ယင်းကိုသူတို့ အဘယ်ကြောင့်လုပ်ကြသနည်း

ကမ္ဘာတစ်ဝန်းရှိယေဟောဝါသက်သေများသည် နှစ်စဉ်စည်းဝေးကြီးများ၌ထောင်နှင့်ချီ၍ စုဝေးကြသည်။ ထိုတွင် ပျော်ရွှင်စွာပေါင်းသင်းကြပြီး အထူးကောင်းမွန်သောသမ္မာကျမ်းစာလမ်းညွှန်မှုအစီအစဉ်ကို ကြားနာကြသည်။ အချို့သည် ဤစည်းဝေးကြီးများကိုတက်ရောက်ဖို့ အလွန်ပင်အားထုတ်ကြသည်။ သာဓကအနေဖြင့် လွန်ခဲ့သောနှစ်တွင် မာလာဝီမှအသက် ၆၅ နှစ်အရွယ်ရှိမောင်နှံတစ်စုံသည် သူတို့၏သား၊ ချွေးမ၊ မြေးနှင့်အတူ စည်းဝေးကြီးတက်ရောက်ဖို့ စက်ဘီးဖြင့်မိုင် ၅၀ သွားခဲ့ကြသည်။ သူတို့သည် နံနက်ခြောက်နာရီတွင် ရွာမှထွက်ခဲ့ပြီး ၁၅ နာရီအကြာတွင် စည်းဝေးကြီးကျင်းပမည့်နေရာသို့ ရောက်ရှိကြသည်။

မိုဇမ်ဘစ်နိုင်ငံတွင် အုပ်စုတစ်စုသည် စည်းဝေးကြီးတက်ရောက်ဖို့ စက်ဘီးဖြင့်သုံးရက်သွားခဲ့ကြသည်။ တစ်ညတွင် လဟာပြင်ကွက်လပ်၌စခန်းချကြသောအခါ အနီးမှခြင်္သေ့များ၏ဟောက်သံကို ကြားခဲ့ကြသည်။ တိရစ္ဆာန်များရှိရာအရပ်သို့ မီးထင်းများဖြင့်ပစ်ပေါက်ကြသော်လည်း ခြင်္သေ့များသည်မိုးသောက်သည့်အထိ ယင်းတစ်ဝိုက်တွင်ရှိနေကြသည်။ အခြားသက်သေခံတစ်ဦးသည် ယင်းစည်းဝေးကြီးကိုတက်ရောက်ဖို့ထွက်လာခဲ့ရာ လမ်းတွင် ခြင်္သေ့တစ်ကောင်နှင့်မျက်နှာချင်းဆိုင် ရင်ဆိုင်ခဲ့ရသည်။ သူသည် ခြင်္သေ့မထွက်သွားမီအထိ မလှုပ်ဘဲတိတ်ဆိတ်စွာရပ်နေခဲ့သည်။ စည်းဝေးကြီးတွင် ဤသက်သေခံများသည် “ခြင်္သေ့ခံတွင်းမှကယ်နုတ်ခြင်း” ခံရပုံကို ဝမ်းသာအယ်လဲပြောပြခဲ့ကြသည်။—၂ တိမောသေ ၄:၁၇။

ယေဟောဝါသက်သေများစွာသည် ဝတ်ပြုမှုအတွက် စည်းဝေးကြီးများ သို့မဟုတ် ပတ်စဉ်အစည်းအဝေးများကိုပင်တက်ရောက်ဖို့ အလွန်ပင်အားထုတ်ကြသည်။ အဘယ်ကြောင့်နည်း။ အတူတကွစည်းဝေးခြင်းသည် အဘယ်ကြောင့်အလွန်အရေးကြီးကြောင်းကို နောက်ဆောင်းပါးများက သိရှိနားလည်စေပါလိမ့်မည်။