“Għal Alla Kollox Jistaʼ Jkun”
1 Ix-xogħol ewlieni tal-kongregazzjoni Kristjana hu li xxandar il-messaġġ tas-Saltna mad-dinja kollha. (Mt. 24:14) Din hija biċċa xogħol immensa. Għal ħafna minn dawk li josservawna, dan l-inkarigu jidher li jirrikjedi ħafna iktar riżorsi milli għandna. Oħrajn ma jistgħu jifhmu bl-ebda mod kif inwettqu dan l-inkarigu, għax aħna suġġetti għat-twaqqigħ għaċ-ċajt, l-oppożizzjoni, u l-persekuzzjoni. (Mt. 24:9; 2 Tim. 3:12) Ix-xettiċi huma konvinti li dan ix-xogħol huwa impossibbli li jitwettaq. Imma Ġesù qal: “Għal Alla kollox jistaʼ jkun.”—Mt. 19:26.
2 Eżempji Tajbin li Jaqblilna Nimitawhom: Ġesù beda l-ministeru tiegħu bħala raġel wieħed kontra d-dinja kollha. Biex ifixkluh milli jirnexxi, dawk li jopponu ttrattawh bl-iktar mod umiljanti li wieħed jistaʼ jimmaġina, sakemm tawh mewta agonizzanti. Madankollu, fl-aħħar, Ġesù b’mod konvint iddikjara: “Jiena rbaħt id-dinja!” (Ġw. 16:33) Wettaq l-inkarigu tiegħu b’mod verament taʼ l-għaġeb!
3 Id-dixxipli taʼ Ġesù wrew l-istess spirtu taʼ kuraġġ u żelu fil-ministeru Kristjan. Ħafna minnhom ngħataw daqqiet bil-frosta, ġew imsawtin, mitfugħin il-ħabs, u saħansitra maqtulin. Madankollu, huma kienu “ferħana talli ġew meqjusa bħala nies li jistħoqqilhom li jkunu mmaqdra minħabba l-isem taʼ Ġesù.” (Atti 5:41) Minkejja li kien hemm ħafna affarijiet kontra tagħhom, xorta wettqu l-inkarigu, li kien jidher impossibbli, taʼ li jxandru l-aħbar tajba “sa truf l-art.”—Atti 1:8; Kol. 1:23.
4 Kif Nistgħu Nirnexxu fi Żmienna: Aħna wkoll qed inwettqu x-xogħol taʼ l-ippridkar tas-Saltna b’żelu avolja niffaċċjaw ħafna affarijiet li jagħmluh jidher impossibbli li jsir. Minkejja l-projbizzjonijiet, il-persekuzzjoni, it-tfigħ fil-ħabs, u l-attentati vjolenti oħrajn biex iwaqqfuna, aħna qed nirnexxu. Dan kif jistaʼ jkun? “La bil-ħila u lanqas bil-qawwa, imma bl-ispirtu tiegħi, qal il-Mulej taʼ l-eżerċti.” (Żak. 4:6) La għandna lil Jehovah magħna, xejn ma jistaʼ jwaqqfilna xogħolna!—Rum. 8:31.
5 Meta nxandru, m’għandniex għalfejn nistħu jew nibżgħu jew inħossuna li m’aħniex kapaċi. (2 Kor. 2:16, 17) Aħna għandna l-iktar raġunijiet sodi għalxiex nagħfsu ’l quddiem biex inxerrdu l-aħbar tajba tas-Saltna. Bl-għajnuna taʼ Jehovah, aħna se nwettqu “dak li ma jistax ikun”!—Lq. 18:27.