Se Noffru Browxer Ġdid!
1. X’se noffru matul Novembru, u x’inhu l-iskop taʼ din il-pubblikazzjoni?
1 Fil-Konvenzjoni Distrettwali tagħna tal-2009 “Ibqaʼ Għassa!” ħareġ browxer ġdid jismu Il-Bibbja—X’Inhu l-Messaġġ Tagħha? Matul Novembru, il-kongregazzjonijiet madwar id-dinja se joffruh għall-ewwel darba. Din il-pubblikazzjoni kif se tkun taʼ benefiċċju għan-nies fit-territorju tagħna? Ħafna nies, speċjalment dawk li huma f’reliġjonijiet mhux Kristjani, jafu ftit li xejn dwar il-Bibbja. Għalhekk, il-browxer jispjega f’paġna 3 li hu mħejji biex jagħti “għarfien bażiku dwar dak li hemm fil-Bibbja.”
2. Kif nistgħu noffru l-browxer?
2 Kif Tistaʼ Toffrih: Nistgħu ngħidu xi ħaġa hekk: “Nixtiequ l-opinjoni tiegħek fuq dan. [Aqra t-2 Timotju 3:16.] Ħafna li nitkellmu magħhom jaqblu maʼ dan il-kliem; oħrajn iħossu li l-Bibbja mhi xejn għajr ktieb tajjeb. Int x’taħseb dwar il-Bibbja? [Agħti ċans għal tweġiba.] Hu x’inhu t-twemmin reliġjuż tagħna, hemm raġunijiet tajbin biex neżaminaw il-Bibbja għalina nfusna. [Aqra l-paragrafu tal-ftuħ fin-naħa taʼ fuq taʼ paġna 3.] Int u taqra s-sommarju eċċitanti tal-Bibbja li jinsab f’dan il-browxer se tiltaqaʼ maʼ xi ħaġa interessanti: Il-Bibbja għandha tema u messaġġ ġenerali wieħed.”
3. Liema preżentazzjoni oħra nistgħu nużaw, speċjalment f’territorju fejn ħafna min-nies huma parti minn reliġjon mhix Kristjana?
3 Inkella, speċjalment jekk tkun qed tipprietka fejn hemm ħafna nies li huma parti minn reliġjon mhix Kristjana, tistaʼ tgħid: “Nixtiequ l-opinjoni tiegħek fuq dan il-kliem fl-Iskrittura (jew f’dan il-ktieb qaddis). [Aqra Salm 37:11.] Kif taħseb li tkun l-art meta din il-profezija titwettaq? [Agħti ċans għal tweġiba.] Dan hu eżempju tat-tama u l-faraġ li nies taʼ kull kultura u reliġjon jistgħu jirċievu mill-Bibbja.” Aqra l-paragrafu fin-naħa taʼ fuq taʼ paġna 3, u offri l-browxer.
4. Kif nistgħu nużaw il-browxer biex nibdew studju tal-Bibbja?
4 Ibda Studju tal-Bibbja: Meta nerġgħu nżuru lill-inkwilin, nistgħu nfakkruh dwar il-konversazzjoni li kellna d-darba taʼ qabel u nikkunsidraw paragrafu jew tnejn fuq is-suġġett li ddiskutejna billi nużaw il-mistoqsijiet fl-aħħar tas-sezzjoni li għażilna. Jew jekk irridu nintroduċu mill-ewwel il-ktieb Il-Bibbja X’Tgħallem?, nistgħu naqraw mal-inkwilin il-qoxra taʼ wara tal-browxer, nagħtuh il-ktieb, nistaqsuh liema titlu tal-kapitli jinteressah, u nikkunsidraw paragrafu jew tnejn minn dak il-kapitlu flimkien. Jalla lkoll kemm aħna jkollna sehem sħiħ f’li noffru dan il-browxer matul Novembru!