Erfgħu
Qed Tużahom Dawn il-Browxers?
Il-Bibbja—X’Inhu l-Messaġġ Tagħha?
Imħejji biex jinteressa lil dawk li ftit li xejn jafu dwar il-Bibbja, speċjalment dawk f’reliġjonijiet mhux Kristjani
Kif tistaʼ toffrih: “Nixtiequ l-opinjoni tiegħek dwar dak li hawn miktub fil-Bibbja (jew f’dan il-ktieb qaddis). [Aqra Salm 37:11, li hu msemmi f’sezzjoni 11.] Kif taħseb li se tkun id-dinja meta titwettaq din il-profezija? [Agħti ċans għal tweġiba.] Dan hu eżempju tat-tama u l-faraġ li n-nies taʼ kull kultura u twemmin jistgħu jiksbu mill-Bibbja.” Aqra l-paragrafu fin-naħa taʼ fuq taʼ paġna 3, u offri l-browxer.
Tistaʼ tipprova dan: Jekk qed tikkonduċi studju tal-Bibbja fil-ktieb Il-Bibbja X’Tgħallem? maʼ persuna li għandha reliġjon mhix Kristjana, uża ftit minuti fil-bidu jew fl-aħħar taʼ kull studju biex tikkunsidra sezzjoni minn dan il-browxer biex lill-persuna tagħtiha ħarsa ġenerali tal-Bibbja.
Ktieb għan-Nies Kollha
Imħejji biex jinteressa lil nies t’edukazzjoni li ma tantx jafu dwar il-Bibbja
Kif tistaʼ toffrih: Aqra t-2 Timotju 3:16, 17. Imbagħad għid: “Taqbel maʼ dan, li l-Bibbja hi ispirata minn Alla? Jew taħseb li hi biss ktieb tajjeb? [Agħti ċans għal tweġiba.] Il-biċċa l-kbira min-nies għandhom opinjoni dwar din il-mistoqsija, imma sibna li ftit fil-fatt eżaminaw il-Bibbja huma nfushom. [Aqra l-esperjenza taħt it-titlu f’paġna 3.] Dan il-browxer interessanti fih raġunijiet tajbin biex nies minn kull sfond u twemmin jikkunsidraw x’fiha l-Bibbja.”
Tistaʼ tipprova dan: Jekk l-inkwilin jaċċetta l-browxer, għid: “Raġuni waħda għala ħafna nies jaħsbu li mhuwiex importanti li jaqraw il-Bibbja hi għax ir-reliġjon irrappreżentat ħażin lill-Bibbja u t-tagħlim tagħha. Meta nerġaʼ niġi, nixtieq nagħtik eżempju taʼ dan.” Meta terġaʼ tmur, ikkunsidra ftit mill-informazzjoni minn paġni 4-5.
Int Tistaʼ Tkun il-Ħabib t’Alla!
Imħejji biex jinteressa lil dawk li għandhom ftit edukazzjoni jew li ma tantx jafu jaqraw
Kif tistaʼ toffrih: “Taħseb li hu possibbli għalina li nsiru ħbieb t’Alla? [Agħti ċans għal tweġiba. Imbagħad aqra Ġakbu 2:23.] Dan il-browxer ġie mħejji biex jgħinna nsiru ħbieb t’Alla, bħalma kien Abraham.”
Tistaʼ tipprova dan: Fl-ewwel żjara jew fiż-żjara lura, uri kif isir studju tal-Bibbja billi tiddiskutu flimkien lezzjoni 1 kollha jew parti minnha.
Għandek Int Temmen fit-Trinità?
Imħejji biex jinteressa lil dawk li jemmnu fit-Trinità u li jixtiequ jkunu jafu l-verità dwar Alla, Ibnu, u l-ispirtu qaddis.
Kif tistaʼ toffrih: “Ħafna nies sinċieri ġew mgħallmin jemmnu fit-Trinità, però jsibuha diffiċli ferm biex jifhmuha. Int hekk tħossok? [Agħti ċans għal tweġiba, imbagħad aqra Ġwanni 17:3] Innota li dan il-vers jgħid li l-futur kollu tagħna jiddependi milli nkunu nafu n-natura vera t’Alla. Dan il-browxer jeżamina t-Trinità b’dettall kbir minn ħarsa storika u fi qbil maʼ dak li tgħid il-Bibbja.” Aqra l-aħħar paragrafu fis-sezzjoni “Għandek Temminha?” f’paġna 3, u offri l-browxer.
Tistaʼ tipprova dan: Meta tagħmel żjara lura lil xi ħadd li aċċetta l-browxer, iddiskuti l-ewwel tliet paragrafi f’paġna 30. Imbagħad introduċi l-ktieb Il-Bibbja X’Tgħallem?
The Origin of Life—Five Questions Worth Asking
Imħejji għal żgħażagħ Kristjani li fl-iskola qed jiġu mgħallmin l-evoluzzjoni u hu t’għajnuna wkoll biex nirraġunaw m’evoluzzjonisti, anjostiċi, u atei (Dan il-browxer mhuwiex imħejji biex jitqassam minn dar għal dar.)
Kif nistgħu nużawh meta nkellmu lil evoluzzjonista jew ateu: “Tistaʼ tgħid li llum il-kotba tax-xjenza kollha jgħallmu l-evoluzzjoni. Int temmen li l-evoluzzjoni hija teorija, jew taħseb li issa ġiet stabbilita bħala fatt? [Agħti ċans għal tweġiba.] Biex tieħu deċiżjoni bbażata fuq l-informazzjoni, żgur li taqbel li għandna neżaminaw iż-żewġ naħat taʼ kwistjoni. Dan il-browxer jiddiskuti ftit mill-evidenza li wasslet lil ħafna biex jemmnu li l-ħajja ġiet maħluqa.”
Tistaʼ tipprova dan: Jekk tmur l-iskola, ħalli l-browxer fuq id-desk tiegħek u ara jekk tqajjimx il-kurżità taʼ xi ħadd minn sħabek tal-klassi.