ကျမ်းစာစောင်နံပါတ် ၆၂​—၁ ယောဟန်

ကျမ်းရေးသူ– တမန်တော်ယောဟန်

ရေးရာဒေသ– ဧဖက် သို့မဟုတ် အနီးတစ်ဝိုက်

ရေးသားပြီးစီးချိန်– အေဒီ ၉၈ ခန့်

ယေရှုခရစ်ချစ်သော တမန်တော်ယောဟန်သည် ဖြောင့်မတ်ခြင်းကို အလွန်မြတ်နိုးသူတစ်ဦးဖြစ်သည်။ ထို့ကြောင့်ပင် ယေရှုခရစ်၏ စိတ်သဘောထားကို အတွင်းကျကျ ထိုးထွင်းသိမြင်စေနိုင်ခဲ့သည်။ ထို့ကြောင့် သူ့အရေးအသားများတွင် မေတ္တာဟူသော အဓိကအချက်ပေါ်လွင်နေသည်မှာ အဆန်းမဟုတ်ပါလေ။ သူကား စိတ်ကူးယဉ်မေတ္တာဘွဲ့သမားတစ်ဦးတော့ မဟုတ်ပါ။ သူ့ကို ယေရှုက “မိုးကြိုးသား [ဗောနေရဂက်]” ဟုခေါ်ခဲ့သည်။ (မာ. ၃:၁၇) တကယ်ဆိုလျှင် ဤစာသုံးစောင်ရေးရခြင်းအကြောင်းမှာ အမှန်တရားနှင့် ဖြောင့်မတ်ခြင်းတရားအတွက် ခုခံကာကွယ်ရန် ရည်ရွယ်ချက်ဖြင့်ဖြစ်သည်။ ပေါလုကြိုပြောခဲ့သော အယူဖောက်ပြန်ခြင်း ပေါ်ထွန်းနေပြီဖြစ်သောကြောင့်တည်း။ “ဆိုးညစ်သူ” ၏မလိမ့်တပတ်လုပ်ရပ်များကို ရင်ဆိုင်ခုခံသွားကြရာတွင် ရှေးခရစ်ယာန်များအတွက် ယောဟန်၏စာသုံးစောင်သည် အခန့်သင့်ပင်ဖြစ်ပေသည်။—၂ သက်. ၂:၃၊ ၄; ၁ ယော. ၂:၁၃၊ ၁၄; ၅:၁၈၊ ၁၉၊ ကဘ။

^၂ စာပါအကြောင်းများကိုကြည့်လျှင် ဤစာတို့သည် မဿဲနှင့် မာကုခရစ်ဝင်ကျမ်းများ၊ ပေတရုနှင့်ပေါလုတို့၏ သာသနာပြုစာများထက် များစွာနောက်ကျသောအချိန်တွင် ရေးသည့်စာများဖြစ်သည်။ အချိန်ကာလတို့သည် ပြောင်းလဲကုန်ကြပေပြီ။ အသင်းတော်ပေါ်ထွန်းစခေတ်က အန္တရာယ်ကြီးဖြစ်သော ဂျူးအယူဝါဒအကြောင်း တစိုးတစေ့မျှပင် မတွေ့ရပေ။ ဟေဗြဲကျမ်းစာမှ တိုက်ရိုက်ကိုးကားချက်ဟူ၍လည်း တစ်ချက်မျှ မတွေ့ရတော့။ ၎င်းတို့အစား ယောဟန်သည် “အန္တိခရစ်များ” အကြောင်း၊ “နောက်ဆုံးသောကာလ” အကြောင်းများကို ပြောထားသည်။ (၁ ယော. ၂:၁၈) သူ့စာဖတ်ပရိသတ်ကို “ချစ်သားတို့” ဟုခေါ်ပြီး သူ့ကိုယ်သူ “အသက်ကြီးသူ” ဟုခေါ်ထားသည်။ (၁ ယော. ၂:၁၊ ၁၂၊ ၁၃၊ ၁၈၊ ၂၈; ၃:၇၊ ၁၈; ၄:၄; ၅:၂၁; ၂ ယော. ၁; ၃ ယော. ၁) ဤအရာတို့က နှောင်းပိုင်းကျကျအချိန်တွင် ဤစာသုံးစောင်ကို ရေးခြင်းဖြစ်ကြောင်း ညွှန်ပြသည်။ ၎င်းအပြင် ၁ ယောဟန် ၁:၃၊ ၄ က ယောဟန်ခရစ်ဝင်ကျမ်းကိုလည်း တစ်ချိန်တည်းလောက်တွင် ရေးကြောင်းပြသည်။ တမန်တော်ယောဟန်မသေမီလေး အေဒီ ၉၈ ခန့်တွင် ဤစာသုံးစောင်ကို ရေးသားပြီးစီးသည်ဟု ယေဘုယျအားဖြင့် လက်ခံထားကြသည်။ ဧဖက်မြို့တစ်ဝိုက်မှ ရေးခြင်းဖြစ်သည်ဟုလည်း ယူဆကြသည်။

^၃ ယောဟန်ပထမစောင်ကို တမန်တော်ယောဟန်ရေးခဲ့သည်ဟု ဆိုနိုင်ခြင်းမှာ ယောဟန်ခရစ်ဝင်ကျမ်းနှင့် အလွန်ဆင်တူသောကြောင့်ဖြစ်သည်။ ယောဟန်ခရစ်ဝင်ကျမ်းကို ယောဟန်ရေးကြောင်း သေချာလှပေသည်။ ဥပမာ၊ ‘ခမည်းတော်သည် ငါတို့ကို ထင်ရှားပြသော ထာဝရအသက်ဖြစ်သည့် အသက်ရှင်သော နှုတ်ကပါဌ်တော်’ ကို သူမျက်မြင်သက်သေဖြစ်ကြောင်း ဖော်ပြခြင်းဖြင့် စာကိုနိဒါန်းပျိုးထားသည်။ ယောဟန်ခရစ်ဝင်ကျမ်းအဖွင့်စကားများနှင့် ထူးခြားစွာဆင်တူနေပေသည်။ ၎င်း၏ကျမ်းစစ်ကျမ်းမှန်ဖြစ်မှုကို အေဒီဒုတိယရာစုက အိုင်ရင်နီးယပ်စ်၊ ပေါ်လီကပ်နှင့် ပေပီးယပ်စ်စသော အစောပိုင်းစာရေးဆရာများနှင့် မူရေတိုရီယန်ကျမ်းအပိုင်းအစများက ထောက်ခံသည်။a ယူစီးဘီးယပ်စ် (အေဒီ ၂၆၀ ခန့်-၃၄၂) ၏အဆိုအရ ယောဟန်ပထမစောင်၏ ကျမ်းစစ်ကျမ်းမှန်ဖြစ်မှုကို တစ်ခါမျှ စောဒကမတက်ခဲ့ချေ။b သို့သော် ရှေးကျသောအချို့ဘာသာပြန်ကျမ်းများက အခန်းကြီး ၅၊ အခန်းငယ် ၇ မှ စကားများအဆုံးနှင့် အခန်းငယ် ၈ မှ စကားများအစအကြားတွင် ဤစကားများကို ထပ်ထည့်ထားကြသည်– “ကောင်းကင်ဘုံ၌ ခမည်းတော်တစ်ပါး၊ နှုတ်ကပါဌ်တော်တစ်ပါး၊ သန့်ရှင်းသောဝိညာဉ်တော်တစ်ပါး၊ ထိုသုံးပါးတို့သည် တစ်ပါးတည်းဖြစ်၏။ မြေကြီးပေါ်တွင် သက်သေခံသုံးပါးရှိ၏။” (ဂျိမ်းစ်ဘုရင်ဘာသာပြန်ကျမ်း) သို့သော် ၎င်းစကားများကို အစောပိုင်းဂရိလက်ရေးစာမူများတွင် မတွေ့ရပေ။ သုံးပါးတစ်ဆူအယူဝါဒကို ပံ့ပိုးပေးဖို့အတွက် ထပ်ဖြည့်ထားရာများဖြစ်ကြောင်း ထင်ရှားလှသည်။ မျက်မှောက်ခေတ် ကက်သလစ်နှင့် ပရိုတက်စတင့်ဘာသာပြန်ကျမ်းများစွာတွင် ယင်းစကားများကို ထုတ်ပယ်ထားကြသည်။—၁ ယောဟန် ၁:၁၊ ၂။c

^၄ မိမိ၏ “ချစ်သူတို့၊” “ချစ်သားတို့” ကိုကာကွယ်ရန် ယောဟန်ရေးသားသည်။ သမ္မာတရားမှ သူတို့လမ်းလွဲသွားရန် လှည့်ဖြားဖို့ကြိုးစားနေကြသူ၊ သူတို့ထံမှထွက်သွားကြသူတို့ဖြစ်သော ‘အန္တိခရစ်များ’ ၏မှားယွင်းသောသွန်သင်ချက်များမှ ကာကွယ်ပေးရန်ဖြစ်သည်။ (၂:၇၊ ၈) ဤအယူဖောက်ပြန်သော အန္တိခရစ်များသည် အစောပိုင်းအသိပညာပဓာနဝါဒ နောက်လိုက်များဖြစ်ကြသည့် ဘုရားသခင်ထံမှ လျှို့ဝှက်နက်နဲသောအရာများကို သိသည်ဟုဆိုကြသူများအပါအဝင် ဂရိအတွေးအခေါ်ပညာရှင်များ၏ လွှမ်းမိုးမှုကိုခံခဲ့ရသူတို့ဖြစ်နိုင်သည်။d အယူဖောက်ပြန်မှုကို ခုခံကာကွယ်ရန် ယောဟန်သည် အပြစ်၊ ချစ်ခြင်းမေတ္တာနှင့် အန္တိခရစ်ဟူသော အဓိကအချက်သုံးချက်ဖြင့် အကျယ်တဝင့် ဆွေးနွေးသုံးသပ်ပြသည်။ အပြစ်အကြောင်း၊ အပြစ်ဖြေစရာ ယေရှု၏ရွေးနုတ်ဖိုးပူဇော်သကာအကြောင်းများ ယောဟန်ပြောခြင်းကိုထောက်ခြင်းဖြင့် ဤအန္တိခရစ်များသည် သူတို့မှ ဖြောင့်မတ်သည်၊ သူတို့ ၌ အပြစ်မရှိ၊ ယေရှု၏ရွေးနုတ်ဖိုးကို မလိုဟုပြောနေကြကြောင်း သိစေသည်။ ကိုယ်အကျိုးကိုသာအဓိကထားသော သူတို့၏ ‘အသိပညာ’ က သူတို့ကို အတ္တသမားများ၊ မေတ္တာမဲ့သူများ ဖြစ်စေခဲ့ပြီး ယောဟန်တစ်ချိန်လုံး ဦးစားပေး ရေးသွားသော ခရစ်ယာန်မေတ္တာစစ်နှင့် လားလားကြီးဆန့်ကျင်နေပါသည်။ ထို့ ပြင် ယေရှုသည် ခရစ်တော်ဖြစ်သည်၊ လူသားမတိုင်မီက အသက်ရှင်ခဲ့သည်၊ ဘုရားသခင့်သားတော်အဖြစ် အသွေးအသားကို ယူတင်ဝတ်ဆောင်ခဲ့သည်၊ ယုံကြည်သူများအတွက် ကယ်တင်ခြင်းကိုပေးသည်စသည်တို့ကို ယောဟန် ရှင်းလင်းဖော်ပြခြင်းဖြင့် မှားယွင်းသောအယူဝါဒများကို ချေဖျက်နေခြင်းပင်ဖြစ်သည်။ (၁:၇-၁၀; ၂:၁၊ ၂; ၄:၁၆-၂၁; ၂:၂၂; ၁:၁၊ ၂; ၄:၂၊ ၃၊ ၁၄၊ ၁၅) ထိုမိစ္ဆာဆရာများကို “အန္တိခရစ်များ” ဟုယောဟန် တံဆိပ်တပ်လိုက်သည်။ ဘုရားသခင်၏သားများနှင့် မာရ်နတ်၏သားများကို ခွဲခြားသိမြင်ပုံနည်းလမ်းအချို့ကိုလည်း ဖော်ပြသည်။—၂:၁၈၊ ၂၂; ၄:၃။

^၅ အသင်းတော်တစ်စုံတစ်ခုသို့ လိပ်မူထားခြင်းမဟုတ်ရကား ဤစာသည် ခရစ်ယာန်အသင်းအပင်းတစ်ခုလုံးဖတ်ရန် ရည်ရွယ်သည့်စာဖြစ်သည်။ အစနှုတ်ခွန်းဆက်စကားများနှင့် နောက်ဆုံးနှုတ်ဆက်စကားများမပါရှိခြင်းက ဤအချက်ကိုထောက်ခံ၏။ ၎င်းကို စာတစ်စောင်အဖြစ်မဟုတ်ဘဲ ကျမ်းတစ်စောင်ဟုပင် အချို့ကဖော်ပြခဲ့ကြသည်။ “သင်တို့” (ကမ္ဘာသစ်ဘာသာပြန်ကျမ်းတွင် စာလုံးကြီးဖြင့် ဖော်ပြထား) ဟူ၍ ဗဟုဝုစ်ကိန်းကိုသုံးထားခြင်းက တစ်ဦးတစ်ယောက်ကို ရည်ညွှန်းနေခြင်းမဟုတ်ဘဲ အုပ်စုတစ်စုကို ရေးကြောင်းသိသာစေသည်။

အဘယ်ကြောင့်အကျိုးရှိကြောင်း

^၁၁ ခရစ်သက္ကရာဇ်ပထမရာစု အကုန်ပိုင်းကကဲ့သို့ပင် မျက်မှောက်ခေတ်တွင်လည်း ခရစ်ယာန်စစ်တို့ သတိပြုရှောင်ရှားရမည့် “အန္တိခရစ်” များစွာရှိပေသည်။ ခရစ်ယာန်စစ်တို့သည် “အချင်းချင်းချစ်ရကြမည်ဟူသော တရားတော်” ကို ခိုင်ခိုင်မြဲမြဲ ကိုင်စွဲရမည်ဖြစ်ကာ လွတ်လပ်စွာပြောဆိုခွင့်နှင့် ဖြောင့်မတ်စွာကျင့်ခြင်းဖြင့် ဘုရားသခင်၊ မှန်ကန်သောသွန်သင်ချက်တို့နှင့် တစ်လုံးတစ်ဝတည်းရှိရကြမည်။ (၂:၁၈; ၃:၁၁၊ ၁၂; ၂:၂၇-၂၉၊ ကဘ) ထို့ ပြင် အရေးအကြီးဆုံးကား ခရစ်ယာန်အမည်ခံတို့ကို ဝါးမျိုသွားသော ရုပ်ဝါဒ၊ လောက၏ဆိုးညစ်မှုများဖြစ်သော “ကိုယ်ကာယတပ်မက်ခြင်း၊ မျက်စိတပ်မက်ခြင်း၊ လောကီစည်းစိမ်၌ဝါကြွားခြင်း” တို့ကိုရှောင်ရှားရန် သတိပေးခြင်းဖြစ်ပေသည်။ “ဘုရားသခင်၏အလိုတော်နှင့်အညီ ကျင့်သောသူ” သည် “နိစ္စထာဝရတည်” ကြောင်းသိကာ ခရစ်ယာန်စစ်များသည် လောကနှင့် ယင်း၏တပ်မက်ခြင်းတို့ကို ရှောင်ရှားပေလိမ့်မည်။ လောကီတပ်မက်ခြင်း၊ ဂိုဏ်းဂဏကွဲခြင်း၊ မုန်းတီးခြင်းတို့နှင့်ပြည့်နေသော ဤခေတ်သမယကြီးဝယ် မှုတ်သွင်းခံသမ္မာကျမ်းစာအားဖြင့် ဘုရားသခင့်အလိုတော်ကိုလေ့လာပြီး ထိုအတိုင်း လိုက်လျှောက်လုပ်ကိုင်ရသည်မှာ အကျိုးကြီးလှသည်။—၂:၁၅-၁၇။

^၁၂ ခမည်းတော်ထံမှသက်ရောက်သော အလင်းနှင့် သမ္မာတရားကိုဖျက်ဆီးသော မိစ္ဆာကောင်မှသက်ရောက်သည့် အမှောင်၏ကွာခြားမှု၊ ဘုရားသခင်၏အသက်ပေးသြဝါဒများနှင့် အန္တိခရစ်၏လှည့်ဖြားတတ်သော ကလိန်စကားကွာခြားမှု၊ ဘုရားသခင်၊ သားတော်တို့နှင့်ပေါင်းစည်းသော အသင်းတော်တစ်ခုလုံးကို လွှမ်းခြုံသောမေတ္တာနှင့် “ငါတို့နှင့်မစပ်ဆိုင်ကြောင်းကို ထင်ရှားစေခြင်းငှာ ငါတို့ထံမှ ထွက်သွား” သောသူတို့၏ ကာဣနဆန်သော အသက်သတ်လိုသည့်မုန်းတီးမှုတို့အကြား ကွာခြားမှုများကို ကျွန်ုပ်တို့အကျိုးအလို့ငှာ ယောဟန်ပထမစောင်က နှိုင်းယှဉ်ပြသည်။ (၂:၁၉; ၁:၅-၇; ၂: ၈- ၁၁၊ ၂၂-၂၅; ၃:၂၃၊ ၂၄၊ ၁၁၊ ၁၂) ယင်းကိုကျေးဇူးတင်လေးမြတ်သောအားဖြင့် ကျွန်ုပ်တို့၏ပြင်းပြသည့်စိတ်ဆန္ဒမှာ “လောကကိုအောင်” ရန် ဖြစ်သင့်သည်။ မည်သို့လုပ်နိုင်ပါအံ့နည်း။ ခိုင်မာသောယုံကြည်ခြင်းရှိခြင်း၊ ကိုယ်တော်၏ပညတ်များကို စောင့်ခြင်းမည်သော “ဘုရားသခင်ကိုချစ်” ခြင်းအားဖြင့် အောင်နိုင်ပါမည်။—၅:၃၊ ၄။

^၁၃ ဤ “ဘုရားသခင်ကိုချစ်” ခြင်းတည်းဟူသော လှုံ့ဆော်အားကို စာစောင်တစ်လျှောက်လုံး အလေးပေးဖော်ပြခဲ့သည်မှာ ထူးခြားလှပေစွ။ အခန်းကြီး ၂ တွင် လောကကိုချစ်ခြင်းနှင့် ခမည်းတော်ကိုချစ်ခြင်းတို့၏ ခြားနားပုံနှိုင်းယှဉ်ချက်ကို ပြတ်ပြတ်သားသား တွေ့ရှိရသည်။ ထို့နောက် “ဘုရားသခင်သည် ချစ်ခြင်းမေတ္တာ” ဖြစ်ကြောင်း ကျွန်ုပ်တို့အား တင်ပြသည်။ (၄:၈၊ ၁၆) အပြောသာမဟုတ်သည့်မေတ္တာပါတကား။ “လောကီသားတို့ကို ကယ်တင်သောသခင်ဖြစ်စေခြင်းငှာ ခမည်းတော်သည် သားတော်ကိုစေလွှတ်” ရာတွင် ဤမေတ္တာ ထင်ထင်ရှားရှား ပေါ်လွင်လေသည်။ (၄:၁၄) “ဘုရားသခင်သည် ငါတို့ကို ရှေးဦးစွာချစ်တော်မူသောကြောင့် ငါတို့သည် ဘုရားသခင်ကိုချစ်ကြ၏” ဟုဆိုသော တမန်တော်၏စကားနှင့်အညီ ကျွန်ုပ်တို့သည် ကျေးဇူးတင်လေးမြတ်သော၊ ကြောက်ခြင်းကင်းသောမေတ္တာဖြင့် ချစ်ကြရန် ဤအချက်က လှုံ့ဆော်ပေးသင့်သည်။ (၄:၁၉) ကျွန်ုပ်တို့၏မေတ္တာသည် ခမည်းတော်နှင့်သားတော်တို့ကဲ့သို့ အပြောသက်သက်မဟုတ်သည့် ကိုယ်ကျိုးစွန့်မေတ္တာဖြစ်သင့်သည်။ ကျွန်ုပ်တို့အတွက် ယေရှုအသက်စွန့်ခဲ့သည်နည်းတူ “ငါတို့သည်လည်း ညီအစ်ကိုချင်းတို့အဖို့အလို့ငှာ အသက်ကိုစွန့်” ရန်တာဝန်ရှိပေသည်။ မှန်ပါသည်။ “စကားပြောကာမျှအားဖြင့်သာမချစ်ဘဲ စိတ်ပါကိုယ်ရောက် ဧကန်အမှန်ချစ်” ရန် သနားခြင်းကရုဏာစိတ်ကို ချုပ်တည်းမထားသင့်ပါ။ (၃:၁၆-၁၈) ယောဟန်၏စာတွင် ရှင်းလင်းထားသကဲ့သို့ ဤမေတ္တာသည် ဘုရားသခင်နှင့်အတူ သွားလာသူတို့ကို ခမည်းတော်၊ သားတော်တို့နှင့် ပေါင်းစည်းစေသောအသိပညာစစ်နှင့် ဒွန်တွဲနေသည့် မေတ္တာဖြစ်ပေသည်။ (၂:၅၊ ၆) အခွင့်ထူးလှသည့် မေတ္တာနှောင်ကြိုးပတ်ရစ်ခံရသော နိုင်ငံတော်အမွေခံများကို ယောဟန် ဤသို့ဆိုလေသည်– “ငါတို့သည် သားတော်ယေရှုခရစ်အားဖြင့် ထိုစစ်မှန်သောအရှင်နှင့် တစ်လုံးတစ်ဝတည်း ရှိကြ၏။ ထိုအရှင်ကား စစ်မှန်သောဘုရားသခင်ဖြစ်တော်မူ၍ ထာဝရအသက်ပေးသောအရှင်ပေတည်း။”—၅:၂၀၊ ကဘ။

[အောက်ခြေမှတ်ချက်များ]