ယေဟောဝါ၏အလိုတော်ကို သူတို့လုပ်ဆောင်ခဲ့ကြ

မောရှေနှင့် အာရုန်—ဘုရားသခင့်နှုတ်ကပါဌ်တော်ကို ရဲရင့်စွာကြွေးကြော်သူများ

အဖြစ်အပျက်ကို မြင်ယောင်ကြည့်လိုက်ပါ– အသက်ရှစ်ဆယ်အရွယ်မောရှေနှင့် သူ၏အစ်ကိုအာရုန်တို့သည် ကမ္ဘာပေါ်တွင်တန်ခိုးအကြီးမားဆုံးသောပုဂ္ဂိုလ်—အီဂျစ်ဘုရင်ဖာရော—၏ရှေ့မှောက်တွင်ရပ်နေကြသည်။ အီဂျစ်လူမျိုးများအတွက် ဤပုဂ္ဂိုလ်သည် ဘုရားများ၏ကိုယ်စားလှယ်မျှသာမဟုတ်ပါ။ သူကိုယ်နှိုက်က ဘုရားတစ်ပါးဖြစ်သည်ဟု သူတို့ယုံကြည်ကြသည်။ သိန်းငှက်ခေါင်းရှိဟောရပ်စ်ဘုရားဝင်စားသူဖြစ်သည်ဟု ယူမှတ်ခံရသည်။ အီဂျစ်ဘုရားနှင့်ဘုရားမများအနက် ဟောရပ်စ်သည် အိုက်စစ်စ်နှင့် အော်စီရစ်စ်တို့နှင့်အတူ အဓိကသုံးပါးပေါင်းတစ်ဆူဘုရားအဝင်ဖြစ်သည်။

ဖာရောထံချဉ်းကပ်သွားသူမည်သူမဆို သူ၏သရဖူအလယ်ဗဟိုမှထိုးထွက်နေသော နိမိတ်ဆိုးပုံသဏ္ဌာန်ဆောင်သည့် မြွေဟောက်ခေါင်းတစ်ခုကို သတိမပြုမိဘဲနေမည်မဟုတ်ပေ။ ဤမြွေသည် ဖာရော၏ရန်သူမှန်သမျှကို မီးမှုတ်ထုတ်၍ဖျက်ဆီးပစ်လိုက်နိုင်သည်ဟု ထင်ရ၏။ ယခု မောရှေနှင့်အာရုန်တို့သည် ဤဘုရား-ဘုရင်၏ရှေ့သို့ မကြုံစဖူးသောတောင်းဆိုမှုမျိုးဖြင့် ရောက်လာကြသည်—ယင်းမှာ ကျွန်ခံနေရသောဣသရေလလူမျိုးတို့ကို သူတို့၏ဘုရားသခင်ယေဟောဝါအတွက်ပွဲခံနိုင်ရန် ကျွန်ဘဝမှလွှတ်ပေးဖို့ဟူ၍ဖြစ်သည်။—ထွက်မြောက်ရာ ၅:၁။

ဖာရော၏နှလုံး ခိုင်မာလိမ့်မည်ဖြစ်ကြောင်း ယေဟောဝါကြိုပြောနှင့်ပြီးဖြစ်သည်။ ထို့ကြောင့် သူ၏ရန်လိုသော ဤတုံ့ပြန်မှုကို မောရှေနှင့်အာရုန်တို့မအံ့သြခဲ့ကြပေ– “ထာဝရဘုရား၏ စကားကိုနားထောင်၍ ဣသရေလအမျိုးသားတို့ကို ငါလွှတ်စေခြင်းငှာ ထိုထာဝရဘုရားကားအဘယ်သူနည်း။ ထာဝရဘုရားကို ငါမသိ၊ ဣသရေလအမျိုးသားတို့ကို ငါမလွှတ်ဟုဆိုလေ၏။” (ထွက်မြောက်ရာ ၄:၂၁; ၅:၂) သို့ဖြင့် စိတ်လှုပ်ရှားဖွယ်ကောင်းသောထိပ်တိုက်ရင်ဆိုင်မှုအတွက် အဆင်သင့်ဖြစ်နေကြပေပြီ။ နောက်တစ်ကြိမ်တွေ့ဆုံကြချိန်၌ မောရှေနှင့်အာရုန်တို့က မိမိတို့သည် စစ်မှန်၍အနန္တတန်ခိုးနှင့်ပြည့်စုံတော်မူသောဘုရားသခင်ကိုကိုယ်စားပြုကြောင်း ဖာရောကို အံ့ဖွယ်သက်သေသာဓကများ ပြသခဲ့ကြသည်။

အံ့ဖွယ်အမှုတစ်ခုဖြစ်ပျက်

ယေဟောဝါ၏ညွှန်ကြားချက်အရ အီဂျစ်ဘုရားများထက် ယေဟောဝါ၏မြင့်မားကြီးမြတ်မှုကိုသက်သေထူသော အံ့ဖွယ်အမှုတစ်ခုကို အာရုန်ပြုလုပ်ခဲ့သည်။ ဖာရော၏ရှေ့တော်သို့ သူ၏တုတ်ကိုပစ်ချလိုက်သောအခါ ချက်ချင်းပင်မြွေကြီးတစ်ကောင်ဖြစ်သွားသည်! ဤအံ့ဖွယ်အမှုကြောင့်စိတ်ရှုပ်ထွေးသွားကာ ဖာရောသည် သူ၏မျက်လှည့်ဆရာပုရောဟိတ်များကို ဆင့်ခေါ်လိုက်သည်။a နတ်ဆိုးတန်ခိုး၏အကူအညီနှင့် ဤလူတို့သည် သူတို့၏တုတ်များဖြင့်ထပ်တူအရာမျိုးကို လုပ်ဆောင်နိုင်ခဲ့ကြသည်။

အကယ်၍ ဖာရောနှင့်သူ၏ပုရောဟိတ်များသည် ပီတိဖြစ်စေကာမူ တစ်ခဏမျှသာဖြစ်သည်။ အာရုန်၏မြွေက သူတို့၏မြွေများကို တစ်ကောင်ပြီးတစ်ကောင်မျိုချလိုက်သောအခါ သူတို့မျက်နှာများကို စိတ်ကူးကြည့်ပါ! ရောက်ရှိနေကြသောသူအားလုံးတို့သည် အီဂျစ်လူမျိုးများ၏နတ်ဘုရားများက စစ်မှန်သောဘုရားသခင် ယေဟောဝါနှင့်ယှဉ်ပြိုင်၍မရကြောင်း တွေ့ရှိနိုင်ကြပေသည်။—ထွက်မြောက်ရာ ၇:၈-၁၃။

သို့သော် ဤအရာများဖြစ်ပျက်ပြီးနောက်၌ပင် ဖာရော၏နှလုံးသည် ဆက်၍ခိုင်မာနေဆဲပင်ဖြစ်သည်။ အီဂျစ်နိုင်ငံအပေါ် အကြီးအကျယ်ပျက်စီးစေသည့်ထိုးနှက်ချက် သို့မဟုတ် ကပ်ဘေးဆယ်ခုကို ဘုရားသခင်ကျရောက်စေပြီးသည့်နောက်၌သာ ဖာရောသည် မောရှေနှင့်အာရုန်တို့အား ဤသို့ဆိုခဲ့သည်– “သင်တို့မှစ၍ ဣသရေလအမျိုးသားတို့၊ ထ၍ငါ့လူစုထဲကထွက်သွားကြလော့။ သင်တို့တောင်းသည်အတိုင်း ထာဝရဘုရားအားသွား၍ဝတ်ပြုကြလော့။”—ထွက်မြောက်ရာ ၁၂:၃၁။

ကျွန်ုပ်တို့အတွက် သင်ခန်းစာ

တန်ခိုးကြီးမားသောအီဂျစ်ဘုရင်ဖာရောထံချဉ်းကပ်သွားရန် မောရှေနှင့်အာရုန်တို့ကို ဘာကဖြစ်စေနိုင်ခဲ့သနည်း။ ပထမတွင် မောရှေသည် “နှုတ်လေးသောသူ၊ စကားနှေးနှေးပြောတတ်သောသူ” ဖြစ်ပါသည်ဟုဆိုကာ မိမိ၏အရည်အချင်းကို ယုံကြည်စိတ်ချမှုမရှိကြောင်းဖော်ပြခဲ့သည်။ ယေဟောဝါ၏အကူအညီနှင့်ပတ်သက်၍ အာမခံချက်ရရှိပြီးနောက်၌ပင် “အလိုတော်ရှိသောသူ၏လက်တွင် ပေးလိုက်တော်မူပါ” ဟု သူတောင်းပန်ခဲ့သည်။ တစ်နည်းအားဖြင့်ဆိုလျှင် အခြားသူတစ်ဦးဦးကို ဘုရားသခင်စေလွှတ်ပါရန် မောရှေတိုးလျှိုးတောင်းပန်နေခြင်းဖြစ်သည်။ (ထွက်မြောက်ရာ ၄:၁၀၊ ၁၃) သို့သော်လည်း ယေဟောဝါသည် နှိမ့်ချမှုရှိသောမောရှေကိုအသုံးပြုခဲ့ကာ သူ၏တာဝန်ကိုပြီးမြောက်အောင်ဆောင်ရွက်နိုင်ရန် လိုအပ်သည့်ဉာဏ်ပညာနှင့်ခွန်အားများကိုပေးခဲ့လေသည်။—တောလည်ရာ ၁၂:၃။

ယနေ့၊ ယေဟောဝါဘုရားသခင်နှင့် ယေရှုခရစ်တို့၏ကျေးကျွန်များသည် “လူမျိုးတကာတို့ကို . . . တပည့်ဖြစ်စေ” ရန်ဟူသည့် အမိန့်ကိုထမ်းဆောင်နေကြပါသည်။ (မဿဲ ၂၈:၁၉၊ ၂၀) ဤခန့်အပ်ချက်ကိုတစ်စိတ်တစ်ပိုင်းအနေနှင့် ကျေပွန်ရန်ဆောင်ရွက်ရာ၌ ကျမ်းစာအသိပညာနှင့် ကျွန်ုပ်တို့တွင်ရှိသောမည်သည့်အရည်အချင်းကိုမဆို အကောင်းဆုံးနည်းဖြင့်အသုံးပြုသင့်ပေသည်။ (၁ တိမောသေ ၄:၁၃-၁၆) ကျွန်ုပ်တို့၏အားနည်းချက်များကို အာရုံစူးစိုက်နေမည့်အစား ကျွန်ုပ်တို့အားဘုရားသခင်ပေးသည့် မည်သည့်တာဝန်ကိုမဆို ယုံကြည်စိတ်ချစွာဖြင့်လက်ခံယူကြစို့။ ကိုယ်တော်၏အလိုတော်ကိုလုပ်ဆောင်နိုင်ရန် ကျွန်ုပ်တို့အား အရည်အချင်းနှင့်ခွန်အားတို့ဖြင့် ကိုယ်တော်ပြည့်ဝစေနိုင်တော်မူသည်။—၂ ကောရိန္သု ၃:၅၊ ၆; ဖိလိပ္ပိ ၄:၁၃။

မောရှေသည် လူနှင့်နတ်ဆိုးတို့၏ဆန့်ကျင်မှုကိုခံနေရသောကြောင့် လူ့ထက်သာလွန်သောအစွမ်းရှိသူ၏အကူအညီ အမှန်ပင်လိုအပ်ပေသည်။ ထို့ကြောင့် သူ့အားယေဟောဝါ ဤသို့အာမခံချက်ပေးသည်– “ကြည့်လော့၊ သင့်ကို ဖာရောမင်း၏ဘုရားအရာ၌ ငါခန့်ထား၏။” (ထွက်မြောက်ရာ ၇:၁၊ သမ္မာ) မှန်သည်၊ မောရှေ၌ ဘုရားသခင့်ကူညီထောက်ပံ့မှုနှင့်အခွင့်အာဏာရှိနေသည်။ မောရှေသည် သူ့အပေါ်တွင်ယေဟောဝါ၏ဝိညာဉ်တော်ရှိနေသဖြင့် ဖာရောနှင့် မာနကြီးသောထိုအုပ်စိုးရှင်၏အပေါင်းအပါတို့ကို ကြောက်ရွံ့စရာအကြောင်းလုံးဝမရှိပါ။

ဓမ္မအမှုကိုကျေပွန်နိုင်ရန်အတွက် ကျွန်ုပ်တို့သည်လည်း ယေဟောဝါ၏သန့်ရှင်းသောဝိညာဉ်တော် သို့မဟုတ် တက်ကြွလှုပ်ရှားသောစွမ်းအားအပေါ် မှီခိုအားထားရပေမည်။ (ယောဟန် ၁၄:၂၆; ၁၅:၂၆၊ ၂၇) ဘုရားသခင်၏ကူညီထောက်ပံ့မှုနှင့်အတူ ဤသို့သီဆိုခဲ့သောဒါဝိဒ်၏စကားများကို ကျွန်ုပ်တို့ပဲ့တင်ထပ်နိုင်ကြပါသည်– “ငါသည် ဘုရားသခင်ကိုခိုလှုံသည်ဖြစ်၍ ကြောက်စရာမရှိ။ လူသည် ငါ၌အဘယ်သို့ပြုနိုင်သနည်း။”—ဆာလံ ၅၆:၁၁။

စာနာထောက်ထားစွာဖြင့် ယေဟောဝါသည် မောရှေအား သူ၏တာဝန်၌တစ်ဦးတည်းပစ်မထားခဲ့ပါ။ ယင်းအစား ဘုရားသခင်က ဤသို့မိန့်တော်မူသည်– “သင်၏အစ်ကိုအာရုန်သည် သင်၏ပရောဖက်ဖြစ်ရလိမ့်မည်။ ငါမိန့်တော်မူသမျှတို့ကို သင်သည်ပြန်ပြောရမည်။ ဖာရောဘုရင် . . . ကို သင်၏အစ်ကိုအာရုန်သည် . . . လျှောက်ရမည်။” (ထွက်မြောက်ရာ ၇:၁၊ ၂) မောရှေပြုမူဆောင်ရွက်နိုင်လောက်သည့်အတိုင်းအတာအတွင်း ယေဟောဝါလုပ်ဆောင်ပေးခဲ့ခြင်းသည် မည်မျှမေတ္တာရှိလှပါသည်တကား!

အကြီးမြတ်ဆုံးသောအရှင်ယေဟောဝါ၏သက်သေများ ဖြစ်ခြင်းနှင့်ပတ်သက်သောစိန်ခေါ်ချက်ကို လက်ခံသူခရစ်ယာန်ချင်းများဖြင့်ဖွဲ့စည်းထားသည့် အသင်းအဖွဲ့တစ်ခုကို ကျွန်ုပ်တို့အတွက်ဘုရားသခင်ပြင်ဆင်ပေးထားသည်။ (၁ ပေတရု ၅:၉) သို့သော် အတားအဆီးများနှင့် ကျွန်ုပ်တို့ ကြုံကြရမည်ဖြစ်သော်ငြားလည်း ဘုရားသခင့်နှုတ်ကပါဌ်တော်ကို ရဲရင့်စွာကြွေးကြော်သူများဖြစ်သော မောရှေနှင့်အာရုန်တို့ကဲ့သို့ ဖြစ်ကြစို့။

[အောက်ခြေမှတ်ချက်များ]

[စာမျက်နှာ ၂၅ ပါ ရုပ်ပုံ]

ဖာရော၏ရှေ့မှောက်တွင် မောရှေနှင့်အာရုန်တို့သည် ရဲရင့်စွာဖြင့်ယေဟောဝါကိုကိုယ်စားပြုခဲ့ကြသည်