‘သခင်နှင့်တွေ့ရန်ချီဆောင်ခံရခြင်း’—မည်သို့အားဖြင့်နည်း

လက်ရှိဆိုးသွမ်းသည့်စနစ်၏အဆုံးသည် အတားအဆီးမရှိချဉ်းကပ်လာနေသည်။ နာရီတိုင်း၊ မိနစ်တိုင်း၊ စက္ကန့်တိုင်းကိုကျော်ဖြတ်လာခြင်းအားဖြင့် ကျွန်ုပ်တို့သည် ရှေးကတည်းကပရောဖက်ပြုထားသည့် တုန်လှုပ်ဖွယ်အခြေအနေများထံသို့ ဦးတည်နေကြသည်။ ရုတ်ခြည်းချီဆောင်ခံရခြင်းသည် ယင်းတို့တွင်တစ်ခုအပါအဝင်ဖြစ်သလော။ သို့ဖြစ်လျှင် မည်သို့နှင့်မည်သည့်အချိန်တွင်ဖြစ်မည်နည်း။

“ရုတ်ခြည်းချီဆောင်ခံရခြင်း” ဟူသောဝေါဟာရသည် သမ္မာကျမ်းစာတွင်မပါဝင်ပါ။ သို့သော် ယင်းကိုယုံကြည်သူများက ၁ သက်သာလောနိတ် ၄:၁၇ ပါတမန်တော်ပေါလု၏စကားကို မိမိတို့၏ယုံကြည်မှုအခြေအမြစ်အဖြစ် ကိုးကားကြသည်။ ယင်းကျမ်းချက်၏ရှေ့နောက်စကားများကို စစ်ဆေးကြည့်ကြစို့။ ပေါလုရေးခဲ့သည်မှာ၊–

“ညီအစ်ကိုတို့၊ မျှော်လင့်ခြင်းမရှိသောအခြားသူတို့သည် ဝမ်းနည်းသကဲ့သို့ သင်တို့သည်ဝမ်းမနည်းမည်အကြောင်း အိပ်ပျော်သောသူတို့၏အမှုအရာကိုမသိဘဲနေစေခြင်းငှာ ငါတို့အလိုမရှိ။ ယေရှုသည် သေပြီးမှတစ်ဖန်ထမြောက်တော်မူသည်ကို ငါတို့သည်ယုံလျှင် ထိုနည်းတူ ယေရှု၌အိပ်ပျော်သောသူတို့ကိုလည်း ထိုသခင်နှင့်အတူဘုရားသခင် [ယေဟောဝါ၊ ကဘ] ပို့ဆောင်တော်မူလိမ့်မည်။ သခင်ဘုရား၏ဗျာဒိတ်တော်အားဖြင့် တစ်ဖန်ငါတို့ဆိုသည်ကား သခင်ဘုရားကြွလာတော်မူသောအခါ အသက်ရှင်၍ကျန်ကြွင်းသောငါတို့သည် အိပ်ပျော်ပြီးသောသူတို့၏အရင်အဦးနေရာကျရကြမည်မဟုတ်။ သခင်ဘုရားသည် ကြွေးကြော်ခြင်း၊ ကောင်းကင်တမန်မင်းအသံပေးခြင်း၊ ဘုရားသခင်၏တံပိုးတော်ကိုမှုတ်ခြင်းနှင့်တကွ ကောင်းကင်ဘုံမှကိုယ်တိုင်ဆင်းသက်တော်မူ၍ ခရစ်တော်၌သေလွန်သောသူတို့သည် အဦးထမြောက်ကြလိမ့်မည်။ ထိုအခါ အသက်ရှင်၍ကျန်ကြွင်းသောငါတို့သည် အာကာသကောင်းကင်၌ သခင်ဘုရားထံတော်သို့ရောက်စေခြင်းငှာ ထိုသူတို့နှင့်တကွ မိုးတိမ်ပေါ်သို့ချီဆောင်ခြင်းကိုခံရသောအားဖြင့် သခင်ဘုရားနှင့်အတူအစဉ်မပြတ်နေရကြလိမ့်မည်။ သို့ဖြစ်၍ ဤစကားများအားဖြင့် အချင်းချင်းတစ်ယောက်ကိုတစ်ယောက် သက်သာစေကြလော့” ဟူ၍ဖြစ်သည်။—၁ သက်သာလောနိတ် ၄:၁၃-၁၈။

စီ၊ အီး ၅၀ ခုနှစ်ခန့်က သက်သာလောနိတ်မြို့ရှိခရစ်ယာန်များထံ ပထမဆုံးစာကိုပေါလုရေးခဲ့ချိန်တွင် ထိုအသင်းတော်သည် အသစ်စက်စက်ပင်ရှိသေးသည်။ အသင်းသားများက မိမိတို့၏အသင်းသားအချို့တို့သည် “သေခြင်းတွင်အိပ်ပျော်နေကြ” သောကြောင့် ဝမ်းနည်းပူဆွေးနေကြသည်။ သို့တစေ ပေါလုရေးလိုက်သောစာက သက်သာလောနိတ်မြို့သားများအား ရှင်ပြန်ထမြောက်ခြင်းမျှော်လင့်ချက်အားဖြင့် နှစ်သိမ့်မှုဖြစ်စေခဲ့သည်။

ခရစ်တော် “ရောက်ရှိနေခြင်း”

ထိုအချိန်ကသေဆုံးသွားခဲ့သောသစ္စာရှိခရစ်ယာန်များ ရှင်ပြန်ထမြောက်ကြမည်ကို အခိုင်အမာပြောဆိုနေစဉ် ပေါလုပြောသေးသည်မှာ “သခင်ဘုရားကြွလာတော်မူသောအခါ အသက်ရှင်၍ကျန်ကြွင်းသောငါတို့သည် အိပ်ပျော်ပြီးသောသူတို့၏အရင်အဦးနေရာကျရကြမည်မဟုတ်” ဟူ၍ဖြစ်သည်။ (အငယ် ၁၅) အမှန်မှတ်သားဖွယ်ကား သခင်ဘုရား “ရောက်ရှိနေခြင်း” ကို တမန်တော်ကိုးကားခြင်းဖြစ်သည်။ ဤတွင် မူရင်းဂရိဝေါဟာရမှာ ပါရိုစီးယန် ဖြစ်ပြီး စာသားအရ “အတူတကွရှိခြင်း” ဟူ၍အဓိပ္ပာယ်ရှိသည်။

နိုင်ငံတစ်ခုသို့ နိုင်ငံခြားမှနိုင်ငံ့ခေါင်းဆောင်တစ်ဦး လာရောက်လည်ပတ်မည်ဆိုလျှင် အများအားဖြင့် ထိုနိုင်ငံသို့သူရောက်ရှိမည့်နေ့စွဲကို ကြေညာလေ့ရှိသည်။ သခင်ယေရှု၏ရောက်ရှိနေခြင်းတွင်လည်း ယင်းသို့ပင်ဖြစ်ခဲ့သည်။ စိတ်နှလုံးရိုးဖြောင့်သော သမ္မာကျမ်းစာပရောဖက်ပြုချက်၏ကျောင်းသားများအား ကောင်းကင်တန်ခိုးအာဏာဖြင့်ယေရှုရောက်ရှိနေခြင်းသည် ၁၉၁၄ ခုနှစ်ကစတင်ကြောင်းအထောက်အထားများကို ကင်းမျှော်စင် က, တသမတ်တည်းတင်ပြလာခဲ့သည်။ ထိုနှစ်ကအဖြစ်အပျက်များသည် ယေရှု၏ မျက်မြင်မရ ရောက်ရှိနေခြင်းကို သက်သေထူသည်။ (မဿဲ ၂၄:၃-၁၄) ထို့ကြောင့် သခင်ရောက်ရှိနေချိန်အတွင်းအသက်ရှင်နေသောခရစ်ယာန်အချို့တို့သည် “အာကာသကောင်းကင်၌ သခင်ဘုရားထံတော်သို့ရောက်စေခြင်းငှာ မိုးတိမ်ပေါ်သို့ချီဆောင်ခြင်းကိုခံရ” မည်ဟုပေါလုပြောရာတွင် ထိုဆက်လက်အသက်ရှင်သူများသည် မြေကြီးနယ်ပယ်တွင်မဟုတ်ဘဲ မမြင်နိုင်သောကောင်းကင်နယ်ပယ်ရှိ ဘုရားသခင့်လက်ယာဘက်တွင်ထိုင်နေသောခရစ်တော်နှင့် တွေ့ရမည်ကို ပေါလုဆိုလိုခြင်းဖြစ်သည်။ (ဟေဗြဲ ၁:၁-၃) သို့ရာတွင် မည်သူများနည်း။

“ဘုရားသခင်၏ဣသရေလလူမျိုး”

ကျမ်းစာစောင်များက ဇာတိဣသရေလအကြောင်း အတော်များများပြောထားပြီး “ဝိညာဏဣသရေလ” အကြောင်းလည်း ပြောဆိုဖော်ပြထားသည်။ ဘုရားသခင့်သန့်ရှင်းသောဝိညာဉ်တော် သို့မဟုတ် လှုပ်ရှားသောစွမ်းအားနှင့် ဘိသိက်ခံရသောဤအဖွဲ့တွင် ဂျူးလူမျိုးနှင့်တစ်ပါးအမျိုးသားများ ဖွဲ့စည်းပါဝင်ကြရမည်ဖြစ်သည်။ (ဂလာတိ ၆:၁၆။ ရောမ ၁၁:၂၅၊ ၂၆။ ၁ ယောဟန် ၂:၂၀၊ ၂၇) ဗျာဒိတ်ကျမ်းက ဝိညာဏဣသရေလ၏အရေအတွက်စုစုပေါင်းမှာ ၁၄၄,၀၀၀ ဖြစ်ကြောင်း၊ သူတို့အားလုံးသည် ကောင်းကင်ဇိအုန်တောင်ရှိ သိုးသငယ်ခရစ်တော်ယေရှု၏နာမနှင့် တံဆိပ်ခတ်ခြင်းခံရသူများဖြစ်ကြောင်း ဗျာဒိတ်ကျမ်းစာစောင်က ဖော်ပြသည်။ (ဗျာဒိတ် ၇:၁-၈၊ ၁၄:၁-၄၊ ၂၀:၆) သူတို့အထဲတွင် သက်သာလောနိတ်မြို့နှင့် အခြားဒေသရှိအသင်းတော်များနှင့်ပေါင်းသင်းခဲ့သည့် လူမျိုးနွယ်ပေါင်းစုံပါဝင်ခဲ့ပေမည်။—တမန်တော် ၁၀:၃၄၊ ၃၅။

သစ္စာရှိဝိညာဏဣသရေလအဖွဲ့ဝင် မည်သူမဆို ကောင်းကင်ဆုကျေးဇူးကိုမရရှိမီ တစ်စုံတစ်ခုကိုတွေ့ကြုံကြရမည်။ ယေရှုသည် ကောင်းကင်အသက်တာဖြင့်ရှင်ပြန်ထမြောက်ခြင်းမခံရမီ နှက်တိုင်ပေါ်တွင်အသေခံခဲ့ရသကဲ့သို့ ကောင်းကင်မျှော်လင့်ချက်ရှိသည့်ခရစ်ယာန်များလည်း မိမိတို့၏ဆုကျေးဇူးကိုမခံရမီ သေရကြမည်ဖြစ်သည်။ (၁ ကောရိန္သု ၁၅:၃၅၊ ၃၆) ယင်းသည် ပထမရာစုတွင်အသက်ရှင်ခဲ့သူများနည်းတူ ယနေ့အသက်ရှင်သော ဝိညာဏဣသရေလအဖွဲ့ဝင်များအတွက်လည်း မှန်ကန်သည်။

“သခင်၏ရောက်ရှိနေခြင်း” အကြောင်းဖော်ပြပြီးနောက် သေဆုံးခဲ့သောသစ္စာရှိဝိညာဏဣသရေလလူများ ကောင်းကင်ဆုကျေးဇူးရရှိကြမည့်အချိန်ကို ပေါလုထောက်ပြခဲ့သည်။ ဤသို့သူရေးခဲ့သည်။ “သခင်ဘုရားသည် ကြွေးကြော်ခြင်း၊ ကောင်းကင်တမန်မင်းအသံပေးခြင်း၊ ဘုရားသခင်၏တံပိုးတော်ကိုမှုတ်ခြင်းနှင့်တကွ ကောင်းကင်ဘုံမှကိုယ်တိုင်ဆင်းသက်တော်မူ၍ ခရစ်တော်၌သေလွန်သောသူတို့သည် အဦးထမြောက်ကြလိမ့်မည်။” (အငယ် ၁၆) ထို့ကြောင့် ဘုရင်အဖြစ်ခရစ်တော်ရောက်ရှိသည်နှင့်တစ်ပြိုင်နက် ကောင်းကင်ဆိုင်ရာရှင်ပြန်ထမြောက်ခြင်းသည် သမာဓိစောင့်သိသူများအဖြစ်သေဆုံးသွားခဲ့ကြသော ဝိညာဏဣသရေလများထမြောက်ခြင်းအားဖြင့် အစပြုသွားရန်ကျွန်ုပ်တို့မျှော်လင့်နိုင်သည်။ (၁ ကောရိန္သု ၁၅:၂၃) ယခုသူတို့သည် ကောင်းကင်တွင် ယေရှုနှင့်အတူအမှုဆောင်နေကြသည်။ သို့သော် မြေကြီးပေါ်တွင်အသက်ရှင်ဆဲရှိသော ဘိသိက်ခံခရစ်ယာန်အနည်းငယ်ကား မည်သို့နည်း။ သူတို့သည် ရုတ်ခြည်းချီဆောင်ခံရခြင်းကို စောင့်မျှော်နေကြသလော။

“ချီဆောင်ခံရခြင်း”—မည်သို့အားဖြင့်နည်း

သေလွန်ခဲ့ပြီးသောဘိသိက်ခံခရစ်ယာန်များကို ရည်ညွှန်းပြောဆိုပြီးနောက် ပေါလုဤသို့ဆက်ပြောသည်။ “ထိုအခါ အသက်ရှင်၍ကျန်ကြွင်းသောငါတို့သည် အာကာသကောင်းကင်၌ သခင်ဘုရားထံတော်သို့ရောက်စေခြင်းငှာ ထိုသူတို့နှင့်တကွ မိုးတိမ်ပေါ်သို့ချီဆောင်ခြင်းကိုခံရသောအားဖြင့် သခင်ဘုရားနှင့်အတူအစဉ်မပြတ်နေရကြလိမ့်မည်။” (အငယ် ၁၇) ‘အသက်ရှင်သူ’ များသည် ခရစ်တော်ရောက်ရှိချိန်တွင်အတွင်း အသက်ရှင်သူများဖြစ်ရမည်။ သူတို့သည် ယေရှုနှင့်တွေ့ရန် ချီဆောင်ခြင်းခံရကြမည်။ သူတို့သည် ကောင်းကင်တွင် ခရစ်တော်နှင့်အတူပေါင်းဆုံနိုင်ကြရန် ရှေးသစ္စာရှိခရစ်ယာန်များကဲ့သို့ပင် လူသားတစ်ယောက်အဖြစ်သေဆုံးရန်လိုအပ်သည်။—ရောမ ၈:၁၇၊ ၃၅-၃၉။

ကောရိန္သုမြို့ရှိခရစ်ယာန်များထံ ပေါလုစာရေးစဉ်က ဤသို့ဖော်ပြခဲ့သည်။ “ညီအစ်ကိုတို့၊ ငါဆိုသည်ကား လူ့အသွေးအသားသည် ဘုရားသခင်၏နိုင်ငံတော်ကို အမွေမခံနိုင်။ ပုပ်တတ်သောအရာသည် မပုပ်နိုင်သောအဖြစ်ကို အမွေမခံနိုင်။ နက်နဲသောအရာတစ်ခုကို ငါပြဦးမည်။ ငါတို့ရှိသမျှသည် အိပ်ပျော်ရကြမည်မဟုတ်။ သို့သော်လည်း နောက်ဆုံးသောတံပိုးမှုတ်သောအခါ တစ်ခဏချင်းတွင် မျက်စိတစ်မှိတ်၌ ငါတို့ရှိသမျှသည် ပြောင်းလဲခြင်းသို့ရောက်ရကြမည်။ ထိုတံပိုးမှုတ်ချိန်ရောက်သောအခါ သေလွန်သောသူတို့သည် မပုပ်နိုင်သောအဖြစ်၌တည်လျက် ထမြောက်၍ ငါတို့ရှိသမျှသည် ပြောင်းလဲခြင်းသို့ရောက်ရကြမည်။” (၁ ကောရိန္သု ၁၅:၅၀-၅၂) ဝိညာဏဣသရေလအကြွင်းအကျန်တစ်ဦးစီသည် ခရစ်တော်ရောက်ရှိချိန်အတွင်း သစ္စာရှိစွာသေဆုံးခြင်းဖြင့် ကောင်းကင်ဆိုင်ရာဆုကျေးဇူးကို ချက်ချင်းလက်ခံရရှိကြမည်ဖြစ်သည်။ “မျက်စိတစ်မှိတ်” အတွင်း သူသည် ဝိညာဏပုဂ္ဂိုလ်တစ်ဦးအဖြစ်ထမြောက်ခံရပြီး ကောင်းကင်နိုင်ငံတော်တွင် ယေရှုနှင့်တွေ့ဆုံကာ တွဲဖက်အုပ်ချုပ်သူအဖြစ်အမှုဆောင်ရန် “ချီဆောင်ခြင်း” ခံရကြမည်။ သို့သော် ယေဟောဝါအားဝတ်ပြုသည့်အခြားသူအားလုံးမူ မည်သို့နည်း။ ဤဆိုးသွမ်းသည့်စနစ်အဆုံးနီးကပ်လာသည်နှင့်အမျှ သူတို့လည်း ကောင်းကင်သို့ချီဆောင်ခံရကြမည်လော။

လွတ်မြောက်ခြင်း —ရုတ်ခြည်းချီဆောင်ခံရခြင်းအားဖြင့်မဟုတ်

ဘုရင်အဖြစ်ယေရှုရောက်ရှိခြင်းသည် ၁၉၁၄ ခုနှစ်တွင်စတင်သည်ကိုထောက်၍ ကျွန်ုပ်တို့သည် ဤလောက၏ “ကုန်ဆုံးချိန်” သို့အလွန်နီးကပ်စွာရောက်နေကြကြောင်းသိရသည်။ (ဒံယေလ ၁၂:၄) ပေါလုဤသို့သတိပေးခဲ့သည်။ “ညီအစ်ကိုတို့၊ ကပ်ကာလအချိန်များကို သင်တို့အားရေး၍ပေးလိုက်စရာအကြောင်းမရှိ။ အဘယ်ကြောင့်နည်းဟူမူကား သူခိုးသည် ညအခါလာသကဲ့သို့ [ယေဟောဝါ၊ ကဘ] ၏နေ့ရက်သည် လာလိမ့်မည်ကို သင်တို့သည်သေချာစွာသိကြ၏။ ငြိမ်ဝပ်ခြင်းရှိ၏၊ ဘေးအန္တရာယ်နှင့်ကင်းလွတ်၏ဟုဆိုစဉ်တွင် ကိုယ်ဝန်ဆောင်သောမိန်းမ၌ သားဖွားခြင်းဝေဒနာရောက်သကဲ့သို့ သူတို့အပေါ်၌လျင်မြန်စွာသောပျက်စီးခြင်းရောက်၍ လွတ်ခြင်းအခွင့်မရှိရကြ။” (၁ သက်သာလောနိတ် ၅:၁-၃) သို့ရာတွင် နိုးကြားသောခရစ်ယာန်များလွတ်မြောက်ကြလိမ့်မည်။ မည်သို့အားဖြင့်နည်း။

“ငြိမ်းချမ်းပြီ၊ လုံခြုံပြီ” ဟူသောကြွေးကြော်သံသည် ယေရှုပြောခဲ့သည့် “ကြီးစွာသောဒုက္ခ” ကာလ၏ရှေ့ပြေးဖြစ်သည်။ မြေကြီးပရဒိသုတွင် ထာဝစဉ်အသက်ရှင်ရန်မျှော်လင့်သော သစ္စာရှိသူ “လူအုပ်ကြီး” အကြောင်းဖော်ပြရာတွင် ဗျာဒိတ်ကျမ်းက “ဤသူတို့သည် ကြီးစွာသောဆင်းရဲဒုက္ခအထဲကထွက်မြောက်၍ မိမိတို့ဝတ်လုံကို သိုးသငယ်၏အသွေး၌လျှော်၍ဖြူစေသောသူဖြစ်ကြသတည်း” ဟုဆိုထားသည်။ (ဗျာဒိတ် ၇:၉၊ ၁၄။ လုကာ ၂၃:၄၃) သူတို့၏မျှော်လင့်ချက်သည် ရုတ်ခြည်းချီဆောင်ခံရခြင်းမဟုတ်ပါ။ သူတို့သည် ဤမြေကြီးပေါ်တွင် ကပ်ကျော်နေထိုင်ရန် မျှော်လင့်ကြသည်။ ယင်းအတွက်ပြင်ဆင်သည့်အနေနှင့် သူတို့သည် ဝိညာဉ်ရေးအရနိုးကြားနေကြရမည်ဖြစ်သည်။ ယင်းသို့နိုးကြားပြီး ဤစနစ်အဆုံးကိုကပ်ကျော်နိုင်ရန် သင်မည်သို့ပြုနိုင်သနည်း။

သင်သည် ‘သမ္မာသတိရှိလျက် ယုံကြည်ခြင်း၊ ချစ်ခြင်းတည်းဟူသောရင်အုပ်တန်ဆာနှင့် ကယ်တင်ခြင်းမျှော်လင့်ချက်တည်းဟူသောသံခမောက်လုံးတို့ကို ဝတ်ဆောင်ရန်’ လိုသည်။ (၁ သက်သာလောနိတ် ၅:၆-၈) ယခုအချိန်သည် ဘုရားသခင်၏ပရောဖက်ပြုစကားများဖြစ်သည့်သမ္မာကျမ်းစာကို အရေးစိုက်ရမည့်အချိန်ဖြစ်သည်။ ဤစနစ်၏အဆုံးသို့ရောက်ရန် အချိန်များကုန်လွန်နေလျက်ရှိရာ ပေါလု၏သြဝါဒကို လိုက်လျှောက်ပါ။ “ပရောဖက်ပြုခြင်းကို မထီမဲ့မြင်မမှတ်ကြနှင့်။ ခပ်သိမ်းသောအရာကိုစုံစမ်း၍ ကောင်းသောအရာကို အမြဲကိုင်စွဲကြလော့။” (၁ သက်သာလောနိတ် ၅:၂၀၊ ၂၁) သို့ဖြစ်၍ ယေဟောဝါသက်သေများနှင့်အတူ ကျမ်းစာပရောဖက်ပြုချက်များနှင့် ဘုရားသခင့်မှုတ်သွင်းခံနှုတ်ကပါဌ်တော်၏ အခြားအပိုင်းကဏ္ဍများကိုလေ့လာနိုင်ရန် သင့်အား သူတို့၏ဘုရားသခင့်နိုင်ငံတော်ခန်းမသို့ခေါ်ဖိတ်ပါသည်။

သင်သည် တိကျမှန်ကန်သောအသိပညာနှင့် ယုံကြည်ခြင်းတို့တွင် ကြီးထွားလာသည်နှင့်အမျှ စကြဝဠာတစ်ခွင်ရှိရန်သူများကို သုတ်သင်ပယ်ရှင်းပြီး မြေကြီးကိုပရဒိသုအဖြစ်ပြုပြင်မည့် ယေဟောဝါဘုရားသခင့်ရည်ရွယ်တော်မူချက်၏ အထမြောက်ခြင်းကို သင်ဆင်ခြင်မိလာမည်။ ယုံကြည်ခြင်းကိုတင်ပြခြင်းအားဖြင့် သင်လည်း ကြီးစွာသောဒုက္ခကိုကပ်ကျော်သူများအဝင်ဖြစ်နိုင်ပြီး မြေကြီးပေါ်တွင် ပြန်လည်ရှင်ပြန်ထမြောက်လာမည့်လူသန်းပေါင်းများစွာအား ကြိုဆိုရမည့်အခွင့်အရေးရရှိမည်။ ယေရှုခရစ်တော်နှင့် ကောင်းကင်အသက်တာသို့ရှင်ပြန်ထမြောက်ခံရခြင်းအားဖြင့် ‘သခင်ဘုရားနှင့်တွေ့ဆုံရန်ချီဆောင်ခံရ’ မည့် ကိုယ်တော်နှင့်တွဲဖက်အုပ်ချုပ်မည့်သူများလက်တွင်ရှိသော ဘုရားသခင့်နိုင်ငံတော်တွင်နေထိုင်ရခြင်းသည် မည်မျှရွှင်လန်းဖွယ်ပါတကား။

သို့ဖြစ်လျှင် နာခံမှုရှိသောလူသားအများစုအတွက် ကျမ်းဆိုင်ရာစစ်မှန်သောမျှော်လင့်ချက်ကား အဘယ်နည်း။ ရုတ်ခြည်းချီဆောင်ခံရခြင်းမဟုတ်ပါ။ ယင်းအစား ဘုရားသခင့်နိုင်ငံတော်အုပ်ချုပ်မှုအောက်ရှိမြေကြီးပေါ်တွင် ထာဝရအသက်ရှင်ခြင်းပင်ဖြစ်သည်။

[စာမျက်နှာ ၇ ပါ ရုပ်ပုံ]

ကြီးစွာသောဒုက္ခကိုကပ်ကျော်သူများသည် ယေရှုနှင့် ကောင်းကင်သို့ “ချီဆောင်ခြင်း” ခံရသူများအုပ်ချုပ်မည့် မြေကြီးပရဒိသုတွင် ရှင်ပြန်ထမြောက်လာမည့်သူများကို ကြိုဆိုကြလိမ့်မည်