မိသားစုဘဝတွင် ဘုရားသခင့်ရေးရာ ငြိမ်သက်ခြင်းကို အမီလိုက်ခြင်း

“အိုလူအမျိုးမျိုး၏ မိသားစုများတို့၊ ယေဟောဝါသည် ဘုန်းတန်ခိုးအစွမ်းသတ္တိရှိတော်မူသည်ဟု ဝန်ခံကြလော့။” —ဆာလံ ၉၆:၇၊ ကဘ။

၁။ ယေဟောဝါသည် မိသားစုဘဝကို အဘယ်ပုံစံမျိုးဖြင့် စတင်ပေးတော်မူခဲ့သနည်း။

ယေဟောဝါသည် ပထမလူယောက်ျားနှင့် လူမိန်းမကို ထိမ်းမြားပေးတော်မူချိန်တွင် မိသားစုကို ငြိမ်းချမ်းသာယာသည့်ဘဝမျိုးဖြင့် စတင်ပေးတော်မူခဲ့သည်။ အမှန်ဆိုလျှင် အာဒံသည် အလွန်ပျော်ရွှင်သောကြောင့် အစောဆုံးမှတ်တမ်းတင်ခဲ့သော ကဗျာတစ်ပုဒ်တွင် သူ၏အားရရွှင်လန်းမှုကို ဤသို့ဖော်ပြခဲ့သည်– “ယခု ဤသူသည် ငါ့အရိုးထဲကအရိုး၊ ငါ့အသားထဲကအသားဖြစ်၏။ လူထဲကထုတ်သောကြောင့် သူ့ကိုလူမိန်းမဟု ခေါ်ဝေါ်အပ်သည်။”—ကမ္ဘာဦး ၂:၂၃။

၂။ ဘုရားသခင်သည် အိမ်ထောင်ရေးကိုစီစဉ်သောအခါ လူ့သားသမီးများအား ပျော်ရွှင်မှုပေးရုံထက်မက အဘယ်အရာကို ရည်ရွယ်တော်မူခဲ့သနည်း။

^၂ ဘုရားသခင်သည် အိမ်ထောင်ရေးနှင့် မိသားစုအစီအစဉ်ကို စတင်တော်မူသောအခါ လူ့သားသမီးများအား ပျော်ရွှင်မှုပေးရုံထက်မက ကိုယ်တော်ရည်ရွယ်တော်မူခဲ့သည်။ သူတို့ကို ကိုယ်တော့်အလိုတော် ဆောင်ရွက်စေလိုတော်မူခဲ့သည်။ ပထမမောင်နှံစုံကို ကိုယ်တော်က “အချင်းတို့ များပြားစွာမွေးဖွားကြလော့။ မြေကြီးကိုပြည့်စေ၍ နိုင်ကြလော့။ ပင်လယ်ငါးတို့ကိုလည်းကောင်း၊ မိုးကောင်းကင်ငှက်တို့ကိုလည်းကောင်း၊ အသက်ရှင်၍ မြေပေါ်မှာလှုပ်ရှားတတ်သော တိရစ္ဆာန်အပေါင်းတို့ကိုလည်းကောင်း အုပ်စိုးကြလော့ဟုမိန့်တော်မူ၏။” (ကမ္ဘာဦး ၁:၂၈) အမှန်တကယ်ပင် ကျေနပ်ဖွယ်ကောင်းသော တာဝန်ပါတကား။ ပထမဆုံးမောင်နှံစုံ အာဒံနှင့်ဧဝတို့သာ နာခံမှုရှိရှိ ယေဟောဝါ၏အလိုတော်ကို ဆောင်ရွက်ခဲ့ကြမည်ဆိုလျှင် သူတို့နှင့် သူတို့မှမွေးဖွားလာမည့် ကလေးများပါ မည်မျှပျော်ရွှင်ချမ်းမြေ့ကြမည်တကား!

၃။ ဘုရားဝတ်၌မွေ့လျော်သော မိသားစုများဖြစ်ရန် အဘယ်အရာကိုလိုက်လျှောက်ဖို့လိုသနည်း။

^၃ သို့သော် ယနေ့အချိန်တွင်ပင် မိသားစုများသည် ဘုရားသခင်၏အလိုတော်ကို အတူတကွဆောင်ရွက်ကြသည့်အခါ အပျော်ရွှင်ဆုံးဖြစ်ကြသည်။ ဤသို့နာခံမှုပြသော မိသားစုများသည် အမှန်ထူးမြတ်သော အလားအလာများ ရရှိကြသည်တကား! တမန်တော်ပေါလုက ဤသို့ရေးသားခဲ့သည်– “ဘုရား[သခင်]ဝတ်၌မွေ့လျော်ခြင်းမူကား၊ ယခုဘဝနောင်ဘဝနှင့် စပ်ဆိုင်သောကတိတော်ကို ရသည်ဖြစ်၍ အရာရာ၌အကျိုးကိုပေးတတ်သည်။” (၁ တိမောသေ ၄:၈) ဘုရားသခင်ဝတ်၌ အမှန်မွေ့လျော်သော မိသားစုများသည် ယေဟောဝါနှုတ်ကပါဌ်တော်၏ ကျင့်စဉ်မူများကို လိုက်လျှောက်ကာ အလိုတော်ကို ဆောင်ရွက်ကြသည်။ ဘုရားသခင်ရေးရာငြိမ်သက်ခြင်းကို သူတို့အမီလိုက်ကြသဖြင့် “ယခုဘဝ” ၌ပျော်ရွှင်မှုရရှိကြသည်။

မိသားစုဘဝ အန္တရာယ်ကြုံတွေ့နေ

၄၊ ၅။ ယနေ့ မိသားစုဘဝသည် ကမ္ဘာတစ်ဝန်းတွင် အန္တရာယ်ကြုံတွေ့နေသည်ဟု အဘယ်ကြောင့်ဆိုနိုင်သနည်း။

^၄ မိသားစုတိုင်းတွင် ငြိမ်သက်ခြင်းနှင့်ပျော်ရွှင်မှု မတွေ့ရှိကြသည်မှာ အမှန်ပင်။ လူဦးရေကောင်စီဟု အမည်ရှိသော လူဦးရေစာရင်းယူအဖွဲ့၏ သုတေသနပြုမှုကို နယူးယောက်တိုင်းမ်စ်က ဤသို့ကိုးကားတင်ပြခဲ့သည်– “ချမ်းသာသောတိုင်းပြည်များတွင်ကော၊ ဆင်းရဲသောတိုင်းပြည်များတွင်ပါ မိသားစုဘဝ တည်ဆောက်ပုံသည် အကြီးအကျယ်ပြောင်းလဲနေပါသည်။” ဤသုတေသနပြုမှု၏ ကလောင်ရှင်က ဤသို့ပြောသည်ဟု ကြားသိရသည်– “ဖခင်သည် ဝင်ငွေရှာကျွေးမွေးပြုစုပေးသူ၊ မိခင်မှာမူ စိတ်ဓာတ်ရေးကို ပျိုးထောင်ပေးသူအဖြစ် လုပ်ကျွေးသမှုပြုသော မိသားစုသည် တည်ငြိမ်ပြီး စည်းလုံးသည့်အဖွဲ့အစည်းဖြစ်သည်ဟုဆိုခြင်းသည် ယုံတမ်းစကားသာဖြစ်သည်။ အမှန်မှာ လက်မထပ်ဘဲ မိခင်ဘဝရောက်ခြင်း၊ ကွာရှင်းမှုနှုန်း မြင့်တက်နေခြင်း၊ [နှင့်] အိမ်ထောင်ဦးရေ လျော့နည်းလာခြင်းတို့ . . . သည် ကမ္ဘာတစ်ဝန်း ဖြစ်ပျက်နေကျကိစ္စများဖြစ်သည်။” ဤကဲ့သို့ဖြစ်ပျက်နေသောကြောင့် မိသားစု သန်းပေါင်းများစွာမှာ တည်ငြိမ်မှု၊ ငြိမ်သက်မှုနှင့် ပျော်ရွှင်မှု ကင်းမဲ့ကာ အများအပြားမှာ ပြိုကွဲနေကြသည်။ စပိန်နိုင်ငံတွင် ၂၀ ရာစု၏ နောက်ဆုံးဆယ်စုနှစ်အစပိုင်း၌ ကွာရှင်းမှုနှုန်းသည် ၈ အိမ်ထောင်တွင် ၁ အိမ်ထောင်ဖြစ်သည်—လွန်ခဲ့သော နှစ်ပေါင်း ၂၅ နှစ်က အိမ်ထောင် ၁၀၀ တွင် ၁ အိမ်ထောင်မှ ခုန်တက်သွားခြင်းဖြစ်သည်။ ဥရောပတိုက်တွင် ကွာရှင်းမှုနှုန်း အမြင့်ဆုံးမှာ ၁၀ အိမ်ထောင်လျှင် ၄ အိမ်ထောင်နှုန်းပြိုကွဲသည့် ဗြိတိန်နိုင်ငံဖြစ်သည်။ ထိုနိုင်ငံတွင် ကြင်ဖော်မဲ့အိမ်ထောင်များ၏ ဦးရေ တိုးများလာနေသည်ကိုလည်း တွေ့ရှိရသည်။

^၅ အချို့သူများသည် ကွာရှင်းခြင်းကို မစောင့်ဆိုင်းနိုင်ပုံရှိသည်။ များစွာသောသူတို့သည် ဂျပန်နိုင်ငံ၊ တိုကျိုမြို့အနီးရှိ “သံယောဇဉ်ဖြတ်ဝတ်ကျောင်း” သို့စုပြုံသွားနေကြ၏။ ဤရှင်တိုဘုရားကျောင်းတွင် ကွာရှင်းခြင်းနှင့် အခြားမလိုလားသော ဆက်ဆံရေးများ ပြတ်စဲရန် ပန်ကြားချက်များကို တာဝန်ယူလက်ခံသည်။ ဝတ်ပြုကိုးကွယ်သူ တစ်ဦးစီသည် မိမိ၏ပန်ကြားချက်ကို ပါးလွှာသောသစ်သားပြားပေါ် ရေးချပြီး ဝတ်ကျောင်းပရိဝုဏ်အတွင်း ဆွဲချိတ်ထားလျက် အဖြေရရန် ဆုတောင်းလေ့ရှိသည်။ ထိုဝတ်ကျောင်းကို စတင်တည်ဆောက်ခဲ့သည့် လွန်ခဲ့သောအနှစ်တစ်ရာက “ဒေသခံကုန်သည် သူဌေးသူကြွယ်များ၏ ဇနီးသည်များက မိမိတို့၏လင်ယောက်ျားများသည် သူတို့၏အပျော်မယားများကိုစွန့်ကာ မိမိတို့ထံပြန်လာကြရန် ဆုပန်ချက်များကို ရေးသားခဲ့” ကြောင်း တိုကျိုသတင်းစာတစ်စောင်က ဖော်ပြသည်။ သို့သော် ယနေ့မူကား ပန်ကြားချက်အများမှာ ကွာရှင်းခြင်းအတွက်ဖြစ်သည်။ ပြန်ပေါင်းသင်းရန်အတွက် မဟုတ်တော့ပေ။ မိသားစုဘဝသည် တစ်ကမ္ဘာလုံးတွင် အန္တရာယ်ကြုံတွေ့နေသည်ကား အမှန်ပင်ဖြစ်သည်။ ဤသို့ဖြစ်ခြင်းကို ခရစ်ယာန်များ အံ့ဩစရာဖြစ်သလော။ မဖြစ်သင့်ပါ။ အကြောင်းမှာ သမ္မာကျမ်းစာသည် မျက်မှောက်ခေတ် မိသားစုအကျပ်ရိုက်ရသည့်အကြောင်းရင်းကို ထိုးထွင်းဖော်ပြထားပါသည်။

အဘယ်ကြောင့်မိသားစုအကျပ်ရိုက်ရ

၆။ ယနေ့ မိသားစုအကျပ်ရိုက်ရသည့်အကြောင်းနှင့် ၁ ယောဟန် ၅:၁၉ ကမည်သို့သက်ဆိုင်သနည်း။

^၆ ယနေ့ မိသားစုအကျပ်ရိုက်ရသည့် အကြောင်းတစ်ကြောင်းမှာ ဤသို့– “လောကီသားအပေါင်းတို့သည် [စာတန်]မာရ်နတ်၏လက်၌ရှိကြ၏။” (၁ ယောဟန် ၅:၁၉) စာတန်မာရ်နတ်ထံမှ ကျွန်ုပ်တို့ အဘယ်အရာ မျှော်လင့်နိုင်သနည်း။ သူသည် ဆိုးသွမ်းသောစာရိတ္တယိုယွင်းသည့် မုသားကောင်ဖြစ်သည်။ (ယောဟန် ၈:၄၄) ထို့ကြောင့်လည်း သူ၏လောကသည် မိသားစုဘဝကိုပျက်စီးစေသည့် လိမ်လည်လှည့်ဖြားမှုနှင့် စာရိတ္တယိုယွင်းမှုတို့နှင့် တင်းကျမ်းဖြစ်နေခြင်းမှာ အံ့ဩစရာမဟုတ်ပါ! ဘုရားသခင်၏အဖွဲ့အစည်းပြင်ပတွင် စာတန်၏သြဇာသည် ယေဟောဝါ၏အိမ်ထောင်ရေးဖွဲ့စည်းကို ဖျက်ဆီးကာ သာယာသောအိမ်ထောင်ရေးဘဝ မရှိစေရန် ခြိမ်းခြောက်နေပါသည်။

၇။ ဤနောက်ဆုံးအချိန်ရှိ လူများစွာတို့၏ဉာဉ်များသည် မိသားစုများကို မည်သို့ဂယက်ရိုက်နိုင်သနည်း။

^၇ လူသားတို့ ယခု ကပ်ဆိုက်နေသည့် မိသားစုပြဿနာများဖြစ်ရသည့် နောက်အကြောင်းရင်းတစ်ခုကို ၂ တိမောသေ ၃:၁-၅ (ကဘ) တွင် တင်ပြထားပါသည်။ ထိုတွင်မှတ်တမ်းတင်ထားသော ပေါလု၏ပရောဖက်ပြုစကားက ကျွန်ုပ်တို့သည် “နောက်ဆုံးအချိန်” ၌အသက်ရှင်နေကြကြောင်း ဖော်ပြသည်။ မိသားစုဝင် ဖြစ်သူတို့သည် ‘ကိုယ်ကိုချစ်သောသူ၊ ငွေကိုတပ်မက်သောသူ၊ ဝါကြွားသောသူ၊ ထောင်လွှားစော်ကားသောသူ၊ သူ့အသရေကိုရှုတ်ချသောသူ၊ မိဘစကားကို နားမထောင်သောသူ၊ ကျေးဇူးမရှိသောသူ၊ သစ္စာမရှိသောသူ၊ ပင်ကိုအရချစ်ခင်စုံမက်ခြင်းမရှိသောသူ၊ ထော်လော်ကန့်လန့်လုပ်သူ၊ သူ့အသရေကိုဖျက်သူ၊ ချုပ်တည်းခြင်းမရှိသောသူ၊ ပြင်းထန်သောသူ၊ ကောင်းမှုကိုမချစ်သောသူ၊ သစ္စာဖောက်သူ၊ သတိပေးခြင်းကိုမခံသောသူ၊ မာန်မာနနှင့်ယစ်မူးသောသူ၊ ဘုရားသခင်ကိုချစ်မြတ်နိုးသည်ထက် အပျော်အပါးကို သာ၍ခုံမင်သောသူ၊ ဘုရား[သခင်]ဝတ်၌မွေ့လျော်ယောင်ဆောင်၍ မွေ့လျော်ခြင်းတန်ခိုးကို ငြင်းပယ်သောသူ ဖြစ်မည်’ ဆိုလျှင် မိသားစုတို့သည် အေးဆေးငြိမ်သက်ပြီး ပျော်ရွှင်နိုင်ကြမည်မဟုတ်ပါ။ မိသားစုဝင်တစ်ဦး ပင်ကိုအရ ချစ်ခင်စုံမက်ခြင်းမရှိ၊ သို့မဟုတ် သစ္စာမရှိလျှင်ပင် ထိုမိသားစုသည် ပျော်ရွှင်နိုင်မည်မဟုတ်ပါ။ အိမ်ထောင်တွင် တစ်ယောက်ကခက်ထန်ပြီး သတိပေးခြင်းကိုမခံလျှင် မိသားစုဘဝသည် မည်သို့ငြိမ်သက်နိုင်မည်နည်း။ ထိုထက်ဆိုးသည်မှာ မိသားစုဝင်ဖြစ်သူတို့သည် ‘ဘုရားသခင်ကို ချစ်မြတ်နိုးခြင်းထက် အပျော်အပါးကိုသာ၍ခုံမင်သူ’ များကြမည်ဆိုလျှင် ငြိမ်သက်မှုနှင့်ပျော်ရွှင်မှု မည်သို့ရှိနိုင်မည်နည်း။ ယင်းတို့ကား စာတန်အုပ်စိုးနေသောလောကတွင်းရှိ လူတို့၏ ဉာဉ်များဖြစ်သည်။ ထို့ကြောင့်လည်း ဤနောက်ဆုံးအချိန်တွင် မိသားစုပျော်ရွှင်မှုတွေ့ရခဲခြင်းမှာ အံ့ဩစရာမဟုတ်!

၈၊ ၉။ သားသမီးများ၏ အကျင့်အကြံအပြုအမူက မိသားစုပျော်ရွှင်မှုကို မည်သို့ထိခိုက်စေနိုင်သနည်း။

^၈ မိသားစုများစွာတွင် ငြိမ်သက်မှုနှင့် ပျော်ရွှင်မှုမရှိသည့် အခြားအကြောင်းတစ်ခုမှာ သားသမီးများ၏ အကျင့်ဆိုးကြောင့်ဖြစ်သည်။ နောက်ဆုံးအချိန်၏ အခြေအနေကို ပေါလုကြိုတင်ဟောပြောချိန်တွင် သားသမီးအများသည် မိဘစကားကို နားမထောင်သူများဖြစ်ကြမည်ဟု သူပရောဖက်ပြုခဲ့သည်။ သင်သည် လူငယ်တစ်ဦးဖြစ်ပါက သင့်အပြုအမူအကျင့်အကြံသည် သင့်မိသားစု၏ ငြိမ်သက်မှုနှင့် ပျော်ရွှင်မှုကို ပံ့ပိုးပေးပါသလော။

^၉ လူငယ်အချို့သည် အကျင့်အကြံအပြုအမူတွင် ပုံသက်သေမကောင်းပါ။ ဥပမာ၊ လူငယ်တစ်ဦးသည် သူ၏ဖခင်ထံ ဤရိုင်းပျသောစာကို ရေးသားခဲ့သည်– “ကျွန်တော့်ကို အဲလက်ဇန္ဒြီးယားမြို့ အလည်ခေါ်မသွားရင် အဖေ့ဆီ ကျွန်တော်နောက်ဘယ်တော့မှ စာမရေးတော့ဘူး၊ စကားလည်းမပြောတော့ဘူး၊ နှုတ်လည်းမဆက်ဘူး၊ အဲလက်ဇန္ဒြီးယားမြို့ကို ကျွန်တော်မပါဘဲ သွားမယ်ဆိုရင် အဖေ့လက်ကိုမကိုင်ဘူး၊ နောက်လည်း ဘယ်တော့မှနှုတ်မဆက်တော့ဘူး။ ကျွန်တော့်ကိုခေါ်မသွားရင် ဒီအတိုင်းဖြစ်မယ် . . .။ ဒါပေမဲ့ ကျွန်တော့်ကို စောင်းဝယ်ပို့ပေးပါ။ မဝယ်ပေးရင် အစာမစားတော့ဘူး။ ရေလည်း မသောက်တော့ဘူးသာမှတ်!” ယင်းသည် ယခုခေတ်ပုံစံနှင့် မတူပေလော။ အမှန်မှာ၊ ထိုစာသည် လွန်ခဲ့သော နှစ်ပေါင်း ၂,၀၀၀ ကျော်က ရှေးအီဂျစ်နိုင်ငံမှ လူငယ်တစ်ဦး သူ၏ဖခင်ထံရေးခဲ့သောစာဖြစ်သည်။

၁၀။ လူငယ်များသည် သူတို့၏မိသားစု ဘုရားရေးရာငြိမ်သက်မှုကို လိုက်မီနိုင်စေရန် မည်သို့ကူညီပေးနိုင်သနည်း။

^၁၀ ထိုအီဂျစ်သူငယ်၏စိတ်ထားသည် မိသားစုငြိမ်သက်မှုကို တိုးပွားစေခဲ့သည်မဟုတ်။ ဤနောက်ဆုံးအချိန်တွင် ထိုထက်ပင်အကျပ်ရိုက်သော အခြေအနေများ မိသားစုများတွင် ဖြစ်ပေါ်နေပါသည်။ သို့တိုင် အသင်လူငယ်များသည် သင့်မိသားစုကို ဘုရားရေးရာငြိမ်သက်မှု လိုက်မီကြစေရန် ကူညီပေးနိုင်သည်။ မည်သို့အားဖြင့်နည်း။ ကျမ်းစာမှဤဆုံးမစကားကို နာခံခြင်းအားဖြင့်ဖြစ်သည်– “သားသမီးတို့၊ မိဘစကားကို အရာရာ၌နားထောင်ကြလော့။ မိဘစကားကိုနားထောင်ခြင်းသည် သခင်ဘုရားနှစ်သက်တော်မူသောအမှုဖြစ်၏။”—ကောလောသဲ ၃:၂၀။

၁၁။ မိဘများသည် သူတို့၏သားသမီးများကို ယေဟောဝါ၏သစ္စာရှိကျေးကျွန်များဖြစ်လာစေရန် မည်သို့ကူညီပေးနိုင်သနည်း။

^၁၁ အသင်မိဘများကော။ သင့်သားသမီးများကို ယေဟောဝါ၏သစ္စာရှိကျေးကျွန်များ ဖြစ်လာစေရန် မေတ္တာဖြင့်ထောက်မပေးပါ။ “သူငယ်သွားရာလမ်းဝ၌ ဆုံးမသွန်သင်လော့။ သို့ပြုလျှင် သူသည် အိုသောအခါ ထိုလမ်းမှမလွှဲ၊ လိုက်သွားလိမ့်မည်” ဟုနယပုံပြင် ၂၂:၆ ကဆိုသည်။ ကျမ်းစာမှ ကောင်းသောသွန်သင်မှုနှင့် မိဘတို့၏ပုံသက်သေကောင်းများအားဖြင့် သားသမီးများစွာတို့သည် အသက်အရွယ်ကြီးရင့်လာသောအခါ လမ်းစစ်လမ်းမှန်မှ သွေဖည်မသွားကြပါ။ သို့သော် ကျမ်းစာလေ့ကျင့်မှု အရည်အသွေး၊ အတိုင်းအတာနှင့် လူငယ်၏စိတ်နှလုံးအပေါ်လည်း များစွာမူတည်သည်။

၁၂။ ခရစ်ယာန်အိမ်ထောင်သည် အဘယ်ကြောင့်စိတ်ငြိမ်သက်ရာအရပ် ဖြစ်သင့်သနည်း။

^၁၂ ကျွန်ုပ်တို့မိသားစုဝင်ဖြစ်သူတိုင်း ယေဟောဝါ၏အလိုတော်ကို ကြိုးစားဆောင်ရွက်ကြမည်ဆိုလျှင် ဘုရားသခင်ရေးရာငြိမ်သက်မှုရှိသင့်သည်။ အမှန်ဆိုလျှင် ခရစ်ယာန်အိမ်ထောင်တွင် ‘ငြိမ်သက်ခြင်းမိတ်ဆွေများ’ နှင့်ပြည့်နေသင့်ပါသည်။ တပည့်တော် ၇၀ ကို ဓမ္မအမှုဆောင်ရွက်ရန် ယေရှုစေလွှတ်တော်မူခဲ့ချိန်တွင် သူတို့အား “မည်သည့်အိမ်သို့ ဝင်သောအခါ ‘ဤအိမ်၌ မင်္ဂလာဖြစ်ပါစေသော’ ဟုရှေ့ဦးစွာ ပြောကြလော့။ ထိုအိမ်၌ မင်္ဂလာသား [“ငြိမ်သက်ခြင်း၏မိတ်ဆွေ၊” ကဘ] ရှိလျှင် သင်တို့မြွက်သောမင်္ဂလာသည် တည်လိမ့်မည်” ဟုကိုယ်တော်မိန့်တော်မူစဉ် ဤသို့သောသူများကို ရည်စူးနေကြောင်း လုကာ ၁၀:၁-၆ ကဖော်ပြသည်။ ယေဟောဝါ၏ကျေးကျွန်များသည် “ငြိမ်သက်ခြင်း၏သတင်းကောင်း” ကိုတစ်အိမ်မှတစ်အိမ် အေးအေးဆေးဆေး ဟောပြောကြစဉ် ငြိမ်သက်ခြင်းမိတ်ဆွေများကိုရှာကြသည်။ (တမန်တော် ၁၀:၃၄-၃၆; ဧဖက် ၂:၁၃-၁၈) ငြိမ်သက်ခြင်းမိတ်ဆွေများနှင့် ဖွဲ့စည်းထားသော ခရစ်ယာန်အိမ်ထောင်သည် အမှန်ငြိမ်သက်မည်ဖြစ်သည်။

၁၃၊ ၁၄။ (က) နောမိသည် ရုသနှင့်သြရပတို့အတွက် အဘယ်သို့ဆန္ဒပြုခဲ့သနည်း။ (ခ) ခရစ်ယာန်တစ်ဦး၏အိမ်သည် အဘယ်ကဲ့သို့သော ချမ်းသာရာအရပ်ဖြစ်သင့်သနည်း။

^၁၃ အိမ်ထောင်သည် စိတ်အေးလက်အေး နားခိုရာအရပ်ဖြစ်သင့်သည်။ သက်ကြီးရွယ်အို မုဆိုးမနောမိသည် မုဆိုးမများဖြစ်သော ငယ်ရွယ်သေးသည့် ချွေးမများဖြစ်သူ ရုသနှင့် ဩရပတို့ကို ဘုရားသခင်သည် လင်သားကောင်းများနှင့် သာယာသောအိမ်ထောင်များ ပေးခြင်းဖြင့် အေးအေးလူလူရှိစေရန် သူမမျှော်မှန်းခဲ့သည်။ နောမိက “လင်အိမ်၌ ချမ်းသာစွာနေရမည်အကြောင်း ထာဝရဘုရား ကယ်မသနားတော်မူပါစေသော” ဟုဆိုသည်။ (ရုသ ၁:၉) နောမိ၏ဆန္ဒနှင့်ပတ်သက်၍ ပညာရှင်တစ်ဦးက ဤသို့သောအိမ်ထောင်မျိုးတွင် ရုသနှင့်သြရပတို့သည် “မငြိမ်သက်မှု၊ စိုးရိမ်မှု ကင်းမည်။ သူတို့သည် စိတ်ချမ်းသာကြမည်။ သူတို့မှီတင်းနေထိုင်နိုင်မည့် နေရာမျိုး၊ သူတို့၏ အနူးညံ့ဆုံးခံစားချက်များနှင့် ဂုဏ်အသရေအရှိဆုံး စိတ်ဆန္ဒများပြည့်ဝပြီး ငြိမ်သက်နိုင်မည့်နေရာမျိုးဖြစ်သည်။ ဟေဗြဲစကား၏ . . . ထူးထူးခြားခြား ပိုင်နိုင်စွာ တင်ပြနိုင်ပုံကို [ဟေရှာယ ၃၂:၁၇၊ ၁၈ ပါ] ဆက်နွှယ်သောအသုံးအနှုန်းများ၏ သဘောသဘာဝက အတိအကျဖော်ပြပေးသည်။”

^၁၄ ဟေရှာယ ၃၂:၁၇၊ ၁၈ ကိုကိုးကားကြောင်း သတိပြုပါ။ ထိုတွင် ဤသို့ဖတ်ရှုရသည်– “ဖြောင့်မတ်ခြင်းတရားသည်လည်း ငြိမ်သက်ခြင်းကို ပြုစုလိမ့်မည်။ ဖြောင့်မတ်ခြင်းအကျိုးမူကား ထာဝရငြိမ်သက်ခြင်းနှင့် လုံခြုံခြင်းတည်း။ ငါ၏လူတို့သည်လည်း ငြိမ်သက်သောနေရာ၊ လုံခြုံသောမြို့ရွာ၊ ဘေးလွတ်သော ချမ်းသာရာအရပ်တို့၌ နေရကြလိမ့်မည်။” ခရစ်ယာန်တစ်ဦး၏အိမ်သည် ဖြောင့်မတ်ခြင်းတရား၏ ငြိမ်သက်ရာအရပ်၊ ဆိတ်ငြိမ်၊ လုံခြုံ၍ ဘုရားရေးရာငြိမ်သက်မှုရှိသောအရပ် ဖြစ်သင့်သည်။ သို့သော် စမ်းသပ်မှုများ၊ စိတ်ဝမ်းကွဲမှုများ သို့မဟုတ် အခြားပြဿနာများ၊ ပေါ်ပေါက်လာလျှင်ကော။ ထိုအခါ မိသားစုအတွက် စစ်မှန်သောပျော်ရွှင်မှု၏လျှို့ဝှက်ချက်ကို သိထားဖို့အထူးလိုအပ်သည်။

အရေးကြီးသော ကျင့်စဉ်မူလေးခု

၁၅။ မိသားစုအတွက် စစ်မှန်သောပျော်ရွှင်မှု၏လျှို့ဝှက်ချက်ကို သင်မည်သို့ရှင်းပြမည်နည်း။

^၁၅ ကမ္ဘာ့မိသားစုအားလုံးတို့သည် မိသားစုတိုင်း၏ ဖန်ဆင်းတော်မူရှင် ယေဟောဝါဘုရားသခင်ကြောင့် သူတို့၏အမည်နာမကိုရထားကြ၏။ (ဧဖက် ၃:၁၄၊ ၁၅၊ ကဘ) ထို့ကြောင့် မိသားစုပျော်ရွှင်မှုရလိုသူများသည် ကိုယ်တော်၏လမ်းပြညွှန်ကြားမှုကို ရှာယူ၍ ဆာလံဆရာနည်းတူ ဤသို့ချီးမွမ်းသင့်သည်– “အိုလူအမျိုးမျိုး၏ မိသားစုများတို့၊ ယေဟောဝါသည် ဘုန်းတန်ခိုးအစွမ်းသတ္တိ ရှိတော်မူသည်ဟု ဝန်ခံကြလော့။” (ဆာလံ ၉၆:၇၊ ကဘ) မိသားစုအတွက် စစ်မှန်သောပျော်ရွှင်မှု၏ လျှို့ဝှက်ချက်သည် ဘုရားသခင့်နှုတ်ကပါဌ်တော် သမ္မာကျမ်းစာနှင့် ၎င်း၏ကျင့်စဉ်မူများကို လက်တွေ့ကျင့်သုံးခြင်းအပေါ် အခြေပြုသည်။ ဤကျင့်စဉ်မူများကို လက်တွေ့ကျင့်သုံးသော မိသားစုသည် ပျော်ရွှင်မည်ဖြစ်ပြီး ဘုရားသခင်ရေးရာငြိမ်သက်ခြင်း ရှိလိမ့်မည်။ ထို့ကြောင့် ဤအရေးကြီးသော ကျင့်စဉ်မူတို့အနက် လေးခုကို ကြည့်ကြစို့။

၁၆။ မိသားစုဘဝတွင် ချုပ်တည်းခြင်းသည် အဘယ်ကဏ္ဍ၌ပါဝင်သင့်သနည်း။

^၁၆ ယင်းမူများအနက် တစ်ခုသည် ဤအရာကိုဗဟိုပြုသည်– မိသားစုဘဝတွင် ဘုရားသခင်ရေးရာငြိမ်သက်မှုရှိရန် ချုပ်တည်းခြင်းရှိဖို့ အရေးကြီးသည်။ ရှောလမုန်မင်းကြီးက ဤသို့ဆိုသည်– “ကိုယ်စိတ်ကို မချုပ်တည်းနိုင်သောသူသည် မြို့ရိုးပြိုပျက်၍ ဟင်းလင်းရှိသောမြို့နှင့်တူ၏။” (သု. ၂၅:၂၈) ငြိမ်သက်ပျော်ရွှင်သောမိသားစုကို ပိုင်ဆိုင်လိုလျှင် စိတ်ချုပ်တည်းခြင်း တင်ပြရန် အရေးကြီးသည်။ ကျွန်ုပ်တို့သည် မစုံလင်ကြသော်လည်း ဘုရားသခင်၏ သန့်ရှင်းသောဝိညာဉ်တော်အသီးဖြစ်သည့် ချုပ်တည်းခြင်းကို တင်ပြဖို့လိုသည်။ (ရောမ ၇:၂၁၊ ၂၂; ဂလာတိ ၅:၂၂၊ ၂၃) ဤအရည်အချင်းအတွက် ဆုတောင်းမည်၊ ယင်းနှင့်ပတ်သက်သည့် ကျမ်းစာဆုံးမချက်ကို လက်တွေ့ကျင့်သုံးမည်၊ ယင်းကို တင်ပြသူများနှင့် ပေါင်းသင်းမည်ဆိုလျှင် ကျွန်ုပ်တို့၌ ချုပ်တည်းမှုရှိရန် ဝိညာဉ်တော်က စွမ်းဆောင်ပေးပါလိမ့်မည်။ ကျွန်ုပ်တို့ ဤသို့ပြုခြင်းဖြင့် “မတရားသောမေထုန်ကို ကြဉ်ရှောင်” ရန် အကူအညီရရှိလိမ့်မည်။ (၁ ကောရိန္သု ၆:၁၈) ချုပ်တည်းခြင်းသည် အကြမ်းဖက်မှုကို ငြင်းပယ်ရန်၊ အရက်စွဲခြင်းကို ရှောင်ကြဉ်ရန် သို့မဟုတ် ဖြတ်ရန်၊ ခဲယဉ်းသောအခြေအနေများကို အေးဆေးစွာကိုင်တွယ်ရန် အကူအညီပေးပါလိမ့်မည်။

၁၇၊ ၁၈။ (က) ၁ ကောရိန္သု ၁၁:၃ သည်ခရစ်ယာန်မိသားစုဘဝတွင် မည်သို့သက်ဆိုင်သနည်း။ (ခ) ဦးစီးမှုကို အသိအမှတ်ပြုခြင်းသည် မိသားစုဘဝတွင် ဘုရားသခင်ရေးရာငြိမ်သက်မှုကို မည်သို့ဖြစ်ပွားစေသနည်း။

^၁၇ အခြားအရေးပါသော ကျင့်စဉ်မူတစ်ခုကို ဤသို့ဖော်ပြနိုင်သည်– ဦးစီးမှုကို အသိအမှတ်ပြုခြင်းသည် ကျွန်ုပ်တို့အိမ်ထောင်တွင် ဘုရားသခင်ရေးရာငြိမ်သက်မှုကို အမီလိုက်နိုင်ဖို့ ထောက်ကူပါလိမ့်မည်။ ပေါလုက ဤသို့ရေးသားခဲ့သည်– “ယောက်ျား၏ခေါင်းကား ခရစ်တော်ဖြစ်သည်ကိုလည်းကောင်း၊ မိန်းမ၏ခေါင်းကား ယောက်ျားဖြစ်သည်ကိုလည်းကောင်း၊ ခရစ်တော်၏ခေါင်းကား ဘုရားသခင်ဖြစ်တော်မူသည်ကိုလည်းကောင်း သင်တို့သိမှတ်စေခြင်းငှာ ငါအလိုရှိ၏။” (၁ ကောရိန္သု ၁၁:၃) ယင်းကြောင့် မိသားစုတွင် ယောက်ျားကဦးစီးရမည်၊ သူ၏ဇနီးက သစ္စာရှိရှိ ထောက်မကူညီရမည်၊ သားသမီးများကမူ မိဘစကားကို နားထောင်ရမည်ဖြစ်သည်။ (ဧဖက် ၅:၂၂-၂၅၊ ၂၈-၃၃; ၆:၁-၄) ဤကဲ့သို့သော အပြုအမူသည် မိသားစုဘဝတွင် ဘုရားသခင်ရေးရာငြိမ်သက်မှုကို ဖြစ်ပွားစေပါမည်။

^၁၈ ကျမ်းစာအရ ဦးစီးခြင်းသည် အာဏာရှင်စနစ်ကို အသုံးပြုခြင်းမဟုတ်ကြောင်း ခရစ်ယာန်လင်ယောက်ျားတစ်ဦး သတိရဖို့လိုသည်။ သူသည် သူ၏ခေါင်းဖြစ်သူ ယေရှုကိုတုပရမည်။ ကိုယ်တော်သည် “အလုံးစုံတို့၏ အချုပ်အခြာဦးခေါင်း” ဖြစ်ဖို့ရန် အကြောင်းရှိသော်လည်း ကိုယ်တော်သည် “သူတစ်ပါးကိုစေစားခြင်းငှာ” မဟုတ်၊ “သူတစ်ပါးအစေကိုခံ” ရန် “ကြွလာ” တော်မူသည်။ (ဧဖက် ၁:၂၂၊ မဿဲ ၂၀:၂၈) ထပ်တူနည်းအတိုင်းပင် ခရစ်ယာန်ယောက်ျားတစ်ဦးသည် သူ၏မိသားစုအကျိုးကို ကောင်းကောင်းပြုစုပေးနိုင်ရန် ချစ်ခင်ကြင်နာစွာ ဦးစီးဦးဆောင်ပါသည်။ ခရစ်ယာန်ဇနီးသည်သည်လည်း သူမ၏လင်ယောက်ျားနှင့် ပူးပေါင်းဆောင်ရွက်လိုသည်မှာ သေချာသည်။ သူမသည် သူ၏ “အထောက်အမ” နှင့် “အဖြည့်အစွက်” အနေနှင့် ခင်ပွန်းသည်၌မရှိသော အရည်အချင်းများကို မိမိကဖြည့်ဆည်းပေးခြင်းအားဖြင့် လိုအပ်သောထောက်မမှုကိုပေး၏။ (ကမ္ဘာဦး ၂:၂၀; သု. ၃၁:၁၀-၃၁) ဦးစီးမှုကို လျောက်ပတ်စွာကျင့်သုံးခြင်းက လင်ယောက်ျားများနှင့် ဇနီးသည်မိန်းမများတို့အား တစ်ဦးကိုတစ်ဦး ရိုသေလေးစားမှုတင်ပြစေပြီး သားသမီးများကိုလည်း နာခံမှုတင်ပြစေပါသည်။ မှန်ပါ၏၊ ဦးစီးမှုကို အသိအမှတ်ပြုခြင်းကား မိသားစုဘဝတွင် ဘုရားသခင်ရေးရာငြိမ်သက်မှု ရှိစေသည်။

၁၉။ မိသားစုငြိမ်သက်မှုနှင့် ပျော်ရွှင်မှုအတွက် ကောင်းသောဆက်သွယ်မှုသည် အဘယ်ကြောင့်မရှိမဖြစ်လိုအပ်သနည်း။

^၁၉ တတိယအရေးကြီးသော ကျင့်စဉ်မူကို ဤစကားများဖြင့် တင်ပြနိုင်သည်– မိသားစုငြိမ်သက်မှုနှင့် ပျော်ရွှင်မှုရရှိဖို့အတွက် ကောင်းသောဆက်သွယ်မှုသည် အရေးကြီးသည်။ ယာကုပ် ၁:၁၉ က ဤသို့ဆိုသည်– “ခပ်သိမ်းသောသူတို့သည် နားကြားခြင်းငှာ လျင်မြန်ကြစေ။ စကားပြောခြင်းငှာလည်းကောင်း၊ အမျက်ထွက်ခြင်းငှာလည်းကောင်း နှေးကြစေ။” မိသားစုဆက်သွယ်မှုသည် နှစ်လမ်းသွားလမ်းဖြစ်သောကြောင့် မိသားစုတွင် အချင်းချင်းတစ်ဦးကိုတစ်ဦး စကားပြောဆို နားထောင်ဖို့လိုသည်။ ကျွန်ုပ်တို့ပြောဆိုသောစကားသည် မှန်ဦးတော့ ခက်ထန်မာန်ဝင့်ပြီး မညှာမတာပြောဆိုလိုက်မည်ဆိုလျှင် ကောင်းကျိုးထက် ဆိုးကျိုးဘက်ရောက်သွားနိုင်သည်။ ကျွန်ုပ်တို့၏အပြောအဆိုသည် “ဆားအားဖြင့် ငန်သောအရသာရှိ” သင့်သည်။ (ကောလောသဲ ၄:၆) ကျမ်းစာကျင့်စဉ်မူများကို လိုက်နာပြီး ကောင်းစွာဆက်သွယ်သော မိသားစုများသည် ဘုရားသခင်ရေးရာငြိမ်သက်ခြင်းကို အမီလိုက်နေကြပါသည်။

၂၀။ မိသားစု၏ငြိမ်သက်မှုအတွက် ချစ်ခြင်းမေတ္တာ မရှိမဖြစ်ပါဟု သင်အဘယ်ကြောင့်ဆိုမည်နည်း။

^၂၀ စတုတ္ထကျင့်စဉ်မူကား ဤသို့ဖြစ်သည်– မိသားစု၏ငြိမ်သက်မှုနှင့် ပျော်ရွှင်မှုအတွက် ချစ်ခြင်းမေတ္တာ မရှိမဖြစ်ပါ။ အိမ်ထောင်ရေးတွင် စွဲစွဲလမ်းလမ်းချစ်သည့် မေတ္တာမျိုးသည်အရေးကြီးအခန်းကဏ္ဍမှ ပါဝင်ဖွယ်ရှိပြီး မိသားစုဝင်အချင်းချင်း သံယောဇဉ် ပို၍တွယ်လာစေနိုင်ပါသည်။ သို့သော် ထိုထက်အရေးကြီးသည့် ချစ်ခြင်းမေတ္တာကား ဂရိစကားလုံး အဂါးပေးဟုတင်ပြသော ချစ်ခြင်းမေတ္တာဖြစ်သည်။ ယင်းက ယေဟောဝါအပေါ်၊ ယေရှုအပေါ်၊ ကိုယ်နှင့်စပ်ဆိုင်သူအပေါ်ထားသော ချစ်ခြင်းမေတ္တာဖြစ်သည်။ (မဿဲ ၂၂:၃၇-၃၉) ‘သားတော်ကိုယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ မိမိ၌တစ်ပါးတည်းသောသားတော်ကို စွန့်တော်မူ’ ခြင်းအားဖြင့် ဤချစ်ခြင်းမေတ္တာကို လောကီသားတို့အား ဘုရားသခင်ဖော်ပြတော်မူခဲ့သည်။ (ယောဟန် ၃:၁၆) ထပ်တူချစ်ခြင်းမျိုးကို မိသားစုအား တင်ပြနိုင်ခြင်းသည် မည်မျှဝမ်းသာစရာပါတကား! ဤမြင့်မြတ်သောချစ်ခြင်းမေတ္တာသည် “စုံလင်ခြင်းအဖွဲ့အစည်း” ဖြစ်သည်။ (ကောလောသဲ ၃:၁၄) ယင်းသည် အိမ်ထောင်သည် မောင်နှံစုံကို ပေါင်းစည်းပေးပြီး တစ်ဦးအပေါ်တစ်ဦးနှင့် မိမိတို့၏ရင်သွေးလေးများအပေါ် အကောင်းဆုံးအရာကို ပြုလုပ်ပေးဖို့ လှုံ့ဆော်ပေးပါသည်။ အခက်အခဲများ ပေါ်ပေါက်လာသည့်အခါ ချစ်ခြင်းမေတ္တာသည် အရာရာကို စည်းလုံးညီညွတ်စွာ ဖြေရှင်းကိုင်တွယ်စေသည်။ “မေတ္တာသည် . . . ကိုယ်အကျိုးကို မရှာတတ်၊ . . . ခပ်သိမ်းသောအရာကို ဖုံးအုပ်တတ်၏။ ခပ်သိမ်းသောအရာကို ယုံတတ်၏။ ခပ်သိမ်းသောအရာကို မျှော်လင့်တတ်၏၊ ခပ်သိမ်းသောအရာကို သည်းခံတတ်၏။ မေတ္တာသည် ဖောက်ပြန်ခြင်းသဘောနှင့် အစဉ်ကင်းလွတ်” သဖြင့် ယင်းသို့ဖြစ်မည်ဟု စိတ်ချနိုင်ပါသည်။ (၁ ကောရိန္သု ၁၃:၄-၈) တစ်ဦးကိုတစ်ဦးချစ်ခြင်းအပေါ် ယေဟောဝါအားချစ်ခြင်း ထပ်ဖြည့်စွက်ထားသော မိသားစုများသည် အမှန်ပင် ပျော်ရွှင်ကြပါသည်တကား!

ဘုရားသခင်ရေးရာငြိမ်သက်ခြင်းကို ဆက်လက်၍အမီလိုက်လေ

၂၁။ သင့်မိသားစု၏ငြိမ်သက်မှုနှင့်ပျော်ရွှင်မှုကို အဘယ်အရာက တိုးပွားစေမည်နည်း။

^၂၁ သမ္မာကျမ်းစာမှ ထုတ်နုတ်ထားသည့် အထက်ပါကျင့်စဉ်မူများနှင့် အခြားမူများကို ယေဟောဝါသည် “သစ္စာနှင့်သတိပညာရှိသောကျွန်” မှတစ်ဆင့်ပြင်ဆင်ထုတ်ဝေပေးသည့် စာအုပ်စာတမ်းများတွင် အကြမ်းဖျင်းဖော်ပြထားပါသည်။ (မဿဲ ၂၄:၄၅၊ သမ) ဥပမာ၊ အဆိုပါအကြောင်းအရာများကို ၁၉၉၆/၉၇ တွင်တစ်ကမ္ဘာလုံး၌ကျင်းပခဲ့သော ယေဟောဝါသက်သေများ၏ “ဘုရား[သခင်]ရေးရာငြိမ်သက်ခြင်းတမန်များ” ခရိုင်စည်းဝေးကြီးတွင် ထုတ်ဝေခဲ့သော ၁၉၂-မျက်နှာရှိ မိသားစုပျော်ရွှင်မှု၏လျှို့ဝှက်ချက် စာအုပ်တွင်တွေ့ရှိပါလိမ့်မည်။ ဤစာအုပ်၏အကူအညီဖြင့် တစ်ဦးတည်းသော်လည်းကောင်း၊ မိသားစုလိုက်သော်လည်းကောင်း ကျမ်းစာလေ့လာရာတွင် အကျိုးကျေးဇူးများစွာရရှိပါလိမ့်မည်။ (ဟေရှာယ ၄၈:၁၇၊ ၁၈) မှန်ပါ၏၊ ကျမ်းစာအခြေခံသော ဆုံးမစကားကို လက်တွေ့ကျင့်သုံးခြင်းသည် သင့်မိသားစု၏ ငြိမ်သက်မှုနှင့်ပျော်ရွှင်မှုကို အမှန်တိုးပွားစေပါလိမ့်မည်။

၂၂။ ကျွန်ုပ်တို့၏မိသားစုဘဝသည် အဘယ်အရာကို ဗဟိုပြုသင့်သနည်း။

^၂၂ ယေဟောဝါသည် ကိုယ်တော်၏အလိုတော်ကိုဆောင်ရွက်သော မိသားစုများအတွက် အံ့ဖွယ်ရာများ သိုမှီးထားတော်မူသည်။ ကိုယ်တော်သည် ကျွန်ုပ်တို့၏ချီးမွမ်းထောမနာ၊ ဝတ်ပြုမှုကို ခံထိုက်တော်မူသည်။ (ဗျာဒိတ် ၂၁:၁-၄) ထို့ကြောင့် သင့်မိသားစုသည် စစ်မှန်သောဘုရားသခင်အား ကိုးကွယ်ခြင်းကို အသက်တာဘဝတွင် ဗဟိုပြုပါလေစေ။ သင့်မိသားစုဘဝတွင် ဘုရားရေးရာငြိမ်သက်မှုကို အမီလိုက်နေစဉ် ကျွန်ုပ်တို့၏မေတ္တာရှင် ကောင်းကင်ခမည်းတော် ယေဟောဝါသည် ကြွယ်ဝစွာ ကောင်းချီးသွန်းလောင်းပေးတော်မူပါစေ!

သင်မည်သို့ဖြေဆိုမည်နည်း

◻ ဘုရားသခင်ဝတ်၌မွေ့လျော်သော မိသားစုများဖြစ်ရန် အဘယ်အရာကိုလိုက်လျှောက်ဖို့လိုသနည်း။

◻ ယနေ့ မိသားစုအကျပ်ရိုက်ရသည့် အကြောင်းကားအဘယ်နည်း။

◻ မိသားစုအတွက် စစ်မှန်သောပျော်ရွှင်မှု၏လျှို့ဝှက်ချက်ကား အဘယ်နည်း။

◻ မိသားစုဘဝတွင် ငြိမ်သက်မှုနှင့်ပျော်ရွှင်မှုကို တိုးပွားစေမည့်ကျင့်စဉ်မူအချို့ကား အဘယ်နည်း။

[စာမျက်နှာ ၂၄ ပါ ရုပ်ပုံ]

ကောင်းသောဆက်သွယ်မှုသည် မိသားစုဘဝတွင် ဘုရားသခင်ရေးရာငြိမ်သက်မှုကို အမီလိုက်ရန်အကူအညီပေးသည်