ယင်းသည် အမှန်ပင် ကျမ်းစာသွန်သင်ချက်ဖြစ်သလော

သုံးပါးပေါင်းတစ်ဆူအယူသည် မှန်ခဲ့လျှင် ယင်းကို သမ္မာကျမ်းစာတွင် ရှင်းရှင်းလင်းလင်း၊ တစ်သမတ်တည်းဖော်ပြထားသင့်သည်။ အဘယ်ကြောင့်နည်း။ တမန်တော်များ အခိုင်အမာယုံကြည်ခဲ့သကဲ့သို့ပင် သမ္မာကျမ်းစာတွင် ဘုရားသခင်ကိုယ်တိုင် မိမိအကြောင်းဖွင့်ပြထားသောကြောင့်ပင်။ ဘုရားသခင်နှစ်သက်လက်ခံသောနည်းဖြင့် ကိုးကွယ်နိုင်ရန် ကိုယ်တော်အကြောင်း သိရှိဖို့လိုသောကြောင့် ကိုယ်တော်သည် မည်သို့သောဘုရားမျိုးဖြစ်ကြောင်း ကျမ်းစာတွင် ရှင်းရှင်းလင်းလင်းဖော်ပြထားသင့်သည်။

ပထမရာစုခရစ်ယာန်များသည် သမ္မာကျမ်းစာကို ဘုရားသခင်၏ဗျာဒိတ်တော်အစစ်အမှန်အဖြစ် လက်ခံကြသည်။ ယင်းသည် သူတို့ယုံကြည်ချက်၏အခြေခံ၊ ခိုင်လုံသောအထောက်အထားဖြစ်သည်။ ဥပမာ၊ ဗေရိမြို့သားများကို တမန်တော်ပေါလုဟောပြောသောအခါ သူတို့သည် “အလွန်ကြည်ဖြူလိုလားသောစိတ်နှင့် တရားစကားတော်ကို ခံယူ၍ ကြားနာရသည့်အရာများ မှန်မမှန် သိမြင်ရန် နေ့စဉ်နေ့တိုင်း ကျမ်းစာကို စေ့စေ့ဆန်းစစ်ကြ၏။”—တမန်တော် ၁၇:၁၀၊ ၁၁၊ ကဘ။

ထိုခေတ်တွင် ဘုရားသခင်၏ အထင်ကရကျေးကျွန်များသည် အဘယ်အရာကို ခိုင်လုံသောအထောက်အထားအဖြစ် မှီငြမ်းခဲ့ကြသနည်း။ တမန်တော် ၁၇:၂၊ ၃ [ကဘ] တွင် ဤသို့ဖော်ပြ၏– “ပေါလုသည် ထုံးစံရှိသည်အတိုင်း . . . ကျမ်းစာကိုအခြေခံ၍ ထိုသူတို့နှင့် ကျိုးကြောင်းဆင်ခြင် ဆွေးနွေးလေ၏။ . . . [ကျမ်းစာမှ] အကိုးအကားများဖြင့် ရှင်းလင်းထောက်ပြ . . . လေ၏။”

ယေရှုသည် “ကျမ်းစာ၌ရေးထားသည်” ဟုအကြိမ်ကြိမ်မိန့်ဆိုခြင်းဖြင့် ကျမ်းစာကိုအခြေခံ၍ သွန်သင်ရာတွင် ပုံသက်သေချမှတ်ခဲ့သည်။ “ကျမ်းစာ၌ ကိုယ်တော်၏အကြောင်း ရေးထားသမျှကို ရှင်းပြတော်မူ၏။”—မဿဲ ၄:၄၊ ၇၊ ကဘ; လုကာ ၂၄:၂၇၊ ကဘ။

ယေရှု၊ ပေါလုနှင့် ပထမရာစုခရစ်ယာန်များသည် မိမိတို့သွန်သင်ချက်များ၏အခြေခံအဖြစ် သမ္မာကျမ်းစာကို အသုံးပြုကြသည်။ “ကျမ်းဂန်ရှိသမျှသည် ဘုရားသခင့် စွမ်းအားတော်၏ လမ်းညွှန်မှုဖြင့် ရေးထားသောကြောင့် သွန်သင်ခြင်း၊ အပြစ်ဖော်ပြခြင်း၊ ပဲ့ပြင်ခြင်း၊ ဖြောင့်မတ်စေရန် ဆုံးမခြင်းတို့တွင် အကျိုးရှိ၏။ ဤသို့ဖြင့် ဘုရားသခင်၏လူသည် ကောင်းသောအမှုအမျိုးမျိုးအတွက် အရည်အချင်းပြည့်ဝပြီး လုံးလုံးလျားလျား အသင့်ဖြစ်နေ” ကြောင်း သူတို့သိရှိထားကြသည်။—၂ တိမောသေ ၃:၁၆၊ ၁၇၊ ကဘ; ၁ ကောရိန္သု ၄:၆; ၁ သက်သာလောနိတ် ၂:၁၃; ၂ ပေတရု ၁:၂၀၊ ၂၁ တို့ကိုလည်းရှု။

သမ္မာကျမ်းစာသည် “ပဲ့ပြင်” တည့်မတ်ပေးနိုင်သောကြောင့် အခြေခံသွန်သင်ချက်ဟုဆိုကြသော သုံးပါးပေါင်းတစ်ဆူအကြောင်း ရှင်းရှင်းလင်းလင်းဖော်ပြပေးသင့်သည်။ သို့သော် ယင်းသည် ကျမ်းစာသွန်သင်ချက်ဖြစ်သည်ဟု ဓမ္မပညာရှင်များနှင့် သမိုင်းပညာရှင်များကိုယ်တိုင် ပြောခဲ့သလော။

သမ္မာကျမ်းစာမှ “သုံးပါးပေါင်းတစ်ဆူ”

ပရိုတက်စတင့်စာအုပ်တစ်အုပ်တွင် ဤသို့ဖော်ပြ၏– “သုံးပါးပေါင်းတစ်ဆူဟူသောစကားလုံးကို ကျမ်းစာတွင် မတွေ့ရပါ။ . . . ၄ ရာစုရောက်သည့်တိုင် ယင်းအကြောင်းကို ချာ့ချ်များ၏ဓမ္မပညာရပ်တွင် မတွေ့ရပါ။” (ရုပ်ပြကျမ်းစာအဘိဓာန်) ထို့ပြင် သုံးပါးပေါင်းတစ်ဆူသည် “ဘုရားသခင်၏နှုတ်တော်ထွက်စကား . . . လုံးဝမဟုတ်” ဟုကက်သလစ်အာဏာပိုင်တစ်ဦး ဆို၏။—ကက်သလစ်စွယ်စုံကျမ်းသစ်။

ကက်သလစ်စွယ်စုံကျမ်းကလည်း ဤသို့ဆို၏– “ဘုရားသုံးပါးကို တစ်ဆူတည်းအဖြစ်ဖော်ပြသော စကားလုံးတစ်လုံးမျှ ကျမ်းစာတွင် မတွေ့ရ။ (လက်တင်ဘာသာစကားဖြင့် ထြီနီတာ့စ်ဟုပြန်ဆိုသည့်) [τρίας] ထရီအာ့စ် ဟူသောစကားလုံးကို အေဒီ ၁၈၀ ခန့်တွင် အန္တိအုတ်မှ သီအောဖလပ်စ်က ဦးဆုံးအသုံးပြုခဲ့သည်။ . . . များမကြာမီ တာတူလျန်က ယင်းကို ထြီနီတာ့စ်ဟူသော လက်တင်ပုံစံဖြင့် ပြန်ဆိုအသုံးပြုခဲ့၏။”

သို့သော် သုံးပါးပေါင်းတစ်ဆူအယူကို တာတူလျန်သွန်သင်ခဲ့သည့် အထောက်အထားမရှိပါ။ ဥပမာ၊ အချို့က သုံးပါးပေါင်းတစ်ဆူကိုရှင်းပြရန် တာတူလျန်၏စကားများကို နောက်ပိုင်းတွင် အသုံးပြုခဲ့သည်ဟု ကက်သလစ်စွယ်စုံကျမ်းတစ်စောင်တွင် ဖော်ပြသည်။ ထို့နောက် ယင်းက ဤသို့သတိပေးသည်– “စကားလုံးသုံးနှုန်းပုံမှ ချက်ချင်းကောက်ချက်မချနိုင်ပါ။ အကြောင်းမှာ တာတူလျန်၏စကားများသည် သုံးပါးပေါင်းတစ်ဆူ ဓမ္မပညာရပ်ကို မထောက်ခံပေ။”

ဟေဗြဲကျမ်းစာစောင်များ၏သက်သေသာဓက

သမ္မာကျမ်းစာတွင် “သုံးပါးပေါင်းတစ်ဆူ” ဟူသောစကားလုံးကို မတွေ့ရသော်လည်း ယင်းကိုထောက်ခံသောအယူအဆ အနည်းဆုံးတစ်ခု အမှန်ပင်ပါရှိသလော။ ဥပမာ၊ ဟေဗြဲကျမ်းစာစောင်များ (“ဓမ္မဟောင်းကျမ်း”) တွင် အဘယ်အရာဖော်ပြသနည်း။

“ဟေဗြဲကျမ်းစာတွင် သုံးပါးပေါင်းတစ်ဆူအယူဝါဒကို မတွေ့ရကြောင်း ယနေ့ဓမ္မပညာရှင်များ သဘောတူကြသည်” ဟုဘာသာရေးဆိုင်ရာစွယ်စုံကျမ်းတွင် ဖော်ပြ၏။ ထို့ပြင် “ဓမ္မဟောင်းကျမ်းသည် သန့်ရှင်းသော သုံးပါးပေါင်းတစ်ဆူအယူကို မသွန်သင်ပါ” ဟုကက်သလစ်စွယ်စုံကျမ်းသစ်တွင် ဖော်ပြသည်။

သုံးပါးတစ်ဆူဘုရားစာအုပ်တွင် ဂျက်ဇူအစ် အက်ဒ်မွန်ဖော့တ်မင်က ဤသို့ရေးခဲ့၏– “ဓမ္မဟောင်းကျမ်းတွင် . . . ခမည်းတော်၊ သားတော်၊ သန့်ရှင်းသောဝိညာဉ်တော် သုံးပါးပေါင်းတစ်ဆူဘုရားအကြောင်း တိုက်ရိုက်ဖြစ်စေ၊ သွယ်ဝိုက်၍ဖြစ်စေ လုံးဝမဖော်ပြထားပါ။ . . . ဘုရားသခင်သည် [သုံးပါးပေါင်းတစ်ဆူ] ဖြစ်ကြောင်းနှင့်ပတ်သက်၍ ကျမ်းရေးသူတစ်ဦးဦးက သံသယဝင်ခဲ့သည်ဟူ၍ပင် အထောက်အထားမရှိ။ . . . [“ဓမ္မဟောင်းကျမ်း”]တွင် သုံးပါးပေါင်းတစ်ဆူကို ထောက်ခံသော သို့မဟုတ် အရိပ်အမြွက်ပြသောစကားလုံးများ တွေ့ခဲ့လျှင်ပင် ယင်းတို့သည် ကျမ်းရေးသူများ၏စကားများနှင့် ရည်ရွယ်ချက်ကို ကျော်လွန်သွားခြင်းဖြစ်သည်။”—ကျွန်ုပ်တို့စာလုံးစောင်းထား။

ဟေဗြဲကျမ်းစာစောင်များကို ဆန်းစစ်လေ့လာကြည့်ပါက အထက်ပါမှတ်ချက်များ မှန်ကန်ကြောင်း ထောက်ခံပါလိမ့်မည်။ ကျမ်းရင်းဝင်အစစ်အမှန်ဖြစ်သော မှုတ်သွင်းခံဟေဗြဲကျမ်းစာစောင် ၃၉ စောင်တွင် သုံးပါးပေါင်းတစ်ဆူသွန်သင်ချက်ကို မတွေ့ရပေ။

ဂရိကျမ်းစောင်များ၏သက်သေသာဓက

သို့ ဆိုလျှင် ခရစ်ယာန်ဂရိကျမ်းစောင်များ (“ဓမ္မသစ်ကျမ်း”) တွင် သုံးပါးပေါင်းတစ်ဆူအကြောင်း အမှန်ပင် ဖော်ပြသလော။

“ဓမ္မသစ်ကျမ်းတွင်လည်း သုံးပါးပေါင်းတစ်ဆူအယူဝါဒကို တိုက်ရိုက်မဖော်ပြထားကြောင်း ဓမ္မပညာရှင်များ သဘောတူကြသည်” ဟု ဘာသာရေးဆိုင်ရာစွယ်စုံကျမ်းက ဆိုသည်။

ဂျက်စူအစ်ဖော့တ်မင်က ဤသို့ဆို၏– “ဓမ္မသစ်ကျမ်းရေးသူများသည် . . . တရားသေ သို့မဟုတ် ပုံသေဖြစ်သော သုံးပါးပေါင်းတစ်ဆူအယူဝါဒအကြောင်း မဖော်ပြပါ၊ တန်းတူရည်တူပုဂ္ဂိုလ်မြတ်သုံးပါးပါဝင်သော ဘုရားတစ်ဆူနှင့်ပတ်သက်သည့် တိုက်ရိုက်သွန်သင်ချက်ကိုလည်း မဖော်ပြပေ။ . . . သီးခြားပုဂ္ဂိုလ်သုံးပါးတွင် ဇာတိတော်တစ်ခုတည်းရှိသည်ဟူသော သုံးပါးပေါင်းတစ်ဆူအယူဝါဒကို မည်သည့်နေရာတွင်မျှ မတွေ့ရပေ။”

“သုံးပါးပေါင်းတစ်ဆူဟူသော စကားလုံးဖြစ်စေ၊ ထိုအယူဝါဒကို အသေအချာရှင်းပြထားခြင်းဖြစ်စေ ဓမ္မသစ်ကျမ်းတွင် မတွေ့ရ” ဟု ဗြိတဲန်နီကာစွယ်စုံကျမ်းသစ်တွင်ဆို၏။

ခရစ်ယာန်အယူဝါဒ၏သမိုင်းကြောင်းစာအုပ်တွင် ဘာန်ဟဒ်လိုစီက “ဓမ္မသစ်ကျမ်းကို မည်သို့ပင် ဆန်းစစ်ပါစေ၊ သုံးပါးပေါင်းတစ်ဆူအယူဝါဒကို မတွေ့ရပေ” ဟုဆို၏။

ဓမ္မသစ်ကျမ်း၏ အပြည်ပြည်ဆိုင်ရာအဘိဓာန်သစ်တွင်လည်း အလားတူဖော်ပြသည်– “ဓမ္မသစ်ကျမ်းတွင် သုံးပါးပေါင်းတစ်ဆူအယူဝါဒ မပါဝင်ပေ။ ‘သမ္မာကျမ်းစာတွင် ခမည်းတော်၊ သားတော်၊ သန့်ရှင်းသောဝိညာဉ်တော်သည် တန်းတူရည်တူဖြစ်၏’ ဟူသောဖော်ပြချက်မရှိဟု [ပရိုတက်စတင့်ဓမ္မပညာရှင် ကားလ်ဘာ့သ်က ဆိုသည်]။”

ယေးလ်တက္ကသိုလ်မှ ပါမောက္ခအီးဝါရှ်ဘန်း ဟော့ပ်ကင်က ဤသို့ဖော်ပြခဲ့၏– “ယေရှုနှင့်ပေါလုသည် သုံးပါးပေါင်းတစ်ဆူအယူဝါဒကို မသိရှိခဲ့ကြောင်း ထင်ရှားသည်။ . . . ယင်းအကြောင်း သူတို့တစ်ခွန်းမျှ မပြောဆိုခဲ့ပါ။”—ဘာသာတရား၏ မူလအစနှင့်ဆင့်ကဲဖြစ်စဉ်။

သမိုင်းပညာရှင်အာသာဝီဂဲလ်က ဤသို့ဖော်ပြ၏– “ယေရှုခရစ်သည် ထိုသို့သောဖြစ်ရပ်ဆန်းအကြောင်း တစ်ခါမျှ မမိန့်ဆိုခဲ့ပါ။ ဓမ္မသစ်ကျမ်း၏မည့်သည့်နေရာတွင်မျှ ‘သုံးပါးပေါင်းတစ်ဆူ’ စကားလုံး မပါရှိ။ ကျွန်ုပ်တို့သခင်ကွယ်လွန်၍ အနှစ်သုံးရာကြာပြီးနောက်မှ ချာ့ချ်ကအတည်ပြုလက်ခံခဲ့သော အယူအဆဖြစ်၏။”—ကျွန်ုပ်တို့၏ခရစ်ယာန်ဘာသာတရားရှိ အယူမှားဝါဒ။

ဟေဗြဲကျမ်းစာစောင် ၃၉ စောင်တွင်ဖြစ်စေ၊ ခရစ်ယာန်ဂရိကျမ်း ၂၇ စောင်တွင်ဖြစ်စေ သုံးပါးပေါင်းတစ်ဆူအယူဝါဒအကြောင်း ရှင်းလင်းပြတ်သားစွာ သွန်သင်ထားခြင်းမရှိပေ။

ကနဦးခရစ်ယာန်များ သွန်သင်ခဲ့သလော

ကနဦးခရစ်ယာန်များသည် သုံးပါးပေါင်းတစ်ဆူကို သွန်သင်ခဲ့သလော။ သမိုင်းပညာရှင်များနှင့် ဓမ္မပညာရှင်များ၏ အောက်ပါမှတ်ချက်များကို သုံးသပ်ကြည့်ပါ–

“ခရစ်ယာန်အယူဝါဒများထဲသို့ နောက်ပိုင်း ဖြည့်စွက်ခဲ့သော သုံးပါးပေါင်းတစ်ဆူအယူဝါဒကို ကနဦးခရစ်ယာန်များ မသွန်သင်ခဲ့ကြပေ။”—ဓမ္မသစ်ကျမ်း၏ အပြည်ပြည်ဆိုင်ရာအဘိဓာန်သစ်။

“မူလက ကနဦးခရစ်ယာန်များသည် [သုံးပါးပေါင်းတစ်ဆူ]အယူကို မယုံကြည်ခဲ့ကြပေ။ သူတို့သည် ခမည်းတော်ဘုရားသခင်နှင့် သားတော်ယေရှုခရစ်ကို ဆည်းကပ်ကြသည်၊ . . . သန့်ရှင်းသောဝိညာဉ်တော်ကို အသိအမှတ်ပြုကြသည်။ သို့သော် ယင်းတို့ကို တန်းတူရည်တူ၊ တစ်လုံးတစ်ဝတည်းဖြစ်သော သုံးပါးတစ်ဆူအဖြစ် လုံးဝမယူဆခဲ့ကြပေ။”—ကျွန်ုပ်တို့၏ခရစ်ယာန်ဘာသာတရားရှိ အယူမှားဝါဒ။

“မူလက ခရစ်ယာန်တို့၏ယုံကြည်ချက်မှာ သုံးပါးပေါင်းတစ်ဆူမဟုတ်။ . . . ဓမ္မသစ်ကျမ်းနှင့် အခြားရှေးခရစ်ယာန်စာပေများတွင် ဖော်ပြသည့်အတိုင်း တမန်တော်များခေတ်နှင့် ၎င်းနောက်ပိုင်းခေတ်များတွင် ယင်းအယူကို မတွေ့ရပေ။”—ဘာသာတရားနှင့် လူ့ကျင့်ဝတ်ဆိုင်ရာစွယ်စုံကျမ်း။

“လေးရာစုမကုန်မီတွင် ‘သုံးပါးတစ်ဆူဘုရား’ အယူကို အတည်တကျပြဋ္ဌာန်းခဲ့ခြင်းမရှိပေ၊ ခရစ်ယာန်အသက်တာနှင့် ၎င်း၏ယုံကြည်ချက်တွင် အပြည့်အဝလက်မခံသည်မှာ သေချာ၏။ . . . တမန်တော်များခေတ်နောက်ပိုင်း ချာ့ချ်ဖခင်များလက်ထက်တွင် ထိုအတွေးအခေါ်မျိုး သို့မဟုတ် အမြင်မျိုးနှင့်နီးစပ်သော သွန်သင်ချက်တစ်ခုမျှ မရှိချေ။”—ကက်သလစ်စွယ်စုံကျမ်းသစ်။

နိုင်စီရာကောင်စီမတိုင်မီက ချာ့ချ်ဖခင်များ၏သွန်သင်ရာ

နိုင်စီရာကောင်စီမတိုင်မီက ချာ့ချ်ဖခင်များသည် ခရစ်တော်လက်ထက်ပြီးနောက် အစောပိုင်းရာစုနှစ်များတွင် ဦးစီးသော ဘာသာရေးခေါင်းဆောင်များဖြစ်ကြသည်။ သူတို့၏သွန်သင်ရာမှာ စိတ်ဝင်စားဖွယ်ဖြစ်၏။

အေဒီ ၁၆၅ ခန့်တွင်ကွယ်လွန်ခဲ့သော ဂျတ်စတင်မာတာသည် လူသားဘဝမတိုင်မီယေရှုကို “အရာခပ်သိမ်းဖန်ဆင်းရှင် ဘုရားသခင်မဟုတ်သော” ဖန်ဆင်းခံကောင်းကင်တမန်တစ်ပါးဟု ခေါ်ဆိုခဲ့သည်။ ယေရှုသည် ဘုရားသခင်ထက် အဆင့်နိမ့်၍ “ဖန်ဆင်းရှင် . . . လုပ်စေလို၊ ပြောစေလိုသည့်အရာကိုသာ လုပ်ဆောင်ပြောဆိုခဲ့သည်” ဟုသူဆိုခဲ့၏။

အေဒီ ၂၀၀ ခန့်တွင်ကွယ်လွန်ခဲ့သော အိုင်ရင်နီးယပ်စ်က လူသားဘဝမတိုင်မီယေရှုသည် ဘုရားသခင်နှင့်သီးခြားတည်ရှိ၍ ဘုရားသခင်ထက် အဆင့်နိမ့်သည်ဟုဆိုခဲ့၏။ ယေရှုသည် “စစ်မှန်၍တစ်ဆူတည်းသောဘုရားသခင်” နှင့်တန်းတူမဟုတ်၊ ဘုရားသခင်သာ “အရာခပ်သိမ်းထက် ကြီးမြင့်ပြီး ကိုယ်တော်မှတစ်ပါး အခြားမရှိ” ကြောင်း သူဖော်ပြခဲ့သည်။

အေဒီ ၂၁၅ ခန့်တွင်ကွယ်လွန်ခဲ့သော အလက်ဇန္ဒြီးယားမြို့သား ကလီးမင့်က ဘုရားသခင်ကို “ဖန်ဆင်းခြင်းမခံရသော၊ မဖောက်ပြန်မပျက်စီးနိုင်သော၊ စစ်မှန်၍တစ်ဆူတည်းသောဘုရားသခင်” ဟုခေါ်ခဲ့သည်။ ထို့ပြင် သားတော်သည် “တစ်ပါးတည်းသောအနန္တတန်ခိုးရှင်ခမည်းတော်၏အနားတွင် ရှိနေ” သော်လည်း ခမည်းတော်နှင့်တန်းတူမဟုတ်ဟု သူ ဆက်ဖော်ပြသည်။

အေဒီ ၂၃၀ ခန့်တွင်ကွယ်လွန်ခဲ့သော တာတူလျန်သည် ဘုရားသခင့်ကြီးမြတ်မှုအကြောင်း သွန်သင်ခဲ့သည်။ သူဤသို့ဆို၏– “ခမည်းတော်သည် ပို၍ကြီးမြတ်သောကြောင့် သားတော် (နောက်ပုဂ္ဂိုလ်တစ်ဦး) နှင့်မတူ။ ခမည်းတော်သည် ဖြစ်ပွားစေသူဖြစ်ပြီး ဖြစ်ပွားခံရသူနှင့်မတူ၊ ခမည်းတော်သည် စေလွှတ်သူဖြစ်ပြီး စေလွှတ်ခံရသူနှင့်မတူပေ။ သားတော်မတည်ရှိသောအချိန်တစ်ချိန် ရှိခဲ့သည်။ . . . အရာခပ်သိမ်းမတည်ရှိမီ ဘုရားသခင်တစ်ပါးတည်းရှိတော်မူ၏။”

အေဒီ ၂၃၅ ခန့်တွင်ကွယ်လွန်ခဲ့သော ဟစ်ပိုလီတပ်စ်က ဘုရားသခင်သည် “တစ်ဆူတည်းသောဘုရား၊ အဦးဆုံးသောသူ၊ တစ်ပါးတည်းသောဘုရား၊ အရာခပ်သိမ်းတို့၏ဖန်ဆင်းရှင်၊ အရာခပ်သိမ်းတို့၏အရှင်သခင်ဖြစ်ပြီး ကိုယ်တော်နှင့်သက်တမ်းတူညီသူမရှိ . . .။ ကိုယ်တော်တစ်ပါးတည်း တည်ရှိခဲ့သော်လည်း” လူသားဘဝမတိုင်မီက ယေရှုကိုဖန်ဆင်းခြင်းကဲ့သို့သော “ယခင်က မတည်ရှိခဲ့ရာများကို တည်ရှိစေသောဘုရားသခင်ဖြစ်၏” ဟုပြောခဲ့သည်။

အေဒီ ၂၅၀ ခန့်တွင်ကွယ်လွန်ခဲ့သာ ဩရီဂျင်က “ခမည်းတော်နှင့်သားတော်သည် ဇာတိတော်နှစ်ခုရှိ၍ . . . ပုဂ္ဂိုလ်နှစ်ပါးဖြစ်၏။ ခမည်းတော်နှင့်နှိုင်းယှဉ်လျှင် [သားတော်]သည် အလွန်သေးငယ်သော အလင်းတန်းလေးဖြစ်၏” ဟုဆိုသည်။

အဲလ်ဗန်လမ်စန်က သမိုင်းအထောက်အထားများကို အကျဉ်းချုပ်၍ ပထမသုံးရာစုမှချာ့ချ် စာအုပ်တွင် ဤသို့ရေးခဲ့၏– “မျက်မှောက်ခေတ်တွင် လူအများခံယူထားသည့် သုံးပါးတစ်ဆူအယူကို . . . ဂျတ်စတင်[မာတာ]၏စကားအသုံးအနှုန်းက လုံးဝမထောက်ခံပါ။ ခရစ်တော်လက်ထက်ပြီးနောက် သုံးရာစုအတွင်းမှ ခရစ်ယာန်စာရေးဆရာများ၊ တစ်နည်းအားဖြင့် နိုင်စီရာကောင်စီမတိုင်မီက ချာ့ချ်ဖခင်အားလုံးလည်း ထပ်တူပင်ဖြစ်သည်။ ခမည်းတော်၊ သားတော်၊ . . . သန့်ရှင်းသောဝိညာဉ်တော်အကြောင်း သူတို့ပြောဆိုကြသည်မှန်၏။ သို့သော် ယင်းတို့ကို တန်းတူရည်တူအဖြစ်၊ ဇာတိတစ်ခုတည်းအဖြစ်၊ သုံးပါးတစ်ဆူအဖြစ်၊ လက်ရှိသုံးပါးတစ်ဆူဝါဒီများ ခံယူထားသည့်အဓိပ္ပာယ်တစ်မျိုးမျိုးအဖြစ် ပြောဆိုကြကြောင်း မတွေ့ရပေ။ အဖြစ်မှန်မှာ ယင်းတို့နှင့် လုံးဝဆန့်ကျင်ဘက်ပင်။”

ထို့ကြောင့် ကျမ်းစာခေတ်တွင်နှင့် ယင်းနောက်ပိုင်းရာစုနှစ်များစွာအထိ သုံးပါးပေါင်းတစ်ဆူအယူကို လုံးဝမသိရှိကြကြောင်း သမ္မာကျမ်းစာနှင့် သမိုင်းအထောက်အထားက သက်သေထူနေသည်။

[စာမျက်နှာ ၇ ပါ အကျဉ်းဖော်ပြချက်]

“ဘုရားသခင်သည် [သုံးပါးပေါင်းတစ်ဆူ] ဖြစ်ကြောင်းနှင့်ပတ်သက်၍ ကျမ်းရေးသူ တစ်ဦးဦးက သံသယဝင်ခဲ့သည် ဟူ၍ပင် အထောက်အထားမရှိ။” —သုံးပါးတစ်ဆူဘုရား