‘အမှန်တရားသည် သင်တို့ကိုလွှတ်လိမ့်မည်’
အထက်ပါစကားဟာ ယောဟန် ၈:၃၂ မှာပါတဲ့ ယေရှုရဲ့စကားဖြစ်ပြီး ထာဝရအမှန်တရားလည်းဖြစ်တယ်။ အဲဒီအမှန်တရားက အယူသီးမှုတွေ၊ ဘုရားသခင်ကိုစိတ်ငြိုငြင်စေပြီး ကျွန်တော်တို့ကိုဘေးဖြစ်စေနိုင်တဲ့ ဓလေ့ထုံးစံတွေကနေ လွတ်မြောက်စေတယ်။ နိုင်ငံအသီးသီးကလူတွေဟာ ကျမ်းစာအမှန်တရားကြောင့် ခရစ္စမတ်နဲ့ပတ်သက်တဲ့ ဝန်ပိစေတဲ့ဓလေ့ထုံးစံတချို့ကနေ လွတ်မြောက်ခဲ့ပုံကို တွေ့ရပါလိမ့်မယ်။
ကျမ်းစာအမှန်တရားက သူတို့ကို လွတ်မြောက်စေခဲ့
အာဂျင်တီးနား “ကျွန်တော်တို့ရဲ့မိသားစုဟာ အစားအသောက်လွန်ကြူးခြင်းနဲ့နွှယ်နေတဲ့ပြဿနာနဲ့ စျေးကြီးလွန်းတဲ့လက်ဆောင်တွေအတွက် အကုန်အကျကနေ လွတ်မြောက်လာခဲ့ပြီ” လို့အော်စကာက ပြောတယ်။
မာရီယိုက “ခရစ္စမတ် လိမ်လည်မှု” (သူထွင်ထားတဲ့စကားလုံးဖြစ်) အကြောင်း သိရှိနားလည်လာတဲ့အခါ လွတ်လပ်မှုကြီးကို ခံစားခဲ့ရတယ်။ “နှစ်တစ်နှစ်ရဲ့ဘယ်အချိန်မှာမဆိုနဲ့ ကျွန်တော်တတ်နိုင်တဲ့အခါတိုင်း အခြားသူတွေကို လက်ဆောင်တွေပေးပြီး ကျေးဇူးတင်လေးမြတ်ကြောင်း ဖော်ပြနိုင်တဲ့အတွက် အခု ကျွန်တော်ရွှင်လန်းနိုင်ပြီ။”
ကနေဒါ “လက်ဆောင်တွေပေးရတာ ဒါမှမဟုတ် လက်ခံရတာကို ကျွန်မနှစ်သက်တယ်” လို့အယ်လ်ဖီက ပြောတယ်။ “ဒါပေမဲ့ မပေးရင်မဖြစ်လို့ ပေးလာတဲ့လက်ဆောင်မျိုးကိုတော့ ကျွန်မ,မကြိုက်ဘူး။ ကျွန်မတို့မိသားစုက ခရစ္စမတ်ပွဲမလုပ်တော့တဲ့အခါ အပန်းဖြေခရီးထွက်လိုက်ရသလိုပဲ။”
အယ်လ်ဖီရဲ့သမီး အူလီက ဒီလိုပြန်ပြောပြတယ်– “ကျွန်မတို့ရဲ့မိဘတွေက ခရစ္စမတ်ပွဲမလုပ်တော့တဲ့နောက် နှစ်တွေတစ်လျှောက် ဘယ်အချိန်မှာမဆို ကျွန်မတို့အတွက် ပျော်စရာကောင်းတဲ့လုပ်ဆောင်မှုတွေစီစဉ်ပေး၊ လက်ဆောင်တွေကိုပေးပြီး အံ့သြဝမ်းသာသွားအောင်လုပ်တတ်ကြတယ်၊ အဲဒီလိုလုပ်ပေးတာတွေကို ကျွန်မတို့ နှစ်သက်တယ်။ ဘာပွဲလဲလို့ အတန်းဖော်တွေမေးလာတဲ့ခါ ‘ဘာပွဲရယ်လို့မဟုတ်ဘူး၊ ကျွန်မတို့ကို ချစ်လို့’ ဆိုပြီး ဂုဏ်ယူစွာနဲ့ပြန်ပြောပြတယ်။ တကယ်တော့ ကျွန်မမိဘတွေဟာ ဆွေမျိုးတွေလုပ်တဲ့ပွဲတွေမှာ မပါဝင်တော့တဲ့အတွက် သူတို့ရဲ့ဆန့်ကျင်မှုခံရတတ်လို့ ကျမ်းစာအမှန်တရားနဲ့အညီ ပြောင်းလဲနေထိုင်ရတာ မလွယ်ကူခဲ့ဘူး။ ဒါပေမဲ့ ကျွန်မမိဘတွေက မားမားမတ်မတ်ရပ်တည်ခဲ့ကြတယ်။ ယေဟောဝါဘုရားသခင်လက်ခံနိုင်တဲ့နည်းနဲ့ ဝတ်ပြုကိုးကွယ်ဖို့ ဆုံးဖြတ်ထားခြင်းကို မြင်တွေ့ရတာက ကျွန်မကို အများကြီးသြဇာညောင်းခဲ့တယ်။”
ခရစ္စမတ်မှာ မပါဝင်တော့တဲ့အခါ ဆီလ်ဗီယား “စိတ်သက်သာရာ” ရခဲ့တယ်။ “အဲလိုမပါဝင်တော့တဲ့နောက် ကျွန်မ အရမ်းနေလို့ကောင်းသွားတယ်။ ယေဟောဝါကို ကျွန်မစိတ်ရွှင်လန်းစေတယ်ဆိုတာကို သိရှိရပြီး အဲဒီခံစားမှုဟာ ခရစ္စမတ်ပွဲထောင်ချီပြုလုပ်တဲ့အခါ ရတဲ့ပျော်ရွှင်မှုထက် ပိုကောင်းတယ်” လို့သူပြောတယ်။
ကင်ညာ ပီတာ ခုလိုရေးတယ်– “ကျွန်တော်ခရစ္စမတ်ကျင်းပတုန်းက လက်ဆောင်တွေဝယ်ဖို့၊ အလျှံပယ်စားသောက်ဖို့ ငွေအများကြီးချေးခဲ့ရတယ်။ တကယ်တော့ ဒါတွေလုပ်နိုင်ဖို့ အလုပ်တွေပိုလုပ်ရပြီး မိသားစုကို သိပ်အချိန်မပေးနိုင်တော့ဘူး။ ဒါတွေအားလုံးကနေ လွတ်မြောက်သွားလို့ ကျွန်တော်တကယ်ပဲ ပီတိဖြစ်ရတယ်။”
“မိသားစုဝင်တွေနဲ့ မိတ်ဆွေတွေကို ဘယ်အချိန်မှာမဆို ကျွန်မ လက်ဆောင်တွေပေးပြီး သူတို့ဆီကနေလည်း လက်ဆောင်တွေရတတ်တယ်။ ဒီလို စိတ်ရင်းမှန်နဲ့ပေးတဲ့ မျှော်လင့်မထားတဲ့လက်ဆောင်တွေက အကောင်းဆုံးလို့ ကျွန်မယုံကြည်ထားတယ်” လို့ခါရာလ်လင်း ပြောတယ်။
ဂျပန် “ကျွန်တော်တို့ကလေးတွေက လက်ဆောင်တွေမျှော်နေတတ်တဲ့၊ လက်ဆောင်တွေကိုတန်ဖိုးမထားတတ်တဲ့ အဖြစ်မျိုးရောက်မသွားဘူး။ ပေးကမ်းခြင်းက နှလုံးထဲကနေလာသင့်တယ်ဆိုတာ သူတို့နားလည်တာကိုမြင်တွေ့ရခြင်းက မိဘတွေဖြစ်တဲ့ကျွန်တော်တို့ကို ပျော်ရွှင်စေတယ်” လို့ ဟီရိုရှီနဲ့ ရီအီး ကပြောတယ်။
ခေးကိုက ဒီလိုပြန်အမှတ်ရတယ်– “ကျွန်မတို့မိသားစုက ခရစ္စမတ်ကျင်းပလေ့ရှိတယ်။ ကျွန်မတို့သားလေးအိပ်ပျော်သွားတာ သေချာပြီဆိုရင် ကျွန်မနဲ့ ကျွန်မခင်ပွန်းက သူ့အိပ်ရာဘေးမှာ လက်ဆောင်ထားပေးတယ်။ နောက်နေ့မနက်မှာ သူ့ကို ကျွန်မတို့ ဒီလိုပြောလေ့ရှိတယ်– ‘သားကလိမ္မာလို့ စဲန်တာက လက်ဆောင်ပေးတာ။’ ဒါပေမဲ့ ခရစ္စမတ်နဲ့ပတ်သက်တဲ့အမှန်တရားကို ကျွန်မသိလာပြီး သားလေးကို ဒီအကြောင်း ပြန်ပြောပြတဲ့အခါ သူအလိမ်ခံရမှန်းသိတော့ တုန်လှုပ်သွားပြီး ငိုတော့တာပဲ။ ခရစ္စမတ်ဆိုတာ ပျော်ရွှင်ဖွယ်အဖြစ်သရုပ်ဖော်သင့်တဲ့ အခါသမယမဟုတ်ဘူးဆိုတာ အဲဒီအခါမှ ကျွန်မအပြည့်အဝနားလည်သွားတယ်။ တကယ်တော့ ဒါက လိမ်လည်မှုတစ်ခုဖြစ်တယ်၊ ဒီလိမ်လည်မှုမှာ ကျွန်မကပါဝင်ခဲ့တော့ သားကို သစ္စာဖောက်ရာရောက်တယ်လို့ ကျွန်မခံစားမိတယ်။”
ဖိလစ်ပိုင် ဒေ့ဗ်က ဒီလိုပြောတယ်– “ကျမ်းစာမှာပါတဲ့ စင်ကြယ်တဲ့အမှန်တရားအားဖြင့် ယေဟောဝါပေးတဲ့ရွှင်လန်းမှုက ဘယ်လောက်ကောင်းသလဲဆိုရင် စကားလုံးနဲ့တောင်မဖော်ပြနိုင်ဘူး။ ကျွန်တော်တို့မိသားစုဝင်တွေက တစ်ဦးနဲ့တစ်ဦးလက်ဆောင်တွေပေးတဲ့အခါ စိတ်ရင်းမှန်နဲ့ပေးကြပြီး ပြန်ရဖို့ မမျှော်လင့်ကြဘူး။”
အထက်မှာဖော်ပြထားတဲ့သူတွေဟာ ကျမ်းစာအမှန်တရားက လွတ်မြောက်စေတယ်ဆိုတာ ကိုယ်ပိုင်အတွေ့အကြုံကနေသိရှိခဲ့ကြတဲ့ သန်းနဲ့ချီတဲ့သူတွေထဲက တချို့မျှသာဖြစ်ပါတယ်။ ဒါပေမဲ့ ပိုပြီးအရေးပါတာက ဒီအမှန်တရားနဲ့အညီနေထိုင်တဲ့အခါ ဘုရားသခင်ရဲ့စိတ်နှလုံးကို ကျွန်တော်တို့ရွှင်လန်းစေတာဖြစ်တယ်။ (သု. ၂၇:၁၁) ယေရှုခရစ်က ခုလိုပြောတယ်– “စစ်မှန်သောကိုးကွယ်သူတို့သည် စွမ်းအားတော်၏လမ်းပြမှုကို ခံယူ၍ အမှန်တရားနှင့်အညီ ခမည်းတော်ကို ကိုးကွယ်ရမည့်အချိန် ရောက်လာလိမ့်မည်။ . . . အကြောင်းမူကား ထိုသို့ကိုးကွယ်မည့်သူတို့ကို ခမည်းတော်ရှာတော်မူ၏။” (ယောဟန် ၄:၂၃) ဘုရားသခင်က သင့်နှလုံးကိုကြည့်ရှုတဲ့အခါ အမှန်တရားကို လိုချင်တောင့်တတဲ့သူအဖြစ် သင့်ကို ရှုမြင်မလား။ ရှုမြင်ပါစေလို့ ကျွန်တော်တို့မျှော်လင့်ပါတယ်။
[စာမျက်နှာ ၉ ပါ ရုပ်ပုံ]
ခရစ်ယာန်တွေဟာ နှစ်တစ်နှစ်ရဲ့ဘယ်အချိန်အခါမှာမဆို မေတ္တာရဲ့လှုံ့ဆော်မှုကြောင့် ပေးကမ်းကြ