Ngħinu lil Dawk li Għadhom Mhumiex Lesti għall-​Ktieb Il-​Bibbja X’Tgħallem?

1. Il-​ktieb Il-​Bibbja X’Tgħallem? se jolqot lil kulħadd mill-​ewwel? Spjega.

¹ Sabiex xi ħadd isir aduratur taʼ Ġeħova, għandu jsir jaf x’tgħallem il-​Bibbja. Madankollu, xi wħud mhumiex Kristjani u ma jikkunsidrawx il-​Bibbja bħala l-​Kelma t’Alla. Oħrajn ma jemmnux f’Alla u ma jirrispettawx il-​Bibbja. Liema pubblikazzjonijiet urew li kienu utli għal dawk li għall-​ewwel ma jkunux lesti jaċċettaw il-​ktieb Il-​Bibbja X’Tgħallem? Is-​suġġerimenti li se naraw huma bbażati fuq il-​kummenti taʼ pubblikaturi minn xi 20 pajjiż differenti.

2. Jekk xi ħadd jgħid li ma jemminx f’Alla, x’għandna nipprovaw insiru nafu, u għala?

² Dawk li Ma Jemmnux f’Alla: Jekk xi ħadd jgħid li ma jemminx f’Alla, ikun tajjeb li ssir taf għala. Huwa minħabba li jemmen fl-​evoluzzjoni? Tilef hu l-​fidi f’Alla minħabba l-​inġustizzji fid-​dinja jew l-​ipokrisija li hemm fir-​reliġjonijiet? Ġej minn pajjiż li ma jridux in-​nies jemmnu f’Alla? Forsi ma jiċħadx għal kollox l-​eżistenza t’Alla, imma qatt ma ħass il-​bżonn biex jemmen fih. Ħafna pubblikaturi sabu li meta jistaqsu, “Dejjem ħassejtek hekk?” l-​individwu jkun lest jispjega. Ismaʼ u taqbiżx fin-​nofs. Meta nifhmu għala l-​individwu ma jemminx f’Alla, se nkunu nafu kif inwieġbu u liema pubblikazzjoni għandna noffru.—Prov. 18:13.

3. Kif nistgħu nuru rispett lejn dak li jkun u t-​twemmin tiegħu?

³ Meta twieġeb, oqgħod attent li dak li jkun ma jħossx li qed tattakka l-​opinjoni tiegħu. Dan is-​suġġeriment ġej mill-​Istati Uniti: “Huwa importanti ħafna li tirrispetta l-​libertà persunali tal-​individwi li jiddeċiedu x’jemmnu. Minflok ma tipprova tirbaħ l-​argumenti, ikun aħjar li tagħmel mistoqsijiet biex in-​nies jaħsbu u jaslu għall-​konklużjonijiet tagħhom stess.” Wara li jismaʼ lill-​inkwilin jesprimi l-​ħsibijiet tiegħu, indokratur li jivvjaġġa spiss jintroduċi t-​tweġiba tiegħu billi jistaqsi: “Ġieli kkunsidrajt dan bħala possibbiltà?”

4. Kif nistgħu ngħinu lil dawk li huma Buddisti?

⁴ L-​idea li jeżisti Alla hi xi ħaġa ġdida għal ħafna Buddisti. Xi pubblikaturi fil-​Britannja jħobbu jużaw il-​browxer Lasting Peace and Happiness—How to Find Them meta jagħtu xhieda lil uħud bħal dawn. Wara li jikkunsidraw l-​introduzzjoni, jiddiskutu s-​sezzjoni “Is There Really a Most High Creator?” u mbagħad is-​sezzjoni “A Guidebook for the Blessing of All Mankind.” Wara dan, huma forsi jistgħu joffru l-​ktieb Il-​Bibbja X’Tgħallem? u jgħidu lill-​inkwilin, “Anki jekk ma temminx f’Alla, li tistudja l-​Bibbja hu taʼ benefiċċju għax fiha ħafna pariri prattiċi.” Pijunier fl-​Istati Uniti li jaqdi fit-​territorju tal-​lingwa Ċiniża qal: “Ħafna fit-​territorju tagħna jħobbu jaqraw. Għalhekk, spiss jaqraw il-​pubblikazzjoni kollha sakemm nerġgħu nżuruhom. Imma huma forsi ma jifhmux l-​idea taʼ studju tal-​Bibbja. Allura nħobb noffri l-​browxer Aħbar Tajba fl-​ewwel żjara għax hu miktub b’tali mod li jinkuraġġixxi diskussjoni.” Indokratur li jżur il-​kongregazzjonijiet u li jaqdi fit-​territorju tal-​lingwa Ċiniża fl-​Istati Uniti jgħid li huwa possibbli li tuża l-​ktieb Il-​Bibbja X’Tgħallem? fl-​ewwel żjara. Madankollu, ikun aħjar jekk tibda l-​istudju minn kapitlu 2 li jispjega dwar il-​Bibbja, minflok minn kapitlu 1 li jitkellem dwar Alla.

5. Il-​paċenzja għala hi importanti?

⁵ Jieħu ż-​żmien biex xi ħadd jibni l-​fidi f’Alla, għalhekk il-​paċenzja hi vitali. L-​ewwel konversazzjonijiet tagħna għandhom mnejn ma jqanqlux lil dak li jkun biex jaqbel magħna li jeżisti Ħallieq. Imma forsi maż-​żmien jirrikonoxxi li jistaʼ jkun possibbli, jew forsi jgħid li jifhem għala xi wħud jaslu għal dik il-​konklużjoni.

6. Għala xi nies għandhom mnejn ma tantx jinteressaw ruħhom fil-​Bibbja?

⁶ Dawk li Ma Tantx Għandhom Interess jew Fiduċja fil-​Bibbja: Madankollu, spiss, xi ħadd li jirrikonoxxi li forsi jeżisti Alla ma jkunx interessat f’dak li tgħallem il-​Bibbja għax ma jemminx li hi l-​Kelma t’Alla. Forsi hu jgħix f’pajjiż mhux Kristjan u jassoċja l-​Bibbja mal-​Kristjaneżmu. Jew forsi jgħix f’pajjiż fejn in-​nies jgħidu li huma Kristjani imma huma materjalisti ħafna u ma jaħsibx li l-​Bibbja se tkun utli għalih. Kif nistgħu ngħinu lil uħud bħal dawn biex jibdew jinteressaw ruħhom fil-​Bibbja u eventwalment jaċċettaw studju mill-​ktieb Il-​Bibbja X’Tgħallem?

7. Spiss, x’inhu mod tajjeb kif tqanqal l-​interess fil-​Bibbja?

⁷ L-​uffiċċju tal-​fergħa fil-​Greċja kiteb: “L-​aħjar mod biex tgħin lil dawk li ma tantx għandhom interess fil-​Bibbja hu billi sempliċement tiftaħ il-​Bibbja u turihom x’fiha. Ħafna pubblikaturi nnotaw li l-​messaġġ tal-​Bibbja jħalli iktar effett fuq qalb dak li jkun minn kwalunkwe ħaġa li jistgħu jgħidu huma. (Ebr. 4:12) Il-​fatt li raw l-​isem t’Alla fil-​Bibbja, għen lil ħafna jiżviluppaw xewqa biex ifittxu fil-​Bibbja.” L-​uffiċċju tal-​fergħa fl-​Indja kiteb: “Il-​verità dwar il-​ħajja u l-​mewt verament tiġbed lil ħafna li huma Ħindu—hekk ukoll il-​wegħda tal-​Bibbja li se jkun hemm dinja mingħajr diskriminazzjoni kontra l-​klassijiet soċjali.” Meta l-​pubblikaturi jitkellmu dwar dak li jinkwieta lin-​nies tal-​lokal, spiss ikollhom opportunità juru x’tgħid il-​Bibbja dwar x’se tagħmel is-​Saltna t’Alla biex tirranġa l-​affarijiet.

8. X’nistgħu ngħidu lil dawk li għandhom ħarsa negattiva lejn il-​Bibbja minħabba l-​Kristjaneżmu?

⁸ Jekk xi ħadd għandu ħarsa negattiva lejn il-​Bibbja minħabba l-​Kristjaneżmu, għidlu li l-​Kristjaneżmu rrappreżenta ħażin il-​Bibbja u t-​tagħlim tagħha. L-​uffiċċju tal-​fergħa tal-​Indja kiteb: “Xi kultant ikollna bżonn ngħinu lil individwi jaraw li l-​Bibbja mhijiex tal-​knejjes biss.” L-​uffiċċju qal li l-​Ħindu spiss jibqgħu impressjonati bis-​sezzjoni 4 tal-​browxer X’Inhu l-​Iskop tal-​Ħajja? Kif Tistaʼ Ssibu? li jispjega kif il-​knejjes ipprovaw iħassru u jeqirdu l-​Kelma t’Alla. Pijunier fil-​Brażil jgħid lin-​nies: “Għala ma ssirx taf iktar x’fiha l-​Bibbja? Ħafna qed jagħmlu dan b’moħħ miftuħ u mingħajr ma jħossuhom obbligati li jissieħbu maʼ xi reliġjon. Għandek mnejn tibqaʼ sorpriż b’dak li titgħallem.”

9. Għala m’għandniex naqtgħu qalbna jekk xi ħadd għall-​ewwel ma jkunx interessat f’dak li tgħallem il-​Bibbja?

⁹ Ġeħova jara l-​qalb taʼ kull individwu. (1 Sam. 16:7; Prov. 21:2) Hu qed jiġbed lil dawk li għandhom attitudni xierqa lejn il-​qima vera. (Ġw. 6:44) Ħafna wħud bħal dawn qatt ma tgħallmu dwar Alla jew ma tantx kienu midħla tal-​Bibbja. Il-​ministeru tagħna jagħtihom l-​opportunità li “jiġu salvati u jaslu għall-​għarfien eżatt dwar il-​verità.” (1 Tim. 2:4) Għalhekk, jekk xi ħadd għall-​ewwel ma jkunx interessat f’dak li tgħallem il-​Bibbja, taqtax qalbek! Uża pubblikazzjoni li hi disponibbli bil-​lingwa tiegħek biex tqanqal l-​interess tiegħu. Eventwalment, forsi tkun tistaʼ tkompli d-​diskussjoni mill-​ktieb Il-​Bibbja X’Tgħallem Verament?, li hu l-​pubblikazzjoni primarja tagħna biex nikkonduċu studji tal-​Bibbja.

[Caption f’paġna 4]

Jekk l-​inkwilin jgħid li ma jemminx f’Alla, ipprova dan:

• Staqsi, “Dejjem ħassejtek hekk?” biex issir taf għala.

• Jekk hu Buddist, uża l-​browxer Lasting Peace and Happiness—How to Find Them, paġni 9-​12.

• Jekk jemmen fl-​evoluzzjoni, dawn ir-​referenzi jistgħu jkunu t’għajnuna:

Is-​serje fi Stenbaħ! “Ġie Disinjat?”

Il-​vidjow The Wonders of Creation Reveal God’s Glory

Il-​browxers A Satisfying Life—How to Attain It, sezzjoni 4; Was Life Created?; u The Origin of Life—Five Questions Worth Asking

• Jekk tilef il-​fidi f’Alla minħabba l-​inġustizzja u t-​tbatija, dawn ir-​referenzi jistgħu jkunu t’għajnuna:

Il-​ktieb Is There a Creator Who Cares About You?, kapitlu 10

Il-​browxers Veru li Alla Jimpurtah Minna? is-​6 parti, u X’Inhu l-​Iskop tal-​Ħajja?, sezzjoni 6

• Malli l-​inkwilin ikun lest jikkunsidra l-​idea li Alla forsi jeżisti, introduċi l-​ktieb Il-​Bibbja X’Tgħallem? Għandu mnejn ikun tajjeb li tibda b’kapitlu 2 jew b’suġġett ieħor li jkun xieraq għalih.

[Caption f’paġna 5]

Jekk l-​inkwilin jgħid li ma jemminx fil-​Bibbja, ipprova dan:

• Ikkunsidra kapitli 17 u 18 tal-​ktieb Life—How Did It Get Here? By Evolution or by Creation?

• Għall-​Ħindu, uża l-​browxer Why Should We Worship God in Love and Truth?

• Għal-​Lhud, uża l-​browxer Will There Ever Be a World Without War?, paġni 3-​11.

• Iddiskuti l-​benefiċċji li jiġu meta dak li jkun isegwi l-​prinċipji tal-​Bibbja. Xi pubblikazzjonijiet li tistaʼ tuża biex turi lil xi ħadd il-​valur prattiku tal-​Bibbja huma:

Is-​serje fi Stenbaħ! “Għajnuna għall-​Familja”

Il-​vidjow The Bible—Its Power in Your Life

Il-​browxers Aħbar Tajba Mingħand Alla!, lezzjoni 9 u 11; Ktieb Għan-​Nies Kollha, paġni 22-​26; u A Satisfying Life—How to Attain It, sezzjoni 2

Għall-​Buddisti, uża l-​browxer The Pathway to Peace and Happiness, paġni 3-​7.

Għall-​Musulmani, uża l-​browxer Real Faith—Your Key to a Happy Life, sezzjoni 3.

Jekk qed tipprietka f’post fejn hemm preġudizzju kontra l-​Bibbja, jaf ikun aħjar li ma ssemmix is-​sors tal-​pariri għaqlin li qed taqsam maʼ dak li jkun fl-​ewwel ftit żjajjar.

• Spjega kif twettqu profeziji tal-​Bibbja. Xi pubblikazzjonijiet li tistaʼ tuża huma:

Il-​vidjow The Bible—Accurate History, Reliable Prophecy

Il-​browxer Ktieb Għan-​Nies Kollha, paġni 27-​29

• Malli l-​individwu jistaqsi x’tgħallem il-​Bibbja fuq suġġetti differenti, introduċi l-​ktieb Il-​Bibbja X’Tgħallem?

Jekk l-​inkwilin jgħid: “Jien ma nemminx f’Alla,” għandek mnejn tgħid:

• “Nistaʼ nispjega fil-​qosor xi kkonvinċa lili biex nemmen f’Ħallieq?” Imbagħad aqsam xi punti miegħu mill-​ktieb Reasoning, paġni 84-​86, jew agħmel arranġamenti biex tiħodlu xi pubblikazzjoni li ħadt pjaċir taqra.

• “Imma jekk hemm Alla, kif tixtieq li jkun?” Ħafna inkwilini jwieġbu li kieku jinġibdu lejn Alla li juri mħabba, ġustizzja, u ħniena, wieħed li hu imparzjali. Urih mill-​Bibbja li Alla għandu dawn il-​kwalitajiet. (Jistaʼ anki jkun possibbli li tuża kapitlu 1 tal-​ktieb Il-​Bibbja X’Tgħallem?, billi tibda minn paragrafu 6.)

Jekk l-​inkwilin jgħid: “Jien ma nemminx fil-​Bibbja,” għandek mnejn tgħid:

• “Hawn ħafna li jħossuhom hekk. Xi wħud għandhom l-​impressjoni li l-​Bibbja mhijiex xjentifika jew li l-​livelli tal-​Bibbja mhumiex prattiċi. Jimporta nistaqsik jekk ġieli qrajtx il-​Bibbja? [Agħti ċans għal tweġiba. Imbagħad uri l-​introduzzjoni f’paġna 3 tal-​browxer Ktieb Għan-​Nies Kollha, u offri l-​browxer.] Ħafna nies tilfu l-​fiduċja fil-​Bibbja minħabba li r-​reliġjon irrappreżentat ħażin it-​tagħlim tagħha. Darb’oħra nixtieq li niddiskutu eżempju minn paġni 4 u 5.”

• “Ħafna nies jaħsbuha bħalek. Jimporta nurik xi ħaġa li timpressjonani dwar il-​Bibbja? [Aqra Ġob 26:7 jew Isaija 40:22, li juru li l-​Bibbja hi xjentifikament eżatta.] Il-​Bibbja fiha wkoll pariri għaqlin li huma t’għajnuna għall-​familji. Darb’oħra nixtieq nurik xi eżempju.”

• “Grazzi talli qed tgħidli dan. Imma kieku Alla vera kiteb ktieb għall-​umanità, x’taħseb li kien ikun fih?” Imbagħad uri lill-​individwu xi ħaġa mill-​Bibbja li taqbel mal-​kumment tiegħu.