ယေဟောဝါ၊ မျက်နှာမလိုက်သော “မြေတစ်ခွင်လုံး၏တရားသူကြီး”

“ခမည်းတော်သည် . . . မျက်နှာမလိုက်ဘဲ လူတစ်ဦးစီ၏အလုပ်အတိုင်းတရားစီရင်တော်မူ၏။”—၁ ပေတရု ၁:၁၇၊ ကဘ။

၁၊ ၂။ (က) ယေဟောဝါသည် ကြီးမြတ်သောတရားသူကြီးဖြစ်သည်ကိုသိရခြင်းက အဘယ့်ကြောင့်ကျွန်ုပ်တို့အား ကြောက်ရွံ့မှုနှင့်နှစ်သိမ့်မှုဖြစ်စေသင့်သနည်း။ (ခ) လူမျိုးများနှင့်တရားဆိုင်ရာတွင် ကိုယ်တော့်မြေကြီးပေါ်ရှိကျေးကျွန်များသည် မည်သည့်ကဏ္ဍ၌ပါဝင်သနည်း။

ယေဟောဝါသည် ကြီးမြတ်တော်မူသော “မြေတစ်ခွင်လုံး၏တရားသူကြီး” ဖြစ်တော်မူ၏။ (ကမ္ဘာဦး ၁၈:၂၅၊ ကဘ) စကြဝဠာတွင်အထွတ်အထိပ်ဘုရားဖြစ်တော်မူသောကြောင့် မိမိ၏ဖန်ဆင်းရာများကို တရားစီရင်ပိုင်ခွင့်အကြွင်းမဲ့ရှိသည်။ ယင်းသို့သိရခြင်းက တစ်ချိန်တည်းတွင် ကြောက်ရွံ့တုန်လှုပ်မှုနှင့် နှစ်သိမ့်မှုကိုဖြစ်စေသည်။ မောရှေက ဆန့်ကျင်ဟန်ရှိသောဤအဆိုကို စိတ်ထက်သန်စွာဖြင့်ပြောခဲ့သည်။ “အကြောင်းမူကား၊ သင်တို့၏ဘုရားသခင် [ယေဟောဝါ၊ ကဘ] သည် ဘုရားတို့၏ဘုရား၊ သခင်တို့၏သခင်၊ ကြီးမြတ်သောဘုရား၊ တန်ခိုးနှင့်ပြည့်စုံ၍ ကြောက်မက်ဖွယ်သောဘုရား၊ လူမျက်နှာကိုမထောက်၊ တံစိုးကိုမစားဘဲ မိဘမရှိသောသူငယ်၊ မုဆိုးမဘက်၌ တရားစီရင်၍ ဧည့်သည်အာဂန္တုတို့ကိုစုံမက်သဖြင့် အဝတ်အစားတို့ကိုပေးသနားသောဘုရားဖြစ်တော်မူ၏။”—တရားဟောရာ ၁၀:၁၇၊ ၁၈။

^၂ မည်မျှထူးခြားထင်ရှားသည့်မျှတမှုပါတကား။ ကြီးမြတ်၊ တန်ခိုးကြီး၍ ကြောက်ရွံ့ဖွယ်ကောင်းသော်လည်း ဘက်မလိုက်ဘဲ မိဘမဲ့ကလေးများ၊ မုဆိုးမများ၊ တိုင်းတစ်ပါးသားတို့၏အကျိုးကို မေတ္တာဖြင့်ကာကွယ်တော်မူသည့်ဘုရားဖြစ်တော်မူသည်။ ယေဟောဝါထက်သာ၍မေတ္တာပြည့်ဝသောတရားသူကြီးမျိုးကို မည်သူမျှော်လင့်နိုင်မည်နည်း။ စာတန့်လောကရှိလူမျိုးများနှင့်တရားဆိုင်နေရသောအဖြစ်တွင် မိမိကိုယ်ကိုသရုပ်ဖော်ရာ၌ ယေဟောဝါသည် မြေကြီးပေါ်ရှိမိမိ၏ကျေးကျွန်များအား မိမိ၏သက်သေဖြစ်ရန်ခေါ်ဖိတ်တော်မူသည်။ (ဟေရှာယ ၃၄:၈။ ၄၃:၉-၁၂) ကိုယ်တော်သည် သူတို့၏သက်သေများအပေါ် မိမိ၏ဘုရားဇာတိတော်နှင့် တရားဝင်စကြဝဠာပိုင်သအုပ်စိုးခွင့်ကို အမှီသဟဲပြုတော်မမူ။ သို့ရာတွင် ကိုယ်တော်၏အထွတ်အထိပ်ဖြစ်တော်မူခြင်းကိုသက်သေထူရန် မိမိ၏သက်သေများအား သာလွန်ထူးခြားသည့်အခွင့်အရေးပေးတော်မူသည်။ ကိုယ်တော်၏သက်သေများသည် ကိုယ်တော်၏ဖြောင့်မတ်သည့်အကြွင်းမဲ့အစိုးပိုင်ခွင့်ကိုလက်အောက်ခံကြပြီး၊ သူတို့၏လူများရှေ့ဓမ္မအမှုဆောင်ခြင်းအားဖြင့် အခြားသူများလည်း မိမိတို့ကိုယ်ကို တရားသူကြီးချုပ်၏သြဇာအာဏာတော်အောက် အောက်ကျို့ရန် လှုံ့ဆော်ပေးသည်။

ယေဟောဝါ၏တရားစီရင်ရာနည်းလမ်း

၃။ ယေဟောဝါ၏တရားစီရင်ရာနည်းလမ်းကို မည်သို့မှတ်ချက်ချနိုင်သနည်း။ အာဒံနှင့်ဧဝတို့ကိစ္စတွင် ယင်းတို့မည်သို့ရှင်းလင်းထင်ရှားခဲ့သနည်း။

^၃ လူ့ရာဇဝင်အစဦးပိုင်းတွင် ယေဟောဝါသည် ပြစ်မှားသူတစ်စုံတစ်ယောက်အား တစ်ဦးချင်းတရားစီရင်တော်မူခဲ့သည်။ တရားစီရင်ရေးကိစ္စများကို ကိုယ်တော်ကိုင်တွယ်ပုံကိုင်တွယ်နည်းပုံဥပမာက နောက်ပိုင်းတွင် မိမိ၏လူမျိုးတော်အတွင်း တရားစီရင်မှုများကိုလုပ်ဆောင်ရမည့် မိမိ၏ကျေးကျွန်များအား ပုံစံချမှတ်ပေးခဲ့ခြင်းဖြစ်သည်။ (ဆာလံ ၇၇:၁၁၊ ၁၂) ကိုယ်တော်၏တရားစီရင်ခြင်းကို ဤသို့မှတ်ချက်ချနိုင်သည်။ လိုအပ်သည့်အခါတည်ကြည်မြဲမြံပြီး ဖြစ်နိုင်သည့်အခါကရုဏာပြတော်မူသည်။ စိတ်လိုကိုယ်လျောက်ပုန်ကန်ခဲ့သော စုံလင်သူအာဒံနှင့်ဧဝတို့၏ကိစ္စတွင် သူတို့သည် ကရုဏာနှင့်မထိုက်တန်ခဲ့ပါ။ သို့နှင့်၊ ယေဟောဝါသည်သူတို့အား သေဒဏ်ချမှတ်ခဲ့သည်။ သို့ရာတွင် ကိုယ်တော့်ကရုဏာတော်သည် သူတို့၏သားစဉ်မြေးဆက်အပေါ်တွင်သက်ရောက်ခဲ့သည်။ သေဒဏ်စီရင်ချက်ကိုယေဟောဝါရွှေ့ဆိုင်းထားခြင်းအားဖြင့် အာဒံနှင့်ဧဝတို့အား သားသမီးမွေးဖွားခွင့်ပြုခဲ့သည်။ သူတို့၏သားစဉ်မြေးဆက်များအား အပြစ်နှင့်သေခြင်းအနှောင်အဖွဲ့မှလွတ်မြောက်ရန်မျှော်လင့်ချက်ကို မေတ္တာပါပါဖြင့်ကိုယ်တော်ပေးတော်မူခဲ့သည်။—ကမ္ဘာဦး ၃:၁၅။ ရောမ ၈:၂၀၊ ၂၁။

၄။ ကာဣနနှင့်ယေဟောဝါမည်သို့ဆက်ဆံခဲ့ပြီး ယင်းကိစ္စသည် အဘယ်ကြောင့်အထူးစိတ်ဝင်စားဖွယ်ဖြစ်သနည်း။

^၄ ကာဣနနှင့်ယေဟောဝါဆက်ဆံပုံသည် အထူးစိတ်ဝင်စားဖွယ်ဖြစ်ခဲ့သည်။ အကြောင်းမှာ “အပြစ်တရားအောက်အရောင်းခံရသူ”၊ အာဒံနှင့်ဧဝတို့၏ မစုံလင်သောမျိုးဆက်ဆိုင်ရာ ပထမဆုံးမှတ်တမ်းဖြစ်သောကြောင့်ဖြစ်သည်။ (ရောမ ၇:၁၄၊ ကဘ) ယင်းကိုယေဟောဝါသည် ထောက်ထားဆင်ခြင်သောအားဖြင့် ကာဣနကို သူ့မိဘများအားဆက်ဆံသည့်နည်းနှင့်ခြားနားစွာဆက်ဆံခဲ့သလော။ ယင်းကိစ္စသည် ယနေ့ခရစ်ယာန်ကြီးကြပ်မှူးများအား သင်ခန်းစာဖြစ်စေသလော။ ကြည့်ကြစို့။ မိမိ၏ပူဇော်သက္ကာနှစ်သက်လက်ခံခြင်းမခံရသောအခါ ကာဣန၏ မှားယွင်းစွာတုံ့ပြန်ခြင်းကို ယေဟောဝါသိမြင်လာသောအခါ သူရောက်ရှိနေသည့်အန္တရာယ်အနေအထားကို ကိုယ်တော်သတိပေးတော်မူခဲ့သည်။ ‘ကာကွယ်ခြင်းသည် ကုသခြင်းထက်ကောင်း၏’ ဟူသောရှေးဆိုရိုးစကားရှိ၏။ အပြစ်သို့တိမ်းယိမ်းလိုက်ပါသည့်သဘောသည် ကာဣနအားကျွန်မပြုစေရန် ယေဟောဝါသူ့အား အတတ်နိုင်ဆုံးသတိပေးတော်မူခဲ့သည်။ သူ “ကောင်းမွန်စွာပြု” ဖို့ ကိုယ်တော်သူ့အားကူညီရန်ကြိုးစားခဲ့သည်။ (ကမ္ဘာဦး ၄:၅-၇) ယင်းက အပြစ်ရှိသောလူသားကို နောင်တရရန် ဘုရားသခင်၏ဦးဆုံးတောင်းဆိုချက်ဖြစ်သည်။ ကာဣနသည် နောင်တမရသည့်သဘောထားကိုတင်ပြပြီး ကြီးလေးသောပြစ်မှုကြီးကို ကျူးလွန်ပြီးသည့်နောက်ပိုင်းတွင် ယေဟောဝါသည် သူ့အားနယ်နှင်ဒဏ်ပေးလိုက်ပြီး လျှော့ပေါ့သောအားဖြင့် အခြားလူသားများသူ့ကိုမသတ်ရန်တားမြစ်သည့်စီရင်ချက်ထုတ်လိုက်သည်။—ကမ္ဘာဦး ၄:၈-၁၅။

၅၊ ၆။ (က) ယေဟောဝါသည် ရေလွှမ်းမိုးခြင်းမတိုင်မီခေတ်ကလူမျိုးဆက်နှင့် မည်သို့စခန်းသွားခဲ့သနည်း။ (ခ) သောဒုံနှင့်ဂေါမောရမြို့သားများကိုစီရင်ချက်မချမီ ယေဟောဝါဘာလုပ်ခဲ့သနည်း။

^၅ ရေလွှမ်းမိုးခြင်းမတိုင်မီက ‘မြေကြီးသည် အဓမ္မအမှုနှင့်ပြည့်စုံ’ ကြောင်းကို ယေဟောဝါတွေ့မြင်တော်မူခဲ့သည်။ (ကမ္ဘာဦး ၆:၅၊ ၆) ရေလွှမ်မိုးခြင်းမတိုင်မီလူမျိုးဆက်ရှိ လူအများစုသည် မိမိတို့၏လွတ်လပ်စွာပြုလုပ်ပိုင်ခွင့်များကိုအလွဲသုံးခဲ့ကြသဖြင့် သူတို့ကိုတရားစီရင်ရမည်ဖြစ်သောကြောင့် ယေဟောဝါ “ဝမ်းနည်းတော်မူ” ခြင်းဖြစ်သည်။ သို့သော် နောဧအား “ဖြောင့်မတ်ခြင်းတရားကိုဟောသော” သူအဖြစ် နှစ်ပေါင်းများစွာဘုရားသခင်အသုံးပြုခဲ့ခြင်းအားဖြင့် လုံလောက်စွာသတိပေးတော်မူခဲ့သည်။ ထိုနောက်ပိုင်းတွင် ယေဟောဝါအတွက် ‘ဘုရားတရားမဲ့သည့်ထိုလောကကိုပြစ်ဒဏ်စီရင်ရန် နှောင့်နှေး’ နေစရာအကြောင်းလုံးဝမရှိတော့ပေ။—၂ ပေတရု ၂:၅၊ ကဘ။

^၆ ဖောက်ပြန်သောသောဒုံနှင့်ဂေါမောရမြို့အား တရားစီရင်ခြင်းကိစ္စကိုကိုင်တွယ်ရန် ယေဟောဝါသည်အလားတူတာဝန်ရှိတော်မူသည်။ သို့ရာတွင် ကိုယ်တော်မည်သို့လုပ်ဆောင်သည်ကိုမှတ်သားပါလေ။ ဖြောင့်မတ်သူလောတ၏ဆုတောင်းချက်များအားဖြင့် ထိုလူများ၏မဖွယ်မရာသောအကျင့်များ “ကြွေးကြော်သောအသံ” ကို ကိုယ်တော်ကြားတော်မူခဲ့သည်။ (ကမ္ဘာဦး ၁၈:၂၀။ ၂ ပေတရု ၂:၇၊ ၈) သို့သော် အရေးမယူမီ ကိုယ်တော်သည် မိမိ၏ကောင်းကင်တမန်များအားဖြင့် “ဆင်းသက်” ၍ ဖြစ်ကြောင်းမှန်ရာကိုကြည့်ရှုတော်မူခဲ့သည်။ (ကမ္ဘာဦး ၁၈:၂၁၊ ၂၂။ ၁၉:၁) မတရားစွာမစီရင်မိစေရန် အာဗြဟံအားလည်း ထပ်မံသေချာစေခဲ့သည်။—ကမ္ဘာဦး ၁၈:၂၃-၃၂။

၇။ တရားရေးကော်မတီတွင်ပါဝင်ရသောအကြီးအကဲများသည် ယေဟောဝါတရားစီရင်ရာနည်းလမ်း၏ပုံသက်သေများမှ မည်သည့်သင်ခန်းစာရယူနိုင်သနည်း။

^၇ ဤဥပမာမှ ယနေ့အကြီးအကဲများမည်သည့်အရာကို သင်ခန်းစာရယူနိုင်သနည်း။ အာဒံနှင့်ဧဝတို့၏ကိစ္စတွင် ပြစ်မှားသူများနှင့်သွေးသားတော်စပ်သော်လည်း ဤကိစ္စနှင့်ပတ်သက်၍အပြစ်မတင်ထိုက်သောသူများကို ယေဟောဝါသည် မေတ္တာနှင့်စာနာမှုတင်ပြတော်မူခဲ့သည်။ အာဒံနှင့်ဧဝတို့မှပေါက်ဖွားလာသူများအား ကိုယ်တော်ကရုဏာပြတော်မူခဲ့သည်။ ကာဣနကိစ္စတွင် သူကျရောက်နေသည့်အန္တရာယ်ကိုယေဟောဝါကြိုမြင်ပြီး သူနှင့်ကြင်နာစွာကျိုးကြောင်းဆင်ခြင်ပြီး အပြစ်မပြုမိရန်ကြိုတင်တားဆီးတော်မူခဲ့သည်။ နှင်ထုတ်ပြီးနောက်ပိုင်း၌ပင် ယေဟောဝါသူ့ကိုစာနာထောက်ထားခဲ့သည်။ ထို့ပြင်၊ ရေလွှမ်းမိုးခြင်းမတိုင်မီလူမျိုးဆက်ကို ယေဟောဝါသည် စိတ်ရှည်သည်းခံမှုများစွာပြသခဲ့ပြီးမှ တရားစီရင်ခဲ့ခြင်းဖြစ်သည်။ ခေါင်းမာမာနှင့်ဆိုးညစ်မှုများကိုကြုံတွေ့ရသောအခါ ယေဟောဝါသည် “နှလုံး၌နာကျင်တော်မူသည်။” လူများသည် ကိုယ်တော်၏ဖြောင့်မတ်သည့်ဥပဒေများကိုဖီဆန်သဖြင့် သူတို့အားဘက်မလိုက်တမ်းတရားစီရင်ရမည်ကို ကိုယ်တော်ဝမ်းနည်းတော်မူခဲ့သည်။ (ကမ္ဘာဦး ၆:၆၊ ကဘ။ ယေဇကျေလ ၁၈:၃၁။ ၂ ပေတရု ၃:၉ နှိုင်းယှဉ်။) သောဒုံနှင့်ဂေါမောရကိစ္စတွင် ယေဟောဝါသည် ဟုတ်ကြောင်းမှန်ရာကိုသက်သေထင်ရှားပြသခဲ့ပြီးမှ အရေးယူခဲ့ခြင်းဖြစ်သည်။ ယနေ့တရားရေးရာကိစ္စများကိုကိုင်တွယ်ဖြေရှင်းရသူများအတွက် မည်မျှကောင်းသည့်ပုံသက်သေပါတကား။

ဘိုးဘေးများခေတ်က လူသားတရားသူကြီးများ

၈။ ဘိုးဘေးများခေတ်က ယေဟောဝါ၏မည်သည့်အခြေခံပညတ်တော်များရှိခဲ့သနည်း။

^၈ သူတို့အချိန်က စာထက်အက္ခရာတင်သည့်ပညတ်တစ်စုံတစ်ရာမရှိခဲ့သော်လည်း ဘိုးဘေးများသည် ယေဟောဝါ၏အခြေခံပညတ်များနှင့်အကျွမ်းတဝင်ဖြစ်ခဲ့ပြီး ကိုယ်တော့်ကျေးကျွန်များသည် ထိုပညတ်များကိုလိုက်လျှောက်ရန်တာဝန်ရှိကြသည်။ (ကမ္ဘာဦး ၂၆:၅ နှိုင်းယှဉ်။) ဧဒင်မှအဖြစ်အပျက်က ယေဟောဝါ၏စကြဝဠာအုပ်စိုးပိုင်ခွင့်ကို နာခံအောက်ကျို့ရန်လိုကြောင်းတင်ပြခဲ့သည်။ ကာဣန၏ကိစ္စက လူသတ်ခြင်းကိုယေဟောဝါမနှစ်သက်ကြောင်းဖော်ပြသည်။ ရေလွှမ်းမိုးမှုပြီးပြီးချင်း ဘုရားသခင်သည် အသက်ကိုလေးမြတ်မှု၊ လူအသက်သတ်ခြင်း၊ သေဒဏ်စီရင်ခြင်းနှင့် အသွေးစားခြင်းများနှင့်ဆိုင်သောပညတ်များကို လူသားများအားပေးခဲ့သည်။ (ကမ္ဘာဦး ၉:၃-၆) ဂါဇမြို့နားတွင် အာဗြဟံ၊ စာရာ၊ ဂေရာမင်းအဘိမလက်တို့ပါဝင်သောအဖြစ်အပျက်က ယေဟောဝါသည် သူ့မယားပြစ်မှားခြင်းကို ပြင်းပြင်းထန်ထန်ပြစ်တင်ရှုတ်ချတော်မူခဲ့သည်။—ကမ္ဘာဦး ၂၀:၁-၇။

၉၊ ၁၀။ ဘိုးဘေးများအသိုင်းအဝိုင်းတွင် တရားစီရင်ရေးစနစ်တစ်ခုရှိခဲ့ကြောင်း မည်သည့်ဥပမာကတင်ပြသနည်း။

^၉ ထိုခေတ်က အိမ်ထောင်ဦးစီးသည် တရားသူကြီးအဖြစ်ဆောင်ရွက်ပြီး တရားရေးပြဿနာများကိုကိုင်တွယ်သည်။ အာဗြဟံနှင့်ပတ်သက်၍ ယေဟောဝါက “သူသည် မိမိနောက်၌ဖြစ်သောသားများ၊ အိမ်သူများတို့အားပညတ်မည့်အရာကိုငါသိ၏။ သူတို့သည်လည်း ထာဝရဘုရား၏တရားလမ်းသို့လိုက်၍ ဟုတ်မှန်ဖြောင့်မတ်စွာကျင့်ကြလိမ့်မည်” ဟုဖော်ပြတော်မူခဲ့သည်။ (ကမ္ဘာဦး ၁၈:၁၉) အာဗြဟံသည် မိမိ၏တိရစ္ဆာန်ထိန်းကျောင်းသူများနှင့် လောတ၏တိရစ္ဆာန်ထိန်းကျောင်းသူများစပ်ကြား ခိုက်ရန်ဖြစ်ခြင်းကိုဖြေရှင်းရာတွင် တစ်ကိုယ်ကောင်းမဆန်ဘဲ ပိုင်းခြားနားလည်နိုင်စွမ်းရှိခြင်းကိုတင်ပြခဲ့သည်။ (ကမ္ဘာဦး ၁၃:၇-၁၁) ယုဒသည် ရှေးဘိုးဘေးတို့၏အကြီးအကဲနှင့်တရားသူကြီးအဖြစ်ဆောင်ရွက်စဉ်က မိမိ၏ချွေးမတာမာကို သူ့သားအိမ်ယာပြစ်မှားသူဟုယူမှတ်သဖြင့် သူမအားကျောက်ခဲနှင့်ပစ်၍မီးရှို့သတ်ရန်စီရင်ခဲ့သည်။ (ကမ္ဘာဦး ၃၈:၁၁၊ ၂၄။ ယောရှု ၇:၂၅ နှိုင်းယှဉ်။) အဖြစ်မှန်အားလုံးကို သူသိရှိပြီးနောက်ပိုင်း သူမကို မိမိထက်သာ၍ဖြောင့်မတ်သူဟုကြေညာခဲ့သည်။ (ကမ္ဘာဦး ၃၈:၂၅၊ ၂၆) တရားစီရင်ချက်တစ်ခုမချမီ အဖြစ်အပျက်အားလုံးကိုသိရှိအောင်ပြုခြင်းသည် မည်မျှအရေးကြီးပါသည်တကား။

^၁၀ ယောဘဝတ္ထုစာစောင်သည် တရားစီရင်ရေးလုပ်ထုံးလုပ်နည်းများကိုရည်ညွှန်းရေးသားထားပြီး ဘက်မလိုက်တရားစီရင်မှုလိုအပ်ကြောင်းကို ဖော်ပြသည်။ (ယောဘ ၁၃:၈၊ ၁၀၊ ၃၁:၁၁။ ၃၂:၂၁) ယောဘကိုယ်တိုင်က မိမိသည်မြို့တံခါးဝတွင်ထိုင်သောလေးစားခံရသည့်တရားသူကြီးဖြစ်ကြောင်း၊ မုဆိုးမများနှင့်မိဘမဲ့ကလေးများ၏အကျိုးကိုကာကွယ်၍ တရားရေးကိစ္စများကိုကိုင်တွယ်စီရင်ခဲ့ကြောင်းကို ပြန်ပြောပြသည်။ (ယောဘ ၂၉:၇-၁၆) ထို့ကြောင့် ဣသရေလလူမျိုးများထွက်မြောက်ရာကာလနှင့် သူတို့အတွက်တရားရေးဆိုင်ရာအခြေခံဥပဒေကိုဘုရားသခင်ပေးခြင်းမတိုင်မီအချိန်အထိ ဘိုးဘေးများ၏အသိုင်းအဝိုင်း၌ “အသက်ကြီးသူများ” သည် အာဗြဟံ၏သားစဉ်မြေးဆက်များတွင် တရားသူကြီးများအဖြစ်ဆောင်ရွက်ခဲ့ကြကြောင်းထင်ရှားသည်။ (ထွက်မြောက်ရာ ၃:၁၆၊ ၁၈) အမှန်မှာ လူများကိုကိုယ်စားပြုသော “အသက်ကြီးသူများ” သို့မဟုတ် “အကြီးအကဲများ” အား ပညတ်ပဋိညာဉ်ဆိုင်ရာကမ်းလှမ်းချက်ကို မောရှေမှတစ်ဆင့်ပေးအပ်ခြင်းခံခဲ့ရသည်။—ထွက်မြောက်ရာ ၁၉:၃-၇။

ဣသရေလလူမျိုးတို့၏တရားစီရင်ရေးစနစ်

၁၁၊ ၁၂။ ကျမ်းပညာရှင်နှစ်ဦး၏အဆိုအရ ဣသရေလလူမျိုးများ၏တရားစီရင်ရေးစနစ်ကို အခြားလူမျိုးများနှင့်ကွာခြားစေသည့်အချက်ကားအဘယ်နည်း။

^၁၁ ဣသရေလလူမျိုးများအတွင်း တရားစီရင်ရေးကိစ္စများကို ကိုင်တွယ်စီမံပုံသည် သူတို့အနီးပတ်ဝန်းကျင်ရှိနိုင်ငံများလိုက်လျှောက်သော တရားစီရင်မှုဆိုင်ရာနည်းလမ်းများနှင့် လားလားကြီးကွာခြားခဲ့သည်။ တရားမမှုဥပဒေများနှင့်ရာဇဝတ်မှုဥပဒေများစပ်ကြား ထူးခြားကွဲပြားမှုမရှိခဲ့ပါ။ ယင်းနှစ်ခုစလုံးသည် စာရိတ္တနှင့်ဘာသာရေးဆိုင်ရာဥပဒေများနှင့်ဆက်စပ်နေသည်။ မိမိ၏အိမ်နီးနားချင်းကို ထိပါးကျူးကျော်ခြင်းသည် ယေဟောဝါကိုထိပါးကျူးကျော်ခြင်းပင်ဖြစ်သည်။ အဲန်ဒရာ ရှူရာခီ က မိမိရေးသားသော The People and the Faith of the Bible စာအုပ်တွင် ဤသို့ဖော်ပြထားသည်။ “ဟေဗြဲလူမျိုးများ၏တရားစီရင်ထုံးများသည် သူတို့၏အိမ်နီးချင်းနိုင်ငံများနှင့်ကွာခြားသည်။ အပြစ်ကျူးလွန်ခြင်းနှင့်ပြစ်ဒဏ်ချမှတ်ခြင်းတို့၏အဓိပ္ပာယ်သတ်မှတ်ချက်တွင်သာမက ဥပဒေသများကိုယ်နှိုက်၏ဆိုလိုရင်းတွင်လည်း ကွာခြားသည်။ . . . တိုရာဥပဒေသည် နေ့စဉ်အသက်တာနှင့်သီးခြားကွာဟမှုမရှိပါ။ ယင်းသည် ကောင်းချီးပေးခြင်း၊ ကျိန်ခြင်းများပါဝင်ခြင်းအားဖြင့် နေ့စဉ်အသက်တာ၏သဘာဝနှင့်ပါဝင်ပတ်သက်ရာအားလုံးကို ထိန်းချုပ်ထားသည်။ . . . ဣသရေလလူမျိုးများတွင် မြို့တော်၏တရားဥပဒေစီမံဆောင်ရွက်မှုများကို သီးခြားခွဲခြားဖော်ပြရန်မဖြစ်နိုင်သလောက်ပင်ဖြစ်သည်။ ယင်းတို့သည် အသက်ရှင်တော်မူသောဘုရားသခင်၏ အလိုတော်ကိုလိုက်နာခြင်းမှ ဖြစ်ပေါ်လာသောဘဝအသက်တာနှင့် တစ်သားတည်းကျနေသည်။”

^၁၂ ဤသို့ထူးခြားသောအခြေအနေသည် တရားဥပဒေစီမံဆောင်ရွက်မှုများနှင့်ပတ်သက်၍ ဣသရေလလူမျိုးများ၏အဆင့်ကို ခေတ်ပြိုင်တိုင်းနိုင်ငံများထက် များစွာမြှင့်တင်ထားပေးသည်။ ကျမ်းပညာရှင် ရော်လန်ဒဗိုးက “ဣသရေလလူမျိုးတို့၏ပညတ်များသည် ပုံစံနှင့်ပါဝင်သည့်အချက်များဆင်တူသည့်ကြားကပင် အရှေ့အလယ်ပိုင်းဒေသများရှိ “သဘောတူစာချုပ်” များတွင်ပါဝင်သောစည်းကမ်းချက်များနှင့် ‘ဥပဒေ’ များတွင်ပါဝင်သောစည်းမျဉ်းများနှင့် အခြေအမြစ်ကျကျကွာဟမှုရှိသည်။ ယင်းတို့သည် ဘာသာရေးဆိုင်ရာဥပဒေသများဖြစ်သည်။ . . . အရှေ့အလယ်ပိုင်းရှိမည်သည့်ဥပဒေမျှ ဥပဒေပြုရေးသားရှင်သည် ဘုရားသခင်ဖြစ်ကြောင်းအခိုင်အမာပြောထားသည့် ဣသရေလလူမျိုးများ၏ပညတ်တော်များနှင့် ယှဉ်၍မရနိုင်ပါ။ ထိုပညတ်တော်များတွင် ကျင့်ဝတ်နှင့်လုပ်ထုံးလုပ်နည်းများဆိုင်ရာစည်းမျဉ်းဥပဒေများပါဝင်သည်ရှိသော် ယင်းတစ်ခုလုံးတွင် ဘုရားသခင့်ပဋိညာဉ်၏အပိုင်းကဏ္ဍအားလုံးပါဝင်သောကြောင့်ဖြစ်သည်။ ယင်းပဋိညာဉ်သည် လူလူချင်း၊ လူနှင့်ဘုရားသခင်၏ပေါင်းသင်းဆက်ဆံရေးတို့ကို ထိန်းချုပ်ထားသောကြောင့်ဖြစ်သည်။” မောရှေဤသို့မေးခဲ့သည်မှာ အဆန်းမဟုတ်ပါ။ “ငါသည်ယနေ့သင်တို့၌ထားသောတရားအပေါင်းနှင့်အမျှ ဖြောင့်မတ်သောစီရင်ထုံးဖွဲ့ချက်တို့ကိုရသော အဘယ်လူမျိုးကြီးရှိသနည်း။”—တရားဟောရာ ၄:၈။

ဣသရေလတရားသူကြီးများ

၁၃။ မောရှေသည် ယနေ့အကြီးအကဲများအတွက် မည်သည့်အချက်များတွင်ပုံသက်သေကောင်းဖြစ်သနည်း။

^၁၃ ယင်းသို့အဆင့်အတန်းမြင့်သောတရားစီရင်ရေးစနစ်များအားဖြင့် တရားသူကြီးအဖြစ်ဆောင်ရွက်ရန် မည်ကဲ့သို့သောလူများလိုအပ်သနည်း။ ဣသရေလတွင် ဦးဆုံးတရားသူကြီးအဖြစ်ခန့်အပ်ခံရသူနှင့်ပတ်သက်၍ ကျမ်းစာက “မောရှေသည် မြေကြီးပေါ်မှာရှိနေသောသူအပေါင်းတို့ထက် သာ၍နူးညံ့သိမ်မွေ့သောသဘောရှိ၏” ဟုဖော်ပြထားသည်။ (တောလည်ရာ ၁၂:၃) သူသည် မိမိကိုယ်ကို အလွန်အမင်းယုံကြည်စိတ်ချခြင်းမရှိခဲ့ပါ။ (ထွက်မြောက်ရာ ၄:၁၀) လူများကိုတရားစီရင်ရသော်လည်း တစ်ခါတစ်ရံတွင် သူတို့အတွက်ဘုရားသခင်ကိုလျှောက်လဲပြောဆိုပေးရသူ၊ သူတို့၏အပြစ်များကိုတောင်းပန်ပြီး သူတို့အကျိုးအတွက် မိမိကိုယ်ကိုပင်အနစ်နာခံပေးရသူအဖြစ်လုပ်ဆောင်ခဲ့ရသည်။ (ထွက်မြောက်ရာ ၃၂:၁၁။ ၃၀-၃၂) သူဤသို့ကဗျာဆန်ဆန်ဖော်ပြခဲ့သည်။ “ငါ့ဒေသနာသည် မိုးရေကဲ့သို့စက်စက်ကျ၍ ငါ့စကားသည် နှင်းကဲ့သို့ဖြည်းညင်းစွာသက်ရောက်လိမ့်မည်။” (တရားဟောရာ ၃၂:၂) မိမိကိုယ်ပိုင်ဉာဏ်ကိုအမှီပြု၍လူများကိုတရားစီရင်ဖို့နေနေသာသာ ဤသို့ပင်သူကြေညာခဲ့သည်။ “သူတို့သည်အမှုရှိလျှင် ကျွန်ုပ်ထံသို့လာ၍ သူတို့၏အမှုကို ကျွန်ုပ်ဆုံးဖြတ်ရ၏။ ဘုရားသခင်၏ပညတ်တရားများကို သင်ချရ၏။” (ထွက်မြောက်ရာ ၁၈:၁၆) ဒွိဟဖြစ်ပါက ပြဿနာကို ယေဟောဝါထံတင်ပြသည်။ (တောလည်ရာ ၉:၆-၈၊ ၁၅:၃၂-၃၆၊ ၂၇:၁-၁၁) ယနေ့ ‘ဘုရားသခင်၏သိုးတော်စုကိုထိန်းကျောင်း’ ရပြီး တရားစီရင်ဆုံးဖြတ်ချက်များချမှတ်ရသောအကြီးအကဲများအတွက် မောရှေသည် ကောင်းသောပုံသက်သေဖြစ်ခဲ့သည်။ (တမန်တော် ၂၀:၂၈) သူတို့ညီအစ်ကိုများနှင့်သူတို့ဆက်ဆံရေးသည် ‘မြက်ပေါ်မှာစက်စက်ကျသောမိုးရေ’ ကဲ့သို့ဖြစ်ပါစေ။

၁၄။ ဣသရေလလူမျိုးတွင် တရားသူကြီးအဖြစ်မောရှေခန့်အပ်သောသူတို့၏ဝိညာဏအရည်အချင်းများကား အဘယ်နည်း။

^၁၄ နောင်အခါတွင် လူများအတွက်တရားစီရင်ရေးကိစ္စများကို မောရှေကိုယ်တိုင်မဆောင်ရွက်ပေးနိုင်တော့ချေ။ (ထွက်မြောက်ရာ ၁၈:၁၃၊ ၁၈) အကူအညီရယူနိုင်ရန် သူ့ယောက္ခမ၏စကားကို သူလက်ခံခဲ့သည်။ ဤတွင်လည်း မည်ကဲ့သို့သောလူများကိုရွေးချယ်သနည်း။ ကျွန်ုပ်တို့ဤသို့ဖတ်ရသည်။ “‘ဘုရားသခင်ကိုကြောက်ရွံ့လျက်၊ သစ္စာနှင့်ပြည့်စုံလျက်၊ လောဘကိုရွံရှာလျက်၊ တတ်စွမ်းနိုင်သောသူတို့ကို လူအပေါင်းတို့အထဲကရွေးကောက် [လော့]’ . . . မောရှေသည်လည်း ယောက္ခမ၏စကားကိုနားထောင်၍ စကားရှိသည်အတိုင်းပြုလျက် တတ်စွမ်းနိုင်သောသူတို့ကို ဣသရေလအမျိုးထဲကရွေးကောက်၍ လူတစ်ထောင်အုပ်၊ တစ်ရာအုပ်၊ ငါးဆယ်အုပ်၊ တစ်ဆယ်အုပ်အသီးသီးခေါင်းအရာ၌ခန့်ထားလေ၏။ သူတို့သည် ခပ်သိမ်းသောအချိန်၌ လူတို့ကိုတရားစီရင်ကြ၏။ ခက်သောအမှု၌ မောရှေ၏အယူကိုခံကြ၏။ လွယ်သောအမှုကို အလိုလိုစီရင်ကြ၏။”—ထွက်မြောက်ရာ ၁၈:၂၁-၂၆။

၁၅။ ဣသရေလလူမျိုးတွင် တရားသူကြီးအဖြစ်လုပ်ဆောင်သူတို့၏အရည်အချင်းများကား အဘယ်နည်း။

^၁၅ တရားသူကြီးများအဖြစ်လူများကိုရွေးချယ်ရာတွင် အသက်အရွယ်သည် တစ်ခုတည်းသောဆုံးဖြတ်စရာအကြောင်းမဟုတ်ကြောင်းကို တွေ့မြင်နိုင်သည်။ မောရှေဤသို့ပြောခဲ့သည်။ “ဉာဏ်ပညာ၊ သတိပညာနှင့် အတွေ့အကြုံရှိသောယောက်ျားများကို သင်တို့အမျိုးများထဲကရွေးပေးကြလော့။ သူတို့ကို သင်တို့၏အကဲအမှူးအရာ၌ငါခန့်ထားမည်။” (တရားဟောရာ ၁:၁၃၊ ကဘ) မောရှေသည် သူ့အချိန်မတိုင်မီနှစ်ပေါင်းများစွာကတည်းက လူငယ်ဧလိဟုပြောခဲ့သည့်စကားများနှင့် အတော်အကျွမ်းတဝင်ဖြစ်နေသည်။ “လူကြီးတို့သည် အစဉ်ပညာရှိသည်မဟုတ်။ အသက်ကြီးသောသူအပေါင်းတို့သည် မှန်သောတရားကိုနားလည်သည်မဟုတ်။” (ယောဘ ၃၂:၉) ခန့်အပ်ခံရသူများသည် “အတွေ့အကြုံရှိသောယောက်ျားများ” ဖြစ်ရန်လိုအပ်သည်မှာမှန်ပါသည်။ သို့သော်၊ ၎င်းတို့အပြင် သူတို့သည် တတ်စွမ်းနိုင်၊ ဘုရားကိုကြောက်ရွံ့၊ မတရားသောအကျိုးစီးပွားကိုမုန်းပြီး ဉာဏ်ပညာနှင့်သတိပညာရှိသော ယုံကြည်စိတ်ချနိုင်သည့်ယောက်ျားများဖြစ်ကြရမည်။ ယောရှု ၂၃:၃ နှင့် ၂၄:၁ တို့တွင်ဖော်ပြထားသော “အကဲအမှူးများ” နှင့် “တရားသူကြီးများ” သည် ထိုအခန်းငယ်များတွင်ဖော်ပြသော “အသက်ကြီးသူများ” နှင့်ကွာခြားမှုမရှိဘဲ သူတို့အထဲမှရွေးနှုတ်ထားသူများသာဖြစ်သည်။—Insight on the Scriptures, Volume 2, page 549 ရှု။

တရားစီရင်ခြင်း

၁၆။ ခန့်အပ်ပြီးခါစတရားသူကြီးများအား မောရှေပေးခဲ့သောသွန်သင်ချက်များနှင့်ပတ်သက်၍ ကျွန်ုပ်တို့ဘာမှတ်သားသင့်သနည်း။

^၁၆ ခန့်အပ်ခံတရားသူကြီးများအား ညွှန်ကြားချက်ပေးရာတွင် မောရှေက “သင်တို့ညီအစ်ကို၏အမှုတို့ကိုနားထောင်၍ အမျိုးသားချင်းတရားတွေ့သည်ဖြစ်စေ၊ တစ်ပါးအမျိုးသားနှင့်တွေ့သည်ဖြစ်စေ တရားသဖြင့်စီရင်ကြလော့။ တရားအမှုကိုစီရင်သောအခါ အဘယ်သူ၏မျက်နှာကိုမထောက်ရ။ လူငယ်စကားကိုလူကြီးစကားကဲ့သို့မှတ်ရမည်။ အဘယ်လူကိုမျှမကြောက်ရ။ အကြောင်းမူကား၊ တရားအမှုကို ဘုရားသခင်ပိုင်တော်မူသောကြောင့်တည်း။ ကိုယ်တိုင်မစီရင်တတ်သောအမှုကို ငါ့ [မောရှေ] ထံမှာအယူခံရမည်။ ငါလည်းနားထောင်မည်” ဟုပြောခဲ့သည်။ —တရားဟောရာ ၁:၁၆၊ ၁၇။

၁၇။ မည်သူများတရားသူကြီးအဖြစ်ခန့်အပ်ခံရပြီး ယောရှဖတ်မင်းကသူတို့အား မည်သို့သတိပေးခဲ့သနည်း။

^၁၇ မောရှေအသက်ရှင်စဉ်ကာလအတွင်းသာ ပြဿနာများကို သူ့ထံယူဆောင်သွားနိုင်သည်။ ထို့ကြောင့် ခက်ခဲသည့်အမှုကိစ္စများကို ယဇ်ပုရောဟိတ်များ၊ လေဝိများနှင့် အထူးသဖြင့် ခန့်အပ်ထားသောတရားသူကြီးများကြားနာနိုင်ရန် အခြားအစီအစဉ်များကိုပြုလုပ်ကြသည်။ (တရားဟောရာ ၁၇:၈-၁၂။ ၁ ရာဇဝင်ချုပ် ၂၃:၁-၄။ ၂ ရာဇဝင်ချုပ် ၁၉:၅၊ ၈) ယောရှဖတ်မင်းကြီးသည် ယုဒမြို့တော်တွင် မိမိခန့်အပ်သောတရားသူကြီးများအား “သင်တို့ပြုသောအမှုကိုသတိပြုကြလော့။ လူ၏အမှုကိုစောင့်၍တရားစီရင်သည်မဟုတ်။ သင်တို့စီရင်ရာတွင် ရှိတော်မူသောထာဝရဘုရား [ယေဟောဝါ၊ ကဘ] ၏အမှုကိုစောင့်၍စီရင်ရကြ၏။ . . . သင်တို့သည် စုံလင်သောစိတ်နှလုံးနှင့် ထာဝရဘုရား [ယေဟောဝါ၊ ကဘ] ကိုကြောက်ရွံ့လျက်၊ သစ္စာစောင့်လျက်စီရင်ကြလော့။ အမြို့မြို့၌နေသောအမျိုးသားချင်းတို့တွင် . . . သင်တို့နှင့်အမျိုးသားချင်းတို့အပေါ်သို့အမျက်တော်သက်ရောက်စေခြင်းငှာ သူတို့သည် ထာဝရဘုရား [ယေဟောဝါ၊ ကဘ] ကိုမပြစ်မှားရမည်အကြောင်း သတိပေးကြလော့။ သို့ပြုလျှင် ကိုယ်တိုင်အပြစ်လွတ်ကြလိမ့်မည်” ဟုပြောခဲ့သည်။—၂ ရာဇဝင်ချုပ် ၁၉:၆-၁၀။

၁၈။ (က) ဣသရေလလူမျိုးများတွင်ရှိသောတရားသူကြီးများ လိုက်နာကျင့်သုံးရသည့်စည်းမျဉ်းအချို့ကား အဘယ်နည်း။ (ခ) တရားသူကြီးများသည် မည်သည့်အချက်ကို အစဉ်အမြဲသတိရနေရမည်နည်း။ ယင်းအချက်ကိုမေ့လျော့ခြင်း၏ရလဒ်ကို မည်သည့်ကျမ်းချက်များကဖော်ပြသနည်း။

^၁၈ ဣသရေလနိုင်ငံရှိတရားသူကြီးများလိုက်နာကျင့်သုံးရမည့်စည်းမျဉ်းမူများမှာ အောက်ပါအတိုင်းဖြစ်သည်။ ဆင်းရဲချမ်းသာမရွေး သာတူညီမျှသောတရားစီရင်ခြင်း (ထွက်မြောက်ရာ ၂၃:၃၊ ၆။ ဝတ်ပြုရာ ၁၉:၁၅)၊ ဘက်မလိုက်ခြင်းကိုကြပ်မတ်လိုက်နာခြင်း (တရားဟောရာ ၁:၁၇)၊ တံစိုးလက်ဆောင်မစားခြင်း တို့ဖြစ်သည်။ (တရားဟောရာ ၁၆:၁၈-၂၀) တရားသူကြီးများအစဉ်အမြဲသတိရနေရမည်မှာ သူတို့တရားစီရင်နေသူများသည် ယေဟောဝါ၏သိုးများဖြစ်ကြောင်းဖြစ်သည်။ (ဆာလံ ၁၀၀:၃) အမှန်မှာ ဇာတိဣသရေလလူမျိုးကို ယေဟောဝါငြင်းပယ်ရသည့်တစ်ခုသောအကြောင်းမှာ သူတို့၏ယဇ်ပုရောဟိတ်များနှင့်သိုးထိန်းများသည် ဖြောင့်မတ်ခြင်းနှင့်အညီတရားစီရင်ရန်ပျက်ကွက်ကြပြီး လူများကို ကြမ်းတမ်းစွာဆက်ဆံကြသောကြောင့်ဖြစ်သည်။—ယေရမိ ၂၂:၃၊ ၅၊ ၂၅။ ၂၃:၁၊ ၂။ ယေဇကျေလ ၃၄:၁-၄။ မာလခိ ၂:၈၊ ၉။

၁၉။ ခေတ်သက္ကရာဇ်မတိုင်မီက ယေဟောဝါ၏တရားမျှတမှုစံချိန်များကို စစ်ဆေးကြည့်ခြင်းက ကျွန်ုပ်တို့အတွက် မည်သည့်တန်ဖိုးရှိစေသနည်း။ နောက်ဆောင်းပါးတွင် မည်သည့်အချက်ကို သုံးသပ်ကြမည်နည်း။

^၁၉ ယေဟောဝါသည် ပြောင်းလဲတော်မမူ။ (မာလခိ ၃:၆) ဣသရေလလူမျိုးများတွင် ပြုသင့်သည့်တရားစီရင်မှုနည်းလမ်းများနှင့် တရားမျှတမှုကိုငြင်းပယ်သူမည်သူမဆိုအား ယေဟောဝါမည်သို့ရှုမြင်ကြောင်းတို့သည် ယနေ့တရားစီရင်မှုများပြုရန်တာဝန်ရှိသောအကြီးအကဲများအား ခေတ္တရပ်၍စဉ်းစားကြည့်စေသင့်သည်။ တရားသူကြီးတစ်ဦးအနေနှင့်ယေဟောဝါ၏ပုံသက်သေနှင့် ဣသရေလလူမျိုးများတွင်ကိုယ်တော်ချမှတ်သောတရားစီရင်မှုနည်းစနစ်များသည် ခရစ်ယာန်အသင်းတော်အတွင်း တရားရေးကိစ္စများကိုကိုင်တွယ်ဖြေရှင်းရန် စည်းမျဉ်းမူများကိုပုံစံချပေးသည်။ လာမည့်ဆောင်းပါးတွင် ယင်းတို့ကိုတွေ့ရကြမည်။

ပြန်လည်ဆွေးနွေးရန်မေးခွန်းများ

▫ ယေဟောဝါ၏တရားစီရင်ရာနည်းလမ်းများကို မည်သို့မှတ်ချက်ချနိုင်သနည်း။

▫ ကာဣနနှင့် ရေလွှမ်းမိုးခြင်းမတိုင်မီလူမျိုးဆက်တို့နှင့် ယေဟောဝါ၏ဆက်ဆံရေးက ကိုယ်တော့်နည်းလမ်းတော်ကို မည်သို့ရှင်းပြသနည်း။

▫ ဘိုးဘေးများခေတ်က မည်သူများသည် တရားသူကြီးများအဖြစ်ဆောင်ရွက်သနည်း။ မည်သို့ဆောင်ရွက်ကြသနည်း။

▫ ဣသရေလလူမျိုးများ၏တရားစီရင်ရေးစနစ်ကို အခြားလူမျိုးများနှင့် ထူးခြားစေသည့်အချက်ကားအဘယ်နည်း။

▫ ဣသရေလလူမျိုးများတွင် မည်ကဲ့သို့သောလူများကို တရားသူကြီးအဖြစ်ခန့်အပ်ပြီး မည်သည့်စည်းမျဉ်းမူများကို သူတို့လိုက်လျှောက်ကြရသနည်း။