Junio

Xíniñúʼu kundi̱ʼi̱-iniyó xa̱ʼa̱ na̱ káʼviyó xíʼin, ta ná kotoyóna nda̱a̱ táki̱ʼva íyo na̱ hermanoyó. Sana íxayo̱ʼvi̱ña xíʼinna ña̱ va̱ása kutáʼankana xíʼin na̱ migona, ta nasamana ña̱ kéʼéna ña̱ va̱ʼa xa̱a̱na kachíñuna nu̱ú Jehová. Ña̱kán tá chíndeétáʼanyó xíʼin na̱ káʼviyó xíʼin ña̱ kuxini̱kana na̱ hermano na̱ íyo ti̱xin congregación. Na̱yóʼo kivi chindeétáʼanna xíʼinna ña̱ kuyatinkana nu̱ú Jehová, ta saátu kivi chindeétáʼanna xíʼinna tá yáʼana nu̱ú tu̱ndóʼo. Ta saátu kúni̱yó ña̱ vií ná kutáʼanna xíʼin na̱ congregación ta ná kotona na̱yóʼo nda̱a̱ táki̱ʼva íyo na̱ veʼena. Tá ná kutóokana kutáʼanna xíʼin na̱ ñuu Ndióxi̱, va̱ása ixayo̱ʼvi̱ña xíʼinna ña̱ sandákoona kutáʼanna xíʼin na̱ yiví na̱ va̱ása chíndeétáʼan xíʼinna ña̱ kuʼvi̱ka-inina kunina Jehová (Prov. 13:20). Tá ná kuxíka na̱ xi̱kuu migona nu̱úna, kunda̱a̱-inina ña̱ kivi ndani̱ʼína na̱ koo migona ti̱xin ñuu Jehová (Mar. 10:29, 30; 1 Ped. 4:4). w20.10 17 párr. 10, 11

Xíniñúʼu kooyó migo ta̱ Jesús ña̱ va̱ʼa kutáʼan viíyó xíʼin Jehová. ¿Nda̱chun káʼa̱nyó ña̱yóʼo? Ná kotoyó nda̱chun. Ña̱ nu̱ú, ta̱ Jesús ni̱ka̱ʼa̱nra ña̱yóʼo xíʼin na̱ discípulora: “Kúʼvi̱ní-ini ta̱ kúú yivá xínira ndóʼó, saáchi ni̱kuʼvi̱-inindó xi̱nindó yi̱ʼi̱” (Juan 16:27). Ta saátu ni̱ka̱ʼa̱nkara: “Nda̱a̱ ni iinna kǒo kivi xa̱a̱ nu̱ú yivái̱ tá kǒo ndíku̱nna yi̱ʼi̱” (Juan 14:6). Tá kúni̱yó kooyó migo Jehová soo va̱ása kúni̱yó kooyó migo ta̱ Jesús, nda̱a̱ táki̱ʼva íyo na̱ kúni̱ ki̱ʼvi ini iin veʼe soo va̱ása kúni̱na ya̱ʼana chí yéʼé saá íyoyó. Ta̱ Jesús xi̱niñúʼura táʼan ejemplo yóʼo tá ni̱ka̱ʼa̱nra ña̱ kúúra iin yéʼé nu̱ú kíʼvi tí ndikachi (Juan 10:7). Ta ña̱ u̱vi̱, ta̱ Jesús va̱ʼaní ni̱na̱ʼa̱ra ña̱ va̱ʼa ña̱ kúúmií yivára. Ni̱ka̱ʼa̱nra ña̱yóʼo xíʼin na̱ discípulora: “Na̱ xa̱a̱ xi̱ni yi̱ʼi̱ xa̱a̱ xi̱nituna yivái̱” (Juan 14:9). Ña̱kán ña̱ va̱ʼa kuxini̱yó Jehová xíniñúʼu kuxini̱yó ta̱ Jesús. Tá ku̱a̱ʼáka ña̱ʼa ná sakuaʼayó xa̱ʼa̱ ta̱ Jesús, kuʼvi̱ka-iniyó kuniyóra. Ta tá yatinka ná kooyó xíʼinra kuʼvi̱ka-iniyó kuniyó yivára. w20.04 21 párr. 5, 6

¿Ndáaña kivi keʼé na̱ ndóo nu̱ú cama á na̱ íyo nu̱ú tayi̱ tú ñúʼu llanta xa̱ʼa̱, na̱ va̱ása kivi kaka á na̱ va̱ása túvi nu̱ú? ¿Á kivi kununa xíʼin na̱ va̱lí na̱ kǒo kue̱ʼe̱ kúúmií? Kiviva. Ku̱a̱ʼání na̱ hermano na̱ xa̱a̱ chée á inkaka na̱ kúúmií kue̱ʼe̱, chíka̱a̱na ndee̱ ña̱ kununa ta ndakiʼinna ña̱ kutakuna, soo va̱ása kéʼéna ña̱yóʼo xíʼin ndee̱ miína, saáchi Jehová táxi ndee̱ ndaʼa̱na. Tá kúú, xíniso̱ʼona ña̱ reunión ti̱xin teléfono á xítonaña nu̱ú Internet. Ta saátu chíka̱a̱na ndee̱ ña̱ natúʼunna xa̱ʼa̱ Ndióxi̱ xíʼin na̱ veʼena, xíʼin na̱ doctor ta saátu xíʼin ná enfermera, ña̱ va̱ʼa xa̱a̱na koona discípulo ta̱ Jesús. Ná va̱ása taxiyó kasi ña̱ ndeéndóʼoyó á inkaka ña̱ʼa nu̱úyó, á sandákavaña-iniyó ta ndakanixi̱níyó ña̱ va̱ása kuchiñukayó kunuyó ña̱ ndakiʼinyó ña̱ kutakuyó. Jehová kúʼvi̱ní-inira xínira miíyó saáchi kándíxayóra ta saátu xa̱ʼa̱ ndiʼi chiñu ña̱ kéʼéyó nu̱úra. Tá yáʼayó nu̱ú ña̱ íxayo̱ʼvi̱ xíʼinyó saá kúú ña̱ xíniñúʼuníkayó Jehová, ta va̱ása sandákoo ndaʼa̱ra miíyó (Sal. 9:10). Chi yatinkava koora xíʼinyó. w20.04 29, 30 párr. 16, 17

¿Ndáaña kivi natúʼunyó xíʼin iin na̱ yiví na̱ xa̱a̱ kúúmií iin religión? Ná natúʼunyó xíʼinna xa̱ʼa̱ ña̱ xa̱a̱ kándíxana. Sana na̱kán ndásakáʼnuna iinlá Ndióxi̱, kándíxana ña̱ ta̱ Jesús kúú ta̱ kivi sakǎku na̱ ñuyǐví á kándíxatuna ña̱ si̱lóʼo kúma̱ní ta ndiʼi-xa̱ʼa̱ ña̱ sáxo̱ʼvi̱ miíyó. Ná kuniñúʼuyó ña̱ kándíxayó ña̱ kítáʼan xíʼin ña̱ kándíxana, ña̱ va̱ʼa natúʼunyó xíʼinna xa̱ʼa̱ Ndióxi̱ ta kuni̱na kuniso̱ʼona ña̱ káʼa̱nyó. Ná ndakaʼányó chi sana na̱ yiví yóʼo va̱ása kándíxana ndiʼi ña̱ sánáʼa̱ religión ña̱ ndíku̱nna. Ña̱kán, tá xa̱a̱ ku̱nda̱a̱-iniyó ndáa religión kúú ña̱ ndíku̱nna, ná kotoyó ndáaña kándíxana. Iin ta̱ misionero káʼa̱nra, ña̱ sava na̱ yiví na̱ káʼa̱n ña̱ kándíxana ña̱ trinidad va̱ása kándíxana ña̱ ta̱ kúú yivá, ta̱ kúú se̱ʼe xíʼin ña̱ espíritu santo kúúna iinlá Ndióxi̱. Káʼa̱nkara: “Tá kúnda̱a̱-iniyó xa̱ʼa̱ ña̱yóʼo va̱ása íxayo̱ʼvi̱kaña xíʼinyó ña̱ natúʼunyó xíʼinna”. Xa̱ʼa̱ ña̱yóʼo, ná kiʼinníyó kuenta ndáaña kúú ña̱ ndixa kándíxana. Ta nda̱a̱ táki̱ʼva ke̱ʼé ta̱ apóstol Pablo ná nasamayó ki̱ʼva ña̱ nátúʼunyó xíʼin ndiʼi na̱ yiví (1 Cor. 9:19-22). w20.04 10 párr. 9, 10

Ta̱ Daniel xíʼin ta̱ Juan ni̱ka̱ʼa̱nna, ña̱ sakǎku Jehová xíʼin ta̱ Jesús na̱ káchíñu nu̱úna ti̱xin ña̱ gran tribulación. Ta xa̱ʼa̱ ña̱yóʼo va̱ása xíniñúʼu yi̱ʼvíyó ña̱ koo chí nu̱únínu. Ta̱ Daniel ni̱ka̱ʼa̱nra ña̱ ka̱ʼyi̱ ki̱vi̱ na̱ ka̱ku nu̱ú libro. ¿Ndáaña xíniñúʼu keʼéyó ña̱ va̱ʼa ka̱ʼyi̱ ki̱vi̱yó nu̱ú ña̱ libro yóʼo? Xíniñúʼu na̱ʼa̱yó ña̱ kándíxayó ta̱ Jesús, ta̱ íyo nda̱a̱ táki̱ʼva íyo ndikachi ta̱ kúú kuenta Ndióxi̱ (Juan 1:29). Saátu xíniñúʼu ndataxiyó miíyó ndaʼa̱ Ndióxi̱ ta ndakuchiyó (1 Ped. 3:21). Ta chika̱a̱yó ndee̱ ña̱ natúʼunyó xíʼin inkaka na̱ yiví xa̱ʼa̱ Jehová, chi saá kúú ña̱ chíndeétáʼanyó xíʼin Reinora. Vitin kúú ña̱ xíniñúʼu chika̱a̱yó ndee̱ ña̱ ndakúka koo ña̱ kándíxayó Ndióxi̱ ta saátu na̱ ñuura. Ta saátu xíniñúʼu chindeétáʼanyó xíʼin Reino Ndióxi̱. Tá saá ná keʼéyó, ka̱kuyó tá ná sandíʼi-xa̱ʼa̱ Reino Ndióxi̱ ta̱ rey ña̱ norte xíʼin ta̱ rey ña̱ sur. w20.05 16 párr. 18, 19

Ta̱ Adán xíʼin ñá Eva xi̱xini̱na ki̱vi̱ Jehová, ta saátu xi̱kunda̱a̱-inina ña̱ ta̱yóʼo kúú ta̱ i̱xava̱ʼa ndiʼi ña̱ʼa, ta̱xira ña̱ tákuna, iin ñuʼú ña̱ liviní nu̱ú kundoona ta va̱ása koo ku̱a̱chi nu̱úna (Gén. 1:26-28; 2:18). Soo, ¿á ndakundeéna ndakanixi̱nína xa̱ʼa̱ ndiʼi ña̱ va̱ʼa ña̱ ke̱ʼé Jehová xa̱ʼa̱na? ¿Á ndakundeéna ndasandakúna ña̱ kúʼvi̱-inina xíninara xíʼin ña̱ táxina tíxa̱ʼvi ndaʼa̱ra? Tá xi̱tondosó ta̱ sáa̱-ini xíni Ndióxi̱ miína, ni̱na̱ʼa̱na ña̱ va̱ása níkeʼéna ña̱yóʼo. Ta̱ Ndi̱va̱ʼa xi̱niñúʼura iin ko̱o̱ ña̱ va̱ʼa ni̱nda̱ka̱tu̱ʼunra ña̱yóʼo ñá Eva: “¿Á ña̱ nda̱a̱ kúú ña̱ ni̱ka̱ʼa̱n Ndióxi̱ xíʼinndó ña̱ va̱ása kivi kaxíndó ku̱i̱ʼi ña̱ íyo ndaʼa̱ ndiʼi yitu̱n tú íyo nu̱ú jardín yóʼo?” (Gén. 2:16, 17; 3:1). Ta̱ Ndi̱va̱ʼa na̱samara ña̱ ni̱nda̱ka̱tu̱ʼunra ñá Eva ña̱ ná ndakanixi̱níñá ña̱ va̱ása va̱ʼa xa̱ʼa̱ Ndióxi̱. Soo ña̱ ni̱ka̱ʼa̱n Ndióxi̱ kúú ña̱ kiviva kaxína ku̱i̱ʼi ña̱ íyo ndaʼa̱ ndiʼi yitu̱n, ta va̱ása kaxína ña̱ íyo ndaʼa̱ iin kuitínú (Gén. 2:9). Ña̱kán, xíʼin ña̱ ni̱nda̱ka̱tu̱ʼun ta̱ Ndi̱va̱ʼa xi̱kuni̱ kachira ña̱ va̱ása va̱ʼa-ini Ndióxi̱. Sana ñá Eva ni̱nda̱ka̱tu̱ʼun xíʼin miíñá, á íyo iin ña̱ va̱ʼa ña̱ va̱ása xíín Ndióxi̱ taxira ndaʼa̱ñá. w20.06 3, 4 párr. 8, 9

Sava na̱ káchíñu nu̱ú Jehová túvina ña̱ sa̱xóʼvi̱ iin na̱ hermano inina. Ta̱ apóstol Pablo ni̱ka̱ʼa̱nra ña̱ sava yichi̱ koo iin xa̱ʼa̱ ña̱ sa̱a̱yó xíʼin inkana. Ta sana nda̱a̱ keʼéna iin ña̱ va̱ása va̱ʼa xíʼinyó. Soo tá va̱ása kíʼinyó kuenta xíʼin ña̱yóʼo, kivi ndakundeéyó sa̱a̱yó xíʼinna ta loʼo tá loʼo kuxíkayó nu̱ú na̱ ñuu Jehová. Ná kotoyó ña̱ ndo̱ʼo iin ta̱ hermano ta̱ naní Pablo ta̱ íyo chí Sudamérica. Ni̱ka̱ʼa̱nna ña̱ ke̱ʼéra iin ña̱ va̱ása va̱ʼa soo iin ña̱ vatá xi̱kuuña, ta xa̱ʼa̱ ña̱yóʼo ki̱ndaana chiñu ña̱ xi̱kuumiíra ti̱xin congregación. ¿Ndáaña ndo̱ʼora? Ta̱yóʼo káchira: “Ni̱sa̱a̱níi̱, tasaá ku̱xíkai̱ nu̱ú na̱ congregación”. Saátu sava na̱ ni̱ki̱ʼvi iin ku̱a̱chi ndeé tá ya̱chi̱, túvina ña̱ kúúmiíkana ku̱a̱chi ta ndákanixi̱nína ña̱ va̱ása xíniñúʼu kuʼvi̱-ini Ndióxi̱ kunirana. Ni xa̱a̱ nda̱ndikó-inina ta i̱xakáʼnu-ini Ndióxi̱ xa̱ʼa̱na, túvina ña̱ va̱ása xíniñúʼu kookana táʼan na̱ ñuura. ¿Ndáaña ndákanixi̱níyó xa̱ʼa̱ na̱ hermano na̱ yáʼa nu̱ú táʼan ña̱yóʼo? w20.06 19 párr. 6, 7

Xíniñúʼu ndakuniyó ndáa ña̱ʼa kúú ña̱ kivi saxóʼvi̱ miíyó, ta kuxíkayó nu̱úña (Heb. 5:14). Tá kúú, xíniñúʼu vií ndaka̱xinyó ña̱ kotonde̱ʼéyó á kusíkíyó. Ku̱a̱ʼání ña̱ kána nu̱ú televisión á nu̱ú película kúúmiíña ña̱ kini. Miíyó na̱ cristiano va̱ása xítonde̱ʼéyó ña̱yóʼo saáchi loʼo tá loʼo kivi sandíʼi-xa̱ʼa̱ña ña̱ kúʼvi̱-iniyó xíniyó Jehová. Kúnda̱a̱-iniyó ña̱ kúndasí Ndióxi̱ xínira ña̱ kini, ta na̱ yiví na̱ kéʼé ña̱yóʼo sáxo̱ʼvi̱na miína ta saátu inkana (Efes. 5:5, 6). Saátu miíyó xíniñúʼu kundaayó miíyó nu̱ú ña̱ vatá ña̱ káʼa̱n na̱ apóstata tá káʼa̱nna ña̱ vatá xa̱ʼa̱ na̱ hermano á kuni̱na ña̱ na̱ kaka-iniyó xa̱ʼa̱ na̱ ñuu Jehová (1 Tim. 4:1, 7; 2 Tim. 2:16). Ña̱ vatá yóʼo kivi sandíʼi-xa̱ʼa̱ña ña̱ kándíxayó Ndióxi̱. Ná va̱ása taxiyó ña̱ sandáʼvina miíyó, saáchi na̱ ta̱a na̱ káʼa̱n ña̱yóʼo va̱ása kúúmiína ña̱ nda̱a̱, chi ña̱ kúni̱na kúú ña̱ va̱ása kitáʼan viíyó ta natúʼun kúáchiyó (1 Tim. 6:4, 5). Ta kúni̱na ná kandíxayó ña̱ vatá ña̱ káʼa̱nna ta ná va̱ása kandíxayó na̱ hermanoyó. w20.09 29 párr. 13, 15

Na̱ xa̱a̱ ti̱ndaʼa̱ xíniñúʼu kuʼvi̱-inina kunitáʼanna ta ixato̱ʼó táʼanna (Efes. 5:33). Ña̱ Biblia sánáʼa̱ña miíyó ña̱ taxiyó ña̱ʼa ndaʼa̱ inkana nu̱úka ña̱ kuni̱yó taxinaña ndaʼa̱ miíyó (Hech. 20:35). Ta ña̱ va̱ʼa na̱ʼa̱na ña̱ kúʼvi̱-inina xínitáʼanna ta íxato̱ʼó táʼanna, u̱vi̱ saána xíniñúʼu vitá koo inina. Ku̱a̱ʼání na̱ hermano na̱ xa̱a̱ ti̱ndaʼa̱ si̱íní íyona, xa̱ʼa̱ ña̱ vitá íyo inina. Iin ta̱ hermano ta̱ naní Steven káchira: “Tá vií kítáʼanna, chindeétáʼanna xíʼin táʼanna tá yáʼana nu̱ú tu̱ndóʼo. Va̱ása ndakanixi̱nína xa̱ʼa̱ ña̱yóʼo, ‘¿ndáaña kúú ña̱ xíniñúʼu keʼíi̱?, chi ndakanixi̱nína ¿ndáaña kúú ña̱ xíniñúʼu keʼéndi̱?ʼ”. Ta ki̱ʼva saátu íyo ña̱ ndákanixi̱ní ñá síʼira ñá Stephanie. Ñáyóʼo káchiñá: “Nda̱a̱ ni iinna va̱ása kútóona koona xíʼin na̱ kánitáʼan xíʼinna. Tá va̱ása inkáchi íyo ña̱ ndákanixi̱níndi̱, nándukúndi̱ nda̱chun kúu ña̱yóʼo. Tasaá káʼa̱nndi̱ xíʼin Ndióxi̱, nándukúndi̱ tutu ña̱ káʼa̱n xa̱ʼa̱ ña̱yóʼo ta nátúʼunndi̱ xa̱ʼa̱ña. Ta va̱ása kánitáʼanndi̱ chi chíka̱a̱ndi̱ ndee̱ ña̱ u̱vi̱ saándi̱ ndasaviíndi̱ ku̱a̱chi”. Si̱íníka koo na̱ ti̱ndaʼa̱ tá ná va̱ása ndakanixi̱nína ña̱ ndáyáʼviníkana nu̱ú na̱ inka. w20.07 3, 4 párr. 5, 6

Tá káchíñuyó nu̱ú Jehová va̱ása xíniñúʼu ndakanixi̱níyó ña̱ xa̱a̱ kúúmiíyó ndee̱ ña̱ keʼéyó iin ña̱ʼa á xa̱a̱ xíni̱yó keʼéyóña. Ta̱ apóstol Pablo ka̱ʼvi va̱ʼara chi ta̱ sa̱náʼa̱-ñaʼá xi̱kuu ta̱ Gamaliel, iin ta̱a ta̱ xi̱ndayáʼviní nu̱ú na̱ judío tiempo saá (Hech. 5:34; 22:3). Ta ni̱xi̱yo iin tiempo ña̱ xi̱kuumiíra iin chiñu ña̱ ndáyáʼvi nu̱ú na̱ judío (Hech. 26:4). Soo ni saá, va̱ása níndakanixi̱níra ña̱ ndáyáʼviníra. Xíʼin ña̱ si̱í-ini sa̱ndákoo ta̱ Pablo ña̱ʼa ña̱ ndáyáʼviní nu̱ú na̱ yiví (Filip. 3:8). Soo, ni̱xo̱ʼvi̱ra xa̱ʼa̱ ña̱ nda̱kundiku̱nra ta̱ Cristo, chi na̱ ñuu miíra ni̱sa̱a̱-inina xi̱ninara (Hech. 23:12-14). Ni xi̱kuura ta̱ ñuu Roma, ka̱ninara ta chi̱ka̱a̱nara veʼeka̱a (Hech. 16:19-24, 37). Ta xi̱kunda̱a̱-inira ña̱ kúúra ta̱ yiví ku̱a̱chi, xa̱ʼa̱ ña̱yóʼo xi̱ ixayo̱ʼvi̱ña xíʼinra keʼéra ña̱ va̱ʼa (Rom. 7:21-25). Soo va̱ása nítaxira kasi ña̱yóʼo nu̱úra á na̱ xi̱sa̱a̱-ini xi̱xiniñaʼá. Chi ni̱ka̱ʼa̱nra ña̱yóʼo: “Kúsi̱í-inii̱ xa̱ʼa̱ ña̱ ndákava-inii̱”. ¿Nda̱chun? Saáchi tá xi̱ndakava-inira saá kúú ña̱ xi̱kiʼinra kuenta ndáa ki̱ʼva xi̱chindeétáʼan ndee̱ Ndióxi̱ xíʼinra (2 Cor. 4:7; 12:10). w20.07 16 párr. 7, 8

Tiempo vitin, xíniñúʼu kundi̱ʼi̱-iniyó xa̱ʼa̱ ña̱ ku̱ʼu̱nyó natúʼunyó xíʼin na̱ yiví xa̱ʼa̱ Reino Ndióxi̱. Ta̱ Jesús ni̱ka̱ʼa̱nra ña̱ tá ná ya̱ʼa tiempo ña̱ kuvira na̱ ndíku̱nñaʼá ndakundeéna keʼéna chiñu yóʼo, ta ku̱a̱ʼáníka na̱ yiví natúʼunna xíʼin. Tá nda̱taku ta̱ Jesús, xi̱niñúʼura ndee̱ra ña̱ chindeétáʼanra xíʼin sava na̱yóʼo ña̱ ti̱inna ku̱a̱ʼání ti̱a̱ká. Tasaá ni̱na̱ʼa̱ra nu̱úna ña̱ ndáyáʼviníka ña̱ ku̱ʼu̱nna nandukúna na̱ yiví nu̱ú inkaka chiñu (Juan 21:15-17). Tá kúma̱ní si̱lóʼo ndikó ta̱ Jesús chí ndiví, ni̱ka̱ʼa̱nra xíʼin na̱ discípulora ña̱ chiñu ña̱ natúʼunna xíʼin na̱ yiví ña̱ ki̱xáʼara xíʼin, su̱ví kuití ñuu Israel natúʼunna xa̱ʼa̱ña chi saátu natúʼunna xa̱ʼa̱ña inka ñuu (Hech. 1:6-8). Tá ni̱ya̱ʼa ku̱a̱ʼá ku̱i̱ya̱ ni̱na̱ʼa̱ra nu̱ú ta̱ apóstol Juan ndáaña kuu “ki̱vi̱ ña̱ kixaa̱ ta̱ táta”. Ta̱ Juan xi̱nira iin ta̱ ángel, ta “níʼira tu̱ʼun va̱ʼa ña̱ káʼa̱nra xíʼin na̱ ndóo nu̱ú ñuʼú yóʼo, ni nda̱a̱ ndáaka ñuuna á ni nda̱a̱ ndáaka tu̱ʼun káʼa̱nna” (Apoc. 1:10; 14:6). Xíʼin ña̱yóʼo kúnda̱a̱-iniyó ña̱ kúni̱ Jehová ña̱ ndakundeéyó natúʼunyó xíʼin na̱ yiví xa̱ʼa̱ra nda̱a̱ ná ndiʼi chiñu yóʼo. w20.09 9 párr. 5

Na̱ veʼe ta̱ Abrahán ni̱ya̱ʼana nu̱ú sava tu̱ndóʼo. Ñá síʼira ñá Sara va̱ása níkivi koo se̱ʼeñá. Ta ku̱a̱ʼání ku̱i̱ya̱ ku̱suchí-inina xa̱ʼa̱ ña̱ xi̱ndoʼona ña̱yóʼo. Tá ni̱ya̱ʼa tiempo ñá Sara ta̱xiñá ñá Agar, ñá xi̱kachíñu nu̱úñá, ña̱ kooñá ñá síʼi ta̱ Abrahán. Tasaá, na̱ se̱ʼe ñá Agar xa̱a̱na koona se̱ʼe ta̱ Abrahán xíʼin ñá Sara. Soo tá ku̱nda̱a̱-ini ñá Agar ña̱ ñúʼu se̱ʼeñá ta̱ Ismael, va̱ása ní ixato̱ʼókañá ñá Sara. Xa̱ʼa̱ ña̱ ndu̱ndeéní ku̱a̱chi yóʼo ñá Sara sa̱xóʼvi̱ñá ñá Agar, tasaá xi̱nu ñá Agar (Gén. 16:1-6). Tá ni̱ya̱ʼa tiempo ni̱ke̱e se̱ʼe ñá Sara, ta tá ka̱ku ta̱ loʼo yóʼo, ta̱ Abrahán chi̱núura ki̱vi̱ra ña̱ kunaníra Isaac. Xi̱kuʼvi̱-inira xi̱xinira u̱vi̱ saá se̱ʼera, ta̱ Ismael xíʼin ta̱ Isaac. Soo xa̱ʼa̱ ña̱ ke̱ʼé ta̱ Ismael ña̱ va̱ása va̱ʼa xíʼin ta̱ Isaac, ta̱ Abrahán ni̱ka̱ʼa̱nra xíʼin ta̱ Ismael ta saátu xíʼin ñá Agar ña̱ ná ku̱ʼu̱nna (Gén. 21:9-14). Tá ni̱ya̱ʼaka ku̱i̱ya̱ Jehová ni̱ka̱ʼa̱nra xíʼin ta̱ Abrahán ña̱ ná kaʼníra ta̱ Isaac (Gén. 22:1, 2; Heb. 11:17-19). Tá ku̱u ña̱yóʼo ta̱ Abrahán xi̱niñúʼu kandíxaníra ña̱ saxínu Jehová ña̱ ki̱ndoora xíʼinra xa̱ʼa̱ na̱ se̱ʼera. w20.08 4 párr. 9, 10

Na̱ ndataku kusi̱íní-inina tá ná sandákoona ña̱ xi̱keʼéna tá ya̱chi̱ ta kixáʼana kutakuna nda̱a̱ táki̱ʼva kúni̱ mií Ndióxi̱. Tá ná kandíxana nasamana ña̱ kéʼéna ndakiʼinna ña̱ kutakuna, soo tá ná va̱ása kandíxana ña̱ káʼa̱n Ndióxi̱, va̱ása taxikara koona nu̱ú ñuyǐví livi (Juan 5:28, 29; Is. 65:20). Tá ná kaʼndachíñu Reino Ndióxi̱, ndiʼi na̱ káchíñu nu̱úra kunina xi̱nu ña̱ káʼa̱n Proverbios 10:22: “Ña̱ va̱ʼa ña̱ táxi Jehová ndaʼa̱yó kúú ña̱ ndásakúiká miíyó, ta va̱ása xóʼvi̱yó xíʼin ña̱yóʼo”. Espíritu Jehová kúú ña̱ chindeétáʼan xíʼin na̱ ñuura ña̱ ndukúikána, ña̱yóʼo kúni̱ kachiña ña̱ xa̱a̱na koona nda̱a̱ táki̱ʼva íyo ta̱ Cristo, ta loʼo tá loʼo va̱ása kuumiíkana ku̱a̱chi (Juan 13:15-17; Efes. 4:23). Iin iin ki̱vi̱ ña̱ ya̱ʼa va̱ʼaníka na̱ yiví koona, ndakúníka koona ta va̱ása kuumiíkana kue̱ʼe̱, si̱íní koona (Job 33:25). w20.08 17 párr. 11, 12

Xíniñúʼu ndakaʼányó ña̱ sava na̱ hermano nda̱kaxinna ña̱ va̱ása tindaʼa̱na. Ta inkana, kúni̱vana tindaʼa̱na soo ta̱ʼán ndani̱ʼína na̱ tindaʼa̱ xíʼinna. Inkana sana ni̱xi̱ʼi̱ na̱ ti̱ndaʼa̱ xíʼinna. Ni nda̱a̱ ndáaka ña̱ ku̱u, va̱ása xíniñúʼu nda̱ka̱tu̱ʼunyóna nda̱chun kúú ña̱ ta̱ʼán tindaʼa̱na, ta ni va̱ása ka̱ʼa̱nyó xíʼinna á kúni̱na ña̱ ná chindeétáʼanyó xíʼinna ña̱ ndani̱ʼína na̱ tindaʼa̱ xíʼinna. Sana kivi ka̱ʼa̱nna xíʼinyó ña̱ chindeétáʼanyó xíʼinna. Soo tá ta̱ʼán ndukúna ña̱yóʼo nu̱úyó, ná ndakanixi̱níyó xa̱ʼa̱ ña̱ kundoʼona tá ná ka̱ʼa̱nyó xíʼinna ña̱ chindeétáʼanyó xíʼinna (1 Tim. 5:13). Na̱ hermanoyó na̱ ta̱ʼán tindaʼa̱ táxinína tíxa̱ʼvi tá chíndayáʼviyóna xa̱ʼa̱ ña̱ va̱ʼa kúúmiína ta su̱ví xa̱ʼa̱ ña̱ ta̱ʼán tindaʼa̱na. Ná va̱ása ndakanixi̱níyó ña̱ xóʼvi̱na xa̱ʼa̱ ña̱ ta̱ʼán tindaʼa̱na. Va̱ʼaka ná kundayáʼvina nu̱úyó xa̱ʼa̱ ña̱ nda̱kú íyo inina xíʼin Ndióxi̱. Tá saá ná keʼéyó va̱ása ndakanixi̱nína ña̱ káʼa̱nyó ña̱yóʼo xíʼinna “Va̱ása xíniñúʼi̱ yóʼó” (1 Cor. 12:21). Chi na̱ʼa̱yó ña̱ íxato̱ʼóyóna ta chíndayáʼviyó chiñu ña̱ kúúmiína ti̱xin congregación. w20.08 29, 30 párr. 10, 14

Tá ni̱ya̱ʼa tiempo ki̱ta ta̱ Jesús nu̱ú ta̱ apóstol Pablo (1 Cor. 15:8). Tá ku̱a̱ʼa̱n ta̱ Saulo chí ñuu Damasco xi̱niso̱ʼora ña̱ ni̱ka̱ʼa̱n ta̱ Jesús xíʼinra tá xa̱a̱ nda̱takura, tasaá xi̱nira iin visión ña̱ íyo ta̱ Jesús chí ndiví (Hech. 9:3-5). Ña̱ ndo̱ʼo ta̱ Pablo kúú inka ña̱ náʼa̱ ña̱ ndixa nda̱taku ta̱ Jesús (Hech. 26:12-15). Sava na̱ yiví ndákanda̱ní-inina xíʼin ña̱ ni̱ka̱ʼa̱n ta̱ Pablo, saáchi tá kúma̱níka kuu ña̱yóʼo i̱xandi̱va̱ʼara xíʼin na̱ cristiano. Tá ni̱xa̱a̱ra ka̱ndíxara ña̱ nda̱taku ta̱ Jesús, chi̱ka̱a̱ra ndee̱ ña̱ na̱túʼunra xíʼin inkana xa̱ʼa̱ ña̱yóʼo. Tá ni̱xi̱kara na̱túʼunra xíʼin na̱ yiví xa̱ʼa̱ ña̱ nda̱taku ta̱ Jesús, ka̱ninara, xi̱ndika̱a̱ra veʼeka̱a ta saátu ndo̱ʼora tu̱ndóʼo xíʼin barco tá ni̱ki̱ʼvinú ini ti̱kui̱í, soo ku̱ndeé-inira nu̱ú ndiʼi ña̱yóʼo (1 Cor. 15:9-11; 2 Cor. 11:23-27). Xa̱ʼa̱ ña̱ xi̱kandíxaníra ña̱ nda̱taku ta̱ Jesús nda̱a̱ chi̱ka̱a̱-inira ña̱ kuvira xa̱ʼa̱ ña̱yóʼo. ¿Á su̱ví ña̱ nda̱a̱ kúú ña̱ chíndeétáʼanní ña̱yóʼo xíʼinyó ña̱ va̱ʼa kandíxayó ña̱ nda̱taku ta̱ Jesús? Ta saátu chíndeétáʼanña xíʼinyó ña̱ kandíxakayó ña̱ ndataku na̱ ni̱xi̱ʼi̱. w20.12 3 párr. 8-10

Ná ndakanixi̱níyó xa̱ʼa̱ ña̱yóʼo: “¿Á chíka̱i̱ ndee̱ ña̱ ku̱ʼi̱n ndiʼi reunión?”. Chi yóʼo kúú nu̱ú ndákiʼinyó ndee̱ ña̱ xíniñúʼuyó ña̱ va̱ʼa ndakundeéyó kachíñuyó nu̱ú Jehová, ta saátu va̱ʼa kítáʼanyó xíʼin na̱ hermano (Mat. 11:28). Saátu kivi ndakanixi̱níyó xa̱ʼa̱ ña̱yóʼo: “¿Á ndiʼi ki̱vi̱ káʼvii̱ Biblia? Tá íyoyó xíʼin na̱ veʼeyó, ¿á ndiʼi semana ndákutáʼanyó ña̱ va̱ʼa kaʼviyó? Á tá íyo mitúʼunyó, ¿á táváyó tiempo ña̱ kaʼviyó nda̱a̱ táki̱ʼva kéʼé na̱ familia? ¿Á chíka̱a̱yó ndee̱ ña̱ natúʼunyó xíʼin na̱ yiví xa̱ʼa̱ Ndióxi̱ ta sanáʼa̱yóna?”. ¿Nda̱chun xíniñúʼu ndakanixi̱níyó xa̱ʼa̱ ña̱yóʼo? Ña̱ Biblia káchiña ña̱ xíto Jehová ndáaña ndákanixi̱níyó xíʼin ña̱ íyo níma̱yó. Ta saátu miíyó xíniñúʼu keʼéyó ña̱yóʼo (1 Crón. 28:9). Tá xítoyó ña̱ xíniñúʼu nasamayó ña̱ kúni̱yó keʼéyó, ki̱ʼva ña̱ íyoyó xíʼin ña̱ ndákanixi̱níyó, ná ka̱ʼa̱nyó xíʼin Jehová chindeétáʼanra xíʼinyó. Vitin kúú ña̱ xíniñúʼu koo tu̱ʼvayó ña̱ ya̱ʼayó nu̱ú tu̱ndóʼo ña̱ si̱lóʼo kúma̱ní koo chí nu̱únínu. w20.09 19 párr. 19, 20

Ta̱ Jesús ni̱ka̱ʼa̱nra xa̱ʼa̱ u̱vi̱ ejemplo ña̱ va̱ʼa sanáʼa̱ra miíyó ndáaña xíniñúʼu keʼé iinna ña̱ va̱ʼa xa̱a̱na koona discípulora. Ni̱ka̱ʼa̱nra xa̱ʼa̱ iin ta̱ ta̱a, ta̱ kúni̱ ixava̱ʼa iin veʼe xíʼin xa̱ʼa̱ iin ta̱ rey ta̱ kúni̱ ku̱ʼu̱n kanitáʼan xíʼin inkara. Ni̱ka̱ʼa̱nra xa̱ʼa̱ ta̱ kúni̱ ixava̱ʼa iin veʼe ña̱ siʼna xíniñúʼu kotora ta tavára ki̱ʼva á kita xu̱ʼúnra ña̱ saxínuraña, ta ni̱ka̱ʼa̱nra xa̱ʼa̱ ta̱ rey ña̱ siʼna xíniñúʼu kotora á kuchiñu na̱ soldado kanitáʼanna (Luc. 14:27-32). Ta̱ Jesús xi̱kunda̱a̱-inira ña̱ ndiʼi na̱ kúni̱ xa̱a̱ koo discípulora, siʼna xíniñúʼu ndakani vií xi̱nína, ndáaña xíniñúʼu keʼéna ña̱ va̱ʼa xa̱a̱na koona discípulora. Xa̱ʼa̱ ña̱yóʼo, ña̱ va̱ʼa kuchiñu iin na̱ yiví keʼéna ña̱ ni̱ka̱ʼa̱n ta̱ Jesús xíniñúʼu ka̱ʼa̱nyó xíʼinna ña̱ ná kaʼvina ndiʼi semana. Tá kúma̱níka ku̱ʼu̱nyó kaʼviyó xíʼin iin na̱ yiví, xíniñúʼu kaʼvi kúeeyó. Tándi̱ʼi ná ndakanixi̱níyó xa̱ʼa̱ na̱ káʼviyó xíʼin, ta ná kotoyó ndáa ki̱ʼva káxi ka̱ʼa̱nyó xíʼinna, tasaá va̱ása ixayo̱ʼvi̱ña xíʼinna kunda̱a̱-inina ta kivi keʼéna ña̱ sákuaʼana (Neh. 8:8; Prov. 15:28a). w20.10 7 párr. 5; 8 párr. 7

Káxi ni̱ka̱ʼa̱n ta̱ Jesús ña̱ xíniñúʼu sanáʼa̱yó na̱ yiví xa̱ʼa̱ chiñu ña̱ xa̱ʼndara. Ta̱ Jesús va̱ása níka̱ʼa̱n kuitíra “Sanáʼa̱ndóna ndiʼi ña̱ʼa ña̱ sa̱náʼi̱ ndóʼó”. Chi ña̱ ni̱ka̱ʼa̱nra kúú “Sanáʼa̱ndóna ná keʼéna ndiʼi ña̱ʼa ña̱ sa̱náʼi̱ ndóʼó”. Ña̱kán tá kúni̱yó saxínuyó ña̱ ni̱ka̱ʼa̱nra, xíniñúʼu sanáʼa̱yó na̱ káʼviyó xíʼin ndáaña keʼéna ta saátu ndáa ki̱ʼva keʼénaña (Hech. 8:31). Tá káʼviyó xíʼin iin na̱ yiví, sánáʼa̱yóna ndáaña kúú ña̱ ndátu Ndióxi̱ ná keʼéyó. Soo su̱ví ña̱yóʼo kuití xíniñúʼu keʼéyó. Chi xíniñúʼu sanáʼa̱yóna ña̱ ndiʼi ki̱vi̱ keʼéna ña̱ sákuaʼana (Juan 14:15; 1 Juan 2:3). Xíʼin ña̱ kéʼéyó kivi na̱ʼa̱yó nu̱úna ndáa ki̱ʼva keʼéna ña̱ káʼa̱n tu̱ʼun Ndióxi̱ tá ku̱a̱ʼa̱nna escuela, nu̱ú káchíñuna á tá ndáka̱xinna ña̱ kotonde̱ʼéna á ña̱ kusíkína. Ta tá kéʼéyó oración xíʼin na̱ káʼviyó xíʼin, kivi ka̱ʼa̱nyó xíʼin Jehová ña̱ ná kuniñúʼura espíritu santora ña̱ va̱ʼa chindeétáʼanra xíʼinna (Juan 16:13). w20.11 2, 3 párr. 3-5

Ni̱xi̱yo inka ña̱ i̱xayo̱ʼvi̱ xíʼin na̱ discípulo ta̱ Jesús. Tá kúú, su̱ví ndiʼi na̱ yiví níxikuumií tu̱ʼun Ndióxi̱ ta ni va̱ása níxikuumiína ña̱ kivi chindeétáʼan xíʼinna ña̱ kunda̱a̱-inina xíʼin tu̱ʼun Ndióxi̱, táʼan ña̱ kúúmiíyó tiempo vitin. Ta saátu xi̱natúʼunna xíʼin inka na̱ yiví na̱ xi̱ka̱ʼa̱n inka tu̱ʼun. Soo ni saá na̱ discípulo yóʼo ku̱chiñuvana ke̱ʼéna iin chiñu ña̱ káʼnuní: tá ni̱ya̱ʼa loʼo ku̱i̱ya̱ xa̱a̱ ku̱chiñuvana na̱túʼunna xíʼin ndiʼi na̱ yiví na̱ íyo nu̱ú ñuʼú yóʼo (Col. 1:6, 23). Tiempo vitin Jehová ndákundeéra níʼira yichi̱ nu̱ú na̱ ñuura, ta táxira ndee̱ ndaʼa̱na ta xíniñúʼura tu̱ʼunra ña̱ va̱ʼa kuniʼira yichi̱ nu̱úna, nu̱ú ña̱yóʼo ni̱ka̱ʼyi̱ ña̱ ke̱ʼé ta̱ Jesús ta saátu chiñu ña̱ xa̱ʼndara nu̱ú na̱ discípulora ña̱ ná ndakundeéna keʼéna chiñu ña̱ xa̱a̱ ki̱xáʼara xíʼin (Mat. 28:19, 20). Jehová va̱ása ndáka̱xinra na̱ yiví, ña̱kán ni̱ka̱ʼa̱nra ña̱ ndiʼi na̱ yiví ni “nda̱a̱ ndáaka ñuuna nda̱a̱ ndáaka tu̱ʼun káʼa̱nna” kunda̱a̱-inina xa̱ʼa̱ tu̱ʼun va̱ʼa (Apoc. 14:6, 7). Chi kúni̱ra ná kunda̱a̱-ini na̱ yiví xa̱ʼa̱ Reinora. w20.10 21 párr. 6-8

Ta̱ rey David xi̱kuʼvi̱ní-inira xi̱xinira ley Jehová (Sal. 1:1-3). Ta̱yóʼo xi̱kunda̱a̱-inira ña̱ sáka̱ku Jehová na̱ vitá-ini soo kúxíkára nu̱ú na̱ ni̱nu kúni. Xa̱ʼa̱ ña̱yóʼo ta̱xira ná nasama ley Ndióxi̱ ña̱ ndákanixi̱níra. Ta ka̱ʼyíra ña̱yóʼo: “Ndasakáʼnui̱ Jehová ta̱ táxi consejo ndaʼíi̱. Ta nda̱a̱ ñuú ndákanixi̱níi̱ xa̱ʼa̱ ña̱ xíniñúʼu nasamai̱” (Sal. 16:7). Tá vitá íyo iniyó taxiyó ña̱ ná nasama Biblia ña̱ va̱ása va̱ʼa ndákanixi̱níyó, tasaá va̱ása xa̱a̱yó keʼéyó ña̱ va̱ása va̱ʼa. Ta ña̱yóʼo ka̱ʼa̱n tu̱ʼun Ndióxi̱ xíʼinyó: “Ña̱yóʼo kúú yichi̱. Nu̱ú ña̱yóʼo ku̱ʼún”. Ka̱ʼa̱nña xíʼinyó tá xa̱a̱ ku̱a̱ʼa̱n sándakooyó yichi̱ yóʼo ta ki̱xáʼayó ku̱a̱ʼa̱nyó chí ndaʼa̱ kúaʼa á chí ndaʼa̱ yítin (Is. 30:21). Tá ná kuniso̱ʼoyó ña̱ káʼa̱n Jehová xíʼinyó ku̱a̱ʼání ña̱ va̱ʼa ndakiʼinyó (Is. 48:17). Tá kúú, va̱ása kukaʼan nu̱úyó xa̱ʼa̱ ña̱ ka̱ʼa̱nna xíʼinyó ndáaña kúú ña̱ va̱ása va̱ʼa kéʼéyó. Ta yatinka kooyó xíʼin Jehová saáchi kunda̱a̱-iniyó ña̱ ndíʼi̱-inira xa̱ʼa̱yó chi kúúyó se̱ʼera na̱ kúni̱níra xínira (Heb. 12:7). w20.11 20 párr. 6, 7

Sana nda̱a̱ sava na̱ cristiano na̱ ni̱xi̱yo ñuu Corinto ni̱xa̱a̱na ni̱xi̱ka-inina xa̱ʼa̱ ña̱yóʼo (1 Cor. 15:12). Ta sana inkana xi̱ndakanixi̱nína xa̱ʼa̱ ña̱ ndataku na̱ ni̱xi̱ʼi̱ ña̱ kúúña iin ña̱ ndánaʼa̱ kuití. Xi̱ndakanixi̱nína ña̱ tá kúma̱ní xa̱a̱na koona cristiano, xa̱ʼa̱ ña̱ xi̱kuumiína ku̱a̱chi tá íyo na̱ ni̱xi̱ʼi̱ saá ni̱xi̱yona; soo tá ni̱xa̱a̱na ndu̱una cristiano, i̱xakáʼnu-ini Ndióxi̱ xa̱ʼa̱ ku̱a̱china ta nda̱a̱ táki̱ʼva íyo na̱ nda̱taku saá ni̱xi̱yona. Soo ni nda̱a̱ ndáaka ña̱ xi̱ndakanixi̱nína tá va̱ása níxi̱kandíxana ña̱ nda̱taku ta̱ Jesús á ña̱ ndataku na̱ ni̱xi̱ʼi̱, va̱ása ndáyáʼvi ña̱ xi̱kandíxana Ndióxi̱. Tá va̱ása nísandátaku Ndióxi̱ ta̱ Jesús ña̱yóʼo kúni̱ kachiña ña̱ va̱ása níchaʼvira xa̱ʼa̱ ku̱a̱china, ta saátu va̱ása kivi ixakáʼnu-ini Ndióxi̱ xa̱ʼa̱na. Ña̱kán, na̱ va̱ása níxikandíxa ña̱ nda̱taku ta̱ Jesús kǒo ña̱ kivi kundatuna ndakiʼinna chí nu̱únínu (1 Cor. 15:13-19; Heb. 9:12, 14). Ta̱ apóstol Pablo ku̱nda̱a̱-inira ña̱ nda̱taku ta̱ Cristo. Soo va̱ʼaníka ña̱ nda̱taku ta̱yóʼo nu̱ú ña̱ nda̱taku inkana tá ya̱chi̱, saáchi na̱kán ni̱xi̱ʼi̱ tukuna. Ta saátu, ta̱ Pablo ni̱ka̱ʼa̱nra xa̱ʼa̱ ta̱ Jesús ña̱ kúúra “ta̱ nu̱ú nda̱taku nu̱ú ndiʼika na̱ ni̱xi̱ʼi̱”. Saáchi ta̱yóʼo kúú ta̱ siʼna nda̱taku ta ndu̱ura espíritu, ta kúútura ta̱ siʼna ku̱a̱ʼa̱n chí ndiví (1 Cor. 15:20; Hech. 26:23; 1 Ped. 3:18, 22). w20.12 5 párr. 11, 12

Tá siglo nu̱ú, na̱ cuerpo gobernante, na̱ ni̱xi̱yo chí ñuu Jerusalén, inkáchi ka̱chíñuna ña̱ va̱ʼa vií kutáʼan na̱ ñuu Ndióxi̱ ta táxi̱n koona (Hech. 2:42). Tá ku̱i̱ya̱ 49 tá ni̱xi̱yo ku̱a̱chi xa̱ʼa̱ ña̱ ta̱ʼnda̱ nu̱ú yi̱i̱ na̱ ta̱a, na̱ cuerpo gobernante ndu̱kúna espíritu santo nu̱ú Ndióxi̱ ña̱ va̱ʼa vií ndatiinna ku̱a̱chi kán. Tá níndataʼví na̱ congregación xa̱ʼa̱ ku̱a̱chi kán, va̱ása kivi ku̱ʼu̱nna natúʼunna xíʼin na̱ yiví xa̱ʼa̱ Ndióxi̱. Ni na̱ judío xi̱kuu na̱ apóstol xíʼin na̱ anciano va̱ása níxindiku̱nna ña̱ xi̱keʼé na̱ ñuuna ni ña̱ xi̱sanáʼa̱na. Va̱ʼaka na̱ndukúna ndáaña káʼa̱n tu̱ʼun Ndióxi̱ ta ndu̱kúna espíritu santo nu̱úra ña̱ va̱ʼa chindeétáʼanña xíʼinna ña̱ vií ndaka̱xinna ña̱ keʼéna (Hech. 15:1, 2, 5-20, 28). Xa̱ʼa̱ ña̱ ke̱ʼéna ña̱yóʼo Jehová ta̱xira bendición ndaʼa̱na, na̱ congregación táxi̱n ni̱xi̱yona ta inkáchi xi̱kitáʼanna, ta nda̱kundeéna na̱túʼunna xíʼin na̱ yiví xa̱ʼa̱ra (Hech. 15:30, 31; 16:5). Tiempo vitin, na̱ ñuu Jehová chíka̱a̱na ndee̱ ña̱ vií kutáʼanna ta táxi̱n koona. w20.10 22, 23 párr. 11, 12

Sana kúni̱yó ndakiʼinyó iin chiñu ti̱xin congregación á ti̱xin circuito nu̱ú ndíka̱a̱yó. Soo íyo sava ña̱ sási nu̱úyó ña̱ va̱ʼa ndakiʼinyó ña̱yóʼo, tá kúú xa̱ʼa̱ ku̱i̱ya̱ ña̱ kúúmiíyó, ña̱ ndeé ndóʼoyó á inkaka ña̱ʼa. Ña̱ ndo̱ʼo ta̱ rey David kivi chindeétáʼanña xíʼinyó tá ndóʼoyó táʼan ña̱yóʼo. Ta̱yóʼo xi̱kuni̱níra ixava̱ʼara veʼe Ndióxi̱; soo tá ni̱xa̱a̱ra ku̱nda̱a̱-inira ña̱ va̱ása níndaka̱xin Ndióxi̱ miíra ña̱ keʼéra chiñu yóʼo, chi̱ndeétáʼanra xíʼin na̱ yiví na̱ nda̱kaxin Ndióxi̱ ña̱ keʼénaña. Ta̱xira ku̱a̱ʼání oro xíʼin plata ña̱ va̱ʼa keʼéna chiñu yóʼo. Va̱ʼaní yichi̱ sa̱ndákoora nu̱úyó (2 Sam. 7:12, 13; 1 Crón. 29:3-5). Iin ta̱ hermano ta̱ naní Hugues ta̱ íyo chí Francia va̱ása níkivika koora anciano xa̱ʼa̱ ña̱ ndeé ndóʼora. Ta ni chiñu ña̱ íyo ti̱xin veʼera va̱ása níkivi keʼéra. Ña̱yóʼo ni̱ka̱ʼa̱nra: “Tá xa̱ʼa̱ nda̱kavaní-inii̱ ta xi̱ndakanixi̱níi̱ ña̱ va̱ása ndáyáʼvii̱. Soo tá ni̱ya̱ʼa tiempo ku̱nda̱a̱-inii̱ ña̱ va̱ása xíniñúʼuví kusuchí-inii̱ xa̱ʼa̱ ña̱ʼa ña̱ va̱ása kívi keʼíi̱, tasaá ki̱xáʼa kúsi̱í-inii̱ xa̱ʼa̱ chiñu ña̱ kivika keʼíi̱ nu̱ú Jehová. Káchíñukavai̱ nu̱ú Jehová. Íyoi̱ nda̱a̱ táki̱ʼva ni̱xi̱yo ta̱ Gedeón xíʼin na̱ 300 ta̱a na̱ xi̱kitáʼan xíʼinra: ni ku̱nái̱, ndákundeévai̱ chíka̱i̱ ndee̱” (Juec. 8:4). w20.12 25 párr. 14, 15

Nu̱ú Evangelio ña̱ ka̱ʼyí ta̱ apóstol Juan, ku̱a̱ʼání yichi̱ káʼa̱nra xa̱ʼa̱ ña̱ kuʼvi̱-iniyó kunitáʼanyó nu̱úka u̱ni̱ saá Evangelio ña̱ ka̱ʼyí ta̱ Mateo, ta̱ Marcos xíʼin ta̱ Lucas. Ña̱ ka̱ʼyíra náʼa̱ña nu̱úyó ña̱ ndiʼi ña̱ kéʼéyó xíniñúʼu keʼéyóña xa̱ʼa̱ ña̱ kúʼvi̱-iniyó xíniyó inkana (1 Juan 4:10, 11). Soo ku̱a̱ʼá tiempo ni̱ya̱ʼa ta saáví sa̱kuaʼa ta̱ Juan na̱ʼa̱ra ña̱yóʼo. Xi̱ i̱xayo̱ʼvi̱ña xíʼinra ña̱ na̱ʼa̱ra ña̱ kúʼvi̱-inira xínira inkana. Tá kúú, tá ku̱a̱ʼa̱n ta̱ Jesús xíʼin na̱ discípulora chí Jerusalén ni̱ya̱ʼana chí Samaria, ta na̱ yiví na̱ ni̱xi̱yo iin ñuu loʼo ña̱ ndíka̱a̱ chí Samaria va̱ása vií níndakiʼinnana. Ta̱ Juan xi̱kuni̱ra ña̱ ná kixi ñuʼu̱ chí ndiví, ta sandíʼi-xa̱ʼa̱ña na̱ yiví kán (Luc. 9:52-56). Ta inka yichi̱, ta̱ Juan va̱ása nína̱ʼa̱ra ña̱ kúʼvi̱-inira xínira na̱ inka apóstol. Saáchi miíra xíʼin ñanira ta̱ Santiago ni̱ka̱ʼa̱nna xíʼin siʼína ña̱ ku̱ʼu̱nñá ka̱ʼa̱nñá xíʼin ta̱ Jesús, ña̱ taxira koona chí sii̱nra ti̱xin Reino Ndióxi̱. Tá ku̱ndaa̱-ini na̱ inka apóstol ni̱sa̱a̱nína (Mat. 20:20, 21, 24). Ni va̱ása va̱ʼa íyo ña̱ ke̱ʼé ta̱ Juan soo ni̱kuʼvi̱kava-ini ta̱ Jesús xi̱nirara (Juan 21:7). w21.01 9 párr. 3, 4

Ndiʼi ña̱ ndáka̱xin Jehová keʼéra, kéʼéraña xa̱ʼa̱ ña̱ va̱ʼa inkana. Tá kúú, tá i̱xava̱ʼara ndiʼi ña̱ʼa va̱ása níkeʼéraña xa̱ʼa̱ ña̱ va̱ʼa miíra, saáchi i̱xava̱ʼaraña ña̱ va̱ʼa ná kusi̱í-iniyó kutakuyó. Nda̱a̱ ni iinna kǒo ní ixandúxa xíʼinra ña̱ chindaʼára se̱ʼera ña̱ kuvira xa̱ʼa̱ ku̱a̱chiyó. Chi ke̱ʼéra ña̱yóʼo ña̱ va̱ʼa chindeétáʼanra xíʼinyó. Ta saátu, ta̱ Jesús nda̱kaxinra keʼéra sava ña̱ʼa ña̱ va̱ʼa chindeétáʼanra xíʼin inkana. Tá kúú, ni ku̱naaníra sa̱náʼa̱ra ku̱a̱ʼá na̱ yiví nu̱úka ña̱ ndakindee̱ra (Mar. 6:31-34). Ta̱ viíní níʼi yichi̱ nu̱ú na̱ veʼera kúnda̱a̱-inira ña̱ ixayo̱ʼvi̱ña xíʼinra ña̱ viíní ndaka̱xinra ña̱ keʼéra ña̱ kivi chindeétáʼan xíʼin na̱ veʼera, ta kúnda̱a̱-inira ña̱ ndáyáʼviní vií keʼéra ña̱yóʼo. Chíka̱a̱ra ndee̱ ña̱ siʼna vií ndakanixi̱níra xa̱ʼa̱ ña̱ keʼéra tasaá va̱ása keʼéra ña̱ kúni̱ miíra. Táxira ña̱ ná sanáʼa̱ Jehová miíra ña̱ vií koo ña̱ ndaka̱xinra keʼéra, tasaá ndákanixi̱níra xa̱ʼa̱ ña̱ chindeétáʼan xíʼin inkana ta su̱ví ña̱ chindeétáʼan xíʼin mií kuitíra (Prov. 2:6, 7; Filip. 2:4). Tá chíka̱a̱ra ndee̱ ña̱ kundiku̱nra yichi̱ Jehová ta saátu ta̱ Jesús, vií kuniʼira yichi̱ nu̱ú na̱ veʼera. w21.02 7 párr. 19-21

Tá ni̱xi̱yo loʼo ta̱ rey Asá vitá ni̱xi̱yo inira ta saátu ndakúní ni̱xi̱yo inira. Tá kúú, ni̱xa̱a̱ra ndu̱ura rey tá ni̱xi̱ʼi̱ yivára ta̱ xi̱naní Abías, tasaá ki̱xáʼara sándiʼi-xa̱ʼa̱ra ndiʼi ndióxi̱ vatá ña̱ ni̱xi̱yo ñuu kán. Tasaá “ni̱ka̱ʼa̱nra xíʼin na̱ ñuu Judá ña̱ ná nandukúna Jehová Ndióxi̱ ta̱ xi̱ndasakáʼnu na̱ xi̱ína, ta ná kuniso̱ʼona ña̱ káʼa̱n ley xíʼin ndiʼika ña̱ ni̱ka̱ʼa̱n Ndióxi̱” (2 Crón. 14:1-7). Ta tá ki̱xaa̱ ta̱ Zérah xíʼin iin millón na̱ soldado na̱ ke̱e ñuu Etiopía ña̱ va̱ʼa sandíʼi-xa̱ʼa̱na na̱ ñuu Judá, ta̱ Asá ndíchi ni̱xi̱yora ta ni̱ka̱ʼa̱nra xíʼin Jehová ña̱ ná chindeétáʼanra xíʼinna. Ta ni̱ka̱ʼa̱nra ña̱yóʼo xíʼin Jehová: “Jehová, va̱ása ndáyáʼviví á na̱ ndakú kúú na̱ chíndeétáʼún xíʼin á na̱ kǒo ndee̱ kúúmií kúúna. Chindeétáʼan xíʼinndi̱ Jehová Ndióxi̱ miíndi̱, saáchi kándíxandi̱ yóʼó”. Ña̱ tu̱ʼun yóʼo ni̱na̱ʼa̱ña ña̱ va̱ʼaní xi̱kandíxa ta̱ Asá ña̱ sakǎku Jehová miíra xíʼin na̱ ñuura. Ta̱ Asá ka̱ndíxaníra Jehová, ta mií Jehová sa̱ndíʼi-xa̱ʼa̱ na̱ ñuu Etiopía (2 Crón. 14:8-12). Iin ña̱ i̱yoní kúú ña̱ kanitáʼanna xíʼin iin millón na̱ soldado. Soo ta̱ Asá ka̱ndíxara Jehová, ta xa̱ʼa̱ ña̱yóʼo ku̱chiñuna ka̱nitáʼanna xíʼinna. w21.03 5 párr. 12, 13

Tu̱ʼun Ndióxi̱ káʼa̱nña xa̱ʼa̱ ku̱a̱ʼání na̱ ni̱na̱ʼa̱ ña̱ kúʼvi̱-inina xínina inkana nda̱a̱ táki̱ʼva kéʼéna xíʼin na̱ veʼena. Ná ka̱ʼa̱nyó xa̱ʼa̱ ta̱ Jonatán xíʼin ta̱ David. Tu̱ʼun Ndióxi̱ káchiña: “Va̱ʼaní ki̱xáʼa ta̱ Jonatán kítáʼanra xíʼin ta̱ David, ta ta̱ Jonatán ki̱xáʼara kúʼvi̱ní-inira xínira ta̱ David nda̱a̱ táki̱ʼva kúʼvi̱-inira xínira miíra” (1 Sam. 18:1). Jehová nda̱kaxinra ta̱ David ña̱ koora rey nu̱ú ta̱ Saúl yivá ta̱ Jonatán. Ta̱ Saúl ni̱sa̱a̱níra xa̱ʼa̱ ña̱yóʼo ta nda̱a̱ xi̱kuni̱ra kaʼníra ta̱ David. Soo ta̱ Jonatán va̱ása níchindeétáʼanra xíʼin yivára tá xi̱kuni̱ra keʼéra ña̱yóʼo. Ta̱ Jonatán xíʼin ta̱ David ki̱ndoona ña̱ ndiʼi tiempo vií kutáʼanna ta chindeétáʼanna xíʼin táʼanna (1 Sam. 20:42). Ndákanda̱-iniyó xa̱ʼa̱ ña̱ viíní xi̱kitáʼan ta̱ Jonatán xíʼin ta̱ David, saáchi ni̱xi̱yo ña̱ kivi kasi nu̱úna ña̱ vií kutáʼanna. Tá kúú, ta̱ Jonatán ki̱ʼva o̱ko̱ u̱xu̱ ku̱i̱ya̱ chéeka ni̱xi̱yora nu̱ú ta̱ David. Xa̱ʼa̱ ña̱yóʼo kivi xa̱a̱ra ndakanixi̱níra ña̱ kǒo kívi kutáʼanra xíʼin iin ta̱ loʼoka nu̱úra, ta̱ va̱ása xíni̱ xa̱ʼa̱ ku̱a̱ʼá ña̱ʼa. Soo va̱ása níndakanixi̱níra saá, chi xi̱ ixato̱ʼóra ta̱ David. w21.01 21, 22 párr. 6, 7

Ta̱ Jesús ni̱ka̱ʼa̱nra xíʼin na̱ discípulora ña̱ ndixa si̱í koona. Soo ni̱ka̱ʼa̱ntura xíʼinna ña̱ ya̱ʼana nu̱ú tu̱ndóʼo xa̱ʼa̱ ña̱ kúʼvi̱-inina xíninara (Mat. 10:22, 23; Luc. 6:20-23). Kúsi̱í-iniyó xa̱ʼa̱ ña̱ ndíku̱nyó ta̱ Cristo. Soo ni saá kivi kundi̱ʼi̱-iniyó tá ndákanixi̱níyó ña̱ kivi kasi na̱ veʼeyó nu̱úyó ña̱ ndasakáʼnuyó Jehová, ña̱ ixandi̱va̱ʼa na̱ chíñu xíʼinyó, ta na̱ káʼvi xíʼinyó escuela á na̱ káchíñu xíʼinyó kivi ka̱ʼa̱nna xíʼinyó keʼéyó ña̱ʼa ña̱ va̱ása kútóo Jehová. Nda̱a̱ ni iinyó va̱ása kúsi̱í-iniyó tá íxandi̱va̱ʼana xíʼinyó. Soo tu̱ʼun Ndióxi̱ káʼa̱nña xíʼinyó ña̱ xíniñúʼu kusi̱í-iniyó. Tá kúú, ta̱ Santiago ka̱ʼyíra ña̱ va̱ása xíniñúʼu kundi̱ʼi̱ní-iniyó tá yáʼayó nu̱ú tu̱ndóʼo, saáchi ni̱ka̱ʼa̱nra ña̱ xíniñúʼu kusi̱í-iniyó (Sant. 1:2, 12). Ta ta̱ Jesús ni̱ka̱ʼa̱nra ña̱ xíniñúʼu kusi̱í-iniyó ni íxandi̱va̱ʼana xíʼinyó (Mat. 5:11). Tá saá, ¿ndáa ki̱ʼva kivi kusi̱í-iniyó ni yáʼayó nu̱ú tu̱ndóʼo? Ku̱a̱ʼá ña̱ʼa kivi sakuaʼayó xíʼin sava ña̱ ka̱ʼyí ta̱ Santiago nu̱ú carta ña̱ ku̱a̱ʼa̱n ndaʼa̱ na̱ cristiano na̱ ni̱xi̱yo tá siglo nu̱ú. w21.02 26 párr. 1, 2; 27 párr. 5

Tá tiempo ña̱ ni̱xi̱yo ta̱ Timoteo, sava na̱ cristiano va̱ása níchindayáʼvina ña̱ va̱ʼa ña̱ xi̱kuumiína ña̱ kachíñuna xíʼin Ndióxi̱. Tá kúú, ta̱ Demas, ta̱ Figelo, ta̱ Hermógenes, ta̱ Himeneo, ta̱ Alejandro xíʼin ta̱ Fileto (1 Tim. 1:19, 20; 2 Tim. 1:15; 2:16-18; 4:10). Ndiʼi na̱yóʼo ni̱xi̱yo iin tiempo ña̱ ni̱kuʼvi̱-inina xi̱nina Jehová, soo va̱ása níchindayáʼvikana ña̱ ta̱xira ndaʼa̱na. ¿Ndáaña xíniñúʼu ta̱ Ndi̱va̱ʼa ña̱ va̱ʼa sandákooyó ña̱ ndáyáʼviní ta̱xi Jehová ndaʼa̱yó? Ná ka̱ʼa̱nyó xa̱ʼa̱ savaña. Xíniñúʼura ña̱ xítonde̱ʼéyó á ña̱ sísikíyó ña̱ va̱ʼa nasamara ña̱ ndákanixi̱níyó xíʼin ña̱ kéʼéyó, tasaá sandákooyó ña̱ nda̱a̱. Ta saátu, xíniñúʼura na̱ yiví ña̱ ka̱ʼa̱nna ña̱ va̱ása va̱ʼa xa̱ʼa̱yó á ixandi̱va̱ʼana xíʼinyó ña̱ va̱ʼa yi̱ʼvíyó ta va̱ása ku̱ʼu̱nkayó natúʼunyó xa̱ʼa̱ Ndióxi̱. Ta kúnira sandáʼvira miíyó ña̱ kandíxayó ña̱ vatá ña̱ sánáʼa̱ na̱ apóstata ta sandákooyó ña̱ nda̱a̱. Tá ná va̱ása kiʼinyó kuenta, loʼo tá loʼo kivi xa̱a̱yó sandákooyó ña̱ nda̱a̱ (1 Tim. 6:21). w20.09 27 párr. 6-8

¿Á íyo iin na̱ veʼeyó á iin na̱ migoyó na̱ sa̱xóʼvi̱ miíyó? Tá saá ndo̱ʼoyó, ña̱ kivi chindeétáʼan xíʼinyó kúú ña̱ kotoyó ndáaña ke̱ʼé iin ta̱ xi̱kuu se̱ʼe ta̱ rey David ta̱ xi̱naní Absalón (2 Sam. 15:5-14, 31; 18:6-14). Tá kúma̱níka kaʼviyó relato yóʼo, ná ka̱ʼa̱nyó xíʼin Jehová ndáaña ndóʼoyó xa̱ʼa̱ ña̱ ke̱ʼéna ña̱ va̱ása va̱ʼa xíʼinyó (Sal. 6:6-8). Vitin ná ndakanixi̱níyó ndáaña ndo̱ʼo ta̱ David xa̱ʼa̱ ña̱yóʼo. Xi̱kuʼvi̱ní-inira xi̱xinira ta̱ Absalón ta saátu xi̱ndaaní-inira ta̱ Ahitofel. Soo ni saá, u̱vi̱ saá na̱yóʼo va̱ása nda̱kú níxi̱yo inina xíʼinra. Sa̱xóʼvi̱nínara ta nda̱a̱ xi̱kuni̱na kaʼnínara. Ta̱ David kivitu xa̱a̱ra ndakanixi̱níra ña̱ nda̱kutáʼan inkaka na̱ migora xíʼin ta̱ Absalón tasaá kǒo kundaaka-inira na̱yóʼo. Á kivitu kundi̱ʼi̱-inira xa̱ʼa̱ iinlá miíra ta kunu iinlá miíra ku̱ʼu̱nra inka país. Á xa̱ʼa̱ ña̱ ndíʼi̱ní-inira kivi ndakava-inira. Soo ni̱ka̱ʼa̱nra xíʼin Jehová ná chindeétáʼanra xíʼinra. Ta saátu ni̱ka̱ʼa̱nra xíʼin na̱ migora ña̱ ná chindeétáʼanna xíʼinra. Ta tá xi̱ndaka̱xinra keʼéra iin ña̱ʼa ndi̱ku̱n kama xi̱keʼéraña. Ta nda̱kundeéra xi̱ndaa-inira Jehová ta saátu na̱ migora. w21.03 15 párr. 7, 8; 17 párr. 10, 11