Julio

Xíniñúʼu kooyó migo ta̱ Jesús ña̱ va̱ʼa ndakuiin Ndióxi̱ oración ña̱ kéʼéyó. Ña̱yóʼo kúni̱ kachiña ña̱ va̱ása xíniñúʼu ka̱ʼa̱n kuitíyó “xa̱ʼa̱ ki̱vi̱ ta̱ Jesús” tá sándiʼiyó kéʼéyó oración. Chi xíniñúʼu kunda̱a̱-iniyó ndáa ki̱ʼva xíniñúʼu Jehová ta̱ Jesús ña̱ ndakuiinra oración ña̱ kéʼéyó. Ta̱ Jesús ni̱ka̱ʼa̱nra ña̱yóʼo xíʼin na̱ apóstolra: “Nda̱a̱ ndáaka ña̱ ná ndukúndó xa̱ʼa̱ ki̱víi̱, yi̱ʼi̱ keʼíi̱ña” (Juan 14:13). Jehová kúú ta̱ xíniso̱ʼo oración ña̱ kéʼéyó ta ndákuiinraña, soo ta̱xira chiñu ndaʼa̱ se̱ʼera ña̱ keʼéra ña̱ kúni̱ra. Tá kúma̱níka ndakuiinra yuʼúyó, xítora á ndíku̱nyó consejo ta̱ Jesús. Tá kúú ña̱yóʼo: “Tá íxakáʼnu-inindó xa̱ʼa̱ inkana, saátu yivándó ta̱ íyo chí ndiví ixakáʼnu-inira xa̱ʼa̱ndó. Soo tá va̱ása íxakáʼnu-inindó xa̱ʼa̱ ña̱ kéʼé inkana xíʼinndó, saátu yivándó va̱ása ixakáʼnu-inira xa̱ʼa̱ ku̱a̱chindó” (Mat. 6:14, 15). ¿Á su̱ví ña̱ nda̱a̱ kúú ña̱ ndáyáʼviní na̱ʼa̱yó ña̱ va̱ʼa íyo iniyó nda̱a̱ táki̱ʼva kéʼé Jehová xíʼin ta̱ Jesús? w20.04 21 párr. 6

Ta̱ apóstol Pablo xi̱kiʼinra kuenta xa̱ʼa̱ ña̱ xi̱ndi̱ʼi̱-ini na̱ yiví xa̱ʼa̱, ta xi̱nasamara ki̱ʼva ña̱ xi̱natúʼunra xíʼinna. Tá kúú, na̱ yiví na̱ na̱túʼunra xíʼin chí ñuu Listra loʼo kuití xi̱kunda̱a̱-inina xa̱ʼa̱ tu̱ʼun Ndióxi̱. Ña̱kán, ta̱ Pablo xi̱natúʼunra xíʼinna xa̱ʼa̱ ña̱ʼa ña̱ xa̱a̱ xíni̱na, xi̱ka̱ʼa̱nra xíʼinna xa̱ʼa̱ ña̱ chíʼina xíʼin ña̱ kúsi̱í-inina xa̱ʼa̱ ña̱ tákuna. Xi̱niñúʼura ejemplo xíʼin tu̱ʼun ña̱ va̱ása yo̱ʼvi̱ kunda̱a̱-inina xíʼin. Ná kotoyó ndáa xa̱ʼa̱ kúú ña̱ ndíʼi̱-ini na̱ yiví na̱ íyo nu̱ú territorio ña̱ kúúmiíyó, ta ná nasamayó ki̱ʼva ña̱ nátúʼunyó xíʼinna. ¿Ndáa ki̱ʼva kivi kunda̱a̱-iniyó ndáaña ndíʼi̱-ini na̱ yiví xa̱ʼa̱ tá kúyatinyó nu̱úna á veʼena? Ná kotoyó ndáaña kéʼéna. Sana ndásaviína jardín ña̱ kúúmiína, káʼvina iin libro, sándaʼana carro á kéʼéna inkaka ña̱ʼa. Tá kivi, ná kuniñúʼuyó ña̱ kéʼéna ña̱ va̱ʼa kixáʼayó natúʼunyó xíʼinna (Juan 4:7). Nda̱a̱ ti̱ko̱to̱ ña̱ ndíxi iin na̱ yiví kivi na̱ʼa̱ña nu̱úyó ndáa ñuuna, ndáa chiñu kúúmiína, ndáa equipo na̱ sísikí kúú na̱ ndíku̱nna sa̱tá. w20.04 11 párr. 11, 12

Xa̱ʼa̱ ña̱ kúúmií sava na̱ hermano kue̱ʼe̱ ña̱ ansiedad á ña̱ sándi̱ʼi̱ní-inina, yíʼvina ta va̱ása va̱ʼa kúnina tá kítáʼanna xíʼin inkana ndiʼi ki̱vi̱. Sana íxayo̱ʼvi̱ña xíʼinna ña̱ kutáʼanna xíʼin ku̱a̱ʼání na̱ yiví, soo ni saá chíka̱a̱na ndee̱ ña̱ ku̱ʼu̱nna reunión ta saátu asamblea. Ta saátu íxayo̱ʼvi̱ña xíʼinna ña̱ ka̱ʼa̱nna xíʼin inka na̱ va̱ása xíni̱na, soo ni saá chíka̱a̱na ndee̱ ña̱ ku̱ʼu̱nna natúʼunna xa̱ʼa̱ Ndióxi̱. Tá saá ndóʼoyó, ná va̱ása kundi̱ʼi̱-iniyó chi ku̱a̱ʼáníva kúú na̱ ndóʼo táʼan ña̱yóʼo. Ná ndakaʼányó chi kúsi̱íní-ini Jehová xíʼin ndiʼi ña̱ kéʼéyó xíʼin ndiʼi níma̱yó. Xa̱ʼa̱ ña̱ va̱ása ndákava-iniyó náʼa̱ña ña̱ táxira bendición ndaʼa̱yó ta saátu ndee̱ ña̱ xíniñúʼuyó (Filip. 4:6, 7). Tá chíka̱a̱yó ndee̱ ña̱ kachíñuyó nu̱ú Jehová ni íyo ña̱ íxayo̱ʼvi̱ xíʼinyó, kivi kandíxayó ña̱ sákusi̱íní ña̱yóʼo inira. Ku̱a̱ʼání miíyó kúúmiíyó kue̱ʼe̱, ta ni saá chíka̱a̱yó ndee̱ (2 Cor. 4:16). Ta mií Jehová kúú ta̱ chindeétáʼan xíʼinyó ña̱ kunuyó ta sandiʼiyó. w20.04 31 párr. 20, 21

Tá xítoyó ndáa ki̱ʼva i̱xava̱ʼa Ndióxi̱ ñuʼú yóʼo, kúnda̱a̱-iniyó ña̱ kúúmiíníra ña̱ ndíchi (Heb. 3:4). Ñuʼú yóʼo kúú ña̱ va̱ʼaníka na̱kuva̱ʼa chi iinlá nu̱ú ña̱yóʼo íyo ña̱ xíniñúʼu na̱ yiví ña̱ va̱ʼa kutakuna. Kivi ka̱ʼa̱nyó ña̱ ñuʼú yóʼo íyoña nda̱a̱ táki̱ʼva íyo iin barco tú ku̱a̱ʼa̱n nu̱ú ti̱kui̱í, tú ñúʼu ku̱a̱ʼání na̱ yiví ti̱xin. Soo xa̱a̱ síín na̱kuva̱ʼa tú barco yóʼo, nu̱ú ñuʼú yóʼo. Ná ka̱ʼa̱nyó xa̱ʼa̱ ña̱yóʼo, ¿nda̱saa tiempo kivi kutaku na̱ ku̱a̱ʼa̱n xíʼin tú barco tá miína ná ixava̱ʼa ta̱chí ña̱ ndakiʼinna, ña̱ kuxuna xíʼin ti̱kui̱í, ta va̱ása kivi katana mi̱ʼí nu̱ú tá mar? ¿Á su̱ví ña̱ nda̱a̱ kúú ña̱ kama kuvina? Soo nu̱ú ñuʼú yóʼo íyo ku̱a̱ʼání ña̱ táku. Ña̱ ñuʼú yóʼo kúú ña̱ táxi ta̱chí ña̱ ndákiʼinyó, ña̱ xíxiyó xíʼin ti̱kui̱í tá xíniñúʼuyó, ta nda̱a̱ ni iin yichi̱ va̱ása ndíʼi ña̱yóʼo. Saátu, ña̱ʼa ña̱ va̱ása xíniñúʼukayó va̱ása xátayóña chí sa̱tá ñuʼú. Soo ni saá ña̱ ñuʼú yóʼo livi íyoña ta va̱ʼa ndóoyó nu̱úña. ¿Nda̱chun va̱ʼa íyo ña̱yóʼo saá? Jehová va̱ʼaní i̱xava̱ʼara ña̱yóʼo chi va̱ʼa ndásaxa̱áña ña̱ íyo nu̱úña. w20.05 20 párr. 3, 4

Xíʼin ña̱ ni̱ka̱ʼa̱n ta̱ Ndi̱va̱ʼa xíʼin ñá Eva xi̱kuni̱ kachira ña̱ ta̱ vatá kúú Jehová. Saá ndu̱u ta̱ Ndi̱va̱ʼa iin ta̱ vatá. Ta ku̱chiñura sa̱ndáʼvira ñá Eva ta ñáyóʼo ka̱ndíxañá ña̱ ni̱ka̱ʼa̱nra (1 Tim. 2:14). Ka̱ndíxakañá ta̱yóʼo nu̱úka ña̱ kandíxañá Jehová, ta xa̱ʼa̱ ña̱yóʼo va̱ása va̱ʼa ña̱ níndaka̱xinñá keʼéñá, i̱xaso̱ʼoñá ña̱ ni̱ka̱ʼa̱n Ndióxi̱ ta xa̱xíñá ku̱i̱ʼi ña̱ ni̱ka̱ʼa̱nra xíʼinñá va̱ása kaxíñá, tá ndi̱ʼi ta̱xiñá ku̱i̱ʼi yóʼo ndaʼa̱ ta̱ Adán (Gén. 3:6). Ná ndakanixi̱níyó xa̱ʼa̱ ña̱ xi̱niñúʼu ka̱ʼa̱n ñá Eva xíʼin ta̱ Ndi̱va̱ʼa. Ná kachiyó ña̱ ni̱ka̱ʼa̱nñá ña̱yóʼo xíʼinra: “Va̱ása xíni̱i̱ yóʼó, soo xíni̱vai̱ yivái̱ Jehová. Kúni̱i̱ xínii̱ra ta kándíxai̱ra. Ta̱yóʼo kúú ta̱ ta̱xi ndiʼi ña̱ʼa ña̱ kúúmiíndi̱. ¿Nda̱chun káʼún ña̱ va̱ása va̱ʼa xa̱ʼa̱ra? Va̱ása kúni̱kai̱ ka̱ʼún xíʼi̱n”. Tá níka̱ʼa̱nñá ña̱yóʼo, kusi̱íníva-ini Jehová chi na̱ʼa̱ñá ña̱ kúʼvi̱-iniñá xíniñára ta nda̱kú íyo iniñá xíʼinra (Prov. 27:11). Soo ni ñá Eva ta ni ta̱ Adán va̱ása nda̱kú níxi̱yo ña̱ kúʼvi̱-inina xínina Jehová. Xa̱ʼa̱ ña̱yóʼo, va̱ása níndakiʼinna tu̱ʼun yivána tá ni̱ka̱ʼa̱n ta̱ Ndi̱va̱ʼa ña̱ vatá xa̱ʼa̱ ki̱vi̱ra. w20.06 4 párr. 10, 11

Xíniñúʼu taxiyó tíxa̱ʼvi ndaʼa̱ ná hermana xa̱ʼa̱ ndiʼi chiñu ña̱ kéʼéná nu̱ú Jehová. Tá kúú, káchíñuná nu̱ú kúva̱ʼa veʼe ña̱ xíniñúʼu na̱ ñuu Ndióxi̱ á ña̱ nduvií veʼe yóʼo, chíndeétáʼanná xíʼin grupo nu̱ú káʼa̱nna inka tu̱ʼun, ta káchíñuná sava ki̱vi̱ ti̱xin Betel. Ta saátu chíndeétáʼanná xíʼin na̱ hermano tá kúu iin tu̱ndóʼo, inkaná sándaya̱ʼaná tutu ña̱ kúúmiíyó inka nu̱ú tu̱ʼun, kúúná precursora á misionera. Ta saátu íyo ná hermana ná xa̱a̱ ti̱ndaʼa̱ ná chíndeétáʼan xíʼin yiíná ña̱ vií keʼéna chiñu ña̱ kúúmiína ti̱xin congregación á xíʼin na̱ ñuu Ndióxi̱. Xa̱ʼa̱ ña̱ chíndeétáʼanná xíʼin yiíná, na̱yóʼo viíní kéʼéna chiñuna ta nda̱a̱ táki̱ʼva íyo iin regalo saá íyona nu̱ú na̱ congregación (Efes. 4:8). Na̱ anciano kúnda̱a̱-inina ña̱ ku̱a̱ʼání kúú ná hermana ná kúni̱ kachíñu nu̱ú Jehová, ta ku̱a̱ʼání náyóʼo va̱ʼaní nátúʼunná xa̱ʼa̱ Ndióxi̱. Ta saátu, na̱ anciano kúnda̱a̱-inina ña̱ ná hermana ná nda̱kú íyo ini xíʼin Ndióxi̱ kivi chindeétáʼanná xíʼin ná hermana ná válíka xíʼin tu̱ndóʼo ña̱ yáʼaná nu̱ú (Tito 2:3-5). Ña̱yóʼo náʼa̱ña ña̱ xíniñúʼu taxiyó tíxa̱ʼvi ndaʼa̱ ná hermanayó ta kuʼvi̱-iniyó kuniyóná. w20.09 23 párr. 13, 14

Va̱ása nándósó-ini Jehová xa̱ʼa̱ na̱ ku̱xíka nu̱ú na̱ ñuura, ta ni va̱ása nándósóra xa̱ʼa̱ chiñu ña̱ ke̱ʼéna nu̱úra (Heb. 6:10). Ta̱ profeta Isaías xi̱niñúʼura iin ejemplo, ña̱ va̱ʼa ka̱ʼa̱nra xa̱ʼa̱ ki̱ʼva ña̱ ndáa Jehová na̱ ñuura ta kúʼvi̱-inira xínirana. Ka̱ʼyíra ña̱yóʼo: “Kundaara ndikachi sa̱na̱ra nda̱a̱ táki̱ʼva kéʼé iin pastor. Ta xíʼin ndaʼa̱ra ndakiʼinrarí, ta numindaararí ku̱ʼu̱n xíʼinra” (Is. 40:11). ¿Ndáaña ndóʼo Jehová tá kúxíka iin ndikachi sa̱na̱ra nu̱ú inkakarí? Xíʼin ña̱ ni̱nda̱ka̱tu̱ʼun ta̱ Jesús na̱ discípulora ni̱na̱ʼa̱ra ndáaña ndóʼo Jehová, ka̱chira: “¿Ndáaña ndákanixi̱níndó? Tá iin ta̱a kúúmiíra 100 ndikachi ta iin tíyóʼo nda̱ñúʼurí, ¿á va̱ása túvindó ña̱ sandákoora tí 99 chí yuku̱ ta ku̱ʼu̱nra nandukúra tí nda̱ñúʼu? Ta, tá nda̱ni̱ʼírarí, mií ña̱ nda̱a̱ káʼi̱n xíʼinndó ña̱ kusi̱íníka-inira xa̱ʼa̱ tíyóʼo, nu̱ú tí 99 tí va̱ása níndañúʼu” (Mat. 18:12, 13). w20.06 19, 20 párr. 8, 9

Nu̱ú miíyó ndáyáʼviní ña̱ vií kachíñuyó nu̱ú Jehová (Sal. 27:4; 84:10). Tá iin na̱ hermano kúni̱na keʼéna ku̱a̱ʼáka chiñu ti̱xin ñuu Jehová iin ña̱ va̱ʼava kúú ña̱yóʼo. Soo tá nda̱kiʼinna iin chiñu, va̱ása xíniñúʼu ni̱nuní kunina xa̱ʼa̱ña (Luc. 17:7-10). Chi ña̱ xíniñúʼu keʼéna kúú ña̱ vitá koo inina ta kachíñuna nu̱ú inkana (2 Cor. 12:15). Biblia káʼa̱nña xa̱ʼa̱ na̱ yiví na̱ nda̱kanixi̱ní ña̱ ndáyáʼvinína. Tá kúú, ta̱ Diótrefes xi̱ndakanixi̱níra ña̱ xíni̱ra keʼéra ndiʼi ña̱ʼa, ta xi̱kuni̱ra kundayáʼvikara nu̱ú na̱ congregación (3 Juan 9). Ta̱ Uzías ni̱na̱ʼa̱ra ña̱ va̱ása vitá íyo inira tá xi̱kuni̱ra keʼéra iin chiñu ña̱ va̱ása nítaxi Jehová ndaʼa̱ra (2 Crón. 26:16-21). Xa̱ʼa̱ ña̱ xi̱kuni̱ ta̱ Absalón koora rey, viíní xi̱keʼéra xíʼin na̱ ñuu ña̱ va̱ʼa sandáʼvirana (2 Sam. 15:2-6). Nda̱a̱ táki̱ʼva káchi ña̱ relato yóʼo, Jehová kúndasíra xínira na̱ yiví na̱ kúni̱ ndukáʼnu (Prov. 25:27). Na̱ ni̱nuní kúni á na̱ kúni̱ ndukáʼnu nu̱ú inkana, kǒo ña̱ va̱ʼa ndákiʼinna (Prov. 16:18). w20.07 4 párr. 7, 8

Sava na̱ familia ku̱a̱ʼa̱nna inka país xa̱ʼa̱ ña̱ íyo ku̱a̱chi ñuuna, á xa̱ʼa̱ ña̱ kúni̱na ndani̱ʼína iin chiñu. Ta sana na̱ va̱lí se̱ʼena xíniñúʼu ku̱ʼu̱nna escuela nu̱ú káʼa̱nna tu̱ʼun ña̱ país nu̱ú ni̱xa̱a̱na, ta saátu na̱ yivána xíniñúʼu sakuaʼana ka̱ʼa̱nna tu̱ʼun kán, ña̱ va̱ʼa ndani̱ʼína chiñu. Soo ná kachiyó ña̱ íyo iin congregación á iin grupo nu̱ú káʼa̱nna tu̱ʼun miína. ¿Ndáaña ndaka̱xinna ku̱ʼu̱nna? ¿Nu̱ú káʼa̱nna tu̱ʼun miína á nu̱ú káʼa̱nna tu̱ʼun ña̱ país kán? Ta̱ níʼi yichi̱ nu̱ú na̱ veʼera kúú ta̱ xíniñúʼu ndaka̱xin ndáa congregación kúú ña̱ ku̱ʼu̱nna. Xa̱ʼa̱ ña̱yóʼo xíniñúʼu kiʼinra kuenta ndáaña kúú ña̱ chindeétáʼanka xíʼin na̱ veʼera. Ña̱kán iin tá iinna kúú na̱ ndáka̱xin ndáaña keʼéna ta xíniñúʼu ixato̱ʼóyó ña̱ ndáka̱xinna. Ni nda̱a̱ ndáaka ña̱ nda̱kaxinna keʼéna, viíní ná ndakiʼinyóna ti̱xin congregación (Rom. 15:7). w20.08 30 párr. 17, 18

Tá kúni̱yó ña̱ ná chindeétáʼan Jehová xíʼinyó va̱ása xíniñúʼu ndakanixi̱níyó ña̱ ndáyáʼviníkayó xa̱ʼa̱ ndee̱ ña̱ kúúmiíyó, xa̱ʼa̱ ña̱ ka̱ʼvi va̱ʼayó, xa̱ʼa̱ ki̱ʼva ña̱ xa̱ʼnuyó á xa̱ʼa̱ ña̱ʼa ña̱ kúúmiíyó. Su̱ví xa̱ʼa̱ ña̱yóʼo xa̱a̱yó kundayáʼvikayó nu̱ú Jehová. Chi ti̱xin ñuu Ndióxi̱ “va̱ása ku̱a̱ʼá kúú na̱ xíni̱ní nda̱a̱ táki̱ʼva ndákanixi̱ní na̱ yiví, ni na̱ ndakúní, ni na̱ ka̱ku ti̱xin veʼe na̱ yiví ndáyáʼvi” (1 Cor. 1:26). Xa̱ʼa̱ ña̱yóʼo, tá íyo iin ña̱ʼa ña̱ íxayo̱ʼvi̱ xíʼinyó ná va̱ása taxiyó kasiña nu̱úyó ña̱ kachíñuyó nu̱ú Ndióxi̱, chi tá ndóʼoyó ña̱yóʼo va̱ʼaka ná kotoyó ndáa ki̱ʼva chíndeétáʼan ndee̱ra xíʼinyó. Tá kúú tá káʼa̱n iin na̱ yiví ña̱ va̱ása va̱ʼa xa̱ʼa̱ ña̱ kándíxaún ta yíʼviún, ka̱ʼa̱n xíʼin Jehová ña̱ ná taxira ndee̱ ndaʼún ña̱ ka̱ʼún xa̱ʼa̱ña (Efes. 6:19, 20). Ta saátu tá kúúmiíyó iin kue̱ʼe̱ ña̱ ndeéní, ná ka̱ʼa̱nyó xíʼin Jehová taxira ndee̱ ndaʼa̱yó ña̱ va̱ʼa kachíñukayó nu̱úra. Tá xítoyó ndáa ki̱ʼva chíndeétáʼanra xíʼinyó, ña̱ kándíxayóra ndúndakúkaña ta va̱ʼaníka kúniyó. w20.07 16 párr. 9

Tá kúni̱yó kundayáʼvika Reino Ndióxi̱ nu̱úyó, xíniñúʼu keʼéyó nda̱a̱ táki̱ʼva ke̱ʼé ta̱ Abrahán ta chika̱a̱-iniyó ña̱ kachíñuyó nu̱ú Ndióxi̱ ña̱ va̱ʼa sakúsi̱íyó-inira (Mar. 10:28-30; Heb. 11:8-10). Ta ni xa̱a̱ nda̱taxiyó miíyó ndaʼa̱ Jehová koo tu̱ndóʼo nu̱úyó (Sant. 1:2; 1 Ped. 5:9). Tiempo vitin kúú ña̱ xíniñúʼuníka ndakanixi̱níyó xa̱ʼa̱ ña̱ ndátuyó ndakiʼinyó chí nu̱únínu. Ndiʼi ña̱ kúu iníísaá nu̱ú ñuʼú yóʼo náʼa̱ña ña̱ xa̱a̱ ndóoyó ki̱vi̱ nu̱ú ndíʼi. Ku̱a̱ʼání bendición ndakiʼinyó tá ná kixáʼa Reino Ndióxi̱ kaʼndachíñuña, tá kúú ndikóyó kuniyó na̱ táʼanyó na̱ ni̱xi̱ʼi̱. Tasaá kúú ña̱ sandátaku Jehová ta̱ Abrahán xíʼin na̱ veʼera ña̱ koona nu̱ú ñuʼú yóʼo xa̱ʼa̱ ña̱ ka̱ndíxanínara, ta kúee ni̱xi̱yo inina. ¿Á koún nu̱ú ñuyǐví xa̱á ña̱ va̱ʼa ndakiʼúnna? Kuchiñuvaún keʼún ña̱yóʼo tá ná keʼún táʼan ña̱ ke̱ʼé ta̱ Abrahán. Tá kúú, chika̱a̱-iniún ña̱ va̱ása keʼún ña̱ kúni̱ miíún tasaá kivi keʼún ku̱a̱ʼáka chiñu xa̱ʼa̱ Reino Ndióxi̱, kandíxaún Ndióxi̱ ni íyoní tu̱ndóʼo nu̱ún, ta kúee koo iniún kundatún saxínu Jehová ña̱ ni̱ka̱ʼa̱nra (Miq. 7:7). w20.08 5, 6 párr. 13, 14; 7 párr. 17

Kúnda̱a̱-iniyó ña̱ ni ná kaʼnína miíyó, Jehová sandátakuvara miíyó. Chi kándíxaníyó ña̱ ni nda̱a̱ ndáaka ña̱ ná keʼéna va̱ása kuchiñuna sakúxíkána miíyó nu̱ú Ndióxi̱ (Rom. 8:35-39). Xa̱ʼa̱ ña̱ káʼa̱n Jehová sandátakura na̱ ni̱xi̱ʼi̱ náʼa̱ra ña̱ ndíchiníra. Chi saá kúú ña̱ kíndaara iin ña̱ʼa ña̱ kivi kuniñúʼu ta̱ Ndi̱va̱ʼa ña̱ sayíʼvira miíyó, ta saátu ndásandakúní Jehová iniyó. Tá na̱ sáa̱-ini xíni miíyó kúni̱na kaʼnína miíyó, ¿á kandíxayó ña̱ sandátaku Jehová miíyó? Ña̱ va̱ʼa kunda̱a̱-iniyó, ná ndakanixi̱níyó xa̱ʼa̱ ña̱yóʼo: “¿Á náʼa̱ ña̱ ndáka̱xii̱n keʼíi̱ ki̱vi̱ tá ki̱vi̱ ña̱ kándíxai̱ Jehová?” (Luc. 16:10). “¿Á náʼi̱ ña̱ kándíxai̱ ña̱ taxi Jehová ndiʼi ña̱ xíniñúʼi̱ tá siʼna ña̱ kúni̱ra ná keʼíi̱?” (Mat. 6:31-33). Tá saá íyo ña̱ kéʼéyó, ña̱yóʼo kúú ña̱ chindeétáʼan xíʼinyó ya̱ʼayó nu̱ú nda̱a̱ ndáaka tu̱ndóʼo (Prov. 3:5, 6). w20.08 17, 18 párr. 15, 16

Xíniñúʼu kuxini̱yó kuniñúʼuyó tu̱ʼun Ndióxi̱. Reunión kúú ña̱ chíndeétáʼan xíʼinyó ña̱ sakúaʼayó ndáa ki̱ʼva keʼéyó ña̱yóʼo. Soo tá kúni̱yó ña̱ ná kandíxa na̱ yiví ña̱ ndáyáʼviní ña̱ nda̱a̱ ña̱ va̱xi nu̱ú Biblia, xíniñúʼu taváyó tiempo ña̱ kaʼviyóña ndiʼi ki̱vi̱. Ná kaʼviyó tu̱ʼun Ndióxi̱ ña̱ va̱ʼa kandíxakayóra. Soo va̱ása xíniñúʼu kaʼvi kuitíyóña. Chi xíniñúʼu ndakanixi̱níyó xa̱ʼa̱ versículo ña̱ káʼviyó, ta nandukúyó xa̱ʼa̱ña nu̱ú tutu ña̱ tává na̱ ñuu Ndióxi̱ ña̱ va̱ʼa kunda̱a̱-iniyó xíʼinña ta kuchiñuyó ka̱ʼa̱nyó xa̱ʼa̱ña xíʼin inkana (1 Tim. 4:13-15). Tasaá koo tu̱ʼvayó ña̱ kuniñúʼuyó Biblia ña̱ va̱ʼa sanáʼa̱yó inkana. Va̱ása kúni̱yó kaʼvi kuitíyó iin texto nu̱úna. Chi ña̱ kúni̱yó kúú ña̱ chindeétáʼanyó xíʼinna ña̱ kunda̱a̱-inina xa̱ʼa̱ña, ta kotona ndáa ki̱ʼva chindeétáʼanña xíʼinna. Ña̱kán tá ná kaʼviyó Biblia ndiʼi ki̱vi̱ va̱ʼaníka sanáʼa̱yó na̱ yiví (2 Tim. 3:16, 17). w20.09 28 párr. 12

Iin ña̱ chindeétáʼan xíʼinyó ña̱ kundi̱ʼi̱ka-iniyó xa̱ʼa̱ ña̱ ku̱ʼu̱nyó natúʼunyó xíʼin na̱ yiví, kúú ña̱ ndakanixi̱níyó xa̱ʼa̱ ndiʼi ña̱ kéʼé Jehová ña̱ va̱ʼa chindeétáʼanra xíʼinyó. Xa̱a̱ táxira ku̱a̱ʼání ña̱ʼa ña̱ va̱ʼa sakuaʼayó xa̱ʼa̱ra: tá kúú, ña̱ kána nu̱ú tutu xíʼin ña̱ kivi kotoyó nu̱ú celular á tableta, audio, video xíʼin programa ña̱ JW Broadcasting. Ta sitio ña̱ kúúmiíyó nu̱ú Internet xa̱a̱ yáʼaka mil nu̱ú tu̱ʼun íyoña (Mat. 24:45-47). Inka ña̱ kivi chindeétáʼan xíʼinyó ña̱ kundi̱ʼi̱ka-iniyó xa̱ʼa̱ ña̱ ku̱ʼu̱nyó natúʼunyó xíʼin na̱ yiví, kúú ña̱ kundiku̱nyó yichi̱ ta̱ Jesús. Nu̱úka ña̱ keʼéra inka ña̱ʼa, iinlá xa̱ʼa̱ ña̱ ku̱ʼu̱nra natúʼunra xa̱ʼa̱ Ndióxi̱ xi̱ndi̱ʼi̱-inira (Juan 18:37). Va̱ása nítaxira sandáʼvi ta̱ Ndi̱va̱ʼa miíra tá ni̱ka̱ʼa̱nra xíʼinra ña̱ taxira “ndiʼi ñuu náʼnu ña̱ íyo ñuyǐví yóʼo xíʼin ña̱ ku̱i̱ká” ndaʼa̱ra, ni tá xi̱kuni̱ na̱ yiví koora rey nu̱úna (Mat. 4:8, 9; Juan 6:15). Va̱ása níkuni̱ra kuumiíra ku̱a̱ʼání ña̱ ku̱i̱ká ta ni va̱ása níyi̱ʼvíra kunira na̱ xi̱sa̱a̱-ini xi̱xiniñaʼá (Luc. 9:58; Juan 8:59). Tá ná ixayo̱ʼvi̱ña xíʼinyó kandíxayó Ndióxi̱, kiviva kundi̱ʼi̱ka-iniyó xa̱ʼa̱ ña̱ ku̱ʼu̱nyó natúʼunyó xíʼin na̱ yiví tá ná keʼéyó ña̱ ni̱ka̱ʼa̱n ta̱ Pablo nu̱ú texto ña̱ káʼviyó ki̱vi̱ vitin. w20.09 10 párr. 6, 7

Táxiníyó tíxa̱ʼvi xa̱ʼa̱ ña̱ íyo ku̱a̱ʼání ná hermana ti̱xin congregación ná ndeéní káchíñu. Táxiná comentario á kéʼéna inkaka ña̱ʼa tá xíyo reunión, nátúʼunná xíʼin na̱ yiví xa̱ʼa̱ Ndióxi̱ ta ndíʼi̱-ininá xa̱ʼa̱ na̱ congregación. Ta saátu, sava náyóʼo chíka̱a̱níná ndee̱ ña̱ kachíñuná tá ndúvií veʼe nu̱ú ndátakayó ña̱ sakúaʼayó xa̱ʼa̱ Ndióxi̱. Soo saátu yáʼaná nu̱ú tu̱ndóʼo. Savaná kíʼinná kuenta xíʼin na̱ yiváná na̱ xa̱a̱ ku̱chée. Inkaná va̱ása táxi na̱ veʼená ña̱ ndasakáʼnuná Ndióxi̱. Ta inkaná sákuaʼnu iinlá miíná se̱ʼená ta chíka̱a̱níná ndee̱ ña̱ taxiná ña̱ xíniñúʼuna. ¿Nda̱chun xíniñúʼu chika̱a̱yó ndee̱ ña̱ chindeétáʼanyó xíʼin ná hermanayó? Saáchi na̱ ñuyǐví yóʼo va̱ása íxato̱ʼóna ná ñaʼá. Ta saátu ña̱ Biblia káʼa̱nña xíʼinyó ña̱ ná chindeétáʼanyó xíʼinná. Tá kúú, ta̱ apóstol Pablo ni̱ka̱ʼa̱nra xíʼin na̱ congregación ña̱ ñuu Roma ña̱ viíní ná ndakiʼinna ñá Febe ta ná chindeétáʼanna xíʼinñá (Rom. 16:1, 2). Na̱ ñuu ta̱ Pablo xi̱ndakanixi̱nína ña̱ va̱ása ndáyáʼvi ná ñaʼá. Soo tá ni̱xa̱a̱ra ndu̱ura cristiano, xi̱keʼéra nda̱a̱ táki̱ʼva xi̱keʼé ta̱ Jesús ta xi̱ ixato̱ʼóra ná ñaʼá ta va̱ʼa ni̱xi̱yo inira xíʼinná. w20.09 20 párr. 1, 2

Ña̱ va̱ʼa chindeétáʼanyó xíʼin na̱ káʼviyó xíʼin ña̱ kutóona natúʼunna xíʼin inkana, kivi nda̱ka̱tu̱ʼunyóna ña̱yóʼo: “¿Á viíka íyo ña̱ tákún vitin xa̱ʼa̱ ña̱ ki̱xáʼún sákuaʼún xa̱ʼa̱ Ndióxi̱? ¿Á túviún ña̱ xíniñúʼu sakuaʼa inka na̱ yiví xa̱ʼa̱ra? ¿Ndáa ki̱ʼva kivi chindeétáʼún xíʼinna?” (Prov. 3:27; Mat. 9:37, 38). Ná ndakaʼányó chi ta̱ Jesús ni̱ka̱ʼa̱nra xíʼinyó ña̱ xíniñúʼu sanáʼa̱yó na̱ yiví ña̱ ná keʼéna ndiʼi ña̱ʼa ña̱ sa̱náʼa̱ra miíyó. Tá kúú, ni̱ka̱ʼa̱nra xa̱ʼa̱ u̱vi̱ ley ña̱ ndáyáʼviní, ña̱ kuʼvi̱-iniyó kuniyó Ndióxi̱ ta saátu kuʼvi̱-iniyó kuniyó inkana (Mat. 22:37-39). Tá ná sanáʼa̱yóna keʼéna ña̱yóʼo, chindeétáʼanyó xíʼinna ña̱ natúʼunna xíʼin na̱ yiví xa̱ʼa̱ Ndióxi̱. Ña̱ nda̱a̱ kúú ña̱ yíʼvi na̱ káʼviyó xíʼin keʼéna ña̱yóʼo tá ndákanixi̱nína xa̱ʼa̱ña, soo kivi ka̱ʼa̱nyó xíʼinna ña̱ chindeétáʼanva Jehová xíʼinna tasaá loʼo tá loʼo va̱ása yi̱ʼvíkana kunina na̱ yiví (Sal. 18:1-3; Prov. 29:25). w20.11 3 párr. 6-8

Tá káʼvi kúeeyó ña̱ va̱ʼa ku̱ʼu̱nyó sanáʼa̱yó iin na̱ yiví ná ka̱ʼa̱nyó xíʼin Jehová xa̱ʼa̱ na̱ káʼviyó xíʼin, xíʼin xa̱ʼa̱ ña̱ xíniñúʼuna. Ná ka̱ʼa̱nyó xíʼinra ña̱ chindeétáʼanra xíʼinyó ña̱ viíní kuniñúʼuyó Biblia ña̱ va̱ʼa ná xa̱a̱ ña̱yóʼo nda̱a̱ níma̱na. Ta ná va̱ása nandósóyó chi ña̱ kúni̱yó keʼéyó kúú ña̱ chindeétáʼanyó xíʼinna ña̱ xa̱a̱na ndakuchina. Saátu xíniñúʼu kuniso̱ʼona ña̱ káʼa̱n Jehová ta natúʼunna xíʼinra. Iin ki̱ʼva ña̱ kuniso̱ʼona ña̱ káʼa̱nra kúú ña̱ kaʼvina Biblia ndiʼi ki̱vi̱ (Jos. 1:8; Sal. 1:1-3). Ta saátu kivi ka̱ʼa̱nna xíʼin Jehová ndiʼi ki̱vi̱. Xíʼin ndiʼi níma̱yó ná ka̱ʼa̱nyó xíʼin Jehová tá kíxáʼayó káʼviyó xíʼinna ta saátu tá xa̱a̱ ndíʼi káʼviyó, ta ná ka̱ʼa̱nyó xa̱ʼa̱na xíʼinra. Saá kúú ña̱ sakúaʼana ka̱ʼa̱nna xíʼin Jehová xíʼin ndiʼi níma̱na, ta kuniñúʼuna ki̱vi̱ ta̱ Jesucristo ña̱ va̱ʼa ka̱ʼa̱nna xíʼinra (Mat. 6:9; Juan 15:16). Na̱yóʼo kuyatinkana nu̱ú Ndióxi̱ tá ná kaʼvina Biblia ndiʼi ki̱vi̱ ta ka̱ʼa̱nna xíʼinra (Sant. 4:8). w20.10 8 párr. 8; 9 párr. 10, 11

Na̱ ñuu Jehová chíka̱a̱na ndee̱ ña̱ vií kutáʼanna ta táxi̱n koona nda̱a̱ táki̱ʼva ke̱ʼé na̱ cristiano na̱ ni̱xi̱yo tá siglo nu̱ú (Hech. 16:4, 5). Tá kúú, tá ná ku̱ʼu̱nyó reunión xíʼin inka congregación á inka país, xa̱a̱ kunda̱a̱va-iniyó ndáa ki̱ʼva sayáʼana Tutu Ña̱ Nátúʼun xíʼinyó ta ndáa artículo kaʼvina, ta xa̱ʼa̱ ña̱yóʼo va̱ʼa kuniyó. Va̱ʼa kítáʼanyó tíxa̱ʼvi ña̱ chíndeétáʼan espíritu santo Ndióxi̱ xíʼinyó (Sof. 3:9, nota). ¿Ndáaña kivi keʼéyó? Ná ndakanixi̱níyó xa̱ʼa̱ ña̱yóʼo: “¿Á chíndeétáʼi̱n xíʼin na̱ congregación ña̱ táxi̱n koona ta vií kitáʼanna? ¿Á xíniso̱ʼi̱ ña̱ káʼa̱n na̱ hermano na̱ níʼi yichi̱ nu̱ú na̱ congregación? Tá kúúmiíi̱ iin chiñu ti̱xin congregación, ¿á kivi kundaa-ini na̱ hermano yi̱ʼi̱? ¿Á kúi̱ iin na̱ yiví na̱ ya̱chi̱ xáa̱? ¿Á chíndeétáʼi̱n xíʼin inkana? Ta, ¿á kútói̱ kachíñui̱?” (Sant. 3:17). Tá xítoyó ña̱ xíniñúʼu viíka keʼéyó ña̱yóʼo, ná ndukúyó espíritu santo nu̱ú Jehová. Tá ná taxiyó nasamaña ki̱ʼva ña̱ íyoyó xíʼin ña̱ kéʼéyó, saá kúú ña̱ kuʼvi̱níka-ini na̱ hermano kunina miíyó ta kundayáʼvikayó nu̱úna. w20.10 23 párr. 12, 13

Nda̱a̱ táki̱ʼva íyo iin espejo saá íyo tu̱ʼun Ndióxi̱ nu̱ú miíyó (Sant. 1:23-25). Ndiʼi xi̱ta̱a̱n ndiʼiyó xítoyó miíyó nu̱ú espejo tá kúma̱níka kitayó ku̱ʼu̱nyó. Tasaá kíʼinyó kuenta á xíniñúʼu ndasaviíyó miíyó. Ki̱ʼva saá íyo ña̱ káʼviyó Biblia ndiʼi ki̱vi̱, chi xítoyó á xíniñúʼu nasamayó ki̱ʼva ña̱ íyoyó á ña̱ ndákanixi̱níyó. Ku̱a̱ʼání na̱ hermano káʼvina texto ña̱ káʼviyó ndiʼi ki̱vi̱ tá kúma̱níka kitana veʼena, chi saá kivi ndakanixi̱nína xa̱ʼa̱ ña̱yóʼo. Tasaá ndúkúna ndáa ki̱ʼva keʼéna ña̱ ka̱ʼvina. Ta saátu xíniñúʼu kaʼviyó Biblia ndiʼi ki̱vi̱ ta ndakanixi̱níyó xa̱ʼa̱ ña̱ káʼviyó. Sana kivi ndakanixi̱níyó ña̱ va̱ása ndáyáʼviví keʼéyó ña̱yóʼo, soo ña̱yóʼo kúú iin ña̱ kivi chindeétáʼan xíʼinyó ña̱ va̱ʼa ndakundeéyó ku̱ʼu̱nyó yichi̱ táñu ña̱ taxi ña̱ kutakuyó. Tu̱ʼun Ndióxi̱ íyoña nda̱a̱ táki̱ʼva íyo iin aparato tú xíniñúʼu na̱ médico ña̱ va̱ʼa kotona ini na̱ yiví, chíndeétáʼanña xíʼinyó ña̱ kotoyó ndáa ki̱ʼva íyoyó. Ña̱kán xíniñúʼu vitá koo iniyó tá kúni̱yó ndakiʼinyó ña̱ va̱ʼa xa̱ʼa̱ consejo ña̱ va̱xi nu̱ú Biblia á ña̱ táxi na̱ ñuu Ndióxi̱ ndaʼa̱yó. w20.11 18 párr. 3; 20 párr. 8

Ku̱a̱ʼá yichi̱ xi̱ i̱xandi̱va̱ʼana xíʼin na̱ cristiano na̱ ni̱xi̱yo tá siglo nu̱ú, soo saátu ni̱xi̱yo tiempo ña̱ táxi̱n xi̱ndoona. ¿Ndáa ki̱ʼva xi̱niñúʼuna tiempo yóʼo? Na̱ cristiano kán chi̱ka̱a̱nína ndee̱ ña̱ na̱túʼunna xíʼin na̱ yiví. Tutu ña̱ Hechos nátúʼunña xa̱ʼa̱ congregación ña̱ ni̱xi̱yo tiempo saá ña̱ xi̱kuʼvi̱ní-inina xi̱xina Jehová, ta xa̱ʼa̱ ña̱ nda̱kundeéna na̱túʼunna xíʼin na̱ yiví, ku̱a̱ʼákana ni̱xa̱a̱na ndu̱una cristiano. Ña̱yóʼo náʼa̱ña ña̱ ta̱xiva Jehová bendición ndaʼa̱na xa̱ʼa̱ ña̱ chi̱ka̱a̱nína ndee̱ na̱túʼunna xíʼin na̱ yiví tá tiempo ña̱ kǒo ku̱a̱chi níxi̱yo nu̱úna (Hech. 9:26-31). Na̱ discípulo na̱ ni̱xi̱yo tá siglo nu̱ú chi̱ka̱a̱nína ndee̱ ña̱ na̱túʼunna xíʼin na̱ yiví xa̱ʼa̱ Ndióxi̱. Tá kúú, ta̱ apóstol Pablo ki̱ndoora ñuu Éfeso tá xi̱nira ña̱ kivi natúʼunra xíʼin na̱ ñuu kán xa̱ʼa̱ Ndióxi̱, tasaá xa̱a̱na koona discípulo ta̱ Jesús (1 Cor. 16:8, 9). Tá na̱kunda̱a̱-ini na̱ congregación xa̱ʼa̱ ña̱ nda̱kaxinna keʼéna, ndiʼina chi̱ka̱a̱nína ndee̱ ña̱ na̱túʼunna xíʼin na̱ yiví xa̱ʼa̱ Ndióxi̱ (Hech. 15:30-35). ¿Ndáaña ku̱u xa̱ʼa̱ ña̱yóʼo? Texto ña̱ ká’viyó ki̱vi̱ vitin náʼa̱ña ndáaña ku̱u. w20.09 16 párr. 6-8

Xa̱ʼa̱ ña̱ ni̱ki̱ʼvi ta̱ Adán ku̱a̱chi kúú ña̱ ni̱xi̱ʼi̱ra, ta ña̱yóʼo kúútu ña̱ ndóʼo na̱ se̱ʼera. Ta nda̱a̱ tiempo vitin ndákundeéyó xóʼvi̱yó xa̱ʼa̱ ña̱ va̱ása níkandíxara. Soo ña̱ ndátuyó ndakiʼinyó chí nu̱únínu va̱ʼaníkaña xa̱ʼa̱ ña̱ sa̱ndátaku Ndióxi̱ se̱ʼera. Ta̱ Pablo ni̱ka̱ʼa̱nkara: “Xa̱ʼa̱ iin ta̱a [ta̱ Jesús] kúú ña̱ ndataku na̱ ni̱xi̱ʼi̱. Saáchi xa̱ʼa̱ ta̱ Adán kúú ña̱ ndiʼina xíʼi̱na ta saátu xa̱ʼa̱ ta̱ Cristo kúu ña̱ ndiʼina ndataku” (1 Cor. 15:22). ¿Ndáana kúú na̱ ni̱ka̱ʼa̱n ta̱ Pablo xa̱ʼa̱ tá ni̱ka̱ʼa̱nra “xa̱ʼa̱ ña̱ ke̱ʼé ta̱ Adán ndiʼina xíʼi̱na”? Ni̱ka̱ʼa̱nra xa̱ʼa̱ ndiʼi miíyó na̱ kúú se̱ʼe ta̱ Adán, ta xa̱ʼa̱ ña̱ ke̱ʼé ta̱yóʼo kúúyó na̱ yiví ku̱a̱chi ta xíʼi̱yó (Rom. 5:12). Ta̱ Adán va̱ása ndatakura, ta̱yóʼo va̱ása ndakiʼinra ña̱ va̱ʼa xa̱ʼa̱ ña̱ ni̱xi̱ʼi̱ ta̱ Cristo, saáchi ta̱yóʼo iin ta̱a ta̱ va̱ása níxi̱kuumií ku̱a̱chi xi̱kuura soo nda̱kaxinra ña̱ va̱ása kandíxara Ndióxi̱. Ta̱ Adán nda̱kiʼinra táʼan ña̱ ndakiʼin na̱ ndatiin ta̱ Jesús ku̱a̱chi xíʼin, na̱ íyo nda̱a̱ táki̱ʼva íyo ti̱xúʼu chi na̱yóʼo ndiʼi-xa̱ʼa̱na ta va̱ása ndatakukana (Mat. 25:31-33, 46; Heb. 5:9). w20.12 5 párr. 13, 14

Tá kǒo iin chiñu ndákiʼinyó ti̱xin ñuu Ndióxi̱, ná kundiku̱nyó yichi̱ na̱ ángel. Iin yichi̱ ni̱nda̱ka̱tu̱ʼun Jehová na̱ ángel ndáa ki̱ʼva kivi sandáʼvina ta̱ rey Acab. Ku̱a̱ʼána ni̱ka̱ʼa̱nna ndáa ki̱ʼva keʼénaña, soo iinlá kuitíva ta̱ ángel nda̱kaxin Jehová ta ni̱ka̱ʼa̱nra xíʼinra ña̱ viíva kana ña̱ ni̱ka̱ʼa̱nra (1 Rey. 22:19-22). ¿Á nda̱kava-ini inka na̱ ángel ta nda̱kanixi̱nína: “¿Nda̱chunví ni̱ka̱ʼi̱n tá va̱ása keʼéna ña̱ ni̱ka̱ʼi̱n?”. Va̱ása níndakanixi̱nína saá. Na̱ ángel vitá íyo inina ta kúni̱na ña̱ iinlá Jehová ná ndukáʼnu (Juec. 13:16-18; Apoc. 19:10). Ña̱ ndáyáʼviníka kúúmiíyó kúú ña̱ kúúyó testigo Jehová ta saátu ña̱ nátúʼunyó xíʼin na̱ yiví xa̱ʼa̱ Reino Ndióxi̱. Chiñu ña̱ kúúmiíyó ti̱xin ñuu Ndióxi̱, kivi nasa̱maña. Ña̱ ndáyáʼvika nu̱ú Jehová ta saátu nu̱ú na̱ hermanoyó kúú ña̱ vitá íyo iniyó ta su̱ví chiñu ña̱ kúúmiíyó. Ña̱kán ná ka̱ʼa̱n ndáʼviyó xíʼin Jehová ña̱ ná chindeétáʼanra xíʼinyó ña̱ ndakundeéyó vitá koo iniyó. Ta saátu ná ndakanixi̱níyó xa̱ʼa̱ na̱ vitá ni̱xi̱yo ini ka̱chíñu nu̱ú Jehová na̱ káʼa̱n Biblia xa̱ʼa̱, ta xíʼin ña̱ si̱í-ini ná kachíñuyó nu̱ú na̱ hermano (1 Ped. 5:5). w20.12 26 párr. 16, 17

Ña̱ kandíxayó ña̱ sakǎku Jehová miíyó íyoña nda̱a̱ táki̱ʼva íyo iin casco, ta miíra kúú ta̱ táxi ña̱yóʼo ndaʼa̱yó. Ña̱ káʼa̱n Jehová keʼéra kúú ña̱ sandátakura miíyó ni ná kuviyó, ta saátu ña̱ taxira ña̱ va̱ʼa ndaʼa̱yó tá ná keʼéyó ña̱ kúni̱ra (1 Tes. 5:8; 1 Tim. 4:10; Tito 1:1, 2). Ña̱ ndátuyó sakǎku Jehová miíyó ndáaña ña̱ ndákanixi̱níyó. Chi chíndeétáʼanña xíʼinyó ña̱ ndakanixi̱níyó xa̱ʼa̱ ña̱ káʼa̱n Ndióxi̱ taxira ndaʼa̱yó chí nu̱únínu ta va̱ása kundi̱ʼi̱ní-iniyó xa̱ʼa̱ tu̱ndóʼo ña̱ yáʼayó nu̱ú. Xíniñúʼuyó casco yóʼo tá chíka̱a̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱ní Jehová xa̱ʼa̱ iin ña̱ʼa. Tá kúú, va̱ása ndáa-iniyó “ña̱ ku̱i̱ká ña̱ íyo loʼo kuití tiempo” chi Ndióxi̱ ndáa-iniyó (Sal. 26:2; 104:34; 1 Tim. 6:17). Espada ña̱ táxi espíritu santo ndaʼa̱yó kúú tu̱ʼun Ndióxi̱. Ña̱yóʼo kúúmiíña ndee̱ ña̱ chindeétáʼanña xíʼinyó ña̱ ndakuniyó ndáaña kúú ña̱ vatá, ta saátu ndátaváñá na̱ yiví ndaʼa̱ ña̱ vatá ña̱ sánáʼa̱ inkana, ta chíndeétáʼanña xíʼinyó ña̱ sandákooyó keʼéyó ña̱ va̱ása va̱ʼa (2 Cor. 10:4, 5; 2 Tim. 3:16, 17; Heb. 4:12). Kivi sakuaʼayó vií kuniñúʼuyóña tá ná kaʼviyóña, ta saátu na̱ ñuu Ndióxi̱ sánáʼa̱na miíyó ndáa ki̱ʼva kuniñúʼuyóña (2 Tim. 2:15). w21.03 26 párr. 4; 28, 29 párr. 10, 11

Ni xi̱ndika̱a̱ ta̱ apóstol Juan veʼeka̱a xa̱ʼa̱ ña̱ xi̱sanáʼa̱ra xa̱ʼa̱ ta̱ Jesús, ni̱na̱ʼa̱ra ña̱ xi̱ndi̱ʼi̱-inira xa̱ʼa̱ inkana. Tá kúú, ka̱ʼyíra libro ña̱ Apocalipsis ta chi̱ndaʼáraña ndaʼa̱ na̱ congregación, ña̱ va̱ʼa kunda̱a̱-inina xa̱ʼa̱ ña̱ si̱lóʼo kúma̱ní kuu (Apoc. 1:1). Tá ni̱ya̱ʼa tiempo tá xa̱a̱ ki̱tara veʼeka̱a ña̱ ni̱xi̱yo chí isla ña̱ Patmos, ka̱ʼyíra Evangelio ña̱ nátúʼun xa̱ʼa̱ ña̱ ke̱ʼé ta̱ Jesús. Ta saátu ka̱ʼyíra u̱ni̱ carta ña̱ chi̱ndaʼára ku̱a̱ʼa̱n ndaʼa̱ na̱ hermano, ña̱ va̱ʼa chika̱a̱ra ndee̱ xíʼinna ta ndasandakúra-inina. Kivi kundiku̱nyó yichi̱ ta̱ Juan ta na̱ʼa̱yó ña̱ kúʼvi̱-iniyó xíniyó na̱ yiví, tá vií ná koo ña̱ ndaka̱xinyó keʼéyó xíʼin ña̱ tákuyó. Na̱ ñuyǐví ta̱ Ndi̱va̱ʼa kúni̱na ña̱ ná kuniñúʼuyó tiempoyó xíʼin ndee̱yó ña̱ ndukúikáyó á ña̱ kundayáʼvikayó nu̱ú na̱ yiví. Soo nu̱ú iníísaá ñuyǐví íyo ku̱a̱ʼání na̱ hermano na̱ chíka̱a̱ní ndee̱ ña̱ natúʼunna xíʼin na̱ yiví xa̱ʼa̱ Ndióxi̱, ta chíndeétáʼanna xíʼinna ña̱ kuyatinna nu̱úra. w21.01 10 párr. 9, 10

Ta̱ Jonatán kivi sa̱a̱-inira kunira ta̱ David, ta ka̱ʼa̱n kúáchira xa̱ʼa̱ derecho ña̱ kúúmiíra ña̱ koora rey xa̱ʼa̱ ña̱ xi̱kuura se̱ʼe ta̱ Saúl (1 Sam. 20:31). Soo va̱ása níkeʼé ta̱ Jonatán ña̱yóʼo saáchi vitá ni̱xi̱yo inira ta nda̱kú ni̱xi̱yo inira xíʼin Jehová, ña̱kán i̱xato̱ʼóra ña̱ nda̱kaxin Jehová ta̱ David ña̱ koora rey. Ta saátu, nda̱kú ni̱xi̱yo inira xíʼin ta̱ David ni ni̱sa̱a̱ní ta̱ Saúl xa̱ʼa̱ ña̱yóʼo (1 Sam. 20:32-34). Xa̱ʼa̱ ña̱ ni̱kuʼvi̱-ini ta̱ Jonatán xi̱nira ta̱ David, va̱ása nísa̱a̱-inira kunirara. Ta̱ Jonatán xi̱xini̱níra kuniñúʼura tú arco tá xi̱kanitáʼanra, ta ndakúní ni̱xi̱yo inira. Ta nda̱a̱ xi̱ka̱ʼa̱nna xa̱ʼa̱ra xíʼin yivára, ña̱ kamaníka ni̱xi̱yona nu̱ú tí águila ta ndakúníka ni̱xi̱yona nu̱ú tí león (2 Sam. 1:22, 23). Ña̱kán kivi ni̱nuní kuni ta̱ Jonatán xa̱ʼa̱ ña̱ va̱ʼaní xi̱xinira kanitáʼanra. Soo va̱ása níkuni̱ra keetáʼanra xíʼin ta̱ David, ta ni va̱ása níxi̱sa̱a̱ra xa̱ʼa̱ ña̱ va̱ʼa xi̱kana ña̱ xi̱keʼé ta̱ David. Nu̱úka ña̱ keʼéra ña̱yóʼo: xi̱ndayáʼviní ta̱ David nu̱úra xa̱ʼa̱ ña̱ ndakú ni̱xi̱yo inira ta xi̱kandíxara Jehová. Ta ki̱xáʼara kúʼvi̱-inira xínira ta̱ David tá xa̱ʼní ta̱yóʼo ta̱ Goliat. w21.01 21 párr. 6; 22 párr. 8, 9

Ta̱ Jesucristo kúú ta̱ níʼi yichi̱ nu̱ú ndiʼi miíyó na̱ ndásakáʼnu Ndióxi̱, ta va̱ʼaní kéʼéra ña̱yóʼo saáchi kǒo ku̱a̱chi kúúmiíra. Soo tá tíndaʼa̱ iin ñá ñaʼá ñá ndásakáʼnu Ndióxi̱, iin ta̱a ta̱ kúúmií ku̱a̱chi kúú ta̱ kíxáʼa níʼi yichi̱ nu̱úñá, ta sana kivi ixayo̱ʼvi̱ ña̱yóʼo xíʼinñá. Ña̱kán tá kúni̱ iin ñá hermana tindaʼa̱ñá xíʼin iin ta̱ hermano, siʼna xíniñúʼu ndakanixi̱níñá xa̱ʼa̱ ña̱yóʼo: “¿Nda̱chun va̱ʼa kúnda̱a̱-inii̱ ña̱ vií kuniʼira yichi̱ nu̱úi̱? ¿Á ña̱ kachíñura nu̱ú Jehová kúú ña̱ ndáyáʼviníka nu̱úra? Tá su̱ví saá íyoña, ¿ndáaña náʼa̱ nu̱úi̱ ña̱ chindeétáʼanra xíʼi̱n ña̱ vií kutáʼi̱n xíʼin Jehová tá xa̱a̱ ná tindaʼa̱ndi̱?”. Soo saátu xíniñúʼu ndakanixi̱níñá xa̱ʼa̱ ña̱yóʼo: “¿Ndáaña va̱ʼa kúúmiíi̱ ta xa̱ʼa̱ ña̱yóʼo vií koondi̱ xíʼin táʼanndi̱? ¿Á kúee íyo inii̱ ta va̱ʼa-inii̱ xíʼin inkana? ¿Á viíní kítáʼi̱n xíʼin Jehová?” (Ecl. 4:9, 12). Tá vií ná koo ña̱ ndaka̱xin iin ñá ñaʼá keʼéñá tá kúma̱níka tindaʼa̱ñá, ña̱yóʼo chindeétáʼanña xíʼinñá ña̱ si̱í kooñá xíʼin na̱ tindaʼa̱ xíʼinñá. Ku̱a̱ʼání ná hermana va̱ʼaní yichi̱ chínúuná nu̱úyó saáchi va̱ʼaní kándíxaná yiíná. Ta xíniñúʼu ka̱ʼa̱nyó tu̱ʼun va̱ʼa xíʼinná xa̱ʼa̱ ña̱yóʼo. w21.02 8 párr. 1, 2

Tiempo vitin ku̱a̱ʼání na̱ publicador sákuaʼana inka tu̱ʼun ña̱ va̱ʼa ku̱a̱ʼáka na̱ yiví natúʼunna xíʼin xa̱ʼa̱ Ndióxi̱. Ta xáʼa̱nna inka congregación nu̱ú káʼa̱nna inka tu̱ʼun ña̱ va̱ʼa chindeétáʼanna xíʼinna ña̱ natúʼunna xa̱ʼa̱ Ndióxi̱. Iin tá iinna ndáka̱xinna keʼéna ña̱yóʼo ña̱ va̱ʼa kachíñukana nu̱ú Jehová. Ni ku̱a̱ʼání ku̱i̱ya̱ xíniñúʼu ya̱ʼa ta saáví kixáʼana vií ka̱ʼa̱nna tu̱ʼun yóʼo, soo chíndeétáʼannína xíʼin na̱ congregación. Ndásandakúnína-ini na̱ hermano chi ku̱a̱ʼání ña̱ va̱ʼa kúúmiína ta xíni̱na keʼéna ku̱a̱ʼá ña̱ʼa. Ndáyáʼviní na̱ hermano yóʼo nu̱úyó chi chíka̱a̱nína ndee̱. ¿Á ña̱ va̱ʼa kúú ña̱ ka̱ʼa̱n na̱ anciano ña̱ va̱ása kívi xa̱a̱ iin ta̱ hermano koora anciano a siervo ministerial, saáchi ta̱ʼán sakuaʼara ka̱ʼa̱nra tu̱ʼun ña̱ káʼa̱n na̱ congregación? Va̱ása. Chi ña̱ xíniñúʼu kiʼinna kuenta xíʼin kúú á sáxi̱nu ta̱ hermano yóʼo ña̱ káʼa̱n Biblia xa̱ʼa̱ na̱ kivi xa̱a̱ koo anciano á siervo ministerial, ta va̱ása kotona á va̱ʼa káʼa̱nra tu̱ʼún ña̱ káʼa̱n na̱ congregación (1 Tim. 3:1-10, 12, 13; Tito 1:5-9). w20.08 30 párr. 15, 16

Ku̱a̱ʼání na̱ yiví ndákanixi̱nína ña̱ ndixa kivi kusi̱í-inina tá va̱ása kúúmiína kue̱ʼe̱, tá ku̱a̱ʼá xu̱ʼún kúúmiína ta saátu tá si̱í íyo na̱ veʼena. Soo ña̱ si̱í-ini ña̱ ni̱ka̱ʼa̱n ta̱ Santiago xa̱ʼa̱ kúú ña̱ táxi espíritu santo Ndióxi̱ ndaʼa̱yó, xa̱ʼa̱ ña̱kán kivi kusi̱í-iniyó ni nda̱a̱ ndáaka tu̱ndóʼo yáʼayó nu̱ú (Gál. 5:22). Miíyó na̱ ndásakáʼnu Ndióxi̱ kúsi̱í-iniyó tá kúnda̱a̱-iniyó ña̱ kúsi̱í-ini Jehová xíʼin ña̱ kéʼéyó, ta saátu tá ndíku̱nyó yichi̱ ta̱ Jesús (Luc. 6:22, 23; Col. 1:10, 11). Iin ñuʼu̱ ña̱ ndíka̱a̱ ini iin farol va̱ása ndáʼva̱ña ni kúun sa̱ví á ni káni ta̱chí, ki̱ʼva saá íyo ña̱ kúsi̱í-iniyó tá ndíka̱a̱ña níma̱yó. Ña̱kán ni va̱ása kúúmiíyó xu̱ʼún á ni kúúmiíyó kue̱ʼe̱ va̱ása ndíʼi-xa̱ʼa̱ ña̱ kúsi̱í-iniyó. Ta ni kúsi̱kindaana miíyó á ni sási na̱ veʼeyó nu̱úyó á inkakana ña̱ ndasakáʼnuyó Ndióxi̱, ndeéka kúsi̱í-iniyó. Tu̱ndóʼo ña̱ yáʼayó nu̱ú xa̱ʼa̱ ña̱ kándíxayó Ndióxi̱ náʼa̱ña ña̱ ndixa kúúyó discípulo ta̱ Cristo (Mat. 10:22; 24:9; Juan 15:20). Xa̱ʼa̱ ña̱kán ni̱ka̱ʼa̱n ta̱ Santiago tu̱ʼun ña̱ va̱xi nu̱ú texto ña̱ káʼviyó ki̱vi̱ vitin. w21.02 28 párr. 6

Tá káʼviún Biblia ta ndáni̱ʼún versículo ña̱ káʼa̱n xa̱ʼa̱ ña̱ ndáyáʼviní táxi̱n koo iniyó ta kandíxayó Jehová, chika̱a̱ ndee̱ ña̱ sakuaʼa xíʼin xi̱níún versículo yóʼo. Kivi ndeé kaʼviúnña á kaʼyíúnña nu̱ú iin tutu, tasaá kivi ndikóún kaʼviúnña inka ki̱vi̱. Jehová ni̱ka̱ʼa̱nra xíʼin ta̱ Josué ña̱ ná kaʼvira libro ña̱ Ley, ta ñuú xíʼin káʼñu ná ndakanixi̱níra xa̱ʼa̱ña, tasaá ndíchi xa̱a̱ra koora ta vií keʼéra ndiʼi ña̱ʼa. Ta ña̱ xi̱kaʼvira xi̱chindeétáʼanña xíʼinra ña̱ va̱ása yi̱ʼvíra ta ndakú koo inira ña̱ va̱ʼa kuniʼira yichi̱ nu̱ú na̱ ñuu Ndióxi̱ (Jos. 1:8, 9). Nu̱ú tu̱ʼun Ndióxi̱ ndáni̱ʼíyó ku̱a̱ʼání ña̱ kivi chindeétáʼan xíʼinyó ña̱ táxi̱n koo iniyó tá yáʼayó nu̱ú tu̱ndóʼo ña̱ kivi sáyíʼvi miíyó á sándi̱ʼi̱-iniyó (Sal. 27:1-3; Prov. 3:25, 26). Ti̱xin reunión ku̱a̱ʼání ña̱ va̱ʼa ndákiʼinyó xíʼin ña̱ sánáʼa̱na nu̱ú plataforma, comentario ña̱ táxi na̱ hermano ta saátu ña̱ nátúʼunyó xíʼinna (Heb. 10:24, 25). Tá ná natúʼunyó xa̱ʼa̱ ña̱ ndóʼoyó xíʼin na̱ migoyó na̱ íyo ti̱xin congregación, kivi chika̱a̱na ndee̱ xíʼinyó. w21.01 6 párr. 15, 16

¿Ndáaña kivi sakuaʼún xíʼin ña̱ ndo̱ʼo ta̱ Asá? Ña̱ ndiʼi tiempo xíniñúʼu vitá koo iniún ta kandíxaún Jehová. Tá nda̱kuchiún ni̱na̱ʼún ña̱ kándíxaníúnra ta ndáa-iniúnra. Ta viíní nda̱kiʼin Jehová yóʼó ti̱xin ñuura. Iin ña̱ va̱ʼaní kúú ña̱yóʼo. Ta ña̱ xíniñúʼu keʼún vitin kúú ña̱ ndakundeún kundaa-iniún Jehová. Va̱ása ixayo̱ʼvi̱víña xíʼún ña̱ keʼún ña̱yóʼo tá xíniñúʼu ndaka̱xiún keʼún ña̱ ndáyáʼviní. Soo saátu xíniñúʼu kundaa-iniún Jehová ni nda̱a̱ ndáaka ña̱ ndáka̱xiún keʼún, kúúña ña̱ kotonde̱ʼún á ña̱ kusíkíún á chiñún á inkaka ña̱ kúni̱ún keʼún. Nu̱úka ña̱ keʼún ña̱ ndákanixi̱ní miíún, va̱ʼaka nandukú ña̱ káʼa̱n tu̱ʼun Ndióxi̱ ña̱ kivi chindeétáʼan xíʼún, ta keʼé ña̱ káʼa̱n ña̱yóʼo (Prov. 3:5, 6). Saá kúú ña̱ sakúsi̱íníún-ini Jehová, ta ixato̱ʼó na̱ hermano na̱ íyo ti̱xin congregación yóʼó. Ndiʼivayó kúúyó na̱ yiví ku̱a̱chi ta xa̱ʼa̱ ña̱yóʼo sava yichi̱ keʼún ña̱ va̱ása va̱ʼa. Soo ña̱yóʼo va̱ása xíniñúʼu kasiña nu̱ún ña̱ chika̱a̱níún ndee̱ ña̱ kachíñún nu̱ú Jehová. w21.03 5, 6 párr. 14, 15

¿Á sási na̱ veʼeyó nu̱úyó ña̱ kachíñuyó nu̱ú Jehová? ¿Á íyoyó iin país nu̱ú sási na̱ chíñu nu̱úyó ña̱ ndasakáʼnuyó Jehová á va̱ása táxina ña̱ keʼéyó ña̱yóʼo? Tá saá íyoña, tá ná kaʼviyó 2 Timoteo 1:12-16 xíʼin 4:6-11, 17-22 kivi chika̱a̱ña ndee̱ xíʼinyó. Ta̱ apóstol Pablo ka̱ʼyíra ña̱yóʼo tá ndíka̱a̱ra veʼeka̱a. Tá kúma̱níka kaʼviyó versículo yóʼo, ná ka̱ʼa̱nyó xíʼin Jehová xa̱ʼa̱ tu̱ndóʼo ña̱ kúúmiíyó ta saátu ndáa ki̱ʼva kúniyó xíʼin ña̱yóʼo. Ta káxiní ná koo ña̱ ka̱ʼa̱nyó xa̱ʼa̱. Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ ndani̱ʼíyó consejo ña̱ kivi chindeétáʼan xíʼinyó tá káʼviyó xa̱ʼa̱ tu̱ndóʼo ña̱ ni̱ya̱ʼa ta̱ Pablo nu̱ú. Xa̱a̱ ya̱chi̱kava ni̱ka̱ʼa̱n Jehová xíʼin ta̱ Pablo ña̱ ixandi̱va̱ʼana xíʼinra xa̱ʼa̱ ña̱ ndíku̱nra ta̱ Cristo (Hech. 21:11-13). ¿Ndáa ki̱ʼva chi̱ndeétáʼan Jehová xíʼin ta̱ Pablo? Nda̱kuiinra oración ña̱ ke̱ʼéra nu̱úra, ta ta̱xira ndee̱ ndaʼa̱ra. Ta saátu ni̱ka̱ʼa̱nra xíʼinra ña̱ taxira ña̱ va̱ʼa ndaʼa̱ra chí nu̱únínu xa̱ʼa̱ ña̱ chi̱ka̱a̱níra ndee̱ ka̱chíñura nu̱úra. Ta chi̱ka̱a̱ra-ini na̱ va̱ʼaní xi̱kitáʼan xíʼin ta̱ Pablo ña̱ chi̱ndeétáʼanna xíʼinra. w21.03 17, 18 párr. 14, 15, 19