Il-​Preparazzjoni—Fundamentali għal Żjajjar Lura Effettivi

1. Il-​ministeru Kristjan tal-​bidu b’liema mod kellu jinfirex?

¹ Ġesù ħejja għalkollox lid-​dixxipli tiegħu biex ikunu predikaturi effettivi taʼ “l-​aħbar tajba tas-​saltna.” (Mt. 4:23; 9:35) Ġesù ħarriġhom waqt li kien qed jippriedka fil-​Palestina biss. Madankollu, qabel ma telaʼ s-​sema, Ġesù wera li l-​ministeru Kristjan tant kien se jinfirex li kien se jkun hemm “dixxipli min-​nies tal-​ġnus kollha.”—Mt. 28:19, 20.

2. X’inhu involut biex wieħed jobdi l-​kmand li ‘jagħmel dixxipli’?

² Dan ix-​xogħol kien se jinvolvi li jsiru żjajjar lura għand individwi li jkunu wrew interess fl-​aħbar tajba tas-​Saltna t’Alla u jiġu mgħallmin josservaw dak kollu li ordna Kristu. Biex nagħmlu żjajjar lura effettivi bħal dawn irridu nkunu preparati sew.

3. Kif tistaʼ twitti t-​triq għal żjara lura, anki fuq l-​ewwel żjara?

³ Ippjana bil-​Quddiem: Xi pubblikaturi jistinkaw biex iqajmu mistoqsija qabel ma jitilqu mill-​ewwel żjara, u mbagħad iwiegħdu li jerġgħu lura u jiddiskutu t-​tweġiba. Huma sabu li meta jirreferu għall-​informazzjoni fil-​ktieb Il-​Bibbja X’Tgħallem? fuq iż-​żjara lura, huma ġew megħjunin biex jibdew studju tal-​Bibbja mill-​ewwel.

4. Għala m’għandniex nistennew il-​ħarġiet il-​ġodda tar-​rivisti qabel ma nagħmlu żjara lura?

⁴ Il-​fatt li nirċievu sett wieħed taʼ rivisti kull tliet xhur ma jfissirx li għandna nistennew il-​ħarġiet tar-​rivisti li jmiss qabel immorru lura. Forsi jkun possibbli li tqanqal l-​interess billi tiddiskuti l-​informazzjoni li tinsab fir-​rivista li diġà għandu l-​individwu.

5. Kif inhu taʼ benefiċċju li jkollok mira meta tagħmel żjara lura?

⁵ Agħmel Mira: Qabel tmur lura, ħu ftit minuti biex tirrivedi n-​noti tiegħek dwar l-​individwu u tiddetermina dak li trid twettaq. Per eżempju, tistaʼ tiddiskuti punt mill-​pubblikazzjoni li diġà ħallejtlu. Jew ħallilu letteratura oħra li titkellem dwar suġġett li ddiskutejtu qabel. Jekk fl-​aħħar żjara qajjimt mistoqsija, żgur li se tkun trid twieġeb dik il-​mistoqsija. Stinka biex taqra direttament mill-​Bibbja meta tkun qed tenfasizza skrittura li tappoġġa l-​punt tiegħek.

6. X’inhi l-​mira tagħna meta nagħmlu żjajjar lura?

⁶ Il-​Mira Tagħna: M’għandniex xi ngħidu, il-​mira tagħna hi li nibdew studju tal-​Bibbja. Wieħed ħu offra studju tal-​Bibbja fiż-​żjara lura, imma r-​raġel irrifjuta. Il-​ħu mar lura bir-​rivisti taʼ l-​aħħar u qal, “Waqt li qegħdin hawn illum, qed inwieġbu lin-​nies mistoqsija waħda mill-​Bibbja.” Wara li semaʼ l-​kumment tar-​raġel, il-​ħu qara skrittura u paragrafu dwar is-​suġġett minn pubblikazzjoni li tintuża għall-​istudji tal-​Bibbja. Dan wassal għal studju regulari tal-​Bibbja.

7. Il-​preparazzjoni tajba kif għenitek biex tibda studju tal-​Bibbja?

⁷ L-​isforz li nagħmlu biex nieħdu l-​ħin ħalli nippreparaw għaż-​żjajjar lura huwa tassew siewi. Il-​ferħ tagħna se jiżdied, u jistaʼ jkollna l-​privileġġ li ngħinu lil min għandu “attitudni xierqa” biex jaqbad it-​triq għall-​ħajja.—Atti 13:48.