ယေဟောဝါသည် မိမိ၏ကတိတော်များကို သစ္စာရှိသူများအပေါ် ပြည့်စုံစေ

“ကတိထားတော်မူသောသူသည် သစ္စာနှင့်ပြည့်စုံတော်မူ၏။”—ဟေဗြဲ ၁၀:၂၃။

၁၊ ၂။ ကျွန်ုပ်တို့သည် ယေဟောဝါ၏ကတိတော်များကို အဘယ်ကြောင့် လုံးဝစိတ်ချနိုင်သနည်း။

ယဟောဝါသည် မိမိ၏ကျေးကျွန်များ မိမိနှင့် မိမိ၏ကတိတော်များအပေါ် ခိုင်မာသောယုံကြည်ခြင်းကို ဖွံ့ဖြိုးစေရန်နှင့် ထိန်းသိမ်းထားရန် တောင်းဆိုထားသည်။ ယင်းသို့သောယုံကြည်ခြင်းဖြင့် တစ်ဦးတစ်ယောက်သည် ယေဟောဝါကတိထားတော်မူရာများကို ကိုယ်တော်လုပ်ဆောင်မည်ဟု လုံးဝယုံကြည်နိုင်သည်။ ကိုယ်တော့်နှုတ်မြွက်စကားတော်က ဤသို့ကြေညာထားသည်– “ကောင်းကင်ဗိုလ်ခြေအရှင်ထာဝရဘုရားသည် ကျိန်ဆို၍မိန့်တော်မူသည်ကား၊ ‘. . . ငါကြံစည်သည်အတိုင်းဖြစ်၍၊ ငါစီရင်ချက်လည်းတည်ရလိမ့်မည်။’”—ဟေရှာယ ၁၄:၂၄၊ ၂၅။

^၂ “ကောင်းကင်ဗိုလ်ခြေအရှင်ထာဝရဘုရားသည် ကျိန်ဆို” သည်ဟူသောဖော်ပြချက်က ကိုယ်တော့်ကတိတော်များကိုပြည့်စုံစေရန် အလေးအနက်သစ္စာဆိုကြောင်း တင်ပြသည်။ ယင်းကြောင့် ကိုယ်တော့်နှုတ်မြွက်စကားတော်က ဤသို့ဆိုနိုင်ခြင်းဖြစ်သည်– “ထာဝရဘုရားကို စိတ်နှလုံးအကြွင်းမဲ့ကိုးစားလော့။ ကိုယ်ဉာဏ်ကိုအမှီမပြုနှင့်။ သွားလေရာရာ၌ ထာဝရဘုရားကိုမျက်မှောက်ပြုလော့။ သို့ပြုလျှင် သင်၏လမ်းခရီးတို့ကို ပဲ့ပြင်တော်မူမည်။” (သု. ၃:၅၊ ၆) ယေဟောဝါအား ယုံကြည်ကိုးစားကာ ကိုယ်တော့်ဉာဏ်ပညာ၏လမ်းညွှန်မှုကို ကျွန်ုပ်တို့ခံယူကြသောအခါ “ပညာကိုကိုင်ဆွဲသောသူသည် အသက်ပင်” ဖြစ်သည့် ဘုရားသခင်၏ဉာဏ်ပညာတော်ကိုရသောကြောင့် ကျွန်ုပ်တို့၏လမ်းစဉ်သည် ထာဝရအသက်သို့ အမှန်ပို့ဆောင်ပေးလိမ့်မည်။—သု. ၃:၁၈; ယောဟန် ၁၇:၃။

ရှေးခေတ်မှစစ်မှန်သောယုံကြည်ခြင်း

၃။ နောဧသည် ယေဟောဝါအားယုံကြည်ကြောင်း မည်သို့တင်ပြခဲ့သနည်း။

^၃ စစ်မှန်သောယုံကြည်ခြင်းရှိခဲ့သူများနှင့်ပတ်သက်၍ ယေဟောဝါ၏လုပ်ဆောင်မှုမှတ်တမ်းက ကိုယ်တော်အား စိတ်ချ၍ရကြောင်း ဖော်ပြသည်။ ဥပမာ၊ လွန်ခဲ့သောနှစ်ပေါင်း ၄,၄၀၀ ကျော်က ကမ္ဘာချီရေလွှမ်းမိုးဘေးဖြင့် နောဧခေတ်ရှိလောကကို ဖျက်ဆီးပစ်မည်ဟု ဘုရားသခင်မိန့်ဆိုခဲ့သည်။ လူနှင့်တိရစ္ဆာန်တို့၏အသက်ကို ကာကွယ်စောင့်ရှောက်ရန် ဧရာမသင်္ဘောတစ်စင်းဆောက်ဖို့ နောဧကိုညွှန်ကြားခဲ့သည်။ နောဧသည် အဘယ်သို့ပြုလုပ်ခဲ့သနည်း။ ဟေဗြဲ ၁၁:၇ တွင်ဤသို့ဆိုသည်– “နောဧသည် မမြင်သေးသောအမှုအရာကိုဖော်ပြသော ဗျာဒိတ်တော်ကိုခံရပြီးမှ၊ ယုံကြည်ခြင်းအားဖြင့် ကြောက်ရွံ့သောစိတ်ရှိ၍၊ မိမိအိမ်သူအိမ်သားတို့ကို ကယ်တင်ခြင်းငှာ သင်္ဘောကိုတည်လေ၏။” နောဧသည် တစ်ခါမျှမဖြစ်ဖူးသော၊ ‘မမြင်ရသေးသော’ အမှုအရာကို အဘယ်ကြောင့် ယုံကြည်ခဲ့ပါသနည်း။ အကြောင်းမှာ လူ့မိသားစုနှင့် ဘုရားသခင် ယခင်ကဆက်ဆံပုံကို သိကျွမ်းထားရာ ကိုယ်တော်မိန့်တော်မူသမျှသည် ဧကန်အမှန်ဖြစ်ပျက်လာကြောင်းကို သိထားသောကြောင့်ဖြစ်သည်။ ထို့ကြောင့် ရေလွှမ်းမိုးဘေးဖြစ်ပျက်လာမည်ကို နောဧယုံကြည်စိတ်ချခဲ့သည်။—ကမ္ဘာဦး ၆:၉-၂၂။

၄၊ ၅။ အာဗြဟံသည် ယေဟောဝါအား အဘယ်ကြောင့်အပြည့်အဝယုံကြည်ကိုးစားခဲ့သနည်း။

^၄ စစ်မှန်သောယုံကြည်ခြင်း၏ အခြားသာဓကတစ်ခုမှာ အာဗြဟံဖြစ်သည်။ လွန်ခဲ့သောနှစ်ပေါင်း ၃,၉၀၀ နီးပါးက သူ၏ဇနီးစာရာနှင့်ရသော တစ်ဦးတည်းသောသား ဣဇာက်ကိုပူဇော်ရန် ဘုရားသခင်မှာကြားခဲ့သည်။ (ကမ္ဘာဦး ၂၂:၁-၁၀) အာဗြဟံ မည်သို့တုံ့ပြန်ခဲ့သနည်း။ ဟေဗြဲ ၁၁:၁၇ တွင်ဤသို့ဖော်ပြထားသည်– “အာဗြဟံသည် စုံစမ်းတော်မူခြင်းကိုခံရသောအခါ၊ ယုံကြည်ခြင်းအားဖြင့် ဣဇာက်ကိုပူဇော်၏။” သို့သော် နောက်ဆုံးတွင် ယေဟောဝါ၏ကောင်းကင်တမန်က အာဗြဟံကိုတားဆီးခဲ့သည်။ (ကမ္ဘာဦး ၂၂:၁၁၊ ၁၂) သို့တိုင် ထိုသို့ပြုလုပ်ဖို့ အာဗြဟံ အဘယ်ကြောင့် စဉ်းစားခဲ့ရသနည်း။ အကြောင်းမှာ ဟေဗြဲ ၁၁:၁၉ တွင်ဖော်ပြသကဲ့သို့ “သေခြင်းမှ [ဣဇာက်ကို] ထမြောက်စေခြင်းငှာ၊ ဘုရားသခင် တတ်နိုင်တော်မူသည်ကို သူသည်အောက်မေ့” သောကြောင့်ဖြစ်သည်။ သို့သော် အာဗြဟံသည် ရှင်ပြန်ထမြောက်ခြင်းကို တစ်ခါမျှမမြင်စဖူး၊ ယခင်က ထမြောက်ခဲ့သူမှတ်တမ်း မရှိခဲ့ပါလျက်နှင့် သူမည်သို့ယုံကြည်နိုင်ခဲ့သနည်း။

^၅ သားတစ်ယောက်ရမည်ဟု ဘုရားသခင်ကတိပေးချိန်တွင် စာရာသည် အသက် ၈၉ နှစ်ရှိနေပြီဖြစ်သည်ကို သတိရပါ။ စာရာ၏ဝမ်းသည် သားမဖွားနိုင်တော့ပေ—ပြောရမည်ဆိုလျှင် အသေဖြစ်နေသည်။ (ကမ္ဘာဦး ၁၈:၉-၁၄) ဘုရားသခင်သည် စာရာ၏ဝမ်းကို အသက်ဝင်စေခဲ့ရာ သူမသည် ဣဇာက်ကိုဖွားခဲ့သည်။ (ကမ္ဘာဦး ၂၁:၁-၃) ဘုရားသခင်သည် စာရာ၏ဝမ်းကို အသက်ဝင်စေတော်မူခဲ့ကြောင်း အာဗြဟံသိထားရာ လိုအပ်လျှင် ဣဇာက်ကိုလည်း အသက်ပြန်ရှင်စေနိုင်သည်ကို သူသိခဲ့သည်။ ရောမ ၄:၂၀၊ ၂၁ ကအာဗြဟံအကြောင်း ဤသို့ဆိုထားသည်– “ယုံမှားသောစိတ်နှင့်ကင်း၍ ဘုရားသခင်၏ကတိတော်ကို တွေးတောခြင်းမရှိ၊ ယုံကြည်အားကြီးသဖြင့် ဘုရားသခင်ကိုချီးမွမ်း၍၊ ကတိထားတော်မူသောသူသည် ကတိတော်အတိုင်းတတ်နိုင်တော်မူသည်ကို စွဲလမ်းလေ၏။”

၆။ ယေဟောဝါအား စိတ်ချကြောင်း ယောရှုမည်သို့ဖော်ပြခဲ့သနည်း။

^၆ နှစ်ပေါင်း ၃,၄၀၀ ကျော်က ယောရှုသည် အသက်တစ်ရာကျော်ရှိပြီး သူ၏ဘဝအသက်တာတစ်လျှောက် ဘုရားသခင်သည် မည်မျှယုံကြည်စိတ်ချထိုက်ကြောင်း တွေ့ ကြုံခဲ့ရပြီးသည့်အခါ သူယုံကြည်စိတ်ချရသည့် အကြောင်းရင်းကို ဤသို့ဖော်ပြခဲ့သည်– “သင်တို့၏ဘုရားသခင် ထာဝရဘုရား [“ယေဟောဝါ၊” ကဘ] သည် သင်တို့အဖို့မိန့်တော်မူသော ကောင်းကျိုးတစ်စုံတစ်ပါးမှ မယုတ်မလျော့၊ အကုန်အစင်ပြည့်စုံကြောင်းကို သင်တို့သည် စိတ်နှလုံးထဲမှာသိကြ၏။”—ယောရှု ၂၃:၁၄။

၇၊ ၈။ ပထမရာစုတွင် သစ္စာရှိခရစ်ယာန်များသည် အဘယ်ကယ်တင်ခြင်းလမ်းစဉ်ကို လိုက်လျှောက်ခဲ့ကြသနည်း၊ အဘယ်ကြောင့်နည်း။

^၇ လွန်ခဲ့သောနှစ်ပေါင်း ၁,၉၀၀ ခန့်က နှိမ့်ချမှုရှိသူများစွာတို့သည် စစ်မှန်သောယုံကြည်ခြင်းရှိကြောင်း ဖော်ပြခဲ့ကြသည်။ ယေရှုသည် မေရှိယဖြစ်ကြောင်းကို ကျမ်းစာပရောဖက်ပြုချက်ပြည့်စုံခြင်းမှ သူတို့သဘောပေါက်ခဲ့ကြကာ ကိုယ်တော်၏သွန်သင်ချက်များကို လက်ခံခဲ့ကြသည်။ ဖြစ်ရပ်မှန်များနှင့် ဟေဗြဲကျမ်းစာစောင်များအပေါ်အခြေခံသောကြောင့် ယေရှုသင်ကြားပေးရာများကို သူတို့ယုံကြည်ကြသည်။ သို့ဖြင့် သစ္စာမရှိသောကြောင့် ယုဒပြည်နှင့် ယေရုရှလင်အပေါ် ဘုရားသခင့်စီရင်ချက် ကျရောက်တော့မည်ဟု ယေရှုမိန့်ဆိုခဲ့သောအခါ ကိုယ်တော်အား သူတို့ယုံကြည်ကြသည်။ ထို့အပြင် သူတို့အသက်ချမ်းသာရရန် မည်သို့လုပ်ဆောင်ရမည်ကို မိန့်မှာတော်မူသောအခါ သူတို့လိုက်နာခဲ့ကြသည်။

^၈ ယေရုရှလင်ကို တိတ္ထိ စစ်တပ်များလာဝိုင်းသောအခါ ထွက်ပြေးသင့်ကြောင်း ယုံကြည်သူများကို ယေရှုမိန့်တော်မူခဲ့သည်။ ရောမတပ်သားများသည် စီ.အီး. ၆၆ ခုနှစ်တွင် ယေရုရှလင်ကိုတိုက်ရန် ရောက်ရှိလာကြ၏။ သို့သော် ရောမတို့သည် ရှင်းမပြသော အကြောင်းရင်းတချို့ကြောင့် ဆုတ်ခွာသွားခဲ့ကြသည်။ ယင်းက ယေရှုမိန့်မှာခဲ့သည့်အတိုင်း မြို့တော်ကို ခရစ်ယာန်များစွန့်ခွာရန် အချက်ပြချက်ဖြစ်သည်– “ယေရုရှလင်မြို့ကို ဗိုလ်ခြေများဝန်းရံလျက်ရှိသည်ကို သင်တို့မြင်သောအခါ၊ ထိုမြို့သည် ပျက်စီးခြင်းသို့ရောက်လုသည်ကို သိမှတ်ကြလော့။ ထိုအခါ ယုဒပြည်၌ရှိသောသူတို့သည် တောင်ပေါ်သို့ပြေးကြစေ။ မြို့ထဲ၌ရှိသောသူတို့သည် မြို့ပြင်သို့ထွက်ကြစေ။ တောရွာမှာရှိသောသူတို့သည် မြို့ထဲသို့မဝင်ကြစေနှင့်။” (လုကာ ၂၁:၂၀၊ ၂၁) စစ်မှန်သောယုံကြည်ခြင်းရှိသူများသည် ယေရုရှလင်နှင့် ပတ်ဝန်းကျင်ဒေသကို စွန့်ခွာပြီး လုံခြုံရာသို့ ပြေးခဲ့ကြသည်။

ယုံကြည်ခြင်းကင်းမဲ့မှု၏ရလဒ်များ

၉၊ ၁၀။ (က) ဘာသာရေးခေါင်းဆောင်များသည် ယေရှုကို မယုံကြည်ကြောင်း မည်သို့တင်ပြခဲ့ကြသနည်း။ (ခ) ထိုသို့မယုံကြည်ခြင်း၏ရလဒ်များကား အဘယ်နည်း။

^၉ စစ်မှန်သောယုံကြည်ခြင်းမရှိသူများ ဘာလုပ်ခဲ့ကြသနည်း။ သူတို့သည် အခွင့်အရေးရှိစဉ် ထွက်မပြေးခဲ့ကြပါ။ သူတို့၏ခေါင်းဆောင်များက သူတို့ကိုကယ်တင်နိုင်မည်ဟု ထင်နေကြသည်။ သို့တိုင် ထိုခေါင်းဆောင်များနှင့် သူတို့၏နောက်လိုက်များတို့သည်လည်း ယေရှု၏ မေရှိယအဖြစ်တော်နှင့်ဆိုင်သော သက်သေအထောက်အထား ရရှိခဲ့ကြပါသည်။ သို့ဖြင့် ကိုယ်တော်မိန့်တော်မူရာကို သူတို့အဘယ်ကြောင့်လက်မခံခဲ့ကြသနည်း။ သူတို့၏ဆိုးညစ်သော နှလုံးအခြေအနေကြောင့်ဖြစ်သည်။ လာဇရုကို ယေရှုထမြောက်စေပြီးနောက် သာမညလူတန်းစားများစွာတို့သည် ကိုယ်တော်ထံ အစောပိုင်းက စုရုံးလာကြသည်ကို သူတို့မြင်ကြစဉ် ထိုသဘောထားထင်ရှားခဲ့သည်။ ယောဟန် ၁၁:၄၇၊ ၄၈ တွင် ဤသို့ဖော်ပြထားသည်– “ယဇ်ပုရောဟိတ်အကြီးတို့နှင့် ဖာရိရှဲများသည် လွှတ်အရာရှိတို့ [“ဆဲန်ဟီဒရင်၊” ကဘ] [ဂျူးအထက်တရားရုံး] ကိုစည်းဝေးစေပြီးလျှင်၊ ‘ငါတို့သည် အဘယ်သို့ပြုလျက်နေကြသနည်း။ ထိုသူ [ယေရှု] သည် များစွာသောနိမိတ်လက္ခဏာကိုပြ၏။ သူ့ကို ဤသို့အလွတ်ထားလျှင် လူခပ်သိမ်းတို့သည် ယုံကြည်ကြလိမ့်မည်။ ရောမလူတို့သည်လည်း လာ၍ ငါတို့အရပ်ဌာနကိုလည်းကောင်း၊ ငါတို့အမျိုးကိုလည်းကောင်း သုတ်သင်ပယ်ရှင်းကြလိမ့်မည်’ ဟု ပြောဆိုကြ၏။” အခန်းငယ် ၅၃ ကဤသို့ဆိုသည်– “ထိုနေ့မှစ၍ ကိုယ်တော်၏အသက်ကိုသတ်ခြင်းငှာ တိုင်ပင်ကြံစည်ကြ၏။”

^၁၀ လာဇရုကို သေရာမှယေရှုပြန်ရှင်စေခဲ့သည့်လုပ်ရပ်သည် တကယ့်ထူးဆန်းသည့် အံ့ဖွယ်အမှုဖြစ်၏! သို့သော်ဘာသာရေးခေါင်းဆောင်များသည် ယင်းကိုလုပ်သည့်အတွက် ယေရှုအားသတ်လိုကြ၏။ “ထိုသို့ယုဒလူများတို့သည် လာဇရုကိုအကြောင်းပြုသဖြင့် ထွက်သွား၍၊ ယေရှုကိုယုံကြည်သောကြောင့်၊ ယဇ်ပုရောဟိတ်အကြီးတို့သည် လာဇရုကိုလည်း သတ်ခြင်းငှာတိုင်ပင်စီရင်ကြ” သောအခါ သူတို့၏အလွန်ဆိုးယုတ်မှု ထပ်မံထင်ရှားလာခဲ့သည်။ (ယောဟန် ၁၂:၁၀၊ ၁၁) လာဇရုသေရာမှ ထမြောက်လာရုံမျှရှိသေး၍ သူ နောက်တစ်ကြိမ်ပြန်သေသည်ကို ထိုယဇ်ပုရောဟိတ်များတွေ့ မြင်လိုကြသည်! သူတို့သည် ဘုရားသခင်၏အလိုတော် သို့မဟုတ် လူတို့၏အကျိုးကို ထည့်မစဉ်းစားကြပါ။ သူတို့သည် အတ္တ ကိုယ်ကျိုးဆန်ပြီး မိမိတို့၏ရာထူး၊ မိမိတို့၏အကျိုးအမြတ်ကိုသာ အလေးထားကြသည်။ “ဘုရားသခင်ပေးတော်မူသော ဘုန်းအသရေထက် လူတို့ပေးသောဘုန်းအသရေကို သာ၍နှစ်သက်ကြ၏။” (ယောဟန် ၁၂:၄၃) သို့သော် သူတို့သည် ယုံကြည်ခြင်းကင်းမဲ့မှု၏အခကို ခံခဲ့ကြရသည်။ စီ.အီး. ၇၀ တွင် ရောမစစ်တပ်များပြန်လာပြီး သူတို့၏ဌာနေနှင့် သူတို့၏လူမျိုးအပြင် လူများစွာကို ဖျက်ဆီးခဲ့ကြသည်။

ကျွန်ုပ်တို့အချိန်တွင် ဖော်ပြသောယုံကြည်ခြင်း

၁၁။ ဤရာစုနှစ်အစောပိုင်း၌ စစ်မှန်သောယုံကြည်ခြင်းသည် မည်သို့ထင်ရှားခဲ့သနည်း။

^၁၁ ဤရာစုနှစ်တွင် စစ်မှန်သောယုံကြည်ခြင်းရှိသည့် အမျိုးသား၊ အမျိုးသမီးမြောက်မြားစွာ ရှိခဲ့ပါသည်။ ဥပမာ၊ ၁၉၀၀ ပြည့်လွန်နှစ်များအစောပိုင်းတွင် လူများစွာတို့သည် ငြိမ်းချမ်းပြီးတောက်ပသောအနာဂတ်ကို မျှော်လင့်ခဲ့ကြသည်။ တစ်ကြိမ်တည်းတွင် ယေဟောဝါအားယုံကြည်သူတို့က လူသားတို့သည် အဆိုးရွားဆုံးဒုက္ခကို တွေ့မြင်ကြတော့မည်ဟု သတိပေးခဲ့ကြသည်။ ဘုရားသခင့်နှုတ်ကပါဌ်တော်မှ မဿဲအခန်းကြီး ၂၄၊ ၂ တိမောသေ အခန်းကြီး ၃ နှင့်အခြားကျမ်းချက်များတွင် ထိုသို့ကြိုတင်ဟောထားသည်။ ဤယုံကြည်ခြင်းရှိသူတို့ ပြောသည့်အတိုင်း ၁၉၁၄ တွင် ပထမကမ္ဘာစစ်စတင်ချိန်၌ အမှန်တကယ်ဖြစ်ပျက်ခဲ့သည်။ ကမ္ဘာသည် ကြိုတင်ဟောထားသည့် “ခဲယဉ်းသောကာလ” ဖြစ်သည့် “နောက်ဆုံးသောကာလ” ထဲအမှန်ပင်ဝင်ရောက်ခဲ့သည်။ (၂ တိမောသေ ၃:၁) ကမ္ဘာ့အခြေအနေများ၏ အမှန်တရားကို အခြားသူများမသိကြဘဲလျက် ယေဟောဝါ၏ကျေးကျွန်များ အဘယ်ကြောင့်သိခဲ့ကြသနည်း။ အကြောင်းမှာ ယောရှုကဲ့သို့ သူတို့သည်လည်း ယေဟောဝါ၏နှုတ်တော်ထွက်စကားတစ်လုံးမျှ မဖြစ်လာဘဲရှိမည်မဟုတ်ကြောင်း ယုံကြည်ကြသောကြောင့်ဖြစ်သည်။

၁၂။ ယနေ့ ယေဟောဝါ၏အဘယ်ကတိတော်ကို ကိုယ်တော့်ကျေးကျွန်များ အပြည့်အဝယုံကြည်ကိုးစားကြသနည်း။

^၁၂ ယနေ့ ယေဟောဝါအား ယုံကြည်ကြသော ကိုယ်တော့်ကျေးကျွန်များ၏အရေအတွက်သည် ကမ္ဘာတစ်ဝန်းတွင် ခြောက်သန်းနီးပါး ရှိနေပြီ။ ဘုရားသခင်သည် ဤယိုယွင်းပျက်ပြားသော အစီအစဉ်စနစ်ကို မကြာမီ အဆုံးတိုင်စေတော်မူမည်ဖြစ်ကြောင်း ဘုရားသခင့်ပရောဖက်ပြုစကား၏ ပြည့်စုံချက်အထောက်အထားမှ သူတို့သိကြသည်။ ထို့ကြောင့် သူတို့သည် ၁ ယောဟန် ၂:၁၇ ပါ “လောကနှင့် လောကီတပ်မက်ခြင်းသည် ရွေ့သွားကွယ်ပျောက်တတ်၏။ ဘုရားသခင်၏အလိုတော်နှင့်အညီ ကျင့်သောသူမူကား နိစ္စထာဝရတည်၏” ဟူသောစကားများ ပြည့်စုံလုနီးနေပြီဖြစ်ကြောင်း ယုံကြည်စိတ်ချကြသည်။ ယေဟောဝါသည် ဤကတိတော်ကို ပြည့်စုံစေမည်ဖြစ်ကြောင်း ကိုယ်တော်၏ကျေးကျွန်များ အကြွင်းမဲ့ယုံကြည်ကိုးစားကြသည်။

၁၃။ ယေဟောဝါအား သင်မည်မျှယုံကြည်ကိုးစားနိုင်သနည်း။

^၁၃ ယေဟောဝါအား သင်မည်မျှယုံကြည်ကိုးစားနိုင်သနည်း။ ပုံအပ်ပြီးယုံကြည်နိုင်၏! ကိုယ်တော့်အားဝတ်ပြု၍ အသက်ဆုံးရှုံးသွားရသည့်တိုင် ရှင်ပြန်ထမြောက်ချိန်တွင် သာ၍ကောင်းသောအသက်တာကို သင့်အား ကိုယ်တော်ပြန်ပေးတော်မူမည်။ ယေရှုက ကျွန်ုပ်တို့ကို ဤသို့အာမခံထားသည်– “သင်္ချိုင်းများမှာရှိသောသူအပေါင်း [ဘုရားသခင်၏အောက်မေ့ခြင်းခံရသူများ] တို့သည် သားတော်၏စကားသံကိုကြား၍၊ ထွက်ရမည့်အချိန်ကာလရောက်လတ္တံ့။” (ယောဟန် ၅:၂၈၊ ၂၉) ထိုသို့ပြုလုပ်နိုင်သည့် ဆရာဝန်၊ နိုင်ငံရေးခေါင်းဆောင်၊ သိပ္ပံပညာရှင်၊ စီးပွားရေးလုပ်ငန်းရှင် သို့မဟုတ် အခြားလူသားတစ်ဦးဦးကို သင်သိပါသလော။ သူတို့၏အတိတ်မှတ်တမ်းက ထိုသို့မပြုလုပ်ပေးနိုင်ကြောင်း တင်ပြပါသည်။ ယေဟောဝါမူကား တတ်နိုင်ပြီး ပြုလုပ်ပေးတော်မူမည်!

သစ္စာရှိသူများအတွက် အံ့သြဖွယ်အနာဂတ်

၁၄။ ဘုရားသခင့်နှုတ်မြွက်စကားတော်သည် သစ္စာရှိသူများအား အဘယ်အံ့ဖွယ်ကောင်းသောအနာဂတ်ကို ကတိပေးထားသနည်း။

^၁၄ ဘုရားသခင့်ကောင်းကင်နိုင်ငံတော်လက်အောက် ကမ္ဘာသစ်သည် ကျိန်းသေရောက်ရှိမည့်အကြောင်း ယေရှုအခိုင်အမာ ဤသို့ပြောဆိုသည်– “စိတ်နူးညံ့သိမ်မွေ့သောသူတို့သည် မင်္ဂလာရှိကြ၏။ အကြောင်းမူကား၊ ထိုသူတို့သည် ပြည်တော် [“မြေကြီး၊” ကဘ] ကို အမွေခံရကြလတ္တံ့။” (မဿဲ ၅:၅) ယင်းသည် ဆာလံ ၃၇:၂၉ ၌ပါသော ဘုရားသခင့်ကတိတော်ကိုပိုခိုင်လုံစေသည်– “ဖြောင့်မတ်သောသူတို့သည် ပြည်တော်ကိုအမွေခံ၍ အစဉ်အမြဲနေရကြလိမ့်မည်။” ယေရှုသေဆုံးတော်မမူမီလေးတွင် လူဆိုးတစ်ယောက်သည် ကိုယ်တော်အား ယုံကြည်ကြောင်း ဖော်ပြခဲ့သောအခါ သူ့ကို ယေရှုက “သင်သည် ငါနှင့်အတူပရဒိသု၌ရှိလိမ့်မည်” ဟူ၍မိန့်ကြားတော်မူ၏။ (လုကာ ၂၃:၄၃၊ ကဘ) မှန်ပါသည်၊ ဘုရားသခင်၏နိုင်ငံတော်ဘုရင်အနေနှင့် ယေရှုသည် ပရဒိသုတွင် ဤလူဆိုးအသက်ရှင်နေထိုင်ခွင့်ရရန် မြေကြီးပေါ်သို့ သူ့ကိုရှင်ပြန်ထမြောက်လာစေတော်မူမည်။ ယနေ့ ယေဟောဝါ၏နိုင်ငံတော်၌ ယုံကြည်သူတို့သည်လည်း ‘လူတို့၏မျက်စိ၌ မျက်ရည်ရှိသမျှတို့ကို [ဘုရားသခင်] သုတ်တော်မူမည့်၊ နောက်တစ်ဖန် သေဘေးမရှိမည့်၊ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိမည့်’ ပရဒိသုတွင် အသက်ရှင်နေထိုင်ရန် မျှော်လင့်နိုင်ပါသည်။—ဗျာဒိတ် ၂၁:၄။

၁၅၊ ၁၆။ ကမ္ဘာသစ်တွင် ဘဝသည် အဘယ်ကြောင့်အလွန်ငြိမ်းချမ်းမည်နည်း။

^၁၅ ကျွန်ုပ်တို့သည် ထိုကမ္ဘာသစ်ထဲ ရောက်နေသကဲ့သို့ စဉ်းစားကြည့်ကြစို့။ ကျွန်ုပ်တို့သည် ထိုကမ္ဘာသစ်တွင် နေထိုင်ကြပြီဟု မြင်ယောင်ကြည့်ပါ။ ချက်ချင်းပင် ကျွန်ုပ်တို့သည် လုံးဝငြိမ်းချမ်းစွာ အတူတကွနေထိုင်ကြသော ပျော်ရွှင်သူများကို လွယ်လင့်တကူ သတိပြုမိကြပေမည်။ ဟေရှာယ ၁၄:၇ တွင်ဖော်ပြထားသော ထပ်တူအခြေအနေမျိုးကို ခံစားနေရကြသည်– “မြေတစ်ပြင်လုံးသည် ငြိမ်ဝပ်ခြင်းရှိ၏။ ရွှင်လန်းစွာသီချင်းဆိုသံနှင့် ကြွေးကြော်ကြ၏။” သူတို့သည် အဘယ်ကြောင့် ထိုသို့ပြုကြသနည်း။ အကြောင်းတစ်ခုမှာ၊ အိမ်တံခါးများတွင် သော့ခလောက်များမရှိသည်ကို သတိပြုပါ။ ရာဇဝတ်မှု၊ အကြမ်းဖက်မှုတို့ မရှိသောကြောင့် ၎င်းတို့မလိုတော့ပါ။ ဘုရားသခင့်နှုတ်မြွက်စကားတော် ဆိုထားသည့်အတိုင်း ဖြစ်နေသည်– “လူအပေါင်းတို့သည် ကိုယ်ပိုင်သောစပျစ်ပင်၊ ကိုယ်ပိုင်သောသင်္ဘောသဖန်းပင်အောက်မှာ ထိုင်ကြလိမ့်မည်။ ကြောက်စေသောသူ တစ်ယောက်မျှမရှိရ။”—မိက္ခာ ၄:၄။

^၁၆ ဤကမ္ဘာသစ်တွင် စစ်မှုကိုပိတ်ပင်ထားသောကြောင့် စစ်လည်းမရှိတော့။ စစ်လက်နက်အားလုံးကို ငြိမ်းချမ်းရေးအသုံးအဆောင်ပစ္စည်းများအဖြစ် ထုလုပ်ပြောင်းလဲပစ်ခဲ့ပြီ။ ဟေရှာယ ၂:၄ သည် ပြီးပြည့်စုံသောသဘောမျိုးဖြင့် ပြည့်စုံနေပြီ– “သူတို့ဓားလက်နက်များကို ထွန်သွားဖြစ်စေခြင်းငှာလည်းကောင်း၊ လှံများကို တံစဉ်ဖြစ်စေခြင်းငှာလည်းကောင်း ထုလုပ်ကြလိမ့်မည်။ တစ်ပြည်ကိုတစ်ပြည်စစ်မတိုက်၊ စစ်အတတ်ကိုလည်း နောက်တစ်ဖန်မသင်ရကြ။” သို့သော် ယင်းသည် ကျွန်ုပ်တို့မျှော်လင့်ထားရာပင်! အဘယ်ကြောင့်နည်း။ အကြောင်းမှာ ကမ္ဘာသစ်တွင် နေထိုင်သူများစွာသည် ကမ္ဘာဟောင်းတွင် ဘုရားသခင့်အမှုထမ်းရွက်စဉ် ယင်းကို သင်ယူခဲ့ပြီဖြစ်သောကြောင့်တည်း။

၁၇။ ဘုရားသခင့်နိုင်ငံတော်အောက်၌ အဘယ်နေမှုထိုင်မှုအခြေအနေများရှိလိမ့်မည်နည်း။

^၁၇ သင်သတိပြုမိသည့် အခြားအရာတစ်ခုမှာ ဆင်းရဲနွမ်းပါးမှု မရှိခြင်းဖြစ်သည်။ မည်သူမျှ အလွန်ညစ်ပတ်သောတဲကုပ်တွင် မနေထိုင်၊ ဟောင်းနွမ်းစုတ်ပြတ်သော အဝတ်အစားများကိုလည်း မဝတ်ကြ၊ အိုးမဲ့အိမ်မဲ့လည်း မဖြစ်ကြပါ။ လူတိုင်းတွင် သက်သောင့်သက်သာရှိသောစံအိမ်နှင့် လှပကြည်နူးဖွယ် သစ်ပင်ပန်းမန်များရှိသည့် သာယာသောခြံမြေရှိ၏။ (ဟေရှာယ ၃၅:၁၊၂; ၆၅:၂၁၊ ၂၂; ယေဇကျေလ ၃၄:၂၇) ထို့အပြင် အားလုံးအတွက် အစားအစာအလျှံပယ်ရှိမည်ဟူသည့် ကတိတော်ကို ဘုရားသခင်ပြည့်စုံစေပြီဖြစ်သောကြောင့် ဆာလောင်မွတ်သိပ်ခြင်းမရှိတော့ပါ– “မြေကြီးပေါ်တွင် အသီးအနှံများစွာရှိလိမ့်မည်; တောင်များ၏ထိပ်ပေါ်တွင် အလျှံပယ်ဖြစ်နေလိမ့်မည်။” (ဆာလံ ၇၂:၁၆၊ ကဘ) မှန်ပါသည်၊ ဧဒင်ဥယျာဉ်တွင် ဘုရားသခင်ရည်ရွယ်တော်မူခဲ့သကဲ့သို့ ဘုရားသခင့်နိုင်ငံတော်၏ညွှန်ကြားမှုအောက်တွင် ဂုဏ်ကျက်သရေနှင့်ပြည့်စုံသောပရဒိသုကို ကမ္ဘာအနှံ့ချဲ့ထွင်သွားပေမည်။—ကမ္ဘာဦး ၂:၈။

၁၈။ ကမ္ဘာသစ်တွင် အဘယ်အရာများသည် လူများကို ခြိမ်းခြောက်တော့မည်မဟုတ်သနည်း။

^၁၈ လူတိုင်းသည် ကျန်းမာသန်စွမ်းကြသောကြောင့်လည်း သင်အံ့သြပေမည်။ ယင်းသို့ဖြစ်ခြင်းမှာ ယခုသူတို့၏စိတ်နှင့်ကိုယ်တို့သည် စုံလင်နေသောကြောင့်ဖြစ်သည်။ ဖျားနာမှု၊ နာကျင်မှုနှင့် သေခြင်းရှိတော့မည် မဟုတ်။ မည်သူမျှ ဘီးတပ်ကုလားထိုင်တွင် သို့မဟုတ် ဆေးရုံခုတင်ပေါ်တွင် မရှိတော့။ ထိုအရာအားလုံး ထာဝစဉ်ပျောက်ကွယ်သွားပေပြီ။ (ဟေရှာယ ၃၃:၂၄; ၃၅:၅၊ ၆) တိရစ္ဆာန်တစ်ကောင်မျှလည်း လူ့အသက်ကို အန္တရာယ်ပြုမည်မဟုတ်၊ အကြောင်းမှာ ၎င်းတို့သည် ဘုရားသခင့်တန်ခိုးတော်ဖြင့် သင့်မြတ်စွာ နေတတ်ကြပြီဖြစ်သောကြောင့်တည်း!—ဟေရှာယ ၁၁:၆-၈; ၆၅:၂၅; ယေဇကျေလ ၃၄:၂၅။

၁၉။ ကမ္ဘာသစ်တွင် နေ့ရက်တိုင်းသည် အဘယ်ကြောင့် “မွေ့လျော်” စရာဖြစ်မည်နည်း။

^၁၉ ဤကမ္ဘာသစ်၏သစ္စာရှိပြည်သားများ တည်ဆောက်ထားသည့် ယဉ်ကျေးမှုသည် အမှန်ထူးမြတ်လှ၏! သူတို့၏အစွမ်းခွန်အား၊ သူတို့၏အတတ်ပညာနှင့် မြေကြီး၏ဘဏ္ဍာကို အကျိုးယုတ်စေသည့်အရာများအတွက်မဟုတ်ဘဲ အကျိုးရှိလုပ်ငန်းများတွင် မြှုပ်နှံထားကြသည်။ ပြိုင်ဆိုင်ရန်မဟုတ်ဘဲ အခြားသူများနှင့် ပူးပေါင်းလုပ်ဆောင်ကြရန်ဖြစ်သည်။ ထို့ပြင် သင်တွေ့ဆုံရသူတိုင်းသည် ယုံကြည်အားထားနိုင်သူဖြစ်မည်၊ အကြောင်းမှာ ဘုရားသခင်ကတိပေးတော်မူသကဲ့သို့ လူအားလုံးသည် “ယေဟောဝါ၏သွန်သင်တော်မူခြင်းခံရသူများ” ဖြစ်ကြသောကြောင့်တည်း။ (ဟေရှာယ ၅၄:၁၃၊ ကဘ) လူတိုင်းကို ဘုရားသခင်၏ဥပဒေများစိုးမိုးထားသောကြောင့် “ပင်လယ်ရေသည် မိမိနေရာကို လွှမ်းမိုးသကဲ့သို့” မြေကြီးသည် “ထာဝရဘုရား [“ယေဟောဝါ၊” ကဘ] ကိုသိကျွမ်းခြင်းပညာနှင့် ပြည့်စုံလိမ့်မည်။” (ဟေရှာယ ၁၁:၉) ဤကမ္ဘာသစ်တွင် နေ့ရက်တိုင်းသည် ဆာလံ ၃၇:၁၁ ဆိုသည့်အတိုင်း အမှန်ပင် “မွေ့လျော်” စရာဖြစ်ပေမည်။

ပျော်စရာအနာဂတ်တစ်ခု အာမခံထား

၂၀။ ငြိမ်းချမ်းသောအနာဂတ်ကိုခံစားရရန် ကျွန်ုပ်တို့အဘယ်အရာပြုလုပ်ရမည်နည်း။

^၂၀ ထိုပျော်စရာအနာဂတ်တွင် ပါဝင်ရန် ကျွန်ုပ်တို့ဘာလုပ်ရမည်နည်း။ ဟေရှာယ ၅၅:၆ က “တွေ့နိုင်သည်ကာလတွင် ထာဝရဘုရား [“ယေဟောဝါ၊” ကဘ] ကိုရှာကြလော့။ နီးတော်မူသည်ကာလတွင် ဆုတောင်း ပတ္ထနာပြုကြလော့” ဟုဆိုထားပါသည်။ ကျွန်ုပ်တို့ရှာဖွေကြစဉ် ကျွန်ုပ်တို့၏သဘောထားသည် ဆာလံ ၁၄၃:၁၀ တွင် ဖော်ပြသည့်အတိုင်းဖြစ်သင့်သည်– “အလိုတော်သို့လိုက်စေမည်အကြောင်း သွန်သင်တော်မူပါ။ ကိုယ်တော်သည် အကျွန်ုပ်၏ဘုရားသခင်ဖြစ်တော်မူ၏။” ယင်းသို့ပြုလုပ်သူများသည် ဤနောက်ဆုံးကာလတွင် ယေဟောဝါ၏ရှေ့မှောက်တော်တွင် အပြစ်ကင်းမဲ့စွာ လျှောက်လှမ်းနိုင်ကြပြီး ကောင်းသောအနာဂတ်ကို မျှော်လင့်စောင့်စားနိုင်ကြသည်။ “စုံလင်ခြင်းတရားကို စောင့်ရှောက်လော့။ ဖြောင့်မတ်ခြင်းတရားကို ကြည့်ရှုဆင်ခြင်လော့။ ထိုသို့ပြုသောသူသည် အဆုံး၌ငြိမ်သက်ခြင်းကိုခံစားရလိမ့်မည်။ ပြစ်မှားသောသူအပေါင်းတို့သည် ပျက်စီးခြင်းသို့ရောက်၍၊ မတရားသောသူတို့သည် အဆုံး၌ ပယ်ရှင်းခြင်းကိုခံရကြလိမ့်မည်။”—ဆာလံ ၃၇:၃၇၊ ၃၈။

၂၁၊ ၂၂။ ဘုရားသခင်သည် ယနေ့အဘယ်အရာကို ဖွဲ့စည်းနေတော်မူသနည်း။ ဤလေ့ကျင့်မှုကို မည်သို့ဖြစ်မြောက်စေတော်မူသနည်း။

^၂၁ ယခုပင် ယေဟောဝါသည် ကိုယ်တော့်အလိုတော်ဆောင်လိုသူများကို လူမျိုးအသီးသီးမှ စုသိမ်းနေပါသည်။ သမ္မာကျမ်းစာက “နောက်ဆုံးသောကာလ၌ [ကျွန်ုပ်တို့ ယခုအသက်ရှင်နေသည့်အချိန်] . . . များပြားသောသူတို့ကလည်း၊ ‘လာကြလော့။ ထာဝရဘုရား [“ယေဟောဝါ၊” ကဘ] ၏တောင်တော် [ကိုယ်တော်၏မှန်သောဝတ်ပြုရေး] . . . သို့ တက်သွားကြကုန်အံ့။ လမ်းခရီးတော်တို့ကို ပြသသွန်သင်တော်မူ၍၊ ငါတို့သည် ခြေတော်ရာသို့လိုက်သွားကြမည်’ ဟုခရီးသွားလျက်ပြောဆိုကြလိမ့်မည်” ဟုတင်ကူး၍မိန့်တော်မူထားသကဲ့သို့ ကိုယ်တော်သည် ထိုသူများကို မြေကြီးလူ့ဘောင်သစ်၏ အုတ်မြစ်အဖြစ် ဖွဲ့စည်းနေတော်မူသည်။

^၂၂ ဤသူတို့ကို ဗျာဒိတ်ကျမ်း ၇:၉ က “အသီးသီးဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှ [“လူအုပ်ကြီး၊” ကဘ]” အဖြစ် ဖော်ပြထားသည်။ အခန်းငယ် ၁၄ က “ဤသူတို့သည်” လက်ရှိစနစ်၏အဆုံးကိုကပ်ကျော်ကာ “ကြီးစွာသောဆင်းရဲဒုက္ခထဲက ထွက်မြောက် . . . သောသူဖြစ်ကြသတည်း” ဟုဖော်ပြထားသည်။ ကမ္ဘာသစ်၏ ဤအခြေခံအုတ်မြစ်သည် ယခုခြောက်သန်းနီးပါးရှိနေပြီဖြစ်ကာ နှစ်စဉ်နှစ်တိုင်း လူသစ်များစွာတို့သည် ယင်း၏အဝင်ဖြစ်လာနေကြသည်။ ယေဟောဝါ၏ ဤသစ္စာရှိကျေးကျွန်အားလုံးသည် ကိုယ်တော်၏ကမ္ဘာသစ်တွင် အသက်ရှင်ရန် လေ့ကျင့်ခံနေကြရသည်။ သူတို့သည် ဤကမ္ဘာမြေကြီးကို ပရဒိသုအဖြစ် ပြောင်းလဲပစ်ရန်လိုအပ်သည့်ဝိညာဉ်ရေးနှင့် အခြားကျွမ်းကျင်မှုများကို သင်ယူနေကြပါသည်။ ထို့အပြင် “ကတိထားတော်မူသောသူသည် သစ္စာနှင့်ပြည့်စုံတော်မူ” သောကြောင့် ထိုပရဒိသုသည် ဧကန်ဖြစ်လာမည်ကို သူတို့အပြည့်အဝယုံကြည်စိတ်ချကြသည်။—ဟေဗြဲ ၁၀:၂၃။

ပြန်လည်ဆန်းစစ်ရန်အချက်များ

◻ ပထမရာစုတွင် ယုံကြည်ခြင်းကင်းမဲ့မှုသည် အဘယ်ရလဒ်များဖြစ်ပေါ်စေခဲ့သနည်း။

◻ ဘုရားသခင့်ကျေးကျွန်များသည် ကိုယ်တော့်အား မည်မျှယုံကြည်ကိုးစားနိုင်သနည်း။

◻ သစ္စာရှိသူများအတွက် အဘယ်အနာဂတ်ရှိသနည်း။

◻ ဘုရားသခင့်ကမ္ဘာသစ်တွင် ပျော်ရွှင်သောအနာဂတ် အမှန်ရရှိရန် ကျွန်ုပ်တို့အဘယ်အရာကိုပြုလုပ်ရမည်နည်း။

[စာမျက်နှာ ၁၈ ပါ ရုပ်ပုံ]

ယခုပင် ယေဟောဝါသည် မြေကြီးလူ့ဘောင်သစ်၏အုတ်မြစ်ကို ဖွဲ့စည်းနေတော်မူသည်