‘Morru u Agħmlu Dixxipli, [u] Għammduhom’

“Għalhekk, morru u agħmlu dixxipli min-​nies tal-​ġnus kollha, għammduhom . . .  u għallmuhom josservaw dak kollu li ordnajtilkom.” —Mattew 28:​19, 20.

1. Liema deċiżjoni ħa l-​ġens taʼ Iżrael ħdejn il-​Muntanja Sinaj?

XI 3,500 sena ilu, ġens sħiħ għamel wegħda lil Alla. Miġburin ħdejn il-​Muntanja Sinaj, l-​Iżraelin iddikjaraw pubblikament: “Kull ma qalilna l-​Mulej nagħmluh.” Minn dakinhar ’il quddiem, Iżrael sar poplu dedikat lil Alla, il-​‘wirt tiegħu.’ (Eżodu 19:​5, 8; 24:3) Huma kienu qed jantiċipaw il-​protezzjoni tiegħu u li jgħixu għal ġenerazzjonijiet sħaħ f’art “tnixxi ħalib u għasel.”—Levitiku 20:24.

2. Liema relazzjoni m’Alla jistgħu jgawdu n-​nies illum?

² Però, bħalma rrikonoxxa s-​salmista Asaf, l-​Iżraelin “ma ħarsux il-​patt taʼ Alla, ma ridux jimxu fuq il-​Liġi tiegħu.” (Salm 78:10) Huma ma żammewx il-​wegħda li missirijiethom kienu għamlu lil Ġeħova. Maż-​żmien, il-​ġens tilef dik ir-​relazzjoni unika m’Alla. (Koħèlet 5:3 [5:​4, NW]; Mattew 23:​37, 38) Għalhekk, Alla “dawwar l-​attenzjoni tiegħu lejn il-​ġnus biex jieħu minnhom poplu għal ismu.” (Atti 15:14) U f’dawn l-​aħħar jiem, hu qed jiġbor flimkien “folla kbira, li ebda bniedem ma [jistaʼ] jgħoddha, minn kull ġens u tribù u poplu u lsien,” li bil-​ferħ tirrikonoxxi: “Is-​salvazzjoni nafuha lil Alla tagħna, li qiegħed bil-​qiegħda fuq it-​tron, u lill-​Ħaruf.”—Rivelazzjoni 7:​9, 10.

3. Liema passi jrid jieħu dak li jkun sabiex igawdi relazzjoni persunali m’Alla?

³ Jekk individwu jrid ikun fost dawk li jgawdu din ir-​relazzjoni prezzjuża m’Alla, hu għandu jiddedika ruħu lil Ġeħova u jissimbolizza din id-​dedikazzjoni billi jitgħammed fl-​ilma fil-​pubbliku. Dan hu fi qbil mal-​kmand dirett li Ġesù ta lid-​dixxipli tiegħu: “Għalhekk, morru u agħmlu dixxipli min-​nies tal-​ġnus kollha, għammduhom fl-​isem tal-​Missier u taʼ l-​Iben u taʼ l-​ispirtu qaddis, u għallmuhom josservaw dak kollu li ordnajtilkom.” (Mattew 28:​19, 20) L-​Iżraelin taw widen għall-​qari mill-​“ktieb tal-​patt.” (Eżodu 24:​3, 7, 8) Għalhekk, huma fehmu l-​obbligi tagħhom lejn Ġeħova. Bl-​istess mod illum, l-​għarfien eżatt tar-​rieda t’Alla kif misjub fil-​Kelma tiegħu, il-​Bibbja, hu essenzjali qabel ma individwu jieħu l-​pass tal-​magħmudija.

4. Xi jrid jagħmel individwu biex jikkwalifika għall-​magħmudija? (Inkludi l-​kaxxa t’hawn fuq.)

⁴ Jidher ċar li Ġesù ried li d-​dixxipli tiegħu jkollhom bażi soda għall-​fidi tagħhom qabel ma jitgħammdu. Hu għallem lis-​segwaċi tiegħu mhux biss biex imorru jagħmlu dixxipli, imma wkoll biex jgħallmuhom ‘josservaw dak kollu li ordnalhom.’ (Mattew 7:​24, 25; Efesin 3:​17-19) Għalhekk, dawk li jikkwalifikaw għall-​magħmudija ġeneralment ikunu studjaw il-​Bibbja għal xhur sħaħ jew saħansitra għal sena sħiħa jew tnejn, ħalli meta jieħdu d-​deċiżjoni ma jkunux ħaduha taʼ malajr jew mingħajr biżżejjed għarfien. Fil-​magħmudija stess, il-​kandidati jwieġbu iva għal żewġ mistoqsijiet fundamentali. Ladarba Ġesù enfasizza li ‘l-​kelma tagħna Iva ħa tfisser Iva, u l-​Le, Le,’ se jkun t’għajnuna għalina lkoll li nirrivedu bir-​reqqa t-​tifsir taʼ dawn iż-​żewġ mistoqsijiet tal-​magħmudija.—Mattew 5:37.

L-​Indiema u d-​Dedikazzjoni

5. Liema żewġ passi fundamentali tenfasizza l-​ewwel mistoqsija tal-​magħmudija?

⁵ L-​ewwel mistoqsija tal-​magħmudija tistaqsi lill-​kandidat jekk nidimx mill-​mod taʼ ħajja li kellu qabel u jekk iddedikax ħajtu lil Ġeħova biex jagħmel ir-​rieda tiegħu. Din il-​mistoqsija tenfasizza żewġ passi vitali li għandhom jittieħdu qabel il-​magħmudija, jiġifieri, l-​indiema u d-​dedikazzjoni.

6, 7. (a) Għala hija neċessarja l-​indiema għall-​kandidati kollha tal-​magħmudija? (b) Liema bidliet iridu jsiru wara li l-​individwu jindem?

⁶ Individwu għala għandu jindem qabel ma jippreżenta ruħu għall-​magħmudija? L-​appostlu Pawlu jispjega: “Aħna lkoll darba konna nġibu ruħna fi qbil max-​xewqat taʼ laħamna.” (Efesin 2:3) Qabel ma ksibna l-​għarfien eżatt tar-​rieda t’Alla, aħna konna ngħixu fi qbil mad-​dinja, skond il-​valuri u l-​livelli tagħha. Ħajjitna kienet kontrollata minn Satana, l-​alla taʼ din is-​sistema. (2 Korintin 4:4) Madankollu, issa li sirna nafu r-​rieda t’Alla, aħna nagħżlu b’determinazzjoni li ma ngħixux “iktar għax-​xewqat tal-​bnedmin, imma għar-​rieda t’Alla.”—1 Pietru 4:2.

⁷ Dan il-​mod taʼ ħajja ġdid iġib miegħu ħafna barkiet. Fuq kollox, jiftaħ it-​triq għal relazzjoni prezzjuża maʼ Ġeħova, li David qabbilha maʼ stedina biex nidħlu “fid-​dar” u “l-​għolja mqaddsa” t’Alla—tabilħaqq privileġġ grandjuż. (Salm 15:1) Loġikament, Ġeħova ma kienx se jistieden sempliċement lil kulħadd kif ġie ġie imma biss lil min “jgħix bla ħtija u jagħmel it-​tajjeb, min jgħid is-​sewwa f’qalbu.” (Salm 15:2) Skond iċ-​ċirkustanzi tagħna qabel ma tgħallimna l-​verità, jistaʼ jkollna nagħmlu ċerti bidliet biex naġixxu skond dawn il-​ħtiġijiet—kemm fl-​imġiba u kemm fil-​personalità. (1 Korintin 6:​9-11; Kolossin 3:​5-10) Il-​motivazzjoni għal bidliet bħal dawn hi l-​indiema—dispjaċir kbir dwar il-​mod taʼ ħajja li kellna qabel u determinazzjoni qawwija li nogħġbu lil Ġeħova. Dan iġib bidla sħiħa—jiġifieri, irridu nabbandunaw il-​mod taʼ ħajja egoist u dinji li kellna u nistinkaw biex ngħixu ħajja li togħġob lil Alla.—Atti 3:19.

8. Kif nagħmlu d-​dedikazzjoni tagħna, u liema konnessjoni għandha mal-​magħmudija?

⁸ It-​tieni parti taʼ l-​ewwel mistoqsija tal-​magħmudija tistaqsi lill-​kandidati jekk iddedikawx ruħhom lil Ġeħova biex jagħmlu r-​rieda tiegħu. Id-​dedikazzjoni hi pass essenzjali li għandu jsir qabel il-​magħmudija. Din issir permezz tat-​talb, u fiha nesprimu x-​xewqa tagħna li nagħtu ħajjitna lil Ġeħova permezz taʼ Kristu. (Rumani 14:​7, 8; 2 Korintin 5:15) Imbagħad Ġeħova jsir Sidna u l-​Proprjetarju tagħna, u bħal Ġesù aħna nitgħaxxqu nagħmlu r-​rieda t’Alla. (Salm 40:9 [40:​8, NW]; Efesin 6:6) Din il-​wegħda solenni lil Ġeħova ssir darba biss. Madankollu, peress li nagħmlu d-​dedikazzjoni tagħna fil-​privat, id-​dikjarazzjoni pubblika dakinhar tal-​magħmudija sservi biex kulħadd ikun jaf li aħna għamilna din id-​dedikazzjoni solenni lil Missierna tas-​sema.—Rumani 10:10.

9, 10. (a) X’jinvolvi li nagħmlu r-​rieda t’Alla? (b) Id-​dedikazzjoni tagħna kif ġiet rikonoxxuta anki mill-​uffiċjali tan-​Nazi?

⁹ X’jinvolvi l-​fatt li nsegwu l-​eżempju taʼ Ġesù biex nagħmlu r-​rieda t’Alla? Ġesù qal lid-​dixxipli tiegħu: “Jekk xi ħadd irid jiġi warajja, ħa jiċħad lilu nnifsu u jerfaʼ z-​zokk tat-​tortura tiegħu u jibqaʼ miexi warajja.” (Mattew 16:24) Hawnhekk hu enfasizza tliet affarijiet li rridu nagħmlu. L-​ewwel għandna ‘niċħdu’ lilna nfusna. Fi kliem ieħor, irridu ngħidu le għall-​inklinazzjonijiet egoistiċi u imperfetti tagħna u ngħidu iva għall-​parir u d-​direzzjoni t’Alla. It-​tieni, irridu ‘nerfgħu zzokk tat-​tortura tagħna.’ Fi żmien Ġesù, iz-​zokk tat-​tortura kien jissimbolizza l-​għajb u t-​tbatija. Bħala Kristjani, aħna naċċettaw il-​fatt li kultant ikollna nsofru minħabba laħbar tajba. (2 Timotju 1:8) Għalkemm id-​dinja tistaʼ tidħaq bina jew tikkundannana, bħal Kristu aħna ‘ma nqisux l-​għajb,’ minħabba li aħna henjin għaliex nafu li qed nogħġbu ’l Alla. (Ebrej 12:2) Fl-​aħħarnett, aħna ‘nibqgħu’ mexjin wara Ġesù.—Salm 73:26; 119:44; 145:2.

¹⁰ Huwa interessanti li anki xi wħud li jopponu jirrikonoxxu li d-​dedikazzjoni li jagħmlu x-​Xhieda taʼ Ġeħova lil Alla hi biex jaqduh b’mod assolut. Per eżempju, fil-​kamp tal-​konċentrament taʼ Buchenwald fil-​Ġermanja Nazista, ix-​Xhieda li rrifjutaw li jiċħdu l-​fidi tagħhom kellhom jiffirmaw l-​istqarrija stampata li ġejja: “Jien għadni Student tal-​Bibbja dedikat u qatt ma se nikser il-​ħalfa li għamilt lil Ġeħova.” Żgur li dan jesprimi tajjeb l-​attitudni tal-​qaddejja kollha t’Alla li huma dedikati u leali!—Atti 5:32.

Identifikat Bħala Wieħed mix-​Xhieda taʼ Ġeħova

11. Xi privileġġ ikollu min jitgħammed?

¹¹ It-​tieni mistoqsija tistaqsi lill-​kandidat, l-​ewwelnett, jekk jifhimx li l-​magħmudija tiegħu sservi biex tidentifikah bħala wieħed mix-​Xiehda taʼ Ġeħova. Wara t-​tgħaddis fl-​ilma, hu jsir ministru ordnat li jġorr l-​isem taʼ Ġeħova. Dan hu kemm privileġġ kbir kif ukoll responsabbiltà serja. Ukoll, lil dak li jitgħammed tagħtih il-​prospett taʼ salvazzjoni dejjiema, sakemm jibqaʼ leali lejn Ġeħova.—Mattew 24:13.

12. Liema obbligu jġib miegħu l-​unur li nġorru l-​isem taʼ Ġeħova?

¹² Żgur li hu unur kbir li nġorru l-​isem t’Alla li jistaʼ kollox, Ġeħova. Il-​profeta Mikea qal: “Il-​popli kollha jimxu kull wieħed f’isem l-​alla tiegħu; imma aħna nimxu f’isem [“Ġeħova,” NW], Alla tagħna, għal dejjem taʼ dejjem.” (Mikea 4:5) Minkejja dan, għandna obbligu maʼ dan l-​unur. Irridu nistinkaw biex ngħixu ħajjitna b’mod li jonora lill-​isem li nġorru. Bħalma Pawlu fakkar lill-​Kristjani f’Ruma, jekk ma nipprattikawx dak li nippridkaw, l-​isem t’Alla jiġi “mkasbar,” jew inġibu fuqu fama ħażina.—Rumani 2:​21-24.

13. Il-​qaddejja dedikati taʼ Ġeħova għala għandhom ir-​responsabbiltà li jixhdu dwar Alla tagħhom?

¹³ Meta individwu jsir wieħed mix-​Xhieda taʼ Ġeħova, hu jaċċetta wkoll ir-​responsabbiltà li jagħti xiehda dwar Alla tiegħu. Ġeħova stieden lill-​membri tal-​ġens dedikat taʼ Iżrael biex ikunu xhieda tiegħu ħalli jixhdu għad-​Divinità eterna tiegħu. (Isaija 43:​10-12, 21) Imma l-​ġens naqas milli jwettaq dan l-​irwol, u maż-​żmien tilef il-​favur taʼ Ġeħova kompletament. Illum, il-​Kristjani veri huma kburin li għandhom il-​privileġġ li jixhdu dwar Ġeħova. Aħna nagħmlu dan għaliex inħobbuh u nixtiequ li ismu jiġi mqaddes. Kif nistgħu noqogħdu siekta meta nafu l-​verità dwar Missierna tas-​sema u l-​iskop tiegħu? Aħna nħossuna bħall-​appostlu Pawlu meta qal: “Il-​bżonn iġagħalni. Tassew, gwaj għalija jekk ma nxandarx l-​aħbar tajba!”—1 Korintin 9:16.

14, 15. (a) L-organizzazzjoni taʼ Ġeħova kif tgħinna nikbru spiritwalment? (b) Liema provvedimenti huma disponibbli biex jgħinuna spiritwalment?

¹⁴ It-​tieni mistoqsija tfakkar ukoll lill-​kandidat dwar ir-​responsabbiltà li jikkoopera maʼ l-​organizzazzjoni taʼ Ġeħova mmexxija mill-​ispirtu Tiegħu. Aħna m’aħniex waħedna fis-​servizz tagħna lil Alla, u għandna bżonn lgħajnuna, l-​appoġġ, u l-​inkuraġġiment tal-​“fratellanza kollha.” (1 Pietru 2:17; 1 Korintin 12:​12, 13) L-​organizzazzjoni t’Alla għandha rwol vitali biex tgħinna nikbru spiritwalment. Tipprovdilna abbundanza taʼ pubblikazzjonijiet ibbażati fuq il-​Bibbja li jgħinuna nkabbru l-​għarfien eżatt tagħna, naġixxu bl-​għaqal meta niffaċċjaw il-​problemi, u nikkultivaw relazzjoni mill-​qrib m’Alla. Bħal omm li taċċerta ruħha li titmaʼ u tieħu ħsieb lil uliedha, “l-​ilsir leali u għaqli” jipprovdi abbundanza taʼ ikel spiritwali fiż-​żmien xieraq sabiex nikbru spiritwalment.—Mattew 24:​45-47; 1 Tessalonikin 2:​7, 8.

¹⁵ Fil-​laqgħat taʼ kull ġimgħa, in-​nies taʼ Ġeħova jirċievu t-​taħriġ u l-​inkuraġġiment li għandhom bżonn biex ikunu Xhieda leali taʼ Ġeħova. (Ebrej 10:​24, 25) L-​Iskola tal-​Ministeru Teokratiku tgħallimna kif nitkellmu fil-​pubbliku, u l-​Laqgħa tas-​Servizz taʼ l-​Għalqa tħarriġna biex nippreżentaw il-​messaġġ tagħna b’mod effettiv. Kemm fil-​laqgħat tagħna u kemm fl-​istudju persunali tagħna bil-​pubblikazzjonijiet Bibliċi, aħna nistgħu naraw l-​ispirtu taʼ Ġeħova jopera, hekk kif jidderieġi l-​organizzazzjoni tiegħu. Permezz taʼ dawn il-​provvedimenti regulari, Alla jwissina dwar il-​perikli, iħarriġna biex inkunu ministri effettivi, u jgħinna nibqgħu mqajmin spiritwalment.—Salm 19:​8, 9, 12 (19:​7, 8, 11, NW); 1 Tessalonikin 5:​6, 11; 1 Timotju 4:13.

Il-​Motivazzjoni għad-​Deċiżjoni

16. Xi jqanqalna niddedikaw ruħna lil Ġeħova?

¹⁶ Iż-​żewġ mistoqsijiet tal-​magħmudija għalhekk ifakkru lill-​kandidati dwar it-​tifsir tal-​magħmudija fl-​ilma u r-​responsabbiltajiet li ġġib magħha. Imma allura x’għandu jqanqalhom jieħdu d-​deċiżjoni biex jitgħammdu? Aħna ma nsirux dixxipli mgħammdin għax xi ħadd jisforzana, imma għax Ġeħova ‘jiġbidna.’ (Ġwanni 6:44) Ladarba “Alla hu mħabba,” hu jaħkem l-​univers bl-​imħabba, mhux bil-​forza. (1 Ġwanni 4:8) Aħna ninġibdu lejn Ġeħova mill-​kwalitajiet sbieħ tiegħu u mill-​mod kif jittratta magħna. Ġeħova ta lill-​Iben uniġenitu tiegħu għalina u offrielna l-​aqwa futur possibbli. (Ġwanni 3:16) Mill-​banda l-​oħra, aħna niġu mqanqlin biex noffrulu—u niddedikawlu—ħajjitna.—Proverbji 3:9; 2 Korintin 5:​14, 15.

17. Lejn xiex ma ddedikajniex ruħna?

¹⁷ Aħna ma niddedikawx ruħna għal xi kawża, jew xi biċċa xogħol speċifika, imma lil Ġeħova nnifsu. Ix-​xogħol li Alla għandu għan-​nies tiegħu se jinbidel, imma d-​dedikazzjoni tagħhom lejh tibqaʼ l-​istess. Per eżempju, dak li qabbad lil Abraham biex jagħmel kien differenti ħafna minn dak li qabbad lil Ġeremija biex jagħmel. (Ġenesi 13:​17, 18; Ġeremija 1:​6, 7) Però, it-​tnejn li huma għamlu x-​xogħol speċifiku li tahom Alla minħabba li kienu jħobbu lil Ġeħova u xtaqu jagħmlu r-​rieda tiegħu lealment. Matul dan iż-​żmien taʼ l-​aħħar, is-​segwaċi mgħammdin kollha taʼ Kristu jistinkaw biex iwettqu l-​kmand taʼ Kristu li jippridkaw l-​aħbar tajba tas-​Saltna u jagħmlu dixxipli. (Mattew 24:14; 28:​19, 20) Mod mill-​aqwa kif nuru l-​imħabba tagħna għal Missierna tas-​sema u li aħna tassew dedikati lilu hu billi nagħmlu dan ix-​xogħol mill-​qalb.​—1 Ġwanni 5:3.

18, 19. (a) Liema stqarrija pubblika nagħmlu permezz tal-​magħmudija tagħna? (b) X’se jiġi kunsidrat fl-​artiklu li jmiss?

¹⁸ Mingħajr ebda dubju, il-​magħmudija tagħtina l-​opportunità li ngawdu ħafna barkiet, imma m’hijiex pass li għandna niħduh mingħajr ma naħsbu dwaru sew. (Luqa 14:​26-33) Din tesprimi determinazzjoni li tiġi qabel kull responsabbiltà oħra. (Luqa 9:62) Meta nitgħammdu, aħna fil-​fatt inkunu qed nistqarru pubblikament: “Dan hu Alla! Alla tagħna għal dejjem taʼ dejjem. Hu jmexxina għal dejjem!”—Salm 48:15 (48:​14, NW).

¹⁹ L-​artiklu li jmiss se jeżamina iktar mistoqsijiet li jistgħu jinqalgħu dwar il-​magħmudija fl-​ilma. Jistaʼ jkun hemm raġunijiet validi għala individwu għandu joqgħod lura milli jitgħammed? Hija importanti l-​età? Kif jistaʼ kulħadd jgħin biex l-​okkażjoni tal-​magħmudija tkun waħda dinjituża?

Tistaʼ Tispjega?

• Kull Kristjan għala jrid jindem qabel il-​magħmudija?

• X’tinvolvi d-​dedikazzjoni lil Alla?

• Liema responsabbiltajiet iġib miegħu l-​unur li nġorru l-​isem taʼ Ġeħova?

• X’għandu jqanqalna nieħdu d-​deċiżjoni li nitgħammdu?

[Kaxxa/Stampa f’paġna 22]

Iż-​Żewġ Mistoqsijiet tal-​Magħmudija

Fuq il-​bażi tas-​sagrifiċċju taʼ Ġesù Kristu, indimt int minn dnubietek u ddedikajt ruħek lil Ġeħova biex tagħmel ir-​rieda tiegħu?

Tifhem int li d-​dedikazzjoni u l-​magħmudija tiegħek jidentifikawk bħala wieħed/waħda mix-​Xhieda taʼ Ġeħova fi sħubija maʼ l-​organizzazzjoni t’Alla mmexxija mill-​ispirtu?

[Stampa f’paġna 23]

Id-​dedikazzjoni hija wegħda solenni li ssir lil Ġeħova fit-​talb

[Stampa f’paġna 25]

Ix-​xogħol tagħna taʼ l-​ippridkar juri li aħna dedikati lil Alla