Aogositra

Mariho ireo hevi-dehibe roa ao amin’io salamo io: 1) Miatrika zava-tsarotra ny olo-marina. 2) Manafaka antsika amin’ny fitsapana mahazo antsika i Jehovah. Ahoana no anaovany an’izany? Ampiany, ohatra, isika hijery ny tena zava-misy raha mbola eto amin’izao tontolo izao. Marina fa mampanantena izy hoe ho faly isika rehefa manompo azy, nefa tsy manome toky izy hoe hisosa fotsiny ny fiainantsika. (Isaia 66:14) Mampirisika antsika kosa izy mba hifantoka amin’ny hoavy. Amin’izay mantsy isika vao hanana an’ilay fiainana tiany hankafizintsika mandrakizay. (2 Kor. 4:16-18) Ampiany hahavita hiatrika ny andro tsirairay anefa isika mandra-pahatongan’izay. (Fitom. 3:22-24) Inona no azontsika ianarana avy amin’ny mpanompon’i Jehovah tsy mivadika, na taloha na amin’izao? Mety hiatrika olana tsy ampoizina isika. Rehefa miantehitra amin’i Jehovah anefa isika, dia tsy hanary antsika mihitsy izy.​—Sal. 55:22. w23.04 17:3-4

Afaka mianatra avy amin’i Josefa sy Maria isika. Vonona hankatò ny manam-pahefana foana mantsy ry zareo, na dia rehefa sarotra aza izany. (Lioka 2:1-6) Tsy mora tamin’izy mivady, ohatra, ny nankatò, tamin’i Maria bevohoka sivy volana teo ho eo. I Aogosto no nitondra ny Fanjakana Romanina tamin’izany, dia nasainy nisoratra anarana tany amin’ny tanàna niaviany avy ny vahoaka. Nila nanao dia lavitra 150 kilaometatra nankany Betlehema àry i Josefa sy Maria, sady niaka-nidina be ny lalana. Nanahirana be ny nanao an’io dia io, indrindra ho an’i Maria. Natahotra angamba izy roa sao maninomaninona eny i Maria, na ilay zaza mbola ao an-kibo. Ahoana izao raha mihetsi-jaza eny an-dalana eny izy? Ny Mesia ange no ao an-kibony ao e! Tsy maninona ve izany raha tsy mankatò ny fanjakana ry zareo tamin’iny? Tsy navelan’i Josefa sy Maria hisakana azy tsy hankatò ireny fanahiana ireny. Notahin’i Jehovah àry ry zareo. Tonga soa aman-tsara tany Betlehema i Maria, dia niteraka zaza salama tsara, ary nanampy hanatanteraka faminanian’ny Baiboly mihitsy!​—Mika 5:2. w23.10 42:9, 11-12

Ahoana raha tsy mahazo aina ianao raha vao mieritreritra fotsiny hoe hamaly any am-pivoriana? Mahasoa ny hoe manomana tsara. (Ohab. 21:5) Ho mora kokoa aminao ny hamaly raha azonao tsara ilay fianarana. Ataovy fohy koa ny valin-teninao. (Ohab. 15:23; 17:27) Tsy dia hanahy loatra mantsy ianao raha fohy izany, ohatra hoe fehezanteny iray na roa fotsiny. Ho hita hoe nanomana tsara ianao sady azonao tsara ilay fianarana, raha manome valin-teny fohy amin’ny fomba fiteninao ianao. Ahoana raha efa niezaka nanaraka ny sasany tamin’ireo soso-kevitra ireo ianao, nefa mbola mitebiteby foana ka tsy mahavita mamaly mihoatra ny indray mandeha na indroa? Matokia fa faly i Jehovah rehefa miezaka manao izay vitanao ianao. (Lioka 21:1-4) Ny hoe manome ny tsara indrindra mantsy tsy midika hoe manezakezaka manao izay tsy ho vita. (Fil. 4:5) Fantaro hoe inona no azonao atao, dia ataovy tanjona ny hanao an’ilay izy, ary mivavaha mba hanana fo tony. Mety hoe ny hanome valin-teny fohy iray izany tanjona izany amin’ny voalohany. w23.04 18:6-8

Oharin’ny apostoly Paoly amin’ny miaramila mailo tsara sy efa nametaka ny fitaovam-piadiana rehetra isika. Tokony ho vonona hiady ny miaramila am-perinasa, na rahoviana na rahoviana. Hoatr’izany koa isika. Vonona foana ho amin’ny andron’i Jehovah isika, ka ataontsika fiarovan-tratra ny finoana sy ny fitiavana ary ataontsika fiarovan-doha ny fanantenana. Niaro ny fon’ny miaramila ny fiarovan-tratra. Miaro ny fontsika an’ohatra koa ny finoana sy ny fitiavana. Hanampy antsika hanohy hanompo an’Andriamanitra sy hanara-dia an’i Jesosy ireo. Ny finoana no mahatonga antsika hatoky fa hamaly soa antsika i Jehovah, rehefa mitady azy amin’ny fo manontolo isika. (Heb. 11:6) Handrisika antsika tsy hivadika amin’i Jesosy, ilay Mpitarika antsika, koa izy io, na dia tsy maintsy hiaritra ny mafy aza isika. Ahoana àry no hatao raha te hanana finoana bebe kokoa, ka hahavita hiatrika olana? Afaka mianatra avy amin’ireo Kristianina amin’izao isika. Tsy nanaiky hivadika ry zareo, na dia nenjehina na sahirana ara-bola aza. Tsy ho matimatin-karena koa isika, raha manahaka an’izay nanatsotra ny fiainany mba hanaovana loha laharana an’ilay Fanjakana. w23.06 26:8-9

Mahavita mifehy ny fihetseham-pony sy izay ataony ny olona mahafehy tena. Ilaina ny fifehezan-tena mba hahatonga ny olona iray hanatratra tanjona, indrindra raha sarotra tratrarina ilay tanjona na tsy te hanao an’ilay izy izy. Tadidio fa anisan’ny vokatry ny fanahy ny fifehezan-tena. Mangataha àry fanahy masina amin’i Jehovah mba hanampy anao hanana kokoa an’io toetra tena ilaina io. (Lioka 11:13; Gal. 5:22, 23) Aza miandry hoe mety tsara daholo ny zava-drehetra. Tsy manantena isika hoe hety be daholo ny zava-drehetra, raha mbola eto amin’ity tontolo ity. Raha izany no andrasantsika, dia mety tsy ho tratrantsika mihitsy ny tanjontsika. Mety tsy te hanatratra ny tanjontsika isika raha hoatran’ny hoe sarotra be ilay izy. Raha izany no mahazo anao, dia maninona raha tsinjaraina ho kelikely kokoa ilay tanjona? Andao hatao hoe misy toetra tsara iray tianao hananana. Maninona raha mitady fomba tsotsotra hampisehoana an’ilay izy aloha? Ahoana indray raha ny hamaky Baiboly iray manontolo ilay tanjonao? Maninona raha fotoana fohifohy no atokana hamakiana an’izany amin’ny voalohany? w23.05 24:11-13

Mampiasa ny fandaminany i Jehovah mandritra ny andro farany, mba hanomezana sakafo ara-panahy tsy tapaka ho an’ny vahoakany. Manampy antsika rehetra izany mba handeha foana amin’ilay “Lalan’ny Fahamasinana.” (Isaia 35:8; 48:17; 60:17) Azo lazaina hoe isaky ny misy olona manaiky hianatra Baiboly, dia manomboka mandeha amin’ilay “Lalan’ny Fahamasinana” izy. Ny sasany vetivety ihany no mandeha amin’io lalambe io, dia avy eo miala. Ny hafa kosa tapa-kevitra hoe tsy hiala mihitsy mandra-pahatongany any amin’ilay toerana tiany haleha. Aiza izany? Mitondra mankany amin’ny “paradisan’Andriamanitra” any an-danitra ilay “Lalan’ny Fahamasinana”, ho an’ireo manantena hiaina any an-danitra. (Apok. 2:7) Mitondra mankany amin’ny faran’ny 1000 taona kosa izy io, ho an’ireo manantena hiaina eto an-tany, rehefa lasa lavorary daholo ny olombelona. Raha efa mandeha amin’io lalambe io àry ianao, dia aza mitodika any aoriana. Aza miala amin’ilay izy mihitsy koa mandra-pahatonganao any amin’ny tontolo vaovao. w23.05 22:15-18

Rehefa mieritreritra an’izay rehetra nataon’i Jehovah ho anao ianao, dia lasa mandeha ho azy ilay fanapahan-kevitra hoe te hanokan-tena. (Sal. 116:12-14) Tena mety raha milaza ny Baiboly fa avy amin’i Jehovah “ny fanomezana tsara rehetra sy ny fanomezana tonga lafatra rehetra.” (Jak. 1:17) Ny soron’i Jesosy Zanany no fanomezana lehibe indrindra nomeny. Eritrereto ange e! Noho ny vidim-panavotana, dia afaka mifandray akaiky amin’i Jehovah ianao. Lasa afaka manantena ny hiaina mandrakizay koa ianao. (1 Jaona 4:9, 10) Rehefa manokan-tena ho an’i Jehovah ianao dia mampiseho hoe ankasitrahanao io porofom-pitiavana lehibe indrindra io sy ny fitahiana hafa rehetra nomeny anao.​—Deot. 16:17; 2 Kor. 5:15. w24.03 9:8

Hoatran’ny tsapan’ilay olo-marina atao hoe Lota no tsapantsika mahita ny fitondran-tenan’ny olona eo amin’izao tontolo izao. “Nalahelo be [izy] rehefa nahita an’ireo mpandika lalàna nanana fitondran-tena tsy misy henatra.” (2 Pet. 2:7, 8) Fantany mantsy hoe halan’ilay Raintsika any an-danitra ny fitondran-tena ratsy. Tia sy natahotra an’Andriamanitra i Lota. Tsy nanaiky hanana toe-tsaina mirefarefa amin’ny tany hoatran’ny an’ny olona nanodidina azy àry izy, ka hoe haloto fitondran-tena. Tsy manaja ny fitsipik’i Jehovah momba ny fitondran-tena koa ny olona manodidina antsika, na zara raha miraharaha an’izany. Afaka ny hadio fitondran-tena foana anefa isika, raha tsy mihena mihitsy ny fitiavantsika an’Andriamanitra sady mianatra matahotra azy isika. Manampy antsika hahavita an’izany i Jehovah, ka mampahery sy mandrisika antsika amin’ny alalan’ny bokin’ny Ohabolana. Tena afaka mandray soa avy amin’ny torohevitra ao ny Kristianina rehetra, na antitra na tanora, ary na lahy na vavy. Rehefa matahotra an’i Jehovah isika, dia mitandrina mba tsy hanala tsiny ny fitondran-tena ratsy. w23.06 28:1-2, 5

Nenjehin’ny fianakaviana angamba ianao na nisy vola na zavatra nafoinao, amin’izay ilay Fanjakana no ho voalohany eo amin’ny fiainanao. (Mat. 6:33) Raha izany, dia matokia hoe tsikaritr’i Jehovah izay rehetra nataonao ho azy. (Heb. 6:10) Azo inoana fa hitanao hoe marina ity tenin’i Jesosy ity: “Tsy misy olona efa nahafoy trano, na rahalahy, na anabavy, na reny, na ray, na zanaka, na saha, noho ny amiko sy ny vaovao tsara, ka tsy hahazo avo 100 heny amin’izao andro izao, dia trano, rahalahy, anabavy, reny, zanaka, saha, sy fanenjehana, ary fiainana mandrakizay ao amin’ilay tontolo ho avy.” (Mar. 10:29, 30) Betsaka lavitra noho izay sorona nataonao ny fitahiana azonao.​—Sal. 37:4. w24.03 10:5

Rehefa tratran’ny mosary lehibe ny Kristianina tany Jodia, dia “nanapa-kevitra” ireo rahalahy tao amin’ny fiangonan’i Antiokia “fa samy handefa fanampiana araka izay vitany, ho an’ireo rahalahy nipetraka tany Jodia.” (Asa. 11:27-30) Tapa-kevitra ny hanampy an-dry zareo ny Kristianina tany Antiokia, na dia lavidavitra ihany aza no nisy an’ireo rahalahy tratran’ny mosary ireo. (1 Jaona 3:17, 18) Azontsika aseho koa hoe mangoraka ny mpiara-manompo isika rehefa henontsika hoe tratran’ny loza ry zareo. Tonga dia manao zavatra isika, ohatra hoe manontany ny anti-panahy raha misy tetikasa azontsika anampiana. Afaka manao fanomezana ho an’ny asa maneran-tany koa isika, na mivavaka ho an’ireo tra-boina. Mety hila ny fanampiantsika koa ny rahalahy sy anabavintsika, vao hahazo an’izay tena ilainy eo amin’ny fiainana. Rehefa ho avy hampihatra ny didim-pitsarany i Kristy Jesosy Mpanjakantsika, dia enga anie isika ho hitany hoe maneho fangorahana, amin’izay izy hanasa antsika ‘handova an’ilay Fanjakana.’​—Mat. 25:34-40. w23.07 29:9-10, 12

Nahay nandanjalanja hoatran’i Jehovah i Jesosy. Nirahina tetỳ an-tany izy mba hitory tamin’ny ‘ondry very tamin’ny taranak’Israely.’ Nahay nandanjalanja anefa izy rehefa nanao an’izany asa nanendrena azy izany. Indray mandeha, ohatra, nisy vehivavy tsy Israelita niangavy azy mba hanasitrana ny zanany vavy. ‘Nijaly be’ izy io satria ‘nisy demonia.’ Nangoraka i Jesosy dia nanao an’izay nangatahin’ilay vehivavy, ka nanasitrana ny zanany vavy. (Mat. 15:21-28) Ity koa misy ohatra iray. Nisy fotoana i Jesosy nilaza hoe: “Izay tsy manaiky ... hoe mpianatro, dia tsy hekeko” koa. (Mat. 10:33) Tsy nekeny ho mpianany ve anefa i Petera, tatỳ aoriana, rehefa nanda azy intelo? Tsy izany! Fantatr’i Jesosy mantsy hoe nibebaka sy nanam-pinoana izy. Niseho taminy i Jesosy rehefa natsangana tamin’ny maty. Azo inoana fa nanome toky azy izy hoe namela ny helony ary mbola tia azy. (Lioka 24:33, 34) Mahay mandanjalanja i Jehovah Andriamanitra sy Jesosy Kristy. Ary isika? Tian’i Jehovah hahay handanjalanja koa isika. w23.07 32:6-7

Inona no azontsika lazaina mba hahatonga an’izay misalasala hatoky hoe tena ho tanteraka ilay Paradisa ampanantenain’Andriamanitra? Voalohany, i Jehovah mihitsy no nilaza an’ilay fampanantenana. Izao no resahin’ny Apokalypsy: “Hoy Ilay nipetraka teo ambonin’ny seza fiandrianana: ‘Ataoko vaovao ny zava-drehetra.’” Ananan’i Jehovah na ny fahendrena, na ny hery, na ny faniriana ilaina mba hanatanterahana an’io fampanantenana io. Faharoa, tena azo antoka hoe ho tanteraka ilay fampanantenany, ka hoatran’ny hoe efa mitranga mihitsy ilay izy amin’i Jehovah. Mety tsara àry raha niteny izy hoe: “Azo antoka sady marina ireo teny ireo. ... Efa tanteraka izany!” Fahatelo, rehefa manomboka zavatra iray i Jehovah, dia vitainy hatramin’ny farany iny. Manamafy an’izany ilay hoe: “Izaho no Alfa sy Omega.” (Apok. 21:6) Hoporofoin’i Jehovah fa i Satana no tena mpandainga sy tsy mahavita azy! Raha misy miteny àry hoe: “Tsara loatra izany ka sarotra inoana”, dia vakio sy hazavao aminy ny Apokalypsy 21:5, 6. Asehoy azy fa hoatran’ny hoe nanao sonia mihitsy i Jehovah mba ho antok’ilay fampanantenany.​—Isaia 65:16. w23.11 46:18-19

Efa 75 taona i Abrahama sady mbola tsy nanan-janaka, tamin’i Jehovah nilaza an’io fampanantenana io taminy. Tsy tena nahita ny fahatanterahan’io fampanantenana io i Abrahama. Marina hoe hitany ihany ny nahaterahan’i Isaka zanany noho ny fahagagana nataon’i Jehovah, rehefa avy niampita ny Reniranon’i Eofrata sy niandry 25 taona izy. Hitany koa ny nahaterahan’i Esao sy Jakoba zafikeliny, 60 taona taorian’izay. (Heb. 6:15) Tsy hitany mihitsy anefa ilay hoe lasa firenena lehibe sy nandova ny Tany Nampanantenaina ny taranany. Na izany aza, dia mpinamana be tamin’ny Mpamorona azy io lehilahy nanam-pinoana io, ary tena nankafy an’izany izy. (Jak. 2:23) Ho faly be izao i Abrahama rehefa hatsangana amin’ny maty, ka mahafantatra hoe nahazo fitahiana ny firenena rehetra noho izy nanam-pinoana sy nanam-paharetana! (Gen. 22:18) Inona no ianarantsika avy amin’izany? Mety tsy ho hitantsika amin’izao daholo ny fahatanterahan’ny fampanantenan’i Jehovah. Raha manam-paharetana hoatran’i Abrahama anefa isika, dia hatoky fa hamaly soa antsika i Jehovah dieny izao, ary mbola hanao mihoatra noho izany aza ao amin’ilay tontolo vaovao ampanantenainy.​—Mar. 10:29, 30. w23.08 35:14

Nanetry tena i Ozia Mpanjaka tamin’izy tanora. Nianatra ny “hatahotra an’ilay tena Andriamanitra” izy. Notahin’i Jehovah àry izy tamin’ny ankapobeny, nandritra an’ireo 68 taona niainany. (2 Tan. 26:1-4) Nandresy firenena fahavalo be dia be izy, ary nataony azo antoka hoe voaro tsara i Jerosalema. (2 Tan. 26:6-15) Faly be izao i Ozia tamin’ny fanampiana rehetra nomen’Andriamanitra azy. (Mpito. 3:12, 13) Narahina foana ny tenin’i Ozia Mpanjaka hatramin’izay, dia efa zatra an’izany izy. Lasa nieritreritra ve izy hoe afaka manao izay tiany? Tsy haintsika izany. Fa indray andro izy niditra tao amin’ny tempolin’i Jehovah, dia nitady handoro emboka manitra teo amin’ny alitara. Sahisahy ratsy izy, satria tsy nahazo nanao an’izany ny mpanjaka. (2 Tan. 26:16-18) Niezaka nanitsy azy i Azaria Mpisoronabe, nefa tezitra be izy. Mampalahelo hoe efa tsy nivadika ihany i Ozia hatramin’izay, nefa hoatran’ny hoe very maina fotsiny izany. Voasazy àry izy ka lasa boka. (2 Tan. 26:19-21) Hafa mihitsy izao ny fiainany raha mba nanetry tena foana izy! w23.09 38:9-10

Mbola nanana ny fahalemeny ihany ny apostoly Petera, na dia efa lasa Kristianina voahosotra aza. Eritrereto izay nitranga tamin’ny taona 36. Voahosotry ny fanahy masina i Kornelio, ary nahita an’izany i Petera. Anisan’ny hafa firenena tsy voafora izy io. Hita amin’izany hoe “tsy mijery tavan’olona Andriamanitra”, ary afaka ny ho anisan’ny fiangonana kristianina ny hafa firenena. (Asa. 10:34, 44, 45) Nanomboka niara-nisakafo tamin-dry zareo àry i Petera, nefa tsy ho nanao an’izany mihitsy izy taloha. Nisy Kristianina jiosy anefa nieritreritra hoe tsy tokony hiara-misakafo ny Jiosy sy ny hafa firenena. Rehefa nisy tamin-dry zareo tonga tany Antiokia, dia tsy niara-nisakafo tamin’ireo rahalahiny hafa firenena intsony i Petera. Natahotra angamba izy sao ho tafintohina ny Kristianina jiosy. Nanitsy an’i Petera teo imason’ny rehetra ny apostoly Paoly, rehefa nahita hoe nihatsaravelatsihy izy. (Gal. 2:13, 14) Na teo aza anefa ny fahadisoana nataon’i Petera, dia tsy nilavo lefona izy. w23.09 40:8

Mety hahita zavatra mila ahitsy ianao raha mandini-tena amin’ny saina tsy miangatra, nefa aza kivy. “Tsara fanahy [mantsy] ny Tompo”, dia hanampy anao hihatsara izy. (1 Pet. 2:3) Nanome toky ny apostoly Petera hoe: ‘Hamita ny fampiofanana anareo Andriamanitra. Hanampy anareo ho mafy orina izy, sady hanatanjaka anareo, ary hataony mifototra tsara ianareo.’ Nisy fotoana i Petera nahatsiaro ho tsy mendrika ny ho eo anatrehan’ny Zanak’Andriamanitra. (Lioka 5:8) Nahavita nanara-dia an’i Kristy foana anefa izy, rehefa nampian’i Jehovah sy Jesosy. Navela ‘hiditra ao amin’ilay Fanjakana mandrakizay’ izy vokatr’izany, “dia ny Fanjakan’i Jesosy Kristy Tompontsika sy Mpamonjy antsika.” (2 Pet. 1:11) Valisoa be izany! Miezaha àry hikiry foana hoatran’i Petera, dia avelao i Jehovah hampiofana anao. Hahazo valisoa koa ianao amin’izay, ka hiaina mandrakizay. Ho ‘tratranao ny tanjonao, dia ny hahazo famonjena, noho ianao manam-pinoana.’​—1 Pet. 1:9. w23.09 41:16-17

Nisy tokotany ny tranolay masina. Toerana malalaka mifefy izy io, ary tao ny mpisorona no nanao ny andraikiny. Tao amin’io tokotany io koa ny alitara varahina lehibe fanaovana fanatitra dorana sy ny kovetabe varahina nisy rano. Io rano io no nampiasain’ny mpisorona hidiovana, talohan’ny nanaovany ny fanompoany masina. (Eks. 30:17-20; 40:6-8) Manompo ao amin’ilay tokotany anatiny amin’ilay tempoly ara-panahy ny sisa voahosotra rahalahin’i Jesosy amin’izao, sady miezaka ny tsy hivadika, alohan’ny hanaovany ny asan’ny mpisorona any an-danitra miaraka amin’i Jesosy. Fampahatsiahivana lehibe ilay kovetabe tao amin’ny tranolay masina sy ny tempoly hoe tokony hadio foana ry zareo, na eo amin’ny resaka fitondran-tena na ara-panahy. Tsy ho an-dry zareo ihany anefa izany, fa ho an’ny Kristianina rehetra mihitsy. Ary ahoana ny amin’ilay “vahoaka be”? Aiza ry zareo no manompo? Hitan’ny apostoly Jaona “nitsangana teo anoloan’ny seza fiandrianana” ry zareo, ary “manao fanompoana masina ho an’Andriamanitra andro aman’alina.” (Apok. 7:9, 13-15) Eto an-tany, ao amin’ilay tokotany ivelan’ny tempoly ara-panahy, ry zareo no manao an’izany. Tena ankamamiantsika àry ilay tombontsoa lehibe hoe avelan’i Jehovah hanompo azy ao amin’ny tempoliny ara-panahy lehibe isika. w23.10 45:15-16

Anisan’ny fomba anomezan’i Jehovah hery antsika ny anti-panahy. (Isaia 32:1, 2) Raha miady saina àry ianao, dia resaho amin’ny anti-panahy izay mampanahy anao. Raiso tsara ny fanampiany. Amin’ny alalan’izy ireo mantsy i Jehovah no manatanjaka anao. Manome hery antsika koa ny fanantenantsika hiaina mandrakizay, na ao amin’ny tany lasa paradisa izany, na ao amin’ilay Fanjakana any an-danitra. (Rom. 4:3, 18, 19) Io fanantenana sarobidy io no manatanjaka antsika, dia lasa vitantsika ny miaritra fitsapana, mitory ny vaovao tsara, ary mamita an’ireo fanendrena samihafa ao amin’ny fiangonana. (1 Tes. 1:3) Io fanantenana io koa no nanatanjaka ny apostoly Paoly. “Voageja” izy, “very hevitra”, ‘nenjehina’, ary ‘nazera.’ Nisy fotoana aza izy saika maty. (2 Kor. 4:8-10) Nahazo hery hiaretana anefa i Paoly, satria nifantoka tamin’ny fanantenany. (2 Kor. 4:16-18) Nifantoka tamin’ny hoavy izy. Mbola “voninahitra lehibe lavitra” ilay fanantenana hiaina mandrakizay any an-danitra, ka vonona hiaritra fahoriana izy mba hahazoana an’izany. Nisaintsaina an’izany fanantenana izany i Paoly, dia lasa tsapany hoe ‘nohavaozina isan’andro’ izy. w23.10 43:14-17

Rehefa mivavaka ianao, dia eritrereto raha izao no fotoana mety amin’i Jehovah mba hamaliana ny vavakao. Mieritreritra isika indraindray hoe mila valim-bavaka eo no ho eo. Raha ny marina anefa, dia i Jehovah no mahafantatra ny fotoana tsara indrindra anampiana antsika. (Heb. 4:16) Rehefa tsy azontsika eo no ho eo izay nangatahintsika, dia mety hieritreritra isika hoe ‘tsia’ no valiny avy amin’i Jehovah. Indraindray anefa ilay valiny mety hoe ‘mbola tsy izao aloha.’ Nivavaka, ohatra, ny rahalahy tanora iray mba ho sitrana. Tsy nihatsara anefa ny fahasalamany. Raha nanao fahagagana i Jehovah mba hanasitranana azy, dia ho afaka nilaza i Satana hoe noho izy nositranina fotsiny no mahatonga azy hanompo an’i Jehovah. (Joba 1:9-11; 2:4) Tsy izay ihany, fa efa nisy fotoana noeritreretin’i Jehovah hanasitranana ny aretina rehetra. (Isaia 33:24; Apok. 21:3, 4) Tsy afaka manantena fahagagana àry isika mba ho sitrana, mandra-pahatongan’izay. Inona àry no azon’ilay rahalahy angatahina amin’i Jehovah? Hoe mba homeny hery sy fiadanan-tsaina izy, amin’izay hahavita hiaritra an’ilay aretiny sy hanompo an’Andriamanitra foana. w23.11 49:13

Nanao fahadisoana lehibe i Samsona, nefa tsy nilavo lefona. Nitady hirika izy mba hanatanterahana an’ilay asa nanendren’Andriamanitra azy, dia ny hiady amin’ny Filistinina. (Mpits. 16:28-30) Niangavy an’i Jehovah àry izy hoe: “Avelao aho hamaly faty ny Filistinina.” Nohenoin’ilay tena Andriamanitra ny fitalahoany, dia nataony matanjaka be indray izy. Be lavitra noho ny hatramin’izay àry ny Filistinina matin’i Samsona tamin’io. Nizaka vokany mangidy i Samsona noho ny fahadisoana nataony, nefa mbola niezaka nanao ny sitrapon’i Jehovah foana izy. Ary isika? Tsy tokony hilavo lefona isika na dia nanao fahadisoana aza, ka nanarina na namoy tombontsoam-panompoana. Tadidio fa tsy manary antsika i Jehovah. (Sal. 103:8, 9) Mbola azony ampiasaina isika, hoatran’ny tamin’i Samsona, na dia nanao fahadisoana aza. w23.09 37:15-16

Mahatonga antsika “hankasitrahan’Andriamanitra” ny fiaretana. Tsy midika izany hoe faly i Jehovah rehefa miatrika fitsapana ianao na mahita olana. Ianao kosa no ankasitrahany. Rehefa miaritra ianao, dia mahazo sitraka aminy. Fitahiana miavaka izany! (Sal. 5:12) Tadidio fa niaritra fitsapana i Abrahama, ka lasa nankasitrahan’Andriamanitra. Noraisin’i Jehovah ho namany izy, ary nekeny ho olo-marina. (Gen. 15:6; Rom. 4:13, 22) Afaka ny ho hoatr’izany koa isika. Mety hoe mahavita be eo amin’ny fanompoana isika, na manana tombontsoam-panompoana. Tsy miankina amin’izany anefa ny fankasitrahan’Andriamanitra. Ankasitrahany kosa isika rehefa tsy mivadika sady miaritra. Afaka miaritra daholo isika, na firy taona na firy taona, ary na inona na inona zavatra iainantsika na fahaizantsika. Miatrika fitsapana ve ianao amin’izao nefa tsy mivadika? Mahereza fa ankasitrahan’Andriamanitra ianao. Afaka ny hisy vokany be aminao ny fahalalana an’izany. Mety hanamafy orina ny fanantenanao izany. w23.12 51:13-14

Tsy maintsy mianatra mifampiresaka amin’olona ny lehilahy kristianina. Hahay an’izany izy raha mihaino tsara, dia mahazo an’izay any an-tsain’ny olona sy ny fihetseham-pony. (Ohab. 20:5) Hainy ny mamantatra ny fihetseham-pon’ilay olona amin’ny alalan’ny toe-peony, ny endriny, ary ny fihetsiny. Tsy hahay an’izany mihitsy anefa ianao, raha tsy manokana fotoana hiarahana matetika amin’olona. Raha fitaovana elektronika foana no ampiasainao mba hifandraisana amin’ny hafa, ohatra hoe amin’ny alalan’ny e-mail sy SMS, dia vao mainka ianao tsy hahay hifampiresaka mivantana. Mitadiava àry hirika hifampiresahana mivantana amin’ny hafa. (2 Jaona 12) Tsy maintsy mahavita mamelona ny tenany sy ny fianakaviany koa ny lehilahy kristianina matotra. (1 Tim. 5:8) Tsara foana ny mianatra fahaizana hanampy anao hahita asa any aoriana any. (Asa. 18:2, 3; 20:34; Efes. 4:28) Miasa mafy sy mamita asa hatramin’ny farany ve no ahalalana anao? Miezaha mba ho hoatr’izany. Ho mora kokoa aminao amin’izay ny hahita asa sy hateza amin’izany. w23.12 53:12-13

Ilay fotoana hitsaran’i Jehovah ny fahavalony sy hamonjeny ny vahoakany no atao hoe “andron’i Jehovah” ao amin’ny Baiboly. Efa nampihatra ny didim-pitsarany izy taloha. (Isaia 13:1, 6; Ezek. 13:5; Zef. 1:8) Mbola misy “andron’i Jehovah” koa amin’izao. Hanomboka izy io rehefa ringanina i Babylona Lehibe, ary hifarana amin’ny ady Aramagedona. Mila miomana dieny izao isika raha te ho tafavoaka velona amin’io “andro” io. Tsy ampy anefa ny miomana ho amin’ny “fahoriana lehibe.” Nampianarin’i Jesosy koa hoe tsy maintsy “vonona foana” isika hiatrika azy io. (Mat. 24:21; Lioka 12:40) Nampiasa fanoharana maromaro ny apostoly Paoly ao amin’ny taratasiny voalohany ho an’ny Tesalonianina, mba hanampiana ny Kristianina ho vonona foana ho amin’ilay andro lehibe hampiharan’i Jehovah ny didim-pitsarany. Fantatr’i Paoly hoe tsy ho tonga tamin’izany io andro io. (2 Tes. 2:1-3) Nampirisika an’ireo rahalahiny anefa izy mba hiomana, ka hihevitra azy io ho hoatran’ny hoe ho tonga rahampitso. Tokony hampihatra an’io torohevitra io koa isika. w23.06 26:1-2

Nisy trano avo be misy rihana 59 naorina tany Tokyo, any Japon, tamin’ny 1978. Matetika misy horohoron-tany ao amin’io tanàna io, ka lasa saina ny olona hoe io ve dia tsy ho rava. Rehefa nanorina an’io trano io anefa ny injeniera, dia tsy hoe nataony mafy tsara fotsiny ilay izy, fa nataony afaka mitongilana kely manaraka ny fihetsehan’ny tany koa mba tsy ho rava. Azo oharina amin’io trano avo be io ny Kristianina. Nahoana? Tsy maintsy mahay mandanjalanja ny Kristianina, ka tsy hanaiky ho voahozongozona nefa koa hahay hilefitra. Tsy tokony hiovaova mihitsy izy, fa hankatò ny lalàn’i Jehovah sy ny fitsipiny foana. “Vonona hankatò” izy ary tsy mampandefitra ny finoany. Tokony ‘hahay handanjalanja’ koa anefa izy, izany hoe hilefitra, rehefa mamela an’izany ny zava-misy na mitaky an’izany. (Jak. 3:17) Rehefa mianatra ny hahay handanjalanja hoatr’izany ny Kristianina, dia tsy ho hentitra loatra nefa koa tsy hilefitra loatra. w23.07 31:1-2

Tsy maintsy nanohitra ny fakam-panahy avy tamin’i Satana Devoly i Jesosy. Anisan’izany ilay izy nampirisihiny mivantana hivadika amin’Andriamanitra. (Mat. 4:1-11) Tapa-kevitra i Satana hoe hataony izay hahatonga an’i Jesosy hanota, amin’izay izy tsy ho afaka handoa ny vidim-panavotana. Mbola niatrika fitsapana hafa i Jesosy nandritra ny fanompoany teto an-tany. Nenjehina sy norahonana ho faty izy. (Lioka 4:28, 29; 13:31) Tsy maintsy nizaka ny tsy fahalavorarian’ny mpanara-dia azy koa izy. (Mar. 9:33, 34) Rehefa notsaraina izy, dia nampijalijalina sy nesoesoina. Novonoina hoatran’ny olon-dratsy izy tamin’ny farany, ary nanaintaina be. (Heb. 12:1-3) Tsy maintsy niady irery izy rehefa nijalijaly teo amin’ny hazo fijaliana, satria tsy niaro azy intsony i Jehovah. (Mat. 27:46) Tena nijaly be àry i Jesosy mba hanomezana ny vidim-panavotana. Tsy vao mainka ve ianao tia azy rehefa misaintsaina hoe vonona hamoy zavatra be dia be ho antsika izy? w24.01 2:7-9

Manampy antsika hifandray tsara amin’ny hafa ny faharetana. Hihaino tsara, ohatra, isika rehefa misy miresaka. (Jak. 1:19) Manampy antsika ho tsara fihavanana amin’ny olona koa izy io. Miaro antsika io toetra io mba tsy hanao zavatra maimaika sy tsy hanao teny maharary rehefa miady saina. Tsy ho mora tezitra koa isika rehefa misy mandratra ny fontsika. Tsy hamaly faty isika fa hiezaka ‘foana hifandefitra sy hifamela heloka tanteraka.’ (Kol. 3:12, 13) Manampy antsika hahay hanapa-kevitra koa ny faharetana. Tsy ho maimaika na ho taitaitra isika, fa haka fotoana tsara hanaovana fikarohana sy handinihana an’izay safidy ananantsika. Raha mitady asa, ohatra, isika dia mety ho te hanaiky an’izay asa voalohany hitantsika eo. Raha manam-paharetana kosa isika, dia haka fotoana tsara mba handinihana hoe inona no ho vokatr’ilay izy amin’ny fianakaviantsika sy ny fifandraisantsika amin’i Jehovah. Mety tsy handray fanapahan-kevitra ratsy isika raha manam-paharetana. w23.08 35:8-9

Raha kivy ianao noho ny fanirian-dratsy iadianao, dia ho tapa-kevitra kokoa hanohitra fakam-panahy ianao raha misaintsaina ny fampanantenana nataonao tamin’i Jehovah tamin’ianao nanokan-tena ho azy. Nahoana? Mandà ny tenanao ianao rehefa manokan-tena ho an’i Jehovah. Midika izany hoe lavinao izay fanirianao sy tanjonao, raha vao tsy mampifaly an’i Jehovah ilay izy. (Mat. 16:24) Rehefa misy fitsapana àry, dia tsy mila mandany fotoana hiasana saina be ny amin’izay hatao ianao. Efa navalonao tany daholo mantsy ny safidy hafa rehetra, afa-tsy iray ihany. Inona izany? Ny hoe tsy hivadika amin’i Jehovah! Ho tapa-kevitra foana ianao hoe hampifaly azy. Hitovitovy amin’i Joba ianao amin’izay. Na dia niatrika ny mangidy indrindra aza izy, dia resy lahatra be rehefa niteny hoe: “Tsy hanaiky hivadika mihitsy aho.”​—Joba 27:5. w24.03 10:6-7

Tena manampy antsika i Jehovah, “ilay Andriamanitry ny fitiavana.” (2 Kor. 13:11) Mahaliana azy izay mitranga amintsika tsirairay. Resy lahatra isika hoe ‘manodidina [antsika] ny fitiavany sy ny tsy fivadihany.’ (Sal. 32:10) Inona no vokany rehefa misaintsaina ny fomba anehoany fitiavana antsika isika? Vao mainka isika hino hoe tena misy izy, dia ho lasa akaiky kokoa azy. Tsy misalasala mivavaka aminy isika, dia lazaintsika aminy hoe tena mila ny fitiavany isika. Azontsika tantaraina aminy daholo izay mampanahy antsika, satria matoky isika fa ho azony tsara izany ary vonona hanampy antsika izy. (Sal. 145:19) Manintona antsika ny fitiavan’i Jehovah, hoatran’ny afon-dasy manintona antsika rehefa mangatsiaka ny andro. Marina hoe mahery be ny fitiavany, nefa feno hatsaram-panahy koa. Tsy faly erỳ ve ianao satria tia anao izy? Enga anie isika rehetra hamaly fitia azy, dia hilaza koa hoe: “Tiako i Jehovah”!​—Sal. 116:1. w24.01 4:19-20

Tsy hoe nilaza tamin’ny olona fotsiny i Jesosy hoe Jehovah no anaran’Andriamanitra. Efa nahafantatra an’io anarana io mantsy ny Jiosy nampianariny. I Jesosy kosa no voalohany “nanazava ny momba Azy.” (Jaona 1:17, 18) Milaza, ohatra, ny Soratra Hebreo fa mamindra fo sy mangoraka i Jehovah. (Eks. 34:5-7) Nataon’i Jesosy nazava kokoa anefa izany, rehefa nilaza an’ilay fanoharana momba ny zanaka adala sy ny rainy izy. “Mbola lavitra” ilay zanany lahy efa nibebaka dia efa tazan’ny rainy. Nihazakazaka nanatona azy izy, namihina azy, ary namela azy tanteraka. (Lioka 15:11-32) Lasa mazava be amintsika àry fa tena mamindra fo sy mangoraka i Jehovah. Nasehon’i Jesosy tamin’izany hoe hoatran’ny ahoana marina ny Rainy. w24.02 6:8-9

Mamelombelona sy mampionona an’izay malahelo i Jehovah. Inona no hanampy antsika hangoraka sy hampionona ny hafa hoatran’i Jehovah? Azo atao, ohatra, ny miezaka hanana toetra sasany. Inona avy izany? Inona no hanampy antsika ho tia foana an’ireo rahalahy sy anabavy, amin’izay isika hahavita ‘hiezaka foana hifampionona’ isan’andro? (1 Tes. 4:18) Mila mianatra miara-ory isika, mifankatia hoatran’ny mpirahalahy, ary ho tsara fanahy. (Kol. 3:12; 1 Pet. 3:8) Nahoana no hanampy antsika ireo toetra ireo? Rehefa lasa toetrantsika ilay hoe mangoraka sy ny toetra hafa mifandray amin’izany, dia tsy ho vitantsika mihitsy ny hijery fotsiny rehefa misy olona ory fa hampionona azy isika. Nilaza i Jesosy hoe: “Izay mameno ny fon’ny olona no lazain’ny vavany. Ny olona tsara dia mamoaka an’izay zavatra tsara tehiriziny ao am-pony.” (Mat. 12:34, 35) Anisan’ny fomba lehibe ampisehoantsika ny fitiavantsika an’ireo rahalahy sy anabavy mila fanampiana àry ilay hoe mampionona azy. w23.11 47:10-11

Mila mangataka fanampiana isika raha te hahazo ny faminanian’ny Baiboly. Andao hatao hoe mitsidika toerana iray mbola tsy nalehanao ianao. Mahafantatra tsara an’ilay toerana anefa ny namanao iray, ary miara-dalana aminao izy. Fantany tsara hoe aiza ho aiza ianao, ary mitondra mankaiza ny lalana tsirairay. Azo antoka hoe faly ianao satria nanaiky hiara-dalana aminao izy! Hoatr’izany koa i Jehovah. Fantany tsara hoe aiza ho aiza isika amin’ny fandehan’ny fotoana, ary inona no miandry antsika ao aloha ao. Tsy maintsy manetry tena àry isika dia mangataka ny fanampian’i Jehovah, raha te hahazo ny faminanian’ny Baiboly. (Dan. 2:28; 2 Pet. 1:19, 20) Hoatran’ny ray be fitiavana i Jehovah, ka tiany hanana hoavy sambatra ny zanany. (Jer. 29:11) Tsy hoatran’ny ray olombelona anefa izy, satria afaka milaza mialoha an’izay hitranga amin’ny hoavy, ary marina tsara foana izay lazainy. Nasainy nosoratana ao amin’ny Teniny ny faminaniana, amin’izay isika afaka mahafantatra mialoha an’izay zava-dehibe hitranga.​—Isaia 46:10. w23.08 34:3-4