11 MOSÈ
“Idħol Għand il-Fargħun”
KIENU għaddew ħafna snin minn meta Mosè telaq mill-Eġittu. Hu kien inbidel ħafna. Issa kellu 80 sena, kien miżżewweġ, u kellu żewġt itfal. Mosè għamel 40 sena jieħu ħsieb in-nagħaġ tal-kunjatu tiegħu fl-art niexfa taʼ Midjan, u dan għenu biex isir raġel umli. Milli jidher, hu ma baqax jaħseb li kien se jkun il-wieħed li jeħles lill-Iżraelin minn taħt l-Eġizzjani.
Ġeħova ra kemm Mosè kien inbidel. Darba waħda, meta Mosè kien ħdejn il-Muntanja Ħoreb (Sinaj), Ġeħova ġiegħel għollieqa taqbad, però din ma kinitx qed tinħaraq. Meta ra dan, Mosè resaq viċin biex jara x’qed jiġri. Mill-għollieqa, Ġeħova kellmu permezz t’anġlu u qallu biex jerġaʼ jmur l-Eġittu u jeħles lill-Iżraelin mit-tbatija li kienu għaddejjin minnha. Biex jinkuraġġih, Alla spjegalu xi jfisser ismu billi qallu: “Jien Se Nsir Dak li Rrid Insir.” Din hi parti importanti mill-isem taʼ Ġeħova għax hu kien se jagħmel dak kollu li kien hemm bżonn biex jeħlishom minn taħt l-Eġizzjani u jagħmilhom poplu b’saħħtu.
Mosè ma kienx ċert jekk għandux imur għax ma ħassux kapaċi biex imur jitkellem quddiem il-Fargħun tal-Eġittu. Imma Ġeħova kkoreġieh u saħħaħlu l-fidi billi għamel xi ħaġa tal-għaġeb. Ġeħova ta l-qawwa lil Mosè biex jagħmel il-mirakli. Din kienet l-ewwel darba li fil-Bibbja naqraw li Ġeħova ta din il-qawwa lil xi ħadd uman. Hu tah ukoll lil ħuh Aron biex jgħinu u jitkellem f’ismu. Fl-aħħar, Mosè aċċetta li jkun il-wieħed li Ġeħova għażel biex jeħles il-poplu tiegħu.—Lhud 11:26.
Mosè u Aron reġgħu marru l-Eġittu biex jitkellmu mal-Fargħun. Imma l-Fargħun tgħidx kemm irrabja meta sema’ dak li qalulu. Minflok ħeles lill-Iżraelin, hu ordna biex dawn l-ilsiera jaħdmu iktar iebes. Imbagħad, Ġeħova reġaʼ bagħat lil Mosè għand il-Fargħun biex jgħidlu li Ġeħova kien se jġib l-ewwel kastig fuq l-Eġittu. Ġeħova bidel l-ilma tax-Xmara Nil f’demm! Imma l-Fargħun xorta ma ħalliex lill-Iżraelin jitilqu. Ġeħova baqaʼ jgħid lil Mosè biex imur għand il-Fargħun u Mosè b’kuraġġ kull darba mar biex jgħidlu kif Ġeħova kien se jikkastiga l-Eġittu. Imma dan il-mexxej kburi ma riedx jismaʼ. Mir-rabaʼ kastig, Ġeħova pproteġa lill-poplu tiegħu, u għalhekk batew biss l-Eġizzjani.
L-Għaxar Kastigi wrew li la l-allat tal-Eġizzjani, la l-Fargħun, u lanqas il-qassisin li jagħmlu l-maġija ma kellhom il-qawwa biex iwaqqfuhom. Imma l-Fargħun baqaʼ jwebbes rasu u xorta ma ħalliex l-ilsiera tiegħu jitilqu. Fid-disaʼ kastig, Ġeħova ġab dalma kbira fuq l-Eġittu kollu, imma l-Iżraelin xorta waħda kellhom id-dawl fid-djar tagħhom. Għall-ewwel, il-Fargħun qabel li jħalli lill-Iżraelin jitilqu, imma mbagħad reġaʼ biddel fehemtu. Hu wissa lil Mosè li jekk jerġaʼ jidħol għandu, żgur kien se joqtlu.
Għal darba wara l-oħra Mosè kellu jiffaċċja r-rabja tal-iktar mexxej b’saħħtu li kien hemm fuq l-art
Imbagħad Ġeħova bagħat l-għaxar kastig. Kull l-ewwel imwieled tal-Eġizzjani u tal-annimali li kellhom mietu. It-tifel tal-Fargħun ukoll miet. Il-Fargħun ġie umiljat u bagħat għal Mosè biex imur għandu. Mosè mar għall-aħħar darba. Il-Fargħun ħeles lill-Iżraelin u qal lil Mosè biex ibierku. Fl-aħħar, wara 430 sena li Abraham kien daħal fl-Art Imwiegħda, in-nies taʼ Ġeħova nħelsu! (Eżo. 12:40, 41) Meta l-Iżraelin telqu mill-Eġittu, magħhom telqu “ħafna barranin” li x’aktarx ħafna minnhom kienu Eġizzjani. Però għal darb’oħra, il-Fargħun reġaʼ biddel fehemtu u mar jiġri bl-armata kbira tiegħu għal wara l-Iżraelin!
Mosè u l-Iżraelin waslu ħdejn il-Baħar l-Aħmar imma deher li ma kienx hemm mod kif setgħu jaħarbu. L-Iżraelin bdew jibżgħu u Mosè talab lil Ġeħova biex jgħinhom. Ġeħova wiġibhom billi għamel wieħed mill-akbar mirakli. Hu fired il-Baħar l-Aħmar. Għalhekk, l-Iżraelin għaddew minn nofs il-baħar fuq art niexfa. Meta l-Fargħun ra li l-Iżraelin qed jaħarbu, hu u l-armata kollha tiegħu ġrew għal warajhom. Però, meta Ġeħova ra li l-Iżraelin kienu waslu n-naħa l-oħra, hu ħalla l-baħar jinżel fuq l-Eġizzjani, u b’hekk għerqu. L-ikbar u l-aqwa armata fid-dinja kienet ġiet fix-xejn!
Mosè qatt ma nesa dawk il-ġrajjiet tal-għaġeb li għadda minnhom. Issa l-fidi tiegħu kienet ħafna iżjed b’saħħitha. Hu mexxa u ħa ħsieb lill-Iżraelin għal 40 sena oħra sakemm miet fl-età taʼ 120 sena. Mosè ħallielna eżempju tajjeb taʼ fidi, imħabba, u kuraġġ.
Aqra l-istorja mill-Bibbja:
Biex tiddiskuti:
Matul dan iż-żmien f’ħajtu, Mosè kif wera kuraġġ?
Fittex Iktar
1. Ma nafux l-isem tal-Fargħun li kien qed imexxi dak iż-żmien, u ma nstab l-ebda rekord fil-kitbiet tal-Eġizzjani li l-Iżraelin ħarġu mill-Eġittu. Imma għala nistgħu nemmnu dan ir-rakkont mill-Bibbja? (g04 4/8 7 ¶4–9 ¶1-wcgr)
2. In-nies għala kienu jibżgħu mill-Fargħun? (w14 4/15 8 ¶1) A
PRISMA ARCHIVO/Alamy Stock Photo
Stampa A: Tpinġija antika taʼ Fargħun li kien imexxi iktar tard
3. L-Għaxar Kastigi kif urew li l-allat tal-Eġittu ma kienu jiswew għal xejn? (w93 10/15 3 ¶4–4 ¶3)
4. Kif nafu li t-triq li Ġeħova fetħilhom fil-Baħar l-Aħmar kienet wiesgħa, u x’aktarx kemm kienu Iżraelin li għaddew minnha? (it “Joħorġu mill-Pajjiż” ¶46-51-wcgr) B
Stampa B: Il-Baħar l-Aħmar min-naħa taʼ Sinaj minn fejn x’aktarx qasmu l-Iżraelin
Aħseb Fuq Dak li Tistaʼ Titgħallem
L-eżempju taʼ Mosè kif jinkuraġġina meta nħossuna li m’aħniex kapaċi nagħmlu dak li Ġeħova jridna nagħmlu? (Eżo. 4:10; 7:6, 7)
Aħna kif nistgħu ngħinu lil ħutna bħalma Aron għen lil Mosè jagħmel l-inkarigu tiegħu bil-kuraġġ? (Eżo. 4:14-16) Ċ
Stampa Ċ
Int kif tistaʼ turi l-kuraġġ li wera Mosè?
Ħu l-Ħin Biex Taħseb Dwar Dawn il-Mistoqsijiet
Din l-istorja x’tgħallimni dwar Ġeħova?
Din l-istorja kif inhi marbuta mal-iskop taʼ Ġeħova?
Meta Ġeħova jirxoxta lil Mosè, x’nixtieq nistaqsih dwar dan iż-żmien f’ħajtu?
Tgħallem Iktar
Aħseb kif it-tifsira tal-isem taʼ Ġeħova jistaʼ jgħin lit-tfal biex ikunu kuraġġużi.
L-esperjenzi li għadda minnhom Mosè x’għallmuh dwar il-kwalitajiet taʼ Ġeħova?