ဘာသာတရားသည် သင့်လိုအပ်ရာများကို ဖြည့်စွက်ပေးနေပါသလော

လေ၊ ရေ၊ စားစရာ၊ ခိုလှုံရာ—ယင်းတို့သည် လူ့လိုအပ်ရာများဖြစ်ကြောင်း တစ်လောကလုံးကအသိအမှတ်ပြုထားကြသည်။ ယင်းတို့မရှိလျှင် သင်သည် ချို့ငဲ့ပြီးသေရလတ္တံ့။ သို့ရာတွင် ရှေးအချိန်က ဣသရေလခေါင်းဆောင် မောရှေသည် လူ့လိုအပ်ရာ တစ်ခုဖြစ်သော အစာရေစာထက်ပင် ပိုမိုအရေးကြီးသည့်အရာကို ညွှန်ပြခဲ့သည်။ မောရှေ ဤသို့ဆို၏– “လူသည် မုန့်အားဖြင့်သာ အသက်ကို မွေးရသည်မဟုတ်။ ဘုရားသခင် မိန့်တော်မူသမျှအားဖြင့် အသက်မွေးရသည်။”—တရားဟောရာ ၈:၃။

ဤလေးနက်သောစကားများဖြင့် ကျွန်ုပ်တို့၏ ဘာသာရေး သို့မဟုတ် ဝိညာဉ်ရေး လိုအပ်ရာများကို ဖြည့်စွက်ပေးခြင်းသည် အရေးကြီးကြောင်း မောရှေဖော်ပြခဲ့သည်။ ကျွန်ုပ်တို့အသက်ရှင်ရေးသည် ယင်းတို့တွင် ကျေနပ်ရောင့်ရဲနေခြင်းအပေါ် တည်မှီနေကြောင်း သူဆိုသည်! ဣသရေလလူမျိုးသည် အနှစ် ၄၀ တောအရပ်၌ လှည့်လည်စဉ် ‘ယေဟောဝါ၏မိန့်တော်မူချက်များ’ အားဖြင့် အမှန်တကယ်အသက်ရှင်ခဲ့ကြသည်။ ထိုသို့သာမဟုတ်လျှင် သူတို့အသက်သေဆုံးကြရမည်။ ဘုရားသခင်အမိန့်တော်ရှိသည်အတိုင်း မန္နအမည်ရှိ မုန့်တစ်မျိုး ကောင်းကင်မှ အံ့ဖွယ်နည်းဖြင့် ကျလာခဲ့သည်။ ရေငတ်ပြေရန် ကျောက်ဆောင်မှ ရေထွက်လာသည်။ သို့သော် ကာယလိုအပ်ရာများကို ဖြည့်စွက်ပေးရုံထက်မက သူတို့ကို ကိုယ်တော်ကူညီတော်မူခဲ့သည်။ မောရှေ ဤသို့ဆိုသည်– “အဘသည် သားကို ဆုံးမသကဲ့သို့ သင်၏ ဘုရားသခင် ထာဝရဘုရားသည် သင့်အား ဆုံးမတော်မူသည်။”—တရားဟောရာ ၈:၄၊ ၅; ထွက်မြောက်ရာ ၁၆:၃၁၊ ၃၂; ၁၇:၅၊ ၆။

စာရိတ္တရေး (ဝါ) ဘာသာရေးနှင့်စပ်လျဉ်း၍ ဣသရေလလူမျိုးသည် အမှားအမှန်ကို ဆုံးဖြတ်စီရင်ရန် အကူအညီမဲ့မဖြစ်ခဲ့ပါ။ ဘုရားသခင်ကိုယ်တော်တိုင် သူတို့ကို လမ်းညွှန်တော်မူခဲ့သည်။ ကျန်းမာရေးနှင့်ညီညွတ်သည့်အစာ၊ ကျန်းမာရေးဆိုင်ရာ ကြပ်မတ်သော စည်းကမ်းချက်များ၊ စာရိတ္တနှင့် ဘာသာတရားဆိုင်ရာ ကောင်းမွန်သောမူများကို အကြမ်းဖျင်းဖော်ပြသည့်မှတ်သားဖွယ်တရားဝင်ဥပဒေများပါသော မောရှေပညတ္တိကျမ်းကို သူတို့အား ပေးတော်မူခဲ့သည်။ ဤနည်းဖြင့် ဣသရေလလူမျိုး၏ ကျန်းမာရေးနှင့် ဝိညာဉ်ရေးအကျိုးကို ဘုရားသခင်တိုးပွားစေတော်မူခဲ့သည်။ ‘ယေဟောဝါ၏မိန့်တော်မူချက်များ’ အားဖြင့် သူတို့အသက်ရှင်ခဲ့ကြသည်။

ဤနည်းအားဖြင့် အခြားတိုင်းနိုင်ငံများနှင့် ဣသရေလနိုင်ငံသည် လုံးဝမတူခဲ့ပါ။ မောရှေခေတ်က အဲဂုတ္တု (အီဂျစ်) နိုင်ငံသည် အဓိကကမ္ဘာ့အာဏာစက်အဖြစ် အုပ်ချုပ်ခဲ့သည်။ ယင်းနိုင်ငံသည် ဘာသာရေးအလွန်လိုက်စားသောနိုင်ငံဖြစ်ပါသည်။ ကမ္ဘာ့စာအုပ်စွယ်စုံကျမ်းက ဤသို့ဆိုသည်– “သဘာဝ အသွင်အပြင်တိုင်း၊ လူ့အလုပ်အကိုင်တိုင်းကို နတ်ဘုရား (ဘုရား၊ ဘုရားမများ) အသီးအသီး ဩဇာလွှမ်းမိုးသည်ဟု ရှေးအဲဂုတ္တုလူမျိုး ယုံကြည်ခဲ့သည်။ ယင်းကြောင့်လည်း နတ်ဘုရားမြောက်မြားစွာကို သူတို့ကိုးကွယ်ခဲ့ကြသည်။ . . . အဓိကနတ်ဘုရားများအပြင် အဲဂုတ္တုမြို့ရွာတိုင်းတွင်ပင် ကိုယ်ပိုင်နတ်ဘုရားများကို ကိုးကွယ်ကြသည်။”

ဘုရားမြောက်မြားစွာကိုးကွယ်ခြင်းက အဲဂုတ္တုလူမျိုး၏ လိုအပ်သောဝိညာဉ်ရေးကို ဖြည့်ပေးခဲ့သလော။ မဖြည့်ပေးချေ။ အဲဂုတ္တုနိုင်ငံသည် အယူသီးမှုနှင့် ယုတ်ညံ့သော လိင်ဆိုင်ရာအကျင့်များတွင် စုံးစုံးမြုပ်နေသည့်နိုင်ငံ ဖြစ်လာသည်။ ကျန်းမာရေးကောင်းစွာ အသက်ရှင်နေထိုင်စေမည့်အစား အဲဂုတ္တုဘဝပုံစံက “အနာဆိုး” များရစေသည်။ (တရားဟောရာ ၇:၁၅) ထိုကြောင့် အဲဂုတ္တုဘုရားများကို ‘စက်ဆုပ်ဖွယ်ရာများ’ ဟုရွံရှာသောသဘောမျိုးဖြင့် သမ္မာကျမ်းစာခေါ်ဆိုထားခြင်းကို အံ့ဩစရာမရှိချေ။—ယေဇကျေလ ၂၀:၇၊ ၈၊ သမ။

ယနေ့ ထပ်တူအခြေအနေမျိုးပေါ်ပေါက်နေသည်။ လူအများစုသည် အနည်းဆုံး ဘာသာရေးဆိုင်ရာ ယုံကြည်မှု တစ်မျိုးမဟုတ်တစ်မျိုးရှိကြသည်; ဘုရားမဲ့သူဟု ကိုယ့်ကိုယ်ကို ခေါ်ဆိုမည့်သူ အလွန်နည်းမည်။ သို့သော် ယေဘုယျအနေနှင့် လူသားတို့၏ဝိညာဉ်ရေးလိုအပ်ရာများကို ဘာသာရေးသည် ကျေနပ်ရောင့်ရဲမှု မပေးနိုင်သည်ကား ရှင်းနေပါသည်။ လူတို့သည် အမှန်တကယ်ပင် “ဘုရားသခင်မိန့်တော်မူသမျှအားဖြင့် အသက်မွေး” ကြမည်ဆိုလျှင် စစ်မှု၊ လူမျိုးရေး၊ ငတ်ပြတ်မှုနှင့် မညှာမတာချို့တဲ့နွမ်းပါးမှုပြဿနာများ ယနေ့ ရှိပါမည်လော။ လုံးဝမရှိနိုင်! သို့တိုင် မိမိတို့ဘာသာပြောင်းရန် စဉ်းစားမည့်သူ နည်းပေမည်။ အဘယ်ကြောင့်နည်း။ အချို့ဆိုလျှင် ဘာသာရေးအကြောင်း ဆွေးနွေးခြင်း သို့မဟုတ် ဘာသာရေးဆိုင်ရာ အယူအဆအသစ်များကို နားထောင်ရန်အတွက်ပင် ဆန္ဒမရှိကြပါ!

ဥပမာ၊ အနောက်အာဖရိက၊ ဂါနာနိုင်ငံရှိသူတစ်ဦးသည် ဓမ္မအမှုဆောင်တစ်ဦးအား ဤသို့ပြောသည်– “ဂျူးများအား သူတို့၏ပရောဖက်များမှတစ်ဆင့် ဘုရားသခင်သည် ကိုယ်တော်တိုင်ကို ထင်ရှားဖော်ပြခဲ့သည်နည်းတူ ကျွန်ုပ်တို့၏ တန်ခိုးကြီးမားသော ယဇ်ဆရာ၊ ဆရာမများမှတစ်ဆင့် ဘုရားသခင် ထင်ရှားပြသည်ဟု အကျွန်ုပ်ယုံကြည်သည်။ ကျွန်ုပ်တို့အာဖရိကလူမျိုးအချို့သည် မိမိယဇ်ဆရာများကို အသိအမှတ်မပြုဘဲ ယေရှုနှင့်အခြားသူတို့အကြောင်း ပြောဆိုကြခြင်းသည် ဝမ်းနည်းစရာဖြစ်သည်။”

ရိုးရာအာဖရိကအဖွဲ့အစည်းများစွာတွင် ခရစ်ယာန်ဘာသာတရားကို လူဖြူဘာသာ—အကျိုးပေးသည်ထက် အကျိုးယုတ်စေခဲ့သော တင်သွင်းစနစ်တစ်ခုအဖြစ် ယူမှတ်ကြသည်။ သို့သော် သဘောထားကျဉ်းမြောင်းခြင်းသည် သင့်ဝိညာဏလိုအပ်ရာများကို ဖြည့်ဆည်းပေးရန် အကူအညီဖြစ်မည်လော သို့မဟုတ် အတားအဆီးဖြစ်မည်လော။ အာဖရိကစကားပုံတစ်ခုက ဤသို့ဆိုသည်– “ဆာသည့်အတွက် လက်နှစ်ဘက်စလုံးဖြင့် အစာကို နှိုက်မစားတတ်ပါ။” ဤစားပုံစားနည်းသည် မယဉ်ကျေးရုံမက အန္တရာယ်ပင်ရှိသည်—အထူးသဖြင့် ဟင်းခွက်ထဲပါသည့်အရာကို မသိသောအခါတွင်ဖြစ်သည်! သို့တိုင် အသေအချာ စစ်ဆေးစဉ်းစားပြီး၍မဟုတ်ဘဲ အစွဲတစ်ခုခုအရ သို့မဟုတ် မိသားစုထုံးစံအရ ဘာသာတရားကို ရွေးချယ်တတ်ကြသူ များပါသည်။

သင့်ဝိညာဏလိုအပ်ရာကို ဖြည့်စွက်ပေးနိုင်သည့် ဝတ်ပြုရေးသည် “ဉာဏ်ဆိုင်ရာဝတ်ဖြစ်သည့်အလျောက် ဆက်ကပ်” သောဝတ်ပြုရေးလည်းဖြစ်သင့်သည်။ (ရောမ ၁၂:၁၊ သမ) အကြောင်းစုံကြားသိထား၍ အသိဉာဏ်ရှိရှိ ရွေးချယ်ထားခြင်း ဖြစ်သင့်သည်။ ထို့ကြောင့် အာဖရိကရှုထောင့်မှ ဘာသာတရားရွေးချယ်ခြင်းကိစ္စကို စစ်ဆေးကြည့်ကြစို့။ သို့ရာတွင် ဆက်သိရှိမည့်အကြောင်းအရာသည် နေရာအရပ်ရပ်ရှိ စာရှုသူများ စိတ်ဝင်စားရာ ဖြစ်ပေလိမ့်မည်။

[စာမျက်နှာ ၃ ပါ ရုပ်ပုံ]

ကျွန်ုပ်တို့ဝိညာဏလိုအပ်ရာကို ဖြည့်ပေးခြင်းသည် အရေးကြီးကြောင်း မောရှေဖော်ပြခဲ့

[စာမျက်နှာ ၄ ပါ ရုပ်ပုံ]

ခရစ်ယာန်ဘောင်သာသနာပြုများနှင့်စပ်လျဉ်း၍ အာဖရိကနိုင်ငံ၏ အတွေ့အကြုံကြောင့် အချို့သူများ ကျမ်းစာအပေါ်သဘောထားကျဉ်းမြောင်းခဲ့ကြ