Jistgħu t-​Tfal Tiegħek Jieħdu Deċiżjoni Matura?

¹ Deċiżjoni matura dwar xiex? It-​trasfużjonijiet tad-​demm. Bħalma ntwera fl-​artiklu “Imxi Kif Istruwit Minn Jehovah” fit-​Torri taʼ l-​Għassa tal-​15 taʼ Settembru, 1991, xi tfal tax-​Xhieda taʼ Ġeħova kellhom jieħdu waqfa matura biex jagħtu prova li x-​xewqa tagħhom li jobdu l-​liġi t’Alla dwar id-​demm hija importanti għalihom daqskemm hi għall-​ġenituri tagħhom. Jistaʼ jkun li t-​tifel jew it-​tifla minorenni tiegħek ikollha tagħmel l-​istess ħaġa?

² Il-Liġi X’Tgħid? F’Malta u l-​Britannja, il-​Qrati taw permess lit-​tobba biex jagħtu kwalunkwe kura medika li jkun hemm bżonn jekk huma jemmnu li hi neċessarja biex issalva l-​ħajja tat-​tifel jew it-​tifla. Minkejja dan, l-​awtoritajiet mediċi jaqblu li għandhom jisimgħu l-​opinjoni tal-​minorenni. L-​Assoċjazzjoni Medika Britannika qalet hekk: “Bħal fil-​każi kollha meta tiġi rifjutata kura, jekk il-​pazjenti huma kompetenti, informati, u ċerti mid-​deċiżjoni tagħhom li jirrifjutaw id-​demm, hemm argumenti etiċi importanti biex id-​deċiżjoni tiġi rispettata. . . . Meta jippermetti ż-​żmien, għandu jkun hemm diskussjoni dettaljata mal-​minorenni u l-​familja tiegħu biex kulħadd ikun jistaʼ jifhem sew is-​sitwazzjoni. . . . Ikun tajjeb jekk il-​professjonisti tas-​saħħa jiddiskutu s-​sitwazzjoni mal-​minorenni waħdu biex ikunu ċerti li saret deċiżjoni valida mingħajr ebda pressjoni.” F’ħafna każi, wara li t-​tabib ikun semaʼ lill-​minorenni jesprimi l-​opinjoni persunali, ċara, u persważiva tiegħu, hu jaqbel li jagħmel l-​operazzjoni serja u jagħżel li jagħmel l-​almu tiegħu biex jevita li juża d-​demm.

³ Kieku X’Jgħidu t-​Tfal Tagħkom? Kapaċi t-​tfal tiegħek jesprimu lilhom infushom dwar din il-​kwistjoni? Jemmnu b’qalbhom kollha li huwa kmand divin biex ‘jitbiegħdu mid-​demm’? (Atti 15:29; 21:25) Jistgħu jispjegaw it-​twemmin tagħhom mill-​Iskrittura? Ikunu huma lesti li jiddefendu b’kuraġġ id-​deċiżjoni soda tagħhom dwar id-​demm jekk it-​tobba jkunu tal-​fehma li ħajjithom qiegħda fil-​periklu, anki jekk il-​ġenituri tagħhom ma jkunux preżenti? Ladarba “f’kollox jidħol iż-​żmien u ċ-​ċirkustanzi,” kif tistaʼ tipprepara lil uliedek għal kwalunkwe sfida mhix mistennija taʼ l-​integrità tagħhom?​—Koħ. 9:11; Efes. 6:4.

⁴ Ġenituri, X’Tistgħu Tagħmlu? Intom għandkom ir-​responsabbiltà li tgħallmu lil uliedkom dwar il-​ħarsa t’Alla lejn id-​demm. (2 Tim. 3:​14, 15) Spjegazzjoni ċara tinsab fil-​ktieb Reasoning, paġni 70-4. Studjaha bir-​reqqa mal-​familja tiegħek. Uża s-​sezzjoni “If Someone Says—” (Jekk Xi Ħadd Jgħid—) f’paġni 74-6, u ikkonduċi sessjonijiet taʼ prattika maʼ wliedek biex tgħinhom jiksbu esperjenza dwar kif jispjegaw dak li jemmnu u għala. (1 Pt. 3:15) Provvedimenti oħra biex jedukawna dwar il-​kwistjoni tad-​demm jinkludu l-​browxer Id-​Demm Kif Jistaʼ Jsalvalek Ħajtek? u t-​Torri taʼ l-​Għassa tal-​15 taʼ Ġunju, 2004, paġni 14-24. Flimkien maʼ dan, il-​programmi fuq vidjos Transfusion-Alternative Health Care​—Meeting Patient Needs and Rights u No Blood​—Medicine Meets the Challenge, li huma disponibbli fuq id-​DVD intitolat Transfusion Alternatives​—Documentary Series, jagħtu informazzjoni konvinċenti dwar kemm il-​mediċina u l-​kirurġija mingħajr demm huma raġunevoli u effettivi. Rajtu u ddiskutejtu dawn il-​preżentazzjonijiet bħala familja reċentement?

⁵ Għin lil uliedek ‘jagħtu prova lilhom infushom dwar x’inhi r-​rieda tajba u aċċettabbli u perfetta t’Alla’ rigward id-​demm. Imbagħad, huma jkunu jistgħu jieħdu deċiżjoni matura li jkollha l-​barka taʼ Ġeħova.​—Rum. 12:2.

[Mistoqsijiet taʼ Studju]

1. Liema waqfa ħadu xi żgħażagħ li huma Xhieda rigward l-​użu tad-​demm? Agħti eżempju.

2. Il-minorenni x’jistgħu jagħmlu biex jevitaw trasfużjoni tad-​demm?

3. Liema mistoqsijiet għandhom il-​ġenituri jikkunsidraw bis-​serjetà, u għala?

4, 5. (a) Liema responsabbiltà għandhom il-​ġenituri, u kif jistgħu jwettquha? (b) Liema provvedimenti huma disponibbli biex jgħinu lill-​ġenituri?