သတင်းကောင်းတင်ဆက်ခြင်း—တစ်အိမ်မှတစ်အိမ်မှတ်တမ်းအသုံးပြုခြင်း

^၁ “ခရစ်တော်၏ဧဝံဂေလိတရားကို အကုန်အစင် [“စေ့စပ်စွာ၊” ကဘ] ဟောပြောခဲ့ပြီ။” (ရော. ၁၅:၁၉) တမန်တော်ပေါလု၏ ဤစကားများက ဟောပြောခြင်း၊ သွန်သင်ခြင်းနှင့် တပည့်ဖြစ်စေခြင်းတာဝန်ကိုထမ်းဆောင်ရာတွင် သူသည် မည်မျှဝီရိယရှိခဲ့ကြောင်းဖော်ပြသည်။ ကျွန်ုပ်တို့လည်း မိမိတို့၏ခန့်အပ်ခံရပ်ကွက်တွင် စေ့စပ်စွာသက်သေခံလိုကြသည်။ ကျွန်ုပ်တို့သည် သေရေးရှင်ရေးဖြစ်နေသည့် အကျပ်တည်းဆုံးအချိန်တွင် အသက်ရှင်နေကြသည်။ လူတို့ကိုသတိပေးဖို့ပျက်ကွက်ခြင်းသည် သွေးပြစ်သင့်မည်ဖြစ်သည်။ (ယေဇ. ၃:၁၈၊ ၁၉) ကျွန်ုပ်တို့သည် တမန်တော်ပေါလုကဲ့သို့ ‘လူအပေါင်းတို့၏အသွေးနှင့် ကင်းလွတ်သည်’ ဟုပြောလိုကြသည်။ (တ. ၂၀:၂၆) ကျွန်ုပ်တို့သည် ရပ်ကွက်တွင်အမှုဆောင်ရာ၌ မည်သို့ပို၍ စေ့စေ့စပ်စပ်ရှိနိုင်သနည်း။ တစ်အိမ်မှတစ်အိမ်မှတ်တမ်းပုံစံကို တော်မှန်စွာအသုံးပြုခြင်းက အကူအညီဖြစ်စေနိုင်သည်။

တစ်အိမ်မှတစ်အိမ်မှတ်တမ်းဟူသည်မှာ

^၂ နာမည်နှင့်အညီ ၎င်းမှတ်တမ်းသည် လယ်ကွင်းဓမ္မအမှုတွင်ပါဝင်သည့်အခါ အချက်အလက်များ ရေးမှတ်ထားရန်အတွက်ဖြစ်သည်။ သို့သော် ကျွန်ုပ်တို့ရေးမှတ်ထားလိုသည့်အရာကား အဘယ်နည်း။ ပုံစံစာရွက်က ကျွန်ုပ်တို့အား ဖော်ပြပေးသည်။ (တစ်အိမ်မှတစ်အိမ်မှတ်တမ်းသင်္ကေတများနှင့် အခြားအသေးစိတ်အချက်အလက်များကို သုံးသပ်ပါ)

တစ်အိမ်မှတစ်အိမ်မှတ်တမ်းကိုအသုံးပြုပုံ—အိမ်တွင်တစ်ဦးမျှမရှိသည့်အခါ

^၃ ကျွန်ုပ်တို့၏ရပ်ကွက်ကို ထိရောက်စွာပြီးမြောက်စေရန် လူမရှိသည့်အိမ်များနှင့်ပတ်သက်သော ပြည့်စုံတိကျသည့်မှတ်တမ်းတစ်ခု မရှိမဖြစ်လိုအပ်သည်။ တစ်ခါတစ်ရံ သို့မဟုတ် မကြာခဏအမှုဆောင်ရသောရပ်ကွက်တွင်ဖြစ်စေ ထိုအတိုင်းပြုရန်ဖြစ်သည်။ ထို့ကြောင့် အိမ်တိုင်းရှိတစ်ဦးဦးထံရောက်ရှိရန် မဆုတ်မနစ်ကြိုးစားရမည်ဖြစ်သည်။ တုံ့ပြန်မှုမရရှိသည့်အခါ တစ်အိမ်မှတစ်အိမ်မှတ်တမ်းတွင် သင့်လျော်သည့်အမှတ်အသားများ ပြုလုပ်ထားသင့်သည်။ ထို့နောက် မပျက်မကွက်ပြန်သွားကာ ထိုအိမ်ထောင်ရှိ တစ်ဦးဦးကိုသက်သေခံရန် ကြိုးစားသင့်သည်။

^၄ ဦးဆုံးအကြိမ်သွားသည့်အခါ အိမ်၌မတွေ့ခဲ့ရသူတို့ထံရောက်ရှိရန် အချို့သူတို့သည် မိမိတို့၏တစ်အိမ်မှတစ်အိမ်မှတ်တမ်းကို အသုံးပြုကာ ထိုနေ့တွင်ပင် အမှုဆောင်ပြီးသည်နှင့် ချက်ချင်းပြန်သွားခဲ့ကြသည်။ သို့မဟုတ် အခြားရက်တစ်ရက်တွင်ဖြစ်စေ၊ ထိုနေ့၏အခြားအချိန်တစ်ချိန်တွင်ဖြစ်စေ ပြန်သွားဖို့ကြိုးစားကြသည်။ ညနေပိုင်းတွင်သွားရောက်လည်ပတ်ခြင်းသည် အကျိုးရှိကြောင်း များစွာသောသူတို့ တွေ့ရှိကြသည်။ အိုမင်းမစွမ်းသော သို့မဟုတ် နာမကျန်းဖြစ်နေသောကြေညာသူများသည် အချို့သောအိမ်များသို့ အကြိမ်ကြိမ်လည်ပတ်၍ မအောင်မြင်သည့်အခါ စာရေးခြင်းဖြင့် အောင်မြင်မှုရရှိခဲ့ကြပြီ။ သင်နေထိုင်ရာဝန်းကျင်ရှိရပ်ကွက်တွင် တစ်အိမ်မှတစ်အိမ်မှတ်တမ်းကို အကျိုးရှိရှိအသုံးပြုနိုင်သည်။ ယင်းနယ်မြေကို သင့်ကိုယ်ပိုင်ရပ်ကွက်အဖြစ် လုပ်ငန်းတော်ကြီးကြပ်မှူးထံတောင်းဆိုကာ နိုင်ငံတော်သတင်းဖြင့် သင့်အိမ်နီးချင်းတိုင်းကိုတွေ့ဆုံရန် ပန်းတိုင်ထားပါလေ။ (ကျွန်ုပ်တို့၏ဓမ္မအမှု စာအုပ်၊ စာမျက်နှာ ၉၆ အပိုဒ် ၂ ရှု)

စိတ်ဝင်စားမှုတွေ့သည့်အခါ

^၅ ကျွန်ုပ်တို့သည် ခမည်းတော်ယေဟောဝါနှင့် ကိုယ်တော့်သားတော်ယေရှုခရစ်ကိုတုပသည့်အနေဖြင့် အခြားသူတို့ကို ပုဂ္ဂိုလ်ရေးစိတ်ဝင်စားမှုပြဖို့လိုသည်။ မိမိတို့တွေ့ရှိသည့် စိတ်ဝင်စားသူများနှင့်ပတ်သက်သော တိကျမှန်ကန်သည့် တစ်အိမ်မှတစ်အိမ်မှတ်တမ်းတစ်ခုထားခြင်းဖြင့် ယင်းကို ကျွန်ုပ်တို့လုပ်ဆောင်ကြသည်။ အိမ်မှထွက်ထွက်ချင်း အိမ်ရှင်၏အမည်နှင့် လိပ်စာကိုရေးမှတ်ပါ။ အိမ်နံပါတ် သို့မဟုတ် လမ်းအမည်သည် ခန့်မှန်းချက်မဟုတ်ဘဲ တိကျမှန်ကန်စေဖို့ အချက်အလက်များကို စစ်ဆေးပါ။ တစ်ဦးစီ၏ထုတ်ဖော်ပြောဆိုချက်ကို ရေးမှတ်ပါ။ သင်ဆွေးနွေးခဲ့သည့်အကြောင်းအရာ၊ ဖတ်ပြခဲ့သည့်ကျမ်းချက်၊ ထားခဲ့သည့်စာပေတစ်ခုခု၊ ပြန်လာသောအခါ ဖြေကြားရမည့်မေးခွန်းတို့ကို မှတ်သားထားပါ။ သင် ပထမဆုံးအကြိမ်လည်ပတ်သည့်နေ့နှင့်အချိန်၊ သင် ပြန်လာလည်မည်ဟု ပြောခဲ့သည့်နေ့နှင့်အချိန်တို့ကို ပါဝင်စေပါ။ ယခု သင့်မှတ်တမ်းသည် ပြည့်စုံသွားပြီ၊ မပျောက်စေပါနှင့်! နောက်ပိုင်းတွင် သင် ရည်ညွှန်းသိရှိနိုင်ရန် လုံလုံခြုံခြုံသိမ်းထားပါ။ (ကြေညာသူအချို့တွင် ၎င်းတို့၏ပြန်လည်ပတ်မှုမှတ်တမ်းစာရွက်များထားသည့် ဖိုင်အသေးတစ်ခုရှိကြသည်။) လာမည့်အပတ်တွင် တစ်ဦးစီ၏အကြောင်းနှင့် ပြန်လည်ပတ်သောအခါ မည်သို့ကိုင်တွယ်ရမည်တို့ကို စဉ်းစားတွေးတောနေပါ။

တစ်အိမ်မှတစ်အိမ်မှတ်တမ်းဖြင့် ပြန်လည်ပတ်မှုများပြုလုပ်ခြင်း

^၆ အဓိပ္ပာယ်ရှိသောပြန်လည်ပတ်မှုများသည် အိမ်ရှင်တစ်ဦးအား အဆင့်ဆင့်လှုံ့ဆော်အားပေးကာ ယုံကြည်သူတစ်ဦးဖြစ်လာသည်အထိ တိုးတက်စေသည်။ စိတ်ဝင်စားမှုပြသူတို့ထံ ပြန်လည်ပတ်သည့်အခါ စွဲမှတ်ထားရမည့် လက်တွေ့ကျအကြံပြုချက်အချို့ကား အဘယ်နည်း။ ပြန်လည်ပတ်မှုများမပြုလုပ်မီ ကောင်းစွာပြင်ဆင်ပါ။ သင့်မှတ်တမ်းစာရွက်ကိုထုတ်ကာ အစမှအဆုံး သေသေချာချာဖတ်ပါ။ ထိုသူ၏အမည်နှင့် သင်ဆွေးနွေးခဲ့သည့်အကြောင်းအရာကို မှတ်ထားပါ။ သင်ပြန်သွားသည့်အခါ ဘာပြောရမည်ကို ဆုတောင်းစဉ်းစားပါ။ သင်သည် ယခင်တစ်ကြိမ်က မဂ္ဂဇင်းများထားခဲ့လျှင် ဆောင်းပါးတစ်ခုခုတွင်ပါသည့် အကြောင်းအရာတစ်ခုကိုအခြေခံ၍ ပြန်လည်ပတ်မှုပြုလုပ်နိုင်သည်။

^၇ သက်သေခံခဲ့ရသူများနှင့်သက်ဆိုင်သည့် အချက်အလက်များပါရှိသော တစ်အိမ်မှတစ်အိမ်မှတ်တမ်းသည် ထိရောက်သောပြန်လည်ပတ်မှုများပြုလုပ်ပြီး ကျမ်းစာအကြောင်းဆွေးနွေးမှုများ အစပြုရန်အတွက် မရှိမဖြစ်လို၏။ ဤမှတ်တမ်းများကို စာအုပ်တစ်အုပ် သို့မဟုတ် ကျမ်းစာအုပ်ကြားညှပ်ပြီး မမေ့လိုက်ပါနှင့်။ ရပ်ကွက်တစ်ခုသို့ရောက်ပြီးနောက် ရက်သတ္တပတ်အတော်အတန်ကြာမှ ပြန်လည်ပတ်မှုပြုလုပ်ဖို့ သတိရခြင်းက ထိုသူ၏နှလုံးထဲ ကြဲလိုက်သည့်မျိုးစေ့ကိုနုတ်ပစ်ဖို့ရှာကြံနေသော စာတန့်ကိုယ်စားလှယ်များလက်တွင်း သူ့အားရောက်စေပါသည်။ (လု. ၈:၁၂) ချက်ချင်းပြန်လည်ပတ်ခြင်းအားဖြင့် စာတန့်နည်းပရိယာယ်များကို တားဆီးပေးမည်လော။ အသင်သည် တာဝန်သိတတ်ပြီး မိမိအခွင့်အရေးကို တန်ဖိုးထားမည်ဆိုလျှင် ဖြစ်နိုင်သည်နှင့် ချက်ချင်းပြန်လည်ပတ်မည်ဖြစ်သည်။ (၁ ကော. ၉:၁၆၊ ၂၃) သင်သည် အကြိမ်ကြိမ်ကြိုးစားသော်လည်း စိတ်ဝင်စားသူနှင့် နောက်ထပ်မတွေ့ရပါက သင်သွားသည့်ရက် သို့မဟုတ် အချိန်ကိုပြောင်းခြင်းသည် အကူအညီဖြစ်စေလိမ့်မည်။ စိတ်ဝင်စားမှုပြသူတစ်စုံတစ်ဦးကို အလျင်စလို လက်မလျှော့လိုက်ပါနှင့်။

သတိပေးချက်ကိုဂရုပြုပါ

^၈ ယေရှုသည် မိမိ၏အစောပိုင်းနောက်တော်လိုက်များကို ဓမ္မအမှုဆောင်များအဖြစ် စေလွှတ်သည့်အခါ မဿဲ ၁၀:၁၆ တွင် “မြွေကဲ့သို့လိမ္မာလျက်၊ ချိုးငှက်ကဲ့သို့ အဆိပ်ကင်း” ရန် သတိပေးခဲ့သည်။ ယနေ့ ခက်ခဲသည့်အခြေအနေများအောက်တွင် သတင်းကောင်းကိုဟောပြောစဉ် ၎င်းသည် ကျွန်ုပ်တို့အတွက် အကြံဉာဏ်ကောင်းဖြစ်၏။ ယင်းသည် အထူးသဖြင့် တစ်အိမ်မှတစ်အိမ်မှတ်တမ်းများကို ဖြည့်သည့်အခါတွင်ဖြစ်သည်။ ယင်းကို အိမ်ရှင် သို့မဟုတ် အခြားသတိပြုနေသူများမမြင်စေဘဲ အလွန်လိမ္မာပါးနပ်စွာပြုသင့်သည်။ များသောအားဖြင့် သင်ရေးမှတ်ထားသည့် အချက်အလက်များသည် အိမ်ရှင်အမည်နှင့်လိပ်စာအပါအဝင် ၎င်း၏ပုဂ္ဂိုလ်ရေး အသေးစိတ်အချက်အလက်များနှင့်သက်ဆိုင်သည်။ ယင်းအချက်အလက်သည် သင့်အတွက်သာဖြစ်ပြီး ယင်းကို သင့်အမှုဆောင်လွယ်အိတ်ထဲတွင် လုံလုံခြုံခြုံသိမ်းထားပါ။

^၉ တမန်တော်ပေါလုသည် ကျွန်ုပ်တို့အတွက် ပုံသက်သေကောင်းချမှတ်ခဲ့သည်။ သူသည် သူ၏ခန့်အပ်ခံရပ်ကွက်တွင် “စေ့စပ်စွာသက်သေခံ” ခဲ့သည်။ တစ်အိမ်မှတစ်အိမ်မှတ်တမ်းကို တော်မှန်စွာအသုံးပြုခြင်းသည် ကျွန်ုပ်တို့၏ခန့်အပ်ခံရပ်ကွက်တွင် စေ့စပ်စွာသက်သေခံရန် အကူအညီဖြစ်စေပါမည်။ ထို့အပြင် နောက်ထပ်များစွာသောသူတို့သည် ယေရှုခရစ်၏တပည့်များဖြစ်လာသည့်အခါ ကျွန်ုပ်တို့အလွန်ပျော်ရွှင်ကြမည်တကား! ဤသို့ဖြင့် ကျွန်ုပ်တို့သည် “လူအပေါင်းတို့၏အသွေးနှင့်ငါကင်းလွတ်သည်” ဟူသော ပေါလု၏စကားများကို ထပ်မံပြောဆိုနိုင်မည်ဖြစ်သည်။—တ. ၂၀:၂၁၊ ကဘ၊ တ. ၂၀:၂၆။