ကျွန်ုပ်တို့သည် ယုံကြည်ခြင်းရှိသောလူစားဖြစ်ကြ

အိန္ဒိယတွင် ကျမ်းစာလေ့လာခြင်းဖြင့် ယုံကြည်ခြင်းတည်ဆောက်

မြောက်ပိုင်းရှိ ခန့်ညားထည်ဝါသော နှင်းဖုံးလွှမ်းနေသည့် ဟိမဝန္တာတောင်တန်းမှ တောင်ပိုင်းရှိ အိန္ဒိယသမုဒ္ဒရာ၏ ပူနွေးသောကမ်းခြေအထိကျယ်ပြန့်သည့် အိန္ဒိယနိုင်ငံသည် နယ်မြေဒေသနှင့် ဘာသာရေးအရ ကွဲပြားခြားနားသောနိုင်ငံတစ်နိုင်ငံဖြစ်သည်။ ၎င်း၏လူဦးရေသန်းတစ်ထောင်ကျော်တွင် ၈၃ ရာခိုင်နှုန်းခန့်သည် ဟိန္ဒူများ၊ ၁၁ ရာခိုင်နှုန်းသည် မွတ်စလင်များနှင့် ကျန်သူများမှာ ခရစ်ယာန်အခေါ်ခံသူများ၊ ဆစ်ခ်များ၊ . . . ဂျိန်းဘာသာဝင်များ အဓိကပေါင်းစပ်ပါဝင်သည်။ သူတို့အားလုံး လွတ်လပ်စွာဝတ်ပြုကိုးကွယ်ခွင့်ကို ပျော်မွေ့ ကြသည်။ “အိန္ဒိယနိုင်ငံသားတို့၏ဘဝတွင် ဘာသာရေးသည် အရေးပါသောကဏ္ဍမှပါဝင်သည်” ဟု ကမ္ဘာ့စွယ်စုံကျမ်းကဆိုသည်။

အိန္ဒိယတွင် ၂၁,၂၀၀ ကျော်အရေအတွက်ရှိ ယေဟောဝါသက်သေများသည် သူတို့၏ခရစ်ယာန်ယုံကြည်ခြင်းနှင့်အညီ ကောင်းစွာနေထိုင်ကြသည်။ ကမ္ဘာ့အခြားဒေသများရှိ သူတို့၏ဝိညာဉ်ရေးအပေါင်းအဖော်များကဲ့သို့ အိန္ဒိယရှိသက်သေခံများသည် အိမ်နီးချင်းများကို သန့်ရှင်းသောသမ္မာကျမ်းစာ ဘုရားသခင့်နှုတ်မြွက်တော်၌ ခိုင်မြဲသောယုံကြည်ခြင်းရှိစေရန်ကူညီရခြင်းကို အခွင့်ထူးအဖြစ် ရှုမြင်ကြသည်။ (၂ တိမောသေ ၃:၁၆၊ ၁၇) အိန္ဒိယနိုင်ငံတောင်ပိုင်း ချယ်န်နိုင်မှမိသားစုတစ်စုသည် ကျမ်းစာသမ္မာတရားအသိပညာကို မည်သို့ရရှိလာကြောင်း သုံးသပ်ကြည့်ပါ။

ယေဟောဝါသက်သေများနှင့် သူတို့မတွေ့မီက ဤမိသားစုသည် အဆင်းအာရုံများမြင်ရခြင်း၊ ဘာသာစကားအမျိုးမျိုးပြောဆိုခြင်းနှင့် ဖျားနာသူများကိုကုသပေးခြင်းအစွမ်းရှိ၏ဟုဆိုကြသော . . . ဂိုဏ်းများတွင် တက်ကြွစွာပါဝင်ခဲ့ကြသည်။ သူတို့၏ချာ့ချ်နှင့် အသိုင်းအဝိုင်းတွင် ထင်ပေါ်သူများဖြစ်ကြပြီး ထိုမိသားစုမှအချို့ကို “သခင်” ဟုအဓိပ္ပာယ်ရှိသည့် “ဆွာမိ” ဟူ၍ပင် လူတို့ကခေါ်ခဲ့ကြသည်။ တစ်နေ့တွင် ဤမိသားစုထံသက်သေခံတစ်ဦး အလည်ရောက်လာပြီး ယေရှုသည် ဘုရားသခင်၏သားတော်ဖြစ်ကြောင်း၊ အများလက်ခံယုံကြည်သကဲ့သို့ အဆုံးမဲ့တန်ခိုးရှင်မဟုတ်ကြောင်း ကျမ်းစာမှပြသခဲ့သည်။ သက်သေခံက ဘုရားသခင်၏နာမတော်သည် ယေဟောဝါဖြစ်ပြီး ကမ္ဘာမြေကြီးအတွက် ယေဟောဝါ၏ရည်ရွယ်ချက်မှာ လှပသောပရဒိသုတစ်ခုဖြစ်စေရန်ဖြစ်ကြောင်းကိုလည်း ပြသခဲ့သည်။—ဆာလံ ၈၃:၁၈; လုကာ ၂၃:၄၃; ယောဟန် ၃:၁၆။

သူတို့သည် ဘုရားသခင့်နှုတ်မြွက်စကားတော်ကို လေးမြတ်ပြီး ကြားခဲ့ရာများကို နှစ်သက်ကြသောကြောင့် ထိုမိသားစုသည် ယေဟောဝါသက်သေများနှင့် ကျမ်းစာသင်အံမှုမှန်မှန်ပြုလုပ်ရန် သဘောတူခဲ့ကြသည်။ ယင်းကြောင့် ချာ့ချ်မှမိတ်ဆွေများ၏ ပြက်ရယ်ပြုမှုကိုခံခဲ့ရသည်။ မည်သို့ပင်ဖြစ်စေ ထိုမိသားစုသည် သူတို့၏ကျမ်းစာလေ့လာမှုကို ဆက်ပြုလုပ်ရန် ဆုံးဖြတ်ကြသည်။ သူတို့၏အသိပညာတိုးများလာသည်နှင့်အမျှ ယုံကြည်ခြင်းလည်းပိုထက်သန်လာသောအခါ . . . သောဘာသာရေး ထုံးစံဓလေ့များကို အဆက်ဖြတ်လိုက်ကြသည်။ ယနေ့တွင် ထိုမိသားစုမှသုံးဦးသည် ဇွဲရှိသောနှစ်ခြင်းခံပြီးသည့်သက်သေခံများဖြစ်နေကြပြီး မိခင်ဖြစ်သူသည် အခွင့်အရေးရတိုင်း အရန်ရှေ့ဆောင်အဖြစ်အမှုဆောင်လျက်ရှိသည်။

အင်္ဂါချို့တဲ့မှုကို ကျော်လွှားစေသည့် ယုံကြည်ခြင်း

ပန်ဂျပ်ပြည်နယ်၏ကျေးရွာတစ်ရွာတွင်နေထိုင်သော စွန်ဒါလာလ်အမည်ရှိ လူငယ်တစ်ယောက်သည် အခြားသူများနှင့် ဘုရားသခင့်နိုင်ငံတော်သတင်းကောင်း ဝေမျှခြင်းအစီအစဉ်တွင်ပါဝင်ရန် ယုံကြည်ခြင်းနှင့် ရဲစွမ်းသတ္တိများစွာလိုအပ်ခဲ့သည်။ (မဿဲ ၂၄:၁၄) တစ်ကြောင်းမှာ စစ်မှန်သောဘုရားသခင်ယေဟောဝါကို ကိုးကွယ်ရန် သူ့မိသားစုနှင့် ရွာသားများယုံကြည်ကြသော ဘုရားအများကိုးကွယ်မှုကို သူစွန့်လွှတ်ခဲ့ပြီဖြစ်သည်။ နောက်တစ်ကြောင်းမှာ စွန်ဒါလာလ်သည် ခြေထောက်မရှိသောကြောင့်ဖြစ်သည်။

၁၉၉၂ ခုနှစ်အထိ စွန်ဒါလာလ်၏ဘဝသည် ပုံမှန်ဖြစ်ခဲ့သည်။ သူသည် ဆရာဝန်၏လက်ထောက်အနေနှင့်အလုပ်လုပ်ခဲ့ပြီး သူ့မိသားစုနှစ်သက်သော ဂူးရူးဆရာ၏ ညွှန်ကြားမှုအောက် နတ်ဘုရားအမျိုးမျိုးတို့ကို သူတို့နှင့်အတူဝတ်ပြုခဲ့သည်။ ညတစ်ညတွင် မီးရထားလမ်းကိုဖြတ်ကူးစဉ် သူလဲကျသွားသည်။ ရထားကြိတ်မိပြီး ခြေထောက်နှစ်ဖက်စလုံး ပေါင်မှပြတ်သွားသည်။ အသက်ရှင်နေသော်လည်း သူ့ဘဝပြိုကွဲခဲ့ရသည်။ ထိုကြောင့် စွန်ဒါလာလ်သည် အလွန်စိတ်ဓာတ်ကျကာ ကိုယ့်ကိုယ်ကိုသတ်သေရန်ပင် စဉ်းစားခဲ့ခြင်းကို နားလည်နိုင်ပါသည်။ မိသားစုက နှစ်သိမ့်အားပေးသော်လည်း သူ့အနာဂတ်မှာ မျှော်လင့်စရာမရှိတော့သယောင်ထင်ရသည်။

မကြာမီ ယေဟောဝါသက်သေတစ်ယောက် စွန်ဒါလာလ်ထံရောက်လာပြီး ကမ္ဘာမြေကြီးကို ကြည်နူးဖွယ်ပရဒိသုပြုလုပ်ရန် ဘုရားသခင်ကတိပြုထားကြောင်းနှင့် ကိုယ်တော်ကိုချစ်၍ကြောက်ရွံ့သူအားလုံးအား စုံလင်သောကျန်းမာမှုပေးမည့်အကြောင်းများကို သမ္မာကျမ်းစာမှဖော်ပြသည်။ ကျမ်းစာသင်အံမှုကို စွန်ဒါလာလ်လက်ခံလိုက်ပြီး ဝီရိယရှိရှိတစ်နှစ်ကြာလေ့လာခဲ့သည်။ ခရစ်ယာန်အစည်းအဝေးများကိုတက်ရောက်ရန် ဖိတ်ခေါ်ခံရ၍ နောက်ဆုံးတွင် သူငယ်ချင်းတစ်ဦး၏စက်ဘီးနောက်မှလိုက်၍ သွားတက်ခဲ့သည်။ စက်ဘီးပေါ်ထိုင်လိုက်သွားခဲ့ရသည်မှာ ပင်ပန်းသော်လည်း အကျိုးများစွာရရှိခဲ့သည်။ ဘုရားသခင့်နှုတ်မြွက်တော်မှကတိတော်များကို တကယ်ယုံကြည်ပြီး ကျမ်းစာသွန်သင်ချက်နှင့်အညီ နေထိုင်ကြသူများနှင့် တွေ့ဆုံခဲ့ရသောအခါ သူ၏ကိုယ်ပိုင်ကျမ်းစာလေ့လာမှုမှ သိရှိထားခဲ့ရာများကို ခိုင်မာစေခဲ့သည်။

စွန်ဒါလာလ်သည် အိမ်နီးချင်းများအား သတင်းကောင်းကိုစတင်ဝေမျှကာ ၁၉၉၅ ခုနှစ်တွင် နှစ်ခြင်းခံခဲ့သည်။ အစပိုင်းတွင် သူပုံမှန်သွားလာသည့်ပုံစံအတိုင်း ရွာထဲ၌တစ်အိမ်မှတစ်အိမ်သို့ တရွတ်တိုက်သွား၍ အမှုဆောင်ခြင်းတွင်ပါဝင်ခဲ့သည်။ သို့သော် ယခုသူသည် သူ၏ဝိညာဉ်ရေးညီအစ်ကိုများထံမှ လက်ဆောင်တစ်ခု—လက် “လှည့်” အထူးသုံးဘီးစက်ဘီးတစ်စီး—ရထားသည်။ သူ၏သုံးဘီးစက်ဘီး၏အကူအညီကြောင့် ယခု သူသည် အသင်းတော်အစည်းအဝေးများကိုတက်ရန် ခုနစ်မိုင်ခရီးကို အကူအညီမလိုဘဲ ကိုယ်တိုင်သွားတက်ရောက်နိုင်ပြီဖြစ်သည်။ တစ်ခါတစ်ရံ မိုးသည်းထန်သည့် မုတ်သုံရာသီတွင်၊ အခြားအချိန်များတွင်မူ အပူချိန် ၁၁၀ ဒီဂရီဖာရင်ဟိုက်ကျော်တွင် သူစက်ဘီးစီးသွားရသည်။

အစည်းအဝေးများတက်ရောက်ခြင်းအပြင် စွန်ဒါလာလ်သည် စစ်မှန်သောဘုရားသခင်ယေဟောဝါ၌ ခိုင်မြဲသောယုံကြည်ခြင်းရှိလိုသော အခြားသူများနှင့် ကျမ်းစာသင်အံမှုများစွာပြုလုပ်ပါသည်။ အမှန်ဆိုရလျှင်၊ သူနှင့်ကျမ်းစာသင်ခဲ့သူ ခုနစ်ဦးအပြင် သူနှင့်စတွေ့ဆုံခဲ့ပြီး အခြားသက်သေခံများကျမ်းစာသင်ပေးခဲ့သူ သုံးဦးလည်း ယခုနှစ်ခြင်းခံပြီးကြပြီဖြစ်သည်။

သမ္မာကျမ်းစာအရ “လူတိုင်း ယုံကြည်ခြင်းရှိသည်မဟုတ်။” (၂ သက်သာလောနိတ် ၃:၂၊ ကဘ) သို့သော် ဘုရားသခင့်နှုတ်မြွက်တော်ကို မှန်မှန်လေ့လာခြင်းက “ထာဝရအသက်ကိုတလိုတလားရှိသူ” များတွင် ခိုင်မြဲသောယုံကြည်ခြင်းရှိစေနိုင်သည်။ (တမန်တော် ၁၃:၄၈၊ ကဘ) ထိုသို့လေ့လာခြင်းကလည်း အံ့ချီးဖွယ်အနာဂတ်မျှော်လင့်ချက်ဖြင့် မျက်စိကိုလင်းစေပါသည်—အိန္ဒိယတွင်ရှိ ပိုမိုတိုးများနေသောသူများ ယုံကြည်ခြင်းကျင့်သုံးနေကြသည့်အရာပင်။

[စာမျက်နှာ ၃၀ ပါ ရုပ်ပုံ]

(ကားချက်အပြည့်အစုံကို စာစောင်တွင်ကြည့်ပါ)

အာဖဂန်နစ္စတန်

ပါကစ္စတန်

နီပေါလ်

ဘူတန်

တရုတ်

ဘင်္ဂလားဒေ့ရှ်

မြန်မာ

လာအို

ထိုင်း

ဗီယက်နမ်

ကမ္ဘောဒီးယား

သီရိလင်္ကာ

အိန္ဒိယ

[Credit Line]

Mountain High Maps® Copyright © 1997 Digital Wisdom, Inc.