Vitá ná koo iniyó nda̱a̱ táki̱ʼva kéʼé Jehová

1. ¿Nda̱chun ndákanda̱-iniyó xa̱ʼa̱ ña̱ vitá íyo ini Jehová?

TÁ NDÁKANIXI̱NÍYÓ xa̱ʼa̱ iin na̱ yiví na̱ kúúmií iin chiñu ña̱ ndáyáʼviní ñuyǐví yóʼo, ¿á vitá íyo inina? Sana va̱ásaví. Jehová ta̱ kúúmií ndiʼi ndee̱ vitáva íyo ini ta̱yóʼo (Sal. 113:5-8). Iinlá Jehová kúú ta̱ vitá-ini ta va̱ása ni̱nu kúnira. Nu̱ú artículo yóʼo ka̱ʼa̱nyó xa̱ʼa̱ u̱vi̱ ña̱ va̱ʼa ña̱ kúúmií Jehová, ta kunda̱a̱-iniyó ndáa ki̱ʼva vitá íyo inira ña̱ náʼa̱ra iin tá iin ña̱yóʼo. Saátu kotoyó ndáa ki̱ʼva ni̱na̱ʼa̱ ta̱ Jesús ña̱ va̱ʼa ña̱ kúúmií yivára, ndiʼi ña̱yóʼo chíndeétáʼanña xíʼinyó ña̱ kuyatinyó nu̱ú Jehová xíʼin ña̱ chikaa̱yó ndee̱ ña̱ vitá koo iniyó.

JEHOVÁ VA̱ʼANÍ KÚNDA̱A̱-INIRA XÍʼINYÓ

2. ¿Ndáaña sánáʼa̱ Salmo 62:8 miíyó xa̱ʼa̱ Jehová? (Koto na̱ʼná ña̱ va̱xi chí nu̱ú kíxáʼa tutu yóʼo).

² Na̱ yiví na̱ ni̱nu kúni va̱ása kúnda̱a̱-inina xíʼin ña̱ ndóʼo inkana. Na̱yóʼo ndákanixi̱nína ña̱ ndáyáʼvinína, ña̱kán inka na̱ yiví va̱ása xíínna kuyatinna nu̱úna á ní va̱ása xíínna kutáʼanna xíʼinna. Soo síínníva íyo Jehová xa̱ʼa̱ ña̱ vitá-inira káʼa̱nra xíʼinyó ña̱ kuyatinyó nu̱úra ta ná ka̱ʼa̱nyó xíʼinra xa̱ʼa̱ ndiʼi ña̱ ndóʼoyó xíʼin ña̱ ndákanixi̱níyó (kaʼvi Salmo 62:8).a Jehová xíniso̱ʼora oración ña̱ kéʼé na̱ ndásakáʼnu miíra nda̱a̱ táki̱ʼva kéʼé iin ta̱a ta kúʼvi̱ní-ini xíni se̱ʼe xíniso̱ʼora ndiʼi ña̱ káʼa̱n se̱ʼera xíʼinra. Jehová ta̱xira ña̱ ná ka̱ʼyi̱ oración ña̱ ke̱ʼé inkana nu̱ú tu̱ʼunra. Ña̱yóʼo náʼa̱ña nu̱úyó ña̱ ndiʼi tiempo kivi ka̱ʼa̱nyó xíʼinra ta íyo tu̱ʼvara ña̱ kuniso̱ʼora ña̱ káʼa̱nyó xíʼinra (Jos. 10:12-14; 1 Sam. 1:10-18). Soo sava yichi̱ íxayo̱ʼvi̱ña xíʼinyó ka̱ʼa̱nyó xíʼinra xa̱ʼa̱ ña̱ ke̱ʼéyó ña̱ va̱ása va̱ʼa, ¿ndáaña kivi chindeétáʼan xíʼinyó?

3. ¿Nda̱chun kándíxaún ña̱ kúni̱va Jehová ná ka̱ʼún xíʼinra ndiʼi tiempo?

³ Kiviva ka̱ʼa̱nyó xíʼin Jehová ni túviyó ña̱ kǒo kúni̱kara xínira miíyó, ¿nda̱chun va̱ʼa kúnda̱a̱-iniyó xa̱ʼa̱ ña̱yóʼo? Xa̱ʼa̱ parábola ña̱ káʼa̱n xa̱ʼa̱ ta̱ loʼo ta̱ ndi̱kó nu̱ú na̱ veʼera. Nu̱ú ña̱yóʼo ta̱ Jesús ni̱ka̱ʼa̱nra xa̱ʼa̱ iin ta̱a ña̱ ku̱ndáʼvi-inira xi̱nira se̱ʼera ña̱ ndi̱kóra nu̱ú na̱ veʼera, ta̱ loʼo yóʼo nda̱kanixi̱níra ña̱ va̱ása ndakiʼinka na̱ veʼera miíra saáchi ku̱a̱ʼá ña̱ va̱ása va̱ʼa ke̱ʼéra, ¿ndáaña ndo̱ʼo yivára tá ndi̱kóra nu̱úra? Tá xi̱nirara, “xínura ni̱xa̱ʼa̱nra nda̱a̱ nu̱ú va̱xi ta̱ loʼo kán ta nu̱mirara ta chi̱tóra nu̱úra” (Luc. 15:17-20). Ki̱ʼva saá íyo Jehová, xíniso̱ʼora oración na̱ ndákavaní-ini xa̱ʼa̱ ña̱ ndíʼi̱ní-inina á xa̱ʼa̱ ku̱a̱chi ña̱ ni̱ki̱ʼvina, ta xa̱ʼa̱ ña̱ vitání íyo inira va̱ʼaní xíniso̱ʼora miína (Lam. 3:19, 20). Va̱ʼaní sandíkora-inina ta náʼa̱ra ña̱ kúʼvi̱-inira xínirana ta saátu íxakáʼnu-inira xa̱ʼa̱na (Is. 57:15). ¿Ndáa ki̱ʼva kéʼéraña? Sava yichi̱ xíniñúʼura na̱ anciano, na̱ veʼeyó na̱ kúú Testigo xíʼin inkaka na̱ hermano ña̱ chikaa̱na ndee̱ xíʼinyó (Sant. 5:14, 15). Jehová chíndeétáʼanra xíʼinyó chi kúni̱ra ña̱ yatin ná kooyó xíʼinra.

4. ¿Ndáa ki̱ʼva ni̱na̱ʼa̱ ta̱ Jesús ña̱ va̱ʼaní xi̱kunda̱a̱-inira xíʼin ña̱ xi̱ndoʼo inkana?

⁴ Ta̱ Jesús ndíku̱nra yichi̱ yivára. Ta̱ Jesús vitá-inira nda̱a̱ táki̱ʼva íyo Jehová. Tá ni̱xi̱yora nu̱ú ñúʼu yóʼo na̱ yiví va̱ʼaní xi̱kuyatinna nu̱úra chi xi̱ndaa-ininara ta xi̱nda̱ka̱tu̱ʼunna ndiʼi ña̱ʼa miíra (Mar. 4:10, 11). Tá xi̱nda̱ka̱tu̱ʼunra miína ndáaña xi̱ndakanixi̱nína xa̱ʼa̱ sava ña̱ʼa, na̱kán xi̱kaʼa̱nna xíʼinra xa̱ʼa̱ ña̱ xi̱ndakanixi̱nína (Mat. 16:13-16). Tá xi̱keʼéna ña̱ va̱ása va̱ʼa va̱ása níxi̱yiʼvína saáchi xi̱kunda̱a̱-inina ña̱ va̱ʼaníva-ini ta̱ Jesús ta kúee ni̱xi̱yo inira xíʼinna (Mat. 17:24-27). Xa̱ʼa̱ ña̱ va̱ʼaní xi̱ndiku̱n ta̱ Jesús yichi̱ yivára na̱ xi̱ndiku̱n miíra va̱ʼaní xi̱kunda̱a̱-inina xa̱ʼa̱ Jehová (Juan 14:9). Sa̱kuaʼana ña̱ va̱ása inkáchi íyo Jehová xíʼin na̱ xi̱niʼi yichi̱ ti̱xin veʼe-ñu̱ʼu tiempo saá, saáchi na̱kán ndi̱va̱ʼaní xi̱keʼéna xíʼinna ta ni̱nuní xi̱kunina. Soo Jehová vitá-inira ta̱ va̱ʼaní xi̱kunda̱a̱-inira xíʼin ña̱ xi̱ndoʼona.

5. Ña̱ vitá koo iniyó, ¿ndáa ki̱ʼva chíndeétáʼanña xíʼinyó ña̱ kunda̱a̱-iniyó xíʼin ña̱ ndóʼo inkana?

⁵ ¿Ndáa ki̱ʼva kundiku̱nyó yichi̱ Jehová? Ña̱ vitá koo iniyó kúú ña̱ chindeétáʼan xíʼinyó, saáchi tá ni̱nu kúniyó ta va̱ása nándóso-iniyó xa̱ʼa̱ ña̱ kéʼé inkana xíʼinyó, ña̱yóʼo kivi sákuxíkaña miíyó nu̱ú inkana soo tá va̱ʼa-iniyó, kúee íyo iniyó ta íxakáʼnu-iniyó xa̱ʼa̱na ña̱yóʼo sákuyatinña miíyó nu̱ú inkana (Col. 3:12-14). Na̱ anciano kúú na̱ xíniñúʼu chikaa̱ ndee̱ ña̱ va̱ʼa kunda̱a̱-inina xíʼin ña̱ ndóʼo inkana. Ña̱ va̱ʼa kuyatin na̱ hermano nu̱ú na̱yóʼo siʼna xíniñúʼu kunina miína. Ña̱yóʼo kúni̱ káchiña na̱ anciano xíniñúʼu ku̱ʼu̱nna reunión nu̱úka ña̱ kotonaña nu̱ú ña̱ videollamada. Ta inka ña̱ kéʼé na̱yóʼo kúú ña̱ kéena nátúʼunna xíʼin na̱ yiví veʼe tá veʼe xíʼin na̱ hermano ta saátu xíʼin ná hermana. Saá kúú ña̱ va̱ʼa xáa̱ na̱ hermano kúnda̱a̱-inina ndáa ki̱ʼva íyo anciano tasaá va̱ʼa ka̱ʼa̱nna xíʼinna xa̱ʼa̱ ña̱ ndóʼona.

JEHOVÁ VIÍNÍ NDÁKANIXI̱NÍRA

6, 7. Ka̱ʼa̱n xa̱ʼa̱ sava ejemplo ña̱ xi̱niso̱ʼova Jehová ña̱ ni̱ka̱ʼa̱n ndáʼvi na̱ xi̱ndasakáʼnu miíra xíʼinra.

⁶ Na̱ yiví na̱ ni̱nu kúni̱ va̱ása kúnda̱a̱-inina xíʼin ña̱ ndóʼo inkana ta ni va̱ása vií ndákanixi̱nína xa̱ʼa̱na. Soo Jehová viíníva íyo ña̱ ndákanixi̱níra, ndíchiníra, vitá íyo inira tá xíniso̱ʼora ña̱ káʼa̱n inkana xíʼinra. Ná ndakanixi̱níyó ndáaña ke̱ʼé Jehová xíʼin ñá Míriam ta saátu xíʼin ta̱ Aarón tá ki̱xáʼana káʼa̱n kúáchina xa̱ʼa̱ ta̱ Moisés chi xíʼin ta̱yóʼo xi̱kaʼa̱n Ndióxi̱ ndáaña keʼéra xíʼin na̱ ñuu. Jehová ni̱sa̱a̱níra xíʼin ñá Míriam saáchi ni̱na̱ʼa̱ñá ña̱ va̱ása ní ixato̱ʼóñára, xa̱ʼa̱ ña̱yóʼo ta̱xira castigo ndaʼa̱ñá ta ndo̱ʼoñá kue̱ʼe̱ lepra. Ta̱ Aarón ni̱ka̱ʼa̱n ndáʼvira xíʼin ta̱ Moisés ña̱ ná chindeétáʼanra xíʼinñá tasaá ta̱ Moisés ni̱ka̱ʼa̱n ndáʼvira xíʼin Jehová ña̱ ná sandáʼara miíñá. ¿Ndáaña ke̱ʼé Ndióxi̱? ¿Á xi̱kuni̱kara ña̱ ná xo̱ʼvi̱kañá xa̱ʼa̱ ña̱ va̱ása va̱ʼa ke̱ʼéñá? Iin na̱ yiví na̱ ni̱nu kúni taxivana ña̱ xo̱ʼvi̱kañá. Soo Jehová kǒo ní ke̱ʼéra saá chi vitá-inira xa̱ʼa̱ ña̱kán ke̱ʼévara ña̱ ni̱ka̱ʼa̱n ndáʼvi ta̱ Moisés xíʼinra ta sa̱ndáʼavara ñá Míriam (Núm. 12:1-15).

⁷ Ná kotoyó inka ki̱ʼva ña̱ ni̱náʼa̱ Jehová ña̱ vitá ni̱xi̱yo inira. Ta̱ rey Ezequías xi̱kuumiíra kue̱ʼe̱, xa̱ʼa̱ ña̱kán Jehová xi̱niñúʼura iin profeta ña̱ ni̱ka̱ʼa̱nra xíʼinra ña̱ kuvivara. Ña̱kán ta̱ rey yóʼo xa̱kundáʼvira nu̱ú Jehová ña̱ ná sándaʼara miíra, ¿ndáaña ke̱ʼé Ndióxi̱? Xa̱ʼa̱ ña̱ ku̱ndáʼvi-inira xi̱nirara ta̱xira ña̱ ná kutakura inka 15 ku̱i̱ya̱ (2 Rey. 20:1, 5, 6). Nda̱a̱ táki̱ʼva kúnda̱a̱-iniyó xa̱ʼa̱ ña̱ vitá íyo ini Jehová kúú ña̱ chíndeétáʼan xíʼinra ña̱ kunda̱a̱-inira xíʼin ña̱ ndóʼo inkana ta kúndáʼvi-inira xínirana.

8. ¿Ndáa ejemplo náʼa̱ nu̱úyó ña̱ vií íyo ña̱ ndákanixi̱ní ta̱ Jesús? (Marcos 3:1-6).

⁸ Ta̱ Jesús ndíku̱nra yichi̱ yivára. Tá ni̱xi̱yo ta̱ Jesús nu̱ú ñúʼu yóʼo viíní xi̱ndakanixi̱níra ta xi̱ndukúra ki̱ʼva ña̱ xi̱chindeétáʼanra xíʼin na̱ yiví ndiʼi tiempo. Tá kúú xi̱sandáʼara na̱ yiví ki̱vi̱ sábado soo na̱ xi̱niʼi yichi̱ nu̱ú na̱ veʼe-ñu̱ʼu va̱ása níxi̱kuni̱na ña̱ ná keʼéra ña̱yóʼo (kaʼvi Marcos 3:1-6). Ta nda̱a̱ tiempo vitin kéʼéra ña̱yóʼo chi miíra kúú ta̱ níʼi yichi̱ ti̱xin congregación. Tá kúú, tá iinna ni̱ki̱ʼvina iin ku̱a̱chi ndeé ta̱ Jesús kúee íyo inira xíʼin na̱yóʼo ta táxira tiempo ndaʼa̱na ña̱ ná nasa̱mana (Apoc. 2:2-5).

9. ¿Ndáa ki̱ʼva kundiku̱nyó yichi̱ Jehová ta vií koo ña̱ ndákanixi̱níyó? (Koto na̱ʼná).

⁹ ¿Ndáa ki̱ʼva kundiku̱nyó yichi̱ Jehová? Xíniñúʼu vitá koo iniyó ña̱ va̱ʼa vií koo ña̱ ndákanixi̱níyó ta keʼéyó nda̱a̱ táki̱ʼva kéʼé Jehová (Sant. 3:17). Na̱ íyo se̱ʼe na̱ vií ndákanixi̱ní va̱ása táxina ña̱ ná keʼé se̱ʼena ña̱ kúni̱ miína, ta ni kǒo káʼa̱nna xíʼinna ña̱ ná keʼéna ña̱ʼa ña̱ kǒo kúchiñuna keʼéna. Iin ña̱ va̱ʼaní káʼa̱n xa̱ʼa̱ ña̱yóʼo kúú ña̱ va̱xi nu̱ú Génesis 33:12-14 nu̱ú káʼa̱nña ña̱ viíní ke̱ʼé ta̱ Jacob xíʼin se̱ʼera. Na̱ íyo se̱ʼe na̱ vitá-ini ta vií ndákanixi̱nína va̱ása chítáʼanna ña̱ kéʼé iin se̱ʼena xíʼin ña̱ kéʼé inkaka se̱ʼena. Saátu na̱ anciano xíniñúʼu vií koo ña̱ ndákanixi̱nína, nu̱úka ña̱ kuni̱na ña̱ ná keʼé inka na̱ anciano ña̱ kúni̱ miína va̱ʼaka chíkaa̱na ndee̱ ña̱ keʼéna ña̱ káʼa̱n ndiʼi na̱ anciano soo ná va̱ása yaʼandosóña ña̱ káʼa̱n tu̱ʼun Ndióxi̱ (1 Tim. 3:2, 3). Ndiʼiyó ná chikaa̱ ndee̱ ña̱ kunda̱a̱-iniyó xíʼin ña̱ ndákanixi̱ní inkana ni síínva íyoña xíʼin ña̱ ndákanixi̱ní miíyó (Rom. 14:1). Ta saátu ná kundiku̱nyó consejo yóʼo: “Ndiʼina ná kunda̱a̱-ini ña̱ va̱ʼaní ndákanixi̱níndó” (Filip. 4:5).

JEHOVÁ KÚEE ÍYO INIRA

10. ¿Ndáa ki̱ʼva ni̱na̱ʼa̱ Jehová ña̱ kúee ni̱xi̱yo-inira?

¹⁰ Na̱ yiví na̱ ni̱nu kúni va̱ása kúee íyo inina, va̱ása kúni̱na kundatuna ku̱a̱ʼá tiempo. Iinlá Jehová kúú ta̱ kúeení íyo ini. Tá kúú tiempo ña̱ ni̱xi̱yo ta̱ Noé ni̱ka̱ʼa̱nra ña̱ kundatura 120 ku̱i̱ya̱ ña̱ va̱ʼa sandíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa (Gén. 6:3). Ta̱xivaña tiempo ndaʼa̱ ta̱ Noé ña̱ vií sa̱kúaʼnura se̱ʼera ta i̱xava̱ʼara arca xíʼin na̱ veʼera. Tá ni̱ya̱ʼa tiempo Jehová viíníva xi̱niso̱ʼora ña̱ ni̱ka̱ʼa̱n ta̱ Abrahán xíʼinra tá ni̱nda̱ka̱tu̱ʼunra ndáaña keʼé Jehová tá ná sandíʼi-xa̱ʼa̱ra ñuu Sodoma xíʼin Gomorra. Iin na̱ yiví na̱ ni̱nu kúni kivi ka̱ʼa̱nna ña̱yóʼo xíʼin ta̱ Abrahán: “¿Nda̱chun ndáka̱tu̱ʼunníún ña̱yóʼo yi̱ʼi̱?”. Soo Jehová kǒo níkeʼéra saá, chi vitá ni̱xi̱yo-inira ta kúee ni̱xi̱yo-inira (Gén. 18:20-33).

11. Nda̱a̱ táki̱ʼva káʼa̱n 2 Pedro 3:9, ¿nda̱chun kúeení íyo ini Jehová tiempo vitin?

¹¹ Tiempo vitin saátu náʼa̱ Jehová ña̱ kúee íyo inira. Ndátura ña̱ ná kixaa̱ ki̱vi̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa, ¿nda̱chun kúeení íyo inira xíʼin na̱ yiví? Chi kǒo kúni̱ra ña̱ ná ndiʼi-xa̱ʼa̱ nda̱a̱ ni iinyó chi ña̱ kúni̱ra kúú ña̱ ná ndikó-ini ndiʼiyó (kaʼvi 2 Pedro 3:9). Xa̱ʼa̱ ña̱ kúeení íyo ini Jehová ku̱a̱ʼání na̱ yiví xa̱a̱ kúnda̱a̱-ini xa̱ʼa̱ra ta kúni̱yó ña̱ ku̱a̱ʼáníkana ná xa̱a̱ kunda̱a̱-ini xa̱ʼa̱ra, soo su̱ví ndiʼi tiempoví kúee koo inira. Kúʼvi̱níva-inira xínira na̱ yiví soo kǒo táxira ña̱ ná ke̱ʼéna ña̱ kúni̱ miína ta ní va̱ása taxira ña̱ ku̱a̱ʼání tiempo ná koo ña̱ kini nu̱ú ñúʼu yóʼo (Hab. 2:3).

12. ¿Ndáa ki̱ʼva ndíku̱n ta̱ Jesús yichi̱ Jehová ña̱ kúee íyo inira?

¹² Ta̱ Jesús ndíku̱nra yichi̱ yivára. Xa̱a̱ ku̱a̱ʼání tiempo kúee íyo inira nda̱a̱ táki̱ʼva kéʼé Jehová. Xa̱a̱ kíʼinra kuenta ndáa ki̱ʼva káʼa̱n ta̱ Ndi̱va̱ʼa ña̱ vatá xa̱ʼa̱ Ndióxi̱ ta saátu xa̱ʼa̱ na̱ yiví na̱ ndásakáʼnu Jehová (Gén. 3:4, 5; Job 1:11; Apoc. 12:10). Ta saátu kíʼinra kuenta ña̱ xóʼvi̱ní ña̱ yiví, sana xa̱a̱ kúni̱níva ta̱ Jesús sandíʼi-xa̱ʼa̱ra ña̱ va̱ása va̱ʼa ña̱ kéʼé ta̱ Ndi̱va̱ʼa (1 Juan 3:8). ¿Ndáaña chíndeétáʼan xíʼinra ña̱ kúee koo inira nda̱a̱ ná ka̱ʼa̱n mií Jehová xíʼinra ña̱ kixira sandíʼi-xa̱ʼa̱ra ndiʼi ña̱ va̱ása va̱ʼa kéʼé ta̱ Ndi̱va̱ʼa? Iin ña̱ chíndeétáʼan xíʼin ta̱ Jesús kúú ña̱ vitá íyo inira ta ndátura ña̱ mií Jehová ka̱ʼa̱n xíʼinra ama kúú tiempo ña̱ kixira sandíʼi-xa̱ʼa̱ra ña̱ va̱ása va̱ʼa (Hech. 1:7).

13. ¿Ama kúú ña̱ ni̱na̱ʼa̱ ta̱ Jesús ña̱ kúee ni̱xi̱yo inira xíʼin na̱ apóstolra?

¹³ Tá ni̱xi̱yo ta̱ Jesús nu̱ú ñúʼu yóʼo kúeení ni̱xi̱yo inira xíʼin na̱ apóstolra. Tá xi̱xitora ña̱ xi̱kaʼa̱n kúáchina ndáana kúú na̱ ndáyáʼvika, va̱ása kama níxi̱sa̱a̱ra xíʼinna chi ña̱ ke̱ʼéra kúú ña̱ kúee ni̱xi̱yo inira xíʼinna (Luc. 9:46; 22:24-27). Xi̱kunda̱a̱-inira ña̱ tá ná ya̱ʼa tiempo nasa̱mavana. ¿Ta miíyó á xa̱a̱ ku̱a̱ʼá yichi̱ kéʼéyó ña̱ va̱ása va̱ʼa? Tá saá kéʼéyó táxiníyó tíxa̱ʼvi ndaʼa̱ ta̱ rey ta̱ kúúmiíyó chi vitá íyo inira ta kúee íyo inira xíʼinyó.

14. ¿Ndáaña chindeétáʼan xíʼinyó ña̱ kúee koo iniyó?

¹⁴ ¿Ndáa ki̱ʼva kundiku̱nyó yichi̱ Jehová? Ña̱ va̱ʼa kundiku̱nyó yichi̱ra xíniñúʼu ndákanixi̱níyó nda̱a̱ táki̱ʼva ndákanixi̱ní ta̱ Cristo (1 Cor. 2:16). ¿Ndáaña chindeétáʼan xíʼinyó ña̱ ndakanixi̱níyó nda̱a̱ táki̱ʼva ndákanixi̱ní ta̱ Jesús? Xíniñúʼu kaʼviyó ña̱ Evangelio ta taváyó tiempo ña̱ ndakanixi̱níyó xa̱ʼa̱ ña̱ xi̱keʼé ta̱ Jesús, saáchi xíʼin ndiʼi ña̱ xi̱keʼéra xi̱naʼa̱ña ndáa ki̱ʼva xi̱ndakanixi̱níra. Saátu xíniñúʼu ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ vitá koo iniyó nda̱a̱ táki̱ʼva ke̱ʼé se̱ʼera. Tá ndákanixi̱níyó nda̱a̱ táki̱ʼva ndákanixi̱ní ta̱ Jesús, saá kúú ña̱ keʼéyó nda̱a̱ táki̱ʼva kéʼé mií Jehová. Saá xa̱a̱yó kúee koo iniyó xíʼin na̱ hermanoyó (Mat. 18:26-30, 35).

JEHOVÁ KÍʼINRA KUENTA XÍʼIN NA̱ VITÁ-INI

15. ¿Ndáa ki̱ʼva xa̱a̱ sáxi̱nu Jehová ña̱ káʼa̱n Salmo 138:6?

¹⁵ (Kaʼvi Salmo 138:6).b Jehová ni kúúra iin Ndióxi̱ ta̱ kúúmií ndiʼi ndee̱ kíʼinra kuenta xíʼin na̱ yiví na̱ vitá-ini. Ná kotoyó ndáa ki̱ʼva kúú ña̱ xa̱a̱ kéʼéraña. Ni loʼoníva xíniyó xa̱ʼa̱ sava na̱ va̱xi nu̱ú Biblia soo Jehová xi̱kuni̱ra ña̱ ná ka̱ʼyi ña̱ ke̱ʼéna nu̱ú tu̱ʼunra. Tá kúú ñá Débora ñá xi̱kachíñu ki̱ʼva 125 ku̱i̱ya̱ nu̱ú na̱ veʼe ta̱ Isaac xíʼin ta̱ Jacob. Loʼoníva xíniyó xa̱ʼa̱ ñáyóʼo soo Jehová ni̱ka̱ʼa̱nra xíʼin ta̱ Moisés ña̱ ná kaʼyíra xa̱ʼa̱ñá xíʼin xa̱ʼa̱ ña̱ xi̱kuni̱nína xi̱xinina miíñá (Gén. 24:59; 35:8, nota). Tá ni̱ya̱ʼa tiempo Jehová nda̱kaxinra iin ta̱ loʼo ta̱ xi̱ndaa ndikachi ta̱ xi̱naní David ña̱ xa̱a̱ra koora rey chí ñuu Israel (2 Sam. 22:1, 36). Tá ka̱ku ta̱ Jesús, Ndióxi̱ xi̱niñúʼura iin ángel ña̱ va̱ʼa natúʼunra xíʼin na̱ xi̱ndaa ndikachi ña̱ xa̱a̱ ka̱ku ta̱ Mesías chí ñuu Belén, ta siʼna na̱yóʼo ku̱ndaa̱-ini (Luc. 2:8-11). Tá ni̱xa̱ʼa̱n ta̱ José xíʼin ñá María chí templo ta níʼina ta̱ Jesús, Jehová ta̱xira ña̱ ná koto ta̱ Simeón xíʼin ñá Ana se̱ʼera ta na̱yóʼo xa̱a̱ chéenívana tiempo saá (Luc. 2:25-30, 36-38). Ni súkunníva íyo Jehová kíʼinvara kuenta xíʼin na̱ vitá-ini.

16. ¿Ndáa ki̱ʼva xi̱ndiku̱n ta̱ Jesús yichi̱ yivára?

¹⁶ Ta̱ Jesús ndíku̱nra yichi̱ yivára. Nda̱a̱ táki̱ʼva kéʼé Jehová saá kéʼé ta̱ Jesús saáchi ndáyáʼviní na̱ yiví na̱ vitá-ini nu̱úra. Sa̱náʼa̱ra na̱ yiví na̱ va̱ása níkaʼvi va̱ʼa xa̱ʼa̱ Reino Ndióxi̱ (Hech. 4:13; Mat. 11:25). Ta sa̱ndáʼara na̱ xi̱kuumií kue̱ʼe̱ ta xíʼin ki̱ʼva ña̱ xi̱keʼéra xi̱na̱ʼa̱ra ña̱ xi̱ ixato̱ʼórana ta xi̱kuni̱rana (Luc. 5:13). Ñuú tá kúma̱níka kuvira nda̱katara xa̱ʼa̱ na̱ apóstolra, ta chiñu yóʼo na̱ káchíñu ndáʼviva xi̱keʼéña (Juan 13:5). Tá kúma̱níka ku̱ʼu̱nra chí ndiví ta̱xira iin chiñu ña̱ ndáyáʼviní ndaʼa̱ na̱ xi̱ndiku̱n miíra ta nda̱a̱ miíyó kéʼé ña̱yóʼo, ña̱ chindeétáʼanyó xíʼin inkana ña̱ va̱ʼa koona ndiʼi tiempo (Mat. 28:19, 20).

17. ¿Ndáa ki̱ʼva kundiku̱nyó yichi̱ Jehová? (Koto na̱ʼná).

¹⁷ ¿Ndáa ki̱ʼva kundiku̱nyó yichi̱ Jehová? Ndíku̱nyó yichi̱ra tá nátúʼunyó xíʼin na̱ yiví. Iin ña̱ va̱ʼaní kúú ña̱ natúʼunyó xíʼin na̱ yiví xa̱ʼa̱ tu̱ʼun va̱ʼa ni xa̱a̱ síín culturana, color ña̱ kúúmiína, á ka̱ʼvi va̱ʼana á va̱ása. Saátu ndíku̱nyó yichi̱ra xíʼin ki̱ʼva ña̱ kéʼéyó xíʼin na̱ hermano ta ndákanixi̱níyó ña̱ ndáyáʼvika na̱kán nu̱ú miíyó ni nda̱a̱ ndáaka chiñu kúúmiíyó á ña̱ xíni̱yó keʼéyó (Filip. 2:3). Jehová kúsi̱í-inira tá xítora ña̱ vitá íyo iniyó ta náʼa̱yó ña̱ íxato̱ʼó-táʼanyó (Sof. 3:12; Rom. 12:10).

18. ¿Nda̱chun kúni̱ún vitá koo iniún nda̱a̱ táki̱ʼva kéʼé Jehová?

¹⁸ Tá chíkaa̱yó ndee̱ ña̱ vitá koo iniyó nda̱a̱ táki̱ʼva kéʼé yiváyó ta̱ íyo chí ndiví saá náʼa̱yó ña̱ va̱ʼa kúnda̱a̱-iniyó xíʼin ña̱ ndóʼo inkana, vií ndákanixi̱níyó ta kúee íyo iniyó. Saátu ná chikaa̱yó ndee̱ ña̱ vií keʼéyó xíʼin inkana nda̱a̱ táki̱ʼva kéʼé Jehová. Ña̱ chíkaa̱yó ndee̱ ña̱ keʼéyó nda̱a̱ táki̱ʼva kéʼé miíra saá kúú ña̱ ndáyáʼvikayó nu̱úra (Is. 43:4).