ကျမ်းစာစောင်နံပါတ် ၆၆–ဗျာဒိတ်ကျမ်း

ကျမ်းရေးသူ– တမန်တော်ယောဟန်

ရေးရာဒေသ– ပတ်မု

ရေးသားပြီးစီးချိန်– အေဒီ ၉၆ ခန့်

ဗျာဒိတ်ကျမ်းပါ သရုပ်ဖော်ချက်များသည် လူတို့ကို ခြောက်လှန့်ရန်အတွက်လော။ လုံးဝမဟုတ်ပါ။ ပရောဖက်ပြုချက်၏ ပြည့်စုံချက်သည် ဆိုးယုတ်သူတို့ကို ထိတ်လန့်ချောက်ချားသွားစေကောင်း သွားစေမည်။ သို့သော် ဘုရားသခင့်သစ္စာရှိ ကျေးကျွန်တို့သည် မှုတ်သွင်းခံနိဒါန်းစကားနှင့် ကောင်းကင်တမန်၏နိဂုံးချုပ် ကောက်ချက်တို့ကို သဘောတူမည်မှာ သေချာသည်။ “အနာဂတ္တိကျမ်းစကားကို ကြည့်ရှုဖတ်ရွတ် နားထောင်၍ ရေးထားသမျှတို့ကို စောင့်ရှောက်သောသူတို့သည် မင်္ဂလာရှိကြ၏။” “ဤစာစောင်၏ အနာဂတ္တိစကားကို စောင့်ရှောက်သောသူသည် မင်္ဂလာရှိ၏။” (ဗျာ. ၁:၃; ၂၂:၇) ယောဟန်၏မှုတ်သွင်းခံ အခြားကျမ်းလေးကျမ်းထက်အရင် ရေးခဲ့သော်လည်း ဗျာဒိတ်ကျမ်းသည် ကျွန်ုပ်တို့ သမ္မာကျမ်းစာ၏မှုတ်သွင်းခံ ၆၆ စောင်တွင် နောက်ဆုံး၌ထားခြင်းသည် သင့်လျော်မှန်ကန်ပါသည်။ အကြောင်းမှာ ဗျာဒိတ်ကျမ်းသည် လူသားတို့အတွက် ဘုရားသခင့်ရည်ရွယ်တော်မူချက်များနှင့်သက်ဆိုင်သည့် ရူပါရုံကို ပေးတော်မူခြင်းအားဖြင့် စာဖတ်သူတို့ကို ဝေးလံသောအနာဂတ်ဆီသို့ ခေါ်ဆောင်သွားကာ၊ သမ္မာကျမ်းစာ၏ ခမ်းနားထည်ဝါသောအဓိကအကြောင်းဖြစ်သည့် ကတိထားရာမျိုးနွယ်တော်ဖြစ်သော ခရစ်တော်၏နိုင်ငံတော်အားဖြင့် ယေဟောဝါ၏နာမတော် သိဒ္ဓိတင်ခံရကာ ကိုယ်တော်၏ အချုပ်အခြာအာဏာတော်အပေါ် သံသယကင်းရှင်းပုံတို့ကို ဘုန်းကျက်သရေနှင့်ပြည့်ဝသည့် အထွတ်အထိပ်သို့ ရောက်ရှိစေသောကြောင့်ပင်။

^၂ အဖွင့်အခန်းငယ်တွင် “ယေရှုခရစ်သည် . . . ဘုရားသခင်အပ်ပေးတော်မူသော ထိုသခင်၏ဗျာဒိတ်တော်ကိုဆိုပေအံ့။ ထိုသခင်သည် မိမိကောင်းကင်တမန်ကိုစေလွှတ်၍ မိမိအစေခံကျွန်ယောဟန်အား ဗျာဒိတ်တော်အရိပ်ကို ပြတော်မူ၏” ဟုဆိုထားရာ ယောဟန်သည် အကြောင်းအရာကိုစဖန်တီးသူမဟုတ်ဘဲ စာရေးသူသာဖြစ်သည်။ သို့နှင့် ယောဟန်သည် ဗျာဒိတ်တော်ဖွင့်ပြသူမဟုတ်သည့်အပြင် ယောဟန်၏ဗျာဒိတ်ကျမ်းလည်းမဟုတ်ချေ။ (၁:၁) အနာဂတ်အတွက် ဘုရားသခင့်အံ့ချီးဖွယ်ရာ ရည်ရွယ်ချက်များကို ကိုယ်တော့်ကျေးကျွန်အားဖွင့်လှစ်ဖော်ပြသော ကျမ်းဖြစ်ရကား ဗျာဒိတ်ကျမ်းဟူသောအမည်သည် အလွန်ဆီလျော်လှပါသည်။ ဂရိတွင် ဤကျမ်း၏အမည်မှာ A·po·kaʹly·psis (Apocalypse) အပေါကလစ်ဖြစ်ကာ အဓိပ္ပာယ်မှာ “လှစ်ဟခြင်း” သို့မဟုတ် “ဖော်ထုတ်ခြင်း” ဟူ၍ဖြစ်သည်။

^၃ ဗျာဒိတ် အခန်းကြီးတစ်တွင်ဖော်ပြထားသော ကျမ်းရေးသူယောဟန်မှာ မည်သူဖြစ်ပါသနည်း။ ယေရှုခရစ်၏ကျွန်တစ်ဦးဖြစ်ကြောင်း၊ ဒုက္ခဆင်းရဲခြင်းကို ဝေမျှခံစားသောညီအစ်ကိုတစ်ဦးဖြစ်ကြောင်း၊ ပတ်မုကျွန်းပေါ်သို့ နယ်နှင်ခံထားရကြောင်း သိရှိရပါသည်။ သူ၏လက်ဦးစာဖတ်သူများသည် သူ့ကို ကောင်းစွာသိကြသောကြောင့် ဤထက်ပို၍ ရှင်းပြနေစရာမလိုခဲ့ချေ။ သူကား တမန်တော်ယောဟန်ဖြစ်ရပါမည်။ ဤယူဆချက်ကို ရှေးသမိုင်းပညာရှင်များက ထောက်ခံကြသည်။ အေဒီဒုတိယရာစု၏ ပထမပိုင်းတွင် ရေးသားခဲ့သူ ပေပီးယပ်စ်က ဤကျမ်းကို တမန်တော်ရေးသောကျမ်းဟု ခေါ်ခဲ့သည်။ ဒုတိယရာစုမှ ဂျတ်စတင်မာတာက သူ၏ “Dialogue With Trypho, a Jew” (LXXXI) စာအုပ်တွင် ဤသို့ပြောခဲ့သည်– “ကျွန်ုပ်တို့နှင့်အတူ လူတစ်ဦးရှိခဲ့သည်၊ သူ၏အမည်မှာ ယောဟန်ဖြစ်ပြီး ခရစ်တော်၏တမန်တော်တစ်ပါးဖြစ်ခဲ့ကာ သူရရှိသည့်ဗျာဒိတ်တော်အားဖြင့် ပရောဖက်ပြုခဲ့သူဖြစ်သည်။”a တမန်တော်ယောဟန်သည် ဗျာဒိတ်ကျမ်းကိုရေးသူဖြစ်သည်ဟု အိုင်ရင်နီးယပ်စ်က အတိအကျပြောခဲ့သည်။ ဒုတိယရာစုနှောင်းပိုင်းနှင့် တတိယရာစုအစောပိုင်းမှ အလက်ဇန္ဒြီးယားမြို့သား ကလီးမင့်နှင့် တာတူလျန်တို့ကလည်း ထိုသို့ပင်လက်ခံခဲ့သည်။ တတိယရာစုမှ နာမည်ကျော်ကျမ်းပညာရှင် သြရီဂျင်က “ယေရှုရင်ခွင်၌လျောင်းသော ယောဟန်၊ ငါတို့အတွက် သတင်းကောင်းကျမ်းစောင်တစ်စောင်ကို ထားရစ်ခဲ့သူ၊ . . . အပေါကလစ်ကျမ်းကိုလည်း ရေးခဲ့သူအကြောင်း ငါပြောခြင်းဖြစ်သည်” ဟုပြောခဲ့သည်။b

^၄ ယောဟန်၏အခြားကျမ်းများတွင် မေတ္တာအကြောင်း အလွန်အသားပေးရေးခဲ့သောကြောင့် အားနှင့်အင်နှင့် တန်ခိုးပါပါရေးထားသော ဗျာဒိတ်ကျမ်းကို ယောဟန်ရေးခဲ့ခြင်းမဟုတ်ဟု မဆိုနိုင်ပါလေ။ မြို့တစ်မြို့မှ ရှမာရိလူများကို ယောဟန်နှင့် ညီဖြစ်သူ ယာကုပ်တို့ မည်မျှအထိ စိတ်ဆိုးမာန်ဆိုး ဖြစ်ခဲ့သနည်းဟူမူ မိုးကောင်းကင်မှမီးကျပြီး လောင်စေဖို့ ဆန္ဒရှိခဲ့ကြသည်။ ထို့ကြောင့် “ဗောနေရဂက်” သို့မဟုတ် “မိုးကြိုးသား” များဟု အမည်တွင်ခဲ့ရသည်။ (မာကု ၃:၁၇; လုကာ ၉:၅၄) ရေးဟန်ကွဲလွဲနေမှုကြောင့် ကျွန်ုပ်တို့ မည်သို့မျှ စိတ်ရှုပ်မသွားသင့်ပေ။ ဗျာဒိတ်ကျမ်းပါအကြောင်းသည် တစ်မျိုးတစ်မည်သောအကြောင်းဖြစ်သည်ကို သတိရပါ။ ဤရူပါရုံများတွင် ယောဟန်မြင်တွေ့ရာများသည် သူတစ်ခါမျှ မမြင်ဖူးသောအရာများ ဖြစ်သည်။ ဗျာဒိတ်ကျမ်းသည် ကျန်ပရောဖက်ပြုကျမ်းစာမှန်သမျှနှင့် အံ့ဖွယ်ကောင်းလောက်အောင် သဘောချင်းညီညွတ်နေခြင်းက ယင်းသည် မှုတ်သွင်းခံဘုရားနှုတ်ကပါဌ်တော်၏ တစ်စိတ်တစ်ပိုင်း အမှန်တကယ်ပင်ဖြစ်ကြောင်း သက်သေထူပါသည်။

^၅ ရှေးအကျဆုံးအထောက်အထားများအရ ယောဟန်သည် ဗျာဒိတ်ကျမ်းကို အေဒီ ၉၆ ခန့်၌ ရေးခဲ့၏။ ယေရုရှလင်မြို့ ပျက်စီးပြီးနောက် ခန့်မှန်းခြေ ၂၆ နှစ်ခန့်တွင်ဖြစ်သည်။ ဧကရာဇ် ဒိုမီရှန် နန်းစံအဆုံးပိုင်းတွင် ဖြစ်ပေမည်။ ဤအချက်ကို မှန်မမှန်စစ်ဆေးရာတွင် အပေါကလစ်သည် “ရှေးယခင်က တွေ့ခဲ့ရသောကျမ်းမဟုတ်ပါ။ ကျွန်ုပ်တို့ခေတ်ရောက်လုနီးအချိန်၊ ဒိုမီရှန်နန်းသက် ကုန်ခါနီးမှတွေ့ရသော ကျမ်းဖြစ်ပါသည်” ဟုအိုင်ရင်နီးယပ်စ်က ၎င်း၏ “Against Heresies” (V, xxx) ဟူသောစာအုပ်တွင် ဆိုခဲ့သည်။c ယူစီဘီးယပ်စ်နှင့် ဂျရုမ်းတို့သည်လည်း ယင်းအဆိုကိုသဘောတူသည်။ ဒိုမီရှန်သည် ယေရုရှလင်မြို့ကို ဖျက်ဆီးပစ်သည့် ရောမဗိုလ်ချုပ်တိတု၏ညီဖြစ်သည်။ တိတုသေပြီး သူဧကရာဇ်ဖြစ်လာသည်။ ဗျာဒိတ်ကျမ်းမရေးမီ ၁၅ နှစ်ကဖြစ်သည်။ ဒိုမီးနပ်စ်အက်ဒီယပ်စ်နောစ်တာ (Dominus et Deus noster) (“ကျွန်ုပ်တို့၏သခင်နှင့် ဘုရား” ဟုအဓိပ္ပာယ်ရှိ) ဟူသောဘွဲ့ကိုခံယူကာ သူ့ကို ဘုရားတစ်ဆူအဖြစ် ကိုးကွယ်ကြဖို့ အတင်းအကျပ်ခိုင်းစေခဲ့သူဖြစ်သည်။d မှောက်မှားသောဘုရားများကို ဝတ်ပြုသူများအဖို့ ဧကရာဇ်ကိုဝတ်ပြုရခြင်းသည် အဆန်းမဟုတ်သော်လည်း ရှေးခရစ်ယာန်များအတွက်မူ လုံးဝလက်ခံနိုင်သောအရာမဟုတ်၍ ယင်းကိစ္စနှင့်ပတ်သက်၍ မိမိတို့ယုံကြည်ခြင်းကို အလျော့ပေးလိုက်လျောရန် ငြင်းဆိုကြသည်။ သို့နှင့် ဒိုမီရှန်နန်းစံအဆုံးပိုင်း (အေဒီ ၈၁-၉၆) တွင် ခရစ်ယာန်တို့ အကြီးအကျယ် ညှဉ်းပန်းခံရလေတော့သည်။ ထို့ကြောင့်ပင် ဒိုမီရှန်က ယောဟန်ကို ပတ်မုကျွန်းသို့ ပို့လိုက်ခြင်းဖြစ်သည်။ အေဒီ ၉၆ တွင် ဒိုမီရှန် လုပ်ကြံသတ်ဖြတ်ခံရသောအခါ သက်သက်ညှာညှာရှိလှသော ဧကရာဇ်နားဗာ ဆက်ခံသည်။ ယောဟန်လည်း လွတ်မြောက်လာရတော့သည်။ ထိုသို့ပတ်မုကျွန်း၌ တစ်ကျွန်းပို့ခံနေရနေချိန်အတွင်း ယောဟန်သည် ရူပါရုံများကိုရရှိပြီး မှတ်တမ်းတင်ခဲ့သည်။

^၆ ယောဟန်တွေ့ မြင်ခဲ့ပြီး အသင်းတော်များသို့ ရေးသားပေးပို့ရန် မှာကြားခံရသော ရူပါရုံများသည် အဆက်အစပ်မရှိ ကိုးရိုးကားရားနိုင်သော အကြောင်းအရာများမဟုတ်သည့်အတွက် ကျွန်ုပ်တို့ ကျေးဇူးတင်လေးမြတ်ရမည်။ ဗျာဒိတ်ကျမ်းသည် အစမှအဆုံးအထိ နောင်ဖြစ်လတ္တံ့သောအရာတို့ကို အချိတ်အဆက်မိမိဖြင့် အဆီအငေါ်တည့်တည့် ဖော်ပြထားရာများဖြစ်ပေသည်။ ဘုရားသခင့်နိုင်ငံတော်ရည်ရွယ်ချက်တစ်ခုလုံး ပီပြင်စွာ ရုပ်လုံးပေါ်လာသည်အထိ ရူပါရုံတစ်ခုမှတစ်ခုသို့ကူးပြောင်းကာ တစ်စတစ်စ ဖော်ပြသွားရာဖြစ်သည်။ ထို့ကြောင့် ဗျာဒိတ်ကျမ်းကို တစ်စောင်လုံးခြုံ၍ ကြည့်တတ်ရမည်။ ယောဟန်၏အချိန်မှ ဝေးလံသောအနာဂတ်အထိ လှမ်း၍ပို့ဆောင်ပေးသော ကွင်းဆက်အပိုင်းများကို ဖြစ်ပါသည်။ နိဒါန်း (ဗျာ. ၁:၁-၉) ပြီးနောက်ဗျာဒိတ်ကျမ်းကို ရူပါရုံ ၁၆ ခုဖြင့် ပိုင်းခြားထားပါသည်။ (၁) ၁:၁၀–၃:၂၂; (၂) ၄:၁–၅:၁၄; (၃) ၆:၁-၁၇; (၄) ၇:၁-၁၇; (၅) ၈:၁–၉:၂၁; (၆) ၁၀:၁–၁၁:၁၉; (၇) ၁၂:၁-၁၇; (၈) ၁၃:၁-၁၈; (၉) ၁၄:၁-၂၀; (၁၀) ၁၅:၁–၁၆:၂၁; (၁၁) ၁၇:၁-၁၈; (၁၂) ၁၈:၁–၁၉:၁၀; (၁၃) ၁၉:၁၁-၂၁; (၁၄) ၂၀:၁-၁၀; (၁၅) ၂၀:၁၁–၂၁:၈; (၁၆) ၂၁:၉–၂၂:၅။ ဤရူပါရုံများကို လှုံ့ဆော်မှုပေးသောစကားများဖြင့် နိဂုံးချုပ်ထားသည်။ ယေဟောဝါ၊ ယေရှု၊ ကောင်းကင်တမန်နှင့် ယောဟန်တို့အားလုံး ဆက်သွယ်ရေးလမ်းကြောင်းရှိ အဓိကပုဂ္ဂိုလ်များအဖြစ် မိမိတို့၏အခန်းကဏ္ဍကို လုပ်ဆောင်သွားခဲ့ကြလေသည်။—၂၂:၆-၂၁။

အဘယ်ကြောင့်အကျိုးရှိကြောင်း

^၂၈ မှုတ်သွင်းခံကျမ်းစာစောင် ၆၆ စောင်လုံးချင်းအတွက် ဗျာဒိတ်ကျမ်းသည် ကောင်းမွန်လှသည့်နိဂုံးဖြစ်သည်။ ဖယ်ထုတ်ထားသည့်အရာ ဘာမျှမရှိ။ မရေမရာ မသေမချာနှင့် အဆုံးသတ်ထားသည်မရှိ။ ခမ်းနားထည်ဝါသည့်အဆုံးနှင့်အစကို ယခု ကျွန်ုပ်တို့ ပီပီပြင်ပြင် မြင်ရပြီ။ ကျမ်းစာ၏အစပိုင်းတွင် စတင်ထားသည့် မှတ်တမ်းကို ကျမ်းစာ၏အဆုံးပိုင်းအရောက်တွင် နိဂုံးချုပ်ထားသည်။ ကမ္ဘာဦး ၁:၁ တွင် ဘုရားသခင်သည် ရုပ်ပိုင်းဆိုင်ရာကောင်းကင်နှင့်မြေကြီးကို ဖန်ဆင်းခြင်းအကြောင်း ရေးထားသကဲ့သို့ ဗျာဒိတ် ၂၁:၁-၄ က ဟေရှာယ ၆၅:၁၇၊ ၁၈; ၆၆:၂၂ နှင့် ၂ ပေတရု ၃:၁၃ တို့တွင်လည်း ပရောဖက်ပြုထားသကဲ့သို့ ကောင်းကင်သစ်နှင့်မြေကြီးသစ်သည် လူသားတို့အတွက် ပြောမကုန်သည့် ကောင်းချီးများကို ဖြစ်စေမည်အကြောင်း ဖော်ပြထားသည်။ မနာခံလျှင် ဧကန်အမှန်သေရမည်ဖြစ်ကြောင်း ပထမလူ သတိပေးခံရသကဲ့သို့ နာခံသောသူတို့အား ဘုရားသခင်က “နောက်တစ်ဖန် သေခြင်းမရှိရ” ဟု ဧကန်အမှန်အာမခံသည်။ (က. ၂:၁၇; ဗျာ. ၂၁:၄) မြွေသည် လူသားကို လှည့်စားသောသူအဖြစ် ပထမအကြိမ် ပေါ်လာသောအခါက သူ၏ခေါင်းကြိတ်ခြင်းကိုခံရမည်ဟု ဘုရားသခင် တင်ကူးပြောခဲ့သည်။ ယခု ဗျာဒိတ်ကျမ်းက ရှေးမြွေဟောင်း စာတန်မာရ်နတ်သည် နောက်ဆုံး မည်ကဲ့သို့ ဖျက်ဆီးခံရကြောင်း ဖော်ပြသည်။ (က. ၃:၁-၅၊ ၁၅; ဗျာ. ၂၀:၁၀) မနာခံသောလူကို အသက်ပင်ရှိရာ ဧဒင်ဥယျာဉ်မှ နှင်ထုတ်ခံရသော်လည်း ပုံဆောင်ရာအသက်ပင်သည် နာခံသော “လူအမျိုးမျိုးတို့၏ အနာရောဂါ ငြိမ်းစရာဖို့” ပြန်လည်ပေါ်ပေါက်လာသည်။ (က. ၃:၂၂-၂၄; ဗျာ. ၂၂:၂) ဥယျာဉ်ရေရရှိစေရန် ဧဒင်အရပ်မှ မြစ်တစ်စင်းစီးဆင်းသကဲ့သို့ အသက်ပေး၊ အသက်ရှင်စေသော ပုံဆောင်ရာမြစ်သည် ဘုရားသခင့်ပလ္လင်တော်မှ စီးထွက်ကြောင်း ပုံဖော်ထားသည်။ ဤအချက်သည် အစောပိုင်းက ယေဇကျေလ၏ရူပါရုံနှင့် ဆင်တူပြီး “ထာဝရအသက်ရှင်ခြင်းအလို့ငှာ ထွက်သောစမ်းရေ” အကြောင်း ယေရှု၏မိန့်တော်မူချက်ကို သတိရစေသည်။ (က. ၂:၁၀; ဗျာ. ၂၂:၁၊ ၂; ယေဇ. ၄၇:၁-၁၂; ယော. ၄:၁၃၊ ၁၄) ပထမလူယောက်ျားနှင့်လူမိန်းမ ဘုရားသခင်ရှေ့မှောက်မှ နှင်ထုတ်ခြင်းခံရသည်နှင့် အခြားကြီးခြားစွာ သစ္စာရှိသော ကပ်ကျော်သူတို့သည် ကိုယ်တော်၏မျက်နှာတော်ကို ဖူးမြင်ရကြမည်။ (က. ၃:၂၄; ဗျာ. ၂၂:၄) ဗျာဒိတ်ကျမ်း၏ စိတ်ဝင်စားစရာကောင်းသော ယင်းရူပါရုံများကို ဆင်ခြင်သုံးသပ်ရသည်မှာ အမှန်အကျိုးဖြစ်ထွန်းလှသည်။

^၂၉ ဆိုးယုတ်သောဗာဗုလုန်နှင့်ပတ်သက်သည့် ပရောဖက်ပြုချက်များကို ဗျာဒိတ်ကျမ်းက ပေါင်းစည်းလိုက်ပုံမှာလည်း မှတ်သားလောက်ပေသည်။ တကယ့်ဗာဗုလုန်မြို့ ပျက်စီးခြင်းကို မပျက်စီးမီကြာမြင့်စွာကပင် ဟေရှာယ တင်ကူးတွေ့ရှိခဲ့ပြီး “ဗာဗုလုန်မြို့ ပြိုလဲပြီ၊ ပြိုလဲပြီ” ဟုသူကြွေးကြော်ခဲ့သည်။ (ဟေရှာ. ၂၁:၉) ယေရမိကလည်း ဗာဗုလုန်မြို့ပျက်စီးမည်ဖြစ်ကြောင်း ပရောဖက်ပြုခဲ့သည်။ (ယေ. ၅၁:၆-၁၂) သို့သော် ဗျာဒိတ်ကျမ်းက ပုံဆောင်ရာ “ဗာဗုလုန်မြို့ကြီး၊ ပြည့်တန်ဆာ၏အမိ၊ မြေ၌စက်ဆုပ်ရွံရှာဖွယ်သောအရာတို့၏အမိ” အကြောင်းပြောသည်။ သူမလည်း ဖျက်ဆီးခံရမည်ဖြစ်ပြီး ယင်းသို့ပျက်စီးသည်ကို ယောဟန်သည် ရူပါရုံ၌မြင်ကာ “ဗာဗုလုန်မြို့ကြီး ပြိုလဲပြီ၊ ပြိုလဲပြီ” ဟုကြေညာလေသည်။ (ဗျာ. ၁၇:၅; ၁၈:၂) ဘုရားသခင်တည်ထောင်သည့် နိုင်ငံတစ်ခုသည် အခြားနိုင်ငံတို့ကို ဖြိုလှဲပြီး “အစဉ်အမြဲ” တည်မည်အကြောင်း ဒံယေလရူပါရုံကို သင် သတိရပါသလော။ ယင်းသည် ဗျာဒိတ်ကျမ်းပါ ဤကောင်းကင်ကြေညာချက်နှင့် မည်သို့သက်ဆိုင်နေသည်ကို သတိပြုကြည့်ပါ– “လောကီနိုင်ငံသည် ငါတို့အရှင်၏နိုင်ငံဖြစ်လေပြီ။ ထိုအရှင်၏ ခရစ်တော်နိုင်ငံဖြစ်လေပြီ။ သူသည်လည်း ကမ္ဘာအဆက်ဆက် စိုးစံတော်မူမည်။” (ဒံ. ၂:၄၄၊ ၄၅; ဗျာ. ၁၁:၁၅) ‘လူသားနှင့်တူသောသူတစ်ဦးသည် မိုးတိမ်ကိုစီးပြီး ကြွလာကာ ထာဝရအုပ်စိုးခြင်း အာဏာစက်၊ ဘုန်းတန်ခိုးနှင့် နိုင်ငံတော်ကိုရသည်’ ဟုဒံယေလရူပါရုံ ဖော်ပြသကဲ့သို့ ဗျာဒိတ်ကျမ်းကလည်း ယေရှုခရစ်ကို “လောကီဘုရင်တို့၏အထွတ်” အဖြစ်နှင့် “မိုးတိမ်နှင့်တကွကြွလာတော်မူသည်၊” “ရှိသမျှသောသူတို့သည် ကိုယ်တော်ကိုရှုမြင်ရကြလိမ့်မည်” ဟု ဖော်ပြထားသည်။ (ဒံ. ၇:၁၃၊ ၁၄; ဗျာ. ၁:၅၊ ၇) သတိမူရမည့် တူညီချက်အချို့ ရှိပေသေးသည်။ ဒံယေလရူပါရုံမှ သားရဲနှင့် ဗျာဒိတ်ကျမ်း၏ သားရဲတို့ ဖြစ်သည်။ (ဒံ. ၇:၁-၈; ဗျာ. ၁၃:၁-၃; ၁၇:၁၂) ဗျာဒိတ်ကျမ်းတွင် ယုံကြည်ခြင်းခိုင်မာစေသည့် လေ့လာမှုပြုလုပ်စရာ များစွာပါရှိလေသည်။

^၃၀ ဗျာဒိတ်ကျမ်းသည် ဘုရားသခင့်နိုင်ငံတော်အကြောင်း အံ့မခန်းဖွယ် လက္ခဏာရပ်များစွာပါဝင်သော ရူပါရုံဖြစ်သည်။ နိုင်ငံတော်နှင့်ပတ်သက်ပြီး ရှေးခေတ်ပရောဖက်များ၊ ခရစ်တော်နှင့် တပည့်များ ဖော်ပြခဲ့သည်များကို ထူးခြားကောင်းမွန်စွာ အာရုံပြုစေပါသည်။ နိုင်ငံတော်အားဖြင့် ယေဟောဝါ၏နာမတော် မည်သို့ရိုသေလေးမြတ်ခံရကြောင်း ကျွန်ုပ်တို့ အထင်းသား မြင်တွေ့ရသည်။ ‘အနန္တတန်ခိုးနှင့်ပြည့်စုံသော [ယေဟောဝါ] သည် သန့်ရှင်းတော်မူ၏။ သန့်ရှင်းတော်မူ၏။ သန့်ရှင်းတော်မူ၏။’ ကိုယ်တော်သည် “ဘုန်းအသရေတန်ခိုးတော်ကို ခံစားထိုက်တော်မူ၏။” အမှန်မှာ ကိုယ်တော်သည် ခရစ်တော်အားဖြင့် “မဟာတန်ခိုးတော်ကိုယူဆောင်၍ စိုးစံတော်မူ” သည်။ “ဘုရင်တို့၏ဘုရင်၊ သခင်တို့၏သခင်” ဖြစ်သော ဤတော်ဝင်သားတော်သည် တိုင်းနိုင်ငံတို့ကို ချေမှုန်းရာတွင်နှင့် “အနန္တတန်ခိုးနှင့်ပြည့်စုံတော်မူသော ဘုရားသခင်၏ ဒေါသအမျက်တော်၏ စပျစ်သီးနယ်ရာတန်ဆာ” ကိုဖိနင်းရာတွင် အလွန်စိတ်အားထက်သန်ကြောင်း ဖော်ပြထားသည်။ ယေဟောဝါအပေါ် သံသယကင်းရှင်းရေးဆိုင်ရာ သမ္မာကျမ်းစာ၏ ခမ်းနားထည်ဝါသော အဓိကအကြောင်းသည် အထွတ်အထိပ်အပိုင်းသို့ရောက်ချိန်တွင် နိုင်ငံတော်ရည်ရွယ်ချက်နှင့်ပတ်သက်သမျှ လူအားလုံးနှင့် အရာအားလုံး သန့်ရှင်းစင်ကြယ်ရမည်ဟု လေးလေးနက်နက် တင်ပြသည်။ “ဒါဝိဒ်မင်း၏ တံခါးသော့” ကိုရထားသော သိုးသငယ်ယေရှုခရစ်သည် သန့်ရှင်းသည်ဟု သတ်မှတ်ခံရသည်နည်းတူ ကောင်းကင်တမန်တို့လည်း သတ်မှတ်ခံရသည်။ ပထမထမြောက်ခြင်းကို ခံရသောသူတို့သည် “မင်္ဂလာရှိသောသူ၊ သန့်ရှင်းသောသူ” ဖြစ်ကြပြီး “ညစ်ညူးသောအရာ၊ စက်ဆုပ်ဖွယ်သောအရာ၊ သစ္စာပျက်သောအရာ တစ်စုံတစ်ခုမျှ” “သန့်ရှင်းသောယေရုရှလင်မြို့” ထဲသို့ မဝင်ရကြောင်းကိုလည်း အလေးပေးဖော်ပြထားသည်။ “အကျွန်ုပ်တို့၏ဘုရားသခင့်ရှေ့မှာ ရှင်ဘုရင်အရာ၌လည်းကောင်း၊ ယဇ်ပုရောဟိတ်အရာ၌လည်းကောင်း” ခန့်ထားခြင်းခံရရန် သိုးသငယ်၏အသွေးတော်နှင့် ဝယ်ယူခံရသူတို့သည် ယေဟောဝါရှေ့မှောက် သန့်ရှင်းမှုကိုဆက်ထိန်းသိမ်းရန် တန်ခိုးပါသောအားပေးမှု ခံရလေသည်။ ‘လူအုပ်ကြီး’ လည်း သန့်ရှင်းမြင့်မြတ်သောအမှုတော်ဆောင်ခြင်းတွင် ပါဝင်နိုင်ရန် “မိမိတို့ဝတ်လုံကို သိုးသငယ်၏အသွေး၌ လျှော်၍ဖြူစေ” ရမည်။—ဗျာ. ၄:၈၊ ၁၁; ၁၁:၁၇; ၁၉:၁၅၊ ၁၆; ၃:၇; ၁၄:၁၀; ၂၀:၆; ၂၁:၂၊ ၁၀၊ ၂၇; ၂၂:၁၉; ၅:၉၊ ၁၀; ၇:၉၊ ၁၄၊ ၁၅။

^၃၁ ကြီးကျယ်ခမ်းနား သန့်ရှင်းသော ဘုရားသခင့်နိုင်ငံတော်ဆိုင်ရာ ရူပါရုံကို ဗျာဒိတ်ကျမ်းတစ်စောင်တည်း၌သာ ဖော်ပြသည်။ ကြန်အင်လက္ခဏာအချို့အားဖြင့် ကျွန်ုပ်တို့စိတ်အမြင်ဝယ် ပီပီပြင်ပြင်ရှိလှပါသည်။ နိုင်ငံတော်အမွေခံတို့သည် သိုးသငယ်နှင့်အတူ ဇိအုန်တောင်တွင်ရပ်ကာ သူတို့သာ သီဆိုတတ်သောသီချင်းကို သီဆိုနေပုံဖြစ်သည့် အပြည့်အစုံပါသောရူပါရုံကို ကျွန်ုပ်တို့ရရှိထားသည်။ ဗျာဒိတ်ကျမ်းတစ်စောင်တည်းကသာ နိုင်ငံတော်သို့ဝင်ရန် မြေကြီးမှခေါ်ဆောင်ခံရသူ အရေအတွက် ၁၄၄,၀၀၀ ဖြစ်ကြောင်း၊ ပုံဆောင်ဣသရေလ ၁၂ နွယ်မှ ရွေးချယ်ကြောင်း ဖော်ပြသည်။ ဤ ‘ယဇ်ပုရောဟိတ်နှင့် ဘုရင်’ တို့သည် ခရစ်တော်နှင့်အတူ ပထမထမြောက်ခြင်းတွင်ပါဝင်ကာ “အနှစ်တစ်ထောင်ပတ်လုံး” ကိုယ်တော်နှင့်အတူ စိုးစံမည်ဖြစ်ကြောင်း ဖော်ပြသည့်ကျမ်းမှာလည်း ဗျာဒိတ်ကျမ်းတစ်စောင်တည်းသာဖြစ်သည်။ ယေဟောဝါနှင့် သိုးသငယ်သည် မြို့၏ဗိမာန်တော်ဖြစ်သည်၊ တံခါးနှင့် အုတ်မြစ် ၁၂ ခုရှိသည်၊ ယေဟောဝါ သက်ရောက်စေသော အလင်းတော်ဖြင့် အုပ်စိုးကြသော ရှင်ဘုရင်များ ထာဝရစိုးစံသည်၊ ဘုန်းရောင်ကွန့်မြူးသောမြို့ဖြစ်သည်စသဖြင့် “သန့်ရှင်းသောမြို့တည်းဟူသော ယေရုရှလင်မြို့သစ်” အကြောင်း ပြည့်ပြည့်စုံစုံ ဖော်ပြသောကျမ်းမှာလည်း ဗျာဒိတ်ကျမ်းတစ်စောင်တည်းသာဖြစ်ပါသည်။—၁၄:၁၊ ၃; ၇:၄-၈; ၂၀:၆; ၂၁:၂၊ ၁၀-၁၄၊ ၂၂; ၂၂:၅။

^၃၂ “ကောင်းကင်းသစ်” နှင့် “သန့်ရှင်းသောမြို့တည်းဟူသော ယေရုရှလင်မြို့သစ်” ရူပါရုံသည် နိုင်ငံတော်မျိုးနွယ်နှင့်ပတ်သက်ပြီး ရှေးအချိန်ကတည်းက ကြိုတင်ဖော်ပြခဲ့သော ကျမ်းချက်အားလုံးကို အကျဉ်းချုပ် တင်ပြခြင်းဖြစ်သည်ဟု မှန်ကန်စွာဆိုနိုင်ပါသည်။ ‘လူမျိုးအပေါင်းတို့ကို ကောင်းချီးမင်္ဂလာခံစားစေမည့်’ မျိုးနွယ်တော်နှင့် “ဘုရားသခင် တည်ထောင်ပြုစုတော်မူသော၊ ခိုင်ခံ့မြဲမြံသောမြို့” ကိုအာဗြဟံ မျှော်လင့်ခဲ့သည်။ ယခု ဗျာဒိတ်ကျမ်းရူပါရုံတွင် ဤကောင်းချီးမင်္ဂလာဖြစ်စေသောမြို့မှာ “ကောင်းကင်သစ်”—ယေရုရှလင်မြို့သစ် (ခရစ်တော်၏သတို့သမီး) နှင့် သတို့သားခရစ်တော်တို့ ဖြင့် ဖွဲ့စည်းထားသော အစိုးရသစ်ဖြစ်သည့် ဘုရားသခင့်နိုင်ငံတော်—ဖြစ်ကြောင်း ကျွန်ုပ်တို့ကို ရှင်းရှင်းလင်းလင်း ဖော်ပြပေသည်။ သူတို့သည် ဖြောင့်မတ်သောအစိုးရအနေဖြင့် မြေကြီးတစ်ပြင်လုံးအပေါ် စီမံအုပ်ချုပ်သွားမည်။ သစ္စာရှိလူသားတို့သည် “ကိုယ်တော်၏လူ” ဖြစ်လာကြမည်ဖြစ်ပြီး သူတို့သည် ဧဒင်ဥယျာဉ်တွင် လူသားတို့ မပုန်ကန်မီကကဲ့သို့ ပျော်ရွှင်သော၊ အပြစ်မဲ့သော၊ သေခြင်းကင်းသော အခြေအနေသို့ ပြန်ရောက်လာမည်ဖြစ်ကြောင်း ယေဟောဝါ ကတိပြုတော်မူသည်။ လေးလေးနက်နက်ပြောဆိုသည့်အနေနှင့် “ဘုရားသခင်သည် သူတို့၏မျက်စိ၌ မျက်ရည်ရှိသမျှတို့ကို သုတ်တော်မူမည်” ဟု ဗျာဒိတ်ကျမ်း၌ နှစ်ကြိမ်ဖော်ပြလေသည်။—က. ၁၂:၃; ၂၂:၁၅-၁၈; ဟေဗြဲ ၁၁:၁၀; ဗျာ. ၇:၁၇; ၂၁:၁-၄။

^၃၃ မှန်ပါသည်။ မှုတ်သွင်းခံကျမ်းစာ၏ ပနံရလှသည့် နိဂုံးပါတကား။ “ကာလမကြာမမြင့်မီ ဖြစ်ရမည့်အမှုအရာများ” သည် အံ့သြချီးမွမ်းဖွယ်ကောင်းလှပေသည်။ (ဗျာ. ၁:၁) “ပရောဖက်တို့၏ [အပြောအဆိုတို့] ကိုအစိုးရသော ထာဝရအရှင်ဘုရားသခင်၊” ယေဟောဝါ၏နာမတော်သည် ချီးမွမ်းသြဘာပေးခြင်းခံရသည်။ (၂၂:၆) ရာစုပေါင်း ၁၆ ခုအတွင်း ရေးခဲ့သော ပရောဖက်ပြုချက်တို့ ပြည့်စုံနေပုံ၊ နှစ်ထောင်ချီကာလအတွင်း ယုံကြည်ခြင်းလုပ်ရပ်တို့ ဆုချခံရပုံတို့ကို ဖော်ပြထားသည်။ “ရှေးမြွေဟောင်း” သေပြီ။ ၎င်း၏အပေါင်းပါတို့သည်လည်း သုတ်သင်ခံရပြီ။ ဆိုးယုတ်မှု ဆိတ်သုဉ်းပြီ။ (၁၂:၉) ဘုရားသခင့်နိုင်ငံတော်သည် “ကောင်းကင်သစ်” အဖြစ် အုပ်ချုပ်ကာ ကိုယ်တော့်ကို ချီးမွမ်းသြဘာပေးသည်။ ပြန်လည်တည်ထောင်ထားသည့် မြေကြီး၏ ကောင်းချီးမင်္ဂလာတို့သည် ကျမ်းစာ၏ပထမအခန်းကြီး၌ ဖော်ပြထားသည့် ယေဟောဝါ၏ရည်ရွယ်ချက်အတိုင်း ပြည့်စုံအောင်မြင်ပြီး လူသားတို့အဖို့ ထာဝရတည်တံ့ပနံရနေပေမည်။ (က. ၁:၂၈) “ကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍ . . . သြဝါဒပေးခြင်း၊ အပြစ်ကိုဖော်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်း ကျေးဇူးများကိုပြုတတ်” ကြောင်း သက်သေထူခဲ့ပြီ။ အရည်အချင်းပြည့်ဝ၍ အပြည့်အစုံပြင်ဆင်ပေးခြင်းခံရသော ယုံကြည်ခြင်းရှိသူတို့ကို ဤအံ့ဖွယ်နေ့ရက်ရောက်သည်အထိ ၎င်းအားဖြင့် ယေဟောဝါလမ်းညွှန်တော်မူခဲ့သည်။ ထို့ကြောင့် ယခု သင့်ယုံကြည်ခြင်းကို အားဖြည့်ရန် ဤကျမ်းစာတို့ကို လေ့လာရန်အချိန်တန်ပါပြီ။ ၎င်းပါ ပညတ်တို့ကို နာခံပါ။ ဘုရားသခင့်ကောင်းချီးရပါမည်။ ထာဝရအသက်သို့ပို့ဆောင်သော ၎င်း၏ဖြောင့်မတ်သောလမ်းကို လိုက်ပါ။ သို့ ပြုခြင်းဖြင့် သင်လည်း ကျမ်းစာနောက်ဆုံးစာစောင် နိဂုံးချုပ်သကဲ့သို့ “အာမင်၊ အရှင်ယေရှုကြွလာတော်မူပါ” ဟုဧကန်မုချ ကျိန်းသေပြောနိုင်ပေမည်။—၂ တိ. ၃:၁၆၊ ၁၇; ဗျာ. ၂၂:၂၀။

^၃၄ ‘အနန္တတန်ခိုးရှင် ယေဟောဝါဘုရားသခင်’ ၏ ပြိုင်ဘက်မရှိသောနာမတော်ကို ထာဝရချီးမြှောက်ခြင်းဖြစ်စေသည့် “ငါတို့အရှင်၏နိုင်ငံ၊” မျိုးနွယ်တော်ဖြစ်သော “ထိုအရှင်၏ခရစ်တော်နိုင်ငံ” ကို ချီးမွမ်းကြွေးကြော်ခြင်းဖြင့် ခိုင်းနှိုင်း၍မရသော ပျော်ရွှင်မှုကို ကျွန်ုပ်တို့ ယခု ခံစားနေရပါသည်။—ဗျာ. ၁၁:၁၅၊ ၁၇။

[အောက်ခြေမှတ်ချက်များ]