ဘုရားသခင်၏ဘုန်းတော်ကိုထောက်၍ ခပ်သိမ်းသောအမှုကိစ္စကိုပြုလော့

^၁ ကျွန်ုပ်တို့ချစ်မြတ်နိုးရသော ညီအစ်ကိုညီအစ်မများနှင့် ပေါင်းသင်းရခြင်းသည် မည်မျှလန်းဆန်းမှုပေးသည်တကား! (၁ ကော. ၁၆:၁၇၊ ၁၈) ယင်းကို အသင်းတော်အစည်းအဝေးများ၊ စည်းဝေးပွဲများနှင့် စည်းဝေးပွဲကြီးများအပြင် လယ်ကွင်းဓမ္မအမှုတွင် ကျွန်ုပ်တို့ပြုလုပ်ကြသည်။ ကျွန်ုပ်တို့အိမ်သို့ ဧည့်သည်များအဖြစ်ခေါ်ဖိတ်သည့်အခါတွင်လည်း ပေါင်းသင်းနိုင်ကြသည်။ ယင်းသို့ပြုခြင်းအားဖြင့် ဧည့်ဝတ်ကိုပြုခြင်းနှင့် တစ်ဦးကိုတစ်ဦး အားပေးခြင်းကိုပြုကြသည်။ (ရော. ၁၂:၁၃; ၁ ပေ. ၄:၉) မင်္ဂလာဆောင်ပွဲကျင်းပသည့်အခါ ၁၉၈၅၊ ဧပြီ ၁၅ ရက်ထုတ် ကင်းမျှော်စင်ပါ အလွန်ကောင်းသောသြဝါဒကို စွဲမှတ်ထားပါ။

^၂ စည်းစနစ်ရှိ မိတ်ဆုံပွဲများ– “စားသော်လည်းကောင်း၊ သောက်သော်လည်းကောင်း၊ မည်သည့်အမှုကို ပြုသော်လည်းကောင်း” “ဘုရားသခင်၏ဘုန်းတော်ကိုထောက်၍ ခပ်သိမ်းသောအမှုကိစ္စ” ကိုပြုသင့်သည်။ (၁ ကော. ၁၀:၃၁-၃၃) ဤသြဝါဒကို အချို့မလိုက်နာကြသောကြောင့် လူများလွန်း၍ကောင်းစွာမကွပ်ကဲနိုင်သည့် မိတ်ဆုံပွဲများတွင် ပြဿနာများ ဆက်ပေါ်ပေါက်နေသည်။ တစ်ခါတစ်ရံ လောကဆန်သောဖျော်ဖြေပွဲများသို့ လူပေါင်းရာနှင့်ချီ ဖိတ်ကြားတတ်သည်။ မင်္ဂလာဆောင်ပွဲများသို့ လောကီအပေါင်းအသင်းများနှင့် ဆွေမျိုးများကို ဖိတ်ခေါ်တတ်ကြသည်။ ထိုအချိန်အခါမျိုးနှင့် အခြားမည်သည့်အချိန်အခါတွင်မဆို မိတ်ဆုံပွဲများသည် အလွန်သီအိုကရက်တစ်ဆန်ပြီး ယေဟောဝါ၏ဘုန်းတော်အတွက် ဝိညာဉ်ရေးဆန်ဆန်ဖြစ်သင့်သည်။—ရော. ၁၃:၁၃၊ ၁၄; ဧ. ၅:၁၅-၂၀။

^၃ သက်သေခံမြောက်မြားစွာသည် စုပေါင်းပြီး အခန်းငှားရမ်းကာ မိတ်ဆုံပွဲများကျင်းပကြရာ ထိုတွင်ကောင်းစွာကွပ်ကဲခြင်းမရှိ လောကီဆန်သောဖျော်ဖြေမှုများကို တည်ခင်းဧည့်ခံခဲ့ကြကြောင်း ကြားသိရသည်။ “ယေဟောဝါသက်သေ” သီတင်းပတ် ကုန်ရက်များ ဟုကြေညာထားကာ ဟိုတယ် သို့မဟုတ် အပန်းဖြေစခန်းများ၌ ထပ်တူပွဲများကို ကျင်းပခဲ့ကြောင်း သိရသည်။ ဤကဲ့သို့သော အုပ်စုကြီးများကို အသေအချာအုပ်ထိန်းမပေးနိုင်သည့်အတွက် ပြဿနာများလည်း ပေါ်ပေါက်ခဲ့ပြီ။ ဆူပူသောင်းကျန်းမှု၊ အရက်သေစာကို အလွန်အကျွံသုံးစွဲမှု၊ မတရားမေထုန်ပြုမှုပင် တစ်ခါတစ်ရံ ဖြစ်ခဲ့ပြီ။ (ဧ. ၅:၃၊ ၄) ဤကဲ့သို့သောအပြုအမူများရှိ မိတ်ဆုံစားပွဲများသည် ယေဟောဝါ၏ဘုန်းတော်ကို မထင်ရှားစေသည်ကား အမှန်ပင်ဖြစ်သည်။ ယင်းအစား အသင်းတော်၏နာမည်ကောင်းကို ကဲ့ရဲ့ပြစ်တင်စရာဖြစ်စေပြီး အခြားသူတို့အတွက် ထိမိလဲစရာဖြစ်စေပါသည်။—၁ ကော. ၁၀:၂၃၊ ၂၄၊ ၂၉။

^၄ ခရစ်ယာန်များသည် ဧည့်ဝတ်ပျူငှာရမည်ဖြစ်သည်။ သို့သော် အချင်းချင်း တစ်ယောက်ကိုတစ်ယောက် ဝိညာဏအားပေးတည်ဆောက်မှုကို အလေးပေးသင့်သည်။ (ရော. ၁:၁၁၊ ၁၂) အကောင်းဆုံးမှာ လူနည်းစုနှင့် မိတ်ဆုံပွဲကျင်းပခြင်းဖြစ်သည်။ မိမိတို့ဓမ္မအမှု စာအုပ်စာမျက်နှာ ၁၆၇ တွင် ဤသို့ဆိုသည်– “ခရစ်ယာန်မိသားစုနှစ်စုသုံးစုကို တစ်ကြိမ်တည်း ဖိတ်ခေါ်ပေါင်းသင်းကြသည်လည်း ရှိပါသည်။ . . . ထိုသို့သော အခါသမယမျိုး၌ ဖြစ်ပျက်သမျှကို အိမ်ရှင်တာဝန်ယူခြင်းသည် သင့်လျော်ပါသည်။ ဤအချက်ကို ထည့်တွက်ပြီး အမြော်အမြင်ရှိ ခရစ်ယာန်တို့သည် ထိုမိတ်ဆုံပွဲများ၌ လူဦးရေကို မနိုင်မနင်းမဖြစ်အောင် ကန့်သတ်ခြင်း၊ အချိန်ကို ကန့်သတ်ခြင်းတို့၏ ပညာရှိမှုကို သိထားကြသည်။” ကျွန်ုပ်တို့မိတ်ဆွေများကို ဝိညာဉ်ရေးဘက် အားပေးရန် ပန်းတိုင်ထားမည်ဆိုလျှင် အကြီးအကျယ်ဧည့်ခံခြင်း မလိုကြောင်း ယေရှုဖော်ပြခဲ့သည်။—လု. ၁၀:၄၀-၄၂။

^၅ ခရစ်ယာန်ချင်းတို့ကို ဧည့်ဝတ်ပြုခြင်းသည် အလွန်ကောင်းသည်။ သို့ရာတွင် မိမိတို့အိမ်တွင် လူအနည်းငယ်စုဝေး ပေါင်းသင်းခြင်းနှင့် အခန်းငှားပြီး လောကဆန်သည့် ကြီးမားသော မိတ်ဆုံပွဲကျင်းပခြင်းသည် တခြားစီဖြစ်သည်။ ဧည့်သည်များ ဖိတ်ခေါ်သည့်အခါ ဖြစ်သမျှကို သင်တာဝန်ယူနိုင်ရမည်ဖြစ်သည်။—၁၉၉၂၊ ဩဂုတ် ၁၅၊ ကင်းမျှော်စင်၊ စာမျက်နှာ ၁၇-၂၁ ရှု။

^၆ ကောင်းသောအကျင့်များကို ကျွန်ုပ်တို့ဆက်ကျင့်ကြံနိုင်ရန် စိတ်လန်းဆန်းပြီး အားပေးတည်ဆောက်သည့် ညီအစ်ကိုများအသင်းအပင်းကို ယေဟောဝါဘုရားသခင်သည် အမှန်ပင် ပေးသနားထားတော်မူပြီ။ (မ. ၅:၁၆; ၁ ပေ. ၂:၁၂) မိတ်ဆုံပွဲများကို တော်ရုံသင့်ရုံ၊ အကျိုးသင့်အကြောင်းသင့်သဘောနှင့်အညီ ကျင်းပခြင်းအားဖြင့် ဘုရားသခင်၏ဘုန်းတော်ကို အမြဲထင်ရှားစေပြီး အခြားသူများကိုလည်း တည်ဆောက်မှုပေးနိုင်ပါလိမ့်မည်။—ရော. ၁၅:၂။