ကမ္ဘာတစ်ခွင်ရွှင်လန်းမှု
“ငါ၏ကျွန်တို့သည် ရွှင်လန်းသောစိတ်နှင့် သီချင်းဆိုကြလိမ့်မည်။” (ဟေရှာယ ၆၅:၁၄) ယင်းသို့ယေဟောဝါရှင်သည် မိမိ၏ပရောဖက်ဟေရှာယအားဖြင့်မိန့်ဆိုပြီး၊ ကိုယ်တော်၏စကားတော်များသည် ယေဟောဝါသက်သေများအတွင်းတွင် ကြီးကျယ်ခမ်းနားစွာ ပြည့်စုံလျက်ရှိနေပါသည်တကား။ သူတို့၏နှလုံးထဲမှရွှင်လန်းမှုသည် အဘယ်ကလာသနည်း။ ယေဟောဝါရှင်အား သူတို့၏စည်းလုံးစွာဝတ်ပြုမှုမှလာသည်။ ကိုယ်တော်သည် “ရွှင်လန်းသောဘုရား” ဖြစ်ပြီး၊ ကိုယ်တော်အားဝတ်ပြုသူတို့သည် “ယေဟောဝါ၌ရွှင်လန်း” ကြ၏။ (၁ တိမောသေ ၁:၁၁။ ဇာခရိ ၁၀:၇) သူတို့သည်နိုင်ငံတော်သတင်းကြေညာစဉ် ဤရွှင်လန်းဖွယ်ဆက်ကပ်အပ်နှံမှုက သူတို့အားလူမျိုးတစ်မျိုးအဖြစ် စည်းလုံးစေပြီး၊ သူတို့၏ဘုရားရှင်အား ကမ္ဘာချီဟစ်ကြွေးချီးမွမ်းမှုကို ဖြစ်ပေါ်စေသည်။—ဗျာဒိတ် ၇:၉၊ ၁၀။
“မည်သူမျှနှုတ်ယူမသွားနိုင်သောရွှင်လန်းမှု”
အမှန်ပင်ဘုရားရှင်၏နာမနှင့်နိုင်ငံတော်ကို ကြေညာခြင်းသည် ယေဟောဝါသက်သေများအတွက် အဆက်မပြတ်ရွှင်လန်းမှု၏ အရင်းခံဖြစ်သည်။ (မာကု ၁၃:၁၀) သူတို့သည်ဆာလံဆရာကြီး၏စကားများကို တုံ့ပြန်ကြသည်။ “သန့်ရှင်းသောနာမတော်၌ ဝါကြွားဝမ်းမြောက်ကြလော့။ ထာဝရဘုရား [ယေဟောဝါ၊NW] ကိုရှာသောသူတို့သည် စိတ်နှလုံးရွှင်လန်းကြစေ။”—ဆာလံ ၁၀၅:၃။
အများအားဖြင့် ယင်းသို့ပြုရန် သူတို့အခက်အခဲများကျော်လွှားကြရသည်။ စပိန်နိုင်ငံတွင်အစ်စ်စီဒရိုသည် သူ့ကိုယ်ကိုယေဟောဝါထံဆက်ကပ်အပ်နှံခဲ့ပြီး၊ ကိုယ်တော်အကြောင်းအခြားသူများအား သူပြောပြလိုသည်။ သို့သော်သူသည်ကုန်ကားမောင်းသူဖြစ်ပြီး အားလပ်ချိန်မှာအကန့်အသတ်နှင့်ဖြစ်ခါ၊ တစ်ညလုံးခရီးရှည်များမောင်းနှင်၍ နေ့တွင်အိပ်စက်ရသည်။ အစ်စ်စီဒရိုသည် အခြားကုန်တင်ကားမောင်းသူများကို သက်သေခံလိုသည်။ သို့သော်သူမည်သို့ပြုမည်နည်း။
သူသည်အခြားဒရိုင်ဘာများနှင့်စကားပြောနိုင်ရန် သူ၏ကားထဲတွင် စီဘီ (ဆက်သွယ်ရေး) ရေဒီယိုကိုတပ်ဆင်လိုက်သည်။ မကြာမီ၊ အနည်းငယ်သုံးထားပြီးသော လိုင်း (channel,) ၁၃ ပစ္စည်းကိုတွေ့ရှိခဲ့ရပြီး၊ ယင်းကိုအခွင့်အရေးယူရန် ဆုံးဖြတ်ခဲ့သည်။ သို့ပင်ငြားလည်း အခြားကုန်တင်ကားသမားများကို စီဘီရေဒီယိုမှတစ်ဆင့် သမ္မာကျမ်းစာအကြောင်းပြောရန်အကြံပြုသောအခါ တုံ့ပြန်မှုမရှိကြချေ။ သို့သော်အချို့မူနားထောင်ကြသည်။ စကားပျံ့နှံ့သွားပြီး၊ စပိန်ကုန်တင်ကားမောင်းသူများသည်လိုင်း ၁၃ ကိုဖွင့်ကြသည်။ မကြာမီ အစ်စ်စီဒရိုကအနည်းဆုံးတစ်ဦးသည် ကျမ်းစာဆက်သင်ရန် ခြေလှမ်းနေကြောင်း သိရှိခဲ့ရသည်။
အီတလီတွင်လူတစ်ဦးသည် ဘတ်စ်ကားပေါ်တွင်အခြားသူတစ်ဦးနှင့် စကားပြောနေရာမှ ယေဟောဝါသက်သေများအကြောင်းကြားသိခဲ့သည်။ သူ၏ဇနီးသည် သူတို့အားမိတ်ဆွေတစ်ဦးမှတစ်ဆင့် တွေ့ခဲ့ကြသည်။ နှစ်ဦးစလုံးသမ္မာကျမ်းစာကိုသင်ကြပြီး၊ သူတို့သင်ကြားခဲ့ရသည်ကို အခြားသူများအားတစ်ဖန်ဝေမျှရန် စိတ်ထက်သန်ကြ၏။ သူတို့သည်စိတ်ထက်သန်လွန်း၍ နိုင်ငံတော်သတင်းကိုအခြားသူများအား ပိုမိုအချိန်ယူဟောပြောနိုင်ရန် အမျိုးသားသည်သူ၏အလုပ်တွင် ရာထူးတိုးပေးသည်ကိုလက်မခံခဲ့ချေ။ သူ၏ဇနီးသည်လည်း လခကောင်းသောအလုပ်ကိုစွန့်လွှတ်လိုက်သည်။ အကျိုးနပ်ပါသလော။ နပ်ပါသည်။ ယောက်ျားဖြစ်သူက “ကျွန်တော်တို့သမ္မာတရားသိရှိတဲ့အချိန်ကစပြီး၊ ကျွန်တော်ရဲ့ဇနီးနဲ့ကျွန်တော်ဟာလူပေါင်း ၂၀ ကိုဘုရားရည်ရွယ်ချက်ဆိုင်ရာတိကျတဲ့အသိပညာရရှိဖို့ ကူညီပေးနိုင်တဲ့ရွှင်လန်းမှုခံစားခဲ့ရတယ်။ ညနေပိုင်းရောက်လာပြီး၊ ယေဟောဝါရဲ့အမှုတော်မှာတစ်နေ့တာဆောင်ရွက်ပြီးနောက် အိမ်ပြန်လာတဲ့အခါ၊ ကျွန်တော်မောပန်းတာတော့မှန်ပါတယ်။ ဒါပေမဲ့ကျွန်တော်ပျော်တယ်။ ဘယ်သူမှနှုတ်မယူသွားနိုင်တဲ့ရွှင်လန်းမှုကို ကျွန်တော့်ကိုပေးခဲ့တဲ့အတွက် ယေဟောဝါကိုကျေးဇူးတင်မိပါတယ်” ဟုဆိုသည်။
“မြေကြီးစွန်းတိုင်အောင်”
ဘုရားရှင်၏ရွှင်လန်းသောလူမျိုးတွင် ပါဝင်သူများသည် မည်သည့်နေရာတွင်ရှိရှိ “မြေကြီးစွန်းတိုင်အောင်” တွင်ပင်ရှိစေကာမူ အလားတူဇွဲလုံ့လကိုတင်ပြကြသည်။ (တမန်တော် ၁:၈) ဂရင်းလန်မြောက်ပိုင်းလောက်ဝေးသည့်နေရာ မရှိသလောက်ဖြစ်သည်။ ထိုနေရာ၌ပင် အာတိတ်စက်ဝိုင်း၏မြောက်ပိုင်းမိုင် ၂၀၀ တွင်လူ ၁၉ ဦးဖြင့်ဖွဲ့စည်းထားသော အင်လာလ်လစ်စတ် အသင်းတော်ငယ်လေးတည်ရှိသည်။ သူတို့သည်ထိုအီတလီမောင်နှံနှစ်ဦးကဲ့သို့ ထပ်တူသတင်းကောင်းကိုဟောပြောပြီး၊ လွန်ခဲ့သည်နှစ်က ဂရင်းလန်လူမျိုးခုနစ်ဦး ယေဟောဝါထံသူတို့၏ဆက်ကပ်အပ်နှံခြင်းကို နှစ်ခြင်းခံခြင်းအားဖြင့်တင်ပြသည်ကိုတွေ့ခဲ့ရသည့်အတွက် သူတို့ဝမ်းသာပီတိဖြစ်ခဲ့ရသည်။
ဂရင်းလန်မှမိုင်ပေါင်းထောင်ချီဝေးသော အိန္ဒိယသမုဒ္ဒရာတွင်းရှိ အပူပိုင်းဖြစ်သောမောရစ်ရှပ်ကျွန်းမှ အင်ဂျီနီသည်အလားတူရွှင်လန်းမှုခံစားရသည်။ ပထမပိုင်းတွင်အင်ဂျီနီသည် အခက်အခဲများရင်ဆိုင်ရသည်။ မောရစ်ရှပ်ကျွန်းတွင် ခရစ်ယာန်စည်းဝေးများတက်ခြင်းနှင့် လူသူရှေ့ဘုရားအကြောင်းဟောပြောခြင်းသည် အိန္ဒိယနွယ်ဟိန္ဒူပျိုကညာတစ်ဦးအတွက် လျောက်ပတ်သောလုပ်ငန်းဟု မရှူမြင်ကြချေ။ သို့သော်အင်ဂျီနီ ရပ်တည်သည်။ ယခုသူမသည် ကိုးနှစ်ကြာ ခရစ်ယာန်လမ်းစဉ်တွင်ရပ်တည်ပြီးနောက်၊ သူမ၏ဆွေမျိုးအချို့သည်လည်း ကျမ်းစာသင်အံလျက်ရှိသည်။
အင်ဂျီနီနှင့်ဆက်နွယ်၍ အမ်မင်လီယို အကြောင်းလည်းပြောရပေမည်။ ကမ္ဘာ့တစ်ဘက်ပိုင်းရှိ ဟွန်းဒူးရပ်စ်နိုင်ငံတွင်ဖြစ်သည်။ အလုပ်တွင်လုပ်ဖော်များ သမ္မာကျမ်းစာဆွေးနွေးနေသည်ကိုအမ်မင်လီယိုကြားရပြီး၊ သူ့အားပါဝင်ရန်ဖိတ်ခေါ်ခဲ့သည်။ သူသည်စာမဖတ်တတ်သော်လည်း ကျမ်းချက်များကိုဖတ်သွားသောအခါ ဝမ်းမြောက်စွာနှင့်နားထောင်ခဲ့သည်။ ခရစ်ယာန်သမ္မာတရားသည် သူ၏နှလုံးတွင်းစိမ့်ဝင်လာသောအခါ အမ်မင်လီယိုသည် သူ၏အကျင့်ပျက်ဘဝပုံစံကိုပြောင်းလဲလိုက်ပြီး၊ လွန်ကြူးစွာမသောက်တော့ချေ။ ယေဟောဝါသက်သေများသည် သူ့အားဖတ်တတ်၊ ရေးတတ်အောင်သင်ပေးခဲ့ပြီး၊ ယခုသူသည်ဘုရားရှင်၏ရွှင်လန်းသောလူမျိုးတွင် အမှုဆောင်တစ်ဦးဖြစ်နေလေပြီ။
ဟွန်းဒူးရပ်စ်အနောက်မြောက်ပိုင်းမှ မိုင်ပေါင်းထောင်ချီဝေးသည့်အလာစကာတွင် အက်စကီးမိုးမိခင်တစ်ဦးသည် အလားတူသမ္မာတရားကို သိရှိခဲ့သည်။ ဤအမျိုးသမီးသည် အလွန်ဝေးလံသောသီးခြားဖြစ်နေသည့်ရွာကလေးတွင်နေထိုင်ကာ၊ ယေဟောဝါသက်သေများနှင့်ဆက်သွယ်နိုင်သော တစ်ခုတည်းသောနည်းမှာ စာအားဖြင့်ဖြစ်သည်။ ထို့ကြောင့်သူမသည်စာအားဖြင့်သင်အံကာ၊ စာအားဖြင့်မေးခွန်းများကိုမေးရာ ယခုသူမသည်ဇွဲရှိရှိဖြင့် မိမိသိရှိရာကို အိမ်နီးနားခြင်းများအား ဝေမျှလျက်ရှိလေသည်။ ဤသို့သောပုံနမူနာများကို မကုန်နိုင်လောက်အောင်တင်ပြနိုင်သည်။ ကမ္ဘာတစ်ဝန်းတွင် စိတ်နူးညံ့သူများသည် “ယေဟောဝါကိုရွှင်လန်းစွာအမှုဆောင်ရန်” လာရောက်လျက်ရှိကြသည်။—ဆာလံ ၁၀၀:၂၊ NW။
“သင်တို့သည်အချင်းအချင်းချစ်ကြ”
သူတို့အားလုံးကိုဆွဲဆောင်သည့်အရာမှာ ဘုရားရှင်၏ရွှင်လန်းသောလူမျိုးဘောင်
တွင် တည်ရှိသောမေတ္တာဖြစ်သည်။ ယေရှုကမိန့်ဆိုခဲ့သည်။ “သင်တို့သည်အချင်းချင်းချစ်ကြလျှင် လူအပေါင်းတို့သည်ထိုမေတ္တာကိုထောက်၍ သင်တို့သည်ငါ၏တပည့်ဖြစ်သည်ကို သိရကြလိမ့်မည်။” (ယောဟန် ၁၃:၃၅) ခရစ်ယာန်မေတ္တာကို ဤခရစ်ယာန်စစ်များ၏နေ့စဉ်အသက်တာ၊ အထူးသဖြင့်ဘေးဒုက္ခအချိန်များတွင်တွေ့နိုင်သည်။
ယေဟောဝါသက်သေများ၏လုပ်ငန်းများ ပိတ်ပင်ခံရသောအာဖရိကတစ်နိုင်ငံတွင် မိုးခေါင်ခြင်းဘေးကြီးဆိုက်ရောက်သည်။ လူတစ်သောင်းသေဆုံးခဲ့ပြီး၊ ကျွဲ၊ နွားများအုပ်လိုက်သေဆုံးခဲ့သည်။ သက်သေခံများမည်သို့ အသက်ရှင်ကျန်ခဲ့သနည်း။ သစ်ဥသစ်ဖုများစားခြင်းနှင့် ထောပတ်သီးအစေ့များချက်ပြုတ်ခြင်းအားဖြင့်ဖြစ်သည်။ သို့သော်ဘုရားရှင်၏အကူအညီအားဖြင့် အခြားနိုင်ငံများမှသက်သေခံများသည် မမျှော်လင့်ဘဲခွင့်ပြုချက်ရယူကါ ကယ်ဆယ်ရေးပစ္စည်း ၂၅ တန်ပို့ပေးနိုင်သောအခါ သူတို့၏ဖြစ်အင်ကိုအံ့ဖွယ်ဖြေရှင်းပေးနိုင်ခဲ့သည်။ ပိတ်ပင်ထားသည့်ကြားမှ ဤပစ္စည်းများလိုရာခရီးသို့ လုံခြုံစွာဖြင့်ဆိုက်ရောက်ရန် စစ်တပ်ကပင်စောင့်ရှောက်ပေးခဲ့သည်။
အမှန်ပင်၊ ထိုအာဖရိကသက်သေခံများသည် ဟေရှာယ၏စကားများပြည့်စုံချက်ကိုခံစားရပြီး၊ သူတို့ညီအစ်ကိုများ၏မေတ္တာသက်သေပြချက်ကို ရရှိခဲ့သောကြောင့် သူတို့သည်အတိုင်းထက်အလွန်ရွှင်လန်းခဲ့ကြရသည်။ “ကြည့်ရှုလော့။ ထာဝရဘုရား [ယေဟောဝါ၊ NW] သည်မကယ်မတင်နိုင်အောင် လက်တော်တိုသည်မဟုတ်။ မကြားနိုင်အောင်နားတော်ထိုင်းသည်မဟုတ်။”—ဟေရှာယ ၅၉:၁။
ငြိမ်းချမ်းသောလူမျိုး
သူတို့အဝင်တို့သည် ဤလောက၏စစ်မက်လမ်းစဉ်များကို စွန့်ပယ်ပြီး၊ ‘သူတို့၊ဓားလက်နက်များကို ထွန်သွားဖြစ်စေ’ သောကြောင့် နူးညံ့သောနှလုံးရှိသူများလည်း ဘုရှားရှင်၏ရွှင်လန်းသောလူမျိုးဘက်သို့ ဆွဲဆောင်ခံခဲ့ရသည်။ (ဟေရှာယ ၂:၄) အယ်လ်ဆဗာဒိုတွင် စစ်မှုထမ်းဟောင်းတစ်ဦး၏အိမ်တွင် သူ၏စစ်မှုထမ်းခဲ့စဉ်ကအထိမ်းအမှတ်ပစ္စည်းများဖြင့် ပြည့်နေသည်။ သို့သော်ယေဟောဝါသက်သေများနှင့် သူကျမ်းစာစသင်သောအခါ၊ သူသည်ငြိမ်းချမ်းရေးတွင်စိတ်ဝင်စားမှု တိုးပွားလာသည်။ နောက်ဆုံးတွင် သူ၏အိမ်၌စစ်နှင့်သက်ဆိုင်သည့်အရာအားလုံးကို ရှင်းလင်းလိုက်ပြီး၊ ဟောပြောခြင်းလုပ်ငန်းကို ထက်သန်စွာဖြင့်လှမ်းယူခဲ့သည်။
အစိုးရကိုဆန့်ကျင်သူများ သူ၏ရွာကိုသိမ်းပိုက်သောအခါ သူ့အားအကျဉ်းသားအဖြစ်ခေါ်ဆောင်သွားကါ တစ်ယောက်ကသူ့အားစစ်မှုထမ်းဟောင်းအဖြစ် လက်ညိုးထိုးပြသည်။ သို့သော်သူက သူသည်စစ်သားတစ်ဦးမဟုတ်တော့ကြောင်း ယေဟောဝါသက်သေတစ်ဦးဖြစ်နေကြောင်း ရှင်းပြခဲ့သည်။ သူပုန်များကသူ၏အိမ်တွင် လက်နက်များရှိကြောင်းစွပ်စွဲကာ ရှာဖွေရာတွင် ဘာမှမတွေ့ကြချေ။ ထို့နောက်သူပုန်ခေါင်းဆောင်က သူ့အကြောင်းကိုအိမ်နီးနားချင်းများထံမေးကြည့်သည်။ ဤသို့ပြန်ဖြေကြသည်။ “သူဟာလမ်းပေါ်မှာသွားလိုက်လာလိုက်နဲ့ တစ်နေ့ပြီးတစ်နေ့ ကျမ်းစာအကြောင်းဘဲ ဟောပြောနေတယ်။” သူ့ကိုလွှတ်လိုက်သည်။ သူ၏ဇွဲသည်သူ့အသက်ကို ကယ်တင်ခဲ့သည်မှာမုချပင်။
အာဖရိကနိုင်ငံတစ်ခုမှသတင်းတစ်ပုဒ်က ယေဟောဝါသက်သေများနှင့်ကျမ်းစာလေ့လာခဲ့သော စစ်သားနှစ်ဦးအကြောင်းပြောပြသည်။ တစ်ဦးသည်အစိုးရစစ်တပ်အတွက်အမှုထမ်းပြီး၊ အခြားတစ်ဦးသည်သူပုန်များဘက်ကတိုက်ခိုက်သည်။ နောက်ဆုံးတွင်၊ နှစ်ဦးစလုံးသည် “သူတို့၏ဓားလက်နက်များကိုထွန်သွားဖြစ်စေခြင်းငှာ” ဆုံးဖြတ်ပြီး၊ စစ်တပ်မှထွက်လိုက်သည်။ သူတို့သည်ခရစ်ယာန်စည်းဝေးများကို ပထမဆုံးအကြိမ်တက်သောအခါ အစိုးရဆန့်ကျင်သောစစ်သားကအခြားသူအား “ခင်ဗျားဒီမှာဘာလိုချင်လို့လဲ” ဟုမေးသည်။ သူက “ခင်ဗျားကောဒီမှာဘာလိုချင်လို့လဲ” ဟုပြန်မေးသည်။ “ထို့နောက်” သတင်းကဆက်ဖော်ပြသည်။ “တစ်ဦးနှင့်တစ်ဦးဖက်ကြကာ၊ သူတို့သည်အတူတကွငြိမ်းချမ်းစွာနေနိုင်မှုကြောင့် ဝမ်းသာလုံးဆို့၍ မျက်ရည်များကျခဲ့ကြသည်။” ဤစစ်မှုထမ်းဟောင်းနှစ်ဦးစလုံးသည်အမှန်ပင် ဘုရားရှင်ထံဆုတောင်းခဲ့ပေမည်။ “အိုဘုရားသခင်၊ အကျွန်ုပ်ကိုကယ်တင်တော်မူသောဘုရား လူအသက်ကိုသတ်ခြင်းအပြစ်နှင့် အကျွန်ုပ်ကိုကင်းလွတ်စေတော်မူပါ။ တရားသဖြင့်စီရင်တော်မူခြင်းကို အကျွန်ုပ်လျှာသည်ရွှင်လန်းစွာ သီချင်းဆိုပါမည်။”—ဆာလံ ၅၁:၁၄။
“ကိုယ်တော်သည်အကျွန်ုပ်ဆင်းရဲခြင်းကိုကြည့်ရှု၍”
“ကရုဏာတော်ကြောင့် ဝမ်းသာရွှင်လန်းခြင်းရှိပါလိမ့်မည်။ ကိုယ်တော်သည်အကျွန်ုပ်ဆင်းရဲခြင်းကိုကြည့်ရှု၍ အကျွန်ုပ်၏ဝိညာဉ်တွေ့သောအမှုကို သိမှတ်တော်မူ၏။” (ဆာလံ ၃၁:၇) ထိုသို့ဆာလံဆရာကြီးကဆုတောင်းခဲ့ပြီး၊ ဘုရားနှုတ်ကပတ်တော်သည် သူတို့၏ဒုက္ခများကိုတွန်းလှန်နိုင်ရန် ကူညီပေးခဲ့သောကြောင့် ယနေ့လူအများရွှင်လန်းလျက်ရှိကြသည်။ ပြင်သစ်တွင်ယေဟောဝါသက်သေတစ်ဦးသည် စိတ်ရောဂါခံစားနေရသောအမျိုးသမီးတစ်ဦးနှင့် သင်အံမှုကျင်းပသည်။ သူမသည်စိတ်ရောဂါကုသနေသည်မှာ အချိန်အတန်ကြာနေပြီဖြစ်သော်လည်း မထူးခြားခဲ့ချေ။ သူမကျမ်းစာစသင်ပြီးနောက် တစ်ပတ်အကြာတွင် စိတ်ရောဂါကုဆရာဝန်က “ခင်ဗျားကိုဒီအမျိုးသမီးကကျမ်းစာထဲက ရှင်းပြနေတာတစ်ကယ်ဘဲနားလည်ရဲ့လား” ဟုမေးသည်။ ထို့ကြောင့်နောက်တစ်ပတ်တွင် သက်သေခံသည်သူ၏ရုံးခန်းသို့သွားပြီး၊ ဆရာဝန်ရှေ့မှောက်တွင် သူမနှင့်ကျမ်းစာသင်အံခဲ့သည်။
ကျမ်းစာသင်ပြီးနောက်၊ ဆရာဝန်ကသက်သေခံအား ဤသို့ဆိုသည်။ “ဒီနှစ်တွေတစ်လျှောက်မှာ ကျွန်တော်ဟာကျွန်တော့်လူနာရဲ့ ဘာသာတွေကိုဂရုစိုက်ကြည့်နေခဲ့တာကြာပြီ။ ဒါပေမယ့် ဘယ်ဘာသာမှတစ်ကယ့်အထောက်အကူမပေးနိုင်တာ ကျွန်တော်သတိပြုမိတယ်။ ခင်ဗျားတို့ကျတော့ကွာတယ်။ ဒေါ်ပီ—ဟာအကြံဉာဏ်ယူဖို့ ကျွန်တော့်ဆီကိုတစ်ပတ်နှစ်ခါလါပြပြီး အခလည်းပေးတယ်။ ဒါပေမဲ့၊ ခင်ဗျားတို့ကျတော့အဖိုးအခမယူဘဲ ခင်ဗျားတို့ရဲ့ကျမ်းစာသင်အံပေးမှုနဲ့ အကြံဉာဏ်ကောင်းက ပိုပြီးထိရောက်နေတယ်။ သူမဟာအခု အတော်တိုးတက်လာတယ်။ ဆက်ပြီးလုပ်ပါ။ ခင်ဗျားတို့အကူအညီလိုများလိုခဲ့ရင် ကျွန်တော်အကူအညီအပြည့်အဝပေးပါမယ်ဆိုတာ စိတ်ချစေလိုပါတယ်။”
သမ္မာကျမ်းစာကဆိုသည်။ “အိုထာဝရဘုရား [ယေဟောဝါ၊ NW] နှိုးဆော်တော်မူခြင်းအသံကို နားလည်သောလူမျိုးသည် မင်္ဂလာရှိပါ၏။ သူတို့သည်မျက်နှာတော်အလင်း၌ သွားလာရကြပါ၏။ နာမတော်၌အစဉ်ဝမ်းမြောက်၍ ဖြောင့်မတ်တော်မူခြင်းတရားအားဖြင့် ချီးမြှောက်ခြင်းသို့ရောက်ရကြပါ၏။” (ဆာလံ ၈၉:၁၅၊ ၁၆) ဤဆာလံကျမ်းသည်မှန်ကန်ကြောင်း ယေဟောဝါသက်သေအားလုံးသိကြသည်။ ယေဟောဝါအားချီးမွမ်းမှုအတွက် သူတို့၏နှုတ်မှ ကမ္ဘာချီရွှင်လန်းသောဟစ်ကြွေးသံများ ထွက်ပေါ်လျက်ရှိသည်။ သူတို့နှင့်အတူ ဘုရားရှင်အားချီးမွမ်းရန် လူမျိုးများမှပို၍ပို၍ထွက်လာလျက်ရှိသည်။ သူတို့နှင့်ပူးပေါင်း၍ သင်ကိုယ်တိုင်ထိုရွှင်လန်းမှုကို ခံစားကြည့်ပါလေ။
[စာမျက်နှာ ၈ ပါ ရုပ်ပုံ]
ယေဟောဝါသက်သေများကို နိုင်ငံအားလုံးတွင်တွေ့ရပြီး၊ ရာပေါင်းများစွာသောသီးခြားဘာသာစကားများကို ပြောဆိုကြသည်။ သို့သော်အားလုံးသည် သမ္မာတရားဘာသာစကားတစ်မျိုးကိုသာပြောဆိုကြပြီးထို ‘ရွှင်လန်းသောလူမျိုး’ အဝင်ဖြစ်ကြသည်။