ကမ္ဘာပေါ် ရှေးအကျဆုံးရပ်ကွက်၏ စိန်ခေါ်ချက်ကို ရင်ဆိုင်ခြင်း
“ကောင်းကင်နိုင်ငံတော် တည်လုနီးပြီ။” မျက်မှောက်ခေတ် အစ္စရေးနိုင်ငံရှိ “သတင်းကောင်း” ကြေညာသူ ၃၇၀ အတွက် ထိုသတင်းကြေညာခြင်းသည် အထူးအဓိပ္ပာယ်ရှိသည်။ အဘယ်ကြောင့်နည်း။ အကြောင်းမူကား လွန်ခဲ့သော နှစ်ပေါင်း ၂၀၀၀ ခန့်က ယေရှုခရစ်သည် ဤနေရာတွင် နိုင်ငံတော်သတင်းကိုဦးဆုံးကြေညာတော်မူခဲ့သည်။ (မဿဲ ၄:၁၇။ ၂၄:၁၄) ယင်းကြောင့် ကမ္ဘာပေါ် သတင်းကောင်းကြေညာနေသည့်နေရာများတွင် အစ္စရေးသည် ရှေးအကျဆုံးရပ်ကွက်ဖြစ်စေသည်။
သို့ရာတွင် အစကနဦးကတည်းက ဤနေရာသည် တကယ်စိန်ခေါ်ရာရပ်ကွက်တစ်ခုဖြစ်ခဲ့သည်။ ယေရှု၏သတင်းတရားကို စိတ်ဝင်စားသူ များစွာရှိသော်လည်း ထိုထက်ရှေ့တိုးသူကား နည်းလှသည်။ (ယောဟန် ၆:၂၊ ၆၆) ယနေ့ ဘာသာတရား၊ ယဉ်ကျေးမှု နှင့် နိုင်ငံရေးရှုဒေါင့်များ ခြားနားကွဲလွဲသည့်အတွက် စိန်ခေါ်ချက်ဖြစ်ရလေသည်။
တစ်ဖက်တွင် အာရပ်လူမျိုး ၂.၂ သန်းရှိသည်။ သူတို့အနက် အချို့မှာ အမည်ခံခရစ်ယာန်များ၊ ဘာသာကျင့်သုံးသော၊ မကျင့်သုံးသော မူစလင်များ၊ ဒရူးဇ် ဂိုဏ်းဝင်များ နှင့် ဘုရားမရှိဝါဒီများ ပါဝင်သည်။ နိုင်ငံရေးအရလည်း ဘက်လိုက်မှုကွဲပြားပါသည်။ အချို့က အနောက်ဘက်ကမ်း နှင့် ဂါဇာကမ်းမြောင်တွင် ပါလက်စတိုင်း လွတ်မြောက်ရေးပြည်နယ် တည်ထောင်ရန် အားပေးထောက်ခံကြသည်။
တစ်ဖက်ကကြည့်ပြန်လျှင် ဂျူးတိုင်းရင်းသား အစ္စရေးလူမျိုး ၃.၅ သန်းရှိသည်။ ဤသူများလည်း နည်းအမျိုးမျိုးဖြင့် ကွဲပြားနေကြသည်။ အချို့ မိုရော့ကို၊ ရီမင်၊ အီရတ်နှင့် ဆီးရီယားနိုင်ငံများမှ ဌာနီပြောင်းဝင်လာသူများဖြစ်ကြသည်။ အခြားသူများမှာ ဥရောပ နှင့် ရုရှားတို့မှလာကြသည်။ အန္ဒိယ၊ အမေရိကတိုက်များ၊ အီသီယိုးပီးယား၊ တောင်အာဖရိက နှင့် အခြားအရပ်ရပ်မှ ရောက်လာသူများလည်းရှိသည်။ သူတို့အသီးသီး မိမိယဉ်ကျေးမှုနှင့်မိမိတို့ထုံးစံကိုယ်စီ ရှိကြသည့်အပြင် ယုဒဘာသာကို ကိုယ့်နည်းကိုယ့်ဟန်ကျင့်သုံးသည့် သီးခြားရပ်ကွက်များတွင် အခြေစိုက်နေထိုင်ကြသည်။
ဥပမာ၊ အဲရ်ကီနာဇီ (ဥရောပ) ဂျူးများအတွက် ရဗ္ဗိဆရာတော်ကြီးတစ်ဦးရှိသကဲ့သို့ စီဖာဒစ် (အရှေ့အလယ်ပိုင်း) ဂျူးများအတွက် ဆရာတော်ကြီးရှိသည်။ အများစုက နိုင်ငံရေး၌စိတ်ဝင်စားကြသော်လည်း အစ္စရေးပြည်နယ်ကို အသိအမှတ်မပြု၊ အခွန်များမဆက်သသော ဘာသာရေးစိတ်ထက်သန်သော ဂျူးများလည်းရှိသည်။ ထို့ပြင် မီးလောင်တိုက်ဘေးလွတ်ခဲ့သူများရှိသည်။ သူတို့အနက်အများစုသည် နောက်ကြောင်းကိုမမေ့နိုင်၊ စိတ်ဆင်းရဲ၊ ကိုယ်ဆင်းရဲ ခံနေရတုံးပင်။ သူတို့အသီးသီး ကိုယ်စီဝမ်းနည်းဖွယ်အတွေ့အကြုံ များစွာပြောစရာရှိကြပေသည်။ ကိုယ်စီကိုယ်င အတွေးအခေါ်အသီးသီးကို ခံယူထားကြသည့် ဘုရားမရှိဝါဒီများ အရေအတွက်သည်လည်း တိုး၍တိုး၍များလာနေသည်။ ဂျူးလူဦးရေကို ပေါင်းစည်းထားသည့် ချည်မျှင်တစ်ချောင်းတည်းမှာ လူမျိုးတစ်မျိုးအနေနှင့်သော်လည်းကောင်း၊ နိုင်ငံရေးသဘောအရသော်လည်းကောင်း ယနေ့တိုင်တည်ရှိနေခြင်းဖြစ်သည်။
စိန်ခေါ်ချက်ကို ရင်ဆိုင်ခြင်း
နှစ်ပေါင်း ၁၈၀၀ ကျော်ရပ်စဲပြီးနောက် ၁၉၁၃ ခုနှစ်တွင် နိုင်ငံတော်သတင်းဟောပြောခြင်းလုပ်ငန်းကို အနည်းအကျဉ်း စတင်ဟောပြောလာသည်။ ထိုအချိန်က သမ္မာကျမ်းစာကိုစိတ်ဝင်စားသော လူပျိုတစ်ဦးသည် ယေရုရှလင်မြို့မြောက်ဘက် ဆယ်မိုင်အဝေးရှိ ရာမာလာမြို့တွင် နိုင်ငံတော်မျိုးစေ့ကို စကြဲခဲ့သည်။ ထိုနေရာမှ သတင်းကောင်းသည် ဘီအက်-ဂျာလာ နှင့် ဟိုင်ဖါမြို့သား အာရပ်လူမျိုးတို့ထံ ရောက်ရှိသွားသည်။ ဒုတိယကမ္ဘာစစ်ကြီးပြီးနောက် ဂျူးနောက်ခံရှိ သက်သေခံညီအစ်မနှစ်ဦး တဲလ်အဗစ်/ဂျာဖါ နယ်တွင် လုပ်ငန်းတော်ကို ပြန်စ၍ လုပ်ကိုင်ခဲ့သည်။ ယနေ့ ဟိုင်ဖါ၊ တဲလ်အဗစ်၊ ဗက်လင်၊ ရာမာလာ၊ လောဒ် နှင့် ဘီယာ-ရှီဘာနယ်တွင် ယေဟောဝါသက်သေခံ အသင်းတော်ခြောက်ခုနှင့် အုပ်စုနှစ်စုရှိပါသည်။
လွန်ခဲ့သော ၁၉ ရာစုနှစ်ကကဲ့သို့ပင် တစ်အိမ်မှတစ်အိမ်လုပ်ငန်းသည် သတင်းကောင်းကိုစိတ်ဝင်စားသူများရှာဖွေရန် အထိရောက်ဆုံးနည်းဖြစ်တုံးပင်။ (လုကာ ၈:၁။ တမန်တော် ၅:၄၂) အမှန်မှာ အခြားနေရာအချို့နှင့်နှိုင်းယှဉ်ရလျှင် ဤနည်းဖြင့်သက်သေခံရန် တကယ်ပျော်စရာကောင်းပါသည်။ အများအားဖြင့် ကျွန်ုပ်တို့သတင်းကို သိလိုစိတ်နှင့် နိုင်ငံတော်ကြေညာသူများ အိမ်ထဲခေါ်ထိုင်ခွင့်ရကြသည်။ ဤသိလိုစိတ်ကြောင့် မဂ္ဂဇင်းများနှင့် အခြားကျမ်းစာစာပေများစွာ ဝေငှရသည်။ မကြာခဏဆိုသလို ဤစာပေများကို အိမ်နီးချင်း တစ်ဆင့်မှတစ်ဆင့် ယူဖတ်ကြရာ အချို့သူများ ကျမ်းစာဆိုင်ရာသမ္မာတရားကို သိနားလည်လာကြသည်။
သို့ရာတွင် ဤစပ်စုစိတ်ကြောင့်ပင် လူသစ်များနှလုံးထဲရောက်သော နုနယ်သေးသည့် သမ္မာတရားမျိုးစေ့အတွက် စိုးရိမ်ဖွယ်ဖြစ်စေသည်။ (မဿဲ ၁၃:၂၀၊ ၂၁) အိမ်နီးချင်း၊ မိတ်ဆွေများ၊ အထူးသဖြင့် ဘာသာရေးခေါင်းဆောင်များသည် နိုင်ငံတော်သတင်းကို စိတ်ဝင်စားသူတို့အား ဖိစီးနှောင့်ယှက်၊ ကဲ့ရဲ့ပြစ်တင်၊ ခြိမ်းခြောက်ရုံမက အချို့သူတို့ကို အနာတရနှိပ်စက်ကလူပြုကြသည်။ ယင်းကြောင့် အချို့အလုပ်ပြုတ်သွားသည်။ မိတ်ဆွေနှင့် မိသားစု၏အဆက်ဖြတ်မှုကိုလည်းခံရသူရှိသည်။ သစ္စာတည်ကြည်ပြီး ယေဟောဝါသက်သေဖြစ်လာသူတို့သည် အတိုက်အခံမီးစက်လက်နက်တို့ကို ခံရကြသည်။—ယောဟန် ၉:၂၂ နှင့်နှိုင်းယှဉ်ပါ။
အခြားနည်းများဖြင့်လည်း အတိုက်အခံများကြုံရကြသည်။ ဂျူးနောက်ခံရှိသက်သေခံများ လူအုပ်စုလိုက်ရန်မူမှု ကြုံခဲ့ရသည်။ ဌာနခွဲရုံး၊ တဲလ်အဗစ်မြို့ရှိ နိုင်ငံတော်ခန်းမနှင့် ဟိုင်ဖာမြို့ရှိ နိုင်ငံတော်ခန်းမတို့သည် မီးကွင်းပစ်သူတို့၏ပစ်မှတ်ဖြစ်ခဲ့ဖူးသည်။ ပါလက်စတိုင်းပြည်နယ် တည်ထောင်ရေးအတွက် နိုင်ငံရေးပဋိပက္ခတွင် ဘက်လိုက်ရန် ယခုအာရပ်နှင့်ဂျူးသက်သေခံများကို အဓမ္မတိုက်တွန်းနေကြသည်။ ဤကိစ္စများတွင် ကြားနေ၍ ဖျားနေသောလူ့လောက၏ပြဿနာများကို မည်သည့်လူ့အဖွဲ့အစည်းမျှ ဖြေရှင်းမပေးနိုင်ကြောင်း ညီအစ်ကိုများ လိမ္မာပါးနပ်စွာဖြေရှင်းပေးကြသည်။ တစ်ခုတည်းသောဖြေရှင်းနည်းကား ဘုရားသခင်၏နိုင်ငံတော်ဖြစ်ကြောင်း သူတို့ခေါင်းဆောင် ယေရှုခရစ်ကိုအတုယူပြီး သက်သေခံများညွှန်ပြပေးကြသည်။—ယောဟန် ၁၇:၁၆; ၁၈:၃၆။
နိုင်ငံတော်အသီး သီးခြင်း
ဤရှေးအကျဆုံးရပ်ကွက်တွင် စိန်ခေါ်ချက်များရင်ဆိုင်ရငြားလည်း “တရားစကားကိုကြား၍ နှလုံးသွင်း” သူများသည် သူတို့လယ်ကွင်းတွင် နိုင်ငံတော်အသီးများသီးနေကြပါသည်။ (မဿဲ ၁၃:၂၃) “ဖြောင့်မတ်ခြင်းတရားကိုမြတ်နိုးသဖြင့် တကယ်ရှာဖွေနေသည့် သမ္မာတရားရေကိုငတ်နေသူများရှိသည်” ဟု အတွေ့အကြုံရင့်ကျက်သော အချိန်ပြည့်ဓမ္မအမှုဆောင်တစ်ဦးပြောပါသည်။ “ဤသူများသည် သူတစ်ပါးအထင်အမြင်၊ ဖိစီးနှောင့်ယှက်မှုတို့ကြောင့် ဩဇာညောင်းမခံကြပါ။ သမ္မာတရားသိရှိရန်အခွင့်အရေးရသည်နှင့် သူတို့ချက်ချင်းလက်ခံကြသည်။” ဤအချက်ကို တွေ့ကြုံမှုများစွာ ထောက်ခံပါသည်။
ဂရိနိုင်ငံတွင် ကောန်ဖင့်ကျောင်းနေခဲ့သူ ဘင်ဗီနီဒါသည် “စစ်မှန်သော ဘုရားတရားကြည်ညိုမှုသည်ကား ဒုက္ခရောက်သော မိဘမဲ့ကလေးများနှင့် မုဆိုးမတို့ကို ကြည့်ရှုစောင့်ရှောက်ခြင်း၊ လောကီအညစ်အကြေးတို့မှ ကင်းစင်အောင် မိမိတို့ကိုယ်ကိုစောင့်ထိန်းခြင်း” ဟူသောကျမ်းစကားကို အထူးနှစ်ခြိုက်ခဲ့သည်။ (ယာကုပ် ၁:၂၇၊ သတင်းကောင်း) ဂျူးအမျိုးသမီးငယ်ဘဝကတည်းက သူပြောသည်အတိုင်း “ဘေးတစ်ခုပြီးတစ်ခု” သာသူကြုံတွေ့ခဲ့ရသည်။ နာဇီခေတ်၏ ခဲယဉ်းဒုက္ခ၊ သူမ၏ခင်ပွန်းသေဆုံးခဲ့သော ပြည်တွင်းစစ်၏ဘေးများကိုလည်း ခံခဲ့ရ၏။ သို့သော် ရိုးသားဖြောင့်မတ်ပြီး ဟန်ဆောင်မှုကင်းမဲ့သူများကို တစ်နေ့နေ့ ရှာတွေ့ပါမည်ဟူသော သူမ၏မျှော်လင့်ချက် တစ်ခါမျှ မပျောက်ခဲ့ပေ။
၁၉၄၉ ခုနှစ်၌ အစ္စရေးနိုင်ငံတွင် အခြေစိုက်ရန်ဝင်လာပြီးနောက် ဗင်ဗီနီဒါသည် ၁၉၇၄ ခုနှစ်အထိ ဝမ်းဆွဲဆရာမအဖြစ် ဝမ်းစာရှာဖွေခဲ့သည်။ “ထိုကာလတစ်လျှောက် ကျွန်မကိုယ်ကိုကျွန်မ ‘ကျမ်းစာဖေါ်ပြတဲ့ ရိုးသားဖြောင့်မတ်သူများ ဘယ်မှာလဲ။ ဒီလောကထဲမှာ တရားခြင်းဘယ်မှာရှိသလဲ’ လို့အမြဲ မေးစမ်းကြည့်တယ်။” ဂျူးဘာသာဝင်ပြီး တရားဇရပ်တက်၍ ဥပုသ်နှင့်အခြားပွဲနေ့များကို စောင့်ထိန်းခဲ့သည်။ သို့သော် သူမ၏ဒေသခံအသင်းသားများ၏ အတင်းပြောဆိုမှုနှင့် စကားများအငြင်းပွားမှုတို့ကြောင့် ‘အညစ်အကြေးနှင့်ကင်းစင်သော ဘုရားတရားကြည်ညိုမှု’ ကို သာ၍ဆာလောင်တမ်းတစေသည်။
နောက်ဆုံး ၁၉၈၅ ခုနှစ်တွင် ဂရိနိုင်ငံရှိ ကျန်းမာရေးရေပူစမ်းသို့ နှစ်စဉ်လည်ပတ်ချိန်တွင် ဆေးကုသခံနေသော သက်သေခံအမျိုးသမီးတစ်ဦးသည် ဗင်ဗီနီဒါနှင့်စကားစမြည်ပြောဆိုခဲ့ရာမှ အကြောင်းစုံဆွေးနွေးနှီးနှောခဲ့ကြသည်။ ထိုညဉ့်ချင်းပင်ဒေသခံနိုင်ငံတော်ခန်းမ၌ ပထမအကြိမ်စည်းဝေးတက်ခဲ့သည်။ ညီအစ်ကိုညီအစ်မများ၏ ရင်းနှီးစွာပေါင်းသင်းမှုနှင့် စိတ်ရင်းစေတနာကို စွဲမှတ်သွားတော့သည်။
ဗင်ဗီနီဒါသည် အစ္စရေးနိုင်ငံသို့ပြန်သွားသောအခါ ဆက်လက်လေ့လာကာ တစ်နှစ်ခွဲအကြာတွင် သမ္မာတရား၏ဘုရားသခင် ယေဟောဝါထံ မိမိကိုယ်ကိုဆက်ကပ်ကြောင်း အထိမ်းအမှတ်ဖြင့် နှစ်ခြင်းယူခဲ့သည်။ “နောက်ဆုံး ကျွန်မအသက် ၇၀ ရှိမှ သမ္မာကျမ်းစာမှာပါတဲ့ နှိမ့်ချမှုရှိပြီး လူကိုလူလိုဆက်ဆံတဲ့သူတွေကို တွေ့ဆုံရတော့တယ်။ အခုဆိုရင် ကျွန်မအသက်ရှင်ရတဲ့ရက်တိုင်း ရည်ရွယ်ချက်အပြည့်ရှိတဲ့ ပျော်ရွှင်စရာနေ့ရက်ဖြစ်နေပြီ” ဟုသူမပြောပါသည်။
မိုရှေးလည်း ‘ကောင်းသောသိုးထိန်းအသံကိုကြား’ လိုသည့် သမ္မာတရားရှာဖွေသူ အခြားတစ်ဦးဖြစ်သည်။ (ယောဟန် ၁၀:၁၄-၁၆) မိုရှေးသည် ကျမ်းစာကိုမြတ်နိုးသူတစ်ဦးဖြစ်ငြားလည်း၊ သူ၏ညီငယ် ပစ်လိုက်ရန်ရည်ရွယ်သော “ဓမ္မသစ်ကျမ်း” မှ ယေရှုခရစ်အကြောင်းသိရှိလာပြီး တကယ်စိတ်ထိမိခဲ့သည်။ များမကြာမီပင် အလုပ်ဖေါ်တစ်ဦး သက်သေခံတစ်ဦးနှင့် ကျမ်းစာလေ့လာချိန်တွင် ထိုင်ပါဝင်ပြီး လည်ပတ်ရောက်ရှိလာသော ဟောပြောသူတစ်ဦး၏ ဟောပြောချက်ကိုလည်း တက်ရောက်ခဲ့သည်။ “ဒီစကားမျိုးကို ကြားချင်နေတာ” ဟု ထိုပထမအကြိမ်စည်းဝေးတက်ချိန်တွင် သူပြောဆိုခဲ့သည်။
လက်ဦးတွင် အတားအဆီးကြုံပြီးနောက် မိုရှေး၏တိုးတက်မှုသည် အလွန်မြန်ပေသည်။ ခြောက်လအတွင်း သူနှစ်ခြင်းယူလေသည်။ သို့ရာတွင် သူ၏တိုးတက်မှုကြောင့် အထူးသဖြင့် သူ၏ဇနီးနှင့်ဆွေမျိုးတို့က အတိုက်အခံပြုလာကြသည်။ အိမ်ထောင်တွင် သားကြီးအနေနှင့် ဖခင်ဈာပနတွင် အခမ်းအနားဆုတောင်းချက်များ၌ မပါဝင်သဖြင့် အခြေအနေအတော်ဆိုးလာသည်။ ဆွေမျိုးညာတိတို့ကလည်း အသင်းတော်ကိုအားလုံးမအပ်မီ ဇနီးဖြစ်သူ ‘တစ်ခုခု အမြန်လုပ်မှဖြစ်မည်’ ဟူ၍ ရန်တိုက်ပေးခဲ့သည်။ “အိမ်ခန်းကို သူမနာမည်နဲ့ စာချုပ်ချုပ်ဖို့ပြောတော့ သူလည်းစိုးရိမ်စိတ်လျော့နည်းသွားတယ်” ဟုမိုရှေးပြောပြသည်။ သူ၏အချိန်ကို ကောင်းစွာစီစဉ်ပေးခြင်းဖြင့် အိမ်ထောင်ရေးနှင့် အသင်းတော်တာဝန်များကို မျှတစွာထမ်းဆောင်နိုင်ခဲ့သည်။
သို့သော် ဆွေမျိုးရှိသမျှသမ္မာတရားကို အတိုက်အခံပြုတတ်ကြသည်မဟုတ်။ ကျမ်းစာမှ မိမိသိလာသမျှကို နိုင်ငံရေးတွင် ထိုအချိန်က စိတ်ဝင်စားနေသူ လင်ယောက်ျား ဟန်နာအား နီဟိုင်းပြောပြပါသည်။ များမကြာမီပင် ဖိစီးမှုခံနေရသော လူသားအပေါင်းတို့အတွက် တစ်ခုတည်းသောမျှော်လင့်ချက်ကား ဘုရားသခင်၏နိုင်ငံတော်ဖြစ်ကြောင်း သူတို့နှစ်ယောက်စလုံး အသိအမှတ်ပြုလာကြသည်။ သို့နှင့် သူတို့ ယေဟောဝါ၏ဆက်ကပ်အပ်နှံသက်သေခံများဖြစ်လာကြပြီး ဟိုင်ဖါမြို့နှင့် အနီးတစ်ဝိုက်ရှိ ရွာကလေးများတွင် စသက်သေခံလေတော့သည်။ အထူးသဖြင့် သူတို့နှစ်ဦးနှစ်ဖက်ရှိ ဆွေမျိုး၊ စုစုပေါင်း ၂၅၂ ဦးတို့အား သက်သေခံကြသည်။
ယင်းက စိန်ခေါ်ချက်ဖြစ်ခဲ့ပါသလော။ ဖြစ်ပါသည်။ အကြောင်းမှာ အာရပ်ရွာများသို့ တစ်နာရီခွဲကြာ ကားစီးသွားရသည့်ပြင် စိတ်ရှည်မှုနှင့်သည်းခံခြင်းလည်း များစွာပြခဲ့ရသည်။ “တစ်ခါတစ်ရံ ဆက်မကြားချင်တော့ဘူးလို့ သူသူငါငါပြောကြသည်။ အဲ့ဒီအခါ စကားမပြောရုံဘဲရှိတယ်။ နောက်တစ်ခါ လိမ္မာပါးနပ်မှုသုံးပြီး စကားပြန်စပြောကြည့်တယ်။ အိမ်ရှေ့တံခါးကကန်ထုတ်ခံရပြီးနောက် ပြူတင်းပေါက်ကနေပြန်ဝင်ရသလိုပါဘဲ” ဟု ဟန်နာပြောပြသည်။ ဤသို့ပြုခဲ့၍ အကျိုးများစွာဖြစ်ထွန်းခဲ့ပြီ။ ယခုအချိန်အထိ သူနှင့်နီးစပ်သော ဆွေမျိုး ၃၆ ဦးမှ ၂၄ ဦးသည် ကျမ်းစာကိုစိတ်ဝင်စားနေကြပြီ။ သူတို့အနက် ၁၃ ဦးမှာ ဟန်နာနှင့်လည်းကောင်း၊ အခြားသက်သေခံများနှင့်လည်းကောင်း ကျမ်းစာလေ့လာနေပါသည်။ ဤအချိန်တွင် နီးစပ်သောဆွေမျိုး ငါးဦးအပြင် သူ၏သားသမီးများ ယေဟောဝါထံ ဆက်ကပ်အပ်နှံပြီး၍ အခြားသုံးဦးသည် နှစ်ခြင်းယူခြင်းသို့ တိုးတက်နေကြပါသည်။
ရှေးအကျဆုံးရပ်ကွက်တွင် နှုန်းသစ်များ
ဤကဲ့သို့သော စိတ်ကြည်နူးဖွယ်ရာ တွေ့ကြုံမှုများ အစ္စရေးတွင် တိုးများလာနေပါသည်။ တိုးတက်စရာအလားအလာသည်လည်း အားရှိစရာပင်။ ၁၉၈၈ ခုနှစ်တွင် နိုင်ငံတော်ကြေညာသူများ၏အရေအတွက်သည် ၃၇၀ အထိတိုးတက်ခဲ့သည်။ စိတ်ဝင်စားသူများ၏အိမ်တွင် လစဉ်ကျင်းပနေသော ကျမ်းစာသင်အံမှု၏ ပျမ်းမျှအရေအတွက်သည် ၁၉၇၉ ခုနှစ်တွင် ၈၉ ခုမှ ၁၉၈၈ ခုနှစ်တွင် ၃၀၁ သို့ တိုးတက်လာသည်။ ယင်းကား ၂၄၀ ရာခိုင်နှုန်းတိုးတက်မှုဖြစ်သည်။
ယင်းသတင်းပေါင်းစုံက ဤရှေးအကျဆုံးပြည်ရှိ ယေဟောဝါသက်သေများအား များစွာရွှင်လန်းစေသည်။ ကမ္ဘာပေါ် ရှေးအကျဆုံးရပ်ကွက်တွင် တပည့်ဖြစ်စေခြင်းလုပ်ငန်း၌ ဆက်ပါဝင်လုပ်ကိုင်ကြရာ ကျွန်ုပ်တို့ဘုရားသခင်ယေဟောဝါထံတော်မှ ကြီးမားသောကောင်းချီး တိုး၍ရရှိမည်ဟု မျှော်လင့်နေပါသည်။
[စာမျက်နှာ ၂၈ ပါ ရုပ်ပုံ]
အထက်—ဥယျာဉ်ဂူ၊ ယေရုရှလင်
တစ်ဘက်—အစ္စရေးရှိဈေးနှင့်လမ်းမြင်ကွင်း
အောက်—တဲလ်အဗစ်ရှိဌာနခွဲရုံး