နှစ်သိမ့်မှုနှင့် အားပေးမှု—မှန်ကူကွက်များစွာပါသည့် ကျောက်မျက်များ

ကျွန်ုပ်တို့အများစုသည် ငွေကြေးပိုင်းတွင်မဟုတ်ဘဲ စိတ်ဓာတ်ပိုင်းတွင် ဖြူခါပြာခါကျနေပါလားဟုခံစားခဲ့ရသည့် အချိန်ကာလများကို ဖြတ်သန်းခဲ့ရသည်။ ကျွန်ုပ်တို့သည် လက်မှိုင်ချကာ အလွန်စိတ်ပျက်လက်ပျက်ပင် ဖြစ်ခဲ့သည်။ သို့သော်လည်း ဤကဲ့သို့သောအချိန်များတွင် ကျွန်ုပ်တို့သည် အလွန်ကောင်းသည့်အရာတစ်ခုကို ဖန်တီးပေးနိုင်သည့် အဖိုးတန်ရတနာတစ်စုံတစ်ရာကို ကောင်းကောင်းရယူဆုပ်ကိုင်ထားနိုင်ပေမည်။ ထို “ကျောက်မျက်” ကား အားပေးမှုပင်တည်း။

ကျမ်းစာထဲတွင် “အားပေး” နှင့် “နှစ်သိမ့်” ဟူသည့် စကားလုံးများအတွက် တူညီသောဂရိစကားလုံးကို အသုံးပြုထားသည်။ စကားလုံးနှစ်ခုစလုံးသည် ရဲရင့်မှု၊ ခွန်အားနှင့် မျှော်လင့်ချက်တို့ကို ဝေမျှပေးသည့်သဘော သက်ဝင်သည်။ ကျွန်ုပ်တို့သည် အားနည်းနေချိန်တွင် သို့မဟုတ် စိတ်အားငယ်နေချိန်တွင် လိုအပ်သည့်အရာမှာ နှစ်သိမ့်မှုနှင့် အားပေးမှုသာဖြစ်သည်။ ယင်းတို့ကို မည်သည့်နေရာတွင် တွေ့ရှိနိုင်သနည်း။

ယေဟောဝါသည် “နှစ်သိမ့်ခြင်းအမျိုးမျိုးပေးတော်မူသော ဘုရား” ဖြစ်ကြောင်း ကျမ်းစာက ကျွန်ုပ်တို့ကို အာမခံထားသည်။ (၂ ကောရိန္သု ၁:၃၊ သမ) “ဘုရားသခင်သည် ငါတို့တွင် အဘယ်သူနှင့်မျှဝေးတော်မူသည်မဟုတ်” ဟုလည်း ယင်းကကျွန်ုပ်တို့အား ပြောထားသည်။ (တမန်တော် ၁၇:၂၇) ထို့ကြောင့် နှစ်သိမ့်မှုနှင့် အားပေးမှုတို့ကို ရရှိနိုင်ပါသည်။ အားပေးမှုကို ယေဟောဝါရှင်စီမံပေးတော်မူသည့် ယေဘုယျကဏ္ဍလေးခုကို သုံးသပ်ကြစို့။

ဘုရားသခင်နှင့် နှစ်ဦးချင်းဆက်ဆံရေးအားဖြင့်

နှစ်သိမ့်မှု၏အကြီးမားဆုံးအရင်းအမြစ်မှာ ယေဟောဝါဘုရားသခင်နှင့် နှစ်ဦးချင်းဆက်ဆံရေးဖြစ်သည်။ ထိုကဲ့သို့သော ဆက်ဆံရေးမျိုးရရှိနိုင်ခြင်းသည်ပင်လျှင် အားရစရာပင်။ ယင်းနှင့်ဖီလာလျက် အဘယ်လောကီအုပ်စိုးရှင်များသည် ကျွန်ုပ်တို့တယ်လီဖုန်းဆက်သည်ကို လက်ခံနားထောင် သို့မဟုတ် ကျွန်ုပ်တို့ပြဿနာများတွင် နှစ်ဦးချင်းစိတ်ဝင်စားမှုကို ပြသမည်နည်း။ ယေဟောဝါသည် ဤကဲ့သို့သောလူသားများထက် မနှိုင်းယှဉ်နိုင်လောက်အောင် သာ၍အစွမ်းရှိတော်မူသည်။ သို့တိုင်၊ ကိုယ်တော်သည် နှိမ့်ချမှုရှိသည်—နိမ့်ကျမစုံလင်သောလူသားများနှင့် ဆက်ဆံလိုသည့်ဆန္ဒပြင်းပြသည်။ (ဆာလံ ၁၈:၃၅) ယေဟောဝါသည် ကျွန်ုပ်တို့အားမေတ္တာပြရာတွင် အစပြုတင်ပြခဲ့သည်။ ယောဟန်ပထမစောင် ၄:၁၀ ကဤသို့ဆိုသည်– “ငါတို့သည် ဘုရားသခင်ကို ချစ်ကြသည်ဟုမဆို။ ဘုရားသခင်သည် ငါတို့ကိုချစ်၍ ငါတို့၏အပြစ်ဖြေစရာအကြောင်းဖြစ်စေခြင်းငှာ၊ သားတော်ကိုစေလွှတ်တော်မူသောအရာ၌ ချစ်ခြင်းမေတ္တာရှိ၏။” ထို့ပြင် ယေဟောဝါရှင်သည် ကျွန်ုပ်တို့အား မိမိသားတော်ထံသို့ မေတ္တာပါစွာဖြင့် သွေးဆောင်တော်မူသည်။—ယောဟန် ၆:၄၄။

သင်သည် တုံ့ပြန်ခဲ့ကာ ဘုရားသခင်နှင့်မိတ်ဆွေဖြစ်မှုတွင် နှစ်သိမ့်မှုကို ရှာယူခဲ့ပြီလော။ (ယာကုပ် ၂:၂၃ နှိုင်းယှဉ်။) ဥပမာ၊ သင့်တွင် လေးမြတ်ရသော ရင်းနှီးသည့်မိတ်ဆွေတစ်ဦးရှိပါက ထိုသူနှင့်အတူတကွ အချိန်အချို့အသုံးပြုခြင်း၊ သင့်စိုးရိမ်ပူပန်မှုများ၊ သင့်မျှော်လင့်ချက်များနှင့် ရွှင်လန်းမှုများအကြောင်း လွတ်လွတ်လပ်လပ်ပြောရခြင်းကို မနှစ်ခြိုက်ပေလော။ ယေဟောဝါသည် မိမိနှင့်ဤအတိုင်းပြုရန် သင့်ကို ဖိတ်ခေါ်ထားတော်မူသည်။ ဆုတောင်းခြင်းဖြင့် ကိုယ်တော်နှင့်မည်မျှကြာကြာ စကားပြောဆိုနိုင်သည်ကို ကန့်သတ်ထားတော်မမူပါ—ကိုယ်တော်သည် အမှန်ပင်နားထောင်တော်မူသည်။ (ဆာလံ ၆၅:၂; ၁ သက်သာလောနိတ် ၅:၁၇) ယေရှုသည် မှန်မှန်နှင့် စိတ်ထက်သန်စွာ ဆုတောင်းခဲ့သည်။ အမှန်မှာ၊ တမန်တော် ၁၂ ပါးကို မရွေးချယ်မီ ကိုယ်တော်သည် တစ်ညလုံးအချိန်ကုန်ခံ ဆုတောင်းခဲ့သည်။—လုကာ ၆:၁၂-၁၆; ဟေဗြဲ ၅:၇။

အခါအားလျော်စွာ ကျွန်ုပ်တို့ယောက်တိုင်းသည် ယေဟောဝါနှင့် တစ်ယောက်တည်းရှိရန် စီစဉ်နိုင်သည်။ ပြတင်းပေါက်နားတွင် တိတ်ဆိတ်စွာထိုင်နေရုံလေး သို့မဟုတ် အေးအေးဆေးဆေးလမ်းလျှောက်ရုံလေးက ဆုတောင်းခြင်းဖြင့် ယေဟောဝါထံတော်တွင် ကျွန်ုပ်တို့၏နှလုံးကိုဖွင့်ချရန် အခွင့်ရေးကောင်းကို ဖန်တီးပေးနိုင်သည်။ ဤသို့လုပ်ဆောင်ခြင်းသည် ဧရာမစိတ်ပေါ့ပါးမှုနှင့် နှစ်သိမ့်မှုတို့၏အရင်းအမြစ်တစ်ခုဖြစ်နိုင်သည်။ စဉ်းစားတွေးတောနေစဉ် ကြည့်ရှုရန် ယေဟောဝါ၏ဖန်ဆင်းရာများမှ အသွင်အပြင်တချို့ရှိလျှင်—ဝေဟင်၏တစ်စိတ်တစ်ဒေသ၊ သစ်ပင်နှင့် ကျေးငှက်သာရကာတချို့လောက်သာဖြစ်လျှင်ပင်—ယင်းတို့တွင် ကျွန်ုပ်တို့အတွက်တင်ပြသည့် ယေဟောဝါ၏မေတ္တာနှင့် စိုးရိမ်မကင်းဖြစ်မှုတို့မှ နှစ်သိမ့်မှုရသော သတိရစေမှုတချို့ကို တွေ့ရပေမည်။—ရောမ ၁:၂၀။

ဘုရားသခင့်နှုတ်ကပါဌ်တော်ကို ကိုယ်ပိုင်လေ့လာခြင်းအားဖြင့်

သို့သော် ကျမ်းစာကို ကိုယ်ပိုင်လေ့လာခြင်းအားဖြင့် ယေဟောဝါ၏အရည်အသွေးများ အမှန်တကယ်ပေါ်လွင်လာခြင်းဖြစ်သည်။ ယေဟောဝါသည် “သနားတတ်သောသဘော၊ ကျေးဇူးပြုတတ်သောသဘော၊ အမျက်ထွက်နှေးသောသဘော၊ ကရုဏာနှင့်သစ္စာကြွယ်ဝသောသဘောရှိတော်မူသော၊” ဘုရားသခင်ဖြစ်ကြောင်း ကျမ်းစာကကြိမ်ဖန်များစွာ ဖော်ပြသည်။ (ထွက်မြောက်ရာ ၃၄:၆၊ ကဘ; နေဟမိ ၉:၁၇; ဆာလံ ၈၆:၁၅) မိမိ၏မြေကြီးပေါ်ရှိကျေးကျွန်များကို နှစ်သိမ့်ပေးလိုသည့်ဆန္ဒမှာ ယေဟောဝါဥပဓိရုပ်တော်၏ ပင်ကိုရှိရင်းစွဲအရည်အသွေးတစ်ခုဖြစ်သည်။

ဥပမာ၊ ဟေရှာယ ၆၆:၁၃ ပါ ယေဟောဝါ၏နှုတ်ကပါဌ်စကားတော်ကို သုံးသပ်ကြည့်ပါ– “အမိသည် သားငယ်ကိုနှစ်သိမ့်စေသကဲ့သို့ သင်တို့ကို ငါနှစ်သိမ့်စေမည်။” မိမိ၏ရင်သွေးများအပေါ် ကိုယ်ကျိုးစွန့်ကာ မြဲမြံစွာချစ်ဖို့ရန် မိခင်၏မေတ္တာတရားကို ယေဟောဝါစီမံထားတော်မူသည်။ မေတ္တာပြည့်ဝသောမိခင်က အနာတရဖြစ်သွားသော မိမိ၏ရင်သွေးအား နှစ်သိမ့်ပေးသည်ကို သင်တွေ့ဖူးမည်ဆိုလျှင် မိမိ၏လူမျိုးတော်ကို နှစ်သိမ့်ပေးမည်ဟု ကိုယ်တော်မိန့်တော်မူသည့် အဓိပ္ပာယ်ကို သင်သိပေမည်။

များစွာသောကျမ်းစာမှတ်တမ်းများက ဤကဲ့သို့သောနှစ်သိမ့်မှုကို လက်တွေ့တင်ပြခဲ့သည်။ ပရောဖက်ဧလိယသည် မိဖုရားဆိုး ယေဇဗေလ၏ အသက်အန္တရာယ်ခြိမ်းခြောက်မှုကိုခံရသောအခါ ရဲစွမ်းသတ္တိပျောက်ကာ အသက်လုပြေးခဲ့သည်။ သောက်စရာရေ၊ စားစရာအစာယူမသွားကြောင်းသိသာသည့် တောကန္တာရအတွင်း တစ်ရက်ခရီးကို လမ်းလျှောက်ခဲ့ရသည့်အတွက်ကြောင့် သူအလွန်ပင်စိတ်ပျက်အားလျော့ခဲ့သည်။ စိတ်ဒုက္ခအပြင်းအထန်ခံစားနေရသည့် ဧလိယသည် မိမိသေလိုကြောင်း ယေဟောဝါကို ပြောပြခဲ့သည်။ (၃ ဓမ္မရာဇဝင် ၁၉:၁-၄) ယေဟောဝါသည် မိမိ၏ပရောဖက်ကို နှစ်သိမ့်အားပေးရန် အဘယ်အရာပြုတော်မူခဲ့သနည်း။

တစ်ယောက်တည်းဖြစ်သည်ဟူသည့် ခံစားချက်၊ တန်ဖိုးမရှိဟူသည့်ခံစားချက်၊ ကြောက်ရွံ့သည့်စိတ်တို့ကြောင့် ဧလိယကို ယေဟောဝါအပြစ်မတင်ခဲ့ပါ။ ယင်းသို့မဟုတ်ဘဲ ထိုပရောဖက်သည် “ဖြည်းညင်းသောအသံ” ကိုကြားခဲ့ရသည်။ (၃ ဓမ္မရာဇဝင် ၁၉:၁၂) ၃ ဓမ္မရာဇဝင် အခန်းကြီး ၁၉ ကိုသင်ဖတ်ရှုပါက ယေဟောဝါသည် ဧလိယကို နှစ်သိမ့်ပေးခဲ့ပုံ၊ သူ့အားစိတ်သက်သာစေခဲ့ပုံနှင့် သူ၏ယုံကြည်မှုကို ဆောက်တည်ပေးခဲ့ပုံတို့ကို သတိပြုမိမည်ဖြစ်သည်။ ဤနှစ်သိမ့်မှုသည် အပေါ်ယံမျှသာမဟုတ်ပါ။ ယင်းသည် သောကရောက်နေသော ဧလိယ၏နှလုံးကို တည့်တည့်ထိမိခဲ့ပြီး ခရီးဆက်နိုင်ရန် ထိုပရောဖက်ကို အားဖြည့်ပေးခဲ့သည်။ (ဟေရှာယ ၄၀:၁၊ ၂ နှိုင်းယှဉ်။) မကြာပါချေ၊ သူသည် တာဝန်ပြန်ထမ်းဆောင်ခဲ့သည်။

ယေရှုခရစ်သည် မိမိ၏သစ္စာရှိနောက်တော်လိုက်များကို အလားတူ နှစ်သိမ့်ပေးပြီး အားရှိစေသည်။ အမှန်မှာ၊ ဟေရှာယက မေရှိယနှင့်ပတ်သက်ပြီး ဤသို့ပရောဖက်ပြုခဲ့သည်– “ထာဝရဘုရား [သည်] . . . နှလုံးကြေကွဲသောသူတို့၏ အနာကိုစည်းစေခြင်းငှာလည်းကောင်း၊ . . . စိတ်မသာညည်းတွားသောသူတို့အား နှစ်သိမ့်စေခြင်းငှာလည်းကောင်း . . . ငါ့ကိုစေလွှတ်တော်မူပြီ။” (ဟေရှာယ ၆၁:၁-၃) သူ၏အသက်တာတွင် ယေရှုသည် ဤစကားများကို လက်တွေ့ကျင့်သုံးခဲ့ကြောင်း သံသယဖြစ်ဖွယ်မရှိပါ။ (လုကာ ၄:၁၇-၂၁) သင်သည် နှစ်သိမ့်မှုလိုအပ်သည်ဟု ခံစားရပါက အနာတရဖြစ်နေသောသူများနှင့် ချို့ငဲ့နေသောသူများအပေါ် ယေရှု၏နူးညံ့ပြီးမေတ္တာပါသောဆက်ဆံမှုကို စဉ်းစားတွေးတောပါ။ မှန်ပါသည်၊ ကျမ်းစာကိုဂရုတစိုက်လေ့လာခြင်းသည် နှစ်သိမ့်မှုနှင့် အားပေးမှုတို့၏ မဟာအရင်းအမြစ်ဖြစ်သည်။

အသင်းတော်အားဖြင့်

ခရစ်ယာန်အသင်းတော်အတွင်းတွင် နှစ်သိမ့်မှုနှင့် အားပေးမှုတို့၏ကျောက်မျက်များသည် ယင်းတို့၏မှန်ကူကွက်များစွာဖြင့် အရောင်တလက်လက်တောက်နေသည်။ တမန်တော်ပေါလုက ဤသို့ရေးရန် မှုတ်သွင်းခံခဲ့ရသည်– “အချင်းချင်းနှစ်သိမ့်စေလျက်၊ တစ်ဦးကိုတစ်ဦး ဆောက်တည်ရင်းအတိုင်း၊ ဆောက်တည်ကြဦးလော့။” (၁ သက်သာလောနိတ် ၅:၁၁၊ သမ) အသင်းတော်အစည်းအဝေးများတွင် နှစ်သိမ့်မှုနှင့် အားပေးမှုတို့ကို မည်သို့ရရှိနိုင်သနည်း။

အမှန်မှာ၊ အခြေခံအားဖြင့် ကျွန်ုပ်တို့သည် ကိုယ်တော်နှင့် ကိုယ်တော့်နည်းလမ်းတော်များနှင့်ပတ်သက်သော ညွှန်ကြားချက်ကို ရရှိဖို့ “ဘုရားသခင်ဆုံးမသွန်သင်တော်မူ” ခြင်းကိုခံရန်အတွက် ခရစ်ယာန်အစည်းအဝေးများကို တက်ရောက်ကြသည်။ (ယောဟန် ၆:၄၅) ဤကဲ့သို့သောညွှန်ကြားချက်မျိုးသည် အားပေးမှုနှင့် နှစ်သိမ့်မှုဖြစ်စေသည်။ တမန်တော် ၁၅:၃၂ တွင် ကျွန်ုပ်တို့ဤသို့ဖတ်ရသည်– “ယုဒနှင့် သိလတို့သည် . . . များစွာသောစကားများနှင့် ညီအစ်ကိုများကို ဆုံးမ၍ ခိုင်ခံ့မြဲမြံစေကြ၏။”

သင်လက်မှိုင်ချမိသောအချိန်တွင် ခရစ်ယာန်အစည်းအဝေးတစ်ခုသို့သွားရောက်ကာ စိတ်သက်သာမှုဖြင့် အိမ်ပြန်လာရသည်ကို တွေ့ကြုံခံစားဖူးပါသလော။ ဟောပြောချက်တစ်ခုတွင်၊ မှတ်ချက်တစ်ခုတွင် သို့မဟုတ် ဆုတောင်းချက်တစ်ခုတွင် မြွက်ဆိုသည့်အရာတစ်ခုခုက သင့်နှလုံးကို ထိမိကာ လိုအပ်သောနှစ်သိမ့်မှုနှင့် အားပေးမှုကို ရရှိစေခဲ့နိုင်သည်။ ဤအတွက်ကြောင့် ခရစ်ယာန်အစည်းအဝေးများနှင့် ဝေးမနေပါနှင့်။—ဟေဗြဲ ၁၀:၂၄၊ ၂၅။

ဓမ္မအမှုတွင်နှင့် အခြားအချိန်အခါများတွင် ကျွန်ုပ်တို့၏ညီအစ်ကိုညီအစ်မများနှင့် ပေါင်းသင်းခြင်းအားဖြင့် အလားတူအကျိုးခံစားရနိုင်သည်။ “အတူတကွပေါင်းစည်းခြင်း” ဟူ၍အဓိပ္ပာယ်ရှိသည့် ဟေဗြဲကြိယာများစွာတွင် “ခွန်အား” သို့မဟုတ် “ခွန်အားရှိစေခြင်း” ကိုလည်း ရည်ညွှန်းလာသည်—အတူတကွပေါင်းစည်းလိုက်သောအခါ သာ၍သန်စွမ်းလာသည့်အရာများဖြစ်လာသည့် သဘောဖြစ်ပုံရသည်။ ဤမူသည် အသင်းတော်တွင် မှန်ကန်လျက်ပင်ဖြစ်သည်။ မှန်ပါသည်၊ ကျွန်ုပ်တို့သည် အတူတကွပေါင်းသင်းခြင်းမှ နှစ်သိမ့်မှု၊ အားပေးမှုနှင့် ခွန်အားရရှိကြသည်။—ကောလောသဲ ၃:၁၄။

အခါအားလျော်စွာ ကျွန်ုပ်တို့၏ဝိညာဏ ညီအစ်ကိုများ သို့မဟုတ် ညီအစ်မများ၏ သစ္စာတည်ကြည်မှုက ကျွန်ုပ်တို့အတွက် အားရှိစရာဖြစ်စေသည်။ (၁ သက်သာလောနိတ် ၃:၇၊ ၈) တစ်ခါတစ်ရံ သူတို့ပြသသည့် မေတ္တာကဖြစ်သည်။ (ဖိလေမုန် ၇) ထို့အပြင် တစ်ခါတစ်ရံတွင် အခြားသူများကို ဘုရားသခင့်နိုင်ငံတော်အကြောင်း ပြောဆိုရင်းနှင့် အတူတကွ ပခုံးချင်းယှဉ်၍ အမှုတော်ဆောင်နေခြင်းမျှသာဖြစ်သည်။ ဓမ္မအမှုနှင့်ပတ်သက်၍ အားနည်းနေပြီး အားပေးမှုလိုအပ်နေသည်ဟု သင်ခံစားရပါက အသက်ပိုကြီးသော သို့မဟုတ် ပို၍အတွေ့အကြုံရှိသော နိုင်ငံတော်ကြေညာသူတစ်ဦးနှင့် အတူတကွလုပ်ဆောင်ရန် စီစဉ်ပါလေ။ သင်သည် ဤသို့လုပ်ခြင်းဖြင့် နှစ်သိမ့်မှုများစွာ ရရှိနိုင်လိမ့်မည်။—ဒေသနာ ၄:၉-၁၂; ဖိလိပ္ပိ ၁:၂၇။

“သစ္စာနှင့်သတိပညာရှိသောကျွန်” အားဖြင့်

ကျွန်ုပ်တို့ဝတ်ပြုမှုအတွက် နှစ်သိမ့်ပေးသောအသွင်အပြင်များကို မည်သူဖွဲ့စည်းစီစဉ်သနည်း။ ယေရှုသည် ဝိညာဉ် ‘အစာကို ထိုက်သင့်သောအချိန်တွင်’ ပေးစေခြင်းငှာ “သစ္စာနှင့်သတိပညာရှိသောကျွန်” အဖြစ် မိမိသတ်မှတ်ထားသည့် အတန်းအစားတစ်ခုကို ခန့်အပ်ခဲ့သည်။ (မဿဲ ၂၄:၄၅၊ သမ) စီ.အီး. ပထမရာစုတွင် ဝိညာဉ်တော်ဘိသိက်ခံခရစ်ယာန်အဖွဲ့သည် အလုပ်ခွင်ဝင်ခဲ့ကြသည်။ ယေရုရှလင်ရှိ အကြီးအကဲများပါဝင်သော အုပ်ချုပ်ရေးအဖွဲ့သည် ညွှန်ကြားချက်စာများပေးပို့ကာ အသင်းတော်များကို လမ်းညွှန်ခဲ့သည်။ အဘယ်ရလဒ်ရရှိခဲ့သနည်း။ ကျမ်းစာက အသင်းတော်တို့သည် ဤကဲ့သို့သောစာတစ်စောင်စီအား တုံ့ပြန်ကြပုံကို ဤသို့မှတ်တမ်းတင်ထားသည်– “မှာစာကိုဖတ်ရွတ်သောအခါ ထိုသက်သာခြင်း၏အကြောင်းကြောင့် ဝမ်းမြောက်ခြင်းသို့ရောက်ကြ၏။”—တမန်တော် ၁၅:၂၃-၃၁။

အလားတူစွာ ခက်ခဲသောဤနောက်ဆုံးနေ့ရက်များတွင် သစ္စာနှင့်သတိပညာရှိသောကျွန်သည် ယေဟောဝါ၏လူမျိုးတော်အတွက် ကြီးမားသည့်နှစ်သိမ့်မှုနှင့် အားပေးမှုကိုဖြစ်စေသည့် ဝိညာဉ်အစာကို ဝေမျှပေးနေသည်။ ထိုအစာကို သင်ပါဝင်သုံးဆောင်သလော။ ကျေးကျွန်အတန်းအစားက ကမ္ဘာတစ်ခွင်လုံးတွင် အသင့်ရရှိစေရန်စီမံထားသည့် ပုံနှိပ်ထားသောစာပေများတွင် ယင်းကိုအသင့်သုံးဆောင်နိုင်ပါသည်။ ကင်းမျှော်စင်အသင်းက ပုံနှိပ်ထုတ်ဝေသည့် ကင်းမျှော်စင်နှင့် နိုးလော့! မဂ္ဂဇင်းများအပြင် စာအုပ်ကြီးများနှင့် ဘရိုရှာများနှင့် ဝေစာများက မရေတွက်နိုင်သော စာဖတ်ပရိသတ်ကို နှစ်သိမ့်မှုပေးခဲ့ပြီ။

နယ်လှည့်ကြီးကြပ်မှူးတစ်ဦး ဤသို့ရေးခဲ့သည်– “ကျွန်တော်တို့ရဲ့ညီအစ်ကိုညီအစ်မအများစုဟာ မှန်တဲ့အရာကို လုပ်ချင်ကြပေမဲ့လည်း သူတို့ဟာ စိတ်ဓာတ်ကျမှု၊ ကြောက်ရွံ့မှုနဲ့ ကိုယ့်ကိုယ်ကိုထောက်မဖို့ အစွမ်းမရှိပါဘူးဆိုတဲ့ခံစားချက်တွေနဲ့ ရုန်းကန်ရလေ့ရှိပါတယ်။ ကျွန်တော်တို့ရဲ့ဂျာနယ်တွေမှာပါတဲ့ ဆောင်းပါးတွေက အများအပြားကို သူတို့ရဲ့အသက်တာနဲ့ စိတ်လှုပ်ရှားမှုတွေ ပြန်လည်ထိန်းချုပ်နိုင်ဖို့ ထောက်ကူပေးနေပါတယ်။ အဲ့ဒီဆောင်းပါးတွေက အပေါ်ယံအားပေးမှုထက်မကတဲ့ အရာတစ်ခုကို အကြီးအကဲများအား ကမ်းလှမ်းပေးပါသေးတယ်။”

သစ္စာရှိကျေးကျွန်အတန်းအစားမှပြင်ဆင်ပေးသော စာပေများကို အပြည့်အဝအသုံးပြုပါလေ။ အချိန်တန် မဂ္ဂဇင်းများ၊ စာအုပ်များနှင့် အခြားစာပေများက ခက်ခဲသောအချိန်များတွင် နှစ်သိမ့်မှုကိုရရှိနိုင်ရန် ထောက်ကူပေးနိုင်သည်။ တစ်ဖက်တွင်မူ သင်သည် စိတ်ပျက်လက်ပျက်ဖြစ်နေသူတစ်ဦးကို အားပေးရမည့်အခြေအနေတွင်ရှိပါက ဤဂျာနယ်များပါ ကျမ်းစာအချက်အလက်ကို အသုံးပြုပါ။ ဤဆောင်းပါးများကို အလွန်ဂရုတစိုက်နှင့် များသောအားဖြင့် အပတ်ပေါင်း လပေါင်းများစွာ ဝီရိယစိုက်သုတေသနပြု၊ လေ့လာပြီး ဆုတောင်းကာ ရေးသားထားသည်။ သွန်သင်ချက်များသည် ကျမ်းစာအခြေခံထားပြီး စမ်းသပ်စိစစ်ထားရာ မှန်ကန်ပါသည်။ အချို့သူများသည် သင့်လျော်သောဆောင်းပါးတစ်ခု သို့မဟုတ် နှစ်ခုကို စိတ်အားငယ်နေသူနှင့်အတူ ဖတ်ရှုခြင်းက အလွန်အထောက်အကူရခဲ့သည်။ ယင်းသည် နှစ်သိမ့်မှုနှင့် အားပေးမှု များစွာရရှိနိုင်ပါသည်။

သင်သည် အဖိုးတန်ကျောက်မျက်များကို တွေ့ရှိပါက ယင်းတို့ကို သိုမှီးစုဆောင်းထားမည်လော သို့တည်းမဟုတ် အခြားသူများအား ထိုစည်းစိမ်ထဲမှတချို့ကို ရက်ရောစွာ ဝေမျှမည်လော။ အသင်းတော်ရှိ သင့်ညီအစ်ကိုညီအစ်မများအတွက် နှစ်သိမ့်မှုနှင့် အားပေးမှု၏အရင်းအမြစ်တစ်ခုဖြစ်ရန် ပန်းတိုင်ချမှတ်ပါလေ။ သင်သည် ဖြိုဖျက်မည့်အစား တည်ဆောက်ပေးမည်ဆိုလျှင်၊ အပြစ်တင်မည့်အစား ချီးမွမ်းပေးမည်ဆိုလျှင်၊ ‘သန်လျက်နှင့်ထိုးသကဲ့သို့ မစဉ်းမစားပြောဆို’ မည့်အစား “လူတတ်၏နှုတ်သတ္တိ” ဖြင့်ပြောမည်ဆိုလျှင် သင်သည် အခြားသူများ၏အသက်တာကို တကယ်ထူးခြားစေပေမည်။ (ဟေရှာယ ၅၀:၄; သု. ၁၂:၁၈) အမှန်ပင်၊ သင်သည် မိမိကိုယ်ကို ကျောက်မျက်တစ်ခု—အမှန်နှစ်သိမ့်မှုနှင့် အားပေးမှုအဖြစ် ရှုမြင်ခံရနိုင်သည်တကား!

[စာမျက်နှာ ၂၀ ပါ လေးထောင့်ကွက်]

လိုအပ်နေသူများအတွက် နှစ်သိမ့်မှု

တချို့သော ကင်းမျှော်စင်နှင့် နိုးလော့! ဆောင်းပါးများက ယေဟောဝါနှင့် သူတို့၏နှစ်ဦးချင်းဆက်ဆံရေးကို နက်ရှိုင်းစေခဲ့ပုံနှင့်စပ်လျဉ်း၍ များစွာသောသူများ မှတ်ချက်ချခဲ့ကြသည်။ တစ်ဦးဤသို့ဆိုသည်– “ဒီဆောင်းပါးကို ဖတ်ပြီးတဲ့နောက်မှာ အနန္တတန်ခိုးနဲ့အမြင့်မြတ်ဆုံးဖြစ်တော်မူတဲ့ ယေဟောဝါရှင်ဟာ အခုကျွန်မနဲ့အတူရှိနေပါလားလို့ ခံစားခဲ့ရပါတယ်။ ကိုယ်တော်ဟာ တကယ့်ပုဂ္ဂိုလ်တစ်ပါးပါပဲလို့ ကျွန်မခံစားရတယ်ရှင်။” နောက်ထပ်စာတစ်စောင်က ဤသို့ဆိုခဲ့သည်– “ကျွန်ုပ်တို့သည် တစ်ယောက်တည်းမဟုတ်သောကြောင့် ယေဟောဝါနှင့်ပတ်သက်၍ ကျွန်ုပ်တို့ရှုမြင်ရာတွင် ကျွန်ုပ်တို့စိတ်နှလုံးသည် ဤမျှအကြီးအကျယ်ပြောင်းလဲခဲ့ပြီ။ တစ်စုံတစ်ယောက်က ကျွန်ုပ်တို့၏မျက်မှန်ကို သန့်စင်ဆေးကြောပေးလိုက်သည့်နှယ် ယခုအခါတွင် အရာရာကို အလွန်သဲကွဲစွာမြင်နိုင်ပါသည်။”

တချို့ကျပြန်လျှင် ထိုမဂ္ဂဇင်းများက သတ်သတ်မှတ်မှတ်ဖြစ်သောပြဿနာများ သို့မဟုတ် စိန်ခေါ်ချက်များ ကိုင်တွယ်ရာတွင် သူတို့အားထောက်ကူခဲ့ရာ ထိုအကြောင်းကြောင့် သူတို့တစ်ဦးချင်းကို ယေဟောဝါစိတ်ဝင်စားကြောင်း စိတ်ချလက်ချရှိပုံကို စာရေးပြောကြသည်။ စာဖတ်သူတစ်ဦးက ဤသို့ပင်သဘောထားခဲ့သည်– “ယေဟောဝါဟာ မိမိလူမျိုးတော်အတွက် အလွန်ဂရုစိုက်ပြီး မေတ္တာထားတာကို ကျွန်မတို့တွေ့မြင်ခွင့်ရခြင်းအတွက် ထပ်ပြီးအလွန်ကျေးဇူးတင်တယ်ရှင်။” ရင်သွေးငယ်တစ်ဦးဆုံးပါးသွားသော ဂျပန်နိုင်ငံရှိအမျိုးသမီးတစ်ဦးက ထိုအကြောင်းပါသော နိုးလော့! ဆောင်းပါးများနှင့် ပတ်သက်၍ဤသို့ဆိုသည်– “ဘုရားသခင့်ကရုဏာရဲ့နက်ရှိုင်းမှုဟာ ဒီစာမျက်နှာတွေကနေ သွန်းလောင်းပေးခဲ့ပြီး ကျွန်မဟာ ငိုပြီးရင်းငိုရင်းပဲ။ အဲ့ဒီဆောင်းပါးတွေကို ကျွန်မစိတ်သောကရောက်ပြီး အထီးကျန်ခံစားရတဲ့အဘယ်အချိန်မှာမဆို ချက်ချင်းယူဖတ်နိုင်တဲ့နေရာတစ်ခုမှာ ထားတယ်။” ဝမ်းနည်းပူဆွေးနေသည့် နောက်အမျိုးသမီးတစ်ဦး ဤသို့စာရေးခဲ့သည်– “ကင်းမျှော်စင်နှင့် နိုးလော့! ဆောင်းပါးများနှင့် “သင်ချစ်မြတ်နိုးရသူတစ်ဦး သေလွန်သောအခါ” ဘရိုရှာတို့သည် ကျွန်မ၏ဝမ်းနည်းရသောအချိန်များကို ခံရပ်ဖို့လိုအပ်သောခွန်အားကို ပေးခဲ့သည်။”

သမ္မာကျမ်းစာသည် နှစ်သိမ့်မှု၏ အဓိကပင်ရင်းဖြစ်သည်။ (ရောမ ၁၅:၄) ကင်းမျှော်စင်သည် ကျမ်းစာကို အာဏာပိုင်အဖြစ်စွဲကိုင်သကဲ့သို့ ယင်း၏တွဲဖက်မဂ္ဂဇင်းဖြစ်သော နိုးလော့! သည်လည်း အလားတူဖြစ်သည်။ ယင်းကြောင့် ဤဂျာနယ်များသည် ယင်းတို့ကိုဖတ်ရှုသူများအတွက် နှစ်သိမ့်မှုနှင့် အားပေးမှုဖြစ်စေကြောင်း ထင်ရှားခဲ့ပြီ။

[စာမျက်နှာ ၂၃ ပါ ရုပ်ပုံ]

သင်သည် ယေဟောဝါထံဆုတောင်းရန်နှင့် ကိုယ်တော့်အရည်အသွေးများကို စဉ်းစားဆင်ခြင်ရန် အချိန်ထားပါသလော