Żgħażagħ li Jferrħu Qalb Jehovah

Dawn l-​artikli taʼ studju ġew imħejjijin apposta għaż-​żgħażagħ fost ix-​Xhieda taʼ Jehovah. Għalhekk, inħeġġu liż-​żgħażagħ biex jistudjaw il-​materjal bir-​reqqa u jipparteċipaw bil-​ħerqa meta dan jiġi kunsidrat fl-​istudju tat-​Torri taʼ l-​Għassa fil-​kongregazzjoni.

“Kun għaref, ibni, u ferraħli qalbi, biex inkun nistaʼ nwieġeb lil min jgħajjarni.” ​—Proverbji 27:11.

1, 2. (a) Spjega jekk sempliċi ġibda lejn l-​affarijiet tad-​dinja tfissirx li m’intix denju li tkun Kristjan. (Rumani 7:21) (b) X’titgħallem mill-​eżempju taʼ Asaf? (Ara l-​kaxxa f’paġna 13.)

IMMAĠINA li qed iddur il-​ħwienet biex tixtri xi ħwejjeġ. Waqt li qed tfittex, tara flokk li jolqtok mill-​ewwel. Għandu l-​kulur u l-​istil li trid int, u mill-​prezz tiegħu tara li hu verament irħis. Iżda mbagħad toqgħod tiflih ftit. Lanqas tkun trid temmen meta tara li l-​materjal huwa mżarrat fit-​truf u l-​ħjata magħmula kemxejn bl-​addoċċ. Il-​flokk, għalkemm jogħġbok, ma tantx huwa taʼ kwalità tajba. Lest li tonfoq flusek fuq prodott li m’huwiex daqshekk taʼ kwalità?

² Qabbel din is-​sitwazzjoni maʼ dak li tistaʼ tiffaċċja int bħala żagħżugħ Kristjan. Mad-​daqqa t’għajn, l-​affarijiet tad-​dinja—bħal dak il-​flokk—jistgħu jolqtuk ħafna. Per eżempju, sħabek taʼ l-​iskola forsi jmorru parties storbjużi, jieħdu d-​drogi, jiskru, joħorġu maʼ diversi ġuvintur jew tfajliet, u jkollhom relazzjonijiet sesswali barra ż-​żwieġ. Ġieli titħajjar mill-​mod taʼ ħajja tagħhom? Tħossok tixxennaq imqar għal naqra mil-​“libertà” tagħhom? Jekk inhu hekk, taqbadx u tikkonkludi li int ħażin u li m’intix denju li tkun Kristjan. Wara kollox, il-​Bibbja tirrikonoxxi li d-​dinja jistaʼ verament ikollha ġibda qawwija biex tħajjar anki lil min irid jogħġob ’l Alla.—2 Timotju 4:10.

3. (a) Għala hija xi ħaġa fiergħa li tfittex l-​affarijiet tad-​dinja? (b) Oħt Kristjana kif tiddeskrivi l-​frugħa tal-​ġiri wara l-​affarijiet tad-​dinja?

³ Jekk jogħġbok, issa ħares iktar bir-​reqqa lejn l-​affarijiet tad-​dinja li semmejna, bħalma kieku tħares lejn il-​flokk li kont bi ħsiebek tixtri. Staqsi lilek innifsek, ‘Taʼ liema kwalità huma d-​drapp u l-​ħjata taʼ din is-​sistema dinjija?’ Il-​Bibbja tistqarr li ‘d-​dinja tgħaddi.’ (1 Ġwann 2:17) Kull pjaċir li jistaʼ jinkiseb minnha anki fl-​aqwa ċirkustanzi se jkun biss temporanju. Barra minn hekk, il-​kondotta taʼ min jiċħad ’l Alla għandha prezz għoli. Żgur li ma jaqbillekx. Oħt Kristjana, li kellha tissaporti dak li hi ssejjaħlu “l-​uġigħ li ġġarrab meta taħli żgħożitek,” tgħid: “Id-​dinja għandha mnejn tidher kollha xinxilli u tħajrek. U din tridek temmen li int tistaʼ tgawdi t-​tip taʼ divertiment li toffri hi mingħajr ebda tbatija. Iżda dan huwa sempliċement impossibbli. Id-​dinja tużak, u meta tixbaʼ minnek, tarmik.”a Għala għandek taħli żgħożitek f’mod taʼ ħajja li hu daqshekk fqir?

Protezzjoni mill-​“Ħażin”

4, 5. (a) Ftit qabel miet, Ġesù għal xiex talab lil Jehovah? (b) Din għala kienet talba xierqa?

⁴ Peress li ż-​żgħażagħ fost ix-​Xhieda taʼ Jehovah jirrealizzaw li din is-​sistema m’għandha xejn x’toffrilhom li hu taʼ kwalità tajba, huma jistinkaw biex jevitaw il-​ħbiberija maʼ din id-​dinja. (Ġakbu 4:4) Int wieħed minn dawn iż-​żgħażagħ leali? Jekk iva, ħaqqek prosit. Huwa minnu li m’huwiex faċli tegħleb il-​pressjoni minn taʼ madwarek u kulħadd ikun jaf li int differenti minnhom, iżda għandek l-​għajnuna.

⁵ Ftit qabel ma miet, Ġesù talab lil Jehovah biex ‘iħares’ lid-​dixxipli tiegħu “mill-​Ħażin.” (Ġwann 17:15) Ġesù kellu raġuni tajba għala talab hekk. Hu kien jaf li ma kienx se jkun faċli għas-​segwaċi tiegħu biex iżommu l-​integrità, ikunu taʼ liema età jkunu. Għala? Bħalma rrikonoxxa Ġesù, waħda mir-​raġunijiet hi li d-​dixxipli tiegħu kellhom jiffaċċjaw għadu qawwi u inviżibbli—il-​wieħed “Ħażin,” Satana x-​Xitan. Il-​Bibbja tgħid li dan l-​esseri spirtu kiefer “qisu ljun jgħajjat, idur u jfittex ’il min sa jiblaʼ.”—1 Pietru 5:8.

6. Kif nafu li Satana m’għandu ebda ħniena għaż-​żgħar?

⁶ Matul l-​istorja tal-​bniedem, Satana bil-​krudeltà kollha kien u għadu jsib l-​għaxqa tiegħu f’li jġib l-​iktar atroċitajiet ħorox fuq il-​bnedmin. Ikkunsidra l-​hemm kbir li Satana ġab fuq Ġob u l-​familja tiegħu. (Ġob 1:​13-19; 2:7) Forsi tiftakar xi ġrajjiet fl-​aħbarijiet li seħħew matul ħajtek fejn jidher biċ-​ċar li kien hemm l-​ispirtu vjolenti taʼ Satana fin-​nofs. Ix-​Xitan qed iħuf, u fit-​tfittxija tiegħu biex jara lil min se jiblaʼ ma juri l-​ebda ħniena lejn iż-​żgħażagħ. Per eżempju, fil-​bidu taʼ l-​ewwel seklu E.K., Erodi fassal pjan biex joqtol lis-​subien kollha f’Betlehem li kellhom sentejn jew inqas. (Mattew 2:16) Wisq probabbli, kien Satana li qanqal lil Erodi—dan kollu bi sforz biex jeqred lit-​tifel li xi darba kellu jsir il-​Messija mwiegħed t’Alla u jġib il-​ħaqq t’Alla fuq Satana! (Ġenesi 3:15) Jidher ċar li Satana m’għandu ebda ħniena għaż-​żgħar. L-​unika intenzjoni li għandu hi li jiblaʼ kemm jistaʼ bnedmin. Dan hu speċjalment minnu issa, għaliex Satana tkeċċa mis-​sema għal fuq l-​art, “b’korla kbira fuqu, għax jaf li żmien ftit baqagħlu.”—Apokalissi 12:​9, 12.

7. (a) Jehovah kif jispikka f’kuntrast kbir maʼ Satana? (b) Jehovah kif iħossu dwar li int tgawdi l-​ħajja?

⁷ F’kuntrast kbir maʼ Satana, li għandu “korla kbira,” Jehovah tant għandu “qalb ħanina.” (Luqa 1:78) Hu l-​eżempju perfett taʼ l-​imħabba. Fil-​fatt, din il-​kwalità grandjuża tant hi karatteristika tal-​Ħallieq tagħna li l-​Bibbja tgħid: “Alla hu mħabba.” (1 Ġwann 4:8) X’differenza hemm bejn l-​alla taʼ din is-​sistema u dak Alla li int għandek l-​unur li tqim! Waqt li Satana jfittex lil min se jiblaʼ, Jehovah “ma jridx li xi ħadd jintilef.” (2 Pietru 3:9) Hu jqis kull ħajja umana bħala li hi prezzjuża—anki tiegħek. Meta fil-​Kelma tiegħu Jehovah iwissik biex ma tkun ebda parti mid-​dinja, hu ma jkunx qed jipprova jċaħħdek milli tgawdi l-​ħajja jew joħnoq il-​libertà tiegħek. (Ġwann 15:19) Anzi, għall-​kuntrarju hu qed iħarsek mill-​wieħed Ħażin. Missierek tas-​sema jrid jagħtik xi ħaġa ħafna aqwa mill-​pjaċiri tad-​dinja li jgħaddu f’ħakka t’għajn. Hu jixtieqek tikseb “il-​ħajja vera”—ħajja taʼ dejjem f’ġenna taʼ l-​art. (1 Timotju 6:​17-19) Jehovah iridek tirnexxi, u qed iħeġġek biex tilħaq din il-​mira. (1 Timotju 2:4) Barra minn hekk, Jehovah qed jagħmillek stedina speċjali. X’inhi din l-​istedina?

“Ferraħli Qalbi”

8, 9. (a) Int liema rigal tistaʼ tagħti lil Jehovah? (b) Satana kif jgħajjar lil Jehovah, bħalma jurina l-​każ taʼ Ġob?

⁸ Qatt xtrajt rigal għal xi ħabib tal-​qalb u mbagħad rajt wiċċu jixgħel bil-​ferħ u bl-​apprezzament malli tajthulu? Min jaf kemm domt taħseb dwar x’tip taʼ rigal hu addattat għalih. Issa kkunsidra din il-​mistoqsija: X’rigal tistaʼ toffri lill-​Ħallieq tiegħek, Alla Jehovah? Għall-​ewwel, din l-​idea forsi tidher daqsxejn banali. Dak li jistaʼ kollox x’jistaʼ jkollu bżonn mingħand sempliċi bniedem? X’tistaʼ tagħtih li m’għandux diġà? Il-​Bibbja tweġibna fi Proverbji 27:11: “Kun għaref, ibni, u ferraħli qalbi, biex inkun nistaʼ nwieġeb lil min jgħajjarni.”

⁹ Bħalma x’aktarx tgħallimt mill-​studju tiegħek tal-​Bibbja, huwa Satana x-​Xitan li jgħajjar lil Jehovah. Hu jsostni li kulmin jaqdi ’l Alla ma jaqdihx għax iħobbu, iżda għal raġunijiet egoistiċi. Satana jgħidlu li jekk iħallihom ibatu, huma malajr jabbandunaw il-​qima vera. Per eżempju, ikkunsidra x’qallu Satana lil Jehovah dwar ir-​raġel twajjeb Ġob: “Forsi int ma bnejtx ħajt madwaru u madwar daru, u madwar kull ma għandu kif iddur? Berikt kull ma għamlu jdejh, u ġidu kotor maʼ l-​art kollha kemm hi. Imma midd idek u olqot kull ma għandu, u tara jekk jisħtekx f’wiċċek.”—Ġob 1:​10, 11.

10. (a) Kif nafu li Satana mhux dwar l-​integrità taʼ Ġob biss qajjem dubji? (b) Kif int involut fil-​kwistjoni tas-​sovranità?

¹⁰ Bħalma jikxef ir-​rakkont tal-​Bibbja, Satana mhux il-​lealtà taʼ Ġob biss iddubita iżda anki l-​lealtà taʼ dawk kollha li jaqdu ’l Alla—inkluż tiegħek. Fil-​fatt, meta kien qed jitkellem dwar il-​bnedmin b’mod ġenerali, Satana qal lil Jehovah: “Il-​bniedem [mhux biss Ġob imma kulħadd] jagħti kull ma jkollu għal ħajtu!” (Ġob 2:4) Qed tara x’inhu l-​irwol tiegħek f’din il-​kwistjoni vitali? Bħalma jindika Proverbji 27:​11, Jehovah qed jgħid li hemm xi ħaġa li int tistaʼ tagħtih—bażi fuqiex iwieġeb lil dak li jgħajru, lil Satana. Immaġina, is-​Sovran taʼ l-​Univers qed isejjaħlek biex twieġeb personalment għall-​akbar kwistjoni li qatt eżistiet. X’responsabbiltà u privileġġ taʼ l-​għaġeb għandek! Tistaʼ int tagħmel dak li Jehovah qed jitlob minnek? Ġob hekk għamel. (Ġob 2:​9, 10) Anki Ġesù, u anki ħafna oħrajn tul is-​snin, inkluż ħafna żgħażagħ. (Filippin 2:8; Apokalissi 6:9) Int tistaʼ tagħmel bħalhom. Madankollu, ibqaʼ ċert li ma tistax tkun newtrali f’din il-​kwistjoni. Bil-​mod kif taġixxi se turi jekk hux qed tappoġġa l-​akkuża taʼ Satana jew it-​tweġiba taʼ Jehovah. Maʼ liema naħa se żżomm?

Jehovah Jimpurtah Minnek

11, 12. Huwa Jehovah effettwat minn jekk tagħżilx li taqdih jew le? Spjega.

¹¹ Jimpurtah verament Jehovah dwar liema għażla tagħmel? M’hemmx diġà biżżejjed nies li baqgħu leali biex Hu jkun jistaʼ jwieġeb sew lil Satana? Veru, ix-​Xitan sostna li ħadd ma jaqdi lil Jehovah għax iħobbu, akkuża li diġà ġiet provata li hi falza. Xorta waħda, Jehovah iridek tappoġġa n-​naħa tiegħu fil-​kwistjoni tas-​sovranità għaliex hu jimpurtah minnek bħala individwu. Ġesù qal: “Hekk ukoll, anqas Missierkom li hu fis-​smewwiet ma jrid li jintilef wieħed minn dawn iż-​żgħar.”—Mattew 18:14.

¹² Jidher ċar li Jehovah jinteressah x’mod taʼ ħajja tagħżel. Iktar minn hekk, hu jiġi effettwat mill-​għażla tiegħek. Il-​Bibbja tagħmilha ċara li Jehovah għandu sentimenti profondi li jitqanqlu mill-​azzjonijiet tajbin jew ħżiena tal-​bnedmin. Per eżempju, meta l-​Iżraelin irribellaw għal darba wara l-​oħra, lil Jehovah ikkaġunawlu “wġigħ.” (Salm 78:​40, 41, NW) Qabel id-​Dilluvju taʼ żmien Noè, meta “l-​ħażen tal-​bnedmin kien kiber,” Jehovah “sewwed qalbu.” (Ġenesi 6:​5, 6) Aħseb ftit dan xi jfisser. Jekk taqbad triq ħażina, se ssewwed qalb il-​Ħallieq tiegħek. Dan ma jfissirx li Alla hu dgħajjef jew li jħalli l-​emozzjonijiet tiegħu jiġru bih. Pjuttost, hu jħobbok u jimpurtah minnek. Mill-​banda l-​oħra, meta tagħmel it-​tajjeb, qalb Jehovah tifraħ. Hu mhux biss jifraħ għax ikollu tweġiba oħra għal Satana iżda wkoll għax issa jistaʼ jsir il-​Wieħed li jippremjak. U dan hu dak li jixtieq ikun. (Lhud 11:6) X’Missier kollu mħabba hu Alla tiegħek, Jehovah!

Barkiet Kbar Issa

13. Il-​fatt li naqdu lil Jehovah kif iġibilna barkiet saħansitra minn issa?

¹³ Il-​barkiet li jiġu meta naqdu lil Jehovah ma nesperjenzawhomx biss fil-​futur. Ħafna żgħażagħ fost ix-​Xhieda taʼ Jehovah huma mberkin bil-​ferħ u s-​sodisfazzjon minn issa, u mhux taʼ b’xejn. Is-​salmista kiteb: “Il-​preċetti tal-​Mulej dritti, u jferrħu l-​qalb.” (Salm 19:9 [19:​8, NW]) Jehovah jaf iktar minn kull bniedem ieħor x’inhu tajjeb għalina. Permezz tal-​profeta Isaija, Jehovah stqarr: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi. Li kieku tajt widen għall-​kmandamenti tiegħi, kien ikun bħal xmara sliemek, u sedqek bħal mewġ tal-​baħar.”—Isaija 48:​17, 18.

14. Il-​prinċipji tal-​Bibbja kif jistgħu jgħinuk tevita l-​uġigħ li jiġi mid-​dejn?

¹⁴ Jekk tgħix skond il-​prinċipji tal-​Bibbja se tiġi megħjun biex tevita ħafna tbatija u wġigħ taʼ qalb. Per eżempju, il-​Bibbja tgħid li dawk li żviluppaw imħabba għall-​flus “infnew b’niket kbir.” (1 Timotju 6:​9, 10) Hemm xi ħadd minn sħabek li għadda mill-​esperjenza kerha li ssemmi din l-​iskrittura? Xi rġiel u nisa żgħażagħ jinsabu f’dejn enormi sempliċement għax ikunu jridu ħwejjeġ taʼ l-​aqwa ditti fis-​suq u apparat taʼ l-​iktar teknoloġija avanzata. Il-​fatt li tagħmel żmien twil mgħobbi b’ħafna pagamenti u b’interessi għoljin fuq l-​affarijiet li m’għandekx biżżejjed flus biex tixtrihom hu forma taʼ jasar kollu tbatija.—Proverbji 22:7.

15. Il-​prinċipji tal-​Bibbja b’liema modi jipproteġuk mill-​uġigħ li jiġi minħabba l-​immoralità sesswali?

¹⁵ Ikkunsidra wkoll il-​kwistjoni taʼ l-​immoralità sesswali. Kull sena madwar id-​dinja jkun hemm eluf taʼ żgħażagħ mhux miżżewġin li jinqabdu tqal. Xi wħud jildu tfal li la jkollhom ix-​xewqa u lanqas l-​abbiltà li jrabbuhom. Oħrajn jagħmlu abort u jkollhom ibatu l-​konsegwenzi taʼ kuxjenza mimlija rimors. Imbagħad hemm irġiel u nisa żgħażagħ li jlaqqtu xi marda trasmessa sesswalment, bħalma hi l-​AIDS. M’għandniex xi ngħidu, għal min jaf lil Jehovah, l-​agħar konsegwenza li jistaʼ jkollu hija li jitlef ir-​relazzjoni tiegħu maʼ Jehovah.b (Galatin 5:​19-​21) Mhux taʼ b’xejn li l-​Bibbja tgħid: “Aħarbu ż-​żína!”—1 Korintin 6:18.

Naqdu lil “Dak Alla Hieni”

16. (a) Kif nafu li Jehovah iridek tgawdi ż-​żgħożija tiegħek? (b) Jehovah għala jagħti linji taʼ gwida biex int issegwihom?

¹⁶ Il-​Bibbja tiddeskrivi lil Jehovah bħala “Dak Alla hieni.” (1 Timotju 1:​11, NW) Hu jrid li int tkun ferħan ukoll. Fil-​fatt, il-​Kelma tiegħu stess tgħid: “Thenna, o żagħżugħ, fir-​rebbiegħa taʼ ħajtek, u ħa tkun ferħana qalbek f’jiem żgħożitek.” (Koħèlet 11:9) Iżda Jehovah jara ’l bogħod u jistaʼ jara l-​konsegwenzi kemm taʼ l-​imġiba tajba kif ukoll dik ħażina. Għalhekk hu jwissik: “Ftakar f’min ħalqek f’jiem żgħożitek qabel ma jaslu jiem in-​niket, u joqorbu s-​snin li tgħid għalihom: ‘Xejn ma jogħġbuni.’”—Koħèlet 12:1.

17, 18. Żagħżugħa Kristjana kif esprimiet il-​ferħ tagħha f’li taqdi lil Jehovah, u int kif tistaʼ tikseb l-​istess ferħ?

¹⁷ Illum, ħafna żgħażagħ sabu ferħ kbir f’li jaqdu lil Jehovah. Per eżempju Lina, li għandha 15-il sena tgħid: “Inħossni kunfidenti u sodisfatta. Ingawdi saħħa tajba għaliex qatt ma pejjipt jew ħadt id-​drogi. Il-​kongregazzjoni pprovdietli gwida prezzjuża li tgħinni niġġieled il-​pressjoni qawwija taʼ Satana. Wiċċi jixgħel bil-​ferħ minħabba s-​sħubija inkuraġġanti li nsib fis-​Sala tas-​Saltna. Imma l-​aqwa ħaġa hi li għandi l-​prospett li ma jitqabbel maʼ xejn taʼ ħajja taʼ dejjem fuq l-​art.”

¹⁸ Bħal Lina, ħafna żgħażagħ Kristjani qed jiġġieldu ġlieda iebsa għall-​fidi, u dan iġibilhom il-​ferħ. Huma jirrealizzaw li ħajjithom—għalkemm kultant tkun taʼ sfida—għandha skop u futur veru. Għalhekk, kompli aqdi lil dak Alla li jixtieq l-​aħjar għalik. Ferraħlu qalbu, u hu se jferrħek issa u għal dejjem!—Salm 5:12 (5:​11, NW).

[Noti taʼ taħt]

Tiftakar Int?

• Liema periklu tiffaċċja minħabba l-​wieħed “Ħażin,” Satana?

• Kif tistaʼ tferraħ qalb Jehovah?

• Il-​Bibbja kif turi li Jehovah jimpurtah minnek?

• Liema huma xi barkiet li tistaʼ tikseb meta taqdi lil Jehovah?

[Kaxxa/Stampa f’paġna 13]

Raġel Twajjeb Kien Għoddu Tfixkel

Asaf kien mużiċist Levita prominenti fit-​tempju taʼ Jehovah f’Iżrael tal-​qedem. Hu saħansitra kkompona għanjiet li kienu jintużaw fil-​qima pubblika. Iżda, minkejja l-​privileġġi speċjali li kellu, għal xi żmien Asaf ħassu jinġibed lejn il-​kondotta laxka taʼ dawk taʼ mparu, li milli jidher kienu jiksru l-​liġi t’Alla mingħajr ma jbatu l-​konsegwenzi. Asaf iktar tard ammetta: “Jien għal ftit ma għotrux riġlejja, għal ftit ma żlaqtx fil-​mixi tiegħi. Għax ġietni l-​għira għall-​kburin, xħin rajt il-​ħżiena jimxu ’l quddiem.”—Salm 73:​2, 3.

Iktar tard, Asaf mar fis-​santwarju t’Alla u talab dwar din il-​problema. Għal darb’oħra setaʼ jara l-​affarijiet mil-​lat spiritwali, u b’hekk fehem li Jehovah jobgħod il-​ħażen u li meta jasal il-​waqt kemm il-​ħżiena kif ukoll it-​tajbin se jaħsdu dak li jiżirgħu. (Salm 73:​17-20; Galatin 6:​7, 8) Verament, il-​ħżiena jinsabu fuq art tiżloq. Fl-​aħħar mill-​aħħar, huma se jaqgħu meta Jehovah jeqred din is-​sistema li ma tridx taf b’Alla.—Apokalissi 21:8.

[Stampi f’paġna 15]

Jehovah jixtieq l-​aħjar għalik, waqt li l-​mira taʼ Satana hi li jibilgħek

[Stampa f’paġna 16]

Ħafna żgħażagħ qed isibu l-​aqwa ferħ billi jaqdu lil Jehovah maʼ sħabhom il-​Kristjani