ယေဟောဝါအဖွဲ့အစည်းသို့ ကျမ်းစာသင်သားများကို ညွှန်းခြင်း

^၁  ယောဟန် ၁၀:၁၆ တွင်ယေရှုပြောထားသည့် “သိုးစုတစ်စု” ၏အဖွဲ့အစည်းကို ကျမ်းစာသင်သားများသိရန်လိုသည်။ သူတို့ကယ်တင်ခြင်းရရန် ယေဟောဝါအဖွဲ့အစည်းတွင်ပါဝင်ရမည်အကြောင်း သူတို့သဘောပေါက်နားလည်ရမည်။ (ဗျာ၊ ၇:၉၊ ၁၀၊ ၁၅) ထိုကြောင့် ကျမ်းစာသင်အံမှုစသည်နှင့် ကျမ်းစာသင်သားများကို အဖွဲ့အစည်းသို့စတင်ညွှန်ကြားပေးရမည်။

^၂ ယေဟောဝါ၏မြေကြီးဆိုင်ရာအဖွဲ့အစည်း၏ ကဏ္ဍအသီးသီးကို ကျမ်းစာသင်သားများသိလာရန် သွန်သင်ပေးရမည်။ ပထမရာစုပုံစံအတိုင်းပင် ယေဟောဝါ၏လူမျိုးတော်သည် အကြီးအကဲများ၊ ဓမ္မအမှုထမ်းများနှင့် ကြေညာသူများဖြင့်ဖွဲ့စည်းထားသော အသင်းတော်များ၏အဝင်ဖြစ်ကြသည်။ ယနေ့၊ အသင်းတော်အစည်းအဝေးငါးခုစလုံးကို အသင်းသားများပတ်စဉ်တက်ကြသည်။ နှစ်စဉ် အချိန်တန်ကျင်းပသည့် တိုက်နယ်အစည်းအဝေးများ၊ ခရိုင်စည်းဝေးပွဲကြီးများလည်းရှိသည်။ ယင်းတို့မှအထူးညွှန်ကြားချက်များရသည့်အပြင် နေရာဒေသအသီးသီးမှသက်သေခံချင်းတို့နှင့်ပေါင်းသင်းခွင့် ဤစည်းဝေးကြီးများတွင်ရရှိကြသည်။ ထို့ပြင် ရှေ့ဆောင်များ၊ သာသနာပြုများ၊ နယ်လှည့်ကြီးကြပ်မှူးများနှင့် ကမ္ဘာချီလုပ်ငန်းကိုညွှန်ကြားပေးသည့် အုပ်ချုပ်ရေးအဖွဲ့လည်းရှိသည်။ ယေဟောဝါအဖွဲ့အစည်း၏ ကဏ္ဍအသီးသီးကို သင့်ကျမ်းစာသင်သားများသိလာရန် မည်သို့ပြုလုပ်မည်နည်း။ အဖွဲ့အစည်း၏တည်ဆောက်ပုံသည် ကျမ်းစာအခြေခံကြောင်း သူတို့အားမည်သို့သိစေမည်နည်း။

DOING GOD’S WILL ရုပ်ပြစာစောင်ကိုအသုံးပြု

^၃ (ယခုအင်္ဂလိပ်နှင့်တယ်မီလ်ဘာသာစကားဖြင့်ရနိုင်သည့်) Doing God’s Will ရုပ်ပြစာစောင်တွင် ယေဟောဝါအဖွဲ့အစည်းအကြောင်း အပြည့်အစုံဖေါ်ပြထားချက်များရှိသည်။ မြန်မာဘာသာဖြင့်မရှိသော်လည်း အင်္ဂလိပ်စာစောင်ကိုအသုံးပြုကာ ရုပ်ပုံများကိုပြနိုင်ပါသည်။ ၄င်းဖြင့် အဖွဲ့အစည်းအကြောင်းကို ကျမ်းစာသင်သားများအားသိစေပြီး ယင်း၏လှုပ်ရှားပုံကို တန်ဖိုးထားလေးစားစေနိုင်ပါသည်။ စပြောပြနိုင်သည့်အကောင်းဆုံးအကြောင်းကား နိုင်ငံတော်ခန်းမတွင်ဖြစ်ပျက်သည့်အရာများအကြောင်းဖြစ်သည်။ ယင်းသို့ပြုခြင်းအားဖြင့် အသင်းတော်အစည်းအဝေးများကို သင်သားတက်ချင်စိတ်ပေါ်စေနိုင်သည်။ လူထုဟောပြောပွဲသို့ပထမအကြိမ်မခေါ်ဖိတ်မီ စာမျက်နှာ ၁၄ နှင့် ၁၅ ပါအချက်အလက်များကို သုံးသပ်ထားပါ။ ရုပ်ပုံများကိုသူ့အားပြပါ။ ဒေသခံနိုင်ငံတော်ခန်းမ၏လိပ်စာနှင့် အဆောက်အဦးပုံစံကို ပြောပြပါ။ သင်တက်ရောက်သည့်ခန်းမရုပ်ပုံကိုပင် ပြနိုင်ပါသည်။

^၄ အသင်းတော်အား တိုက်နယ်ကြီးကြပ်မှူးလည်ပတ်ရောက်ရှိမည့်အချိန်ကိုကြေညာသောအခါ သင့်သင်သားနှင့် စာမျက်နှာ ၂၀ နှင့် ၂၁ ပါအကြောင်းများကိုသုံးသပ်ပါ။ စာမျက်နှာ ၂၁ အောက်တွင်ပါသောမေးခွန်းများကိုအသုံးပြုကာ အဓိကအချက်များကို ပေါ်လွင်စေပါ။ (ယင်းမေးခွန်းများမှာ (၁) ပထမရာစုခရစ်ယာန်အသင်းတော်တွင် နယ်လှည့်ကြီးကြပ်မှူးများရှိခြင်း၏ရည်ရွယ်ချက်ကားအဘယ်နည်း။ (၂) ဤဓမ္မအမှုအတွက် နယ်လှည့်ကြီးကြပ်မှူးများသည် မည်သို့အရည်အချင်းပြည့်မီပြီးအသုံးတော်ခံနေရသနည်း။ (၃) တိုက်နယ်၊ ခရိုင်ကြီးကြပ်မှူးများ၏လုပ်ငန်းနှင့် သူတို့နေထိုင်ပုံကိုဖေါ်ပြပါ။) စာမျက်နှာ ၂၀ ရှိပထမအပိုဒ်ကိုအသုံးပြုခြင်းအားဖြင့် ကျွန်ုပ်တို့၏လက်ရှိအစီအစဉ်၏ ကျမ်းစာနောက်ခံကိုသူနှင့်သုံးသပ်ပါ။ (ပထမရာစုခရစ်ယာန်အသင်းတော်တွင် တည်ဆောက်ပေးခြင်းငှာ အသင်းတော်များထံနယ်လှည့်ကြီးကြပ်မှူးများ လည်ပတ်သွားကြသည်။ အသင်းတော်သားတို့သည် ဘုရားသခင်နှင့်ထိုက်တန်စွာသွားလာနိုင်ကြရန် သူတို့ကိုယ်ကျိုးစွန့်ပြီး ကြိုးစားအားထုတ်ကြသည်။​—တ၊ ၁၁:၂၃၊ ၂၄။ ၁၄:၂၁၊ ၂၂။ ၁၅:၃၂။ ၂၀:၂၊ ၃၁-၃၅။ ဖိ၊ ၂:၂၀-၂၂၊ ၂၉။ ၁ သက်၊ ၂:၅-၁၂။) ဤအကြောင်းအရာများသည် နိုင်ငံတော်ခန်းမသို့ သင့်သင်သားလာခဲ့ခြင်းကို အဓိပ္ပာယ်လေးနက်စေပါမည်။

^၅ ထိုနည်းတူစွာ ခရိုင်စည်းဝေးပွဲ၊ တိုက်နယ်အစည်းအဝေး၊ သို့မဟုတ်အထူးအစည်းအဝေးနေ့မတိုင်မီ စာမျက်နှာ ၁၉ ပါအကြောင်းကို ကြိုတင်သုံးသပ်ထားပါ။ စည်းဝေးပွဲကြီးတစ်ခုကျင်းပရာတွင် မည်သည့်အရာများပါဝင်ကြောင်းနှင့် စာမျက်နှာ ၁၈ ပါရုပ်ပုံများတင်ပြသည့် အပြည်ပြည်ဆိုင်ရာမြင်ကွင်းကိုပါသိစေပါ။ စာပေအသစ်ထုတ်ဝေခြင်းနှင့်ပတ်သက်သည့်ရုပ်ပုံကိုပြရာတွင် စာမျက်နှာ ၂၄ နှင့် ၂၅ ပါအကြောင်းများကိုသူနှင့်ထပ်ဆင့်ဆွေးနွေးတင်ပြနိုင်သည်။ ရှေ့ဆောင်ခြင်းလုပ်ငန်းအကြောင်းရှင်းပြရန် စာမျက်နှာ ၂၂ နှင့် ၂၃ ပါအချက်များကိုဖေါ်ပြပါ။

လိုအပ်သလိုပြုလုပ်ပါ

^၆ သင်တွေ့မြင်သည့်အတိုင်းပင် Doing God’s Will ရုပ်ပြစာစောင်အစမှစတင်ဖေါ်ပြရန်မလိုအပ်ပါ။ ထိုသို့ပြုမည့်အစား အခွင့်အရေးနှင့်အကြောင်းပေါ်လာသည့်အလျောက် ယေဟောဝါအဖွဲ့အစည်းကို ကျမ်းစာသင်သားတန်ဖိုးထားတတ်ပြီး ဒေသခံအသင်းတော်နှင့်ပေါင်းသင်းရန်တိုက်တွန်းမှုဖြစ်စေမည့် အချက်အလက်များကို ရုပ်ပြစာစောင်မှပြနိုင်ပါသည်။

^၇ ဤကိစ္စရပ်များကိုပိုင်ပိုင်နိုင်နိုင်တင်ပြပြောဆိုခြင်းအားဖြင့် သင့်သင်သားစွဲမှတ်နိုင်စရာဖြစ်သွားစေမည်။ ဝိညာဉ်တော်တန်ခိုးဖြင့် စိတ်အားထက်သန်ပါ။ (တ၊ ၁၈:၂၅) ထို့ပြင် “သူတစ်ပါးကိုဆုံးမ” ပေးသောအသင်သည် ယေဟောဝါအဖွဲ့အစည်းကိုတန်ဖိုးထားလေးစားခြင်းနှင့်ပတ်သက်၍ ပုံသက်သေကောင်းပြသူဖြစ်ပါလေ။ (ရော၊ ၂:၂၁) ဤနည်းဖြင့် ထာဝရအသက်သို့ ယေရှုပို့ဆောင်နေသောသိုးတော်စုအဝင်ဖြစ်လာရန် သူတစ်ပါးအားသင်ကူညီပေးနိုင်ပေမည်။