Na̱ tindaʼa̱ ndáa ki̱ʼva keʼéna vikó ña̱ ixato̱ʼó ki̱vi̱ Jehová

1, 2. ¿Ndáaña kúni̱ Jehová ná keʼé na̱ xa̱a̱ ku̱nu̱mí tindaʼa̱?

¿Á ÍYO novioún á noviaún? ¿Á xa̱a̱ ku̱nu̱mí tindaʼa̱ndó? Tásaá íyoña kúsi̱íní-inindi̱ xíʼinndó. Sana ndíʼi̱níva-inindó xa̱ʼa̱ ña̱ keʼéndó vikó, Jehová kúni̱ra ña̱ ná kusi̱íní-inindó mií ki̱vi̱ ña̱ tindaʼa̱ndóa ta saátu ña̱ si̱íní ná koondó ndiʼi tiempo (Prov. 5:18; Cant. 3:11).

² Ndáyáʼviní ña̱ ná ixato̱ʼóndó Jehová ki̱vi̱ ña̱ tindaʼa̱ndó. ¿Nda̱chun? Ta, ¿ndáaña kivi keʼéndó ña̱ va̱ʼa vií koo vikó ña̱ tindaʼa̱ndó? Nu̱ú artículo yóʼo ka̱ʼa̱nyó xa̱ʼa̱ u̱vi̱ pregunta yóʼo. Artículo yóʼo káʼa̱nña xa̱ʼa̱ na̱ xa̱a̱ ku̱nu̱mí tindaʼa̱ ta ndáa ki̱ʼva koo vikó ña̱ tindaʼa̱na. Saátu texto ña̱ ka̱ʼa̱nyó xa̱ʼa̱ yóʼo chindeétáʼanña xíʼin ndiʼiyó ndáa ki̱ʼva ndasakáʼnuyó Jehová tá ná ku̱ʼu̱nyó vikó ña̱ tindaʼa̱na á tá ndúkúna iin consejo nu̱úyó.

NDA̱CHUN XÍNIÑÚʼU IXATO̱ʼÓYÓ JEHOVÁ

3. Na̱ kúni̱ tindaʼa̱, ¿ndáaña xíniñúʼu kiʼinna kuenta xíʼin tá nátúʼunna ndáa ki̱ʼva koo vikó ña̱ tindaʼa̱na, ta nda̱chun?

³ Tá xa̱a̱ ndákanixi̱níndó ndáa ki̱ʼva koo vikó ña̱ tindaʼa̱ndó, xíniñúʼu kiʼinndó kuenta xíʼin texto ña̱ va̱xi nu̱ú tu̱ʼún Jehová ña̱ káʼa̱n xa̱ʼa̱ ña̱yóʼo. ¿Nda̱chun? Saáchi Jehová kúú ta̱ chi̱ndúʼú xa̱ʼa̱ ña̱ tíndaʼa̱na ta miíra kúú ta̱ sa̱tíndaʼa̱ ta̱ Adán xíʼin ñá Eva (Gén. 1:28; 2:24). Ña̱kán ndóʼo na̱ kúú novio, xíniñúʼu kiʼinndó kuenta xíʼin ña̱ ndákanixi̱ní Ndióxi̱.

4. Tá xa̱a̱ káʼa̱nndó xa̱ʼa̱ ña̱ tindaʼa̱ndó, ¿nda̱chun xíniñúʼu kiʼinndó kuenta ndáaña ndákanixi̱ní Jehová?

⁴ Iinka ña̱ xíniñúʼu kiʼinndó kuenta xíʼin ta xa̱a̱ nátúʼundó ndáa ki̱ʼva koo vikó ña̱ tindaʼa̱ndó kúú ña̱ kiʼinndó kuenta ndáaña ndákanixi̱ní Jehová xa̱ʼa̱ ña̱yóʼo, chi ta̱yóʼo kúú yivándó ta saátu kúúra migondó (Heb. 12:9). Va̱ása kúni̱ndó ña̱ ná koo iin ña̱ va̱ása va̱ʼa ki̱vi̱ ña̱ tindaʼa̱ndó ña̱ kivi sandákava-inira á ña̱ kivi kuu inka ki̱vi̱ (Sal. 25:14). Tá ndákanixi̱níndó xa̱ʼa̱ ndiʼi ña̱ xa̱a̱ kéʼéra xa̱ʼa̱ndó xíʼin ña̱ keʼéra chí nu̱únínu, ¿á su̱ví ña̱ nda̱a̱ ndáyáʼviní ixato̱ʼóndóra ki̱vi̱ ña̱ ná tindaʼa̱ndó? (Sal. 116:12).

NDÁA KI̱ʼVA IXATO̱ʼÓNDÓ JEHOVÁ

5. ¿Ndáa ki̱ʼva chindeétáʼan Biblia xíʼin na̱ novio ña̱ vií koo ña̱ ndaka̱xinna keʼéna tá ná tindaʼa̱na?

⁵ Biblia va̱ása káʼa̱nña xa̱ʼa̱ iin tá iin ña̱ʼa ndáa ki̱ʼva xíniñúʼu koo vikó ña̱ tíndaʼa̱na á xa̱ʼa̱ iinka vikó ña̱ kéʼéna. Íyo ku̱a̱ʼá ña̱ kivi keʼéndó ndáa ki̱ʼva kúni̱ miíndó koo vikó ña̱ tindaʼa̱ndó. Soo miíyó na̱ cristiano íxato̱ʼóvayó ley ña̱ íyo ñuu nu̱ú íyoyó ña̱ káʼa̱n xa̱ʼa̱ ña̱yóʼo (Mat. 22:21). Na̱ kúni̱ tindaʼa̱ tá ndíku̱nna texto ña̱ va̱xi nu̱ú Biblia ni nda̱a̱ ndáaka ña̱ kúni̱na keʼéna, ixato̱ʼóvana Jehová ki̱vi̱ ña̱ tindaʼa̱na ta sakúsi̱ína-inira. Ná kotoyó sava texto ña̱ káʼa̱n xa̱ʼa̱ ña̱yóʼo.

6. Na̱ kúú novio, ¿nda̱chun ndáyáʼviní kundiku̱nna ley ña̱ káʼa̱n xa̱ʼa̱ ña̱ tindaʼa̱na? (Romanos 13:1, 2).

⁶ Kundiku̱nndó ña̱ káʼa̱n ley (Rom. 13:1, 2). Ku̱a̱ʼání país kúúmiíña ley ña̱ káʼa̱n xa̱ʼa̱ ndáaña xíniñúʼu keʼéna ña̱ va̱ʼa tindaʼa̱na. Ña̱kán nda̱ka̱tu̱ʼún ndáaña xíniñúʼuna ñuu nu̱ú íyoún ña̱ va̱ʼa tindaʼa̱ndó. Saátu kivi ka̱ʼún xíʼin na̱ anciano ña̱ ná chindeétáʼanna xíʼún.b

7. ¿Ndáa ki̱ʼva xíniñúʼu koo vikó ña̱ tíndaʼa̱na?

⁷ Kiʼinndó kuenta ña̱ vií ná koo vikó ña̱ tindaʼa̱ndó (1 Cor. 10:31, 32). Ki̱vi̱ ña̱ tindaʼa̱ndó ná na̱ʼa̱ña ña̱ ndásakáʼnundó Ndióxi̱, ta ná kǒo na̱ʼa̱ña ña̱ ndíku̱nndó ña̱ kéʼé na̱ ñuyǐví yóʼo (Gál. 5:19-26). Ta̱ kúú novio ta̱yóʼo kúú ta̱ kuniʼi yichi̱ nu̱ú ñá síʼira, ta saátu miíra kúú ta̱ xíniñúʼu kiʼin kuenta ña̱ vií ná koo vikó ña̱ tindaʼa̱ra ta si̱í ná kooña. ¿Ndáaña chindeétáʼan xíʼinna ña̱ vií kanaña? Ña̱ koo iin discurso xa̱ʼa̱na ta ña̱ ka̱ʼa̱nna xíʼinna ná kanaña nu̱ú Biblia. Tá ta̱ táxi discurso viíní táxiraña ta xíʼin ña̱ to̱ʼó kéʼéraña, na̱ xíniso̱ʼo discurso kúnda̱a̱-inina ña̱ tíndaʼa̱yó iin regalo Ndióxi̱ kúúña ta saátu ki̱vi̱ ña̱ tíndaʼa̱na iin ña̱ ndáyáʼviní kúúña. Ña̱kán ku̱a̱ʼání na̱ tíndaʼa̱ kúni̱na ña̱ ná taxina discurso ti̱xin salón tá kivi keʼénaña. Tá na̱ xa̱a̱ ku̱nu̱mí tindaʼa̱ kúni̱na ña̱ ná taxina discurso ti̱xin Salón ña̱ Reino xíniñúʼu ya̱chi̱ka ndukúnaña nu̱ú na̱ anciano.

8. ¿Ndáaña xíniñúʼu keʼé na̱ tíndaʼa̱ ña̱ va̱ʼa vií koo vikó ña̱ tindaʼa̱na? (Romanos 13:13).

⁸ (Kaʼvi Romanos 13:13). Tá ndákanixi̱níndó keʼéndó iin vikó tá ná tindaʼa̱ndó, ¿ndáaña kivi keʼéndó ña̱ va̱ʼa na̱ʼa̱ndó ña̱ va̱ása ndíku̱nndó ña̱ kéʼé na̱ ñuyǐví yóʼo? Tu̱ʼún griego ña̱ káʼa̱n “vikó nu̱ú kininí kéʼéna” xi̱ka̱ʼa̱nña xa̱ʼa̱ vikó ña̱ xi̱keʼéna nu̱ú kininí xi̱xiʼina ta nda̱a̱ ñu̱ú ndeéní xi̱xita yaa (koto nota ña̱ va̱xi nu̱ú Biblia ña̱ estudio ña̱ káʼa̱n “fiestas descontroladas”, ña̱ va̱xi nu̱ú Romanos 13:13). Tá kúni̱ndó koo ndixi ki̱vi̱ ña̱ ná tindaʼa̱ndó kiʼinndó kuenta ña̱ nda̱a̱ ni iinna ná va̱ása xi̱ni.c Tá kúni̱ndó koo yaa kiʼinndó kuenta ña̱ va̱ása ndeé ná kataña, ña̱ va̱ʼa natúʼun na̱ ku̱ʼu̱n vikó kán. Ta saátu kiʼinndó kuenta ndáa yaa kúú ña̱ kata ta ndáa xa̱ʼa̱ káʼa̱nña ña̱ va̱ʼa kǒo sandákavaña-ini inkana.

9. ¿Ndáaña xíniñúʼu kiʼin na̱ tindaʼa̱ kuenta xíʼin ki̱vi̱ ña̱ koo vikó ña̱ tindaʼa̱na?

⁹ Sana kúni̱ndó iin na̱ veʼendó á iin na̱ migondó ka̱ʼa̱nna iin tu̱ʼún va̱ʼa xíʼinndó, sayáʼana na̱ʼná á video ña̱ kotona ki̱vi̱ ña̱ tindaʼa̱ndó. Sana kiviva keʼéndó táʼan ña̱yóʼo soo kiʼinníndó kuenta ña̱ ka̱ʼa̱nna ña̱ va̱ʼa ná kooña (Filip. 4:8). Nda̱ka̱tu̱ʼunndó ña̱yóʼo miíndó: “¿Á va̱ʼa kuni na̱ yiví na̱ ku̱ʼu̱n kán xíʼin ña̱yóʼo? ¿Á na̱ʼa̱ña ña̱ íxato̱ʼóña na̱ tíndaʼa̱?”. Soo ña̱ ndáyáʼvika: “¿Á ixato̱ʼóña Jehová?”. Kiviva keʼéna inkaka ña̱ʼa ña̱ kusi̱í-inina, soo kiʼinndó kuenta ña̱ kǒo keʼéna ña̱ va̱ása va̱ʼa náʼa̱. Tá kúú ná kǒo ka̱ʼa̱nna tu̱ʼún ña̱ kivi ndakanixi̱ní na̱ yiví xa̱ʼa̱ ña̱ kísi̱ xíʼin táʼanna (Efes. 5:3). Na̱ ka̱ʼa̱n sava tu̱ʼún va̱ʼa xíʼinndó ki̱vi̱ ña̱ ná tindaʼa̱ndó ná koona iin na̱ veʼendó á iin na̱ migondó na̱ íxato̱ʼó miíndó ta kúnda̱a̱-inina ndáaña kúni̱ndó keʼéndó.

10. ¿Ndáaña xíniñúʼu kiʼinna kuenta xíʼin tá ná keʼéna vikó ña̱ tindaʼa̱na? (1 Juan 2:15-17).

¹⁰ Ndakunindó ña̱ kivi keʼéndó (kaʼvi 1 Juan 2:15-17). Jehová kúni̱ra na̱ ndásakáʼnu miíra ná ixato̱ʼónara, nu̱úka ña̱ kuni̱na ña̱ ná ka̱ʼa̱n va̱ʼana xa̱ʼa̱ miína. Na̱ tíndaʼa̱ na̱ ndákuni ndáaña kúú ña̱ kivi keʼéna, va̱ása ku̱a̱ʼáví xu̱ʼún sandíʼina. Ta va̱ása kúni̱na na̱ʼa̱na ña̱ ni̱nu kúnina xa̱ʼa̱ vikó ña̱ keʼéna. Tá va̱ása káʼnuní koo vikó ña̱ tindaʼa̱ndó, ¿ndáaña va̱ʼa ndakiʼinndó? Kotondó ña̱ ni̱ka̱ʼa̱n iin ta̱ hermano ta̱ ñuu Noruega ta̱ nani Mike: “Va̱ása níkávindi̱ xa̱ʼa̱ ña̱ ti̱ndaʼa̱ndi̱ ta xa̱ʼa̱ ña̱kán va̱ʼaka kúúndi̱ precursor. Kǒo níkeʼéndi̱ vikó ña̱ káʼnuní soo ku̱a̱ʼáníva ña̱ livi ndákaʼánndi̱ xa̱ʼa̱ ki̱vi̱ ña̱ ti̱ndaʼa̱ndi̱”. Ta iin ñá hermana ña̱ íyo ñuu India ñá naní Tabitha káchiña: “Xa̱ʼa̱ ña̱ kǒo ku̱a̱ʼá ña̱ʼa níkeʼéndi̱ tá ti̱ndaʼa̱ndi̱ kǒo ku̱a̱ʼáví ña̱ʼa níka̱ʼa̱n kúáchindi̱ xa̱ʼa̱, ta ni kǒo níndi̱ʼi̱-inindi̱”.

11. Na̱ tindaʼa̱, ¿ndáa ki̱ʼva na̱ʼa̱na ña̱ vií koo ña̱ ndaka̱xinna kundixina xíʼin ña̱ ndasaviína miína? (Koto na̱ʼná).

¹¹ ¿Á xa̱a̱ nda̱kanixi̱níndó ndáa ti̱ko̱to̱ kundixindó? Sana liviníva kúni̱ndó kundixindó. Nda̱a̱ tiempo xi̱naʼáví na̱ xi̱tinda̱ʼa xi̱kiʼinnína kuenta xíʼin ña̱ kundixina (Is. 61:10). Ti̱ko̱to̱ ña̱ kundixindó tá ná tindaʼa̱ndó síínva kooña nu̱ú ña̱ xa̱a̱ xíndixindó tá xáʼa̱nndó inka vikó soo nisaá xíniñúʼu vií kuna̱ʼa̱ña (1 Tim. 2:9). Su̱ví ña̱ kundixindó á inkaka ña̱ keʼéndó kúú ña̱ kundayáʼvika ki̱vi̱ ña̱ tindaʼa̱ndó (1 Ped. 3:3, 4).

12. ¿Nda̱chun va̱ása xíniñúʼu kundiku̱n na̱ tindaʼa̱ costumbre ña̱ kǒo kítáʼan xíʼin ña̱ káʼa̱n Biblia?

¹² Kǒo kundiku̱nndó costumbre ña̱ kǒo kítáʼan xíʼin ña̱ káʼa̱n Biblia (Apoc. 18:4). Nu̱ú ñuyǐví ña̱ xáʼndachíñu ta̱ Ndi̱va̱ʼa, ku̱a̱ʼání na̱ tíndaʼa̱ ndíku̱nna costumbre ña̱ kítáʼan xíʼin veʼe-ñu̱ʼu vatá, ña̱ tási xíʼin inkaka ña̱ kándíxa na̱ yiví. Soo Jehová káʼa̱n káxira xíʼinyó ña̱ ná kǒo keʼéyó nda̱a̱ ni iin ña̱ va̱ása va̱ʼa (2 Cor. 6:14-17). Ña̱kán tá xíka-iniún xa̱ʼa̱ sava costumbre ña̱ ndíku̱n na̱ yiví ñuu nu̱ú íyoún, nandukú va̱ʼa xa̱ʼa̱ña ta nandukú texto ña̱ va̱xi nu̱ú Biblia ña̱ kivi chindeétáʼan xíʼinndó ña̱ kunda̱a̱-inindó ndáaña keʼéndó.

13. ¿Ndáa ki̱ʼva kivi na̱ʼa̱ na̱ tíndaʼa̱ ña̱ ndáyáʼviva regalo ña̱ taxina ndaʼa̱na?

¹³ Ñuu nu̱ú íyondó, ¿á kúúmií na̱ yiví costumbre ña̱ taxina regalo ndaʼa̱ na̱ tíndaʼa̱? Na̱ ku̱ʼu̱n vikó kán xa̱a̱ síín síín regalo kivi taxina. Biblia káʼa̱nña xíʼin na̱ cristiano tá táxina ña̱ʼa ndaʼa̱ inkana kúsi̱íka-inina xa̱ʼa̱ ña̱yóʼo (Prov. 11:25; Hech. 20:35). Na̱ tíndaʼa̱ va̱ása xíniñúʼu na̱ʼa̱na nu̱ú na̱ ku̱ʼu̱n vikó kán ña̱ va̱ása kíndo̱o-inina xíʼin regalo ña̱ taxina ndaʼa̱na á ña̱ xíniñúʼu taxina regalo ña̱ yaʼviní ndaʼa̱na. Miíyó na̱ ndásakáʼnu Jehová chíndayáʼviníyó regalo ña̱ táxina ndaʼa̱yó nda̱a̱ táki̱ʼva kéʼé miíra ta táxiyó tíxa̱ʼvi ndaʼa̱na chi kéʼéna ña̱yóʼo xa̱ʼa̱ ña̱ kúʼvi̱-inina xínina miíyó ta su̱ví xíʼin ña̱ nduxa̱ kéʼénaña (2 Cor. 9:7).

NDÁAÑA KEʼÉYÓ TÁ ÍYO IIN ÑA̱ ÍXAYO̱ʼVI̱ XÍʼINYÓ

14. ¿Ndáaña íxayo̱ʼvi̱ xíʼin sava na̱ tíndaʼa̱?

¹⁴ Sana íxayo̱ʼvi̱vaña xíʼinndó keʼéndó vikó ña̱ tindaʼa̱ndó ta ná kǒo ixayaku̱a̱ña ki̱vi̱ Jehová. Xa̱ʼa̱ ña̱ va̱ása kooña iin vikó káʼnu sana ixayo̱ʼvi̱ loʼoña xíʼinndó. Ná kotoyó ña̱ ni̱ka̱ʼa̱n ta̱ Charlie ta̱ íyo chí Islas Salomón, ta̱yóʼo káchira: “I̱xayo̱ʼvi̱níña xíʼinndi̱ ña̱ kotondi̱ ndáana kanandi̱ ku̱ʼu̱n vikó ña̱ tindaʼa̱ndi̱ saáchi ku̱a̱ʼání kúú na̱ migondi̱ ta̱ ñuu nu̱ú íyondi̱ na̱ yiví kúúmiína costumbre ña̱ kánana ndiʼi na̱ xíni̱na ña̱ ku̱ʼu̱nna vikó”. Ñá Tabitha ñá ni̱ka̱ʼa̱nyó xa̱ʼa̱ nu̱ú párrafo 10 káchiñá: “Ñuu nu̱ú íyoi̱ ku̱a̱ʼání na̱ yiví xáʼa̱n vikó nu̱ú tíndaʼa̱na. Ña̱kán i̱xayo̱ʼvi̱níña xíʼinndi̱ ña̱ ka̱ʼa̱nndi̱ xíʼin na̱ yivándi̱ ña̱ 100 kuitíva na̱ yiví kanandi̱”. Ta̱ ñá Sarah ñá ñuu India káchiñá: “Sava na̱ yiví ndíʼi̱níka-inina ña̱ vií ná ndakanixi̱ní inkana xa̱ʼa̱ vikó ña̱ kéʼéna. Tá kúú na̱ primoi̱ káʼnuní vikó ke̱ʼéna tá ti̱ndaʼa̱na. Xa̱ʼa̱ ña̱kán savana ni̱ka̱ʼa̱nna xíʼi̱n ña̱ xíniñúʼu káʼnuníka koo vikó ña̱ tindaʼa̱ miíi̱ nu̱úka ña̱ ke̱ʼé na̱kán”. ¿Ndáaña chindeétáʼan xíʼinndó ña̱ ya̱ʼandó nu̱ú táʼan ña̱yóʼo á inkaka ña̱ kivi ixayo̱ʼvi̱ xíʼinndó?

15. ¿Nda̱chun ndáyáʼviní keʼéna oración tá xa̱a̱ káʼa̱nna xa̱ʼa̱ vikó ña̱ tindaʼa̱na?

¹⁵ Ka̱ʼa̱nndó xíʼin Ndióxi̱ ña̱ vií ná kana vikó ña̱ tindaʼa̱ndó. Kivi ka̱ʼa̱nndó xíʼin Jehová xa̱ʼa̱ nda̱a̱ ndáaka ña̱ ndaka̱xinndó keʼéndó xíʼin xa̱ʼa̱ ña̱ sándi̱ʼi̱-inindó (Filip. 4:6, 7 koto nota ña̱ estudio “en cualquier situación”). Saátu kivi ka̱ʼa̱nndó xíʼinra ña̱ ná chindeétáʼanra xíʼinndó ña̱ vií koo ña̱ ndaka̱xinndó keʼéndó, ña̱ va̱ása kundi̱ʼi̱ní-inindó ta ndakú koo inindó (1 Ped. 5:7). Tá ná kiʼinndó kuenta ña̱ nda̱kuiinra oración ña̱ ni̱ka̱ʼa̱nndó xíʼinra, ndundakúka ña̱ kándíxandóra. Ñá Tabitha káchikañá: “Ta̱ novioi̱ xíʼin miíi̱ xi̱ndi̱ʼi̱ní-inindi̱ ña̱ sana va̱ása kindo̱o-inindi̱ xíʼin sava ña̱ʼa ta saátu ña̱ ka̱ʼa̱n na̱ veʼendi̱ xíʼinndi̱. Ña̱kán tá kúma̱níka ndaka̱xinndi̱ iin ña̱ keʼéndi̱, siʼnaka xi̱keʼéndi̱ oración ta ki̱ʼinndi̱ kuenta ña̱ chi̱ndeétáʼan Jehová xíʼinndi̱ ña̱ va̱ása kundi̱ʼi̱ní-inindi̱”.

16, 17. ¿Nda̱chun ndáyáʼviní natúʼun na̱ tindaʼa̱ ndáa ki̱ʼva koo vikó ña̱ tindaʼa̱na?

¹⁶ Káxi ka̱ʼa̱nndó ta xíʼin ña̱ to̱ʼó natúʼunndó (Prov. 15:22). Tá xa̱a̱ káʼa̱nndó ndáa ki̱ʼva koo vikó ña̱ tindaʼa̱ndó ku̱a̱ʼání ña̱ xíniñúʼu kiʼinndó kuenta xíʼin tá kúú fecha, nda̱saa xu̱ʼún sandíʼindó ta nda̱saa na̱ yiví kanandó á inkaka ña̱ kúni̱ndó keʼéndó. Tá kúma̱níka ndaka̱xinndó keʼéndó iin ña̱ʼa, inkáchi ka̱ʼa̱nndó ndáaña kivi keʼéndó, ndáa texto kivi chindeétáʼan xíʼinndó ta kundiku̱nndó consejo ña̱ táxi inka na̱ hermano na̱ xa̱a̱ xu̱xa-ini ndaʼa̱ndó. Tá káʼa̱nndó xa̱ʼa̱ ña̱ ndákanixi̱níndó, viíní ná koo ña̱ ka̱ʼa̱nndó ta chikaa̱ndó ndee̱ ña̱ kunda̱a̱-inindó xíʼin ña̱ ndákanixi̱ní na̱ tindaʼa̱ xíʼinndó. Tá na̱ yivándo á na̱ migondó káʼa̱nna xíʼinndó ña̱ keʼéndó sava ña̱ʼa, kivi keʼéndó sava ña̱ káʼa̱nna saáchi saátu ndáyáʼviní ki̱vi̱ ña̱ tindaʼa̱ndó nu̱ú na̱yóʼo. Soo tá kǒo kívi keʼéndó ña̱ káʼa̱nna, viíní ka̱ʼa̱nndó xíʼinna nda̱chun kǒo keʼéndóña (Col. 4:6). Chindeétáʼanndó xíʼinna ña̱ kunda̱a̱-inina ña̱ kúni̱ndó kusi̱í-inindó ta saátu kúni̱ndó ixato̱ʼóndó ki̱vi̱ Jehová.

¹⁷ Soo tá na̱ yivándó va̱ása kúúna Testigo, ¿ndáaña keʼéndó? Kivi ixayo̱ʼvi̱ña xíʼinndó ka̱ʼa̱nndó xíʼinna xa̱ʼa̱ ña̱ keʼéndó, soo tá vií káʼa̱nndó xíʼinna xa̱ʼa̱ ña̱yóʼo va̱ʼaníva chindeétáʼanña xíʼinndó. Iin ta̱ hermano ta̱ naní Santhosh ta̱ íyo chí India, káchira: “Na̱ veʼendi̱ xi̱kuni̱na ña̱ ná kundiku̱nndi̱ sava costumbre ña̱ xi̱keʼéna ti̱xin religión ña̱ hinduismo. Ku̱a̱ʼání tiempo i̱xayo̱ʼvi̱ña xíʼinndi̱ ña̱ va̱ʼa kunda̱a̱-ini na̱ veʼendi̱ xíʼin ña̱ xi̱kuni̱ndi̱ keʼéndi̱. Ke̱ʼévandi̱ sava ña̱ ni̱ka̱ʼa̱nna xíʼinndi̱ ta ña̱yóʼo va̱ása níya̱ʼandosóña ña̱ káʼa̱n Biblia. Tá kúú ni̱ka̱ʼa̱nna xíʼinndi̱ ndáaña xi̱kuni̱na ná taxindi̱ kuxu na̱ kuʼun vikó kán, tasaá ke̱ʼévandi̱. Va̱ása nítaxindi̱ ña̱ katana ni ña̱ tixáʼana saáchi na̱ veʼendi̱ va̱ása kéʼéna ña̱yóʼo”.

18. ¿Ndáaña chindeétáʼan xíʼin na̱ tindaʼa̱ ña̱ vií kana ndiʼi ña̱ ki̱ndoona keʼéna? (1 Corintios 14:40; koto na̱ʼná).

¹⁸ Ixatu̱ʼvandó ndiʼi ña̱ʼa. Tá viíní káʼa̱nndó ndáa ki̱ʼva koo vikó ña̱ tindaʼa̱ndó, viíníva kana ña̱yóʼo ta kǒo ña̱ kundi̱ʼi̱-inindó xa̱ʼa̱ (kaʼvi 1 Corintios 14:40). Ta̱ Wayne ta̱ ñuu Taiwán, káchira: “Tá kúma̱níka tindaʼa̱ndi̱, ke̱ʼéndi̱ iin reunión xíʼin na̱ ni̱ka̱ʼa̱n chindeétáʼan xíʼinndi̱. Ke̱ʼéndi̱ ensayo ndáa ki̱ʼva keʼéndi̱ ti̱xin vikó tá ná tindaʼa̱ndi̱ ña̱ va̱ʼa vií kana ndiʼiña”. Chikaa̱ndó ndee̱ ña̱ keʼéndó sava ña̱ʼa mií hora ña̱ ki̱ndoondó keʼéndóña tasaá na̱ʼa̱ndó ña̱ íxato̱ʼóndó na̱ ka̱nandó.

19. ¿Ndáana kivi chindeétáʼan xíʼin na̱ tindaʼa̱ ña̱ vií kana vikó ña̱ tindaʼa̱na?

¹⁹ Tá xa̱a̱ ndákanixi̱níndó ndáaña keʼéndó tá ná kuu iin tu̱ndóʼo va̱ʼaní chindeétáʼanña xíʼinndó (Prov. 22:3). Tá kúú ñuu nu̱ú íyondó, ¿á xáa̱ na̱ yiví vikó nu̱ú tíndaʼa̱na ni kǒo níkanana miína? Ndakanixi̱níndó ndáaña kivi keʼéndó ña̱ va̱ʼa kǒo kundoʼondó ña̱yóʼo. Tá ná ku̱ʼu̱n na̱ veʼendó na̱ va̱ása kúú Testigo vikó nu̱ú tindaʼa̱ndó, kivi ka̱ʼa̱nndó xíʼinna ndáa ki̱ʼva kéʼé miíyó na̱ Testigo vikó nu̱ú tindaʼa̱na ta ndáaña ndákanixi̱níyó xa̱ʼa̱ sava costumbre. Kivi na̱ʼa̱ndó nu̱úna artículo ña̱ va̱xi nu̱ú jw.org ña̱ naní “¿Cómo son las bodas de los testigos de Jehová?”. Ña̱ va̱ʼa vií kana vikó, ndakanixi̱níndó xa̱ʼa̱ iin ta̱ hermano ta̱ xa̱a̱ xu̱xa-ini xíʼin tu̱ʼun Ndióxi̱ ta̱ kivi chindeétáʼan xíʼinndó ña̱ kiʼinra kuenta xíʼin vikó kán (Juan 2:8). Tá káxi káʼa̱nndó xíʼinra ndáa ki̱ʼva kúni̱ndó ná koo vikó, kivi chindeétáʼanra xíʼinndó ña̱ viíní kanaña.

20. ¿Ndáaña xíniñúʼu kiʼin na̱ tindaʼa̱ kuenta xíʼin?

²⁰ Tá ndákanixi̱níndó xa̱ʼa̱ ndiʼi ña̱ keʼéndó ti̱xin vikó ña̱ tindaʼa̱ndó sana sandíʼi̱ní ña̱yóʼo inindó soo ndakaʼánndó chi iin ki̱vi̱ kuitíva xíyoña, ta mií ki̱vi̱ kán kúú nu̱ú inkáchi kixáʼandó kachíñundó nu̱ú Jehová. Chikaa̱ndó ndee̱ ña̱ vií kana vikó ña̱ tindaʼa̱ndó ta kǒo ku̱a̱ʼá xu̱ʼún sandíʼindó ta saátu kundaa-inindó Jehová ña̱ chindeétáʼanra xíʼinndó. Saáchi tá ná ya̱ʼa ki̱vi̱ ña̱ ti̱ndaʼa̱ndó ndakaʼánndó ña̱ liviní ni̱xi̱yoña ta ka̱ʼa̱nndó: “Ku̱tóoníi̱ ki̱ʼva ña̱ ni̱xi̱yo vikó ña̱ ti̱ndaʼa̱yó” (Sal. 37:3, 4).