ကျွန်ုပ်တို့၏စာရှုသူများထံမှ
ကွာရှင်းခြင်း “သားသမီးထိန်းသိမ်းစောင့်ရှောက်ခွင့်—မျှတသောအမြင်ကားအဘယ်နည်း” (ဒီဇင်ဘာ ၈၊ ၁၉၉၇ [လိပ်]) အခန်းဆက်ဆောင်းပါးအတွက် အရမ်းကျေးဇူးတင်တဲ့အကြောင်း စာရေးပြီးပြောရတာပါ။ ကွာရှင်းပြီးတဲ့နောက်ပိုင်း ကျွန်မတို့ရဲ့သမီးကို ကျွန်မရဲ့ခင်ပွန်းဟောင်းနဲ့ တွေ့ဆုံခွင့်ဘယ်လောက်အထိပေးသင့်တယ်ဆိုတာကို ဆုံးဖြတ်ဖို့အခက်တွေ့ခဲ့ရတယ်။ ကျွန်မရဲ့လက်ရှိခင်ပွန်းကလည်း ဖြစ်နိုင်သရွေ့ တွေ့ဆုံခွင့်မပေးသင့်ဘူးလို့ ယူဆထားပါတယ်။ ဒါပေမဲ့ နိုးလော့!မှာကလေးရဲ့ကောင်းကျိုးကိုအဓိကထားရမှာဖြစ်ပြီး မိဘ ဒါမှမဟုတ် မိထွေး၊ ပထွေးရဲ့စိတ်လှုပ်ရှားမှုက အဓိကမကျကြောင်းရှင်းပြထားတယ်။
အယ်လ်. စီ.၊ ဝေလနယ်
ဖခင်နဲ့နေသင့်တယ်လို့ တရားရုံးကဆုံးဖြတ်ချက်ချလိုက်တဲ့အခါ ကျွန်မရဲ့တစ်ဦးတည်းသောသမီးကို ကျွန်မဆီကနေခေါ်သွားခဲ့ကြတယ်။ ဒါကြောင့် ဒီဆောင်းပါးက ကျွန်မအတွက်ရေးထားပုံရတယ်။ ယေဟောဝါဟာ ကျွန်မတို့ကို “အချိန်တန်အစာ” ကျွေးနေတယ်ဆိုတာကိုသိထားရတာက ကောင်းချီးတစ်ခုပါပဲ။—မဿဲ ၂၄:၄၅။
ဒီ. ဘီ.၊ ဆွစ်ဇလန်
နှစ်နှစ်လုံးလုံး ကလေးတွေကိုစောင့်ရှောက်ခြင်းမှာလုံးပန်းခဲ့ရလို့ နိုးလော့! ရဲ့မျက်နှာဖုံးကိုတွေ့လိုက်ရတဲ့အခါ မျက်ရည်ကျပြီး ယေဟောဝါကိုကျေးဇူးတင်ခဲ့ရတယ်။ အဲ့ဒါဟာ အရမ်းကိုစိတ်လှုပ်ရှားစရာကောင်းတဲ့တွေ့ကြုံမှုပါပဲ။ ဒီမှတ်သားဖွယ်ကောင်းပြီး ကောင်းစွာစဉ်းစားထားတဲ့နည်းလမ်းတွေပါတဲ့ အကြောင်းအရာတွေကိုတင်ပြထားတဲ့အတွက် ကျွန်မတကယ့်ကိုတန်ဖိုးထားလေးမြတ်ပါတယ်။
အေ. အက်ဖ်.၊ အမေရိကန်ပြည်ထောင်စု
ကျွန်တော်ကလေးဘဝကတည်းက ကျွန်တော်ရဲ့မိဘတွေကွာရှင်းခဲ့ကြတယ်။ မိဘနှစ်ပါးရဲ့ကြားမှာ စိတ်ဝေခွဲမရဖြစ်နေတယ်။ အဲ့ဒါကြောင့် ဒီအကြောင်းအရာပါတဲ့ဆောင်းပါးတွေကို ကျွန်တော်ဘယ်လောက်ဝမ်းပန်းတသာလက်ခံခဲ့တယ်ဆိုတာကို ခင်ဗျားတို့မှန်းကြည့်နိုင်ပါတယ်။ ဒီပြဿနာကို ကလေးတွေရဲ့ရှုမြင်ပုံကနေ ဖြေရှင်းပေးထားတဲ့အတွက် ကျွန်တော်အရမ်းကိုကျေးဇူးတင်ပါတယ်။
ကေ. ဒီ.၊ ယူဂိုစလားဗီးယား
အယ်လ်ပင်းဥယျာဉ် “အယ်လ်ပင်းအမျိုးသားဥယျာဉ်၏အလှ” (နိုဝင်ဘာ ၂၂၊ ၁၉၉၇ [လိပ်]) ဆောင်းပါးအတွက် အရမ်းကျေးဇူးတင်တယ်လို့ပြောချင်ပါတယ်။ ပွင့်ပွင့်လင်းလင်းပြောရမယ်ဆိုရင် ကျွန်မဟာ သဘာဝနဲ့ပတ်သက်တဲ့ အရင်တုန်းကဆောင်းပါးတွေကို ဂရုမစိုက်ခဲ့ဘူး။ ဒါပေမဲ့ ဆောင်းပါးနဲ့အတူယှဉ်တွဲပါလာတဲ့ သားနားတဲ့ရုပ်ပုံတွေကိုမြင်ပြီး ဖတ်ဖို့ဆုံးဖြတ်ခဲ့တယ်။ ကျွန်မဖတ်ပြီးတဲ့အခါ သဘာဝနဲ့ပတ်သက်တဲ့ စိတ်ဝင်စားစရာတခြားဆောင်းပါးတွေအများကြီးကိုဖတ်ဖို့ လက်လွတ်သွားခဲ့တယ်ဆိုတာသိခဲ့ရတယ်။
တီ. အမ်.၊ ယူကရိန်း
လိင်တူဆက်ဆံခြင်း “သမ္မာကျမ်းစာရှုထောင့်– ခရစ်ယာန်များ လိင်တူဆက်ဆံခြင်းကို ရွံမုန်းသင့်သလော” ဆောင်းပါးပါတဲ့ ဒီဇင်ဘာ ၈၊ ၁၉၉၇ [လိပ်] နိုးလော့! ကိုကျွန်မရလိုက်တဲ့အခါ အရမ်းစိတ်လှုပ်ရှားခဲ့ရတယ်။ ဒီဆောင်းပါးဟာ အရေးအသားပြေပြစ်ပြီး အတိမ်းအစောင်းမခံတဲ့အကြောင်းအရာကို မျှမျှတတခြုံငုံပြထားတဲ့ဆောင်းပါးပါပဲ။
အယ်လ်. ဒဗလျူ.၊ အမေရိကန်ပြည်ထောင်စု
ငြီးငွေ့ခြင်း “သင့်အလုပ်ကို သင်ငြီးငွေ့သလော” (ဒီဇင်ဘာ ၂၂၊ ၁၉၉၈) ဆောင်းပါးပါတဲ့မဂ္ဂဇင်းတစ်စောင်ကို ကျွန်မရဲ့အလုပ်ကြီးကြပ်ရေးမှူးကိုပေးခဲ့တယ်။ နောက်တစ်နေ့မနက်အလုပ်မှာ အရမ်းကောင်းတဲ့ဆောင်းပါးဖြစ်တဲ့အကြောင်း ကျွန်မကိုပြောပြခဲ့တယ်။ ကျွန်မရဲ့အလုပ်ဖော်တချို့ကိုလည်း သူပေးဖတ်ခဲ့ပြီး ကျွန်မတို့ရဲ့အနားယူခန်းမှာ စာစောင်ကိုထားခဲ့တယ်။ ရှင်တို့ရဲ့ဆောင်းပါးဟာ တကယ့်ကိုအချိန်သင့်အခါသင့်ပဲ!
ဗွီ. အယ်လ်.၊ အမေရိကန်ပြည်ထောင်စု
စိတ်ဝင်စားစရာကောင်းတဲ့အကြောင်းအရာအတွက် ကျေးဇူးတင်ပါတယ်။ ကျွန်မက အသက် ၁၇ နှစ်ရှိပြီး အချိန်ပြည့်အလုပ်လုပ်နေသူပါ။ ဒီဆောင်းပါးက ကျွန်မရဲ့အလုပ်မှာ ပိုပြီးပျော်ရွှင်အောင်လုပ်နိုင်ပုံကို ဖော်ပြပေးတဲ့ အရမ်းကောင်းတဲ့အကြံဉာဏ်ကိုပေးတယ်။ ကျေးဇူးပါပဲ!
အီး. အေ.၊ အီတလီ
ဒီဆောင်းပါးအတွက် အရမ်းကိုကျေးဇူးတင်ပါတယ်။ ကျွန်မဟာအခုအချိန်မှာ အလုပ်သင်အဖြစ်ဒုတိယနှစ်ရောက်နေပြီး စိတ်ဓာတ်တွေကျပြီး အလုပ်မှာမပျော်တော့ဘူး။ ကျွန်မရဲ့အလုပ်ကနေ ထပ်ပြီးပျော်ရွှင်မှုရှာတွေ့နိုင်ဖို့ ဒီဆောင်းပါးကအကူအညီပေးခဲ့တယ်။
အိုင်. အက်ဖ်.၊ ဂျာမနီ
ရေ့ဗ်ကပွဲများ ကျွန်မကတော့အသက် ၁၉ နှစ်ရှိပြီး တက္ကနို (techno) တေးဂီတတွေနားထောင်တာကို အရမ်းနှစ်သက်တယ်။ ဒါပေမဲ့ “လူငယ်များအမေး . . . ရေ့ဗ်ကပွဲများသည် အန္တရာယ်ကင်းသောပျော်စရာလော” (ဒီဇင်ဘာ ၈၊ ၁၉၉၈) ဆောင်းပါးကို ကျွန်မအရမ်းကြိုက်တယ်။ ဒီဆောင်းပါးဟာ ကျွန်မမြင်ဖူးတဲ့အထဲမှာ အဲ့ဒီလိုတေးဂီတအမျိုးအစားကို တိကျမှန်ကန်စွာဖော်ပြထားတဲ့ ပထမဆုံးဆောင်းပါးပါပဲ။ အထူးသဖြင့် “ရေ့ဗ်ကပွဲများသည် အမှန်ပင်သင့်အတွက်လော” ခေါင်းစဉ်ငယ်အောက်ကအပိုင်းအတွက် ပိုပြီးကျေးဇူးတင်ပါတယ်။ မေးခွန်းတွေ၊ ကျမ်းချက်တွေကြောင့် ရိုးရှင်းပြီးကျိုးကြောင်းဆီလျော်တဲ့ ဆုံးဖြတ်ချက်ချဖို့ ကျွန်မကိုကူညီပေးခဲ့တယ်။
အေ. ပီ.၊ စလိုဗေးနီးယား