ကျွန်ုပ်တို့၏ဌာနေ ခရစ်ယာန်သာသနာပြုလယ်ကွင်းကို လည်ပတ်ခြင်း

ကျွန်တော်လည်ပတ်ရသော ခရစ်ယာန်အသင်းတော်များ၏အုပ်စုသည် ကျွန်တော့်ကို ပေါ်တူဂီမှ တရုတ်သို့ခရီးဆန့်စေသည်—သို့မဟုတ် ယင်းသို့ပင်ဖြစ်ဟန်ရှိသည်။ သို့ရာတွင် ကျွန်တော့်ဇနီးအော်လီဗ်နှင့်ကျွန်တော်သည် ဗြိတိန်မှမထွက်ခွာဖူးချေ။

နိုင်ငံတစ်ဝန်းတွင် အရေအတွက်တိုးပွားနေသောယေဟောဝါသက်သေတို့၏ နိုင်ငံခြားဘာသာစကားပြောအသင်းတော်များထံ ကျွန်တော်တို့လည်ပတ်ကြသည်။ ပေါ်တူဂီအုပ်စုတစ်စုရှိသည့် ပြင်သစ်နိုင်ငံနော်မန်ဒီပင်လယ်ကမ်းရိုးတန်းမှ ၁၂ မိုင်ခန့်ကွာဝေးသည့် ဂျာစီကျွန်းမှ စိတ်ဝင်စားမှုရှိသော တရုတ်စကားပြောလူမျိုးများရှိသည့် အင်္ဂလန်မြောက်ဘက်ရှိ စန္ဒာလန်မြို့သို့ ကျွန်တော်တို့လည်ပတ်ရောက်ရှိသည်။ အောင်မြင်သော၊ ဝိညာဉ်ရေးတိုးတက်သော၊ ဘာသာစကားပေါင်းစုံပြောဆိုသောလယ်ကွင်းတွင် ကျွန်တော်တို့အမှုဆောင်ကြသည်။ ထူးခြားသောယင်းတာဝန်ကို မည်သို့ရရှိလာခဲ့သနည်း။ ကျွန်တော်တို့၏ဌာနေဖြစ်သော သာသနာပြုလယ်ကွင်းတွင် မည်သည့်အရာဖြစ်ပျက်နေသနည်း။ ကျွန်တော်ရှင်းပြပါရစေ။

အော်လီဗ်နှင့်ကျွန်တော်သည် နယ်လှည့်လုပ်ငန်းတော်တွင် နှစ်ပေါင်း ၂၀ ခန့်အမှုဆောင်ခဲ့ကြပြီး တစ်ပတ်လျှင်အသင်းတော်တစ်ခုကျစီ လည်ပတ်ကြသည်။ ကျွန်တော်တို့ခရီးစဉ်သည် ဗြိတိန်တစ်ခွင် အရှေ့အနောက်၊ တောင်မြောက်နှင့် တစ်မူထူးခြားသောခရစ်ယာန်ဧည့်ဝတ်ကျေပွန်မှုကို ခံစားခဲ့ရသည့်မော်လ်တာ၏မြေထဲပင်လယ်ကျွန်းစုပေါ်ရှိ ကျွန်တော်တို့ခရစ်ယာန်ညီအစ်ကိုများထံ မကြာမီကရောက်ရှိခဲ့သည်။ (တမန်တော် ၂၈:၁၊ ၂ နှိုင်းယှဉ်။) မော်လ်တာတွင် သုံးနှစ်ကြာနေထိုင်ပြီးနောက် တာဝန်ကျမည့်နောက်တစ်နေရာကို ကျွန်တော်တို့သိချင်လာသည်။ အင်္ဂလိပ်ကျေးလက်ဒေသကို ရောက်ရှိကောင်းရောက်ရှိနိုင်လိမ့်မည်ဟု ကျွန်တော်တို့စဉ်းစားမိပြီး ဤဖြစ်လာနိုင်ချေအတွက် ကျွန်တော်တို့၏စိတ်ကူးများကို စပြီးပြုပြင်လာခဲ့သည်။ ဘာသာစကားပေါင်း ၂၃ မျိုးပြောဆိုသော အုပ်စုများနှင့်အသင်းတော်များရှိသည့် ဤတိုက်နယ်အသစ်တွင် အမှုထမ်းဆောင်ရန် ကျွန်တော်တို့၏ခန့်အပ်လွှာကို ရရှိခဲ့သောအခါ အံ့သြလိုက်သည့်ဖြစ်ခြင်း!

ကျွန်တော်တို့မည်သို့စခန်းသွားကြမည်ကို စဉ်းစားမိခဲ့ကြသည်။ မော်လ်တာတွင် ကျွန်တော်တို့တွေ့ကြုံရသည်မှလွဲ၍ သီးခြားနောက်ခံနှင့် ယဉ်ကျေးမှုရှိသူများနှင့် သိပ်မပတ်သက်ခဲ့ဖူးချေ။ အင်္ဂလိပ်စကားအနည်းအကျဉ်းသာနားလည်သောသူများကို ကျွန်ုပ်တို့အမှန်ပင်အားပေးနိုင်မည်လော။ အခြားဘာသာစကားများနားမလည်ဘဲ ကျွန်တော်တို့မည်သို့ဆက်သွယ်နိုင်မည်နည်း။ အခြားသူများ၏ အစားအစာနှင့်ခြားနားသောထုံးစံများနှင့်ပတ်သက်၍ကော အသို့နည်း။ ကျွန်တော်တို့ ပြောင်းသာလွှဲသာရှိနိုင်မည်လော။ ဤမာကေဒေါနိဖိတ်ခေါ်ချက်ကို ပြန်လည်ဖြေကြားဖို့ လေးလေးနက်နက်စဉ်းစားနေစဉ် ကျွန်တော်တို့စိတ်ထဲတွင် မေးခွန်းများပေါ်ပေါက်လာသည်။—တမန်တော် ၁၆:၉၊ ၁၀; ၁ ကောရိန္သု ၉:၁၉-၂၂။

ဘာသာစကားအတားအဆီးကိုအောင်မြင်ခြင်း

“အစက ဘာသာစကားမပြောတတ်တော့ အရည်အချင်းမရှိဘူးဆိုပြီးခံစားရတယ်။ ညီအစ်မတွေကို ကူညီပေးနိုင်မယ်လို့မထင်ခဲ့ဘူး။ ကျွန်မတို့ကိုပထမဆုံးကျမ်းစာသင်ပေးတဲ့ ဇနီးမောင်နှံက တာဝန်တစ်ခုကို ဘယ်တော့မှမငြင်းပယ်ရဘူးလို့ အားပေးခဲ့ပုံကို အဲ့ဒီအချိန်မှာကျွန်မသတိရခဲ့တယ်။ ကျွန်မတို့မလုပ်နိုင်တဲ့အရာကိုလုပ်ဖို့ ယေဟောဝါဘယ်တော့မှ မတောင်းဆိုဘူးဆိုတာကို သူတို့သင်ပေးခဲ့တယ်” ဟုအော်လီဗ်ကပြောပြသည်။ ထို့ကြောင့် ကျွန်မတို့နှစ်ယောက်စလုံးသည် ယင်းတာဝန်ကို လိုလိုလားလားလက်ခံလိုက်သည်။

ရလဒ်အနေနှင့် အခြားဘာသာစကားကိုနားမလည်ခြင်းက လူတိုင်းကိုတစ်သမတ်တည်းဆက်ဆံဖို့ ကျွန်တော်တို့အား အကူအညီဖြစ်စေကြောင်းမြင်လာသည်။ ဥပမာ၊ သီးခြားဘာသာစကားဖြင့် ကျင်းပနေသောအစည်းအဝေးများကို အပတ်တိုင်းတက်ရောက်ရာတွင် အင်္ဂလိပ်ဘာသာစကားဖြင့် ကျင်းပသောအစည်းအဝေးများတစ်လျှောက်ထိုင်နေရစဉ် မည်သည့်အကြောင်းပြောဆိုနေသည်ကို အနည်းအကျဉ်းသာနားလည်သည့်ညီအစ်ကိုများ မည်သို့ခံစားရမည်ကို ကျွန်တော်တို့အားလေးမြတ်စေသည်။ တင်ပြသည့်အချက်များကိုနားလည်ဖို့ အစည်းအဝေးများအတွက် ကောင်းမွန်စွာကြိုတင်ပြင်ဆင်ရန် အမှန်ပင်လိုအပ်သည်။ အော်လီဗ်သည် အစည်းအဝေးတွင် အဖြေတစ်ခုအမြဲပေးသည်။ သူမသည် အင်္ဂလိပ်ဘာသာစကားဖြင့် အဖြေတစ်ခုကိုကြိုတင်ပြင်ဆင်ပြီး ညီအစ်မတစ်ယောက်က ယင်းအဖြေကိုဘာသာပြန်ပေးပါသည်။ ထို့နောက် ဘာသာပြန်ချက်ကို စကားသံအတိုင်းရေးချပေးသည်။ အဖြေပေးရန် လက်ထောင်ဖို့ မဝံ့မရဲဖြစ်မိသည်ကို သူမဝန်ခံပါသည်။ တစ်ခါတစ်ရံ သူမ၏ကြိုးစားအားထုတ်မှုများသည် ရယ်စရာဖြစ်သွားသည်။ သို့သော် ယင်းသည် သူမကိုအဟန့်အတားမဖြစ်စေပါ။ “ညီအစ်ကိုတွေဟာ ကျွန်မရဲ့ကြိုးစားမှုကို လေးမြတ်တယ်ဆိုတာ ကျွန်မသိပါတယ်။ တကယ်တော့ ကျွန်မရဲ့အဖြေဟာ အဲ့ဒီဘာသာစကားကို ကျွမ်းကျွမ်းကျင်ကျင်တတ်မြောက်ထားတဲ့သူတွေ အစည်းအဝေးမှာပါဝင်ဖို့ အားပေးမှုဖြစ်စေပါတယ်” ဟုသူမပြောပါသည်။

ဟောပြောချက်ပေးသောအခါတွင်လည်း ကျွန်တော့်အတွက်ကွာခြားသည်၊ စာကြောင်းတစ်ကြောင်းပြီးတိုင်း စကားပြန်ကိုအချိန်ပေးရသောကြောင့်ဖြစ်သည်။ ထို့ကြောင့် ကျွန်တော်စဉ်းစားထားသော အချက်များပျောက်ဆုံးဖို့ လွယ်ကူလှသည်။ ပိုမိုအာရုံစိုက်ရပြီး အကြောင်းအရာကို အတော်ပင်ဖြတ်ချလိုက်ရသည်။ သို့သော် ကျွန်တော်နှစ်သက်ပါသည်။

ကျွန်တော်တို့၏ဓမ္မအမှုအဖုံဖုံ

ဗြိတိန်နိုင်ငံ၏မြို့ပြဒေသအများအပြား၌ ပျံ့နှံ့နေသောနိုင်ငံခြားဘာသာစကားပြောဆိုသူများသည် လမ်းတစ်လမ်းတွင်နှစ်ယောက်ရှိကောင်းရှိနိုင်ပြီး အခြားသူများကိုထပ်တွေ့ရန် အနည်းငယ်လှမ်းသောနေရာသို့သွားရသည်။ သို့တိုင် သူတို့၏ကိုယ်ပိုင်စကားဖြင့် နှုတ်ဆက်လိုက်ပြီး တုံ့ပြန်မှုကိုတွေ့လိုက်ရသောအခါ အကျိုးနပ်သည်ကိုခံစားရသည်။ အကယ်၍ ကျွန်တော်နှင့်အတူပါလာသောညီအစ်ကိုသည် အိမ်ရှင်ဘာသာစကားဖြင့် ဘုရားသခင့်နိုင်ငံတော်သတင်းကို တင်ပြလိုက်သောအခါ တုံ့ပြန်မှုသည် အများအားဖြင့် အလွန်ရွှင်မြူးမှုကိုဖြစ်စေသည်။

အမှန်အားဖြင့် နိုင်ငံခြားဘာသာစကားလယ်ကွင်းတွင်ဓမ္မအမှုဆောင်ရခြင်းသည် ဘုရားသခင့်နိုင်ငံတော်လုပ်ငန်း၌ အနှစ် ၄၀ အတွင်း ကြုံတွေ့ခဲ့ရသော စိတ်လှုပ်ရှားဖွယ်အကောင်းဆုံးတစ်ခုဖြစ်သည်။ တိုးတက်မှုအလားအလာကြီးမားလှသည်။ သူတို့ကို မိခင်ဘာသာစကားဖြင့် သင်ပေးသောအခါ လူအမြောက်အမြားသည် အထူးလေးမြတ်မှုနှင့်အတူ ပို၍မြန်မြန်သင်ယူကြမည်မှာ ယုံမှားဖွယ်မရှိချေ။ (တမန်တော် ၂:၈၊ ၁၄၊ ၄၁) အစည်းအဝေးအဆုံး၌ ဝမ်းသာလုံးဆို့သောမျက်ရည်နှင့်ညီအစ်ကိုညီအစ်မများကိုတွေ့ရသောအခါ အလွန်စိတ်လှုပ်ရှားဖွယ်ဖြစ်ပြီး အချို့သည် အစီအစဉ်တစ်ခုလုံးကို နားထောင်၍နားလည်နိုင်သည်မှာ ပထမဆုံးအကြိမ်ဖြစ်သည်။

တစ်အိမ်မှတစ်အိမ်သို့ဟောပြောသောအခါ တစ်ခါတစ်ရံ ကျွန်တော်တို့ကိုယ်တိုင် ခက်ခဲမှုအနည်းအကျဉ်းရှိသော်လည်း အိမ်ရှင်ဘာသာစကားဖြင့် အနည်းဆုံးနှုတ်ဆက်စကားတစ်ခွန်းပြောရန် ကျွန်တော်တို့ကြိုးစားကြသည်။ ဥပမာ၊ ဂူဂျာရသီမိသားစုတစ်စုကို သာမန်နှုတ်ဆက်စကားတစ်ခုမှာ “ကမ်းချို” ဖြစ်ပြီး အဓိပ္ပာယ်မှာ “နေကောင်းလား” ဖြစ်သည်။ တစ်ခါက ကျွန်တော်အသံထွက်မှားသွားသောကြောင့် ကျော်ကြားသောကော်ဖီတံဆိပ်ကို ကြော်ငြာနေသည်ဟု ထင်ကြသည်။ သို့သော်ငြားလည်း ဂူဂျာရသီဘာသာစကားဖြင့် အိမ်တစ်အိမ်မှ လင်မယားနှစ်ယောက်ကို နှုတ်ဆက်လိုက်သောအခါ သူတို့သဘောကျခဲ့ကြသည်။ ကျွန်တော်တို့ကို ချက်ချင်းအိမ်ထဲဖိတ်ခေါ်ခဲ့ပြီး ရင်းရင်းနှီးနှီးကော်ဖီတိုက်ခဲ့သည်—အသံထွက်မှား၍တော့မဟုတ်ပါ။ သူတို့သည် ကျွန်တော်တို့လည်ပတ်ရောက်ရှိနေသည့်အုပ်စုထဲမှ ယေဟောဝါသက်သေအချို့နှင့်အမျိုးတော်သူများဖြစ်နေကာ သမ္မာတရားဘက်တွင် အမှန်စိတ်ဝင်စားကြောင်းပြသခဲ့ကြသည်။

နှစ်အတန်ကြာပင် အင်္ဂလိပ်စကားပြောညီအစ်မတစ်ဦးသည် တရုတ်စကားပြောအမျိုးသမီးတစ်ဦးကို မကြာခဏ မဂ္ဂဇင်းများဝေငှခဲ့ဖူးသည်။ သူမသည် ထိုအမျိုးသမီးကို အခါအားလျော်စွာ အခမဲ့ကျမ်းစာသင်အံမှုကမ်းလှမ်းခဲ့သော်လည်း ငြင်းပယ်ခဲ့သည်။ တစ်နေ့တွင် တရုတ်စကားသင်ယူနေသည့်ညီအစ်မတစ်ဦးသည် သူမနှင့်အတူလိုက်သွားကာ ထိုဘာသာဖြင့်ထုတ်ဝေထားသော သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည် စာအုပ်ကို ကမ်းလှမ်းခဲ့ပါသည်၊ စိတ်ဝင်စားသောအိမ်ရှင်သည် လိုလိုလားလားလက်ခံခဲ့သည်။a ယခုတွင် သူမ၏ကိုယ်ပိုင်ဘာသာစကားဖြင့် ထိုစာအုပ်ကိုရရှိထားသောကြောင့် ကျမ်းစာသင်အံမှုစရန် သဘောတူလိုက်သည်။ ယင်းအမျိုးသမီး၏ကိုယ်ပိုင်စကားကို အနည်းငယ်ပြောတတ်ခြင်းသည် အပြောင်းအလဲကြီးဖြစ်သွားစေခဲ့သည်။

ခြားနားသောယဉ်ကျေးမှုများ

အချို့ယဉ်ကျေးမှုများတွင် ယောက်ျားများသည် သူတို့၏မိန်းမများ ညအခါ တစ်ယောက်တည်းအပြင်ထွက်ခြင်းကို မကြိုက်မနှစ်သက်ကြောင်း ကျွန်တော်တို့သဘောမပေါက်ခဲ့ချေ။ ယင်းသည် ညနေပိုင်းကျင်းပသောအစည်းအဝေးများကို တက်ရောက်ရန် ညီအစ်မအများအပြားအတွက် အခက်အခဲဖြစ်စေသည်။ ထိမ်းမြားမှုကိုငြင်းပယ်ပြီး အိမ်၌ဆက်လက်နေထိုင်သော အမျိုးသမီးငယ်များသည် မိသားစုကိုမထီလေးစားပြုလုပ်သည်ဟု အချို့အာရှအသိုင်းအဝိုင်းများက ခံယူထားကြသည်။ ညီအစ်မငယ်တစ်ဦးသည် သူမအတွက်မိသားစုက ရွေးချယ်ထားသောအမျိုးသားကို လက်ထပ်ဖို့ငြင်းပယ်လိုက်သောအခါ သူမ၏ဖခင်သည် သူ့ကိုယ်သူအဆိပ်သောက်သတ်သေချင်ခဲ့သည်။ မှန်ပေသည်၊ ဤကဲ့သို့သောညီအစ်မများသည် ခံနိုင်ရည်ရှိခြင်းတွင် အလွန်အံ့ချီးဖွယ်ပါတကား! သို့သော်ငြားလည်း မိသားစုအသက်တာအပေါ် သမ္မာတရားအကျိုးသက်ရောက်ခြင်းရှိကာ ထိုညီအစ်မများ၏ယေဟောဝါအပေါ်သစ္စာစောင့်သိပုံက မိဘများကိုထိမိစေပုံကို မြင်ရသောအခါ အမှန်ပင်အံ့သြစရာကောင်းလှသည်။

ဤတာဝန်ကိုလက်ခံရာတွင် ကျွန်တော်တို့ ပြောင်းလဲမှုအချို့ပြုလုပ်ခဲ့ရသည်။ နယ်လှည့်လုပ်ငန်းမစတင်မီက ကျွန်တော်တို့အစားအစာသည် ရိုးရိုးအင်္ဂလိပ်အစားအစာဖြစ်သော်လည်း ယခုအခါ ဟင်းခတ်အမွှေးအကြိုင်ထည့်ထားသောအစားအစာကို ပို၍နှစ်သက်မိသည်။ ငါးအစိမ်းမှစ၍ဟင်းခတ်အမွှေးအကြိုင်ဟင်းအဆုံး ဤကဲ့သို့အစားအစာအမျိုးစုံကို မစားသုံးမိလိုက်သည့် ကုန်လွန်ခဲ့သောနှစ်ပေါင်းများစွာကို ကျွန်တော်တို့နှမြောမိသည်။

တောက်ပသောအလားအလာများ

ဤအချိန်သည် ဒေသအများတွင် နိုင်ငံခြားဘာသာစကားလယ်ကွင်းအတွက် တိုးပွားရန် အခါဖြစ်သည်မှာ ရှင်းနေပုံရသည်။ ယခုအချိန်တွင် သီးခြားဘာသာစကားများဖြင့် စာအုပ်စာတမ်းများပို၍ရရှိနိုင်သည်။ အသင်းတော်သစ်များကို ဖွဲ့စည်းလာသည်နှင့်အမျှ ယေဟောဝါ၏ကောင်းချီးကို သင်သိမြင်ခံစားနိုင်သည်။ အခြားဘာသာစကားများတတ်မြောက်သောညီအစ်ကိုများသည် ကူညီရန်အတွက် အဝေးမှရောက်ရှိလာကြသည်။

ထူးခြားသောသာဓကတစ်ခုမှာ ပြင်သစ်နိုင်ငံတွင် ဘုရားသခင့်နိုင်ငံတော်သတင်းကောင်းဟောပြောခြင်းကို တုံ့ပြန်ကြခြင်းဖြစ်သည်။ ဇိုင်ယာနှင့်အခြားအာဖရိကတိုင်းပြည်များမှ ပြင်သစ်စကားပြောဒုက္ခသည်အများအပြားသည် မကြာသေးမီနှစ်များက ဗြိတိန်နိုင်ငံသို့ ရောက်ရှိလာကြသည်။ ပထမဆုံးသောပြင်သစ်စကားပြောအသင်းတော်ကို လန်ဒန်မြို့တွင် တည်ထောင်လိုက်သောအခါ ဘုရားသခင့်နိုင်ငံတော်ကြေညာသူ ၆၅ ယောက်ခန့်ပူးပေါင်းခဲ့သည်။ တစ်နှစ်အကြာတွင် ၁၁၇ ယောက်ထိခုန်တက်လာပြီး သူတို့ထဲမှ ၄၈ ယောက်သည် မှန်မှန်ရှေ့ဆောင်အဖြစ် အချိန်ပြည့်အမှုဆောင်ခဲ့ကြသည်။ မကြာမီပင် တိုးပွားနေသောစိတ်ဝင်စားသူများကို ကြည့်ရှုရန် ဒုတိယအသင်းတော်ကို တည်ထောင်ခဲ့သည်။ ယခုတွင် စိတ်ဝင်စားသူများကို ပိုမိုအာရုံစိုက်နိုင်ပြီး ယင်းတို့မှ ၃၄၅ ယောက်သည် ၁၉၉၅ ခုနှစ် သတိရအောက်မေ့ပွဲအခမ်းအနားကို တက်ရောက်ခဲ့ကြသည်။ ဘီနင်၊ ကုတ်ဒ်အဗွား၊ မော်ရိုကိုနှင့် ဇိုင်ယာနိုင်ငံတို့တွင် အမှုထမ်းဆောင်ခဲ့ကြသော ယခင်ဂိလဒ်ကျောင်းဆင်းသူများသည် ယခုအခါသူတို့၏တွေ့ကြုံမှုကိုအသုံးပြုကာ ဤတိုးပွားနေသောလယ်ကွင်းကို ကြည့်ရှုနေကြကာ ရလဒ်ကား အံ့ဩစရာကောင်းလှသည်။

တစ်ခါက ပြင်သစ်အသင်းတော်သို့ လည်ပတ်စဉ် အာဖရိကန်အမျိုးသမီးငယ်တစ်ဦးကို သင်ပေးသောကျမ်းစာသင်အံမှုသို့ ကျွန်တော်လိုက်ပါလာခဲ့သည်။ ကျွန်တော်တို့ ထွက်သွားကြသောအခါ ထိုအမျိုးသမီးငယ်က “မသွားကြပါနဲ့။ အကြာကြီးနေပါ” ဟုဆိုကာ ငိုကြွေးခဲ့သည်။ သူမ ပိုမို၍သိချင်သေးသည်။ သူမက ကျွန်တော့်အား ပထမရာစုကလုဒိကို သတိရစေသည်။—တမန်တော် ၁၆:၁၄၊ ၁၅။

ကျွန်တော်တို့၏ပဏာမလုပ်ငန်းသည် နိုင်ငံခြားဘာသာစကားပြောအုပ်စုငယ်များကို အသင်းတော်များဖြစ်လာရန် ကူညီပေးခြင်းဖြစ်သည်။ အပတ်စဉ်အသင်းတော်စာအုပ်ကြီးသင်တန်းကျင်းပကြသည့်နေရာတွင် ညီအစ်ကိုများအတွက် တစ်လတစ်ကြိမ် သီအိုကရက်တစ်ဓမ္မအမှုကျောင်းအတိုချုပ်ကို ကျင်းပပေးခဲ့သည်။ ယင်းသည် လယ်ကွင်းဓမ္မအမှုတွင် ကောင်းမွန်စွာပြောဆိုရန် ကူညီပေးသည်။ သူတို့သည် အပတ်စဉ်အသင်းတော်အစည်းအဝေးငါးခုစလုံးကျင်းပဖို့ တဖြည်းဖြည်းလုပ်ဆောင်လာကြသည်။ ကျွန်ုပ်တို့တွင် တရုတ် (ကန်တုံ)၊ ပြင်သစ်၊ ဂူဂျာရသီ၊ ဂျပန်၊ ပေါ်တူဂီ၊ ပန်ချာပီ၊ တမီလ်နှင့် ဝဲ့လ်ချ်စကားပြောသည့် အသင်းတော်အသစ်များရှိနေပေပြီ။

နားလေးသောညီအစ်ကိုများ၏အစည်းအဝေးကို တက်ရောက်ရသည့် အခွင့်အရေးကိုလည်း ပျော်မွေ့ခဲ့သည်။ သူတို့လက်များနှင့်သီချင်းဆိုနေသောညီအစ်ကိုများကို မြင်ရခြင်းသည် အလွန်စိတ်လှုပ်ရှားစရာကောင်းသည်။ သူတို့၏ဓမ္မအမှုတွင် ကိုယ်ဟန်အမူအရာအားဖြင့် ပြောဆိုသည်ကိုသိရှိရပြီး ဘုရားသခင့်နိုင်ငံတော်ဟောပြောခြင်း၌ပါဝင်ရန် သူတို့၏ပြောင်မြောက်သောကြိုးစားအားထုတ်မှုကို ကျွန်တော်လေးမြတ်ပါသည်။ မျက်စိကန်းသောသူနှင့်နားလေးသောသူများအတွက် ကိုယ်ဟန်လက်ဟန်ပြပေးသူများပင်ရှိသည်။ တစ်ဦးတစ်ယောက်မျှ အစည်းအဝေးမလွတ်ရအောင် ယေဟောဝါအသေအချာစီစဉ်ပေးပုံရသည်။

အကယ်၍ ကျွန်တော်တို့သည် အထူးတောင်းဆိုမှုပြုရန်ရှိခဲ့သော် ယေရှုတောင်းဆိုသကဲ့သို့ပင်ဖြစ်မည်– “လုပ်ဆောင်သောသူတို့ကို စပါးရိတ်ခြင်းငှာ စေလွှတ်တော်မူမည်အကြောင်း၊ စပါးရှင်ကို ဆုတောင်းကြလော့။” (မဿဲ ၉:၃၈) ကျွန်တော်တို့ညီအစ်ကိုအများအပြားသည် သူတို့၏အသင်းတော်ရပ်ကွက်ရှိ လူမျိုးစုဘာသာစကားကိုသင်ယူရသည့် စိန်ခေါ်ချက်ကို လက်ခံနေကြသည်။ အမျိုးမျိုးသောဘာသာစကားပြောနိုင်စွမ်းကို အံ့ချီးဖွယ်ဆုကျေးဇူးအဖြစ်မရရှိသော်လည်း ယေဟောဝါသည် ရိတ်သိမ်းစရာအတွက် ရင့်မှည့်နေသောလယ်ကွင်းတစ်ခုဖြစ်သည့် ဤဌာနေသာသနာပြုလယ်ကွင်းတွင် ဓမ္မအမှုကို အမှန်ပင်ဖွင့်လှစ်ပေးနေပါသည်။ (ယောဟန် ၄:၃၅၊ ၃၆)—ကာလင်း စီမိုက ပြောပြသည်။

[အောက်ခြေမှတ်ချက်များ]