Wiegħed Ġesù Ħajja fis-​Sema lir-​Raġel Ħażin?

Il-​mistoqsija tqum minħabba li Ġesù wiegħed ħajja f’Ġenna fil-​futur lill-​kriminal li kien qed jiġi maqtul maġenbu. Ġesù qallu: “Tassew ngħidlek illum, Int tkun fil-​Ġenna miegħi.” (Luqa 23:43) Innota li Ġesù ma qallux fejn se tkun dik il-​Ġenna. Allura, ried Ġesù jfisser li r-​raġel ħażin kien se jingħaqad miegħu fis-​sema?

L-​ewwel, ejja nikkunsidraw jekk dak ir-​raġel ħażin kienx jilħaq il-​ħtiġijiet biex jgħix ħajja fis-​sema. Il-​bnedmin li għandhom il-​prospett għas-​sema ġew mgħammdin bl-​ilma u bl-​ispirtu qaddis, u b’hekk huma dixxipli taʼ Ġesù mnisslin bl-​ispirtu. (Ġwanni 3:3, 5) Ħtieġa oħra hi li jgħixu ħajjithom fi qbil mal-​livelli morali t’Alla u juru kwalitajiet bħalma huma l-​onestà, l-​integrità, u l-​mogħdrija. (1 Korintin 6:9-​11) Iridu wkoll jibqgħu leali lejn Alla u Ġesù sakemm tintemm il-​ħajja tagħhom fuq l-​art. (Luqa 22:28-​30; 2 Timotju 2:12) Huwa biss billi jilħqu dawn il-​ħtiġijiet li jistgħu juru li jistħoqqilhom li jiġu rxoxtati u kwalifikati biex jerfgħu r-​responsabbiltà kbira li hemm tistenniehom fis-​sema, jiġifieri, li jaqdu bħala qassisin u slaten maʼ Kristu fuq l-​umanità għal elf sena.—Rivelazzjoni 20:6.

B’kuntrast, ir-​raġel ħażin maġenb Ġesù għex bħala kriminal u miet bħala kriminal. (Luqa 23:32, 39-​41) Veru, hu wera rispett meta qal lil Ġesù: “Ftakar fija meta tidħol fis-​saltna tiegħek.” (Luqa 23:42) Minkejja dan, hu ma kienx sar dixxiplu taʼ Ġesù mgħammed u mnissel bl-​ispirtu, u lanqas kien ta prova li kien raġel rett u leali matul ħajtu. Huwa raġunevoli li Ġesù jwiegħdu saltna fis-​sema flimkien mas-​segwaċi tiegħu li baqgħu leali lejn Alla sat-​tmiem?—Rumani 2:6, 7.

Biex nagħtu eżempju: Jekk raġel jitolbok biex taħfirlu għax ikun seraqlek xi flus, int għandek mnejn tiddeċiedi li ma tħarrkux. Imma se tafdah biex jiħodlok ħsieb in-​negozju jew il-​familja tiegħek? Dawn ir-​responsabbiltajiet se tħallihom biss f’idejn dawk li int għandek fiduċja sħiħa fihom. Bl-​istess mod, dawk li jingħataw it-​tama taʼ ħajja fis-​sema għandhom jipprovdu bażi soda li jistgħu jiġu fdati biex jappoġġaw il-​livelli ġusti t’Alla meta jaħkmu fuq l-​umanità. (Rivelazzjoni 2:10) Minkejja li r-​raġel ħażin deher sinċier fit-​talba bil-​ħrara tiegħu fl-​aħħar minuta, hu ma pprovdiex bażi bħal din.

Imma Ġesù ma qallux lir-​raġel ħażin li kien se jkun miegħu fis-​sema dakinhar stess? Dan ma setax ikun, ladarba Ġesù nnifsu ma marx fis-​sema dakinhar. Minflok, hu kien “fil-​qalba taʼ l-​art”—fil-​qabar—għal tlett ijiem. (Mattew 12:40; Marku 10:34) Saħansitra wara li ġie rxoxtat, hu baqaʼ fuq l-​art għal 40 jum qabel ma telaʼ s-​sema. (Atti 1:3, 9) B’hekk, ir-​raġel ħażin ma setax ikun fis-​sema maʼ Ġesù dakinhar.

Allura, f’liema Ġenna se jmur ir-​raġel ħażin? Wara l-​irxoxt, hu se jkun fil-​Ġenna tal-​art, li fuqha se jaħkem Ġesù. (Atti 24:15; Rivelazzjoni 21:3, 4) Biex issir taf iktar dwar din il-​Ġenna u l-​ħtiġijiet t’Alla, tkellem maʼ wieħed mix-​Xhieda taʼ Ġeħova.