Il-​Ministeru Kristjan—Ix-​Xogħol Prinċipali Tagħna

¹ Ilkoll kemm aħna għandna diversi tipi taʼ xogħol li rridu nagħmlu. Li nipprovdu għall-​familja hija ħtieġa mingħand Alla. (1 Tim. 5:8) Madankollu, ix-​xogħol involut f’dik il-​ħtieġa mingħand Alla m’għandux ikun iktar importanti mix-​xogħol taʼ l-​ippridkar tas-​Saltna u taʼ li nagħmlu dixxipli.—Mt. 24:14; 28:​19, 20.

² Ġesù ħallielna eżempju xi nsegwu biex infittxu “l-​ewwel is-​Saltna.” (Mt. 6:33; 1 Pt. 2:21) Għalkemm kellu ftit materjalment, kien konċentrat għalkollox fuq li jagħmel ir-​rieda taʼ Missieru. (Lq. 4:43; 9:58; Ġw. 4:34) Hu tħabat biex jagħti xiehda f’kull opportunità. (Lq. 23:43; 1 Tim. 6:13) Hu ħeġġeġ lid-​dixxipli tiegħu biex ikollhom l-​istess interess qawwi fix-​xogħol tal-​ħsad.—Mt. 9:​37, 38.

³ Nimitaw lil Ġesù Llum: Nistgħu nimitaw l-​eżempju taʼ Ġesù billi nistinkaw ħalli ngħixu ħajja sempliċi li tiċċentra fuq il-​ministeru Kristjan. Jekk għandna n-​neċessitajiet tal-​ħajja, ejja nagħtu kas il-​parir tal-​Bibbja biex ma nkomplux nakkwistaw iktar u iktar mill-​ġid taʼ din id-​dinja. (Mt. 6:​19, 20; 1 Tim. 6:8) Kemm ikun aħjar li nfittxu li jkollna sehem akbar fix-​xogħol taʼ l-​ippridkar! Jekk niffaċċjaw ċirkustanzi diffiċli, jalla nitħabtu bħalma għamel Ġesù, u ma nħallux l-​ansjetajiet tal-​ħajja jsiru iktar importanti mix-​xogħol prinċipali tagħna taʼ li niddikjaraw l-​aħbar tajba tas-​Saltna.—Lq. 8:14; 9:​59-62.

⁴ Anki dawk b’ħafna responsabbiltajiet jagħtu l-​prijorità lix-​xogħol taʼ l-​ippridkar. Ħu li għandu familja kbira, xogħol taʼ responsabbiltà, u jaqdi bħala anzjan fil-​kongregazzjoni Kristjana jgħid: “Inħares lejn il-​ministeru bħala l-​karriera tiegħi.” Oħt pijuniera tgħid: “Ix-​xogħol taʼ pijunier jiswa ħafna iktar minn karriera sekulari taʼ suċċess.”

⁵ Huma x’inhuma ċ-​ċirkustanzi tagħna, jalla nsegwu l-​eżempju taʼ Ġesù. Kif? Billi nagħmlu l-​ministeru Kristjan ix-​xogħol prinċipali tagħna.