, billi kulħadd jieħu sehem sħiħ fix-​xogħol tas-​Saltna.

⁸ Ejja ma ninsewx it-​twissija taʼ Ġesù: “Il-​ħsad huwa kbir, iżda l-​ħaddiema ftit. Itolbu mela lil Sid il-​ħsad biex jibgħat ħaddiema għall-​ħsad tiegħu.” Eżatt wara li qal dan, Ġesù sejjaħ lit-​12-il appostlu tiegħu u bagħathom jippridkaw. (Mt. 9:​37, 38; 10:​1, 5, 7) Madwar sena wara, meta t-​12 kienu mrawmin fl-​attività taʼ l-​ippridkar, Ġesù “għażel tnejn u sebgħin oħra u bagħathom,” billi tahom l-​istess istruzzjonijiet: “Il-​ħsad huwa kbir. . . . Itolbu mela lil Sid il-​ħsad biex jibgħat ħaddiema għall-​ħsad tiegħu.” (Lq. 10:​1, 2) Il-​ktieb Bibliku taʼ Atti jirrapporta kif Jehovah wieġeb dak it-​talb. Sa Pentekoste tat-​33 E.K., l-​għadd tad-​dixxipli kiber għal madwar 120. Imbagħad, intlaħqet quċċata taʼ 3,000 dixxiplu u warajha eżatt dik taʼ 5,000 dixxiplu. (Atti 1:15; 2:41; 4:4) Wara dan, l-​għadd taʼ dixxipli baqaʼ jiżdied. (Atti 6:7) Bl-​istess mod, fiż-​żmien preżenti, aħna rridu nibqgħu nitolbu lill-​Imgħallem għal iktar predikaturi tas-​Saltna! Fi qbil mat-​talb tagħna, kull pubblikatur fil-​kongregazzjoni għandu jagħmel arranġamenti definiti biex jipparteċipa fil-​ministeru kull xahar.

⁹ Jekk jogħġbok agħti ħarsa mill-​qrib lejn April fuq il-​kalendarju tas-​Soċjetà għas-​sena 2000. Peress li l-​ewwel jumejn tax-​xahar huma s-​Sibt u l-​Ħadd, tistaʼ tagħmel pjanijiet biex tieħu sehem fis-​servizz f’dak it-​tmiem il-​ġimgħa, billi tibda kmieni fix-​xahar? Tistaʼ tappoġġa kull “Ġurnata tar-​Rivisti” matul ix-​xahar mal-​grupp taʼ l-​Istudju tal-​Ktieb tal-​Kongregazzjoni tiegħek? Xi ngħidu jekk tqattaʼ siegħa jew iktar kull nhar taʼ Ħadd fil-​ministeru? Grazzi għall-​fatt li l-​ġurnata se titwal, se jdum iktar ma jidlam. Tistaʼ tirranġa biex tieħu sehem f’xi għoti taʼ xiehda fil-​għaxija? U tinsiex biex tieħu vantaġġ mill-​opportunitajiet kollha li għandek biex tagħti xiehda informali fuq ix-​xogħol, fl-​iskola, jew waqt li tkun qed tagħmel xi attivitajiet oħrajn taʼ kuljum. Immarka l-​ġranet li fihom tistaʼ tqattaʼ ftit ħin fil-​ministeru, u uża l-​kalendarju biex iżżomm rekord tal-​ħin tiegħek fis-​servizz għal dan ix-​xahar.

¹⁰ April se jkun żmien opportun għal dawk kollha li huma kwalifikati u li ġew approvati mill-​anzjani biex jibdew jaqdu bħala pubblikaturi mhux mgħammdin. Jekk qed tistudja l-​Bibbja maʼ xi ħadd, ipprogressa biżżejjed biex ikun jistaʼ javviċina lill-​indokratur li jippresiedi biex jitlob li jiġi kunsidrat bħala pubblikatur taʼ l-​aħbar tajba? Jekk għandek tfal mhux mgħammdin, iddiskutejt il-​progress spiritwali tagħhom maʼ l-​anzjani? Ma jkunx dan żmien tajjeb għalihom biex jibdew jieħdu sehem fix-​xogħol tax-​xandir?—Ara l-​ktieb Our Ministry, paġni 97-100.

¹¹ Fl-​isforz tagħna biex nagħmlu x-​xahar t’April 2000 l-​aħjar wieħed li qatt kellna, ilkoll kemm aħna għandna bżonn nieħdu sehem fil-​ministeru u mbagħad nitfgħu r-​rapport tagħna tas-​servizz taʼ l-​għalqa malli jispiċċa x-​xahar. (Qabbel Mark 6:30.) Il-​pubblikaturi ġodda mhux mgħammdin li jieħdu sehem fis-​servizz taʼ l-​għalqa għall-​ewwel darba għandhom jiġu inkuraġġiti biex jirrapportaw l-​attività tagħhom fil-​ħin. Billi nagħmlu l-​parti tagħna, aħna nistgħu nagħtu kontribut mill-​aħjar għar-​rapport t’April u għall-​għajta kbira taʼ tifħir li se tiġi offruta lil Jehovah permezz taʼ l-​isforzi tagħna biex nagħtu xiehda.

¹² Ġib lil Oħrajn Miegħek għall-​Mafkar: Ma tkunx xi ħaġa kommoventi li naraw quċċata ġdida fl-​attendenza għall-​Mafkar tal-​mewt taʼ Kristu fl-​2000? Iva! Dan ikun ifisser li iktar nies minn qatt qabel inġabru flimkien biex juru l-​apprezzament tagħhom għall-​akbar espressjonijiet taʼ mħabba li Alla Jehovah u Ġesù Kristu wrew għalina! (Ġw. 3:16; 15:13) Agħmel l-​arranġamenti kollha meħtieġa sabiex xejn ma jtellef lilek u lill-​familja tiegħek milli tattendu għall-​Mafkar.

¹³ Issa huwa ż-​żmien ukoll biex tibda tistieden lil oħrajn għall-​Mafkar. Agħmel lista taʼ kulmin tixtieq li jattendi. Inkludi lil kulmin studja l-​Bibbja fil-​passat, dawk li qed jistudjaw issa, u ż-​żjajjar lura kollha li għandek. Żid mal-​lista tiegħek lil dawk kollha li taf fuq ix-​xogħol, fl-​iskola, u l-​ġirien, kif ukoll lil dawk li għandek xi negozju magħhom. Tinsiex tinkludi lil oħrajn li taf u lill-​qraba tiegħek. Wara li tlesti l-​lista, ibda stieden personalment u bis-​serjetà lil kull wieħed u waħda minnhom. Spjegalhom ċar meta u fejn se jinżamm il-​Mafkar. Hekk kif id-​19 t’April joqrob, lil dawk fil-​lista erġaʼ fakkarhom, jew personalment jew bit-​telefon. Offrilhom biex dakinhar jiġu miegħek għall-​Mafkar.

¹⁴ Fi qbil mad-​direzzjoni li diġà tat is-​Soċjetà, il-​ġemgħa taʼ l-​anzjani se tagħmel sforz speċjali biex tinkuraġġixxi lill-​pubblikaturi inattivi kollha fit-​territorju biex jattendu għall-​Mafkar. (Mt. 18:​12-14) L-​anzjani jkunu jridu jirrevedu l-​ittra tas-​Soċjetà tat-​2 taʼ Frar, 1999. Is-​segretarju tal-​kongregazzjoni għandu jagħmel lista tal-​pubblikaturi inattivi kollha, u l-​indokratur tas-​servizz jinkariga lill-​anzjani biex iċemplulhom u jistidnuhom għall-​Mafkar. Forsi billi jirċievu żjara pastorali inkuraġġanti malajr kemm jistaʼ jkun, dawn l-​uħud inattivi jistgħu jiġu megħjunin biex jerġgħu jsiru attivi fil-​ministeru taʼ l-​għalqa, saħansitra matul April. Li jiġu mistidnin biex jieħdu sehem maʼ pubblikatur bl-​esperjenza fis-​servizz taʼ l-​għalqa se jibnihom mill-​ġdid.

¹⁵ Inkuraġġixxi Appoġġ Tajjeb għal April! Dan jirrikjedi koordinazzjoni tajba min-​naħa taʼ l-​anzjani, il-​qaddejja ministerjali, u l-​kapijiet tal-​familji kollha biex nagħmlu x-​xahar t’April 2000 l-​aħjar wieħed li qatt kellna. L-​anzjani se jkunu diliġenti f’li jkollhom kollox organizzat tajjeb u f’li jieħdu t-​tmexxija. (Lhud 13:7) Hemm bżonn li jsiru arranġamenti prattiċi għal-​laqgħat tas-​servizz taʼ l-​għalqa matul il-​ġimgħa u fi tmiem il-​ġimgħa. Laqgħat tas-​servizz oħrajn jistgħu jiġu rranġati għall-​attività tard wara nofs in-​nhar u kmieni fil-​għaxija. Skeda sħiħa taʼ dak kollu pjanat għal April għandha titwaħħal man-​notice board. Għandu jiġi inkarigat xi ħadd biex jieħu ħsieb kull laqgħa tas-​servizz li jkun hemm fl-​iskeda. Għandu jiġi provdut biżżejjed territorju sabiex jintlaħqu l-​bżonnijiet taʼ kull grupp.

¹⁶ Matul April se jiġu offruti t-​Torri taʼ l-​Għassa u Stenbaħ! Fi sforz biex jinbdew studji tal-​Bibbja fid-​djar, għandu jiġi offrut il-​browxer X’Jirrikjedi lil dawk kollha li juru interess. Għaldaqstant, għandhom jiġu provduti biżżejjed rivisti u browxers.

¹⁷ Fl-​aħħar tax-​xahar, dawk kollha li jikkonduċu l-​istudju tal-​ktieb u l-​assistenti tagħhom iridu jinkuraġġixxu lil kull wieħed fil-​grupp tagħhom biex jitfaʼ r-​rapport tas-​servizz eżatt kif jispiċċa x-​xahar. Forsi dan jistaʼ saħansitra jsir il-​Ħadd, 30 t’April. Imbagħad, meta s-​segretarju jgħodd ir-​rapporti, jekk jinnota li xi pubblikaturi ma jkunux għadhom tefgħuh, hu b’qalb tajba jkun jistaʼ jfakkarhom biex jitfgħuh qabel is-​6 taʼ Mejju, meta jkun irid jibgħat ir-​rapport tal-​kongregazzjoni lis-​Soċjetà. Hu jistaʼ jistaqsi lil dawk li jikkonduċu l-​istudju tal-​ktieb biex jgħinuh jikkuntattja lill-​pubblikaturi individwali.

¹⁸ L-​istaġun tal-​Mafkar huwa l-​iktar perijodu importanti tas-​sena għall-​poplu t’Alla. Għandu jkun żmien fejn ilkoll kemm aħna jkollna ħafna x’nagħmlu fis-​servizz taʼ Jehovah. Dan se jkun hekk jekk kulħadd jieħu sehem bis-​sħiħ kemm jistaʼ bħala pubblikatur taʼ l-​aħbar tajba, u dawk li jistgħu, ikunu pijunieri awżiljarji. Se jkun hekk ukoll jekk aħna nagħmlu ħilitna f’li nġibu lil oħrajn magħna għall-​Mafkar tal-​mewt taʼ Kristu. Ejja nitolbu bil-​ħerqa għall-​barka abbundanti taʼ Jehovah hekk kif inħabirku biex nagħmlu x-​xahar t’April 2000 l-​aħjar wieħed li qatt kellna, kollu għat-​tifħir u l-​glorja t’Alla!—Lhud 13:15.

[Kaxxa f’paġna 3]

Pijunieri Awżiljarji

L-​Ogħla Quċċata li qatt Kellna: 73

(April 1989)

[Kaxxa f’paġna 4]

Total taʼ Pubblikaturi

L-​Ogħla Quċċata li qatt Kellna: 552

(Mejju 1998)

[Kaxxa f’paġna 5]

Attendenza għall-​Mafkar

L-​Ogħla Quċċata li qatt Kellna: 901

(1999)