ယခုအသက်ရှင်ဆဲ သန်းပေါင်းများစွာကို အကျိုးပြုသည့် မင်္ဂလာပွဲ

“အနန္တတန်ခိုးနှင့်ပြည့်စုံတော်မူသော [ယေဟောဝါ] ငါတို့ဘုရားသခင်သည် စိုးစံတော်မူ၏။ . . . ဂုဏ်တော်ကိုချီးမွမ်းကြကုန်အံ့။ အကြောင်းမူကား၊ သိုးသငယ်၏မင်္ဂလာဆောင်ပွဲကို ခံချိန်ရှိပြီ။ သူ၏မိန်းမသည် ကိုယ်ကိုတန်ဆာဆင်ပြီ။”—ဗျာဒိတ် ၁၉:၅-၆၊ ၇။

၁။ ဗျာဒိတ် ၁၉:၆-၈ မှပရောဖက်ပြုချက်ဆိုင်ရာသီချင်း အဘယ်အချိန်၌စ၍သီဆိုမည်နည်း။ အဘယ်ကြောင့်နည်း။

ဘ ဝင်လှိုက်ဖို ရင်ခုန်ဖွယ် အထက်ပါစကားများသည် ပရောဖက်ပြုချက်ဆိုင်ရာ အောင်ပွဲခံသီချင်း၏တစ်စိတ်တစ်ဒေသဖြစ်သည်။ အဘယ်အချိန်တွင် စတင်သီဆိုမည်နည်း။ ယေဟောဝါကိုးကွယ်မှုကို နှစ်ပရိစ္ဆေဒကြာမြင့်စွာ အတိုက်အခံလုပ်လာသော ရန်သူကြီး ပျက်စီးပြီးနောက်၌ သီဆိုမည်ဖြစ်သည်။ ထိုရန်သူကြီးကား မှောက်မှားသောဘာသာအားလုံးကို ကိုယ်စားပြုသော အထိမ်းအမှတ် “ပြည့်တန်ဆာကြီး” တည်းဟူသော “မဟာဗာဗုလုန်” ပင်ဖြစ်သည်။ ဘုရားသခင်အကြောင်း လွဲမှားစွာတင်ပြခြင်းကြောင့် သူမအား စီရင်ချက်ချမှတ်ရမည်။ နိုင်ငံရေးတွင် ပါဝင်ခြင်း၊ ရုပ်ဝါဒမက်မောခြင်း၊ ယေဟောဝါ၏စစ်မှန်သော ကိုးကွယ်သူတို့ကို သတ်ဖြတ်မုန်းတီးခြင်းအားဖြင့် လူသားတို့ကို လှည့်ဖြားခဲ့ပြီတကား။—ဗျာဒိတ် ၁၇:၁-၆၊ ၁၈:၂၃၊ ၂၄၊ ၁၉:၁၊ ၂။ ယာကုပ် ၄:၄။

၂။ (က) မဟာဗာဗုလုန်ကိုယေဟောဝါအဘယ်သို့ ဖျက်ဆီးတော်မူမည်နည်း။ (ခ) မှောက်မှားသောဘာသာကိုဖျက်ဆီးသူတို့သည် ယေဟောဝါအားချီးမွမ်းကြမည့်အစား ဘာလုပ်ကြမည်နည်း။

^၂ များမကြာမီ ယေဟောဝါဘုရားသခင်သည် ကမ္ဘာ့နိုင်ငံရေးခေါင်းဆောင်တို့၏ နှလုံးထဲတွင် သူမကိုဖျက်ဆီးလိုသောစိတ် ထည့်သွင်းတော်မူလိမ့်မည်။ (ဗျာဒိတ် ၁၇:၁၂၊ ၁၆၊ ၁၇) သို့ရာတွင် မှောက်မှားသောဘာသာတရားကို ဖျက်ဆီးသူတို့သည် ထိုကြီးကျယ်ခမ်းနားသော အောင်ပွဲခံသီချင်းကို အတူသီဆိုကြမည်မဟုတ်။ ဂေါဂခေါ်စာတန်၏ ဩဇာအရှိန်အောက်တွင် သူတို့သည် ငြိမ်သက်စွာနေထိုင်၍ ဤလောက၏မကောင်းမှုများမှ တစ်သီးတစ်ခြားနေသည့် မှန်သောဘာသာကိုးကွယ်သူတို့ကို တိုက်ခိုက်လာကြမည်။—ဟေရှာယ ၂:၂-၄။ ယေဇကျေလ ၃၈:၂၊ ၈-၁၂။ ယောဟန် ၁၇:၁၄။ ယာကုပ် ၁:၂၇။

၃။ ယေဟောဝါ၏လူသားအစေခံများသည် အဘယ်အကြောင်းကြောင့် ကောင်းကင်ဆိုင်ရာသီချင်းသီဆိုရာတွင် ပါဝင်ကြမည်နည်း။

^၃ နိုင်ငံရေးခေါင်းဆောင်များ ယခုကဲ့သို့ဘုရားသခင်ကို မထီမဲ့မြင်ပြု၍ တိုက်ခိုက်လာခြင်းဖြင့် အာမဂေဒုန်စစ်ပွဲသို့ဦးတည်သွားပေမည်။ ၄င်းစစ်ပွဲသည် ဘာသာတရားဆန့်ကျင်တိုက်ခိုက်သောနိုင်ငံများကို ရှင်းရှင်းချေမှုန်းပစ်မည်။ ၄င်းနောက်စာတန်နှင့်နတ်ဆိုးတို့၏ ဩဇာအရှိန်အဝါဆိုးကို ကမ္ဘာမြေပေါ်မှပယ်ရှင်းလိမ့်မည်။ (ဗျာဒိတ် ၁၆:၁၄၊ ၁၆; ၁၉:၁၁-၂၁; ၂၀:၁၊ ၂) ထိုအခါကပ်ကျော်သူလူသားအပေါင်းတို့သည် ကျေးဇူးတော်ချီးမွမ်းခြင်းနှင့်ပြည့်လျှံသောနှလုံးသားဖြင့် အောက်ပါကောင်းကင်ဆိုင်ရာသံပြိုင်သီချင်းကို အတူသီဆိုကြလိမ့်မည်။ “ဟာလေလုယ၊ အနန္တတန်ခိုးနှင့်ပြည့်စုံတော်မူသော [ယေဟောဝါ] ငါတို့ဘုရားသခင်သည် စိုးစံတော်မူ၏။” (ဗျာဒိတ် ၁၉:၆) ကမ္ဘာကိုကိုင်လှုပ်သည့် ထိုအခြင်းအရာတို့သည် ခေတ်သစ်ကာလ၏အစကို အချက်ပြပေမည်။ ယေဟောဝါသည် မိမိ၏အချုပ်အခြာအာဏာကို မှန်ကန်ကြောင်းထင်ရှားစေပြီး မိမိ၏အုပ်ချုပ်ရေးကို အံတုသူအပေါင်းတို့ကိုလည်း မြေပြင်မှပယ်ရှားပြီးဖြစ်မည်။ နောက်ဆုံး၌ကောင်းကင်ဆိုင်ရာ ထိမ်းမြားပွဲကျရောက်ပေမည်။ ပရောဖက်ပြုချက်ဆိုင်ရာသီချင်း ဆက်လက်သီဆိုသည့်အတိုင်းပင်။ “ငါတို့သည်ဝမ်းမြောက်ရွှင်လန်းကြကုန်အံ့။ [ယေဟောဝါ] ဂုဏ်တော်ကို ချီးမွမ်းကြကုန်အံ့။ အကြောင်းမူကား၊ သိုးသငယ်၏မင်္ဂလာဆောင်ပွဲကို ခံချိန်ရှိပြီ။ သူ၏မိန်းမသည်ကိုယ်ကိုတန်ဆာဆင်ပြီ။”—ဗျာဒိတ် ၁၉:၇၊ ၈။

၄။ (က) သိုးသငယ်နှင့်သူ၏ “မိန်းမ” တို့သည်မည်သူတို့ကို အသီးသီးပုံဆောင်ကြသနည်း။ (ခ) ဤနေရာတွင်အဘယ်မေးခွန်းများထုတ်ထားသနည်း။ အဖြေများကိုအဘယ်သို့ရနိုင်သနည်း။

^၄ သိုးသငယ်မှာ ဂုဏ်ပြုခံရသော ယေရှုခရစ်ဖြစ်ပြီး သူ၏ “မိန်းမ” မှာ ၁၄၄၀၀၀ သောသစ္စာရှိနောက်လိုက်များ၏ စုံလင်သောအရေအတွက်ဖြစ်သည်။ ကောင်းကင်ဆိုင်ရာ ဤအိမ်ထောင်ဘက်တို့ ပေါင်းစည်းခြင်းဖြင့် ဘုရားသခင့်နိုင်ငံတော်အဖွဲ့ဝင် အပြည့်ဖြစ်လာသည်။ သူတို့သည် ရှင်ပြန်ထမြောက်လာသူများအပါအဝင် လူသားတို့ကို စုံလင်ခြင်းအဆင့်သို့ မြှင့်တင်ပေးကြမည်။ (ဗျာဒိတ် ၅:၈-၁၀၊ ၁၄:၁-၄၊ ၂၀:၄၊ ၁၂၊ ၁၃၊ ၂၁:၃-၅၊ ၉၊ ၁၀၊ ၂၂:၁-၃) အဆိုပါကောင်းချီးခံရသော ထိမ်းမြားပွဲသို့ ဦးတည်ပေးသည့် အခြင်းအရာများသည် ချောချောမောမော အထမြောက်မည်လော။ ထိုထိမ်းမြားပွဲမှ သင်မည်သို့ အကျိုးခံစားနိုင်မည်နည်း။ ဤမေးခွန်းများ၏ အဖြေရရှိရေးအတွက် ကမ္ဘာဦး အခန်းကြီး ၂၄ ၌မှတ်တမ်းတင်ထားသည့်၊ ဣဇာက်၏ထိမ်းမြားပွဲနှင့် ဆက်နွယ်နေသည့်အခြင်းအရာများကို ဆန်းစစ်ကြည့်ကြပါစို့။

ဣဇာက်အတွက် ဘုရားရွေးချယ်ပေးသော သတို့သမီး

၅၊ ၆။ ဣဇာက်ကိုခါနာန်အမျိုးသမီးနှင့်အိမ်ထောင်မချရန် အာဗြဟံအဘယ်ကြောင့်အခိုင်အမာ ပြောဆိုသနည်း။ ၄င်းသည်ယခုခေတ်မည်သူတို့အတွက် စံနမူနာကောင်းဖြစ်သနည်း။ (၁ ကောရိန္သု ၇:၃၉)

^၅ မှတ်တမ်းကအာဗြဟံသည် မိမိအိမ်အုပ်အား ညွှန်ကြားချက်ပေးခြင်းအကြောင်းနှင့် အစချီထားသည်။ ထိုအိမ်အုပ်မှာ ဧလျာဇာဖြစ်ကြောင်းထင်ရှားသည်။ (ကမ္ဘာဦး ၁၅:၂။ ၂၄:၂) အာဗြဟံက “ငါနေသောခါနာန်အမျိုးသမီးတို့တွင် ငါ့သားဖို့မယားကိုမရွေးမယူဘဲ၊ ငါ့ပြည်ငါ့အမျိုးသားချင်းတို့ထံသို့သွား၍ ငါ့သားဣဇာက်အဖို့ မယားကိုယူရမည်ဟု [ယေဟောဝါ] ကိုတိုင်တည်၍ ငါကျိန်ဆိုစေပါမည်” ဟုဆို၏။—ကမ္ဘာဦး ၂၄:၃၊ ၄။

^၆ သားဖြစ်သူအား ခါနာန်အမျိုးသမီးနှင့် အိမ်ထောင်မပြုရန် အာဗြဟံအဘယ်ကြောင့် ဤမျှအခိုင်အမာ ပြောဆိုနေသနည်း။ အကြောင်းမှာ၊ ခါနာန်လူမျိုးသည် နောဧ၏ကျိန်ခြင်းခံရသော ခါနာန်မှဆင်းသက်သူများဖြစ်၍တည်း။ (ကမ္ဘာဦး ၉:၂၅) ထိုမျှမက ခါနာန်လူမျိုးသည် အကျင့်ဓလေ့ဘက်တွင်ယုတ်ညံ့ကြောင်းကျော်ကြားကြသည်။ အရေးကြီးဆုံးအချက်မှာယေဟောဝါကိုသူတို့ မကိုးကွယ်ခြင်းဖြစ်သည်။ (ကမ္ဘာဦး ၁၃:၁၃။ ဝတ်ပြုရာ ၁၈:၃၊ ၁၇-၂၈) အာဗြဟံအနေဖြင့် နောဧ၏ကောင်းချီးပေးခံရသော ရှေမ၏သားမြေးဖြစ်သော မိမိ၏အမျိုးထဲမှ တစ်ယောက်ယောက်နှင့်သာ ပေးစားလိုမည်မှာရှင်းပါသည်။ (ကမ္ဘာဦး ၉:၂၆) ယနေ့အိမ်ထောင်ပြုရန်ရွေးချယ်သူ ခရစ်ယာန်များအတွက် ကောင်းမြတ်လှသော စံနမူနာကောင်းပါတကား။—တရားဟောရာ ၇:၃၊ ၄။

၇။ အာဗြဟံသည်ဧလျာဇာထမ်းဆောင်ရမည့်တာဝန်အတွက် အဘယ်သို့ပြင်ဆင်သနည်း။

^၇ သို့နှင့် ဧလျာဇာသည် မိုင် ၅၀၀ ကျော်ဝေးသော မက်ဆိုပိုတေးမီးယားတိုင်းသို့ ခရီးစတင်ထွက်ခွါလေသည်။ သူသည်လက်ဆောင်အပြည့်တင်ဆောင်ထားသည့် ကုလားအုပ်ဆယ်ကောင်နှင့်အတူ ကောင်းစွာပြင်ဆင်၍ ထွက်သွားသည်။ (ကမ္ဘာဦး ၂၄:၁၀) ၄င်းပြင်သူ့သခင်၏ အောက်ပါယုံကြည်ခြင်း အားတက်ဖွယ်စကားများကိုလည်း သူပြန်ပြောင်းဆင်ခြင်နိုင်ပေမည်။ “ကောင်းကင်ဘုံရှင်ဘုရားသခင် [ယေဟောဝါ] သည်. . .မိမိကောင်းကင်တမန်ကို သင့်ရှေ့၌စေလွှတ်သဖြင့် သင်သည်ထိုပြည်မှငါ့သားဖို့ မယားကိုယူရလိမ့်မည်။”—ကမ္ဘာဦး ၂၄:၇။

၈၊ ၉။ (က) နာခေါ်မြို့သို့ဧလျာဇာရောက်သောအခါ ဘာဖြစ်ပျက်သနည်း။ (ခ) သင့်တော်လိုက်ဖက်သောသတို့သမီးတစ်ဦးကို အဘယ်စမ်းသပ်ချက်ဖြင့်ရွေးချယ်သနည်း။

^၈ နောက်ဆုံး၌ မက်ဆိုပိုတေးမီးယားမြောက်ပိုင်းရှိ နာခေါ်မြို့သို့ရောက်လေ၏။ ဧလျာဇာသည် မြို့ပြင်ရှိရေတွင်းနားမှာ ခရီးပန်းလာသောကုလားအုပ်များကိုဝပ်၍ အနားယူစေသည်။ မိန်းမများ ရေခပ်လာချိန်ဖြစ်သည်။ သတို့သမီးလောင်းကို ရှာယူရန် ဧလျာဇာအဖို့ အထူးသင့်လျော်သော အချိန်အခါဖြစ်ပေသည်။ မည်သို့သောအမျိုးသမီးဖြစ်ရမည်နည်း။ အလှဆုံးလော။ မဟုတ်ပါ။ ဧလျာဇာ အဓိက စိတ်ဝင်စားသော အမျိုးသမီးမှာ ဘုရားရေးရာ ပင်ကိုယ်စရိုက်ရှိသော အမျိုးသမီးဖြစ်သည်။ ယုံကြည်ခြင်းနှင့်နှိမ့်ချစွာ သူဆုတောင်းရာ၌ ဤအချက်ပေါ်လွင်နေသည်။ “အကျွန်ုပ်၏သခင်၊ အာဗြဟံ၏ဘုရား [ယေဟောဝါ] ယနေ့အကျွန်ုပ်အကြံကို ထမြောက်စေ၍ အကျွန်ုပ်၏သခင်အာဗြဟံ၌ ကျေးဇူးပြုတော်မူပါဟု အကျွန်ုပ်ဆုတောင်းပါ၏။ အကျွန်ုပ်သည် ဤရေတွင်းနားမှာရပ်နေ၍ ထိုမြို့သူသတို့သမီးတို့သည် ရေခပ်ခြင်းငှာလာကြသည်တွင် အကြင်သတို့သမီးကို ‘ကျွန်ုပ်သောက်ခြင်းငှာ သင်၏ရေဘူးကိုချပါ’ ဟုဆိုသော် ‘သောက်ပါ၊ သင်၏ကုလားအုပ်တို့ကိုလည်းရေတိုက်ပါမည်’ ဟုပြန်ဆိုသောသတို့သမီးသည် ကိုယ်တော်၏ကျွန်ဣဇာက်ဖို့ ခန့်ထားတော်မူသောသူ ဖြစ်ပါစေသော။ ထိုသို့အားဖြင့် အကျွန်ုပ်၏သခင်၌ ကျေးဇူးပြုတော်မူကြောင်းကို အကျွန်ုပ်သိရပါမည်။”—ကမ္ဘာဦး ၂၄:၁၁-၁၄။

^၉ အထူးသင့်လျော်သော စမ်းသပ်ချက်တစ်ရပ် ဖြစ်ပေသည်။ The New Encyclopedia Britannica အရ အလွန်ရေငတ်နေသော ကုလားအုပ်တစ်ကောင်သည် ‘ဆယ်မိနစ်အတွင်း ရေ ၂၅ ဂါလံ’ သောက်နိုင်သည်။ အာဗြဟံ၏ကုလားအုပ်များသည် ထိုမျှရေငတ်ချင်မှငတ်မည်။ သို့တစေ ထိုခေတ်ကအမျိုးသမီးများသည် ကုလားအုပ်၏ရေသောက်နှုန်းကို မုချသိကြသည်။ သူစိမ်းတစ်ဦး၏ မောပန်းနေသောကုလားအုပ် ဆယ်ကောင်အတွက် စေတနာအလျောက်ရေခပ်တိုက်သည်မှာ အထူးပင်ကြင်နာ၍ ကိုယ်ကျိုးမရှာသော လုံ့လဝီရိယရှိသည့်အမျိုးသမီးတစ်ဦး ဖြစ်ရပေမည်။

၁၀၊ ၁၁။(က) ဧလျာဇာ၏တောင်းလျှောက်ချက် အဘယ်ထူးခြားသောနည်းဖြင့် ပြည့်စုံခဲ့သနည်း။ (ခ) နှစ်သက်ဖွယ်ကောင်းသောအရည်အချင်းများကို ရေဗက္ကအဘယ်သို့ပြသနည်း။ (ဂ) ဧလျာဇာအဘယ်သို့တုံ့ပြန်သနည်း။

^၁၀ ဧလျာဇာ ဆုတောင်း၍ပင် မပြီးခင်တွင် သူ့ဆုတောင်းချက်ပြည့်လာသည်။ မှတ်တမ်း၌ဖော်ပြသည့်အတိုင်းပင်။ “ရေဗက္ကသည်ရေဘူးကိုထမ်းလျက် ထွက်လာသည် . . . ထိုသတို့သမီးသည် အလွန်အဆင်းလှ၍ ယောက်ျားနှင့်မဆက်ဆံသေးသောကညာဖြစ်၏။ ရေတွင်းသို့ဆင်း၍ ရေဘူးကိုရေနှင့်ဖြည့်ပြီးမှ တက်လာ၏။ ကျွန်သည်လည်း ထိုမိန်းမနှင့်တွေ့ခြင်းငှာပြေး၍ ‘သင်၏ရေဘူး၌ ရေအနည်းငယ်ကို သောက်ပါရစေ’ ဟုဆိုသော် မိန်းမက ‘သောက်ပါလော့အရှင်’ ဟုဆိုသဖြင့် မိမိလက်ပေါ်မှရေဘူးကို အလျင်အမြန်ချ၍ ရေကိုပေးလေ၏။ ရေကိုပေးပြီးလျှင် ‘သင်၏ကုလားအုပ်တို့သည်လည်း ဝစွာသောက်စရာဖို့ ရေခပ်ပါမည်’ ဟုဆိုသည့်အတိုင်း အလျင်အမြန် ဘူး၌ရှိသောရေကို ရေတိုက်ခွက်ထဲလောင်းပြီးလျှင် တစ်ဖန်ခပ်ခြင်းငှာရေတွင်းသို့ပြေး၍ ကုလားအုပ်အဖို့ ရေခပ်လေ၏။”—ကမ္ဘာဦး ၂၄:၁၅-၂၀။

^၁၁ ဧလျာဇာသည် သူ၏တောင်းလျှောက်ချက်များ ယခုကဲ့သို့အံ့ဖွယ် ပြည့်စုံလာသည်ကို ‘အံ့သြစွာစေ့စေ့ကြည့်’ လျက်နေ၏။ ချီးကျူးထိုက်သော ထိုအပျိုကညာ ရေတိုက်ပြီးသော် သူသည်ရွှေနှာဆွဲနှင့် ရွှေလက်ကောက်တစ်ရံ ချီးမြှင့်၍ “သင်သည်အဘယ်သူ၏သမီးဖြစ်သနည်း” ဟုမေးလေ၏။ ကလေးမသည် အာဗြဟံ၏မြေးဖြစ်ကြောင်း သိရသောအခါ ဧလျာဇာသည် ပျပ်ဝပ်၍ ယေဟောဝါအား ကိုးကွယ်လျက် “ကရုဏာ၊ သစ္စာတော်ကို အကျွန်ုပ်သခင်မှ ရုပ်သိမ်းတော်မမူသော၊ အကျွန်ုပ်သခင် အာဗြဟံ၏ဘုရား [ယေဟောဝါ] သည်မင်္ဂလာရှိစေသတည်း။ လမ်းမှာသွားလျက်ရှိသော ကျွန်ုပ်ကို [ယေဟောဝါ] သည်အကျွန်ုပ်သခင်၏ ညီအစ်ကိုတို့အိမ်သို့ ပို့ဆောင်တော်မူပါသည်တကား” ဟုမြွက်ဆို၏။—ကမ္ဘာဦး ၂၄:၂၁-၂၇။

၁၂။ ရေဗက္က၏အိမ်တွင်မင်္ဂလာကိစ္စ မည်သို့ပြီးမြောက်သွားသနည်း။

^၁၂ ရေဗက္ကသည်လည်း ဤအကြောင်းများကို မိသားစုအားပြောကြားရန် အိမ်သို့ စိတ်လှုပ်ရှားလျက် ပြေးသွားလေ၏။ နောက်ပိုင်းတွင် ရေဗက္က၏ဖခင်နှင့်မောင်ဖြစ်သူတို့က ဧလျာဇာ၏ နှုတ်မှသူ၏လာရင်း ရည်ရွယ်ချက်နှင့် သူ့ဆုတောင်းချက်ကို ယေဟောဝါအဘယ်သို့ပြည့်စုံစေခဲ့ပုံကို ကြားရသောအခါ ရေဗက္ကသည် ဣဇာက်၏မိန်းမဖြစ်သင့်သည်ဟု မဆိုင်းမတွပင် သဘောတူကြသည်။ “ထိုစကားကိုကြားလျှင် အာဗြဟံကျွန်သည် ဦးညွှတ်၍ [ယေဟောဝါ] ဘုရားကို ကိုးကွယ်ပြီးမှ ငွေဖလား၊ ရွှေဖလား၊ အဝတ်တန်ဆာများကို ထုတ်၍ရေဗက္ကအား ပေး၏။ သူ၏အမိ၊ မောင်တို့အားလည်း အဖိုးထိုက်သော လက်ဆောင်ကိုပေး၏။”—ကမ္ဘာဦး ၂၄:၅၂၊ ၅၃။

သတို့သမီးနှင့် အခြွေအရံတို့၏ တုံ့ပြန်ပုံ

၁၃။ ယေဟောဝါရွေးချယ်ရာသည် မှန်ကန်သောရွေးချယ်မှုဖြစ်ကြောင်း မည်သို့ခိုင်လုံသွားသနည်း။

^၁၃ ရေဗက္ကအနေဖြင့် ဣဇာက်၏သတို့သမီးအဖြစ် ဘုရားရွေးချယ်ခံရခြင်း အခွင့်အရေးကို မည်သို့သဘောထားသနည်း။ နောက်တစ်နေ့တွင် သူမ၏အတွင်းစိတ်သန္တာန်၌ရှိသော ခံစားချက်သဘောအမှန်ကို ဖေါ်ထုတ်ခွင့်ရသည့် အဖြစ်အပျက်တစ်ခု ဖြစ်ပျက်လာသည်။ ဧလျာဇာ လာရင်းရည်ရွယ်ချက် အောင်မြင်ပြီးစီးပြီဖြစ်၍ မိမိသခင်ထံ အမြန်ဆုံးပြန်သွားလိုသည်။ သို့သော်လည်း ရေဗက္က၏မိသားစုက သတို့သမီးကို အနည်းဆုံးဆယ်ရက်နေစေလိုသည်။ ထို့ကြောင့်ချက်ချင်းလိုက်သွားရန် အဆင်သင့်ရှိမရှိ ရေဗက္ကဆုံးဖြတ်စရာဖြစ်လာသည်။ “ကျွန်ုပ်လိုက်ပါမည်” ဟုသူမဆို၏။ မိသားစုနှင့် ရုတ်တရက်ခွဲခွာ၍ တစ်ခါမျှမတွေ့ဖူးသည့် လူတစ်ယောက်နှင့်အိမ်ထောင်ပြုခြင်းငှာ ဝေးလံသောတိုင်းပြည်သို့ ခရီးသွားရန်သဘောတူခြင်းမှာ ယေဟောဝါ၏ညွှန်ကြားချက်ကို ယုံကြည်ကြောင်းပြသသည့် ထင်ရှားသော သာဓကပင်ဖြစ်ပေသည်။ သူမသည် မှန်ကန်စွာ ရွေးချယ်ခံရသူဖြစ်ကြောင်း ပို၍ခိုင်လုံစေသည်။—ကမ္ဘာဦး ၂၄:၅၄-၅၈။

၁၄။ (က) ရေဗက္ကနှင့်မည်သူတို့ လိုက်ပါကြသနည်း။ (ခ) အဘယ်သို့သောခရီးကိုသူတို့ ဖြတ်သန်းကြရသနည်း။

^၁၄ ရေဗက္ကနှင့်အတူ ခရီးဖေါ်များလိုက်လါကြသည်။ မှတ်တမ်း၌ရှင်းပြသည့်အတိုင်း “ရေဗက္ကနှင့် သူ၏မိန်းမငယ်တို့သည်ထ၍ ကုလားအုပ်ကိုစီးလျက် ထိုယောက်ျားနှင့်အတူလိုက်ကြ၏။” (ကမ္ဘာဦး ၂၄:၆၁) ဤသို့ဖြင့် ကုလားအုပ်တန်းသည် တိုင်းတစ်ပါးနယ်မြေကို ဖြတ်သန်း၍ မိုင် ၅၀၀ ကျော်ရှည်လျားသည့် အန္တရာယ်ထူပြောသောခရီးကို စတင်ထွက်ခွာကြသည်။ “ဝန်တင်ကုလားအုပ်များ၏ ပျမ်းမျှခရီးသွားနှုန်းမှာတစ်နာရီလျှင် ၂.၅ မိုင်နှုန်းခန့်ဖြစ်သည်” ဟု The Living World of Animals စာအုပ်၌ဖော်ပြထားသည်။ အကယ်၍အာဗြဟံ၏ကုလားအုပ်တို့သည် ထိုနှုန်းအတိုင်းတစ်နေ့လျှင် ရှစ်နာရီခရီးသွားသော် နေဂပ်ခရိုင်တွင်ရှိသောသူတို့၏ ခရီးလမ်းဆုံးသို့ရောက်ရှိရန် ၂၅ ရက်ကြာပေလိမ့်မည်။

၁၅။ (က) ဧလျာဇာ၊ ရေဗက္ကနှင့်သူမ၏အခြွေအရံတို့၌ အဘယ်စံနမူနာကောင်းကိုတွေ့ရသနည်း။ (ခ) ၄င်းမှတ်တမ်းကအဘယ်အရာကို ကြိုတင်၍ညွှန်ပြသနည်း။

^၁၅ ဧလျာဇာမှစ၍ ရေဗက္ကနှင့် သူ၏အခြွေအရံတို့သည် ယေဟောဝါ၏ညွှန်ကြားမှုကို အပြည့်အဝ ယုံကြည်စိတ်ချကြသည်။ ယင်းသည် ယနေ့ခရစ်ယာန်များအဖို့ စံနမူနာကောင်းဖြစ်ပေသည်။ (သု၊ ၃:၅၊ ၆) ထိုမျှမက ယင်းမှတ်တမ်းသည် ယုံကြည်ခြင်းအားတက်ဖွယ် ပရောဖက်ပြုချက်ဆိုင်ရာ ပြဇာတ်တစ်ခုဖြစ်ပေသည်။ ကျွန်ုပ်တို့တွေ့မြင်ခဲ့သည့်အတိုင်း အာဗြဟံသည် ယေဟောဝါဘုရားသခင်ကို ပုံဆောင်ကြောင်း၊ ကိုယ်တော်သည်အပြစ်သားများ ထာဝရအသက်ရရှိရေးအတွက် သာ၍ကြီးမြတ်သော ဣဇာက်တည်းဟူသော ချစ်လှစွာသောသားတော်ကို ပူဇော်တော်မူ၏။ (ယောဟန် ၃:၁၆) ယဇ်ပလ္လင်မှ ဣဇာက်အသက်ချမ်းသာရာရ၍ အချိန်အတန်ကြာပြီးနောက်၌ သူ့အတွက် ထိမ်းမြားမင်္ဂလာကိစ္စကို ပြင်ဆင်ခဲ့သည်။ ယင်းသည် ယေရှုရှင်ပြန်ထမြောက်ပြီးနောက် စတင်ပြင်ဆင်လာသည့် ကောင်းကင်ဆိုင်ရာမင်္ဂလာပွဲအတွက် စီစဉ်ခြင်းနှင့်ဆိုင်သော ပရောဖက်ပြုချက်ဖြစ်သည်။

သာ၍ကြီးမြတ်သော ဣဇာက်၏မင်္ဂလာပွဲ

၁၆။ (က) အာဗြဟံ၏အစေခံသည် ဘုရားသခင်၏သန့်ရှင်းသောဝိညာဉ်တော်ကို အဘယ်သို့လျောက်ပတ်စွာပုံဆောင်သနည်း။ (ခ) ဝိညာဉ်တော်နှင့်သတို့သမီးတို့နှင့်ပတ်သက်၍ အဘယ်မေးခွန်းမေးနိုင်သနည်း။

^၁၆ ဧလျာဇာ၏အမည်မှာ “ငါ၏ဘုရားသခင်သည် မ-စသောအရှင်ဖြစ်၏” ဟုအဓိပ္ပာယ်ရှိသည်။ သူသည်နာမည်နှင့်အပြုအမူအားဖြင့် သာ၍ကြီးမြတ်သော အာဗြဟံတည်းဟူသော ယေဟောဝါဘုရားသခင်၏ သန့်ရှင်းသောဝိညာဉ်တော်ကို ပုံဆောင်သည်။ ဝေးလံသောတိုင်းပြည်ဖြစ်သော ကျွန်ုပ်တို့၏ ဤကမ္ဘာမြေကြီးသို့ ယင်းကိုစေလွှတ်၍ သာ၍ကြီးမြတ်သော ဣဇာက်တည်းဟူသော ယေရှုခရစ်အတွက်လိုက်ဖက်သော သတို့သမီးတစ်ဦးကို ရွေးချယ်စေ၏။ (ယောဟန် ၁၄:၂၆။ ၁၅:၂၆) သတို့သမီးအတန်းအစားမှာ ဘုရားသခင်၏ဝိညာဏသားများအဖြစ် သန့်ရှင်းသောဝိညာဉ်တော်အားဖြင့် မွေးဖွားခြင်းခံရသော ယေရှု၏တပည့်တော်များဖြင့် ဖွဲ့စည်းထားသည့် “အသင်းတော်” ဖြစ်သည်။ (ဧဖက် ၅:၂၅-၂၇။ ရောမ ၈:၁၅-၁၇) ရေဗက္ကသည်အဖိုးတန်လက်ဆောင်များ ရရှိသကဲ့သို့ ခရစ်ယာန်အသင်းတော်၏ ကနဦးအဖွဲ့ဝင်တို့သည် စီအီး ၃၃ ခုနှစ်၊ ပင်တေကုတ္တေပွဲနေ့တွင် ခေါ်တော်မူခြင်းခံရသည့် သက်သေသာဓကအဖြစ် အံ့ဖွယ်ဆုကျေးဇူးတော်ကို ရရှိခဲ့ကြသည်။ (တမန်တော် ၂:၁-၄) ရေဗက္ကနည်းတူသူတို့သည် နောက်ဆုံးတစ်နေ့တွင် ကောင်းကင်သတို့သားနှင့်ပေါင်းစည်းခြင်းငှာ လောကနှင့်လူဇာတိဆိုင်ရာ အဆက်အသွယ်မှန်သမျှကို စိတ်လိုကိုယ်လျောက် စွန့်လွှတ်ကြသည်။ သတို့သမီးအတန်းအစားဝင် တစ်ဦးချင်းအနေနှင့် ခေါ်တော်မူခြင်းခံရသော အချိန်မှစ၍ သေဆုံးသည့်အချိန်တိုင်အောင် စာတန်၏အန္တရာယ်ထူပြော၍ သွေးဆောင်မှုများပြားသော ဤလောကကြီးကိုဖြတ်သန်း၍ ခရီးသွားနေစဉ်တွင် မိမိတို့၏ဝိညာဏဖြူစင်ခြင်းကို မစွန်းထင်းစေရအောင် ကာကွယ်စောင့်ရှောက်ကြရပေမည်။ (ယောဟန် ၁၅:၁၈၊ ၁၉။ ၂ ကောရိန္သု ၁၁:၃။ ယာကုပ် ၄:၄) သတို့သမီးအတန်းအစားသည် သန့်ရှင်းသောဝိညာဉ်တော်နှင့်ပြည့်ဝလျက် ယေဟောဝါ၏ကယ်တင်ခြင်း အစီအစဉ်ကို ခံစားကြရန် အခြားသူတို့ကို သစ္စာရှိစွာခေါ်ဖိတ်နေကြသည်။ (ဗျာဒိတ် ၂၂:၁၇) သင်သည်ဝိညာဉ်တော်၏ညွှန်ကြားမှုကို လက်ခံခြင်းအားဖြင့် သူ၏စံနမူနာကို လိုက်နာပါသလော။

၁၇။ (က) ကုလားအုပ်ဆယ်ကောင် ဘာကိုပုံဆောင်သနည်း။ (ခ) သမ္မာကျမ်းစာနှင့်သတို့သမီးအတန်းအစား ပြင်ဆင်ပေးသည့် သမ္မာကျမ်းစာအခြေပြုစာပေများအပေါ် ကျွန်ုပ်တို့၏သဘောထား အဘယ်သို့ဖြစ်သင့်သနည်း။ (တမန်တော် ၁၇:၁၁)

^၁၇ သတို့သမီးအတန်းအစားသည် ကုလားအုပ်ဆယ်ကောင်ပုံဆောင်ရာကို အထူးတန်ဖိုးထားကြသည်။ သမ္မာကျမ်းစာတွင်တစ်ဆယ်ဂဏန်းမှာ မြေကြီးပေါ်ရှိအရာများနှင့် စပ်လျဉ်းသောစုံလင်ခြင်း၊ ပြည့်စုံခြင်းကို ရည်ညွှန်းသည်။ ကုလားအုပ်ဆယ်ကောင်သည် ဘုရားသခင်၏စုံလင်ပြည့်ဝသော နှုတ်ကပတ်တော်နှင့် ခိုင်းနှိုင်း၍ရနိုင်ဖွယ်ရှိသည်။ ယင်းမှတစ်ဆင့် သတို့သမီးအတန်းအစားသည် ဝိညာဏအစာနှင့် ဝိညာဏဆုကျေးဇူးများကို ရရှိကြသည်။ (ယောဟန် ၁၇:၁၇။ ဧဖက် ၁:၁၃၊ ၁၄။ ၁ ယောဟန် ၂:၅) ကုလားအုပ်တို့ကို ရေဗက္ကရေတိုက်ခြင်းအကြောင်းရှင်းပြရာတွင် ၁၉၄၈ ခုနိုဝင်ဘာလ ၁ရက်ထုတ် ကင်းမျှော်စင် ၌ သတို့သမီးအတန်းအစားအကြောင်း ဤသို့ဆိုထားသည်။ “သူတို့သည် ဘုရားဝိညာဉ်တော်များစွာရရှိစေသော ကိုယ်တော်၏နှုတ်ကပတ်တော်ကို မေတ္တာဖြင့်သုံးသပ်ကြသည်။ သူတို့သည်နှုတ်ကပတ်တော်ကို စိတ်ဝင်စား၍ အာရုံစူးစိုက်ခြင်း၊ ယင်း၌ပါရှိသောသတင်းတရားနှင့် ရည်ရွယ်ချက်အတွက် စိတ်ရင်းမှန်ဖြင့်ကြောင့်ကြခြင်း၊ ယုံကြည်ခြင်းအားဖြင့် ယင်း၏အကျိုးကိုဆောင်ကာ ယင်းကိုပြန်လည်လန်းဆန်းစေကြသည်။” ဤအတွက် သာဓကတစ်ရပ်အဖြစ် သတို့သမီးအတန်းအစားမှ အကြွင်းအကျန်တို့သည် သစ်လွင်၍ခေတ်မှီသော New World Translation of the Holy Scriptures ကိုလူသန်းပေါင်းလက်ဝယ်ရောက်ရှိအောင် မေတ္တာရှေ့ထား၍ ဆောင်ရွက်ခဲ့ကြသည်။ သင့်ဘာသာစကားဖြင့် ဤဘာသာပြန်ကျမ်းကို ရနိုင်သည်ဖြစ်စေ မရနိုင်သည်ဖြစ်စေ သင်သည်သတို့သမီးအတန်းအစားပြင်ဆင်ပေးသည့် လေ့လာမှုအထောက်အကူများကိုအသုံးပြု၍ သမ္မာကျမ်းစာကို မှန်မှန်ဆန်းစစ်ပါသလော။—၂ တိမောသေ ၃:၁၆။

သိုးသငယ်၏ မင်္ဂလာဆောင်ပွဲနီးပြီ

၁၈။ ရေဗက္က၏အခြွေအရံတို့သည် ယခုခေတ်သတို့သမီး၏အပေါင်းအဖေါ်များကို အဘယ်ကြောင့်လျောက်ပတ်စွာ ပုံဆောင်သနည်း။

^၁၈ စာတန့်လောကကြီး၏ ဤနောက်ဆုံးနေ့ရက်များအတွင်း သတို့သမီးအတန်းအစားမှ အကြွင်းအကျန်တို့နှင့်အတူ ရေဗက္က “အခြွေအရံများ” နှင့်တူသော “လူအုပ်ကြီး” ပူးပေါင်းလာခဲ့ကြသည်။ ရေဗက္ကကိစ္စကဲ့သို့ပင် ဤသူတို့သည်အရေအတွက် အပြည့်အစုံပါဝင်သော ၁၄၄၀၀၀ သတို့သမီးအတန်းအစားထက် အရေအတွက်သာလွန်သည်။ သူတို့သည်ယေရှုခရစ်၏ “အခြားသိုးများ” မှ “လူအုပ်ကြီး” ဖြစ်သည်။ (ဗျာဒိတ်၇:၄၊ ၉။ ယောဟန် ၁၀:၁၆) သတို့သမီး၏အခြွေအရံများအနေနှင့် သူတို့သည်စာတန်၏ ဆိုးယုတ်သောလောကကြောင့် မညစ်ညူးရအောင် အစဉ်စောင့်ထိန်းကြရပေမည်။ သူတို့သည် သတို့သမီးအတန်းအစား ရှင်းပြသည့်အတိုင်း ယေဟောဝါ၏ဝိညာဉ်တော်နှင့် နှုတ်ကပတ်တော်ဦးဆောင်မှုကိုလည်း လိုက်နာကြရမည်။ သို့ရာတွင် သူတို့ရရှိမည့်ဆုလာဘ်ကား နောက်တစ်မျိုးဖြစ်သည်။ အကယ်၍ ခရစ်တော်၏သတို့သမီးကို သစ္စာရှိရှိထောက်ခံရာတွင် ခံနိုင်ရည်ရှိကြပါက သူတို့သည် စာတန့်လောက၏အဆုံးကိုကပ်ကျော်၍ မြေကြီးပရဒိသုတွင် ထာဝရအသက်ရှင်ခြင်း အံ့ချီးဖွယ်အခွင့်အရေး ရရှိကြပေမည်။—ဗျာဒိတ် ၂၁:၃၊ ၄။

၁၉။ ရေဗက္ကနှင့်သူမ၏အခြွေအရံတို့ ခရီးလမ်းဆုံးသို့ရောက်သောအခါ ဘာဖြစ်ပျက်သနည်း။

^၁၉ ရေဗက္ကနှင့်သူမ၏ “အခြွေအရံ” တို့သည်သူတို့၏ပန်းတိုင်သို့ အောင်မြင်စွာအရောက် လှမ်းနိုင်ကြသလော။ ရောက်ပါသည်။ သမ္မာကျမ်းစာမှတ်တမ်းဆိုသည့်အတိုင်းပင်။ ဣဇာက်သည် “ညဦးအချိန်၌ ဆင်ခြင်လိုသောငှာ တောအရပ်သို့ထွက်သွား၍ မျှော်ကြည့်လျှင် ကုလားအုပ်များလာသည်ကို မြင်လေ၏။ ရေဗက္ကသည်လည်း မျှော်ကြည့်၍ ဣဇာက်ကိုမြင်သောအခါ ကုလားအုပ်ပေါ်မှဆင်း” လေ၏။ ဧလျာဇာက သူ့အလုပ်တာဝန်အောင်မြင်ပြီးစီးကြောင်း ရှင်းပြပြီးနောက် ဣဇာက်သည် ရေဗက္ကကိုမယားအဖြစ် သိမ်းပိုက်၍ “စုံဖက်လေ၏။”—ကမ္ဘာဦး ၂၄:၆၃-၆၇။

၂၀။ ဣဇာက်၏မင်္ဂလာဆောင်ပွဲသည် အဘယ်ဝမ်းမြောက်ရွှင်လန်းဖွယ်အခါသမယကို ကြိုတင်ညွှန်ပြသနည်း။

^၂၀ ထိုနည်းတူ ခရစ်တော်၏သတို့သမီးနှင့်စပ်လျဉ်းသော ယေဟောဝါ၏ရည်ရွယ်တော်မူချက်မှာလည်း မအောင်မြင်ဘဲရှိမည်မဟုတ်ပေ။ (ဟေရှာယ ၅၅:၁၁) များမကြာမီ မဟာဗာဗုလုန်ကိုတရားစီရင်၍ ဖျက်ဆီးပစ်ခြင်းနှင့်အတူ သတို့သမီးအကြွင်းအကျန်များမှ နောက်ဆုံးသူတို့သည် သူတို့၏ခရီးပြီးဆုံးပေလိမ့်မည်။

၂၁။ ကောင်းကင်ဆိုင်ရာမင်္ဂလာဆောင်ပွဲ၏ အပြီးသတ်အခြေအနေနီးကပ်လာသည်နှင့်အမျှ ကျွန်ုပ်တို့အားလုံးဘာလုပ်နေသင့်သနည်း။

^၂၁ ထိုကာလအတောအတွင်း သန်းပေါင်းများစွာသောသူတို့သည် အရေအတွက်ယုတ်လျော့လျက်ရှိသော သတို့သမီးအကြွင်းအကျန်တို့၏ ဓမ္မအမှုကိုတုံ့ပြန်ခြင်းအားဖြင့် မိမိတို့ကိုယ်ကိုကောင်းချီးပေးလျက် နေကြသည်။ သူတို့အားလုံးသေခြင်း၌ မြေကြီးဆိုင်ရာလမ်းစဉ်ကို အပြီးမသတ်မီ ပြည့်တန်ဆာနှင့်တူသည့် မှောက်မှားသောဘာသာကမ္ဘာ့အင်ပါယာ ပျက်သုဉ်းလိမ့်မည်။ ထိုပျက်သုဉ်းခြင်းသည် “ကမ္ဘာဦးမှစ၍ ယခုတိုင်အောင်မဖြစ်စဖူး” သော “ကြီးစွာသောဒုက္ခ” ၏အစကိုမှတ်သားပေမည်။ ကျန်ကြွင်းသောအချိန်သည် တိုတောင်းနေပြီ။ အသင့်အနေဖြင့် ကပ်ကျော်လိုပါက ဘုရားသခင့်အမိန့်တော်အတိုင်းဆောင်ရွက်ရန် အလွန်အရေးကြီးလှပါသည်တကား။ (မဿဲ ၂၄:၁၄၊ ၂၁။ မာကု ၁၃:၁၀။ လုကာ ၂၁:၁၅။ ယောဟန် ၁၃:၃၄) ထိုအမိန့်တော်များသည် ဤခဲယဉ်းသောကာလအတွင်း အထူးသက်ဆိုင်ပေသည်။ ထို့ကြောင့်သတို့သမီးမှ အကြွင်းအကျန်များဖြစ်ဖြစ်၊ သူ၏အခြွေအရံမှ “လူအုပ်ကြီး” ပင်ဖြစ်ဖြစ် ယေဟောဝါဂုဏ်တော်နှင့် အသင်ကိုယ်တိုင်၏ ထာဝရပျော်ရွှင်မှုအကျိုးအတွက် ကိုယ်တော်အားဆက်လက်နာခံကြပါ။ ယခုကတည်းက ဘုရားသခင့်မိတ်ဆွေအဖြစ် မှတ်ယူခံရသော လူအုပ်ကြီးအဖို့ ယေဟောဝါသည် ‘အရာခပ်သိမ်းကိုအသစ်ဖန်ဆင်းတော်မူ” ၍ မြေကြီးပရဒိသု၌ရှိသော လူသားသန်းပေါင်းများစွာထံသို့ ထာဝရကောင်းကျိုးချမ်းသာများ စီးဆင်းသွားသည့်အချိန်တွင် ဆက်လက်၍အသက်ရှင်ရခြင်းမှာ ကြီးမားလှသည့် အခွင့်အရေးပါတကား။—ဗျာဒိတ် ၂၁:၅; ၂၂:၁၊ ၂၊ ၁၇။

သင်သတိရသလော

▫ အဘယ်သဲထိတ်ရင်ဖိုဖွယ်ရာ အခြင်းအရာများ မကြာမီတွင် ဖြစ်ပျက်လာမည်နည်း။

▫ ကောင်းကင်ဆိုင်ရာမင်္ဂလာပွဲ အပြည့်အဝအောင်မြင်မည်အကြောင်း အဘယ်အရာကအာမခံသနည်း။

▫ ဧလျာဇာနှင့် ကုလားအုပ်ဆယ်ကောင်တို့သည် အဘယ်အရာများကို နှိုင်းယှဉ်နိုင်သနည်း။

▫ ယခုခေတ်တွင် ရေဗက္ကနှင့် သူတို့၏အခြွေအရံတို့သည် မည်သူတို့နှင့်ဆင်တူကြသနည်း။

▫ ဣဇာက်၏မင်္ဂလာဆောင်ပွဲသို့ ဦးတည်လမ်းခင်းပေးသည့် အခြင်းအရာများမှကျွန်ုပ်တို့ အဘယ်သင်ခန်းစာရရှိသနည်း။