ကင်းမျှော်စင်ပညာပေးဌာနမှ သာသနာပြုများကို စေလွှတ်ခြင်း

ဂိလဒ်ကင်းမျှော်စင်သမ္မာကျမ်းစာကျောင်းသည် သင်တန်းများကို တည်နေရာအသီးသီးတွင် ပို့ချခဲ့သည်။ ၁၉၄၃ နှင့် ၁၉၆၀ ခုနှစ်အတွင်း အမေရိကန်ပြည်ထောင်စု၊ နယူးယောက်ပြည်နယ်၊ လဲန်စင်းမြို့တောင်ပိုင်းရှိ အဆောက်အအုံများတွင်ပို့ချခဲ့သည့် ၉၅ နိုင်ငံမှကျောင်းသားများပါဝင်သော သင်တန်း ၃၅ ခုသည် အထူးလေ့ကျင့်မှုကို ရရှိခဲ့ကြသည်။ ထို့နောက် နယူးယောက်ပြည်နယ်၊ ဘရွတ်ကလင်ရှိ ကမ္ဘာ့ဌာနချုပ်သို့ သင်တန်းကိုပြောင်းရွှေ့ခဲ့ရာ ထိုတွင် ၂၈ နှစ်နီးပါးမျှစီစဉ်ဆောင်ရွက်ခဲ့သည်။ ၁၉၈၈ မှ ၁၉၉၅ ခုနှစ်အစောပိုင်းအချိန်အထိ ဂိလဒ်သင်တန်းကျောင်းကို နယူးယောက်ပြည်နယ်၊ ဝေါလ်ကီလ်မြို့တွင် ပို့ချခဲ့သည်။

ဤနှစ်များအတွင်း သင်တန်းကျောင်းသည် ယင်း၏စီစဉ်ဆောင်ရွက်မှုနယ်ပယ်ကို ချဲ့ထွင်ခဲ့သည်။ ယင်း၏ညွှန်ကြားမှုအောက်၌ မက္ကဆီကိုတွင် သင်တန်းနှစ်ခုအတွက် ဆယ်ပတ်ကြာသင်ကြားပို့ချမှုအစီအစဉ်ကို ပြင်ဆင်ပေးခဲ့သည်; ယင်းကဲ့သို့သောသင်တန်းငါးခုကို ဂျာမနီတွင်ပို့ချခဲ့သည်; အိန္ဒိယတွင် သုံးခုပို့ချခဲ့၏။ ၁၉၈၇ ခုနှစ်ကတည်းက ဓမ္မအမှုထမ်းသင်တန်းကျောင်းအဖြစ်သိကြသော အထောက်အကူပြုကျောင်းကို ၃၄ နိုင်ငံတွင် အရည်အချင်းပြည့်မီသောလူငယ်အမျိုးသားများအတွက် ရှစ်ပတ်ကြာအထူးလေ့ကျင့်မှုအစီအစဉ်ကို ပြင်ဆင်ပေးခဲ့သည်။ သို့သော် နယူးယောက်ပြည်နယ်၊ ပက်တာစင်ရှိ အသစ်တည်ဆောက်ထားသော ကင်းမျှော်စင်ပညာပေးဌာနတွင် ၉၉ ကြိမ်မြောက်ဂိလဒ်သင်တန်းကို သင်ကြားပို့ချမှုပြုခြင်းကား ကျမ်းစာတစ်အုပ်လုံးကို ကျယ်ကျယ်ပြန့်ပြန့်လေ့လာမှုပြုခြင်း၊ မျက်မှောက်ခေတ် ယေဟောဝါသက်သေများ၏သမိုင်းကြောင်းနှင့် အဖွဲ့အစည်းအကြောင်း ဆွေးနွေးမှုပြုခြင်းအပြင် နိုင်ငံရပ်ခြားသာသနာပြုလုပ်ငန်းအပေါ် အကျိုးများစွာဖြစ်ထွန်းစေသည့် အကြံပြုချက်များပါဝင်သော သီတင်းပတ်ပေါင်း ၂၀ ကြာသည့် အစီအစဉ်တစ်ခုဖြစ်သည်။

စက်တင်ဘာ ၂ ရက်နေ့တွင် ထို ၉၉ ကြိမ်မြောက်သင်တန်းဆင်းပွဲကျင်းပခဲ့သည်။ သုံးနာရီကြာ ကျောင်းဆင်းပွဲအစီအစဉ်ကို ကင်းမျှော်စင်ပညာပေးဌာနရှိ သစ်လွင်သောခန်းမဆောင်ကြီးထဲတွင် ကျင်းပခဲ့သည်။ နေရာလပ်ပင်မကျန်အောင် ပြည့်လျှံသွားသည်။ ပက်တာစင်၊ ဝေါလ်ကီလ်နှင့် ဘရွတ်ကလင်ရှိ ဗေသလအဆောက်အအုံများမှ နောက်ထပ်ပရိသတ်တို့သည် အီလက်ထရွန်နစ်စနစ်ဖြင့်ဆက်သွယ်နားထောင်ကြ၏။ ထိုနေ့သည် သင်တန်းသားများ၏ဆွေမျိုးများနှင့် ရင်းနှီးသောမိတ်ဆွေများအပါအဝင် ကျောင်းဆင်းသောသင်တန်းအတွက်သာမကဘဲ သစ်လွင်ကောင်းမွန်သောကျောင်းအဆောက်အအုံများကိုဆောက်လုပ်ရာတွင် စေတနာ့ဝန်ထမ်းများအဖြစ်ပါဝင်ကြသူများ ရာနှင့်ချီသောသူတို့အတွက်လည်း စိတ်လှုပ်ရှားဖွယ်နေ့တစ်နေ့ဖြစ်သည်။

အုပ်ချုပ်ရေးအဖွဲ့မှဖြစ်သော ကယ်ရီ ဘာဘာသည် သူ၏အဖွင့်နိဒါန်းစကားများ၌ ဖြစ်ပျက်နေသောအရာ၏အရေးပါမှုအပေါ် အာရုံစူးစိုက်စေခဲ့သည်။ သူက ဤသို့ဆို၏– “ဒီကမ္ဘာမြေပေါ်မှာ တိုးတက်ဆောင်ရွက်ဖူးခဲ့သမျှတွေအထဲ ဒီအရာဟာ အကြီးမားဆုံးသောမြင့်မြတ်တဲ့ပညာပေးလုပ်ဆောင်မှုရဲ့ ဗဟိုချက်မဖြစ်တယ်။” ကျွန်ုပ်တို့သည် မိန်းမ၏မျိုးနွယ်တော်နှင့် မြွေ၏မျိုးနွယ်တော်တို့အကြားဖြစ်ပျက်မည့် စစ်ပွဲ၏အထွတ်အထိပ်သို့ ချဉ်းကပ်လာနေကြောင်း သူရှင်းပြသည်။ (ကမ္ဘာဦး ၃:၁၅) လာမည့်ကြီးစွာသောဘေးဒုက္ခအတွင်း ထိတ်လန့်ဖွယ်တိုက်ခိုက်မှုကို ကပ်ကျော်မည့်သူများမှာ ဘုရားသခင့်နှုတ်ကပါဌ်တော်နှင့်စပ်လျဉ်းသည့် တိကျမှန်ကန်သောအသိပညာ ရှိထားပြီး ယင်းကိုနာခံသောသူသာလျှင်ဖြစ်ကြောင်း သူဖော်ပြသည်။

“ကျွန်တော်တို့ရဲ့လက်ရှိပညာပေးအစီအစဉ်ဟာ နေရာတိုင်းမှာရှိတဲ့ယေဟောဝါလူမျိုးအားလုံးတို့ကို နယပုံပြင် ၁:၁-၄ မှာဖော်ပြထားတဲ့ ဉာဏ်ပညာ၊ ဆုံးမသွန်သင်ခြင်း၊ ဉာဏ်နှင့်ယှဉ်သောစကားကို နားလည်နိုင်ခြင်း၊ ပညာသတိရှိမှု၊ ဖြောင့်မတ်မှု၊ တရားစောင့်မှု၊ တော်မှန်ညီညွတ်မှုတို့နဲ့ဆိုင်တဲ့ဆုံးမသွန်သင်မှုကို ခံယူခြင်းဆိုင်ရာ ရင့်ကျက်ကောင်းမွန်တဲ့အခြေအနေကို ခေါ်ဆောင်လာပေးဖို့ဖြစ်တယ်။” ထိုကဲ့သို့သော ဝိညာဏအထောက်အမများရရှိထားခြင်းသည် မည်မျှလုံခြုံမှုဖြစ်စေပါသည်တကား!

ကျောင်းဆင်းသင်တန်းသားများကို ဩဝါဒပေးခြင်း

ထိုအချီးနိဒါန်းမှတ်ချက်များနောက်၌ ကျောင်းဆင်းသောသင်တန်းသားများကိုရည်ဆောင်သည့် တစ်ဆက်တည်းဖြစ်သော ဟောပြောချက်တိုငါးခုလိုက်ပါလာသည်။ ယခင်က ဂိလဒ်နည်းပြဆရာတစ်ဦးဖြစ်ပြီး ယခု ဘရွတ်ကလင်ရှိ ဌာနချုပ်မှအမှုထမ်းတစ်ဦးဖြစ်သော ဟာရိုး ဂျက်စန်သည် “ဘုရားရေးရာကျေနပ်ရောင့်ရဲမှုကို ခိုင်မြဲစွာကိုင်စွဲလော့” ဟူ၍ သင်တန်းသားများကိုလှုံ့ဆော်တိုက်တွန်းခဲ့သည်။ အချိန်ကြာမြင့်စွာ သာသနာပြုဖြစ်ခဲ့ကာ ယခု အုပ်ချုပ်ရေးအဖွဲ့ဝင်တစ်ဦးဖြစ်သော လွိုက်ဘယ်ရီက “နှိမ့်ချမှုဖြင့် ယေဟောဝါအားအမှုထမ်းခြင်း” ကို အခြေပြု၍ဟောပြောခဲ့သည်။ အခြေအနေသစ်များနှင့်အညီချိန်ညှိရာတွင်သာမကဘဲ သာသနာပြုချင်းများနှင့်သော်လည်းကောင်း၊ မိမိတို့အမှုထမ်းနေသောအသင်းတော်များနှင့်သော်လည်းကောင်း၊ ဒေသခံများနှင့်သော်လည်းကောင်း ဆက်ဆံမှုတို့တွင် ဤအရည်အချင်းသည် ကျောင်းဆင်းများအတွက် အလွန်အရေးကြီးသည်ဟူ၍ သူရှင်းပြခဲ့သည်။

လက်ရှိ ဂိလဒ်စီမံခန့်ခွဲမှုတွင်အမှုထမ်းနေသော ကားလ် အာဒမ်စ်သည် “ယုံကြည်ခြင်းက သင့်ကိုဘာပြုလုပ်စေလိမ့်မည်နည်း” ဟူသည့်မေးခွန်းကို သင်တန်းသားများနှင့် ဆင်ခြင်သုံးသပ်ခဲ့သည်။ သူက တောတွင်းအခြေအနေနှင့်ပတ်သက်၍ညည်းညူမှုပြုကာ အီဂျစ်ပြည်ကိုပြန်လှည့်ရန်တမ်းတခဲ့သော ဣသရေလလူမျိုးနှင့်မတူဘဲ ပြဿနာဖြေရှင်းနည်းအဖြစ် ခါလဒဲပြည်၊ ဥဇမြို့သို့ပြန်မည့်အစား ဘုရားသခင်၏နိုင်ငံတော်ကိုမျှော်ကိုးခဲ့သော အာဗြဟံနှင့်တူရန် သူတို့ကိုအားပေးခဲ့သည်။ (ထွက်မြောက်ရာ ၁၆:၂၊ ၃; ဟေဗြဲ ၁၁:၁၀၊ ၁၅၊ ၁၆) ကျောင်းမော်ကွန်းထိန်းဖြစ်သော ယူလီစက်စ် ဂလပ်စ်သည် ဆာလံ ၇၃ တွင် မှတ်တမ်းတင်ထားသည့် အာသပ်၏အတွေ့အကြုံကိုအခြေပြုပြီး “သင်၏ကောင်းချီးများကို ပြန်ရေတွက်လော့” ဟူ၍ ကျောင်းဆင်းသင်တန်းသားများကို သတိပေးဆုံးမခဲ့သည်။ သင်ကြားရေးကော်မတီမှ အုပ်ချုပ်ရေးအဖွဲ့ဝင်တစ်ဦးဖြစ်သော အဲလ်ဘတ် ရှရိုးဒါသည် “ယေဟောဝါ ပြင်ဆင်ပေးမှုများ” ဟူသည့်ခေါင်းစဉ်ကို အခြေပြုဟောကြားခဲ့သည်။ ဤပြင်ဆင်ပေးမှုနှင့်ပတ်သက်သော သက်သေသာဓကအဖြစ် ဂိလဒ်ကျောင်းကိုယ်နှိုက်နှင့် ဟောပြောခြင်းနှင့်တပည့်ဖြစ်စေခြင်းဆိုင်ရာ ကြီးမားသည့်လုပ်ငန်းကို ပြီးမြောက်အောင်မြင်စေရာတွင် ယင်း၏ကဏ္ဍကို ညွှန်ပြခဲ့သည်။

ထိုနောက်ပိုင်းတွင် ကင်းမျှော်စင်အသင်း၏ဥက္ကဋ္ဌဖြစ်သော မီလ်တင် ဟင်ရှယ်လ်က “အင်္ဂါချင်းဝင်” များအကြောင်းကို ဟောပြောရာတွင် ပရိသတ်တို့သည် စိတ်ဝင်တစားဖြင့် နားထောင်နေခဲ့ကြသည်။ သူသည် ရောမအခန်းကြီး ၁၂ ကို ဖတ်ရွတ်ကာ အကျယ်တဝင့်အဓိပ္ပာယ်ဖွင့်ပြခဲ့သည်။ အခြားအရာများထဲမှ သူဤသို့ပြောကြားခဲ့သည်– “အသင်းတော်မှ ကျေးကျွန်ချင်းတို့နဲ့ ကျွန်တော်တို့အလွန်ရင်းနှီးတဲ့ဆက်ဆံမှုရှိတယ်ဆိုတာကို ထည့်စဉ်းစားပါ။” ဤသို့ထပ်ဖြည့်စွက်သည်– “ယေဟောဝါရဲ့ပိုင်ဆိုင်ရာအဖြစ် တစ်ဦးကိုတစ်ဦး အမြဲသဘောထားဖို့ ကောင်းတယ်။ ဝေဖန်အပြစ်ရှာနေကြမဲ့အစား ကူညီတတ်တဲ့သူအမြဲဖြစ်ပါ။ ခရစ်ယာန်အသင်းတော်ရဲ့ဝိညာဏစည်းလုံးမှုကို ဆက်လက်ထိန်းသိမ်းထားမယ်ဆိုရင် ကိုယ့်ကိုယ်ကိုကူညီရာရောက်ပါတယ်။” သာသနာပြုအိမ်များတွင် အစားအသောက်ပြင်ဆင်ပေးခြင်း၊ လူတိုင်း တစ်ပုံစံတည်းစားနိုင်မည်မဟုတ်ကြောင်းကို ထည့်သွင်းစဉ်းစားခြင်းဖြင့် ယင်းကဲ့သို့သောကူညီမှုကိုတင်ပြနိုင်ကြောင်း သူဖော်ပြ၏။ ရုပ်ပစ္စည်းအနည်းငယ်သာရှိသော ခရစ်ယာန်ချင်းတို့နှင့်လယ်ကွင်းဓမ္မအမှုတွင်ပါဝင်သောအခါ ဝေဖန်နေမည့်အစား ကူညီပေးကြဖို့လည်း သူအားပေးခဲ့သည်။ ကျွန်ုပ်တို့သည် တစ်ဦးကိုတစ်ဦး အမှန်ပင်ကူညီ၊ တည်ဆောက်၊ အားပေးတတ်သူဖြစ်မည်ဆိုလျှင် “ယေဟောဝါသည် ယင်းတို့အတွက်ကြောင့် ကျွန်ုပ်တို့ကိုချစ်မြတ်နိုးလိမ့်မည်” ဟု ညီအစ်ကိုဟင်ရှယ်လ်က ဖော်ပြသည်။ သူတို့နေထိုင်ခဲ့သောနေရာများနှင့် အတော်ပင်ကွာခြားမှုရှိမည့်နိုင်ငံတို့တွင် သွားရောက်အမှုထမ်းကြတော့မည့် သာသနာပြုများအတွက် မည်မျှကောင်းလိုက်သည့်ဆုံးမသြဝါဒစကားပါတကား!

သင်တန်းသားများနှင့် ပို၍အကျွမ်းတဝင်ရှိစေခြင်း

၉၉ ကြိမ်မြောက်သင်တန်း၏ ကျောင်းသား ၄၈ ယောက်တို့သည် ပျမ်းမျှအားဖြင့် အသက် ၃၂ နှစ်ရှိပြီး အချိန်ပြည့်ဓမ္မအမှုတွင် ၁၁ နှစ်ထက်မနည်း အပ်နှံခဲ့ပြီးဖြစ်သည်။

ကျောင်းဆင်းပွဲအစီအစဉ်၏တစ်စိတ်တစ်ပိုင်းဖြစ်သော လူတွေ့မေးမြန်းခြင်းများသည် သူတို့ထဲမှအနည်းငယ်ကို ပရိသတ်များနှင့်အကျွမ်းဝင်ခွင့်ရရှိစေခဲ့သည်။ အမေရိကန်မှ နစ်ကီး လီဘဲနှင့် အင်္ဂလန်မှ စီမွန် ဘောတန်တို့သည် ယေဟောဝါက သူတို့၏ကာယရေးလိုအပ်ချက်အတွက်ပြင်ဆင်ပေးမည်ဟူသည့် သူတို့၏ယုံကြည်ခြင်းအား စမ်းသပ်ခဲ့သော အဖြစ်အပျက်များကိုပြောပြကြသည်။ အချိန်ပြည့်ဓမ္မအမှုကို ပထမနေရာတွင်ထားခဲ့ကြသည့်အလျောက် ယေဟောဝါ၏ဂရုစိုက်စောင့်ရှောက်မှုကို တွေ့ကြုံခံစားခဲ့ကြရသည်။

ဇာတိရပ်မြေစကား ပြင်သစ်စကားကိုပြောသော အီဆာဘယ်လ် ကာဇဲက သူမ၏နိုင်ငံရှိ အာရဘစ်စကားပြောသူများကိုသက်သေခံရန်အတွက် အာရဘစ်စကားကိုသင်ယူခဲ့ကြောင်း ပြောပြသည်။ သူမအစပြုခဲ့သည့် ၁၉၈၇ ခုနှစ်အချိန်က ပါရီရှိအုပ်စုငယ်လေးတွင် သူမကိုယ်တိုင်နှင့်ထိုဘာသာစကားကိုသင်ယူနေသော ညီအစ်မတစ်ဦးအပြင် အာရဘစ်စကားပြောညီအစ်ကိုလေးယောက်သာ ပါဝင်ကြသည်။ (ယင်းသည် မလွယ်ကူလှပါ။ မှတ်ချက်ပေးနိုင်ဖို့အတွက် သူတို့၏ ကင်းမျှော်စင် သင်ခန်းစာကိုပြင်ဆင်ရာတွင် အပတ်စဉ်ပင် ရှစ်နာရီကြာအချိန်ကိုအသုံးပြုခဲ့ကြသည်။) ကြိုးစားအားထုတ်မှု အကျိုးနပ်ပါသလော။ ယနေ့တွင်၊ ပြင်သစ်နိုင်ငံတစ်ဝန်းလုံးတွင် တိုက်နယ်ငါးခုအဖြစ် စုစည်းဖွဲ့စည်းထားသော အာရဘစ်စကားပြောသက်သေခံများ ရှိနေပေပြီ။ နောက်ကျောင်းသားတစ်ဦးဖြစ်သော မီကို ပူရိုသည် ကျောင်းတွင်သင်ခဲ့ရသော ပြင်သစ်စကားက သူ၏ဇာတိမြေဖင်လန်တွင် အာဖရိကန်ဒုက္ခသည်များကိုဟောပြောရန် မည်သို့အကူအညီဖြစ်စေခဲ့ကြောင်း၊ ထို့ပြင် သူ၏သာသနာပြုခန့်အပ်ရာ ဘီနင်တွင်လည်း တန်ဖိုးရှိလိမ့်မည်ဖြစ်ကြောင်း ပြောပြသည်။ ဘာနီ ဘိုစ်က ကနေဒါနိုင်ငံ ကွင်းဘီစ်တွင် ထိရောက်စွာအမှုဆောင်နိုင်ရန် ပြင်သစ်စကားကို ချောမောပြေပြစ်စွာပြောနိုင်ဖို့ သူမအားထုတ်ခဲ့ရပုံများကို စီကာပတ်ကုံးပြောပြသည်။ ဒိန်းမတ်မှဖြစ်သော ဘာဂျာကီး ရာစ်မြူစင်သည် ဖရိုးကျွန်းစုတွင် အမှုဆောင်နှစ်များအတွင်း သူနှင့်သူ၏ဇနီးတို့ရရှိခဲ့သော အတွေ့အကြုံများကို ပြန်ပြောပြသည်။ မှန်ပါသည် ဤသာသနာပြုအသစ်များသည် အတွေ့အကြုံရှိသောအချိန်ပြည့်ဓမ္မအမှုဆောင်များဖြစ်ကြပါသည်။

ကျောင်းဆင်းများသည် ၁၉ နိုင်ငံ—အာဖရိက၊ အမေရိကအလယ်ပိုင်းနှင့် တောင်ပိုင်း၊ အရှေ့ ဥရောပနှင့် အရှေ့တိုင်း—များသို့ တာဝန်ခန့်အပ်ခံရကြသည်။ ယခင်သင်တန်းများမှ ကျောင်းဆင်းများသည် နိုင်ငံပေါင်း ၂၀၀ ကျော်တွင် အမှုထမ်းနှင့်နေပြီးဖြစ်သည်။ ထိုကျောင်းဆင်းအများတို့သည် သူတို့၏ခန့်အပ်ခံတာဝန်များတွင် အလုပ်များနေတုန်းပင်။ ဤသာသနာပြုအသစ်များသည် မြေကြီးစွန်းတိုင်အောင် ဘုရားသခင့်နိုင်ငံတော်သက်သေခံခြင်းကို ပို၍တိုးချဲ့ရာတွင် ယခုသူတို့နှင့်ပူးပေါင်းကြတော့မည်ဖြစ်သည်။—တမန်တော် ၁:၈။

[စာမျက်နှာ ၂၅ ပါ ရုပ်ပုံ]

ကင်းမျှော်စင်ပညာပေးဌာန၌ စာသင်ခန်းမြင်ကွင်းများ

[စာမျက်နှာ ၂၆ ပါ ရုပ်ပုံ]

ဂိလဒ်ကင်းမျှော်စင်သမ္မာကျမ်းစာကျောင်း၏ ၉၉ ကြိမ်မြောက် သင်တန်း

အောက်ပါစာရင်းတွင် အတန်းများကို ရှေ့တန်းမှနောက်တန်းသို့ရေတွက်ပြီး အမည်များကို လက်ဝဲမှလက်ယာဘက်သို့ စီထားသည်။

(1) Heffey [Pron: hefʹē ], S. [female]; Riley, E. [female]; Mortensen [Mor-ten-sen] [Pron: mȯrʹtənsən], D. [female]; Honable [Pron: ȯnʹəbl], A. [female]; Bolton, J. [female]; Poole [Pron: pül], J. [female]; Siimes [Pron: sēmʹəs], G. [female]; Sousa [sōʹzə], L. [female] (2) Pashnitski [Pash-nit-ski] [Pron: päshnitʹskē], B. [female]; Shepherd [Shep-herd] [Pron: shepʹərd], D. [female]; Pashnitski, W. [male]; Järvinen [Pron: yärʹvinən], J. [female]; Paulsen [Pron: pȯlʹsən], K. [female]; Rasmussen, E. [female]; Schewe [Pron: shweʹvā ], C. [Pron: “k” sound] [female]; Olsson [Pron: ōlʹsən], L. [female] (3) Paulsen, E. [male]; Samsel [Pron: samʹsəl], T. [female]; Bowes, B. [female]; Harris, E. [female]; Kazan, I. [female]; Liebl, N. [female]; Sousa, P. [male]; Puro, J. [female] (4) Lager [Pron: lägʹər], K. [male]; Lager, V. [female]; Golden, K. [female]; Bolton, S. [male]; Johnson, M. [female]; Johnson, S. [male]; Liebl, A. [male]; Rasmussen, B. [male] (5) Harris, D. [male]; Samsel, W. [male]; Schewe, O. [male]; Heffey, R. [male]; Kazan, L. [male]; Riley, T. [male]; Järvinen, O. [male]; Puro, M. [male] (6) Mortensen, D. [male]; Golden, R. [male]; Honable, L. [male]; Shepherd, M. [male]; Bowes, R. [male]; Siimes, T. [male]; Poole, E. [male]; Olsson, J. [male]

[စာမျက်နှာ ၂၇ ပါ ရုပ်ပုံ]

တာဝန်ထမ်းဆောင်ဆဲ– (ဝဲ) ပထမနှင့်ဆဌမအကြိမ် ဂိလဒ်ကျောင်းဆင်းများဖြစ်ကြသည့် ဘရာဇီးလ်တွင်ရှိ ချားစ်လိသ်ကိုနှင့် ဇနီးဖဲန်

(အောက်) သတ္တမအကြိမ်မြောက် ဂိလဒ်ကျောင်းဆင်းဖြစ်သည့် ဂျပန်တွင်ရှိမာသဟက်စ်