ကျွန်ုပ်တို့၏ ကြီးမြတ်တော်မူသော ဖန်ဆင်းရှင်၌ အားရရွှင်လန်းခြင်း

“ဣသရေလအမျိုးသည် မိမိကိုဖန်ဆင်းတော်မူသောဘုရားကိုအမှီပြု၍ ဝမ်းမြောက်စေ။ ဇိအုန်သားတို့သည် မိမိတို့ရှင်ဘုရင်ကိုအမှီပြု၍ ရွှင်လန်းကြစေ။”—ဆာလံ ၁၄၉:၂။

၁။ “ယခုမှလွတ်လပ်ပြီ” ဟုကြွေးကြော်ကြသော်လည်း လူသား၏အခြေအနေမှန်ကား အဘယ်နည်း။

မျက်မှောက်ကမ္ဘာသည် “ဒုက္ခဆင်းရဲခြင်း” များ၏ဖိစီးမှုကိုခံနေရပါသည်။ ၁၉၁၄ ခုနှစ်၊ ပထမကမ္ဘာစစ်နှင့်စတင်ခဲ့သော ကပ်ဆိုက်ရာကာလ၊ ‘အစီအစဉ်စနစ်၏ဆုံးခန်းချိန်’ ဆိုင်ရာယေရှု၏ပရောဖက်ပြုချက်တွင် ထိုအသုံးအနှုန်းကို ကိုယ်တော်အသုံးပြုထားတော်မူသည်။ (မဿဲ ၂၄:၃-၈) နိုင်ငံရေးသမားအများစုသည် မျှော်လင့်ချက်ကင်းသောအနာဂတ်အပြင် အခြားအဘယ်အရာကိုမျှ မမြော်မြင်နိုင်ကြချေ။ အရှေ့ဥရောပတွင် “ယခုမှလွတ်လပ်ပြီ” ဟုကြွေးကြော်ကြသော်လည်း ထိုဒေသ၏ သမ္မတဟောင်းတစ်ဦးက အခြေအနေကို ဤသို့အကျဉ်းချုပ် ဖော်ပြပါသည်။ “လူဦးရေ ပေါက်ကွဲမှုနှင့် ဖန်လုံအိမ်အာနိသင်၊အိုဇုန်းလွှာရှိအပေါက်များနှင့် အေအိုင်ဒီအက်စ်၊ နျူကလီးယားအကြမ်းဖက်မှုဘေး၊ ကြွယ်ဝသောမြောက်ပိုင်းနှင့် ဆင်းရဲသောတောင်ပိုင်းဒေသ၏ ထူးခြားစွာတိုး၍ကျယ်ပြန့်နေသောကွာဟမှု၊ ငတ်မွတ်ခြင်းဘေးဒဏ်၊ ဇီဝထုနှင့် ကမ္ဘာဂြိုဟ်၏တွင်းထွက်ပင်ရင်းတို့ ပြုန်းတီးသွားခြင်း၊ စီးပွားရေးရုပ်မြင်သံကြားထွန်းကားမှုကျယ်ပြန့်လာခြင်း၊ နယ်ပယ်လိုက် စစ်မှုတိုးပွားခြင်းဘေး အစရှိသည်တို့သည် အခြားထောင်ပေါင်းများစွာသောအကြောင်းအရာများနှင့် ပူးပေါင်းပြီး လူ့လောကကို ခြိမ်းခြောက်နေပါသည်။ ဤအဆုံးသတ်ဘေးဒဏ် မသင့်ရောက်စေရန် မည်သည့်လူ့စွမ်းအားကမျှ တားဆီးနိုင်မည်မဟုတ်ပါ။—ယေရမိ ၁၀:၂၃။

၂။ လူ့ပြဿနာများအတွက် တည်တံ့သောဖြေရှင်းနည်း မည်သူ၌ရှိသနည်း။ အဘယ်အမှုကို ကိုယ်တော်စီရင်ပြီးပြီနည်း။

^၂ သို့ရာတွင် ကျွန်ုပ်တို့၏ကြီးမြတ်တော်မူသောဖန်ဆင်းရှင်၌ တည်တံ့သောဖြေရှင်းနည်းရှိသည့်အတွက် ဝမ်းသာနိုင်ကြပါသည်။ ယေရှု၏ပရောဖက်ပြုချက်တွင် “အစီအစဉ်စနစ်၏အဆုံး” ကိုကိုယ်တော်၏မျက်မြင်မရသော “ရောက်ရှိခြင်း” နှင့်ကွင်းဆက်ထားပါသည်။ (မဿဲ ၂၄:၃၊ ၃၇-၃၉) “ကောင်းကင်သစ်” ကိုဖန်ဆင်းခြင်းငှာ မေရှိယဘုရင်အဖြစ် ယေရှုအား ယေဟောဝါနန်းတင်တော်မူ၍ ပရောဖက်ပြုအထောက်အထားတို့က ဤသမိုင်းဝင်အဖြစ်အပျက်သည် ကောင်းကင်တွင် ၁၉၁၄ ခုနှစ်၌ဖြစ်ပျက်ခဲ့ကြောင်းတင်ပြသည်။a(၂ ပေတရု ၃:၁၃) အလုံးစုံပိုင်သအုပ်စိုးခွင့်ရှိသူ ယေဟောဝါရှင်နှင့်အတူ တွဲဖက်မင်းပြုရသောယေရှုသည် နှိမ့်ချမှုရှိသိုးကဲ့သို့သောသူတို့ကို ခေါင်းမာသည့်ဆိတ်ကဲ့သို့သောသူများမှ ခွဲထုတ်ရန် လူမျိုးတို့ကို ယခုတရားစီရင်ခြင်းတာဝန်ရရှိထားတော်မူသည်။ ဘုရားတရားမဲ့သူ “ဆိတ်များ” ကို “ထာဝရဖျက်ဆီးခြင်း” အတွက်နှင့် “သိုးများ” ကိုမူကား ဘုရားသခင့်နိုင်ငံတော်၏ မြေကြီးပိုင်နက်တွင် ထာဝရအသက်ရရေးအတွက် သတ်မှတ်ထားပါသည်။—မဿဲ ၂၅:၃၁-၃၄၊ ၄၆။

၃။ ခရစ်ယာန်စစ်များဝမ်းမြောက်နိုင်စရာ အဘယ်အကြောင်းရှိသနည်း။

^၃ ထာဝရဘုရင်ယေဟောဝါရှင်သည် ကိုယ်တော်တိုင်၏ကြီးမြတ်သောရည်ရွယ်တော်မူချက်များကို သားတော်၏နိုင်ငံတော်အားဖြင့် အထွတ်အထိပ်သို့ရောက်စေသည့်အတွက်၊ ကမ္ဘာပေါ်ရှိ ဝိညာဏဣသရေလလူမျိုးမှ အကြွင်းအကျန်သည်၊ လူအုပ်ကြီးအဝင် ဤနာခံမှုရှိသိုးများနှင့်အတူ ဝမ်းမြောက်ရွှင်လန်းနိုင်စရာအကြောင်း ရှိပါသည်။ သူတို့ ဤသို့ဆိုနိုင်ကြပြီ။ “ထာဝရဘုရား [ယေဟောဝါ၊ ကဘ] ကြောင့်ငါသည်အလွန်ဝမ်းမြောက်၍ ငါ၏ဘုရားသခင်ကြောင့် ငါ့ဝိညာဉ်သည် ရွှင်လန်းမည်။ အကြောင်းမူကား၊ . . . ကယ်တင်ခြင်းအဝတ်တန်ဆာနှင့် ငါ့ကိုဝတ်ဆင်စေ . . . တော်မူပြီ။ မြေကြီးသည် အပင်ကိုပေါက်စေသကဲ့သို့လည်းကောင်း၊ လယ်ယာသည် မိမိ၌စိုက်သောမျိုးစေ့ကိုအညှောက်ထွက်စေသကဲ့သို့လည်းကောင်း ထိုအတူ ထာဝရဘုရား [ယေဟောဝါ၊ ကဘ] သည် ခပ်သိမ်းသောလူမျိုးရှေ့မှာ ဖြောင့်မတ်ခြင်းနှင့်ချီးမွမ်းခြင်းကို ပေါ်ထွန်းစေတော်မူလိမ့်မည်။” (ဟေရှာယ ၆၁:၁၀၊ ၁၁) ဤသို့ “ပေါ်ထွန်း” နေကြောင်း ယေဟောဝါအားထောမနာပြုရန် လူမျိုးအသီးအသီးမှ ယခုစုသိမ်းခံနေရသော သန်းပေါင်းများစွာသောသူတို့က သက်သေထင်ရှားပြပါသည်။

‘အမှုကိုနှိုးဆော်နေခြင်း’

၄၊ ၅။ (က) ဘုရားသခင့်လူမျိုးကိုစုသိမ်းခြင်းလုပ်ငန်းအကြောင်း မည်သို့ပရောဖက်ပြုထားသနည်း။ (ခ) ၁၉၉၂ လုပ်ငန်းတော်နှစ်အတွင်း အဘယ်ထူးခြားသောတိုးတက်မှုကို တွေ့ရှိခဲ့ရသနည်း။

^၄ စာတန့်စနစ်၏ဆုံးခန်းချိန်နီးလာလေ စုသိမ်းခြင်းလုပ်ငန်းအရှိန်တိုးမြင့်၍ မြန်ဆန်လာလေဖြစ်နေသည်။ ကျွန်ုပ်တို့၏ကြီးမြတ်သောဖန်ဆင်းရှင်သည် ဤသို့ကြွေးကြော်တော်မူသည်။ “သင်၏လူအပေါင်းတို့သည် ဖြောင့်မတ်၍ . . . ငါ၏ဘုန်းပွင့်စေခြင်းငှာ ငါ့ကိုယ်တိုင်စိုက်၍ပြုစုသောပျိုးပင်ဖြစ်ရကြလိမ့်မည်။ သူငယ်တစ်ယောက်သည် လူတစ်ထောင်ဖြစ်ရလိမ့်မည်။ အားနည်းသောသူတစ်ယောက်သည် အားကြီးသောလူမျိုးဖြစ်ရလိမ့်မည်။ ငါထာဝရဘုရား [ယေဟောဝါ၊ ကဘ] သည်အချိန်ရောက်လျှင် ထိုအမှုကိုနှိုးဆော်မည်။” (ဟေရှာယ ၆၀:၂၁၊ ၂၂) ဤအံ့ဖွယ်ကောင်းသည့်နှိုးဆော်ခြင်းအမှုကို ဤမဂ္ဂဇင်း၏ စာမျက်နှာ ၁၂ မှ ၁၅ ပါကမ္ဘာချီ ယေဟောဝါသက်သေများ၏ ၁၉၉၂ လုပ်ငန်းတော်နှစ်မှတ်တမ်းတွင် ဖော်ပြထားပါသည်။

^၅ ဤမှတ်တမ်း၌ ထူးခြားချက်ကား လွန်ခဲ့သောနှစ်ထက် ၄.၅ ရာခိုင်နှုန်းပိုများသော ၁၉၃,၉၆၇ ဦး တိုးများလာသည့် နှုန်းသစ်ဖြစ်သည့် ဘုရားသခင့်နိုင်ငံတော်ကြွေးကြော်သူများအရေအတွက် ၄,၄၇၂,၇၈၇ ဖြစ်သည်။ ၁၉၉၂ အတွင်းနှစ်ခြင်းခံသူအများဆုံးအရေအတွက် ၃၀၁,၀၀၂ ဦး ကလည်း ကျမ်းစာသမ္မာတရားကို မြောက်မြားစွာသောသူတို့ လက်သင့်ခံယူနေကြကြောင်း ဖော်ပြပါသည်။ “မိုးအုံ့၍ မှောင်မိုက်ထူထပ်သောနေ့ဖြစ်” သည့်ဤအချိန်တွင် ကျိုင်းကောင်အုပ်များကဲ့သို့ “အများဖြစ်၍ အားကြီးသောအမျိုး” သည် “မြေကြီးစွန်းတိုင်အောင်” ဘုရားသခင့်နိုင်ငံတော်အကြောင်း သက်သေခံနေကြသည့်အတွက် မည်မျှအားရရွှင်လန်းနိုင်ကြပါသည်တကား။ (ယောလ ၂:၂၊ ၂၅။ တမန်တော် ၁:၈) အလွန်အေးမြသောအလာစကာ—ရေခဲဖုံးလွှမ်းသော အရပ်ဒေသများသို့ ကင်းမျှော်စင်အသင်း၏လေယာဉ် အကြိမ် ၅၀ ကျော်ရောက်ခဲ့သည့် အရပ်—မှ ပူပြင်းသောသဲကန္တာရဖြစ်သည့် မာလီနှင့်ဘာကီနာဖာစိုနိုင်ငံများနှင့် နေရာအနှံ့ပြန့်ကြဲတည်ရှိသော မိုက်ခရိုနီးရှားကျွန်းစုများအထိ ယေဟောဝါ၏ကျေးကျွန်များသည် “မြေကြီးစွန်းတိုင်အောင် [ကိုယ်တော်၏] ကယ်တင်ခြင်းကိုပြုစိမ့်သောငှာ . . . တစ်ပါးအမျိုးသားတို့လင်းစရာ” အဖြစ်ထွန်းလင်းနေကြပါသည်။—ဟေရှာယ ၄၉:၆။

၆၊ ၇။ မကြာမီနှစ်များက မမျှော်လင့်သောအဘယ်ဖြစ်ရပ်များ ဖြစ်ခဲ့ပြီး၊ ယင်းကို ယေဟောဝါ၏ကျေးကျွန်များ မည်သို့တုံ့ပြန်ခဲ့ကြသနည်း။

^၆ ယေဟောဝါရှင်သည် ကိုယ်တော်တိုင်၏လူမျိုးကို ကာကွယ်ပြီးထောက်မကူညီရာတွင် ခိုလှုံရာနှင့်ခိုင်ခံ့သောရဲတိုက် ကဲ့သို့ဖြစ်ချေပြီ။ ဒေသအများအပြားတွင် ရက်စက်ကြမ်းကြုတ်မှုများကို ယေဟောဝါသက်သေများသည် ဆယ်စုနှစ်များစွာ ခံခဲ့ကြရပြီ။ (ဆာလံ ၃၇:၃၉၊ ၄၀၊ ၆၁:၃၊ ၄) သို့သော် များမကြာမီက ၂၁ နိုင်ငံတွင် အံ့ဖွယ်ကောင်းသောနည်းဖြင့် ကန့်သတ်ချက်များနှင့် တားဆီးပိတ်ပင်မှုများကို ပယ်ရှားခဲ့ရာ ကမ္ဘာကိုအစိုးရသောမင်းအဖြစ် ခရစ်တော်အား ကြီးမြတ်တော်မူသောဖန်ဆင်းရှင် နန်းတင်မြှောက်ခဲ့ပြီဖြစ်ကြောင်း ယခုဘုရားသခင်၏လူမျိုးသည် လွတ်လပ်စွာကြွေးကြော်နိုင်ကြပြီ။—ဆာလံ ၂:၆-၁၂။

^၇ ယေဟောဝါ၏လူမျိုးသည် သူတို့ရရှိခါစ လွတ်လပ်မှုကို ကောင်းစွာအသုံးပြုနေကြပါသလော။ ဘူဂေးရီးယား၊ ရိုမေးနီးယားနှင့် အရှေ့ဥရောပရှိ ယခင်ဆိုဗီယက်ပြည်ထောင်စုအပြင် အာဖရိကတိုက်ရှိ အင်ဂိုလာ၊ ဘီနင်နှင့်မိုဇမ်ဘစ်နိုင်ငံများ၏ တိုးတက်မှုများကို ဇယားတွင်သတိပြုပါလေ။ ဇိုင်ယာနိုင်ငံတွင်လည်း တိုးတက်မှုသည် အလွန်ထူးကဲပါသည်။ “ထာဝရဘုရား [ယေဟောဝါ၊ ကဘ] သည်ကောင်းမြတ်တော်မူ၍ ကရုဏာတော် အစဉ်အမြဲတည်သောကြောင့် ဂုဏ်ကျေးဇူးတော်ကို ချီးမွမ်းကြလော့။ . . . ကရုဏာတော် အစဉ်အမြဲတည်သည်ဖြစ်၍ အံ့ဖွယ်သောအမှုတို့ကို တစ်ပါးတည်းသာပြုတော်မူထသော” ဘုရားသခင်ကိုချီးမွမ်းလော့ဟူသောဖိတ်ခေါ်ချက်အတိုင်း လွတ်မြောက်လာသောညီအစ်ကိုများသည် အားရရွှင်လန်းစွာဖြင့် ပြုမူနေကြပါသည်။ (ဆာလံ ၁၃၆:၁၊ ၄) ဘုရားနိုင်ငံတော်ဘက်သို့ အခြားသိုးကဲ့သို့သောသူများကို ဇွဲလုံ့လဖြင့်စုရုံးခြင်းအားဖြင့် ကျေးဇူးတင်ကြောင်း တင်ပြနေကြပါသည်။

၈။ အရှေ့ဥရောပနှင့် အာဖရိကတွင် ယေဟောဝါအားချီးမွမ်းသူ လူသစ်များသည် မည်သို့ “မိုးတိမ်ကဲ့သို့ . . . ပျံလာ” ကြသနည်း။

^၈ လွန်ခဲ့သောနွေရာသီအတွင်း ဥရောပရှိ ယခင်ကွန်မြူနစ်နိုင်ငံများတွင်ကျင်းပခဲ့သော ယေဟောဝါလူမျိုး၏ စည်းဝေးပွဲကြီးများသို့ တက်ရောက်ခဲ့သူဦးရေသည် အလွန်အံ့သြစရာ ဖြစ်ခဲ့ပါသည်။ ထိုထက်အံ့သြစရာကား ပူးတွဲပါဇယားဖော်ပြသည့်အတိုင်း နှစ်ခြင်းခံသူများ၏အရေအတွက်ဖြစ်ပါသည်။ ဤနည်းထပ်တူအာဖရိကတိုက်၊ တိုဂိုနိုင်ငံတွင် ၁၉၉၁၊ ဒီဇင်ဘာ ၁၀ ရက်နေ့တွင် ပိတ်ပင်မှုကို ဖယ်ရှားခဲ့သည်။ နောက်လတွင် ပြည်လုံးကျွတ်စည်းဝေးပွဲကြီးတစ်ခု ကျင်းပခဲ့သည်။ လယ်ကွင်းရှိ လစဉ်ပျမ်းမျှကြေညာသူ ၆,၄၄၃ နှင့်နှိုင်းယှဉ်ကြည့်လျှင် စည်းဝေးပွဲကြီးသို့ တက်ရောက်လာသူမှာ ၂၅,၄၆၇ ဦး အထိတိုးများလာပြီး ကြေညာသူအရေအတွက်၏ ၈.၆ ရာခိုင်နှုန်းဖြစ်သည့် နှစ်ခြင်းခံသူ ၅၅၆ ဦး ရှိခဲ့ပါသည်။ ဟေရှာယ ၆၀:၈ ဖော်ပြသည့်အတိုင်းပင် ယေဟောဝါအားချီးမွမ်းသူ လူသစ်များသည် ယေဟောဝါလူမျိုး၏အသင်းတော်များတွင် “မိုးတိမ်ကဲ့သို့လည်းကောင်း၊ မိမိတို့အိမ်သို့ပျံသောချိုးများကဲ့သို့လည်းကောင်း ပျံလာ” နေကြပါသည်။

၉။ များမကြာမီက လွတ်လပ်လာသောနိုင်ငံများရှိခရစ်ယာန်များသည် ‘ဝစွာစားနိုင်ကြ’ ရန် အဘယ်ပြင်ဆင်ချက်များပြုလုပ်ပေးနေသနည်း။

^၉ အရှေ့ဥရောပနှင့်အာဖရိကတို့တွင် ဝိညာဏအစာငတ်ပြတ်မှုကိုလည်း လျော့ပေါ့စေနေပါသည်။ ဂျာမနီ၊ အီတလီနှင့် တောင်အာဖရိကနိုင်ငံတို့ရှိ ကင်းမျှော်စင်အသင်း၏ ပုံနှိပ်တိုက်များမှ ဝိညာဉ်ရေးဘက် ငတ်ပြတ်နေသောနိုင်ငံများထံ ဘာသာစကားအမြောက်အမြားဖြင့် စာအုပ်စာတမ်းများကို ကုန်တင်ကား အစီးပေါင်းများစွာ တင်ပို့ပေးနေပါသည်။ ယခင်ကဆိုလျှင် သက်သေခံများသည် အချင်းချင်းထံ မဂ္ဂဇင်းများကိုလက်ဆင့်ကမ်း ဝေမျှဖတ်ရှုကြရသော်လည်း ယခုဆိုလျှင် ဝိညာဏအစာအလျှံပယ်စားသုံးနေကြရသည်။ “သင်တို့သည် ဝစွာစားရကြလိမ့်မည်။ အံ့သြဖွယ်သောအမှုတို့ကို သင်တို့၌ပြုသော သင်တို့၏ဘုရားသခင် ထာဝရဘုရား [ယေဟောဝါ၊ ကဘ] ၏နာမတော်ကို ချီးမွမ်းကြလိမ့်မည်” ဟူသော ပရောဖက်ပြုချက်ပြည့်စုံမှု၌ပါဝင်ခွင့်ရသည့်အတွက် သူတို့အားရရွှင်လန်းကြသည်။—ယောလ ၂:၂၆။

ထပ်ဆင့်တိုးတက်မှုကို ထိန်းသိမ်းပေးခြင်း

၁၀။ သတိရအောက်မေ့ပွဲတက်ရောက်သူဦးရေ များပြားသည်ကိုထောက်၍ စိတ်ဝင်စားသူများအား မည်သို့ဖိတ်ခေါ်ထားပါသနည်း။

^၁၀ ယေရှုသေခြင်း၏သတိရအောက်မေ့ပွဲတက်ရောက်သူ ကမ္ဘာတစ်ဝန်းလူဦးရေ ၁၁,၄၃၁,၁၇၁ ဖြစ်သည့် ၇၈၁,၀၁၃ ဦး တိုးတက်မှုသည် လွန်ခဲ့သောနှစ်ထက် ၇.၃ ရာခိုင်နှုန်းတိုးတက်ခြင်းဖြစ်ပါသည်။ အသင်လူသစ်အပေါင်းတို့ကို လှိုက်လှဲစွာကြိုဆိုပါသည်။ ဤစိတ်ဝင်စားခါစ လူသစ်အားလုံးတို့သည် ယေဟောဝါသက်သေတစ်ဦးတစ်ယောက်နှင့် အိမ်တွင်းကျမ်းစာသင်အံမှုပြုခြင်းမှ အကျိုးခံစားကြရမည်ဆိုလျှင် မည်မျှကောင်းမွန်မည်တကား။ (ဟေရှာယ ၄၈:၁၇ ရှု။) လုပ်ငန်းတော်နှစ်မှတ်တမ်းအရ လစဉ်ကျမ်းစာသင်အံမှုပေါင်း ၄,၂၇၈,၁၂၇ ခု ကျင်းပနေကြောင်းသိရှိရ၍ ယင်းသည် ချီးမွမ်းစရာကောင်းသည့် ၈.၄ ရာခိုင်နှုန်းတိုးတက်မှုဖြစ်ပါသည်။ သို့ရာတွင် ဤလုပ်ငန်းကိုဆောင်ရွက်နိုင်သည့်သူ မြောက်မြားစွာရှိပါသေးသည်။ စိတ်ဝင်စားသူများထံ မှန်မှန်သွားပြီး အခမဲ့အိမ်တွင်းကျမ်းစာသင်အံမှုကျင်းပပေးခြင်းအားဖြင့် သူတို့အား ထာဝရအသက်လမ်းပေါ် မြဲမြံစွာလျှောက်လှမ်းသွားနိုင်ကြရန် ကူညီပေးဖို့အတွက် ယေဟောဝါသက်သေများအသင့်ရှိကြပါသည်။ (ယောဟန် ၃:၁၆၊ ၃၆) ဤသို့သောသင်အံမှုကို တောင်းဆိုပါလေ။ ဘုရားသခင့်နိုင်ငံတော်ခန်းမတွင် သင့်အားလှိုက်လှဲစွာ အမြဲကြိုဆိုနေကြောင်း စွဲမှတ်ထားပါ။—ဆာလံ ၁၂၂:၁။ ရောမ ၁၅:၇။

၁၁၊ ၁၂။ (က) အချို့နိုင်ငံများတွင် အဘယ်အခက်အခဲများ ကြုံတွေ့နေရသနည်း။ (ခ) ကြွယ်ဝသောနိုင်ငံများနှင့် ချို့ငဲ့သောနိုင်ငံများစပ်ကြား အဘယ် “အညီအမျှဖြစ်စေ” ခြင်းအမှု ဖြစ်ပေါ်လာနေသနည်း။

^၁၁ အလွန်ကောင်းမွန်သောနိုင်ငံတော်ခန်းမများရှိသည့် အသင်းတော်များသည် ကောင်းချီးများစွာရရှိထားပါသည်။ နှစ်ပေါင်းများစွာပိတ်ပင်မှုအောက်နေရသော သစ္စာရှိသက်သေခံများ၏အခြေအနေမူကား ထိုသို့မဟုတ်။ သူတို့သည် အုပ်စုငယ်ကလေးများဖွဲ့ကာ လျှို့ဝှက်စွာစည်းဝေးကြရသည်။ ဤနေရာအတော်အတန်တွင် ယခုလွတ်လပ်နေကြပြီဖြစ်သော်လည်း ဘုရားသခင့်နိုင်ငံတော်ခန်းမ အနည်းငယ်သာရှိပါသည်။ ဥပမာ၊ အာဖရိကနိုင်ငံတစ်ခုတွင် အသင်းတော်ပေါင်း ၉၃ ခု အတွက်နိုင်ငံတော်ခန်းမသုံးခုသာရှိသည်။ ထိုကြောင့်စည်းဝေးများကို မြေကွက်လပ်ကြီးများတွင် အများအားဖြင့်ကျင်းပလေ့ရှိသည်။ လူ ၁၅၀ ရှိအသင်းတော်တစ်ခု၏စည်းဝေးများကို မှန်မှန်တက်ရောက်သူ ၄၅၀ အထိရှိနိုင်ပါသည်။

^၁၂ အရှေ့ဥရောပတွင် ကိုယ်ပိုင်ဝယ်ယူရန်၊ သို့မဟုတ် တည်ဆောက်ရန် အများအားဖြင့်ခဲယဉ်းသော်လည်း အနည်းငယ်တိုးတက်နေပါသည်။ ၁၉၉၂၊ နိုဝင်ဘာ ၂၈ ရက်နေ့တွင် ပိုလန်နိုင်ငံ၌ အလွန်ကောင်းမွန်သောဌာနခွဲအဆောက်အအုံသစ်တစ်ခုကို အနုမောဒနာပြုရန် စီစဉ်ခဲ့ပါသည်။ ယေဟောဝါသက်သေများ၏ ကမ္ဘာချီလုပ်ငန်းအတွက် ရက်ရောစွာလှူဒါန်းသည့်ငွေကို ခန်းမများနှင့် အခြားအဆောက်အအုံများ ဆောက်လုပ်ရန် အသုံးပြုနေပါသည်။ ဤနည်းအားဖြင့် အခွင့်အရေးနည်းသောနိုင်ငံများရှိ အသင်းတော်တို့၏ဝိညာဉ်ရေးကို အထောက်အကူပြုခြင်းငှာ မိမိတို့၏ “စည်းစိမ်” မှရက်ရောစွာလှူဒါန်းသောညီအစ်ကိုများ၏ စိတ်စေတနာကြောင့် “အညီအမျှဖြစ်စေ” နေပါသည်။—၂ ကောရိန္သု ၈:၁၃၊ ၁၄။

နာရီပေါင်း သန်းတစ်ထောင်

၁၃။ ၁၉၉၂ ခုနှစ်အတွင်း ဟောပြောခြင်းနှင့်သွန်သင်ပေးခြင်းလုပ်ငန်းတွင် နာရီမည်မျှအသုံးပြုခဲ့ပြီး၊ ဤကိန်းဂဏန်းတွင် မည်သူတို့၏ကြိုးပမ်းမှုကိုဖော်ပြသနည်း။

^၁၃ နာရီပေါင်း သန်းတစ်ထောင် နှင့်သင်ဘာလုပ်မည်နည်း။ ထာဝရအသက်သို့တက်လှမ်းနေသူအားလုံးသည် ထိုမျှသောနာရီပေါင်းအပြင် ထိုထက်မကတိုး၍ အချိန်ကုန်ခံကာ အကျိုးရှိရှိ စိတ်ကျေနပ်ရောင့်ရဲစွာဖြင့် ယေဟောဝါအမှုတော်ကိုဆောင်ရွက်နိုင်ပါသည်။ သို့သော်ဤမျှများပြားသောအချိန်နာရီကို တစ်နှစ်အတွင်း ဖိဖိစီးစီးကြိုးစားလုပ်ကိုင်သည်ကို စဉ်းစားကြည့်ပါလေ။ ယေဟောဝါသက်သေများသည် ၁၉၉၂ ခုနှစ်တွင် ဤမျှကြိုးစားခဲ့ပါသည်။ ဘုရားသခင့်နိုင်ငံတော်ကြေညာသူအားလုံးတို့၏ မှတ်တမ်းများကို စုပေါင်းကြည့်လိုက်သည့်အခါ နှုန်းသစ်ဖြစ်သည့် နာရီပေါင်း ၁,၀၂၄,၉၁၀,၄၃၄ ကို ကြီးမြတ်တော်မူသောဖန်ဆင်းရှင်အားချီးမွမ်းခြင်း၊ “လူစုဝေးရာ၌လည်းကောင်း၊ အိမ်များ၌ [တစ်အိမ်မှတစ်အိမ်၊ ကဘ] လည်းကောင်း . . . ဆုံးမသြဝါဒ [သွန်သင်၊ ကဘ] ပေး” ခြင်းတို့၌ အကောင်းတကာ့အကောင်းဆုံးနည်းဖြင့် အသုံးပြုခဲ့သည်။ (တမန်တော် ၂၀:၂၀) ပျမ်းမျှအားဖြင့်ဆိုလျှင် လစဉ်သက်သေခံပေါင်း ၄,၂၉၈,၇၃၇ ဦး မှတ်တမ်းသွင်းနေကြပါသည်။ ဤသူများသည် ဘဝနောက်ခံအလွှာအသီးသီးမှ လာသူများဖြစ်ကြသည်။ ဘုရားသခင့်နိုင်ငံတော်လုပ်ငန်းအတွက် အချို့ဆိုလျှင် အချိန်အကန့်အသတ်သာပါဝင်လုပ်ကိုင်နိုင်ကြသည်။ ဤသူတို့တွင် မိသားစုကိုထောက်ပံ့ပေးရသည့် အိမ်ထောင်ဦးစီးများ၊ သက်ကြီးရွယ်အိုများ၊ ကျန်းမာရေးချို့တဲ့သူများနှင့် ကျောင်းနေဆဲကလေးများပါဝင်သည်။ မည်သို့ဆိုစေကာမူ ယေဟောဝါကို မည်မျှချစ်မြတ်နိုးကြောင်း တင်ပြသည့်အတွက် သူတို့တစ်ဦးစီ၏မှတ်တမ်းသည် တန်ဖိုးရှိပါသည်။—လုကာ ၂၁:၂-၄ နှိုင်းယှဉ်။

၁၄။ လူငယ်များသည် အဘယ်နည်းဖြင့် ‘ကြီးမြတ်တော်မူသောဖန်ဆင်းရှင်ကို အောက်မေ့’ နေကြသနည်း။

^၁၄ ငယ်ရွယ်သောလူမျိုးဆက်တစ်ဆက်သည် ယေဟောဝါ၏လုပ်ငန်းတွင် ကြီးပြင်းလာနေကြပြီး၊ ဤသူတို့မှ အများစုသည် ဒေသနာ ၁၂:၁ ပါရှောလမုန်၏စကားကို လက်တွေ့အသုံးချနေကြခြင်းကား ဝမ်းသာအားရစရာပင်ဖြစ်သည်။ “ယခုအသက်ပျိုစဉ်အခါပင် သင့်ကိုဖန်ဆင်းတော်မူသောအရှင်ကို အောက်မေ့လော့။” ကျောင်းစာကိုကြိုးစားအသုံးချနေရုံမက ဆက်ကပ်အပ်နှံထားသောမိဘများ၏ ဝိညာဉ်ရေးဘက်လေ့ကျင့်သွန်သင်မှုကိုလည်း သူတို့ခံယူနေကြပါသည်။ မကြာမီကကျင်းပခဲ့သောစည်းဝေးကြီးများတွင် ဆယ်ကျော်သက်ကလေးများစွာတို့သည် နှစ်ခြင်းယူခြင်းငှာ ကိုယ့်ကိုယ်ကိုဆက်ကပ်အပ်နှံခဲ့ကြသည်ကိုတွေ့ရှိရသဖြင့်လည်း အလွန်ဝမ်းသာစရာပင်။ အလုပ်အကိုင်၊ သို့မဟုတ် အသက်မွေးဝမ်းကျောင်းပညာတစ်မျိုးမျိုး သင်ယူခြင်းအားဖြင့် ကျောင်းပြီးသည့်အခါ ရှေ့ဆောင်နိုင်ရန် လူငယ်များစွာသည် လက်တွေ့ကျကျအသင့်ပြင်ဆင်နေကြကြောင်း သိရသည့်အတွက်လည်း ဝမ်းသာစရာပင်ဖြစ်သည်။ ဤနည်းအားဖြင့် တစ်ခါတစ်ရံတဲရှင်ချုပ်ခဲ့သော တမန်တော်ပေါလုနည်းတူ သူတို့လည်း မိမိတို့၏ဝမ်းစာရေးအတွက် အထောက်အပံ့ပြုနိုင်ကြပါလိမ့်မည်။—တမန်တော် ၁၈:၁-၄။

၁၅၊ ၁၆။ ဘုရားသခင့်နိုင်ငံတော်လုပ်ငန်း တိုးတက်ရေးအတွက် ရှေ့ဆောင်များနှင့် အခြားအချိန်ပြည့်ကျေးကျွန်များ မည်သို့ကြိုးစားအားထုတ်ခဲ့၍ သူတို့အနက် အချို့တို့သည် အဘယ်ကောင်းချီးကိုခံစားခဲ့ကြရပြီနည်း။

^၁၅ ဘုရားသခင့်နိုင်ငံတော်လုပ်ငန်း တိုးတက်ရေးအတွက် ရှေ့ဆောင်များနှင့် အခြားအချိန်ပြည့်ကျေးကျွန်များ အကြီးအကျယ်ကြိုးစားအားထုတ်နေကြပါသည်တကား။ လွန်ခဲ့သောနှစ်အတွင်း ရှေ့ဆောင်များ၏အရေအတွက်သည် အများဆုံးဖြစ်သော ၉၃၁,၅၂၁ ဦး သို့တိုးတက်လာပါသည်။ သူတို့သည် နေ့စဉ်တစ်အိမ်မှတစ်အိမ်ဟောပြော၍ အိမ်တွင်းကျမ်းစာသင်အံမှုများပြုခြင်းအားဖြင့် ကျမ်းစာကိုထိထိမိမိရှင်းလင်းဖော်ပြလာနိုင်ကြပါသည်။ ထို့ပြင်ဘုရားသခင့်လုပ်ငန်းတော်ကိုဆောင်ရွက်ရာတွင် အရည်အချင်းတိုးမြှင့်ပေး၍ ပျော်ရွှင်မှုပိုရရှိစေသည့် နှစ်ပတ်ကြာ ရှေ့ဆောင်လုပ်ငန်းသင်တန်းကျောင်းကို တက်နိုင်ခွင့်ရခဲ့သူ များစွာရှိပါသည်။

^၁၆ ဤသစ္စာရှိရှေ့ဆောင်တစ်ဦးစီသည် ဟေရှာယ ၅၀:၄ (ကဘ) ပါစကားများကို သဘောတူညီနိုင်ကြသည်။ “ငါသည် ပင်ပန်းသူအား မစခြင်းငှာ စကားပြောတတ်မည်အကြောင်း၊ ပိုင်သအုပ်စိုးခွင့်ရှိ ယေဟောဝါသခင်ကိုယ်တော်တိုင်သည် လူတတ်၏နှုတ်သတ္တိကို ငါ့အားပေးတော်မူပြီ။” ကျွန်ုပ်တို့ဝန်းကျင်ရှိ ဖောက်ပြန်ပျက်စီးနေသောလောကကြီးကို ယနေ့စိတ်ပျက်နေသူအများအပြားတို့သည် သစ္စာရှိရှေ့ဆောင်များ ဆင့်ဆိုသောစကားကြောင့် စိတ်သက်သာလန်းဆန်းမှုရယူနေကြပါသည်။—သု၊ ၁၅:၂၃။ ယေဇကျေလ ၉:၄ နှိုင်းယှဉ်။

ကြီးမားသော ဆောက်လုပ်ရေးအစီအစဉ်

၁၇။ ဝိညာဏတည်ဆောက်မှုအပြင် များမကြာမီက ရုပ်ပစ္စည်းအရ အဘယ်ဆောက်လုပ်ရေးကို တွေ့မြင်ခဲ့ရပြီနည်း။

^၁၇ ယေဟောဝါသက်သေများ၏ ကမ္ဘာချီဝိညာဏချမ်းသာကြွယ်ဝမှုကြောင့် ရုပ်ပိုင်းကြီးထွားရန်လည်း လိုအပ်လာပါသည်။ ပုံနှိပ်တိုက်များ၊ ရုံးခန်းများ၊ ဗေသလအိမ်များနှင့် ဘုရားသခင့်နိုင်ငံတော်ခန်းမများ၊ စည်းဝေးပွဲခန်းမများ ဆောက်လုပ်ပေးရန် လိုအပ်လာပါသည်။ ထိုကြောင့် ယေဟောဝါသက်သေများသည် ရုပ်ပိုင်းဆောက်လုပ်သူများဖြစ်ဖို့ရန်လည်း လိုအပ်လာပါသည်။ ထပ်တူဆောက်လုပ်ခြင်းမျိုးကို ရှောလမုန်မင်းကြီးခေတ်က ပြုလုပ်ခဲ့ရပါသည်။ ခမည်းတော်ဒါဝိဒ်မင်းကြီးအား ယေဟောဝါပေးတော်မူခဲ့သည့် “ဗိသုကာဆိုင်ရာပုံစံကို ဝိညာဉ်တော်အားဖြင့်ရရှိသည့်အတိုင်း” ယေဟောဝါ၏ဝတ်ပြုရေးအတွက် ဗိမာန်တော်ကို ရှောလမုန်တည်ဆောက်လေသည်။ (၁ ရာဇဝင်ချုပ် ၂၈:၁၁၊ ၁၂၊ ကဘ) ဤနည်းအားဖြင့် ရှောလမုန်သည် တန်ဖိုးဖြတ်မရဉာဏ်ပညာစကားများဖြင့်သာမက ဤလောကမမီနိုင်သည့် ခန့်ညားထည်ဝါသောအဆောက်အအုံကိုလည်း ဦးစီးဆောက်လုပ်ခဲ့ပါသည်။—၃ ဓမ္မရာဇဝင် ၆:၁။ ၉:၁၅၊ ၁၇-၁၉။

၁၈၊ ၁၉။ (က) အဘယ်အလျင်အမြန်ဆောက်လုပ်ပြီးသော စီမံကိန်းများကို ယေဟောဝါအဖွဲ့အစည်းတွင် ဆောင်ရွက်နေပါသနည်း။ (ခ) ဝိညာဏနှင့်ရုပ်ပိုင်းဆောက်လုပ်ရေးတွင် ယေဟောဝါ၏ဝိညာဉ်တော် မည်သို့ထင်ရှားသနည်း။

^၁၈ ယနေ့ ယေဟောဝါသက်သေများသည် ဘုရားသခင့်မှုတ်သွင်းခံ ဆောက်လုပ်ရေးပုံစံများအရ မဆောက်လုပ်ကြသော်လည်း သူတို့အပေါ် ဘုရားသခင့်ဝိညာဉ်တော်ရှိပါသည်။ ယင်းကြောင့် ဣသရေလလူမျိုးခေတ်ကကဲ့သို့ပင် လောကီသားများ အံ့ဩစရာဖြစ်လောက်အောင် သူတို့ဆောက်လုပ်နိုင်ကြပါသည်။ (ဇာခရိ ၄:၆) အချိန်တိုတောင်းပါသည်။ ဘုရားသခင့်နိုင်ငံတော်ခန်းမများနှင့် အခြားအဆောက်အအုံများကို အလျင်အမြန်လိုအပ်နေပါသည်။ အချို့နိုင်ငံများတွင်ဆိုလျှင် အလျင်အမြန်ဆောက်လုပ်ပြီးသော ဘုရားသခင့်နိုင်ငံတော်ခန်းမများသည် သာမန်ကိစ္စပင်ဖြစ်ချေပြီ။ ဥပမာ၊ နှစ်ရက်အတွင်း အပြီးဆောက်ခဲ့သောခန်းမဆောင်များကို လွန်ခဲ့သော ၁၀ နှစ်အတွင်း ၃၀၆ လုံးဆောက်လုပ်ခဲ့ရကြောင်း ကနေဒါနိုင်ငံမှ သတင်းရပါသည်။ ယေဟောဝါ၏လုပ်ငန်းသည် ကမ္ဘာတစ်ဝန်း အလျင်အမြန်တိုးတက်နေသဖြင့် ဌာနခွဲအဆောက်အအုံသစ်၊ သို့မဟုတ် ဌာနခွဲတိုးချဲ့မှုကို စုစုပေါင်း ၄၃ နေရာတွင်လုပ်ကိုင်နေဆဲ၊ သို့မဟုတ် ဆောက်လုပ်ရန် အစီအစဉ်ရှိနေပါသည်။ ထို့ပြင် ဗေသလအိမ်တွင်လုပ်အားပေးသူ တစ်ထောင်ခန့် နေထိုင်နိုင်ရန် အထပ် ၃၀ ရှိတိုက်ကို ဘရုတ်ကလင်မြို့တွင် ဆောက်လုပ်ပြီးလုပြီဖြစ်သည်။ နယူးယောက်ပြည်နယ်၊ ပက်တဆန်အရပ်ဒေသ၌လည်း ကင်းမျှော်စင်အသင်း ဆောင်ရွက်ခဲ့သမျှစီမံကိန်းများတွင် အကြီးမားဆုံးဖြစ်သည့် သမ္မာကျမ်းစာပညာပေးဌာနကို ဆောက်လုပ်နေရာ ထင်သည်ထက်စောပြီးစီးရန် အကြောင်းရှိသည်။

^၁၉ ဤစီမံကိန်းများကို ကမ္ဘာ့ဆောက်လုပ်ရေးကုမ္ပဏီများ အံ့သြယူရလောက်အောင် အရည်အချင်းပြည့်မီကျွမ်းကျင်စွာ စွမ်းဆောင်နေကြပါသည်။ အဘယ်ကြောင့်နည်း။ ဆက်ကပ်အပ်နှံထားသော ယေဟောဝါသက်သေခံများ၏ ထူးကဲစွာလှူဒါန်းစွန့်ကြဲမှုများကြောင့်ဖြစ်သည်။ သူတို့အား ပစ္စည်းဥစ္စာဖြင့်ထောက်ပံ့ရန်သာမက သူတို့အချိန်နှင့် ခွန်အားကိုပါ စိတ်နှလုံးအကြွင်းမဲ့ပေးဆက်ကြရန် ယေဟောဝါ၏ဝိညာဉ်တော်က တိုက်တွန်းလှုံ့ဆော်ပေးပါသည်။ ဆောက်လုပ်သောနေရာများတွင် ကျွမ်းကျင်လိမ္မာသည့် အလုပ်ကိုတန်ဖိုးထားလေးမြတ်သူများ အများအပြားလှုပ်ရှားဆောင်ရွက်နေကြပါသည်။ အလုပ်သမားသပိတ်မှောက်ခြင်း၊ အလုပ်ခွင်တွင် ခိုကပ်ပျင်းရိနေခြင်းမရှိပါ။ မောရှေခေတ်က တဲတော်ဆောက်သူများ၊ ရှောလမုန်ခေတ်က ဗိမာန်တော်ဆောက်သူများအား တိုက်တွန်းလှုံ့ဆော်ပေးခဲ့သကဲ့သို့ပင် ယေဟောဝါ၏ဝိညာဉ်တော်သည် သူတို့အားစေ့ဆော်ပေးပါသည်။ ဤလုပ်သားများ၏ ထူးခြားသောအရည်အချင်းမှာ ဝိညာဉ်ရေးစိတ်ထားပင်ဖြစ်သည်။—ထွက်မြောက်ရာ ၃၅:၃၀-၃၅၊ ၃၆:၁-၃၊ ၃၉:၄၂၊ ၄၃။ ၃ ဓမ္မရာဇဝင် ၆:၁၁-၁၄ နှိုင်းယှဉ်။

၂၀။ (က) သတင်းကောင်းကို အဘယ်အတိုင်းအတာအထိ ဟောပြောရဦးမည်နည်း။ (ခ) ယေဟောဝါ၏လူများအတွက် အဘယ်ကောင်းချီးမျှော်လင့်စရာအကြောင်း ရှိသေးသနည်း။

^၂၀ ဗိမာန်တော်ကိုတည်ဆောက်ပြီးသည့်နောက် ရှောလမုန်သည် သူ၏ဆောက်လုပ်ရေးအစီအစဉ်ကို ဆက်လက်ဆောင်ရွက်သေးသည်။ (၂ ရာဇဝင်ချုပ် ၈:၁-၆) မျက်မှောက်ခေတ်သက်သေခံခြင်းလုပ်ငန်း အဘယ်အထိဆက်တိုးတက်မည်၊ ယင်းနှင့်ယှဉ်တွဲ၍ ခန်းမများနှင့် အခြားအဆောက်အအုံများ ဆောက်လုပ်ခြင်းလုပ်ငန်းကို အဘယ်အထိဆောက်လုပ်ရမည်အကြောင်း ကျွန်ုပ်တို့မသိရသေးပါ။ သို့ရာတွင် ယေဟောဝါမိန့်တော်မူသည်အထိ ဘုရားသခင့်နိုင်ငံတော်သတင်းကောင်းကို ဟောပြောပြီးပြီဆိုလျှင် အဆုံးတည်းဟူသော “ကြီးစွာသောဒုက္ခ” ရောက်လာလိမ့်မည်ကိုကား ကျွန်ုပ်တို့သိထားပါသည်။ (မဿဲ ၂၄:၁၄၊ ၂၁) လောဘရမ္မက်ကြီးသူများ၏ ဖျက်ဆီးခြင်းကိုမခံရတော့သည့်ကမ္ဘာတွင် ယေဟောဝါ၏ “ကောင်းကင်သစ်နှင့်မြေကြီးသစ်” အစီအစဉ်သည် ထိုအခါ လူသားအပေါင်းတို့အပေါ် မရေအတွက်နိုင်သည့်တိုင် ကောင်းချီးများသွန်းလောင်းပေးပါလိမ့်မည်။ ထိုကြောင့် ကျွန်ုပ်တို့၏ကြီးမြတ်တော်မူသောဖန်ဆင်းရှင်အား ချီးမွမ်းထောမနာပြုကာ ‘ဘုရားသခင်ဖန်ဆင်းသောအရာတို့ကြောင့် အစဉ်အမြဲဝမ်းမြောက်ရွှင်လန်း’ နိုင်ကြပါစေ။—ဟေရှာယ ၆၅:၁၇-၁၉၊ ၂၁၊ ၂၅။

[အောက်ခြေမှတ်ချက်များ]

သင်ရှင်းပြနိုင်သလော

▫ ကျွန်ုပ်တို့၏ကြီးမြတ်တော်မူသောဖန်ဆင်းရှင်၌အားရရွှင်လန်းရန် အဘယ်အကြောင်းများရှိသနည်း။

▫ ၁၉၉၂ လုပ်ငန်းတော်နှစ်အတွင်း အဘယ်တိုးတက်မှုများကို မှတ်တမ်းတင်ခဲ့ပြီနည်း။

▫ ယခင်က သက်သေခံခြင်းလုပ်ငန်းကို ပိတ်ပင်ခဲ့သော နိုင်ငံများတွင် အဘယ်ကြွယ်ဝသောကောင်းချီးများအကြောင်း ကြားသိရသနည်း။

▫ ယေဟောဝါ၏အဖွဲ့အစည်းတွင် တိုးတက်မှုရှိစေရန်လူငယ်များနှင့်ရှေ့ဆောင်များသည် မည်သို့ကူညီခဲ့ကြပြီနည်း။

▫ ရုပ်ပိုင်းနှင့် ဝိညာဏ တည်ဆောက်ရေးလုပ်ငန်းတွင်ပါ ယေဟောဝါ၏လူတို့ မည်သို့အလုပ်များနေကြပြီနည်း။

[စာမျက်နှာ ၁၆ ပါ လေးထောင့်ကွက်]

လွန်ခဲ့သောနှစ်က ဟောပြောခြင်းနှင့်သွန်သင်ခြင်းလုပ်ငန်းတွင် နာရီပေါင်း သန်းတစ်ထောင်ကျော် အသုံးပြုခဲ့ကြသည်

[စာမျက်နှာ ၁၀ ပါ ရုပ်ပုံ]

ဟောပြောခြင်းနှင့် သွန်သင်ပေးခြင်းလုပ်ငန်းအပေါ် ယေဟောဝါ၏ကောင်းချီးသွန်းလောင်းနေကြောင်း လွန်ခဲ့သောနှစ်က နှစ်ခြင်းယူသူအရေအတွက် ထောင်ပေါင်းများစွာက ဖော်ပြပါသည်

[စာမျက်နှာ ၁၆ ပါ ရုပ်ပုံ]

လူငယ်မြောက်မြားစွာတို့သည် ‘သူတို့၏ကြီးမြတ်တော်မူသောဖန်ဆင်းရှင်ကို အောက်မေ့’ နေကြပါသည်