ကျူရှင်နဲ့ ဘုရားရေးရာလုပ်ဆောင်မှုတွေကို ဟန်ချက်ညီစေပါ

၁။ (က) မိဘအချို့က ဘာကြောင့် သူတို့ကလေးတွေကို ကျူရှင်ထားဖို့ စီစဉ်ကြသလဲ။ (ခ) ကျူရှင်ထားဖို့မစီစဉ်ခင်မှာ မိဘတွေ ဘယ်အရေးကြီးတဲ့အချက်ကို စဉ်းစားသုံးသပ်သင့်သလဲ။

^၁ မေတ္တာရှိတဲ့မိဘတွေက မိမိတို့ကလေးတွေရဲ့ဘဝကို ကောင်းမွန်တဲ့ပညာရေးဆည်းပူးခြင်းဖြင့် အစပြုစေလိုကြတယ်။ ဒါပေမဲ့ ကျောင်းမှာ စာကောင်းကောင်းမသင်လို့ ကလေးတွေကို ကျူရှင်ထားဖို့လိုတယ်လို့ မိဘများစွာက ယူဆကြတယ်။ ဒီလိုလုပ်တာက ခရစ်ယာန်မိဘတွေအတွက် ပညာရှိရာကျသလား။ ဒီမေးခွန်းနဲ့ပတ်သက်ပြီး ခရစ်ယာန်မိဘတွေက ဘုရားသခင်နဲ့ ကလေးတွေရဲ့ဆက်ဆံရေးကို အဓိကထည့်တွက်ပြီး ဆုတောင်း၊ စဉ်းစားသုံးသပ်ဖို့လိုတယ်။ ယေရှုခရစ် ဒီလိုမေးခွန်းထုတ်ခဲ့တယ်– “လူသည် တစ်လောကလုံးကို အပိုင်ရ၍ မိမိအသက်ရှုံးလျှင် အဘယ်အကျိုးရှိမည်နည်း။” (မာ. ၈:၃၆) ကလေးတွေကို ကျူရှင်မထားခင်မှာ ဒါက ကလေးတွေရဲ့ ထာဝရအသက်အလားအလာကို ထိခိုက်နိုင်သလားဆိုတာ မိဘတွေ စဉ်းစားသုံးသပ်သင့်တယ်။

၂။ တချို့ကျူရှင်တွေ၊ ဘော်ဒါတွေက ကလေးတွေနဲ့ ဘုရားသခင့်ဆက်ဆံရေးကို ဘယ်လိုထိခိုက်စေနိုင်သလဲ။

^၂ တချို့ကျူရှင်တွေက ကလေးတွေ အစည်းအဝေးမှန်မှန်တက်ဖို့၊ အသင်းတော်လယ်ကွင်းလုပ်ငန်းအစီအစဉ်မှာ မှန်မှန်ပါဝင်ဖို့ အခက်တွေ့စေတယ်။ တချို့မိဘတွေက သူတို့ကလေးတွေကို ဘော်ဒါဆောင်မှာ ပို့ထားကြတယ်။ ဒီလိုလုပ်တာက ကလေးတွေရဲ့ဝတ်ပြုရေးကို ထောက်မကူညီပေးတဲ့ မိဘတွေနဲ့ရော အသင်းတော်နဲ့ပါ အဆက်ပြတ်သွားစေတယ်။ (မတ် ၁၅၊ ၁၉၉၇ ကင်းမျှော်စင် စာမျက်နှာ ၂၅-၂၈ ပါ “ဘော်ဒါကျောင်း၌ သင့်ကလေးကိုထားသင့်ပါသလော” ဆောင်းပါးကိုကြည့်ပါ။) ဒါပေမဲ့ အစည်းအဝေးပုံမှန်မတက်နိုင်၊ အသင်းတော်လယ်ကွင်းလုပ်ငန်းမှာ ပုံမှန်မပါဝင်နိုင်တဲ့ ကျူရှင်တက်ခြင်း၊ ဘော်ဒါထားခြင်းက မဿဲ ၂၈:၁၉၊ ၂၀ နဲ့ ဟေဗြဲ ၁၀:၂၄၊ ၂၅ မှာပါတဲ့ ဘုရားသခင်ရဲ့ ရှင်းလင်းပြတ်သားတဲ့ တောင်းဆိုချက်ကို လျစ်လျူရှုခြင်းဖြစ်တယ်။ ဒါ့အပြင် ဘုရားရေးရာမဆန်တဲ့ အတွေးအခေါ်တွေနဲ့ မကောင်းတဲ့အပေါင်းအသင်းတွေက ကလေးတွေရဲ့ယုံကြည်ခြင်းကို အားနည်းသွားစေနိုင်တဲ့အတွက် ဘုရားသခင်နဲ့ ကလေးတွေရဲ့ဆက်ဆံရေးကို ထိခိုက်နိုင်တယ်။—၂ ကော. ၆:၁၄-၁၈။

၃။ တမန်တော်ပေါလုရဲ့ ပုံသက်သေကနေ ကျွန်ုပ်တို့ ဘာသင်ယူနိုင်သလဲ။

^၃ ဝတ်ပြုရေးအစီအစဉ်တွေ အရေးပါ– ဘယ်ကျူရှင်၊ ဘယ်ပညာရေးအစီအစဉ်ကမှ ယေဟောဝါပြင်ဆင်ပေးတဲ့ ဝတ်ပြုရေးအစီအစဉ်တွေနဲ့ မနှိုင်းယှဉ်နိုင်ဘူး။ တမန်တော်ပေါလုရဲ့ပုံသက်သေကို သုံးသပ်ကြည့်ပါ။ သူ ခရစ်ယာန်မဖြစ်ခင်က နာမည်ကြီးတဲ့ ဥပဒေပညာရှင် ဂါမလျေလထံမှာ ပညာဆည်းပူးခဲ့တယ်။ (တ. ၂၂:၃) အချိန်တန်တော့ ပေါလုဟာ သူ့ရဲ့အသိုင်းအဝိုင်းမှာ စတင်ထင်ရှားလာတယ်။ သူအဲဒီအတိုင်းဆက်သွားမယ်ဆိုရင် ဂျူးအသိုင်းအဝိုင်းမှာ ထင်ပေါ်ကျော်ကြားသူ ဖြစ်လာနိုင်တယ်။ (ဂလ. ၁:၁၃၊ ၁၄) ဒါပေမဲ့ ပေါလုက သတင်းကောင်းကိုလက်ခံပြီး ဟောပြောခြင်းလုပ်ငန်းမှာ ပါဝင်လာတဲ့အခါ ဒါတွေအားလုံးကို ကျောခိုင်းခဲ့တယ်။ သူ့ရွေးချယ်မှုအတွက် ပေါလု နောင်တရခဲ့သလား။ မရခဲ့ပါဘူး။ သူဒီလိုရေးခဲ့တယ်– “ထိုမျှမက ငါ၏သခင် ခရစ်တော်ယေရှုနှင့်ပတ်သက်သော အသိပညာသည် သာလွန်ထူးမြတ်သောကြောင့် အရာခပ်သိမ်းကို ရှုံးစေသောအရာဟု ငါယူမှတ်၏။ ကိုယ်တော်ကြောင့် ငါသည် အရာခပ်သိမ်းကို အရှုံးခံ၍ အမှိုက်သရိုက်ကဲ့သို့ ယူမှတ်၏။”—ဖိ. ၃:၈။

၄။ (က) ဝတ်ပြုရေးအတွက် ပြင်ဆင်ပေးချက်ကိုလေးစားကြောင်း ကျွန်ုပ်တို့ ဘယ်လိုပြသ သလဲ။ (ခ) အကြီးအကဲတွေနဲ့ ဓမ္မအမှုထမ်းတွေကို ဘာတောင်းဆိုထားသလဲ။

^၄ ကလေးတွေ ဘုရားသခင်နဲ့ ဆက်ဆံရေးကောင်းဖို့ဆိုရင် ဝတ်ပြုရေးနဲ့ဆိုင်တဲ့ ပြင်ဆင်ပေးချက်တွေက အရေးပါတယ်။ အစည်းအဝေးတွေက အလွန်အရေးကြီးတဲ့အတွက် ကျူရှင်ကြောင့် အစည်းအဝေးပုံမှန်မတက်နိုင်တာက ပညာမဲ့ရာရောက်တယ်။ အလားတူ၊ ဓမ္မအမှုက ကျွန်ုပ်တို့ဘဝရဲ့ အဓိကဦးစားထားရာဖြစ်တဲ့အတွက် ကျူရှင်ကြောင့် ကလေးတွေ လယ်ကွင်းဓမ္မအမှုမှာ မပါဝင်နိုင်တာမျိုး မဖြစ်စေလိုဘူး။ (၂ တိ. ၄:၂) အထူးသဖြင့် အကြီးအကဲတွေနဲ့ ဓမ္မအမှုထမ်းတွေက သူတို့ရဲ့ကလေးတွေ ကျူရှင်ကြောင့် အစည်းအဝေးနဲ့ လယ်ကွင်းဓမ္မအမှုကို မပျက်ကွက်စေခြင်းအားဖြင့် ပုံသက်သေပြသင့်တယ်၊ အကြောင်းကတော့ ကလေးတွေနဲ့ အိမ်ထောင်ကို ကောင်းစွာဦးစီးဖို့ကျမ်းစာက တောင်းဆိုထားလို့ဖြစ်တယ်။—၁ တိ. ၃:၂-၅၊ ၁၂။

၅။ တချို့မိဘတွေက ကျူရှင်နဲ့ ဘုရားရေးရာလုပ်ဆောင်မှုတွေကို ဘယ်လို ဟန်ချက်ညီစေနိုင်ခဲ့သလဲ။

^၅ ဒါက ဘယ်ကျူရှင်မှ မတက်သင့်ဘူးလို့ ဆိုလိုတာမဟုတ်ဘူး။ ရဲစွမ်းသတ္တိတင်ပြခြင်း၊ ယေဟောဝါကို ယုံကြည်ကိုးစားကြောင်းတင်ပြခြင်းအားဖြင့် တချို့မိဘတွေက ကလေးတွေ အစည်းအဝေးအားလုံးတက်နိုင်တဲ့၊ လယ်ကွင်းလုပ်ငန်းမှာပါဝင်နိုင်တဲ့ ကျူရှင်ကို စီစဉ်နိုင်ခဲ့တယ်။ ခရစ်ယာန်မောင်နှံတစ်စုံက ဒီလိုရှင်းပြခဲ့တယ်– “ကျူရှင်ဆရာနဲ့စကားမပြောခင် ကျွန်တော်တို့ ဆုတောင်းတယ်၊ အဲဒီနောက် ခရစ်ယာန်အစည်းအဝေးတွေတက်ရောက်ခြင်းက ကျွန်တော်တို့မိသားစုအတွက် အဓိကအရေးကြီးတဲ့အရာဖြစ်ကြောင်း ရိုသေလေးစားစွာ ရှင်းပြခဲ့တယ်။ ကလေးတွေရဲ့ ဘုရားရေးရာလုပ်ဆောင်မှုတွေကို မထိခိုက်စေတဲ့ ကျူရှင်တစ်ခုကို ရှာတွေ့ဖို့ ကျွန်တော်တို့က ကျူရှင်ဆရာများစွာနဲ့ စကားပြောခဲ့တယ်။” တချို့မိဘတွေကတော့ သူတို့ကိုယ်တိုင် ကလေးတွေကို စာပြပေးဖို့ အချိန်ဖယ်ထားကြတယ်။ ယေဟောဝါကို မှီခိုအားကိုးခြင်းအားဖြင့် ကလေးတွေက ဝတ်ပြုရေးပြင်ဆင်ပေးချက်တွေကို ဦးစားပေးပြီး ကျူရှင်ကို သူ့နေရာနဲ့သူထားနိုင်ကြမှာဖြစ်တယ်။

၆။ အခြားသူတွေက ကျူရှင်နဲ့ပတ်သက်ပြီး ကျွန်ုပ်တို့ကို ဖိအားပေးလာတဲ့အခါ ဘုရားရေးရာကို ဆက်ဦးစားထားနိုင်ဖို့ ယေရှုရဲ့စကားတွေက ဘယ်လိုအကူအညီပေးနိုင်သလဲ။

^၆ ဘုရားရေးရာကို ဦးစားပေးခြင်း–  တချို့မိသားစု၊ အိမ်နီးချင်းနဲ့ မိတ်ဆွေတွေက ဒီကျူရှင်မထားဘူးဆိုရင် ကလေးတွေရဲ့နောင်ရေးကို ထိခိုက်နိုင်တယ်လို့ စိတ်ရင်းနဲ့ ပြောကြမှာဖြစ်တယ်။ ဒီအပြောကြောင့် စိုးရိမ်စိတ်ဝင်လာတာမျိုး၊ ဘုရားရေးရာကို ဦးစားမထားတာမျိုး အဖြစ်မခံပါနဲ့။ ယေရှု ဒီလိုပြောခဲ့တယ်– “ငါ့နာမကြောင့် အိမ်၊ ညီအစ်ကိုမောင်နှမ၊ မိဘ၊ သားသမီး၊ မြေယာများကို စွန့်သူတိုင်း အဆများစွာ ရမည့်အပြင် ထာဝရအသက်ကိုလည်း အမွေခံရလိမ့်မည်။” (မ. ၁၉:၂၉) မိမိနောက်လိုက်တွေရဲ့လိုအပ်ရာကို ကောင်းကင်ခမည်းတော်သိတယ်လို့ ယေရှု အာမခံခဲ့တယ်။ ဒါကြောင့် သူတို့ကို ကိုယ်တော်ဒီလိုတိုက်တွန်းခဲ့တယ်– “သို့ဖြစ်၍ ဘုရားသခင်၏နိုင်ငံတော်နှင့် ဖြောင့်မတ်ခြင်းတရားကို ဦးစွာ ရှာလျက်နေကြလော့။ နောက်မှ ထိုအရာအားလုံးကို ထပ်၍ပေးတော်မူမည်။”—မ. ၆:၃၁-၃၃။

၇။ ကလေးတွေအတွက် ကျူရှင်ရွေးချယ်ရာမှာ မိဘတွေ ဘာကြောင့် အသေအချာသုံးသပ်ဖို့လိုသလဲ။

^၇ ဒါဆိုရင် ခရစ်ယာန်မိဘတွေက ကလေးတွေအတွက် ကျူရှင်ရွေးချယ်တဲ့အခါ ဘာလုပ်သင့်သလဲ။ မိဘတွေက ကလေးတွေ ကျောင်းမှာ စာကောင်းကောင်းလိုက်နိုင်ပြီး အနာဂတ်မှာ ကလေးတွေအတွက် အထောက်အကူဖြစ်မယ့် အတတ်ပညာတွေကို သင်ယူစေလိုကြတယ်။ (သု. ၂၂:၂၉) ဒါပေမဲ့ သမ္မာကျမ်းစာက ဒီလိုပြောတယ်– “သမ္မာသတိရှိသောသူသည် အမှုကိုမြော်မြင်၍ ပုန်းနေတတ်၏။ ဉာဏ်တိမ်သောသူမူကား အစဉ်အတိုင်းသွား၍ အမှုနှင့်တွေ့တတ်၏။” (သု. ၂၂:၃) ပြဿနာဖြစ်ပြီးမှ ဖြေရှင်းတာထက် ပြဿနာမဖြစ်အောင် ရှောင်တာက ပိုကောင်းပါတယ်။ ဒါကြောင့် သင့်ကလေးကို ကျူရှင်ထားဖို့ စီစဉ်မယ်ဆိုရင် အသေအချာစဉ်းစားသုံးသပ်ပါ၊ အဲဒီလိုလုပ်မယ်ဆိုရင် ဘုရားရေးရာလုပ်ဆောင်မှုတွေက ကလေးတွေရဲ့အသက်တာမှာ အမြဲပထမနေရာမှာ ရှိနေမှာဖြစ်တယ်။